Kuht Sang Mwe Kihsac Wo Emet Lasr nuh sin Jeova

“Kutena ma komwos oru, komwos in oru ke inse pwacye, oana kowos in orekma nu sin Leum.”​—KOLOSSE 3:23.

LIYE FWIN KOM KUH IN TOHPUK:

Kuht kuh in ahkfuhlwactye fuhkah Jeova ke orekma lasr ke lwen nuhkwewa?

Mwe kisac puhspuhs fuhkah kuht oruh ke orekma in alu lasr nuh sin God?

Ma puhspuhs fuhkah kuht kuh in sang nuh sin Jeova?

1-3. (a) Ke sripen Jisus el sang moul lal oacna sie mwe kihsac, ya ma inge kalmekin lah Jeova el tilac siyuhk sesr ke kuhtwena kain in mwe kihsac? Ahkuhtwacye. (b) Kihsen siyuhk puhspuhs fuhkah kuht kuh in siyuhk ke mwe kihsac ke pacl inge?

AHPKUHRAHN yac tausan luo somlah, Jeova el ahkkahlwemye kahlwem nuh sin mwet lahl lah mwe kisac ke lahngo luhn Jisus ahksahfyelah Masap suc ituhkyahng nuh sin mwet Israel ke inkacnek lal Moses. (Kolosse 2:13, 14) Kain in mwe kisac nuhkwewa su mwet Ju kisekinyuhk ke foko foko yac tila eneneyuhk a wacngihnlac kuhtwena sripe. Masap ahkpwacyeye oakwuck wowo lah oana ‘sie mwet liaung su kol nu sin Kraist.’​—Galetia 3:24, BMK.

² Ma inge tiyac kalmackin lah mwet Kihristin elos tilac nuhnkuh ke mwe kihsac puhspuhs. Payeiye pa, mwet sap Piter el kahskahs ke ma eneneyuhk in “esang kise,” su kalmekin nu ke kain in orekma su ku in akengunye God. (1 Piter 2:5) Sayen ma inge, mwet sap Poul el ahkkahlwemye kalem la ohiyac nuhkwewa ke moul luhn sie mwet Kihristin el oacna “sie me kise” mwuleyukla nuh sin God.​—Rom 12:1.

³ Kuht sang mwe kihsac nuh sin Jeova, ke kuht kihsackihn ma puhspuhs nuh sel, ku kuht fin fuleak ma puhspuhs tuh kuht kuh in kuhlacnsapul ke inkanek wo. In fahl nuhke ma kuht etuh ke mwe kihsac suc mwet Israel kihsackihnyuhk, kuht etuh fukah lah mwe kihsac lasr mwe ahkenganye Jeova?

MWE KIHSAC KE MOUL LASR LEN NUHKWEWA

4. Meac kuht enenuh in esam ke kain in orekma lasr len nuhkwewa?

⁴ Saap upac in kahlwem kac lah fuhkah ma puhspuhs suc kuht oruh ke len nuhkwewa kuh in kuhpahsr nuhke orekma lasr in sang mwe kihsac nuh sin Jeova. Ma puhspuhs oacna orekma ke lohm, ke lohm lutlut, ke niyen orekma lasr, kuh kuht fin moli ma ke stoh, kuh in nuhnkeyuck muh tiyac kuh in kahsruh fototo lasr nuh sin God. Tuhsruhktuh kom fin wulela tari moul lom nuh sin Jeova, kuh kom finsrak muh kom e fah oruh ma inge ke pacl na fototo fahsruh, yohk sripe in esam lah kain in orekma inge len nuhkwewa kuh in ahkkeye fototo lom nuh sel. Kuht mwet Kihristin ke lusen ao 24 len nu len, ac kuht orekmakihn oakwuck wowo luhn Bible nuhke ohiyac nuhkwewa ke moul lasr. Pasis mwet sap Poul el ahkkeye kuht ouinge: “Kutena ma komwos oru, komwos in oru ke inse pwacye, oana kowos in orekma nu sin Leum, ac tia nu sin mwet.”​—Ridi Kolosse 3:18-24.

5, 6. Ma fukah kuh in kahsre kuht in oruh sulela ke ohiyac suc kuht ahkkahlwemye ac ke nuknuk suc kuht nukum?

⁵ Orekma lasr len nuhkwewa tiyac kupasr nuhke orekma in kuhlacnsap lasr nuh sin God. Tuhsruhktuh ke sripen Poul el ahkkeye kuht in orekma ke ‘inse pwacye nu sin Jeova’ pwacnacng ma inge oruh kuht in nuhnkuh lah ohiyac fukah kuht enenuh in oruh pacl nuhkwewa. Na, meac kuht lotela kac? Ya kuht ahkkahlwemye ohiyac wo pacl nuhkwewa ac nukom kain in nuknuk fahl nuh sin mwet Kihristin? Kuh ke orekma lasr len nuhkwewa, ya kuht mwekin in fahk lah kuht sie sin Met Loh luhn Jeova, ke sripen ohiyac suc kuht ahkkahlwemye kuh ke kain in nuknuk suc kuht nukum? Kuht fah tiyac lela ohiyac inge in sikyak! Kuht srunga in oruh kuhtwena ma su kuh in oruh mwet in nuhnkuh ma kuluk ke en God.​—Isaia 43:10; 2 Korint 6:3, 4, 9.

⁶ Lela kuht in ahkuhtwacye lah fukah kena lasr in orekma ke ‘insiesr kewa oacna nuh sin Jeova’ kuh in kahsre kuht in nuhnkuh ac oruh ma ke kain in ohiyac puhspuhs. Ke pacl kuht sramsramkin ma inge, kuht enenuh in esam lah mwe kisac nuhkwewa suc mwet Israel sang nuh sin Jeova enenuh in ma wo emeet.​—Exodus 23:19.

MEAC MA INGE ORUH NUHKE MOUL LOM

7. Meac eneneyuhk nuhke wulela lasr nuh sin God?

⁷ Ke kom wulela moul lom nuh sin Jeova, kom oruh sie sulela na wo. Kom wulela in orekmakin moul lom kewa nuhke orekma in kuhlacnsap nuh sel. Kalmen ma inge pah, ke ohiyac nuhkwewa ke moul lom, kom oruh tuh Jeova pa ma se met. (Ridi Hibru 10:7.) Wacngihn ahlohloh kac lah oasr fwako wo puhspuhs kac ke kom kafweang in lotela ke ma Jeova el nuhnkuh ke sie ma, ac kom oruh in fahl nuhke ma luhngse lal. (Isaia 48:17, 18) Kuht mwet kuhlacnsap luhn God suc nwacsnwacs ac inse wowo mweyen kuht etawi Jeova, el suc luti kuht.​—Livitikus 11:44; 1 Timote 1:11.

8. Efuh kuh yohk sripe nuh sesr in esam lah mwe kisac luhn mwet Israel ma muhtahl nuh sin Jeova?

⁸ Jeova el nuhnkuh ke mwe kisac luhn mwet Israel oana ma muhtahl. (Livitikus 6:25; 7:1) Kalmen kas Hebrew se suc luhngasyuhkla oacna “muhtahl” pa in srela liki, kuh ma luhn God muhkwena. Kuht fin luhngse Jeova in inse wowo ke mwe kisac lasr, kuht enenuh in fahsr liki kuhtwena ma luhn fwacluh su tiyac nwacsnwacs. Kuht tiyac kuh in luhngse kuhtwena ma suc Jeova el srunga. (Ridi 1 Jon 2:15-17.) Kahlwem lah, kuht enenuh in fahsr liki kuhtwena mwet kuh kuhtwena ma su kuh in oruh God in nuhnkuh kesr oana ma fokfok. (Isaia 2:4; Fwakyuk 18:4) Oacyacpac, ma inge kalmekin pac lah kuht tiyac kuh in ngetnget kuh nuhnkuh ke ma puhspuhs suc tiyac nwacsnwacs kuh ohiyac fokfok.​—Kolosse 3:5, 6.

9. Efuh kuh orekma ac ohiyac lasr nuh sin mwet saye puhspuhs yohk sripe?

⁹ Poul el ahkkeye mwet lili nuhkwewa: “Nikmet mulkunla in oru ma wo ac in kasru sie sin sie, tu pa inge mwe kise ma God el insewowo kac.” (Hibru 13:16) Ke ma inge kuht fin oruh ma wo pacl nuhkwewa ac kuht fin kahsruh mwet saye puhspuhs, Jeova el fah liye orekma lasr oacna mwe kisac wowo nuh sel. Ke kuht oruh ma inge, kuht ahkkahlwemye lah kuht mwet Kihristin pwacye.​—Jon 13:34, 35; Kolosse 1:10.

MWE KIHSAC PUHSPUHS IN ALU NUH SIN GOD

10, 11. Meac nuhnak luhn Jeova ke orekma lasr in fahkack pweng wo ac ke alu lasr? Ma inge kuh in ahkkeye kuht in oruh meac?

¹⁰ Sie inkacnek su kuht kuh in oruh ma wo nuh sin mwet puhspuhs pa ke kuht ‘fwakak fwinsrak lasr’ nuh selos. Yac kom orekmakihn pacl wowo nuhkwewa in sang ma loh? Poul el fahk lah kuht enenuh in “kise nu sin God [mwe kihsac] ke kaksak pal e nukewa Kel, oinge fwako lun ngoasro su fwakak el.” (Hibru 10:23; 13:15; Hosia 14:2, BMK) Kuht fin nuhnkuh ke luhpahn pacl kuht orekmakin nuhke orekma in fahkack pweng wo ac lah fukah kuht kuh in ahkwoye inkacnek lasr in fahkack pweng wo, ma inge kuh in kahsruh kuht. Mwe sramsram puhspuhs ke Service Meeting kuh in kahsruh kuht in oruh ma inge. Tuhsruhktuh ma kuht enenuh in esam na pwacye pa orekma lasr in fahkack pweng wo, ac in sang ma loh nuh sin mwet yen nuhkwewa pa “me kise nu sin God ke kaksak,” ac ma inge ipin alu lasr nuh sel. Ke ma inge mwe kihsac lasr enenuh in ma wo emeet suc kuht kuh in kihsackihn. Ahok, tiyac oacna sie ohiyacn moul lasr, tuhsruhktuh luhpahn pacl suc kuht orekmakihn in fahkack pweng wo ahkkahlwemye lah kuht ahksacohkye na pwacye orekma in kuhlacnsap lasr nuh sin Jeova.

¹¹ Kuht alu nuh sin Jeova pacl nuhkwewa finnwe kuht oasr ke lohm sesr kuh ke congregation. Jeova el siyuhk sesr in oruh ma inge. Finnwe kuht tiyac enenuh in ahkos masap ke Sabat, kuh som nuh Jerusalem in wi ke mwe ahkfuhlwact puhspuhs, kuht srackna kuh in lotela ke masap inge. Len nuhkwewa oasr ma puspus kuht enenuh in oruh, tuhsruhktuh God el luhngse kuht in orekmakihn kuhtuh pacl lasr in lutlutkin Bible, puhruhe, ac in wi ke miting nuhkwewa. Ac oasr kunohkohn luhn sifwen sou in oruh lutlut Bible nuh sin mwet nuhkwewa ke sou lal. (1 Tessalonika 5:17; Hibru 10:24, 25) Ke ma inge wo in siyuhk sesr sifacna, ‘Yac nga kuh in ahkwoye orekma in alu luhk nuh sin God?’

12. (a) In kihsackihn mwe keng in pacl metah kuh in puhpuhlyuhkin nuhke meac ke pacl inge? (b) Kuht kuh in kihsackihn fuhkah puhruhe lasr oacna mwe keng?

¹² Tohkohsrah Devid el yuhk on inge nuh sin Jeova: “Eis pre luk in oana mwe kisa keng.” (Sam 141:2) Wo kuht in nuhnkuh lah pacl ekahsr kuht puhruhe ac meac kuht puhruhe kac. Buk luhn Fwakyuk puhpuhlyuhkkihn “pre lun mwet mwo” nuhke mwe keng. Ma inge ahkkahlwemye lah puhruhe wowo som nuh sin Jeova oacna sie fohloh wowo. (Fwakyuk 5:8) In acn Israel in pacl metah, mwe keng suc kihsackihnyuhk pacl nuhkwewa ke loang luhn Jeova akoeyuhkla wo fahl nuh kain in recipe wowo. Ma inge mwe ahkihnsewowo Jeova fin kihsackihnyuhk fahl nuhke masap lal kac. (Exodus 30:34-37; Livitikus 10:1, 2) Ke inkacnek oacpacna inge, ke kuht puhruhe ke ohiyac suc Jeova el fahk nuh sesr in puhruhe ac kuht nuhnkuh ke puhruhe oacna ma muhtahl, kuht kuh in luhlahlfongi lah el fah long puhruhe lasr.

KUHT SANG AC KUHT EIS

13, 14. (a) Meac Epafrodaitus ac congregation luhn Filippai elos oruh nuh sel Poul, ac meac puhlakin lal Poul kac? (b) Kuht kuh in etawi fuhkah mwe srikasrak lal Epafrodaitus ac mwet Kihristin luhn acn Filippai?

¹³ Mani suc kuht sang in kahsruh orekma in fahkack pweng wo fin facluh nohfohn el oacna sie mwe kise, finnwe kuht sang ma yohk kuh ma srisrik. (Mark 12:41-44) In pacl metah, congregation in acn Filippai elos supwella Epafrodaitus nuh Rom in sang ma enenuh lal Poul. Epafrodaitus el us kuhtuh mani nuh sel Poul oacna mwe sang luhn congregation. Tiyac pa inge pal se met mwet Kihristin in acn Filippai elos ahkkahlwemye kuhlwacng nuh sel Poul. Elos supwela mwe sang inge nuh sel Poul mweyen elos luhngse elan tiyac fosrnga ke mani, ac elos luhngse elan orekmakihn pacl yohk lal in fahkack pweng wo. Mea Poul el fahk ke mwe sang inge? El pahngon ma inge “oana sie mwe kisa keng nu sin God, su wo ac mwe insewowo nu sel.” (Ridi Filippai 4:15-19.) Poul el luhngse na pwacye in sang kuloh ke kuhlwacng luhn mwet Kihristin luhn acn Filippai ac Jeova el insewowo pac kac.

¹⁴ Ke pacl inge, Jeova el inse wowo na pwacye ke mwe kahsruh lasr nuhke orekma in fahkack pweng wo fwin facluh nohfohn. Ac el olelah lah fin kuht kafweang in suk met Tohkohsrahi lal, el fah ase nuh sesr ma kuht enenuh in karihngihn luhlahlfongi lasr in fokoko ac in moul kais sie len.​—Mattu 6:33; Luk 6:38.

AHKKAHLWEMYE LAH KOM LUHNGSE IN SANG KULOH

15. Meac kuhtuh ma su kom luhngse in sang kuloh kac nuh sin Jeova?

¹⁵ Oasr sripe wowo puhspuhs in sang kuloh nuh sin Jeova. Len nuhkwewa kuht enenuh in sang kuloh nuh sel ke mwe sang luhn moul. El ase nuh sesr ma nuhkwewa kuht enenuh in moul, oacna mongo, nuknuk, lohm, ac eng ma kuht momongkin. Oacyacpac, kuht arlacna inse wowo ke etauk suwohs ke ma pwacye luhn Bible su ase nuh sesr luhlahlfongi ac finsrak wo ke pacl fahsru. Ke ma inge kuht enenuh in alu nuh sin Jeova ac kihsackihn kahs in kahksahk nuh sel ke sripen el pah God suc orwackuhtlah ac ke ma el oruh nuh sesr.​—Ridi Fwakyuk 4:11.

16. Kuht ahkkahlwemye fukah lah kuht sang kuloh nuhke mwe kisac luhn lahngo luhn Kraist?

¹⁶ Mwe lutlut se metah ahkkahlwemye lah mwe kise luhn lahngo luhn Kraist el sie mwe sang sacohk luhn God nuh sin mwet uh. Mwe sang inge ahkkahlwemye luhpahn luhngse luhn God nuh sesr. (1 Jon 4:10) Kuht ahkkahlwemye fuhkah lah kuht luhngse na pwacye in sang kuloh kac? Poul el fahk ouinge: “Tu lungse lun Kraist kaifwe kut; . . . El mise kalos nu kemwa, tu elos su moul elos tia sifwil moul nu selos sifwanu, a nu Sel Su mise kalos a sifwil moulyuk.” (2 Korint 5:14, 15, BMK) Poul el fahk lah kuht fin luhngse na pwacye in sang kuloh ke ma God el orwaclah kacsr, kuht enenuh in orekmakihn moul lasr in ahkfuhlwactye God ac Mwen nuhtuhl. Kuht ahkkahlwemye kuloh lasr nuh sin God ac nuh sin Kraist ke ahkostwen lasr ac ke luhngse lasr in fahkack pweng wo ac in oruh mwet tuhma lutlut.​—1 Timote 2:3, 4; 1 Jon 5:3.

17, 18. Ke ohiyac fukah kuhtuh mwet lili elos ahkyohkye mwe kahksahk lalos oana mwe kise nuh sin Jeova? Sang sie mwe puhpuhlyuhk.

¹⁷ Yac kom kuh in ahkwoye kahs in kahksak ma kom kihsackihn nuh sin God? Tukun elos nuhnkuh ke ma wo nuhkwewa su Jeova el oruh nuh selos, mwet puspus elos ahkkeyeyuk in oruh ma ekla puspus in oasr pacl yok lalos nuhke orekma in fahkack pweng wo ac kuhtuh pac orekma ke u luhn Jeova. Kuhtuh elos wi ke orekma luhn auxiliary pioneer ke lusen mahlwem se kuh loes liki mahlwem se ke kais sie yac, ac kuhtuh mwet lili elos sroang nu ke orekma lun regular pioneer. Kuhtuh elos sang kahsruh nuhke orekma in musai lohm puhspuhs su orekmakihnyuhk nuhke kuhlacnsap nuh sin Jeova. Pah inge inkacnek mwomwo puhspuhs in ahkkahlwemye kuloh lasr. Kuht fin kuhlacnsap nuh sin God wi nuhnak sumwos lasr, kahlme pa, in ahkkahlwemye kuloh nu sel, God el fwa inse wowo ke ma kuht oruh nuh sel.

¹⁸ Mwet Kihristin puspus elos ahkkeyeyuk in ahkkahlwemye kuloh lalos nuh sin Jeova. Morena el sie selos. El mahtuh la oana sie Catholic tuhsruhktuh puhkantwen kihsen siyuhk lal ke God a ke kahlmen moul. El suk ke mwe top kac ke inkacnek luhn mwe luti luhn Catholic ac ke kain in lahlmwetmwet luhn mwet Asia. Tuhsruhktuh kihsen siyuhk nuhkwewa lal topokla muhkwena ke pacl se el lutlutkin Bible yurin Mwet Loh luhn Jeova. Morena el luhngse na pwacye in sang kuloh nuh sin Jeova ke ma el lotela ke Bible mweyen ma inge ahkinsewowoyel na pwacye. Ke ma inge el luhngse in sang kuloh nuh sin Jeova ke el orekmakihn kuh lal kwewa in kuhlacnsap nuh sel. Tukun el baptaisla, el wi pacl nuhkwewa ke orekma luhn auxiliary pioneer, ac ke pacl se el kuh in sroang nuhke orekma luhn regular pioneer el oruh ma inge. Ma inge sikyak yac 30 somla, ac Morena el srakna wi ke orekma se inge pacl nuhkwewa.

19. Kom ku in ahkyokye fuhkah orekma lohm in fahkack inen Jeova?

¹⁹ Oasr mwet kuhlacnsap luhn Jeova su ohiyen moul lalos tiyac lwelah elos in wi ke orekma luhn pioneer. Kuhtwena ma kuht kuh in oruh ke orekma in kuhlacnsap nuh sin Jeova, kuht nuhkwewa kuh in sang mwe kisac wowo nuh sel. Ke ohiyacsr, kuht orekmakin oakwuck wowo luhn Bible ac esam lah kuht mwet tuhtahfpo luhn God pacl nuhkwewa. Kuht luhlahlfongi na pwacye la God el fwa ahkpwacyeye oakwuck nuhkwewa lal. Ke orekma wo, kuht sang kahsruh in fahkelik pweng wo yen nuhkwewa. Kuht ahkkahlwemye lah kuht luhngse na pwacye in sang kuloh ke ma nuhkwewa Jeova el oruh nuh sesr. Ke ma inge lela kuht in kafweang in sang mwe kisac wowo ke moul lasr kewa nuh sin Jeova.

[Petsac ke sra 23]

Ya woiyen Jeova ahkkeye kom in ahkwoye orekma lom in fahkack inel nuh sin mwet nuhkwewa?

[Petsac ke sra 21]

Ya kom orekmakihn pacl wowo nuhkwewa in sang ma loh?