Lutlut ke Mwet Sap lal Jisus ke Ohiyacn Ngetnget ac Soano
“Wiyu ngetnget ac soano.”—MATTHEW 26:38.
MEAC KOM KUH IN LOTELA KE:
Kafweang in soano ke kahs in kolyuk la oyac kuht kuh in fahkack pweng wo?
Kafweang in soano wi puhruhe?
Orekma in fahkack pweng wo finnwe oasr ma upac puhspuhs?
1-3. Ma tafongla fukah mwet sap elos orwaclah ke fong sahflah lal Jisus fin fwacluh? Meac ahkkahlwemye lah elos lotela ke ma tafongla lalos?
SRIKE luhmahlah ke nuhnak lohm ke ma sikyak ke fong safla ke moul lal Jisus fin fwacluh. Jisus el tuku nuh in imac luhn Getsemani, sie nuhke acn puhspuhs suc el luhngse na pwacye oasr leyen kuhtuhlacp in acn Jerusalem. El tuhkuh nuh in acn se inge wekunang mwet sap oaru puhspuhs lal. Oasr ma yohk sripe puhspuhs suc Jisus el enenuh in nuhnkuh kac, paenang el enenuh in suk sie acn su el kuh in mukena muhta ac in puhruhe.—Matthew 26:36; Jon 18:1, 2.
2 Mwet sap Piter, Jemes ac Jon, elos fahsr tokol Jisus som nuh in imac se. El fahk nuh selos: “Komtal mutana inge ac wiyu ngetnget ac soano,” ac tokin ma inge el som tuh lan puhruhe. Ke pacl se el foloko, el liye lah mwet kawuk lal elos motul. El sifwil pah fahk nuh selos: “Soano.” Tuhsruhktuh Jisus el liye lah elos sifwilpac motul pacl luo! Tok kuhtuh, ke fohng sepacna inge, wacngihn sin mwet sap lal inge akola nuhke ma sikyahk. Elos tiyac ngetnget ac soano. Elos som lukel Jisus ac kahenglac!—Mattu 26:38, 41, 56.
3 Mwet sap inge, elos pulakin ahsor yohk ke sripen elos tiyac ngetnget ac soano. Mwet oaru inge, elos sa in lotela ke ma tafongla lalos. Buk luhn Orekma in Bible, el ahkkahlwemye la elos ekla sie mwe srikasrak wowo ke ohiyacn ngetnget ac soano pacl nuhkwewa. Mwe srikasrak lalos kahsruh mwet Kristian saye in pacl meeta in oruh oapana. Ke pacl inge, kuht enenuh in kafweang in ngetnget ac soano yohk liki met ah. (Mattu 24:42) Lela kuht in sramsramkin ke mwe lutlut tolu suc kuht kuh in lotela ke buk luhn Orekma ac kuh in kahsre kuht in ngetnget ac soano pacl nuhkwewa.
ELOS SOANO KE KAHS IN KOLYUHK LAH ELOS FAH SOM NUH YAC IN LUTI
4, 5. Kuh luhn God kolol Poul ac mwet nuhkwewa suc welul fahfahsyesr fuka?
4 Mwe lutlut se meet pah, mwet sap inge elos soano ke kahs in kolyuk lah elos fah som nuh yac in fwackak pweng wo. Bible el ahkkahlwemye nuh sesr lah fukah Jisus el orekmakin kuh luhn God in kol mwet sap Poul ac mwet nuhkwewa suc weluhl ke sie fahfahsyesr na wowo. (Orekma 2:33) Lela kuht in ridi ma inge ke muhtwacwacack me.—Riti Orekma 16:6-10.
5 Poul, Sailas ac Timote elos som liki siti luhn Listra leyen epang luhn acn Galetia. Ke kuhtuh pacl tok uh, elos tuhkuh nuhke inkacnek luhlahp luhn acn Rom suc kololos nuh leyen roto fin acn Esia, acn se ma puhkantwen na pwacye mwet muhta we. Elos lungse in fahsr ke inkacnek soko inge in som nuhke siti puhspuhs suc oasr tausan puhspuhs sin mwet suc enenuh in lutlut ke Kraist. Tuhsruhktuh oasr ma se su igololosi. Fuhs 6 el ahkkahlwemye lah elos fahsr sasla in fwacl Frija ac Galetia, ac kuh luhn God ikololosi in tiyac fwackak kahs in Esia. Bible el tiyac ahkkahlwemye lah fukah ma inge orwack, tuhsruhktuh ke kuhtuh inkanek ku lun God ikolye met fwufwasryesr inge in tiyac fwackak pweng wo in acn Esia. Poul ac mwet nuhkwewa suc welul elos kahlwem lah kolyuk inge sin kuh luhn God kalmekin lah Jisus el lungselos in fwackak pweng wo nuhke sie acn saye.
6, 7. (a) Meac sikyak nuh sel Poul ac mwet nuhkwewa su welul ke elos apkuhran nuh Bitinia? (b) Sulela fuka met tuma lutlut inge elos orala? A mea sikyak?
6 Poul ac mwet nuhkwewa suc welul elos som nuh yac? Fuhs 7 el ahkkahlwemye lah ke elos sun mahsrol nuh acn Misia, elos srike in som nuh in Bitinia, ac tuhsruhktuh Jisus el orekmakihn kuh suc el eis sin Papa tuhmal in ikololosi in tiyac som nuh we. Ke sripen kuh luhn God ikololosi in tiyac fwackak pweng wo in acn Esia, elos som nuh leyen eir ac orwaclah oakwuck in fwackak pweng wo nuhke siti puhspuhs in acn Bitinia. Tuhsruhktuh ke elos apkuhran na in sun acn Bitinia, Jisus el orekmakihn kuh luhn God in tulokinyelos. Saap mwet inge elos nuhnkuh muh efuh ma inge sikyahk. Elos etuh meac elos enenuh in fwackak ac fukah in fwackak ma inge, tuhsruhktuh elos tiyac etuh lah oyac elos ac fah fwackak pweng wo. Elos srike in fwackak pweng wo in acn Esia, tuhsruhktuh elos tiyac kuh in orwaclah. Na elos sifwil pac srike in som nuh acn Bitinia, tuhsruhktuh elos tiyac pacna kuh. Ya mwet fwackak moniyuhk inge tui in srike? Mo, elos tiyac na!
7 Sulela se su elos oruh tok saap sie ma sakuruk. Fuhs 8 el ahkkahlwemye nuh sesr: “Ke ma inge elos fahsr sasla acn Mysia ac som nu Troas.” Mwet fahfahsyesr inge elos forla nuh leyen roto ac fahsr ke lusen mail 350. Elos alukela siti puhspuhs nuhke na elos sun acn in ai luhn oaku in acn Troas. Ke acn in ai inge, metuh elos fahfahsyesr wi oaku som nuh Masedonia. Fuhs 9 ahkuhtweye nuh sesr ma sikyak tok: “Ke fong sac Paul el liye sie aruruma, ac liye sie mwet Macedonia el tu ac kwafe sel ac fahk, ‘Fahsru nu Macedonia ac kasrekut!’” Ingena, Poul ac mwet nuhkwewa su welul elos etu la oya an se ma elos ku in fwackak peng wo. Pah inge pal ahktolu elos srike in fwackak peng wo nuhke sie an saye, tusruktu ke pal se inge elos akpayeye! Na elos sa na som nu Masedonia.
8, 9. Meac kuht kuh in lotela ke fwufwasryesr lal Poul?
8 Mea kut ku in lotela ka? Loang ka la ku lun God muhtwacwacack in kolol Poul tokin el muhtwacwacack fwufwasryesr lal nu Esia. Na tokin Poul el apkuhran nuh Bitinia, Jisus el sang kuhtuh pac kahs in kolyuk nuh sel. Ma se safla, tokin Poul el tuku nu Troas, Jisus el sapkin nuh sel in som nuh Masedonia. Jisus el srakna sifwen congregation ne ke pacl inge, ac el kuh pac in kol kut ke inkacnek sepana inge. (Kolosse 1:18) Ke mwe pupulyuk, saap kom nunku in kulansap oana sie pioneer, ku in som nuhke sie an su oasr ma enenu yohk ke orekma in fwackak peng wo. Tusruktu saap ma inge ku in orek muhkwena tokin kom kafweang in sun nien sun lom, pah inge pacl suc Jisus el e fwa orekmakihn kuh luhn God in kol kom. Ma inge el oacna ke sie mwet kahsruhsr ke soko sitosah. Sie mwet el kuh in oruh sitosah okwel in forla nuh lese kuh nuh leyot, fin sitosah okwel kasrusr. Ke inkacnek sepana inge, Jisus el ku in kol kut in akyokye orekma lasr in fwackak peng wo, fin kuht kafweang yohk muhkwena in sun nien sun lasr.
9 Tuhsruhktuh, na fukah fin kafweang lom tiyac sah in oasr fwako wo? Ya kom e fuleak, ke sripen kom nuhnkuh muh kuh luhn God tiana kol kom? Esam la ma puhspuhs tiyac sa in sikyak oacna ke inkacnek suc Poul el nuhnkuh muh e orek. Tuhsruhktuh el kafweang srike pacl nuhkwewa. Kom fin tafwela in suk “pacl na wowo” in oruh sie “orekma yohk sripa,” kom ku pac in eis fwako wo puhspuhs.—1 Korint 16:9.
KAFWEANG IN SOANO WI PUHRUHE
10. Mea ahkkahlwemye lah in kafweang in ngetnget ac soano, kuht enenuh in puhruhe pacl nuhkwewa?
10 Lwelah kuht in sramsramkin mwe lutlut ahkluo suc kuht lotela sin mwet Kristian wiyesr in pacl meeta. Elos kafweang in soano wi puhruhe. (1 Piter 4:7) Kuht enenuh in puhruhe pacl nuhkwewa, tuh kuht in ngetnget ac soano. Esam lah ke imac luhn Getsemani meet liki mwet uh sruokilye Jisus, el fahk nuh sin mwet sap tolu lal lah elos in kafweang in “soano ac pre” pacl nuhkwewa.—Mattu 26:41.
11, 12. Efuh kuh Herod el oruh ma kuluk upac nuh sin mwet Kristian puhspuhs, welulang Piter? Mea Herod el oruh?
11 Piter el lohng kahs lal Jisus inge in imac luhn Getsemani. Ke pacl toku, el kahlwem kac lah arlacna yok sripe puhruhe luhn mwet lili saye puhspuhs. (Riti Orekma 12:1-6.) Ke muhtwacwacyen Orekma sapta 12, kut lotela la Herod el oruh ma kuluk nuh sin mwet Kristian mweyen el luhngse in ahkenganye mwet Jew. Kahlwem lah el etuh lah Jemes el sie mwet sap suc arlacna fototo nuh sel Jisus. Ke ma inge, Herod el unilye Jemes “ke cutlass.” (Fuhs 2) Mwet lili nuhkwewa ke congregation in pacl sacn arlacna lungsel Jemes, pwacnacng ma inge sie me srufwe yohk nuh selos!
12 Meac Herod el oruh toko? Fuhs 3 el ahkuhtwacye lah: “Ke el liye lah ma se inge ahkinsewowoye mwet Jew uh, na el sifilpa sap in sruoh Peter.” Tuhsruhktuh met liki pacl se inge, kuhtuh sin mwet sap inge aksukosokyeyukla liki prison ke inkacnek luhn mwenmwen. Sie selos pa Piter. (Orekma 5:17-20) Saap Herod el etu ma inge. El lungse in ahkpwacyeye lah Piter el tiyac kuh in kaengla. Herod el esalang “nu in presin, yen ma el taranyuk sin u in mwet mweun akosr, kais akosr mwet meun ke kais u se. Herod el ako in nununkeyuk Peter ye mutun mwet uh tukun Kufwen Alukela uh.” (Fuhs 4) Srike luhmahlah ke nuhnahk lom ma sikyahk inge! Herod el orwaclah oakwuck in kaprilye Piter ke sein inmasrlon mwet mweun luo. Oasr mwet mweun 16 su orekma ke len ac fong in ahkpwacyeye lah el tiyac kuh in kaengla. Nuhnahk lal Herod pah in akinsemwomwoye mwet uh ke el orwaclah oakwuck in unilye Piter tukun kofwen Alukela. Ke oiya kuluk se inge, meac mwet lili elos kuh in oruh?
13, 14. (a) Meac congregation oruh ke pacl se Piter el oasr ke prison? (b) Meac kuht kuh in lotela ke puhruhe luhn mwet lili ke congregation?
13 Mwet lili ke congregation etuh ma elos enenuh in oruh. Fuhs 5 el ahkkahlwemye: “Ouinge elos fililya na in presin, tusruktu mwet in church [“congregation,” NW] uh arulana moniyuk in pre nu sin God kacl.” Puhruhe lalos kel Piter elos oruh ke moniyuhk yok ac tuhkuh ke insielos. Misac lal Jemes tiyac orwaclos in wanginla finsrak lalos kuh in nuhnkuh muh puhruhe lalos wacngihn sripe. Ke ohiyac saye, elos etuh la puhruhe luhn mwet kuhlacnsap oaru nuhkwewa arlacna sacohk nuh sin Jeova. Fin puhruhe nuhkwewa inge fahl nuhke ma luhngse lal, el e fah topuk ma inge.—Hibru 13:18, 19; Jemes 5:16.
14 Meac kuht kuh in lotela ke ma congregation oruh? Kuht fin luhngse in ngetnget ac sano pacl nuhkwewa, kuht enenuh in puhruhe tiyac kesr sifacna ac kuht in puhruhe pac ke mwet lili wiyesr nuhkwewa. (Efesus 6:18) Ya kom etuh ke mwet lili mokul ac mutan suc muteng ke ma upac puhspuhs? Saap kuhtuh selos muteng ke mwe kalyai kuh ke kain in ongoiye puhspuhs. Kuhtuh elos muhta ke mutanfwal puhspuhs suc guferment luhngse in tulokinye orekma in fwackak peng wo. Wo fin kuht moniyuhk in puhruhe ke mwet lili wiyesr inge. Saap kom etuh kuhtuh selos su oasr ma upac, suc mwet lili saye tiyac sah in akihlen, oana ma upac ke sou, mwe ahsor yohk, kuh mahs. Arlacna wo kom fin nuhnkuh ke inen mwet lili su kom ku in fahk ke kom sramsram nuh sin Jeova, el suc “topuk puhruhe.”—Sam 65:2.
15, 16. (a) Fukah lipufacn luhn Jeova el ahksukosokyella Piter liki nien prison? (b) Kuht fin nuhnkuh ke inkacnek luhn Jeova in molella Piter, efuh kuh ma inge ahkkeye luhlahlfongi lasr?
15 Tuhsruhktuh meac sikyahk nuh sel Piter? Ke fong safla lal Piter ke nien prison, ke el motul, oasr ma sakuruk sikyak. (Riti Orekma 12:7-11.) Srike lumala ke nuhnahk lom ke ma sikyahk: Oasr kahlwem se saromelik in prison lal. Piter el kapuri ke sein inmasrlon mwet san luo, tuhsruhktuh elos tiyac liye lah lipufacn se tu siskel. Lipufacn se inge el fahk nuh sel elan silaklak tukakek. A sein putatlac liki paul Piter! Lipufacn se inge penulla liki prison se ac fwasr alukela mwet san puhspuhs suc tu likin prison. Mutunoa wusra luhlahp sifacna ikakla, a Piter a lipufacn se elos illa nuh lik a. Tukun elos som liki nien prison se, lipufacn se wacngihnlac. Piter el sukosokla!
16 Kuht fin nuhnkuh ke kuh luhn Jeova in molela mwet kuhlacnsap puhspuhs lal, ma inge kuh in ahkkeye luhlahlfongi lasr. Pwacye lah, ke pacl inge kuht tiyac tuhpan Jeova in molikutla ke inkacnek luhn mwenmwen. Tuhsruhktuh oasr luhlahlfongi yohk lasr ke kuh luhn Jeova in kahsruh mwet lal. (2 Kronikel 16:9) Ke el orekmakihn kuh lal, el kuh in ahkkeye kuht in muteng ke kutena ma upac. (2 Korint 4:7; 2 Piter 2:9) A fah tiyac pat Jeova el e fah sang kuh nuh sel Jisus in akmoulyeak million puhspuhs sin mwet misac, suc ke kahs in puhpuhlyuhk elos oasr ke nien prison. (Jon 5:28, 29) Luhlahlfongi lasr ke wulela puhspuhs luhn God kuh in ase nuh sesr mwe ahkkeye yok in muteng ke ma upac puhspuhs ke pacl inge.
SANG MA LOH NUH SIN MWET NUHKWEWA FINNWE OASR MA UPAC PUHSPUHS
17. Poul el sie me srikasrak mwomwo fuka in fwackak peng wo ke moniyuhk ac ohiyacn salka?
17 Pah inge mwe lutlut ahktolu ke ohiyacn ngetnget ac soano suc kuht kuh in lotela sin mwet sap puhspuhs: Elos tiyac lela kuhtwena ma upac in tulokinyelos in fwackak peng wo. Tuh kuht in ngetnget ac soano pacl nuhkwewa, kuht enenuh in fwackak peng wo ke moniyuhk ac oiyen salka. Mwet sap Poul el sie mwe srikasrak wo su oruh ouinge. El orekma upac in sulkakin peng wo. El fahfahsyesr nuhke acn puhspuhs ac oakiye congregation puhspuhs. Ahok el muteng ke ma upac puhspuhs, nwe ouinge el kafweang in fwackak peng wo ke moniyuhk a oiyen salka.—2 Korint 11:23-29.
18. Poul el kafweang fukah in fwackak peng wo ke el sie mwet prison in acn Rom?
18 Pacl safla suc kuht rid ma kel Poul ke buk luhn Orekma pah in sapta 28. Poul el tuhkuh nuh acn Rom tuh elan tu ye mutal Nero, mwet kol luhn acn se inge. Poul el sie mwet prison, saap el kapuri ke sein nuh sin sie mwet san, tuhsruhktuh ma inge tiyac tulokinye mwet sap moniyuhk se inge! Poul el kafweang pacl nuhkwewa in suk inkacnek in fwackak peng wo nuh sin mwet saye puhspuhs. (Riti Orekma 28:17, 23, 24.) Len tolu na tokin Poul el sun acn se inge, “el pangon mwet kol lun mwet Jew” tu elan kuh in fwackak peng wo nuh selos. Mwet Jew elos pakiye sie len in sifwil osun nuh sel Poul, ac ke pacl se inge el sang ma loh nuh selos yohk liki met ah. Fuhs 23 ahkkahlwemye ouinge: “Na elos pakiya sie len elos in osun nu sel Paul, ac ke sun len sac mwet pupis tukeni nu yurol yen el muta we. Mutawauk ke lotutang nwe ke fongeni, el aketeya nu selos kalmen Tokosrai lun God, ac el srike in furokolosla in lulalfongi ke Jesus ke el luti ke Ma Sap lal Moses ac ke ma simusla lun mwet palu.”
19, 20. (a) Efuh oasr fwako wowo ke orekma lal Poul in fwackak peng wo? (b) Finnwe kuhtuh mwet elos tiyac eis peng wo, meac Poul el oruh?
19 Efuh kuh oasr fwako wowo ke orekma lal Poul in fwackak peng wo? Fuhs 23 el ahkkahlwemye nuh sesr kuhtuh sripe. (1) El luti ke Tokusrai luhn God ac kel Jisus Kraist. (2) El kahsruh mwet suc longol ke el “furokolosla,” kalme pah, el ahkuhtwacye ac sang sripe wowo tuh elos in luhlahlfongi. (3) El orekmakihn Bible in ahkuhtwacye ma nuh sin met. (4) El ahkkahlwemye lah el nuhnkuh ke mwet yok liki kel sifwana ke el fwackak peng wo “ke lotutang nwe ke fongeni.” Poul el sang ma loh wowo, tuhsruhktuh tiyac mwet nuhkwewa eis peng wo. Fuhs 24 ahkkahlwemye kas inge: “Kutu selos lulalfongi lah ma el fahk uh pwaye, ac kutu tiana lulalfongi.” Ma inge oru metu in tia insese ka a elos som.
20 Ya Poul el munasla ke sripen tiyac mwet nuhkwewa eis peng wo? Mo! Orekma 28:30, 31 ahkkahlwemye nuh sesr: “Ke lusen yac luo, Paul el muta in sie lohm ma el moli elan muta kac, ac el paing mwet nukewa su tuku nu yorol. El pulaik in fahkak ke Tokosrai lun God, ac wangin mwet ikolilya in luti nu sin mwet uh ke Leum Jesus Christ.” Buk luhn Orekma el safla ke kahs in ahkkeye inge.
21. Meac kuht kuh in lotela ke mwe srikasrak lal Poul ke pacl se el sie mwet prison ke lohm se ma el moli?
21 Meac kuht kuh in lotela ke mwe srikasrak lal Poul? Ke pacl se el muhta in lohm se ma el moli oacna sie mwet prison, Poul el tiyac kuh in fwackak peng wo ke sie lohm nuhke sie lohm. Tuhsruhktuh el tiyac lela ma inge in akmunasyel, a el kafweang in fwackak peng wo nuh sin mwet nuhkwewa suc muteta nuh yurol. Ke inkacnek sepacna inge, mwet puhspuhs luhn God ke pacl inge elos sruokye na insewowo lalos ac kafweang in fwackak peng wo finnwe elos muhta in prison ke sripen luhlahlfongi lalos. Kuhtuh sin mwet lili wiyesr elos tiyac kuh in som liki lohm selos, saap ke sripen elos matou kuh mahs. Fin elos kuh, elos fwackak peng wo nuh sin mwet suc muteta ac nuh sin mwet saye nuhkwewa su tuhkuh nuh in lohm selos. Ma elos lungse in oruh pah in sang ma loh nuh sin mwet nuhkwewa ke Togusrai luhn God. Kuht ahksacohkye na pwacye mwe srikasrak lalos!
22. (a) Buk luhn Orekma el kahsruh kuht fuka ke ohiyacn ngetnget ac soano? (b) Meac kom luhngse in oruh ke kom soano saflaiyen oakwuck mahtuh se inge?
22 Ke pacl se kuht riti ke mwet sap ac mwet Kristian puhspuhs saye in pacl meeta ke Buk luhn Orekma, kuht lotela ma puhspuhs ke ohiyacn ngetnget ac soano. Kuht arlacna lungse in etawelos ke kuht fwackak peng wo ke puhlaik ac moniyuhk ke kuht soano saflaiyen akwuk mahtuh se inge. Kunokon yok sripe emeet suc kuht kuh in oruh pac in sang ma loh nuh sin mwet nuhkwewa ke Togusrai luhn God!—Orekma 28:23.
[Petsac ke sra 10]
Sie lipufacn el kolol Piter in illa liki mutunoa wusra lulap suc sifacna ikacslah