Mwet Kihristin Pwacye Elos Ahkfuhlwactye Kahs luhn God

“Kas lom ma pwaye.”​—JON 17:17.

LIYE KE MWE TOP NUHKE KIHSEN SIYUHK NUHKWEWA INGE:

Meac ma tiyac oacna sie inmasrlon miting su orek in Jerusalem in yac 49 ac ke tukeni luhn un mwet kol luhn alu tukun pacl sacn?

Suc kuhtuh mwet suc sang kahsruh ac orekmakihn Kahs luhn God tukun pacl luhn mwet sap nuhkwewa?

Ke inkacnek fukah mwet Kihristin pwacye elos lutlutkihn Bible in yac 1800 kuhtuh? Efuh kuh oakwuck inge sie inkacnek wo in lutlut?

1. Ke pacl se met kom sramsram nuh sin Mwet Loh luhn Jeova, meac ma yohk srihpac kom akihlen lah elos siena liki alu sahyac puhspuhs?

NUHNKUH ke pacl se met kom sramsram nuh sin sie Mwet Loh luhn Jeova. Meac kom esam kac? Puhs inmahsrlosr fah fahk muh ma kuht esam pah Mwet Loh el orekmakihn Bible in sang mwe top nuhke kihsen siyuhk nuhkwewa lasr. Kuht arlacna insewowo in etuh ke oakwuck luhn God ke facluh, meac sikyak kuht fin misac, ac finsrak luhn mwet in sucu lasr su misac tari!

2. Meac kuhtuh srihpac pwacnacng kom ahksacohkye Bible?

² Tuhsruhktuh ke kuht kafweang in lutlut, kuht akihlen lah kuht kuh in lotela ma puhspuhs ke Bible liki na in etuh mwe top nuhke kihsen siyuhk lasr ke moul, misac, ac ke pacl fahsruh. Kuht ahksacohkye Bible mweyen pah inge buk ma wo emet oasr fin facluh su kuh in kahsruh kuht. Kahs in kahsruh luhn Bible kahsruh mwetuh pacl nuhkwewa. Mwet su ahkos ma inge elos fah insewowo ac engankihn moul wowo. (Riti Sam 1:1-3.) Mwet Kihristin pwacye elos luhlahlfongi pacl nuhkwewa ke Bible, “tia oana kas lun mwetuh, a kas na pwacye sin God me.” (1 Tessalonika 2:13) Kalweni fototo ke ohiyac su mwetuh in pacl metah elos orekmakihn Bible kuh pihlesruh ma inge ac fah ahkkahlwemye ma tiyac oacna sie inmahsrlon mwet su ahkfuhlwactye Kahs luhn God ac nuh selos su tiyac.

SIE MA UPAC AHKWOYEYUHKLAH

3. Ma upac fuhkah ahksensenye inse sefanna luhn congregation luhn mwet Kihristin? Efuh kuh ohiyac se inge upac in ahksuwohsye?

³ Yac singoul tolu somlah tukun Cornelius, tiyac sie mwet Jew, ahkmuhsraelah ke kuh luhn God. Oasr mwet puhspuhs su tiyac mwet Jew ekla mwet Kihristin. In pacl se inge, oasr sie ma upac sikyak suc ahksensenye inse sefanna luhn congregation luhn mwet Kihristin. Yac mukul puhspuhs suc tiyac mwet Jew enenuh in kosroila in fahl nuhke facsin luhn mwet Jew met liki elos kuh in pacptais? Sie kihsen siyuhk upac pah inge nuh sin sie mwet Jew in sang mwe top. Mwet Jew suc ahkos Masap elos tiyac utyak nuhke lohm sin sie mwet sahyac. Fin elos tiyac oruh ma inge, pwacye lah elos tiyac pac nuhnkuh ke mwet sac oacna ma lel! Mwet Jew Kihristin elos kalyeiyuhk tari ke srihpacn elos fohrla liki alu luhn mwet Jew. Fin elos paing ingena mwet sahyac su tiyac kohsrelah oacna mwet lelos, ma inge kuh in srihpacn mwe kalyei upac nuh sin mwet Kihristin. Ma inge kuh in srela pac na pwacye mwet Kihristin lukelos su wi ke alu luhn mwet Jew.​—Galetia 2:11-14.

4. Su mwet puhspuhs su tukeni nuh sie in ahksuwohsye sie ma upac? Kihsen siyuhk puhspuhs fuhkah oasr ke nuhnak luhn sie mwet ke mwe sramsram se inge?

⁴ In yac 49, mwet sap a mwet mahtuh in Jerusalem, su elos nuhkwewa mwet Jew su kohsrelah, “elos tukeni nu sie in nunku ke ma se inge.” (Orekma 15:6) Tukeni lalos inge, tiyac sie akuhkuhin ke oakwuck luhn alu ke ma puhspuhs su tiyac yohk srihpac, a ma inge sie sramsram wo in ahkuhtwacye ke mwe luti puhspuhs luhn Bible. Mwet nuhkwewa su wi ke mwe sramsram wo inge el ahkkahlwemye nuhnak lal kac. Elos ahksuwohsye fuhkah ma upac se inge? Yac elos fah lwelah nuhnak luhn mwet sefanna kuh nuhnak in srisri lal in kuhfaslah sulelah lalos? Yac mwet sap ac mwet mahtuh inge elos fah sano nuhke pacl se ohiyac inge in Israel wola tari met liki elos oruh sie sulelah kac? Kuh elos insese ke ma se su elos tiyac arlacna luhlahlfongi muh sumwos tuh elos in kuh in orwaclah na sie sulelah kac?

5. Ke inkacnek yohk srihpac fuhkah tukeni in Jerusalem in yac 49 tiyac oacna sie nuhke tukeni luhn mwet kol puhspuhs luhn alu?

⁵ Ke tukeni luhn mwet kol lun alu puhspuhs, mwet kol inge elos eis ac luhlahlfongi kain in nuhnak su elos tiyac arlacna insese kac tuh elos in orwaclah sie sulelah ke ma se. Ke pacl puhspuhs kuhtuh sin mwet kol inge elos srike in oruh mwet kol sahyac in sang fot ac insese nuhke nuhnak lalos. Tuhsruhktuh kain in ohiyac inge tiyac sikyak ke tukeni in Jerusalem. Nwe ouinge, mwet sap ac mwet mahtuh elos orwaclah sie sulelah su mwet nuhkwewa ke tukeni se inge insese kac. Ma inge ahkpwacyeyuhk fuhkah? Ohiyac wo se inge sikyak mweyen, fin nwe oasr nuhnak lalos kac su tiyac oacna sie, elos nuhkwewa su oasr we elos suhnakihn Kahs luhn God, ac elos orekmakihn ma Suhmuhslah in ahksuwohsye ma upac se inge.​—Riti Sam 119:97-101.

6, 7. Mwet sap ac mwet mahtuh elos orekmakihn fuhkah ma Suhmuhslah in ahksuwohsye ma upac ke kohsrelah?

⁶ Sie ma suhmuhslah su kahsraclos in ahksuwohsye ma upac inge pah Emos 9:11, 12. Ma suhmuhslah inge ahkkahlwemyeyuck pac in Orekma 15:16, 17, ke leng luhn Baibel Mutal ke Kas Kusaie. Ma suhmuhslah inge ahkkahlwemye ouinge: “Nga fwa foloko, a Nga fwa sifwil musai loom sel Devid, su iguri; a Nga fwa sifwil musai ma musalla ka, a Nga fwa tulokunak. Tu met ngia fwa suk Jeova, a met Pegan nukewa su pangonyuk ke ek, Jeova el fwak.”

⁷ Tuhsruhktuh sahp oasr sie mwet fahk muh fus inge tiyac ahkkahlwemye muh sie mwet su tiyac mwet Jew su ekla mwet Kihristin tiyac enenuh in kohsrelah. Ahok pwacye ma inge. Tuhsruhktuh mwet Jew Kihristin elos kahlwem ke ma suhmuhslah inge. Efuh? Elos tiyac nuhnkuh ke mwet sac su kohsrelah tari oacna ‘met lun mutunfwal puspus’ a oacna mwet lelos. (Exodus 12:48, 49) Ke sie me puhpuhlyuhk, in fal nuhke lweng lun Bible inge Bagster version luhn Septuagint, Ester 8:17 el ahkkahlwemye ouinge: “A mwet puspus sin met lun mutunfwalu elos kosroila, ac ekla met Jew.” Ke ma inge, ke pacl se ma Suhmuhslah pahlye lah mwet luhlah ke lohm sin Israel (su mwet Jew ac mwet sahyac su kohsrelah su wi alu luhn mwet Jew), ma suhmuhslah el ahkkahlwemye la elos fah ekla u sefanna nuhke inen God wekuhnacng ‘met lun mutunfwal puspus’ su kalmekihn nuh sin mwet sahyac su tiyac kohsrelah. Ke ma inge mwe top nuhke ma Suhmuhslah arlacna kahlwem. Mwet puhspuhs su tiyac mwet Jew su luhngse in ekla mwet Kihristin elos tiyac enenuh in kohsrelah.

8. Efuh kuh mwet Jew Kihristin enenuh in puhlaik in oruh sulelah su elos orwaclah?

⁸ Kahs luhn God ac kuh lal kahsruh mwet Kihristin inge in insese sie sin sie ac orwaclah sie sulelah wo. (Orekma 15:25) Sulelah se inge kuh in srihpacn mwe kalyei pac nuh sin mwet Jew Kihristin, nwe ouinge elos nuhkwewa su oaru elos puhlaik in ahkos masap se inge fal nuhke oakwuck lun Bible.​—Orekma 16:4, 5.

MA TIYAC OACNA SIE AHKKAHLWEMYEYUCK KALWEM

9. Meac sie srihpac yohk pwacnacng mwe luti kikiyacp ahkkolukye alu pwacye? Mwe luti yohk sripe fuhkah luhn mwet Kihristin ahkkolukyeyuhk?

⁹ Mwet sap Poul el fahk lah tukun misac luhn mwet sap nuhkwewa, mwe luti kikiyacp puhspuhs e fah ahkkolukye alu pwacye. (Riti 2 Tessalonika 2:3, 7.) Fin nwe kuhtuh sin mwet Kihristin su oasr kunohkohn ke congregation elos fah pihlesruh mwe luti pwacye. (2 Timote 4:3) Poul el sang kahs in sensen nuh sin mwet elder in pacl sacn: “Pacl se ac fah tuku, ke mwet na in u lowos an ac fah fahk kas kikiap in kolla mwet lulalfongi uh in fahsr tokolos.” (Orekma 20:30) Buk se inge The New Encyclopædia Britannica el ahkkahlwemye sie srihpac yohk pwacnacng mwet ke congregation elos lwelah mwe luti kikiyacp. Ma inge ahkkahlwemye lah kuhtuh sin mwet Kihristin su eis ahkpah ke lahlmwetmwet yohk luhn mwet Grik elos muhtwacwacack in orekmakihn lahlmwetmwet se inge in ahkuhtweyac luhlahlfongi lalos oacna mwet Kihristin. Ma inge orwaclos in puhlakin wo ke etwacack lalos sifacna, ac elos nuhnkuh muh ma inge kahsruh met sahyac su tiyac mwet Jew in eis alu luhn mwet Kihristin. Sie mwe puhpuhlyuhk ke mwe luti luhn mwet Kihristin su elos ahkkolukyeyuhk ke srihpacn nuhnak luhn mwet pegan kac, pah ke mwe luti kel Jisus Kraist, lah su el. Bible el panglol oacna Wen nuhtin God, tuhsruhktuh mwet su luhngse lahlmwetmwet luhn mwet Grik elos luti muh el pah God.

10. Mwet kol luhn alu puhspuhs elos kuh in konacack oyac mwe top nuhke kihsen siyuhk lah su Jisus Kraist?

¹⁰ Ke pacl tok uh, mwet kol puhspuhs luhn alu elos akuhkuhin ke mwe luti se inge ke un mwet kol ke u puhspuhs luhn alu se inge. Elos kuh in sa in konacack mwe top nuhke kihsen siyuhk se inge lah su Jisus Kraist in ma Suhmuhslah, tuhsruhktuh pus selos tia nunku mu ma Bible el ahkkahlwemye yohk srihpac. Ahok, puhs selos orwaclah tari sulelah lalos sifacna kac met liki tukeni lalos muhtwacwacack, wacngihn kuhtwena ma kuh in ekuhllah sulelah lalos. Sulelah puhspuhs su orwaclah ke tukeni lalos inge suhke ahkkahlwemye kuhtwena ma ke Bible.

11. Mwet kol luhn alu elos ahkfalye sulelah lalos ke meac? Efuh kuh elos oruh ma inge?

¹¹ Efuh kuh mwet kol puhspuhs luhn alu elos tiyac orekmakihn ma Suhmuhslah ke inkacnek yohk ke pacl se elos orwaclah sulelah lalos? Scholar se inge su pangpang Charles Freeman el ahkuhtweyac lah elos tiyac oruh ma inge ke srihpacn ma Bible el ahkkahlwemye kac tiyac fal nuhke nuhnak lalos muh Jisus pah God. Kahs lal Jisus sifacna ahkkahlwemye lah God el yohk lukel. Ke srihpacn mwet kol puhspuhs inge tiyac kuh in fahk muh sito kahs lal, pwacnacng facsin luhn surs ac nuhnak luhn mwet puhspuhs pah mah yohk srihpac nuh selos liki ma Suhmuhslah. Oacyacpac ke pacl inge, mwet kol puhspuhs luhn alu elos nuhnkuh muh kahs luhn mwet puhspuhs su elos pahngon Papa luhn Surs pah ma yohk srihpac liki Kahs luhn God! Kom fin ahkuhtweyac mwe luti ke Trinity, kalme pah God, Mwen, a Ngun Mutal ma sefanna, nuh sin sie mwet lutlut ke alu, saap kom kuh in akihlen ma inge.

12. Me kuhfaslah fuka togusra el orwaclah?

¹² Oasr mwe kuhfaslah yohk luhn Tohkohsrah luhn acn Rom nuhke miting se inge. Ke sie mwe puhpuhlyuhk, mwet Luti luhlahp se inge pangpang Richard E. Rubenstein el suhmuhslah ke ma sikyak ke tukeni luhn mwet kol puhspuhs fin acn Nicaea. El fahk muh togusra sasuh inge, Constantine, el orwaclah mwet kol ke surs su pahngpahng bishops in arlacna kahsruhp. Ke lusen sie pacl su srik liki yac se, el folokonang nuh selos ma nuhkwewa su utucklac lukelos, wekuhnacng lohm alu selos, orekma lalos, a wal lalos. El oruh ma wo nuh sin mwet kol fuhlwact nuhkwewa inge oacna ke ma el oruh nuh sin mwet tol puhspuhs luhn mwet pegan. Ke srihpac inge, Constantine el kuh in oruh mwe kuhfaslah yohk nuhke sulelah su orek ke tukeni luhn mwet kol puhspuhs in acn Nicaea, saap el kuh in ekuhllah pac ma inge. Ac mokul se inge Charles Freeman el suhmuhslah lah tukun miting se inge, togusra se inge el muhtwacwacack in oasr kuh yohk nuhke surs. El sang kuh nuh sin surs ac sang kuhfaslah nuhke mwe luti puhspuhs luhn alu inge.​—Riti Jemes 4:4.

13. Efuh kom nuhnkuh muh mwet kol luhn alu elos tiyac eis ma pwacye suc oasr in Bible?

¹³ Mwet kol puhspuhs luhn alu elos tiyac kuh in eisel Jisus Kraist oacna Wen nuhtin God, tuhsruhktuh tiyac oacna sie nuhnak luhn mwet sahyac puhspuhs kac. Mweyen mwet puhspuhs elos kahlwem na pwacye ac luhlahlfongi ke ma elos rid ke ma Suhmuhslah. Tuhsruhktuh mwet kol luhn alu elos luhngse mani ac kuh su tohkohsrah kuh in sang nuh selos, ke ma inge eltal pulesru Bible. Gregory luhn an Nyssa, sie mwet kol luhn alu in pacl se inge, el ahkkahlwemye nuhnak lal ke ohiyac su mwet luhn acnuh, oacna mwet kuhka ke nuknuk, mwet ahyahol mani, mwet kuhkakihn mwe mongo, ac mwet kuhlacnsap, elos kahskahs ke alu. Gregory el sruhnga ma pwacye la pus sin mwet inge elos ahkuhtwacye la Wen el siena liki Papa, a Papa el yohk liki Wen, ac Wen orekla ke wacngihn. Mwet inge elos kuh in ahkuhtwacye ma pwacye nuhkwewa inge ke elos orekmakihn Bible. Pah inge ma se suc Gregory luhn acn Nyssa ac mwet kol puhspuhs luhn alu elos tiyac oruh. Elos enenuh in lohng sin mwet puhspuhs inge!

“WITU” A “MAH KOLUK” TUKENI NA KAP

14. Kuht etuh fuhkah lah oasr kuhtuh mwet Kihristin ahkmuhsraelah pwacye pacl nuhkwewa fin facluh muhtwacwacack in century se met fahsruh?

¹⁴ Ma Jisus el fahk ke sie me puhpuhlyuhk lal ahkkahlwemye nuh sesr lah muhtwacwacack in pacl sacn fahsruh, pacl nuhkwewa ac fah oasr kuhtuh mwet Kihristin ahkmuhsraelah pwacye fin facluh. El puhpuhlyuhk kihn ma inge nuhke “witu” su kapak inmasrlon “mah koluk.” (Mattu 13:30) Pwacye lah, kuht tiyac etuh na pwacye lah su mwet puhspuhs kuh u puhspuhs inge su wi ke u luhn mwet ahkmuhsraelah. Tuhsruhktuh kuht etuh la oasr pacl nuhkwewa kuhtuh mwet suc puhlaik in orekmakihn wo Kahs luhn God ac in kahskahs lain mwet luti kikiap puhspuhs luhn surs. Lwelah kuht in sramsramkihn kuhtuh mwe puhpuhlyuhk.

15, 16. Su kuhtuh mukul su sang kahsruh ac orekmakihn Kahs luhn God?

¹⁵ Archbishop Agobard luhn acn Lyons, France, suc moul inmasrlon yac 779 nuhke 840, el kahskahs in lain alu nuhke ma srolela, lohm alu puhspuhs suc wuleyuhkla nuh sin mwet mutal, ac ke orekma ac oakwuck lun alu. Bishop Claudius, su moul ke pacl sepacna su Bishop Agobard el moul, el pihlesruh pac facsin luhn alu ac el tiyac insese ke pre nuh sin mwet muhtahl, ac alu nuhke ma puhspuhs. In century ahk 11, Archdeacon Berengarius luhn acn Tours, France, el sisilah liki surs, mweyen el pulesru mwe luti luhn alu luhn Catholic muh ke inkacnek luhn mwenmwen bread ac wain ekla nuhke mahno ac sran Kraist. Oacyacpac el luhlahlfongi na pwacye lah Bible el fuhlwact liki oakwuck ac facsin luhn surs.

¹⁶ Piter luhn acn Bruys ac Henry luhn acn Lausanne, su moul in century ahk 12, elos luhngse ma pwacye luhn Bible. Piter luhn acn Bruys el tui in kuhlacnsap oacna sie mwet tol mweyen el luhlahlfongi lah mwe luti luhn Catholic ke pacptais luhn tulik srisrik, bread ac wain ekla nuhke mahno ac sran Kraist, puhruhe ke mwet misac, ac alu nuhke sahkseng tiyac fahl uh ke ma Suhmuhslah. In yac 1140, Piter el isikyuhkyuhk ke e nuhke na el misac ke srihpacn luhlahlfongi lal. Henry, su wi ke u lun mwet su muhta ke lohm alu ac srela liki mwet puhspuhs, el kahskahs in lain orekma kuluk ac oakwuck in alu tiyac suwohs ke surs. Mwet kol luhn alu se inge elos sruokilye in yac 1148 ac muhta nuh in kaclpous ke lusen moul lal nohfohn.

17. Ma yohk sripe fukah Waldo ac mwet nuhkwewa su fahsr tukol elos oruh?

¹⁷ Ke pacl se Piter luhn acn Bruys anwuki, oasr sie tulik isuslah, ac ke pacl tok e fah oasr kahsruh na yohk nuhke fahsrelihk luhn ma pwacye luhn Bible. Lashnem luhn mokul se inge pah Valdès, kuh Waldo.a (Liyac footnote.) El tiyac eis kuhtwena me ahkpa ke alu oacna Piter lun an Bruys ac Henry luhn acn Lausanne. Tuhsruhktuh el ahksacohkye na pwacye Kahs luhn God pwacnacng el fuleak ma sacohk puhspuhs lal ac el sang kahsruh in luhngaslah kuhtuh buk luhn Bible nuhke kahs su mwet puhsisel puhspuhs kahskahskihn in acn France. Kuhtuh mwet elos engan na pwacye in lohng ke pweng luhn Bible ke kahs lalos sifacna, ac ke srihpac inge elos fuleak pac ma sacohk puhspuhs lalos ac orekmakihn moul lalos in kahskahs kihn ma pwacye lun Bible nuh sin mwet puhspuhs sahyac. Mwet kol puhspuhs luhn alu elos sruhnga ma inge. In yea 1184, mwet kol fuhlwact emet ke alu el sisilah mukul ac muhtwacn puhspuhs moniyuhk inge liki alu se inge, su ke pacl tok elos etwacack pac oacna Waldenses, ac bishop puhspuhs tiyac lwelah elos in fohlohklah nuhke lohm selos. Ohiyac upac inge sang kahsruh in sulkackihn pweng wo luhn Bible nuh sin mwet in acn puhspuhs sahyac. Oasr pacl, mwet su fahsr tokol Waldo, Piter luhn acn Bruys, ac Henry luhn acn Lausanne, elos oasr yen puhspuhs fin acn Europe, wi pac mwet puhspuhs su sifacna srelosla liki surs. Tukun foko yac somlah, oasr pac mwet puhspuhs sahyac su ahksacohkye ma pwacye luhn Bible: oacna John Wycliffe (su moul in yac 1330 nuhke 1384), William Tyndale (su moul in yac 1494 nuhke 1536), Henry Grew (su moul in yac 1781 nuhke 1862), a George Storrs (su moul in yac 1796 nuhke 1879).

“KAS LUN GOD TIA KAPRIYUKI”

18. Ke inkacnek fukah mwet lutlut Bible su pwacye insielos lutlut ke Bible muhtwacwacack in yac 1800 kuhtuh? Efuh kuh oakwuck inge sie inkacnek wo in lutlut?

¹⁸ Mwet lokoalok luhn Bible elos tiyac kuh in tulokihnye ma pwacye luhn Bible in sulkackuhnelihk. Kuht kuh in rit kahs inge in Bible: “Kas lun God tia kapriyuki.” (2 Timote 2:9, BMK) In yac 1870 oasr sie u luhn mwet lutlut Bible elos muhtwacwacack in suk ke ma pwacye. Elos oruh lutlut lalos fukah? Ma se met, oasr sie mwet su siyuhk sie kihsen siyuhk ke sie mwe lutlut. Na elos sramsramkihn ma inge. Tok, elos rit ma suhmuhslah nuhkwewa su sang mwe ahkuhtweyac kac. Ke pacl se elos insese lah fukah ma suhmuhslah puhspuhs kuhpahsr nuh sin sie sin sie, elos orwaclah mwe top lalos nuh kac ac elos suhmuhslah ma inge. Sie inkacnek wo pah inge in lutlut mweyen ma inge fahsr tokin mwe srihkasrak luhn mwet sap ac mwet mahtuh in century se met. Sie mwe ahkkeye in etuh lah mukul oaru nuhkwewa inge ke muhtacwacyacn mwe sramsram luhn Met Lo lun Jeova elos ahkpwacyeye lah luhlahlfongi lalos fahl na pwacye nuhke Kahs luhn God.

19. Meac yeartext nuhke yac 2012, ac efuh kuh ma inge arlacna fahl?

¹⁹ Mwe luti nuhkwewa su kuht luhlahlfongi kac in pacl inge fahl nuhke Bible. Pasis Governing Body luhn Mwet Loh luhn Jeova elos sulelah kahs luhn Jisus in Jon 17:17 in pah inge yeartext lasr nuhke yac 2012: “Kas lom ma pwacye.” Mwet nuhkwewa su luhngse in eis mwe insewowo luhn God enenuh in moulkin moul fahl nuhke ma pwacye. Ke ma inge kuht nuhkwewa enenuh in kafweang in oruh ke kuh lasr kwewa in ahkos kolyuk luhn Kahs luhn God.

[Footnote]

[Petsac ke sra 6]

Yeartext lasr nuhke yac 2012 pah: “Kas lom ma pwaye.”—Jon 17:17

[Petsac ke sra 5]

Waldo

[Petsac ke sra 5]

Wycliffe

[Petsac ke sra 5]

Tyndale

[Petsac ke sra 5]

Grew

[Petsac ke sra 5]

Storrs