Efu Kut Lela Ku lun God in Kol Kut?
“Kom God luk. Ku lom mwo; lela ma inge in kolyu.”—Sam 143:10, New World Translation.
1. Mea oasr ke macknet su oru kain in mwusra puspus in sremla ka?
YA OASR pal kom filiye soko ninul apkuran nu ke sie macknet? Ninul soko inge arla sa in sremla nu ke macknet se. Efu ku ma inge sikyak? Meyen oasr ku su tia ku in liyeyuk oru mwusra nukewa in sremla nu ka. Ke lusen yea foko puspus metu orekmakin macknet in sukok ke kain in mwusra puspus.
2, 3. (a) Ku fokoko fuka Jeova el orekmakin in pal omeeta? (b) Kut etu fuka la ku lun God ku in kol kut ke moul lasr ke pal inge?
2 Oasr sie pa ku su tia ku in liyeyuk su yok sripe liki ku lun macknet su ku in kasre kut. Mea se inge? Ku se inge pa ma akkalemyeyuk ke fus sie a luo ke mutaweyen Baibel. Genesis 1:1 el akkalemye nu sesr ma Jeova el oru in pal omeeta: “Ke mutamwauk God el orala kosrao a fwalu.” Ke el oru ma inge, el orekmakin ku su arlanu fokoko oana ke ma Sam 33:6 el akkalemye: “Ke kas lun Jeova kosrao orekla, a u lun kosrao nukewa ke mong lun oalul.” Kain in ku fuka God el orekmakin? Pa “mong” ku momong lun God, su kalmekin nu ke ku lun God. Ku se inge pa orekmakinyuk in orala ma nukewa. Kut sang kulo yok ke Jeova el orekmakin ku lal in ase nu sesr moul a in orala ma saye nukewa.—Job 33:4; Sam 104:30.
3 Kut etu la Jeova el orekmakin ku lal in orekutla, tusruktu ya ku se inge ku in kasre kut ke moul lasr ke kutu pa inkanek saye? Mwen nutin God el etu la ku se inge ku in kasru met tumal lutlut. El fwak la ku lun God ku in kololos. (Jon 16:13) Mea ku se inge? Efu ku kut lungse ku se inge in kasre kut?
Mea Se Inge Ku lun God?
4, 5. (a) Nunak tia sumwos fuka ke ngun mutal oasr yurin met su lulalfongi ke Trinity ku Ma Tolu in God Sefwanna? (b) Kom e akuteye fuka la mea na paye kalmen ngun mutal?
4 Kutu sin met su kom sramsram nu se ke orekma in luti saap elos lulalfongi ke ma Baibel Kosrae el akkalemye oana “Ngun Mutal.” Met su lulalfongi ke Trinity, ku Ma Tolu in God Sefwanna, elos tafongla in nunku mu ngun se inge el sie ma orekla in ngun su oana God Papa.—1 Korint 8:6.
5 Ke ma inge, mea se inge “Ngun Mutal”? Footnote in Genesis 1:2 ke Bible Mutal Leng Sasu Ke Kas Kosrae akkalemye ouinge: “Ngun lun God. In kas Hibru, Ngun lun God el oana ‘ku lun God,’ ku ‘eng lulap sin God me.’” Kas Hibru se inge ruʹach su orekmakinyuk ka el lungasyukla pa nu ke kutupa kas saye su kalmekin nu ke sie ku su tia ku in liyeyuk. Kut tia ku in liye engu, ne ouinge kut liye ma el ku in oru. Ke oiya ouinge, ku lun God tia ku in liyeyuk, tusruktu ma inge ku in oru ma puspus in sikyak. Ngun mutal el tia sie met. Ma inge pa ku su tuku sin God me. El orekmakin ku se inge nu sin met, ku nu ke ma puspus in akpayeye la ma nukewa el lungse a fwa sikyak. Ya upa in lulalfongi mu ku mwolana se inge tuku sin God kulana? Mo!—Ridi Isaia 40:12, 13.
6. Mea Devid el siyuk sin Jeova?
6 Ya Jeova el ku in tafwela in orekmakin ku lal in kol kut ke moul lasr? El mwulela nu sel Devid: “Nga fwa aketeye nu sum a luti nu sum inkanek kom fwa fwasr we.” (Sam 32:8) Ya Devid el lungse God elan kasrel? Kut etu la el lungse meyen el pre nu sin Jeova: “Luti yu in oru ma lungse lom, tu kom God luk. Ku lom mwo; lela ma inge in kolyu.” (Sam 143:10, NW) Kut lungse pa ku lun God in kol kut. Efu? Kut fwa akuteye ke sripe akosr.
Kut Tia Ku In Kol Kut Sifwana
7, 8. (a) Efu ku kut tia ku in kol kut sifwana? (b) Me pupulyuk fuka kasre kut in kalem la efu kut enenu kolyuk lun God ke fwal koluk se inge?
7 Sripe se meet paenang kut lungse ku lun God in kol kut pa wangin ku lasr in kol kut sifwana. Kalmen in kol sie met pa in akkalemye nu sel inkanek sumwos elan fwasr we. Jeova el tia ase nu sesr ku in oru ma se inge ke ku lasr sifwana. A ke sripen kut sesumwos, kut oru ma tafongla puspus ke kut srike in kol kut sifwana. Met palu Jeremaia el simusla: “O Jeova, nga etu tu inkanek lun met tia on in el sifwana; tia ma lun met su fwasr in aksumwosye fwalkel.” (Jeremaia 10:23) A efu? Ke inkanek lal Jeremaia Jeova el akkalemye nu sesr sripeu, el fwak: “Inse kutasrik yok liki ma nu kemwa, a arulana koluk. Su ku in etu?”—Jeremaia 17:9; Mattu 15:19.
8 Srike nunku la sie met el enenu in fwasr ke sie an su arlana sensen a el tia arla etu, oana nu insaku. Tia mwo elan mukelana som, fwin wangin met su kolol ku orekmakin sie kampihs. Fwin met se inge el tia etu la mea el e oru in karungin moul lal in an se inge, a el nukin pa in koneak inkanek sumwos, moul lal e fwa oasr in sensen. Oayepa, met se su nunku mu el ku in kolol sifwana ke fwal koluk se inge, ke el tia lela God in akkalemye nu sel inkanek sumwos el oasr ke sensen yok. In oana Devid kut enenu pa in pre siyuk ke kasru sin Jeova. El fwak: “Fwalkuk srukye ku inkanek lom, fwalkuk tia sirirla.” (Sam 17:5; 23:3) Kut ku in eis fuka me kolyuk se inge?
9. In oana ke ma akkalemyeyuk in sra 11, ku lun God ku in kasre kut fuka ke inkanek mwo?
9 Kut fwin inse pusisel a inse mulala in fungfung nu sin Jeova, el fwa ase nu sesr ku lal in kol kut. Ku lun God inge fwa kasre kut fuka? Jisus el akuteye nu sin met tuma lutlut lal la ku lun God pa kasrelos in esam ma nukewa el luti nu selos. (Jon 14:26) Kut fwin pre a lutlutkin Kas lun God pal nukewa, wekunang me luti lun Kraist, ku lun God fwa kasre kut in kalem ke lalmetmet yok lun Jeova, tu kut ku in aksol. (1 Korint 2:10) Oayepa, fwin oasr luma a ma sikyak ke moul lasr su kut tia nunku ka, ku lun God fwa kasre kut in etu ma kut enenu in oru. Ku lun God fwa kasre kut in esam ke akwuk mwomwo lun Baibel su kut lotela tari a kasre kut in kalem la fuka kut ku in orekmakin ma inge in oru sulela mwomwo.
Ku lun God Kasrel Jisus
10, 11. Mea Jisus el tupan ke ku lun God in oru nu sel? Ku lun God kasrel fuka?
10 Sripe akluo paenang kut lungse ku lun God in kol kut pa ke sripen Mwen sifwana nutin God oasr pa kolyuk lun ma inge nu sel. Jisus el etu la el fwa eis kasru lun ku lun God ke pal se el oasr fwin fwalu. El etu ke kas palu se inge su simusyukla kel sifwana la ku lun Jeova, lalmetmet a etauk, papu a ku, etu a sangeng sin Jeova fwa on fwel. (Isaia 11:2) Moul lal Jisus fwin fwalu tia ma fusrasr nu sel. Srike lumala ke nunak lom la el lungse na paye me kasru su tuku ke ku lun God!
11 Kas lun Jeova akpayeyuk. Ma simusla lal Luk el akkalemye nu sesr la tia pat tokin baptais lal Jisus, el tingtingi ke ku lun God, foloko Jordan me, a ku lun God kololla nu yen mesis. (Luk 4:1) In an se inge, ke pal se Jisus el lalo, pre a sifwilpa nunku yok, kalem la Jeova el sang kas in kasru nu sel a akoella nu ke ma su e fwa sikyak. Ku lun God kasru nunak a insiel Jisus. Ma inge kasru oiyen nunak lal a sulela nukewa lal. Ke ma inge, Jisus el etu pal nukewa ma Papa tumal lungse elan oru, a el oru ma inge.
12. Efu ku kut enenu in siyuk ke ku lun God in kol kut?
12 Jisus el etu la ku lun God arlana yok sripe nu ke moul lal sifwana, paenang el kaifwe met tuma lutlut lal in siyuk ka, a lela ma inge in kololos ke moul lalos. (Ridi Luk 11:9-13.) Efu ku kut enenu in siyuk ke ku lun God in kol kut? Meyen ma inge ku in ekulla nunak lasr a kasre kut in oasr “nunak lun Kraist” yurosr. (1 Korint 2:16; Rom 12:2) Kalmen ma inge pa kut fwin lela ku lun God in kol moul lasr, kut ku in nunak oana ke ma Jisus el oru a etawi me srikasrak lal.—1 Piter 2:21.
Oiya lun Fwalu Ku in Kol Kut nu ke Inkanek Koluk
13. Mea se inge oiya lun fwalu? Mea ma inge oru nu sin metu?
13 Sripe aktolu paenang kut lungse ku lun God in kol kut pa ke sripen fwin wangin me kolyuk lun ma inge, oiya lun fwalu fwa kufuskutla nu ke inkanek koluk. Oiya lun fwalu kufusla apkuran met nukewa ke pal inge. Ma inge pa ku fokoko su kufusla metu in oru ma siena liki ma ku lun God kol kut in oru. Oiya lun fwalu oru metu in nunku a oru ma oana leum lun fwal se inge, Setan, a ma inge tia kasru metu in oasr nunak lun Kraist. (Ridi Efesus 2:1-3; Taitus 3:3.) Fwin sie met el lela oiya lun fwalu in kutongilye sifwana a el mutawauk in oru “orekma lun ikwe,” e fwa oasr fwako koluk puspus ka. Met se inge el “fah tia usrui tokosrai lun God.”—Galetia 5:19-21, LSK.
14, 15. Kut ku in lain fuka oiya lun fwalu?
14 Jeova el ase nu sesr ma kut enenu in lain oiya lun fwalu. Met sap Poul el fwak in eis “ku in Leum, a in ku lun ku Lal.” Efu? El fwak pa ouinge: “Tu komwos in ku in tu lain in len koluk.” (Efesus 6:10, 13) Ke inkanek lun ku lal, Jeova el ase nu sesr ku in lain orekma lal Setan in kufuskutla nu ke inkanek koluk. (Fwakyuk 12:9) Oiya lun fwalu el fokoko, a kut tia ku in fwasr liki ma inge ke inkanek nukewa. Tusruktu kut ku in lain ma inge. Ku lun God el fokoko liki oiya lun fwalu, a ma inge fwa kasre kut!
15 Met sap Piter el sramsramkin pa ke met puspus su som liki ma paye in pal meeta ke pal se el fwak: “Su fwasr liki inkanek sumwos, a tafongla.” (2 Piter 2:15) Kut ku in sang kulo meyen kut eis ku su tuku sin God a tia eis oiya lun fwalu. (1 Korint 2:12) Ke kut lela ku lun God in kol kut a ke kut orekmakin ma nukewa su Jeova el ase nu sesr in karungin fototo lasr nu sel in fokoko pal nukewa, kut ku in oru ma sumwos a lain oiya lun fwal koluk se inge.—Galetia 5:16.
Ku lun God Orala Fwako Mwomwo
16. Kain in fwako fuka ku lun God ku in orala ke moul lasr?
16 Sripe akakosr paenang kut lungse ku lun God in kol kut pa ke sripen ma inge orala fwako mwomwo ke moul lun met nukewa su oasr kolyuk lun ma inge. Kalme pa ku lun God kasrelos in akkalemye oiya mwomwo puspus. (Ridi Galetia 5:22, 23.) Paye la, kut nukewa lungse in akkalemye lungse yok, engun, a orek misla pal nukewa. Kut nukewa lungse in akkalemye mongfusrasr a in kulang a oiya mwo ke inkanek yok. Mwo nu sesr nukewa in oasr lulalfongi yok a akkalemye fwokpap ku inse pusisel a sifwana leumi. Oiya mwomwo nukewa inge kasre kut a met nukewa ke sou a congregation lasr. Kut enenu in kafweang in akkalemye fwako nukewa inge. Wangin saflaiyen lupan fwako lun ku lun God su kut enenu a ku in orala ke moul lasr.
17. Kut ku in kafweang fuka in akkalemye fwako lun ku lun God?
17 Mwo kut in nunku ke kusensiyuk se inge: Ya kas a orekma lasr akkalemye la ku lun God kol kut a kut orala fwako lun ma inge ke moul lasr? (2 Korint 13:5; Galetia 5:25) Na fuka kut fwin koneak la kut enenu in akkeye kutu oiya mwomwo ke fwako lun ku lun God? Kut ku in kafweang yok tu ku lun God in kol kut in akkalemye oiya mwomwo puspus inge. Kut enenu in nunku ke oiya su kut ku in akkalemye fwako lun ku lun God ke moul lasr len nukewa a kafweang in akkalemye ma inge.a Kut kalem ka la kut enenu na paye kasru lun ku lun God, ke kut liye fwako mwomwo su tuku ke kolyuk lun ma inge ke moul lasr a ke moul lun met lili wiyesr nukewa.
Ya Kom Lela Ku lun God in Kol Kom?
18. Mea kut ku in lotela ke me srikasrak lal Jisus ke el lela ku lun God in kolol?
18 Ke pal se God el orala kosrao a fwalu, Jisus pa “met orekma usrnguk” lal. Ke sripe se inge Jisus el etu ma nukewa ke akwuk lun macknet ke fwalu, ku se su kasru metu ke pal se elos orekmakin kampihs. (Soakas 8:30; Jon 1:3) Baibel el tia na akkalemye la Jisus el orekmakin akwuk lun macknet in kol inkanek lal ke pal se el oasr fwin fwalu. Tusruktu Baibel el akkalemye la ku lun God pa sie ku su arlana fokoko ke moul lal Jisus oana sie met. El lungse ku lun God in kolol. Ke pal se ku lun God kolol in oru ma se, el lungse me kolyuk lun ma inge a akpayeye. (Mark 1:12, 13; Luk 4:14) Ya kom lela ku lun God in kol kom oana ke ma Jisus el oru?
19. Mea kut enenu in oru tu ku lun God in kol kut?
19 Ke pal inge ku lun God srakna kol met nukewa su lungse me kolyuk lun ma inge nu selos. Kom ku in lela fuka ma inge in kol kom ke inkanek sumwos? Pre pal nukewa nu sin Jeova tu elan usot nu sum ku lal a kasre kom in eis kolyuk lun ma inge. (Ridi Efesus 3:14-16.) Kom in akkalemye la kom lungse ku lun God in kol kom ke kom lutlutkin Baibel, su oasr kasru lun God ka ke inkanek lun ku lal. (2 Timote 3:16, 17) Akos kas in kasru mwomwo su oasr ka a orekmakin me kolyuk lun ku lun God. Ke kom oru ma inge, kom akkalemye la oasr lulalfongi lom ke kuiyen Jeova in kol kom ke inkanek mwo emeet ke fwal koluk se inge.
[Footnote]
a Ke me akuteye ke kais sie fwako, liye Tauer in San ke April 15, 2011, sra 13-19, su oasr ke sifwe se inge “Fwako lun Ku lun God Sang Mwolana Nu sin God,” a ke sra 20-26, “Ya kom Lela Ku lun God in Kolkomi?” Liye pa September 1, 2003, sra 24-29, “Akkalemye Fulpap nu sin Met Nukewa,” a May 1, 2004, sra 19-23 “Toeni nu ke Etauk Lom Sifwana Leumi.”
Ya Kom Esam ke Me Lutlut Yok Sripe?
• Ku lun God ku in kasru fuka moul lasr?
• Mea sripe akosr ma paenang kut lungse ku lun God in kol kut?
• Kom ku in lela fuka ku lun God in kol kom ke inkanek sumwos?
[Petsac ke sra 11]
Ku lun God orekma ke nunak a insien metu in akkeyelos a kololos