“Akpwaryelos Nukewa Su Asor”
“Jeova el mosweyula . . . in akpwaryelos nukewa su asor.”—ISAIA 61:1, 2.
1. Mea Jisus el oru nu sin met puspus su asor? Efu?
JISUS KRAIST el fwak: “Me mongo nak in oru ma lungse lal su supeyume, a in aksafyela orekma lal.” (Jon 4:34) Jeova el sang nu sel Jisus sie orekma su el enenu in oru. Ke pal se Jisus el oru orekma inge, el akkalemye pa kain in lungse su Papa tumal el akkalemye. (1 Jon 4:7-10) Met sap Poul el sramsram ke sie inkanek su Jeova el akkalemye lungse inge ke el panglol “God lun parak nukewa.” (2 Korint 1:3) Jisus el akkalemye pa kain in lungse inge ke orekma in luti lal fwin fwalu, oana ma Isaia el palye. (Ridi Isaia 61:1, 2.) Jisus el orekmakin kas palu lal Isaia nu sel sifwana. (Luk 4:16-21) Ke orekma in luti lal, Jisus el akpwaryelos su asor, a sang nu selos me akkeye a misla.
2, 3. Efu ku met su fwasr tokin Jisus elos enenu in akkeye met puspus saye?
2 Met tuma lutlut nukewa lun Jisus elos enenu pa in akpwaryelos su asor. (1 Korint 11:1) Poul el fwak: “Komwos in akkeye sin sie sin sie, a musai sie sin sie.” (1 Tessalonika 5:11, NW) Metu elos enenu me akkeye meyen kut moul ke len safla su oasr kain in ongoiye puspus. (2 Timote 3:1) Met mwo puspus fwin fwalu nufon elos muta inmasrlon met su fwak a oru ma puspus su sripen me keok a asor yok.
3 In oana ke ma kas palu in Baibel el akkalemye nu sesr, ke len safla lun akwuk koluk puspus inge, oasr met puspus su “sifwana lungselos, elos fwa met lungse mani, met konkun, fulang, wenteis, seakos papa a nine, met tia sang kulo, tia mutal, tia lungse met in sou lalos sifwana, met silolel, met lesrik, tia sifwana leum fwelos, met lemnak, met su tia lungse ma mwo, met tukak, met likkeke, met mwan, met lungse me akengun yok liki lungse God.” A in oana ke ma Baibel el akkalemye, ke inkanek su met koluk elos nunku a orekma, a “fwa yokyokelik in ma koluk.”—2 Timote 3:2-4, 13.
4. Oiya fuka sikyak fwin fwalu ke pal lasr?
4 Ma inge tia aklutye kut, meyen Kas lun God el akkalemye la “fwalu nufon on ye ku lun el su koluklana.” (1 Jon 5:19, NW) Kas inge “fwalu nufon” kalmekin nu ke akwuk lun politic, akwuk lun alu, a akwuk lun business lun fwal se inge, oayepa kalmekin pa nu ke inkanek puspus su Setan el orekmakin in akkalemye nunak a akwuk puspus lal. Wangin alolo ka la Setan su Devil pa “leum lun fwalu” a “god lun fwal se inge.” (Jon 14:30; 2 Korint 4:4) Ma koluk su sikyak fwin fwalu yokyokelik meyen Setan el arlana mulat ke pal inge. El etu la fototo pal lula lal. (Fwakyuk 12:12) Sie me akkeye yok in etu la God el fwa tia lela Setan a akwuk koluk lal in oasr pal nukewa, a tia pat ma inge fwa wanginla. A kas kikiap su Setan el fwak in lain kolyuk fulatlana lun Jeova a fwa aksumwosyeyuk!—Genesis, sapta 3; Job, sapta 2.
Mwosasu Sulkakinyukelik Fwin Fwalu Nufon
5. Kas palu ke orekma in sulkakin mwosasu akpayeyuk fuka ke len safla inge?
5 Jisus el palye: “A mwosasu inge lun togusrai fwa sulkakinelik fwin fwalu nufon tu in ma lo nu sin mutanfwal nu kemwa; a na safla a fwa tuku.” (Mattu 24:14) In oana ke ma Jisus el fwak, met kulansap lun Jeova fwin fwalu nufon elos sulkakin mwosasu ke Togusrai lun God. Ke pal inge, pus liki 7,500,000 sin Met Lo lun Jeova su wi ke congregation 107,000 kutu elos oru orekma se inge. Jisus el sulkakin a luti ke Togusrai lun God, a met Lo lun Jeova elos oru pa orekma inge. (Mattu 4:17) Ke inkanek lun orekma se inge, elos sang me pwarak a me akkeye nu sin met puspus su asor. Ke lusen yea luo somla, oasr met 570,601 elos baptaisla oana met Lo lun Jeova!
6. Mea kom nunku ke kapkapek ke orekma lasr in sulkakin mwosasu?
6 Met Lo lun Jeova elos lungasla a kitela me rid puspus su tuku ke Baibel ke kas 500 kutu. Wangin kutena u saye su oru orekma se inge in pal somla! Fwinne elos oasr ke fwalu su Setan pa leumi, met kulansap lun Jeova elos moniyuk ke orekma in kulansap lalos nu sin God, a elos puseni. Ma inge tia ku in orek fwin wangin kasru a kolyuk lun ku lun God. Ke sripen peng mwo sulkakinyukelik fwin fwalu nufon, met su eis peng lun Togusrai elos ku in eis me pwarak a me akkeye su oasr yurin met kulansap lun Jeova.
Akkeye Met Lili Wiyesr
7. (a) Efu ku kut tia tupan Jeova in akwanginyela sripen me akasor nukewa ke pal inge? (b) Kut etu fuka la kut ku in muteng ke me kalyai a ongoiye?
7 Ke sripen kut muta ke sie fwalu su tingtingi ke ma koluk, paenang kut nukewa a fwa sun keok ke kutu oiya. Kut tia enenu in tupan God in akwanginyela ma nukewa su oru kut in asor meet liki el kunausla akwuk puspus inge. Ke kut sano nu ke len se inge, a fwa oasr me kalyai su ku in srufwe kut fwin kut sruokye oaru lasr nu sin Jeova a akfulatye kolyuk fulatlana lal ku tia. (2 Timote 3:12) Tusruktu ke kasru a me akkeye su tuku sin Papa tumasr su in kosrao, kut ku in etawi met Kristian akmusrala in an Tessalonika in pal meeta, su akkalemye “mongfusrasr a lulalfongi” ke pal in me kalyai a ongoiye puspus.—Ridi 2 Tessalonika 1:3-5.
8. Baibel el akkalemye fuka la Jeova el akkeye met kulansap puspus lal?
8 Paye la Jeova el sang nu sin met kulansap nukewa lal me akkeye su elos enenu. Ke sie me pupulyuk, ke pal se mutan kasra se inge Jesebel el lungse in uniye met palu Elaija, el arlana sangeng a kaengla. El fwak pa la el lungse in mise. Jeova el tia fwak mu tia mwo ma Elaija el oru, a el akkeyel a akpulaikyel in tafwela in oru orekma lal oana sie met palu. (1 Togusra 19:1-21) Siepa me pupulyuk ke orekma lun Jeova in akkeye met kulansap lal pa ke el kasru congregation in pal lun met sap puspus. Baibel el akkalemye la congregation in an Judea, a Galili a Samaria elos engankin sie pal in misla a musaiyukyak elos. A “ke elos fwasr in sangeng sin Jeova a ke me pwarak su tuku ke ku lun God, elos puselik.” (Orekma 9:31, NW) Kut arlana engun pa in eis me akkeye lun ku lun God!
9. Efu ku ma kut lotela kel Jisus ku in akpwarye a akkeye kut?
9 In oana met Kristian, kut akkeyeyuk ke kut lotela kel Jisus Kraist a in etawi me srikasrak mwomwo lal. Jisus el fwak: “Fwasru nu yuruk, komwos su orekma a totola, tu nga fwa sot mongla nu suwos. Eis srenena luk nu fowos a lutlut sik, tu nga fwokpap a inse pusisel, a komwos fwa koneak mongla. Tu srenena luk fusrasr, a mwe utuk luk mulala.” (Mattu 11:28-30, LSK) Kut fwin lotela ke inkanek mwomwo wi kulang su Jisus el oru nu sin metu, a kut kafweang in etawi ma el oru, na kut ku in eis me akkeye ke me fosrnga su kut pula.
10, 11. Su ke congregation ku in sang me pwarak ku me akkeye?
10 Kut ku pa in eis me akkeye sin met puspus ke congregation. Ke sie me pupulyuk, nunku ke inkanek mwo su met elder elos ku in kasru met lili puspus su lulalfongi lalos munasla. Jemes el simusla: “Ya kutu yurumwos el mas? Lela lan soloeni met elder lun congregation, a elos in pre kel.” Mea me kasru lalos inge ku in oru? “A pre lun lalalfongi fwa akkeyela met mas se, a Jeova el fwa taksalak. A el fwin oru ma koluk, a fwa nunak munas nu sel ka.” (Jemes 5:14, 15, NW) Tusruktu tia met elder mukena ke congregation ku in akkeye kut.
11 Mutan elos koneak la fusrasr in sramsramkin ma upa lalos nu sin mutan pa na. Mutan Kristian su matu a oasr etauk yok ke moul ku in sang kas in kasru mwomwo nu sin mutan Kristian fwusr. Mutan Kristian matu inge saap elos sun pa oiya upa puspus oana mutan fwusr elos sun ke moul lalos. Ke elos long a nunku kelos, elos ku in sang kasru yok nu sin sister fwusr puspus. (Ridi Taitus 2:3-5.) Aok, met elder a met Kristian saye elos ku a enenu in kaskaskin kas in akkeye nu sin met lili puspus su pulakin asor a munas inse. (1 Tessalonika 5:14, 15) A mwo in esam la God el “akpwarye kut in keok lasr nukewa, tu kut fwa ku in akpwaryelos su muta in kutena keok.”—2 Korint 1:4.
12. Efu ku yok sripe in wi ke miting nukewa?
12 Sie inkanek yok sripe in eis me akkeye pa in wi ke miting nukewa lun congregation. Me lutlut mwowo su tuku ke Baibel su kut long ke miting nukewa ku in akkeye kut. Kut rid in Baibel la Judas a Sailas elos “kaifwe met lili ke kas puspus a akkeye insielos.” (Orekma 15:32) Meet liki a tokin meeting lasr, oasr me sramsram mwomwo inmasrlon met lili ke congregation su ku in akkeyelos. Ke ma inge fwinne kut keok ke sripen sie ma upa, mwo in orekmakin pal yurin met Kristian wiyesr. Kut fwin sifwana srikutla lukelos ma inge tia ku in kasre kut. (Soakas 18:1) A, kut enenu in oru ma met sap Poul el fwak: “Lela kut in nunku ke sie sin sie in akkeye kut nu ke lungse a orekma mwo, a kut in tia likiye tukeni nu sie lasr in alu, oana lia lun kutena, a kut in kaifwe sie sin sie, a akyokye, oana komwos liye tu len apkuran me.”—Hibru 10:24, 25.
Baibel el Ase Nu Sesr Me Akkeye
13, 14. Ke inkanek puspus fuka ma Simusla el ku in akkeye kut?
13 Kut fwin sie met Kristian su baptaisla tari ku kut tufwana mutawauk in lutlut ke God a ke akwuk lal, kut ku in eis me akkeye yok ke Baibel. Poul el simusla: “Tu ma nu kemwa su simusla meet simla in luti kut, tu ke mongfusesr a parak lun ma simusla fwa oasr fwinsrak lasr.” (Rom 15:4) Baibel el ku in akkeye kut a oru kut in arlana fwal a “sumwosna, a akola fwal nu ke orekma mwo nu kemwa.” (2 Timote 3:16, 17) Kut ku in eis etauk ke ma paye ke akwuk lun God a fwinsrak paye ke pal fwasru ke kut rid a lutlutkin Baibel a me rid nutusr nukewa. Kut fwin oru ma inge, kut ku in eis me akkeye a ma lane puspus su tuku ke fwinsrak mwomwo in Baibel.
14 Jisus el ase nu sesr sie me srikasrak mwomwo ke el orekmakin ma Simusla in luti a akkeye met puspus. Tokin sifwil moulyuk lal, Jisus el sikyak nu sin met tuma lutlut luo lal. Jisus el akuteye kalem ma Simusla nu selos. Paye la ma inge akkeyelos. (Luk 24:32) Met sap Poul el etawi me srikasrak mwomwo lun Jisus a el orekmakin ma Simusla in akuteye a sang me top mwomwo nu sin met puspus. In an Berea, met nukewa su longol elos “eis kas inge ke insielos kemwa, a suk in ma Simusla len nu kemwa.” (Orekma 17:2, 10, 11) Ke ma inge arlana yok sripe kut in rid Baibel len nukewa a me rid puspus nutusr a lela ma inge in kasre kut! Ma inge ase nu sesr me akkeye a fwinsrak mwomwo ke pal inge su oasr ma upa puspus.
Kutupa Inkanek in Akkeye Met Lili Puspus
15, 16. Mea kutu ma su kut ku in oru in kasru a akkeye met lili wiyesr?
15 Oasr ma puspus su kut ku in oru in kasru a akkeye met lili wiyesr. Ke sie me pupulyuk, kut ku in som nu ke sto in sang kasru moli ma enenu lun met lili wiyesr su matou tari ku mas. Kut ku in kasru pa met lili ke orekma su elos enenu in oru ke loom selos. Ma inge akkalemye la kut nunku kelos. (Filippai 2:4) Kut ku in fwak nu sin met lili wiyesr la kut kaksakin a aksaokye oiya mwo puspus lalos, oana lungse, pulaik, a lulalfongi.
16 Ma se su kut ku in oru in akkeye met lili su matuo tari pa in muteta nu yurolos a long ke elos fwak nu sesr ma sikyak mwomwo ke moul lalos in pal somla a ke me insemwomwo su elos eis ke orekma in kulansap nu sin Jeova. Ke sripe inge, elos ku in akkeye a akpwarye kut! Saap kut ku in rid Baibel a me rid puspus nutusr nu selos su kut muteta nu yuro. Saap kut ku in lutlutkin nu selos me lutlut ke Tauer in San ku me lutlut ke Lutlut lun Congregation ke Baibel ke wik san. Kut ku in welulos in liye sie DVD lasr su fwal nu ke Baibel. A kut ku in rid ku srumon nu selos kutu experience mwomwo su akkalemyeyuk ke me rid puspus nutusr.
17, 18. Efu kut ku in lulalfongi na paye la Jeova el fwa kasru a akkeye met kulansap oaru nukewa lal?
17 Kut fwin etu la sie brother ku sister wiyesr el enenu me akkeye, kut in pre kelos. (Rom 15:30; Kolosse 4:12) Kut fwin keok ke sripen ma upa puspus a ke pal se kut kafweang in akkeye met lili puspus, kut ku in akkalemye pa lulalfongi oana ke ma Devid el oru: “Filiye me utuk lom fwin Jeova, a el a fwa kasre kom. El koflana filiye met sumwosmwos tu in mukuikui.” (Sam 55:22) Jeova el fwa akkeye a kasre kut pal nukewa oana met kulansap oaru lal.
18 God el fwak nu sin met kulansap nukewa lal in pal meeta: “Nga, aok nga pa su akkeye komwos.” (Isaia 51:12, NW) Jeova el fwa oru ouinge nu sesr a el fwa akinsemwomwoye kafweang lasr in akkeye met lili puspus. Ke kutena fwinsrak su oasr yurosr, kais sie sesr ku in eis me akkeye yok ke kas lal Poul nu sin met Kristian akmusrala in pal lal: “Inge Jisus Kraist Leum lasr sifwana, a God Papa tumasr, su lungse kut a ase nu sesr parak ma patpat, a fwinsrak mwo ke lungkulang, lan akparye insiomwos a akkeye nu ke orekma a kas mwo nu kemwa.”—2 Tessalonika 2:16, 17.
Ya Kom Esam?
• Fuka lupan orekma in sulkakin peng mwo lasr?
• Mea kutu ma su kut ku in oru in akkeye met puspus?
• Baibel el akkalemye fuka la Jeova el akkeye met kulansap nukewa lal?
[Petsac ke sra 18]
Ya kom wi in akkeye met puspus su asor yok?
akkalemye fuka la Jeova el akkeye met kulansap nukewa lal?
[Petsac ke sra 20]
Met fwusr a met matu ku in akkeye sie sin sie