Lulafongi Yok nu sin Jeova Oru Kut in Tu Ku a Tia Sangeng
“Jeova el a fwa long, ke nga pang nu sel.”—SAM 4:3.
1, 2. (a) Me sensen fuka sikyak nu sel Devid? (b) Kut fwa lutlutkin sam luo fuka?
TOGUSRA DEVID el kol Israel ke lusen yea puspus, tusruktu ke pal se inge oasr sie oiya su arlana sensen sikyak. Tulik se natul inge su pangpang Absalom el sifwana oral in sie togusra, a Devid el enenu in som liki an Jerusalem. Sie sin met kawuk fototo lal su orekma oana met papu lal wi met su lainul. A inge Devid a kutu sin met su oaru nu sel elos welul, a el tung ke el fwasr som nu Eol Olif . Sayen ma inge, oasr sie mokul su pangpang Simeai, sie met in sou lal Togusra Soul, el tanglal Devid a sis kutkut nu sel ke pal se el selngawi el.—2 Samuel 15:30, 31; 16:5-14.
2 Ya oiya koluk se inge fwa oral Devid in mise a pulakin me mwekin yok? Mo, meyen el lulalfongi Jeova. Ma inge arlana kalem ke Sam aktolu, su Devid el simusla ke pal se el kaengla lukel Absalom. El simusla pa Sam akakosr. Ma simusla luo inge akkalemye ke lulalfongi yok la God el long a topuk pre lun met kulansap puspus lal. (Sam 3:4; 4:3) Sam luo inge akkeye kut la Jeova el wi met kulansap oaru nukewa lal len a fong, el akinsemwomwoyelos ke inkanek lun kasru lal, a el sang pa misla a karunginelos liki me sensen. (Sam 3:5; 4:8) Ke ma inge, lela kut in lutlutkin sam luo inge a lela kut in liye la fuka ma inge akkeye lulalfongi lasr nu sin God.
Fwin Oasr ‘Met Puspus su Lain Kut’
3. In oana ke ma akkalemyeyuk in Sam 3:1, 2, ma upa fuka Devid el sun?
3 Sie sin met roso el fwak ouinge: “Insien met Israel oelul Absalom.” (2 Samuel 15:13) Devid el nunku la fuka Absalom el oru met puspus in welul, a el siyuk: “O Jeova, met lokwalok luk elos puselik! Met puspus elos tuyuk lain yu. Oasr met puspus su fwak ke ngunik: ‘Wangin me kasru lal in God.’” (Sam 3:1, 2) Oasr met Israel puspus su nunku mu Jeova el fwa tia molella Devid liki me lokwalok se inge su Absalom a met nukewa su welul elos oru.
4, 5. (a) Devid el lulalfongi na paye ke mea? (b) Mea kalmen pulo kas inge “el su kekakunak sifwuk”?
4 Tusruktu Devid el tia fosrngala meyen oasr lulalfongi paye lal nu sin God. El on a fwak: “A kom, O Jeova, kom me loeyuk nu sik, mwolanu luk a El su kekakunak sifwuk.” (Sam 3:3) Devid el lulalfongi la Jeova fwa loangella oana sie me loeyuk su sang me karungin nu sin sie met meun. Aok, togusra se inge su matu tari el kakaeng, oasr me afwunye fwin sifwel a suwoli ke mwekin yok. Tusruktu God su Fulatlanu el fwa ekulla ma upa su sikyak nu sel Devid nu ke ma mwolanu. Jeova el fwa oral in tu sumwos, a in sifwil pa keyuk sifwel. Devid el pang nu sin God wi lulalfongi yok lal la God el fwa topkol. Ya kom akkalemye pa kain in lulalfongi inge nu sin Jeova ke inse kewa lom?
5 Ke pulo kas inge “el su kekakunak sifwuk,” Devid el etu a akilen la Jeova e fwa kasrel. Leng lun Baibel se inge Today’s English Version orekmakin kas inge: “Tusruktu, O LEUM, kom me loeyuk luk liki me sensen pal e nukewa; kom ase nu sik kutangla a kom sifwilpa akpulaikyeyu.” Ke pulo kas inge “el su kekakunak sifwuk,” oasr sie buk akkalemye me akuteye inge: “Fwin God el keyuk . . . ‘sifwen sie met, kalmen ma inge pa el oru sie met in oasr fwinsrak a lulalfongi yok.” Ke sripen el enenu in som liki tron lal oana togusra lun Israel, pa inge sie sripe paenang Devid el asor yok. Ne ouinge, ‘orekma inge in kekakunak sifwel’ e fwa sifwilpa akpulaikyel, in oasr lulalfongi yok nu sin God.
‘Jeova El Fwa Topuk!’
6. Efu ku Devid el siyuk sin Jeova elan topuk pre lal liki eol mutal lal?
6 Devid su oasr lulalfongi yok nu sin Jeova el fwak pa: “Nga pang nu sin Jeova ke pusrek, a el topuk nu sik liki eol mutal sel.” (Sam 3:4) Devid el sapkin la tuptup in mwuleang, su lumeyuk nu ke oasr lun God, utukla nu fwin Eol Saion. (Ridi 2 Samuel 15:23-25.) Ke ma inge, arlana fwal ke Devid el siyuk sin Jeova elan topuk pre lal liki eol mutal lal.
7. Efu ku Devid el tia pulakin sangeng?
7 Devid el lulalfongi la pre lal nu sin God fwa tia ke wangin sripe, a el tia pulakin kutena sangeng. A, el simusla kas inge ke on soko lal: “Nga onnu a motul; nga ngutalik, tu Jeova el karungin yu me.” (Sam 3:5) Devid el tia sangeng in motul fwinne ke fong su oasr me sensen yok la met lokwalok lal fwa tuku in akkolukyel. El lulalfongi la el fwa ngetalik, meyen el etu ke sripen ma sikyak nu sel sifwana in pal somla la el ku in lulalfongi ke kasru lun God pal nukewa. Kut ku in lulalfongi la God fwa karungin kut fwin kut kafweang in fwasr pal nukewa ke “inkanek lun Jeova” a tia som lukel.—Ridi Samuel 22:21, 22.
8. Sam 27:1-4 el akkalemye fuka la Devid el lulalfongi nu sin God?
8 Lulalfongi yok lal Devid nu sin God arlana kalem ke siepa sam su el simusla, su kas inge akkalemyeyuk ka: “Jeova el kalem luk a lango luk. Su nga a fwa sangeng se? Jeova el kuiyen moul luk. A su nga a fwa sangeng se? . . . Sie u lulap fwinne mwalili in lain yu, insiuk fwa tia sangeng. . . . Nga siyuk sie ma sin Jeova, ma se inge nga e fwa suk, tu nga fwa ku in muta in loom sin Jeova in len nukemwa in moul luk, in liye mwoiyen Jeova, a in siyuk in temple lal.” (Sam 27:1-4) Kom fwin nunku pa ouinge a pal a ma sikyak nu sum lela kom in oru, kom e fwa wi pal nukewa ke tukeni lun congregation wi met lili in alu nu sin Jeova.—Hibru 10:23-25.
9, 10. Ke kas su akkalemyeyuk in Sam 3:6, 7, efu kut ku in fwak mu Devid el tia lungse in foloksak?
9 Devid el pula ma upa ke sripen orekma in lain lal Absalom a oasr met puspus su seoaru nu sel, ne ouinge el akkalemye kas inge ke on lal: “Nga fwa tia sangeng ke met siengoul tausen puspus selos su tuyuk apinyula in lain yu. Tuyuk, O Jeova! Moliyula, O God luk! Tu Kom sringil likin tupan met lokwalok luk nu kemwa. Kom kotalik mwusin met koluk.”—Sam 3:6, 7.
10 Devid el tia lungse in foloksak. Fwin met lokwalok lal ‘sringilyuk likin tupalos,’ God fwa oru ma inge a tia el. Togusra Devid el orala a simusla pa sie copy ke Masap a ke ma inge el etu la Jeova el fwak: “Foloksak ma luk, a sifwil moli.” (Duteronomi 17:14, 15, 18; 32:35) Oayepa ma sin God in ‘kotalik mwusin met koluk.’ Orekma se inge in kotalik mwuselos ku in oralos in wangin ku lalos in oru ma koluk. Jeova el etu la su met koluk meyen el “liye inse.” (1 Samuel 16:7) Kut lungse na paye in sang kulo meyen God el ase nu sesr lulalfongi a ku in tu ku in lain met koluklana, Setan, su ke pal na fototo fwasru fwa filiyuki nu in abyss oana soko laion ngutngut su wangin mwis a fwal mukena nu ke kunanela!—1 Piter 5:8, 9; Fwakyuk 20:1, 2, 7-10.
“Molela Ma lun Jeova”
11. Efu ku kut enenu in pre ke met lili wiyesr?
11 Devid el etu a akilen la Jeova mukena ku in oru me molela su el enenu na paye. Tusruktu met sim lun sam se inge el tia nunku kel sifwana. Na fuka ke met kulansap nukewa lun Jeova? Arlana fwal, Devid el aksafyela on soko lal inge ke kas inge: “Molela ma lun Jeova. Insemwomwo lom in on fwin met Sram.” (Sam 3:8) Aok, oasr ma upa puspus lal Devid, tusruktu el nunku pal nukewa ke met lun Jeova nukewa a el lulalfongi la God el fwa akinsemwomwoyelos. Ya kut tia pa nunku ke met lili wiyesr pal nukewa? Lela kut in esamelos ke pre lasr, siyuk sin Jeova in sang nu selos ku lal tu elos ku in akpulaikyelos a in akkalemye pa lulalfongi yok lalos ke elos sulkakin peng mwo.—Efesus 6:17-20.
12, 13. Mea sikyak nu sel Absalom, a oiya fuka Devid el akkalemye?
12 Moul lal Absalom aksafyela ke me mwekin yok, sie me sensen nu sin met nukewa su lungse in akkolukye met puspus saye, yokna met akmusrala puspus lun God, oana Devid. (Ridi Soakas 3:31-35.) Meun in pal san orek, a Absalom a un met meun lal elos kuf. Absalom el kasrusr fwin ors soko natul tusruktu aunsifwel su arlana loes a matoltol sremla ke laa lukwe ke soko sak lulap. Ke ma inge el atla nu lung, srakna moul tusruktu el sremla ka wangin met kasrel, nu ke pal se Joab el unilye ke el fwakisye insiel ke mwusra tolgwe.—2 Samuel 18:6-17.
13 Ya Devid el engun ke pal se el long ke ma sikyak nu sin mwen natul? Mo. El fwasrot fwasru luun loomu, el tufwal, a el tung ma lulap: “O Absalom mwen nutik, mwen nutik, Absalom mwen nutik! Ke ngan mise keyum, O Absalom mwen nutik, mwen nutik!” (2 Samuel 18:24-33) El akwanginyela asor yok lal ke pal se Joab el kaskas nu sel. Paye la saflaiyel Absalom el tia mwo, su nunak insefulat lal moklel in lain papa tumal, su met akmusrala lun Jeova, a el oru ongoiye nu sel sifwana!—2 Samuel 19:1-8; Soakas 12:21; 24:21, 22.
Devid el Sifwilpa Akkalemye Lulalfongi nu sin God
14. Mea kut ku in fwak ke Sam akakosr?
14 In oana ke Sam aktolu, Sam akakos el sie pre lal Devid su sang me akpayeye la oasr lulalfongi yok paye lal nu sin Jeova. (Sam 3:4; 4:3) Saap Devid el simusla on soko inge in akkalemye inse misla lal a kulo lal nu sin God tokin Absalom el tia kutangla ke orekma in lainul. Ku el simusla ma inge ke el nunku ke met Livai su wi ke un met on. Ke oiya luo inge, orekma lasr in sifwilpa nunku ka ku in akkeye lulalfongi lasr nu sin Jeova.
15. Efu kut ku in pre nu sin Jeova wi lulalfongi yok lasr ke inkanek lun Mwen natul?
15 Devid el sifwilpa akkalemye lulalfongi yok lal nu sin God a el akkalemye la el lulalfongi pa la God el long a topuk pre lal. El simusla kas inge: “Topuk nu sik ke nga pang, O God lun sumwosmwos luk. Kom tulayula ke nga muta in ongoiye. Pakomutuk a long pre luk.” (Sam 4:1) Kut ku in akkalemye pa kain in lulalfongi inge kut fwin oru ma sumwosmwos pal nukewa. Ke sripen kut etu la Jeova, su “God lun sumwosmwos,” el akinsemwomwoye met sumwosmwos nukewa lal, kut ku in pre nu sel ke inkanek lun Mwen natul wi lulalfongi yok ke me kise lun lango lun Jisus. (Jon 3:16, 36) Paye la ma inge ase misla yok nu sesr!
16. Efu ku Devid el munasla?
16 Oasr pal, saap kut sun sie oiya su oru kut in munasla su ku in akwanginyela lulalfongi lasr. Kain in oiya se inge saap sikyak pa nu sel Devid, meyen el akkalemye kas inge ke on lal: “O komwos mwen nutin met, putaka mwolanu luk fwa ikulyukla nu ke me mekin? Putaka komwos fwa lungse ma lusrongten, a suk ma kikiap?” (Sam 4:2) Kalem la pulo kas inge “mwen nutin met” el kalmekin nu ke sie oiya tia mwo ke met. Met lokwalok lal Devid elos ‘lungse ma lusrongten.’ Leng lun Baibel se inge New International Version el lungusla fus se inge oana: “Putaka kom lungse ma puspus su tia paye a suk ke god kikiap puspus?” Kut fwin munasla ke sripen ma met saye elos oru, lela kut in kafweang in pre a akkalemye lulalfongi yok nu sin God paye mukefwanna.
17. Akuteye la fuka kut kut ku in oru ma puspus fwal nu ke Sam 4:3.
17 Lulalfongi lal Devid nu sin God arlana kalem ke kas inge: “A komwos in etu tu Jeova el srella su mwo nu sel sifwana; Jeova el a fwa long, ke nga pang nu sel.” (Sam 4:3) Oiyen pulaik a lulalfongi yok nu sin Jeova eneneyuk tu kut in ku in sruokye oaru lasr nu sel. Ke sie me pupulyuk, oiya mwomwo eneneyuk sin sie sou lun met Kristian ke pal se oasr met in sou su sisila liki congregation. God el akinsemwomwoyelos su oaru nu sel a ke inkanek lal. Ke ma inge, oiyen oaru a lulalfongi yok nu sin Jeova el akkeye insemwomwo inmasrlon met lal nukewa.—Sam 84:11, 12.
18. In fwal nu ke Sam 4:4, mea kut enenu in oru fwin oasr met su kaskas tia mwo a oru ma koluk nu sesr?
18 Na mea fwin sie met el fwak ku oru ma puspus su aktoasrye kut? Kut ku in sruokye engun lasr kut fwin oru ma Devid el fwak: “Kom in fosrngala, a nikmet orek ma koluk. Nunkauk ke insiom sifwana fwin me on kiom, a misla.” (Sam 4:4, NW) Fwin oasr met puspus su kaskaskin kas upa ku oru ma koluk nu sesr, lela kut in tia oru ma koluk ke kut folokin ma koluk lalos. (Rom 12:17-19) Kut ku in akkalemye nunak a pulakin lasr ke inkanek lun pre ke kut muta ke me on kiyesr. Kut fwin pre ke ma se su sikyak, kut ku in ekulla nunak lasr ka a kut ku in eis me akkeye in sang nunak munas ke sripen lungse lasr. (1 Piter 4:8) Arlana mwo kas in kasru lun met sap Poul ka, su kalem la fwal nu ke Sam 4:4: “Komwos in mulat, a tia orek ma koluk; tia lela fwatu in tili fwin mulat lomwos, a komwos in tia sang an sin Devil.”—Efesus 4:26, 27.
19. Fuka Sam 4:5 kasre kut ke orekma lasr in alu nu sin God?
19 Devid el akkalemye ma enenu in lulalfongi nu sin God, el akkalemye kas inge ke on lal: “Kisekin me kise lun sumwosmwos, a filiye lalalfongi lom in Jeova.” (Sam 4:5) Me kise su met Israel elos sang nu sin God oasr sripe a saok fwin oasr nunak a inse mwo lun met su sang. (Isaia 1:11-17) Kut fwin lungse orekma in alu lasr nu sin God in me akinsemwomwoye nu sel, kut enenu pa in akkalemye nunak mwomwo a kut in lulalfongi nu sel ke inkanek yok.—Ridi Soakas 3:5, 6; Hibru 13:15, 16.
20. Mea kalmen pulo kas inge ‘kalem lun mutun Jeova’?
20 Devid el fwak pa: “Oasr met puspus su fwak: ‘Su a fwa fwakak nu sesr kutena ma mwo?’ O Jeova, Kom in srekuti ke kalem lun mutom.” (Sam 4:6) Pulo kas inge ‘kalem lun mutun Jeova’ el akkalemye ke me insemwomwo lun God. (Sam 89:15) Ke ma inge, ke pal se Devid el pre: “Kom in srekuti ke kalem lun mutom,” kas lal inge kalmekin la God ‘in akkalemye insemwomwo lal nu sesr.’ Meyen kut lulalfongi nu sin Jeova, el insemwomwo kesr a kut pulakin engun yok ke kut oru ma lungse lal.
21. Ke mea kut lulalfongi kut fwin wi pal nukewa ke orekma in sulkakin peng mwo ke pal inge?
21 Ke pal se Devid el ngetuk nu ke pal fwasru ke engun a insemwomwo su tuku sin God su mwo liki me insemwomwo ke pal in kosrani, el onkin on soko inge nu sin Jeova: “Kom filiye engun insiuk, yok liki ma on yurolos ke korn a wain sasu lalos yokelik.” (Sam 4:7) Kut ku in lulalfongi la kut e fwa pulakin engun yok kut fwin wi pal nukewa ke orekma in sulkakin peng mwo ke pal inge. (Luk 10:2) Ke sripen un met akmusrala su lumeyuk oana sie ‘mutunfwal su oasr met pus ka’ elos kol ke orekma saoklana inge, kut engun yok meyen pisen ‘met kosrani’ yokyokelik ke pal inge. (Isaia 9:3) Ya kom insemwomwo in wi ke orekma in kosrani mwomwo inge?
Kafweang in Fwasr nu Meet Wi Lulalfongi Yok nu sin God
22. In nunku ke Sam 4:8, mea sikyak nu sin met Israel ke elos akos masap lun God?
22 Devid el aksafyela sam inge ke kas inge: “Nga fwa onnu a motul in misla; tu Kom mukena, O Jeova, ore yu in muta in moul a wangin sensen.” (Sam 4:8, NW) Ke pal se met Israel elos akos masap lun Jeova, elos engunkin misla yurin God a elos moulkin moul mwomwo su wangin me sensen. Ke sie me pupulyuk, ‘met Juda a met Israel elos muta in misla ke lusen pal in kolyuk lal Solomon.’ (1 Togusra 4:25) Met nukewa su lulalfongi nu sin God elos engunkin misla fwinne mutunfwal puspus su raunelosla arlana koluk a sensen. In oana Devid kut motul mwo a misla meyen God el oru kut in pulakin mwo a wangin sensen.
23. Mea e fwa sikyak nu sesr fwin oasr lulalfongi lasr nu sin God ke inse kewa lasr?
23 Lela kut in kafweang in fwasr nu meet ke orekma in kulansap nu sin Jeova. Lela kut in pre pa wi lulalfongi a ke ma inge pulakin “misla lun God su alukela ma eteyuk nukewa.” (Filippai 4:6, 7) Paye la ma inge ase nu sesr engun yok! A kut ku in tu ku ke ma nukewa su fwa sikyak ke pal fwasru kut fwin akkalemye lulalfongi nu sin Jeova ke inse kewa lasr.
Kom E Topuk Fuka?
• Ma upa fuka sikyak nu sel Devid ke sripen orekma lal Absalom?
• Fuka Sam ak 3 el akkeye lulalfongi lasr?
• Ke inaknek fuka Sam ak 4 ku in akkeye lulalfongi lasr nu sin Jeova?
• Me insemwomwo fuka ku in tuku ke lulalfongi nu sin God ke inse kewa lasr?
[Petsac ke sra 21]
Fwinne ke pal se el kaengla lukel Absalom, oasr lulalfongi yok lal Devid nu sin Jeova
[Petsac ke sra 24]
Ya kom akkalemye lulalfongi nu sin Jeova ke inse kewa lom?