Su Ma Yok Sripe Emeet ke Moul Lom?
“Kom mukena . . . El su Fulatlanu fwin fwalu nafon.”—SAM 83:18.
1, 2. Ke molela lasr sifwana, efu ku oasr pa ma eneneyuk saye liki na in etu inen Jeova?
SAAP pal se meet kom liye inen Jeova pa ke pal se oasr met su akkalemye nu sum Sam 83:18. Saap kom arlana lut ke pal se kom rid kas inge: “Tu elos fwa ku in etu tu kom mugena, su em pangpang Jeova, kom el su Fulatlanu fwin fwalu nafon.” Mutawauk in pal san, wangin alolo ka la kom orekmakin ma simusla se inge in kasru met puspus in etu Jeova, God lasr su kulang a mwo.—Sam 83:18.
2 Paye la arlana yok sripe nu sin met in etu inen Jeova, tusruktu oasr pa ma eneneyuk saye liki na in etu inel. Loang akmwoye la fuka met sim lun sam el akkalemye yok siepa ma paye su yok sripe nu ke molela lasr: “Kom mukena . . . el su Fulatlana fwin fwalu nafon.” Aok, Jeova el sie su yok sripe emeet in kosrao a fwin fwalu nufon. Oana God su orala ma nukewa, oasr sumwos lal in sapkin ma orekla nukewa in aksol a akpusiselyelos nu sel. (Fwakyuk 4:11) Ke sripe mwomwo se inge, kut enenu in siyuk sesr sifwana la, ‘Su ma yok sripe emeet ke moul luk?’ Arlana yok sripe kut in tuni akmwoye me top lasr nu ke kusensiyuk se inge!
Kusensiyuk Yok su Akkalemyeyuk in Imae Eden
3, 4. Fuka Setan el kiapella If, a mea sikyak?
3 Yok sripaiyen kusensiyuk inge ku in liyeyuk kalem ke ma sikyuk ke imae Eden in pal meeta. Oasr sie lipufan su lungse in lain a tok el eteyuk oana Setan su Devil el kiapela mutan se meet se inge su pangpang If, in akkeye kena lal sifwana liki na in akos masap lun God in tia mongo ke fwako lun soko saku. (Genesis 2:17; 2 Korint 11:3) El fuleak nu ke me srufwe se inge a ke ma inge el tia akkalemye sunak nu ke kolyuk lun Jeova. If el tia nunku kel Jeova oana Sie su yok sripe emeet ke moul lal. Tusruktu ke inkanek fuka Setan el kiapella If?
4 Setan el orekmakin me sruf puspus su arlana kutasrik ke el sramsram nu sel If. (Ridi Genesis 3:1-5.) Ma se meet, Setan el tia orekmakin inen Jeova. El fwak mukena “God.” Ke oiya saye, met sim lun Genesis el orekmakin inen Jeova ke fus se meet lun sapta san. Ma se akluo, el tia sramsramkin “masap” lun God, tusruktu Setan el siyuk ke ma God el “fwak” tari. (Genesis 2:16) Ke inkanek lun oiya kutasrik se inge, Setan el srike in akkalemye la masap se inge el tia yok sripe nu sel. Ma se aktolu, el kaskas mukena nu sel If, ne ouinge el orekmakin kas se inge “komtal.” Ke el oru ma inge, saap el kafweang in oru mutan se inge in nunku mu el arlana saok, oana el pa met kaskas lal sifwana a lun mokul tumal. Mea fwokin ma inge? Kalem la If el akkalemye oiyen fulang ke pal se el sifwana oru sulela lal a nu sin mokul tumal ke el fwak nu sin serpent soko: “Kut ku in mongo ke fwokin sak in ima se inge.”
5. (a) Nu ke mea Setan el kufusella If in loang akmwoye ka? (b) Mea If el akkalemye ke pal se el kang fwokin sak su God el sapkin nu selos in tia mongo?
5 Setan el akkuye ma paye. El fwak mu God el tia mwo ke el sapkin nu sel Adam a If in tia “mongo ke sak nukewa in imae se inge.” Tokin ma inge, Setan el kufusella If in nunku kel sifwana a la fuka el ku in akmwoye oiyen moul lal, in ekla “oana God.” Ke saflaiye, Setan el oral in nunku yok ke saku a ke fwako ka, a tila ke fototo lal nu sin Sie su sang nu sel ma nukewa. (Ridi Genesis 3:6.) Sie me asor, ke el kang fwokin sak se, If el akkalemye la tia Jeova pa Sie su yok sripe emeet ke moul lal.
Kusensiyuk Yok su Sikyak in Len lal Job
6. Fuka Setan el akkalemye nunak in alolo lal ke oiyen oaru lal Job? A pal mwomwo fuka itukyang nu sel Job?
6 Tokin century puspus, oasr pal mwomwo lal Job sie met oaru in akkalemye la su ma yok sripe emeet ke moul lal. Ke pal se Jeova el akkalemye nu sel Setan oiyen oaru lal Job, Setan el topuk: “Ya Job el sangeng sin God ke wangin?” (Ridi Job 1:7-10.) Setan el tia lain la Job el lungse in akos God. A, ma el kusensiyukkin pa ke nunak a oiyel Job paenang el kulansap nu sin God. Setan el fwak mu Job el kulansap nu sin Jeova, tia ke sripen el lungse God, a ke sripen oasr me insemwomwo su el ku in eis. Job mukena ku in sang topuk nu ke kas in lain se inge, a oasr pal mwomwo su itukyang nu sel elan akkalemye la el kulansapu God ke sripen el lungsel na paye.
7, 8. Me srufwe puspus fuka Job el enenu in muteng ka, a mea el akkalemye ke oiyen oaru lal in muteng?
7 Jeova el lela Setan in oru me keok puspus nu sel Job, sie me keok sikyak tokin sie keok tufwana tari. (Job 1:12-19) Oiya fuka Job el akkalemye nu ke ma ekla upa nu ke moul lal? Kas lun God el akkalemye nu sesr la el “tia orek ma koluk ku kaskou lain God ke lalfon.” (Job 1:22) Tusruktu Setan el tia tui in kaskas kel Job. El fwak pa kas in torkaskas inge: “Kolo ke kolo, aok, ma nu kemwa yurin sie met el fwa sang ke moul lal.”a (Job 2:4) Setan el fwak mu fwin Job el pulakin me keok, el fwa oru sulela lal in tia Jeova pa sie su yok sripe emeet ke moul lal.
8 Job el keok a musalla manol ke sripen sie mas upa su sikyak nu sel, a mutan kiyel patkol in selngawi God a elan mise. Tokin kutu pal, oasr met akkeye tia paye tolu su fwak mu el oru ma koluk. (Job 2:11-13; 8:2-6; 22:2, 3) Tusruktu, ke me keok nukewa su el sun, Job el tia fuleak oiyen oaru a sumwos lal. (Job 2:9, 10) El akkalemye ke oiyen oaru lal in muteng la Jeova pa Sie su yok sripe emeet ke moul lal. Job el akkalemye pa la met sesumwos ku in sang me top mwomwo, ke ku lal kewa, nu ke kas kikiap lun Devil.—Srike liye Soakas 27:11.
Me Top Sumwosmwos lun Jisus
9. (a) Fuka Setan el srike in srufwel Jisus elan orekmakin kena in ikwe lal sifwana? (b) Oiya fuka Jisus el akkalemye nu ke me srufwe se inge?
9 Tia pat tokin Jisus el eis baptais, Setan el srike in srufwel Jisus in oru ma in akinsemwomwoyel sifwana liki na in oru Jeova in ma yok sripe emeet ke moul lal. Devil el akkalemye me srufwe tolu nu sel Jisus. Ma se meet, el srike in kiapella Jisus ke kena lun ikwe, el srufwel in ekulla eot nu ke bred. (Mattu 4:2, 3) Jisus el tufwana tari in orek lalo ke lusen len 40 a el musrinsral na paye. Ke ma inge Devil el kaifwel in orekmakin ku lal ke inkanek lun mwenwen elan ku in mongo in akkupyel sifwana. Mea Jisus el oru? Tia oana sie ke ma If el oru su tia porongo kas lun Jeova, Jisus el loang akmwoye ke Kas lun Jeova a el sa in pulesru me srufwe se inge.—Ridi Mattu 4:4.
10. Efu ku Setan el srufwel Jisus el an sifwana srola nu ten?
10 Setan el srike pa in kufusella Jisus elan sifwana srola nu ten. (Mattu 4:5, 6) Mea Setan el lungse in akpayeye? Setan el fwak mu fwin Jisus el tia musalla ke el putatla nu ten, ma inge ku in akpayeye la el “sie mwen nutin God.” Kalem la, Devil el lungsel Jisus in nunku yok kel sifwana, a elan oru orekma sakuruk se inge in akkalemye la el arlana sumat. Setan el etu la sie met el lungse in oru sie orekma fwinne sensen na paye ke sripen oiyen inse fulat lal, a ke sripen el tia lungse in wanginla sunak lun met puspus nu sel. Setan el orekmakin sie ma simusla ke inkanek tia sumwos, tusruktu Jisus el akkalemye la el kalem na paye ke Kas lun Jeova. (Ridi Mattu 4:7.) Ke pal se el pulesru me srufwe se inge, Jisus el sifwilpa akpayeye la Jeova pa Sie su yok sripe emeet ke moul lal.
11. Efu ku Jisus el pulesru togusrai nukewa lun fwalu su Devil el lungse in sang nu sel?
11 Ke me srufwe safla su arlana upa, Setan el akkalemye nu sel Jisus togusrai nukewa lun fwalu. (Mattu 4:8, 9) Jisus el arlana sa in pulesru me srufwe lal. El etu a akilen la fwin el eis ma Setan el akkalemye nu sel, ma inge el kalmekin la el pulesru kolyuk lun Jeova, su kolyuk sumwosmwos inge el kalmekin nu ke sumwos lun God elan pa Fulatlana. (Ridi Mattu 4:10.) Ke me srufwe nukewa inge, Jisus el sang topuk nu sel Setan ke el orekmakin ma simusla su inen Jeova oasr ka.
12. Sulela upa fuka Jisus el enenu in oru ke pal apkuran na in tari moul lal fwin fwalu? A mea kut lotela ke inkanek el oru sulela upa se inge?
12 Ke pal se moul lun Jisus apkuran in tari fwin fwalu, oasr sulela upa su Jisus el enenu in oru. Ke lusen pal su el oru orekma lal in luti peng mwo, el akkalemye la el lungse in sang moul lal oana sie me kise. (Mattu 20:17-19, 28; Luk 12:50; Jon 16:28) Tusruktu, Jisus el etu pa la metu elos fwa fwak ma kikiap mu oasr ma koluk el oru, a metu fwa sang Jisus nu sin met nununku lun met Ju a el fwa anwuki oana sie met kaskou. Oiya koluk nukewa inge su fwa sikyak ke pal se el mise oru elan fosrnga yok ka. El pre: “O Papa, fwin ku, lela kup se inge in alikiyula.” El fwak pa: “Tusruktu tia oana ma Nga lungsik, a oana ma kom lungsum.” (Mattu 26:39) Aok, oiyen oaru lal Jisus nu ke el mise sang me akpayeye la su Sie su yok sripe emeet ke moul lal!
Me Top Lasr nu ke Kusensiyuk Se
13. Me lutlut puspus fuka kut lotela ke me srikasrak lal If, Job, a Jisus Kraist?
13 Mea kut lotela tari? Kel If, kut lotela la elos nukewa su fuleak nu ke kena lalos in akinsemwomwoyelos sifwana ku elos pula mu elos yok sripe na paye akkalemye la tia Jeova pa ma yok sripe ke moul lalos. Ke oiya su tia oana sie, ke oiyen oaru lal Job, kut lotela la met sesumwos elos ku pa in akkalemye la Jeova pa ma yok sripe emeet ke moul lalos ke elos muteng a oaru fwinne oasr kain in me keok puspus. Fwinne sropon me keok puspus su sikyak tia kalem nu selos la tuku ya me. (Jemes 5:11) Ma se safla, me srikasrak lun Jisus luti nu sesr la kut ku pa sun me mwekin a in tia nunku yok kesr sifwana. (Hibru 12:2) Tusruktu fuka kut ku in orekmakin me lutlut mwomwo inge?
14, 15. Ke inkanek fuka oiya su Jisus el akalemye nu ke me srufwe el tia oana sie ke ma If el oru? A fuka kut ku in etawel Jisus?
14 Kom in tia lela me srufwe in oru kom in mwulkunla Jeova. If el lela nunak lal in loang akmwoye nu ke me srufwe su akkalemyeyuk nu sel. El liye fwokin sak mu “mwo in mongo, a me engun in liye a me aklalmetmetye met.” (Genesis 3:6) Oiya su Jisus el akkalemye nu ke me srufwe tolu el siena liki ma If el oru! Ke kais sie pal, el tia lela me srufwe el an mwulkunla fwako koluk su ku in tuku ke orekma lal. El lulalfongi nu ke Kas lun God a el orekmakin pa inen Jeova.
15 Kut fwin sun me srufwe in oru ma puspus in akasorye Jeova, nu ke mea kut loang akmwoye? Kut fwin nunku akmwoye ke me srufwe, ma inge fwa ku in oru kut in akkeye kena koluk. (Jemes 1:14, 15) Kut enenu in sa in oru me aksumwos in eisla kena koluk ke insiesr, fwinne me aksumwos inge arlana upa su ku in pupulyukkin nu ke orekma in pakela a sisla sie laan manosr. (Mattu 5:29, 30) In oana Jisus, kut enenu in loang akmwoye ke fwako koluk su tuku ke orekma lasr, la fuka ma inge ku in akkolukye fototo lasr nu sin Jeova. Kut enenu in esam ke ma Baibel el akkalemye nu sesr. Ke inkanek sefwanna inge kut ku in akpayeye la Jeova pa sie su yok sripe emeet ke moul lasr.
16-18. (a) Ma puspus fuka ku in oru insiesr in fosrnga a asor yok? (b) Mea ku in kasre kut in muteng a kutangla ke ma puspus su sikyak su oru kut in asor ku fosrnga?
16 Tia lela me keok su sikyak nu sum in oru kom in toasr nu sin Jeova. (Soakas 19:3) Ke kut apkuran nu ke saflaiyen fwal koluk se inge, oasr met kulansap puspus lun Jeova su sun ongoiye a me keok puspus. Kut tia tupan la e fwa oasr me karungin nu sesr ke inkanek lun mwenmwen ke pal inge. Ne ouinge, in oana Job, kut ku in pulakin asor yok ke pal se sie sin met su kut lungse el mise, ku kut sifwana sun me keok.
17 Job el tia kalem la efu Jeova el lela kutu ma in sikyak, a saap oasr pa pal kut tia kalem la efu ku ma koluk puspus sikyak. Saap kut long ke met lili oaru su mise ke sie kusrusr, oana ke ma sikyak in an Haiti, ku ke kutupa ongoiye su sikyak. Ku kut etu ke sie met lili su sruokye oiyen oaru lal el akkolukyeyuk sin met koluk, ku el mise ke sie accident upa. Ku kut ku in pula la oasr ma upa puspus sikyak nu sesr ku kut liye la wangin nununku sumwos. Paenang insiesr su arlana fosrnga ku in oru kut in nunku: ‘Efu Jeova. Efu ku ma inge sikyak nu sik? Ma koluk fuka nga oru?’ (Hebakkuk 1:2, 3) Mea ku in kasre kut in muteng ke pal se kut pula oiya inge?
18 Kut enenu in taran in tia nunku mu kain in ma sikyak inge akkalemye la Jeova el tia insemwomwo kesr. Jisus el akkalemye yok ke ma paye inge ke pal se el sramsramkin ke ongoiye luo su sikyak in len lal. (Ridi Luk 13:1-5.) Oasr ongoiye puspus su sikyak ke sripen “pal a ma sikyak” su kut tia etu. (Ekklisiastis 9:11) Tusruktu ke kutena ma su oru kut in asor ku fosrnga, kut ku in muteng a kutangla ka kut fwin nunku akmwoye nu sin “God lun me pwarak nukewa.” El fwa ase nu sesr ku su eneneyuk tu kut in kafweang in sruokye oaru lasr.—2 Korint 1:3-6.
19, 20. Mea kasrel Jisus in muteng ke oiya puspus su akmwekinyel, a mea ku in kasre kut in muteng pa?
19 Nik met lela oiyen insefulat ku me mwekin in oru kom in nunku ka pal nukewa. Inse pusisel lun Jisus kasrel in ‘sifwana akpusiselyel a oru elan oana sie met kulansap.’ (Filippai 2:5-8) El muteng ke oiya puspus su ku in akmwekinyel ke sripen el fungfung nu sin Jeova. (1 Piter 2:23, 24) Ke el oru ma inge, Jisus el oru meet ma lungse lun Jeova, a ke sripe se inge el akfulatyeyuk nu ke kunokon su fulat liki nukewa. (Filippai 2:9) Jisus el fwak pa nu sin met tuma lutlut nukewa lal, la arlana mwo ke moul lalos kain in oiya mwo inge.—Mattu 23:11, 12; Luk 9:26.
20 Oasr pal, kutu me srufwe nu ke lulalfongi lasr ku in me mwekin. Ne ouinge, kut enenu in lulalfongi oana ke ma Poul el akkalemye, ke el fwak kas inge: “Ke sripe se inge nga ouyepa keok ke ma inge, tusruktu nga tia mekin. Tu nga etu el su nga lulalfongel, a nga nunku mu paye tu el ku in liaung ma nga filiye yurol nu ke len sa.”—2 Timote 1:12.
21. Fwinne met puspus fwin fwalu akkalemye oiya koluk su nunku kelos sifwana, sulela fuka kom lungse na paye in oru?
21 Baibel el akaklemye la ke lusen pal inge su kut oasr ka metu elos fwa “sifwana lungselos.” (2 Timote 3:2) Ke sripe se inge, oasr fwil lun met su oasr yen nukewa su tia oru Jeova in ma yok sripe emeet ke moul lalos. Lela kut in tia akkolukyeyuk ke kain in oiya koluk se inge! A, fwinne kut sun me srufwe, kut asor ke sripen oasr ongoiye puspus sikyak nu sesr, oasr me srufwe puspus lun met su ku in akmwekinye kut, lela kais sie sesr in akpayeye la Jeova pa sie su yok sripe emeet ke moul lasr!
[Footnote]
a Kutu sin scholar lun Baibel elos nunku mu kas inge “kolo ke kolo” ku in kalmekin mu ke sripen Job el nunku kel sifwana paenang ku in lela tulik natul a kosro nukewa natul in tula kolo lalos, su kalmekin nu ke moul lalos, meyen el lungse in karungin kolo lal sifwana, ku moul lal sifwana. Kutu sin scholar inge elos nunku pa mu kas inge akkalemye la sie met el lungse in tula kolo lal fwin ma inge kalmekin la ku in molela moul lal sifwana. Ke sie me pupulyuk, sie met el ku in srukak paol in kosrala sie met su lungse sang paol nu ke sifwel, ke ma inge tula kutu ke kolo lal in molela ku karungin kutupa kolo lal. Ke kutena kalmen kas in pupulyuk inge, arlana kalem la Job el lungse in fuleak ma nukewa fwin ma inge ku in molela moul lal.
Mea Kut Ku In Lotela Ke . . .
• inkanek su Setan el kiapella If?
• oiya su Job el akkalemye nu ke ongoiye puspus su sikyak nu sel?
• ma yok sripe emeet nu sel Jisus?
[Petsac ke sra 12]
If el tia nunku akmwoye ke fototo lal nu sin Jeova
[Petsac ke sra 14]
Orekma in sang ma lo nu sin met ke loom nuknuk nu ke loom nuknuk tokin kusrusr sikyak fwin an Haiti
[Petsac ke sra 14]
Ke pal in ongoiye puspus, kut ku in nunku akmwoye ke “God lun pwarak nukewa”