Sou lun Met Kristian Nukewa, Komwos in “Akola” Pal Nukewa
“Komwos in ako pa; tu Mwen nutin met El a tuku in aur se su komwos tia nunku ka.”—LUK 12:40.
1, 2. Efu ku kut enenu in esam a filiye ke insiesr kas in kaifwe lun Jisus in “akola” pal nukewa?
“KE PAL se mwen nutin met el tuku ke mwolana lal” a el srela ‘metu liki sie sin sie,’ mea e fwa sikyuk nu sum a nu sin sou lom? (Mattu 25:31, 32) Ke sripen ma inge e fwa sikyak ke an a pal su kut tia nunku ka, arlana yok sripe kut in esam pal nukewa ke kas in kaifwe lal Jisus in “akola” pal nukewa!—Luk 12:40.
2 Me lutlut se meeta el akuteye la fuka kais sie met ke sou ku in kasru sie sin sie in moniyuk pal nukewa ke orekma in kulansap nu sin God fwin elos akpayeye kunokon lalos. Lela kut in lutlutkin kutupa inkanek su ku in sang kasru in akkeye fototo lun sou lasr nu sin God.
Kafweang in “Oru Mutom in Mwo”
3, 4. (a) Sou nukewa lun met Kristian elos enenu in liyelosyang ke mea? (b) Mea kalmen in oru muton in “mwo”?
3 Sou lun met Kristian nukewa elos enenu in taran in tia loang nu ke ma puspus su kupasr nu ke alu paye, tu elos in akola na paye ke tuku lun Kraist. Elos enenu in karunginelos sifwana liki me akkoluk nukewa. Ke sripen lungse yok ke ma puspus lun fwalu el sie me sruf su srifwe sou puspus, paenang mwo in nunku yok ke ma Jisus el fwak ke kafweang in oru mutasr in “mwo.” (Ridi Mattu 6:22, 23.) In oana ke sie lam el ku in tolak ke inkanek lasr a kasre kut in fwasr we a in tia ikori, ma kut eis ke inkanek lun ‘mutun insiesr’ ku in ase nu sesr kalem yok, a kasre kut in oru oiya mwomwo a tia tukulkul.—Efesus 1:18.
4 Kut fwin lungse in mwo a kalem muta paye lasr, ma inge enenu in orekma mwo a ku in liye akmwoye ke ma puspus. Mutun insiesr el oapana. Fwin mutun insiesr el mwo kalmekin ma inge pa kut nunku a loang akmwoye ke akwuk sefwanna. Kut tia moulkin moul su nunku yok ke ma puspus lun fwalu a tia fosrngala ke karungin ma enenu lun sou, a kut oru mutasr in liye akmwoye ke orekma nukewa lasr in kulansap nu sin God. (Mattu 6:33) Kalmen ma inge pa kut insemwomwokin ma nukewa su oasr yurosr in akfwalye ma enenu lasr a oru meet ke moul lasr orekma in kulansap nu sin God.—Hibru 13:5.
5. Fuka sie tulik mutan el akkalemye la “mutal” el loang akmwoye in kulansap nu sin God?
5 Paye la oasr fwako mwomwo su ku in sikyak fwin tulik elos eis akpa in oru mutalos in mwo! Nunku ke me srikasrak lun sie tulik mutan fwusr su muta fwin an Itiopia. El arlana mwo a sumat ke lutlut lal, paenang ke pal se el srola ke lutlut, oasr sie scholarship su itukyang nu sel tu el an ku in akyokye lutlut lal. Tusruktu, el tia eis ma inge meyen mutun insiel el loang akmwoye ke orekma in kulansap nu sin Jeova. Oayepa tia pat tokin pal se inge, oasr sie orekma na mwomwo su akkalemyeyuk nu sel su yok molin orekma su el ku in eis ka, oasr ke tala 4,200 ke kais sie malem. Molin orekma se inge el yok liki kutena molin orekma in an se inge. Tusruktu “mutun” tulik fwusr se inge el loang akmwoye ke orekma lun pioneer. El tia enenu in siyuk sin papa a nine kiyel fwin el fwa eis ku tia orekma se inge meyen el sifwana ku in oru sulela lal. Mea papa a nine kiyel elos nunku ke ma tulik mutan natulos el oru? Elos engan na paye ke ma tulik natulos el oru a elos fwak nu sel la elos arlana insemwomwo kel!
6, 7. Kut enenu in ‘sismouk’ ku loang akmwoye ke kain in me sensen fuka?
6 Arlana kalem ke kas lal Jisus su simusyukla in Mattu 6:22, 23 ke kas in sensen ke rapku. Jisus el akkalemye ma tia oana sie ke kas inge “muta mwo” a “muta koluk.” Sie ‘muta koluk’ el tia mwo, lungse in sok, a kain in muta inge el rapku. (Mattu 6:23) Mea nunak lun Jeova ke oiyen rapku? Baibel el akkalemye kas inge: “A kosro, a fokfok nu kemwa, a rapku, in tia sikme elos yurumwos.”—Efesus 5:3.
7 Rapku ku in sa in liyeyuk nu sin met saye puspus, tusruktu tia fusrasr in akilen ke moul lasr sifwana. Ke ma inge, mwo kut in porongo kas in sensen lun Jisus: “Sismouk, a liyekomwosyung liki rapku nu kemwa.” (Luk 12:15) Kut fwin lungse in akos kas inge kut enenu in tuni kut sifwana in liye la mea ma on ke insiesr. Sou nukewa lun met Kristian elos enenu in nunku akmwoye ke pal a mani su elos orekmakin nu ke me akengan, a ke orekma lalos in eis ma puspus lun fwalu.
8. Kut fwin nunku in moli ma puspus, fuka kut ku in ‘oru mutasr in loang akmwoye pal nukewa’?
8 Meet liki kom moli ma se, kom enenu in nunku akmwoye ke ma puspus yok liki fwin oasr ku wangin mani lom in moli ma se. Nunku akmwoye ke oiya puspus oana: ‘Ya e fwa oasr pal luk in orekmakin ma inge pal nukewa a in karungin ma inge? Putaka pal eneneyuk meet liki nga ku in lotela in orekmakin ma inge ke inkanek mwo a sumwos?’ Met fwusr, komwos in tia lulalfongi ke ma nukewa su akwuk lun fwal se inge el akkalemye in akkeye a oru metu in nunku mu mwo elos in moli nuknuk a ma puspus su yok molo. Kom enenu in kutongkomi in tia moli ma nukewa. Oayepa, kom in nunku akmwoye fwin kom moli ma se su kom lungse fwa kasru sou lom in ako nu ke tuku lun Mwen nutin met. Kom in lulalfongi ke mwulela lun Jeova inge: “Nga tiana filikomla, a Nga tiana som liki kom.”—Hibru 13:5.
Kafweang in Sun Kain in Akwuk Mwomwo nu ke Orekma nu sin God
9. Mea kafweang in akpayeye akwuk mwomwo ke orekma nu sin God ku in oru nu sin sie sou?
9 Siepa inkanek nu sin met in sou in akkeye lulalfongi lalos a in akmwoye fototo lalos nu sin God pa elos enenu in oakiye akwuk mwomwo ke orekma in kulansap nu sin God a kafweang in sun ma inge. Ma inge ku in kasru sou nukewa in liye fwin elos kapkapek ke orekma lalos in akinsemwomwoye Jeova. A ma inge ku in kasrelos in oru sulela la piya ka ke orekma lalos pa ma yok sripe emeet ke moul lalos.—Ridi Filippai 1:10.
10, 11. Oana sie sou, akwuk mwomwo fuka ke orekma in kulansap nu sin God kom kafweang in akpayeye? A akwuk mwomwo fuka kom lungse in oakiye a oru ke pal fwasru?
10 Oayepa fwin met nukewa ke sou elos oakiye akwuk mwo su ku in akpayeye sin kais sie selos ma inge ku in orala me insemwomwo puspus nu selos. Ke sie me pupulyuk, nunku ke akwuk mwo in akuteye koanon len kais sie len. Me top su met in sou akkalemye ku in kasru sifwen sou in akilen la mea nunak a pulakin lalos kel Jeova a ke ma paye. Akwuk mwomwo in rid Baibel pal nukewa oana sie sou el sang pal mwomwo nu sin tulik in akmwoye ku lalos in rid a ku in akyokye kalem lalos ke kas mwomwo lun Baibel. (Sam 1:1, 2) A ya kut fwa tia kafweang in oru akwuk mwomwo lasr in akmwoye oiyen pre lasr? Siepa akwuk mwomwo su kut ku in akpayeye pa kut in akkeye fwako nukewa lun ku lun God ke moul lasr. (Galetia 5:22, 23) Ku fuka kut fwin suk inkanek puspus in akkalemye la kut kalem pa pulakin lun met puspus su kut osun ke an su kut sulkakin peng mwo ? Kafweang lun sou nukewa in oru ma inge ku in kasru tulik srisrik in etu pa in akkalemye pakoten nu sin met puspus. A ma inge ku in kasrelos pa in akkeye lungse lalos in sroang nu ke orekma lun regular pioneer ku missionary.
11 Efu ku kom tia nunku akmwoye ke kutu akwuk mwomwo su kom a sou lom ku in orala a akpayeye? Ya sou lom elos ku in orala akwuk mwomwo in orekmakin pal yok nu ke orekma in luti peng mwo? Ya kom kafweang in akwanginyela tufwal a nunak in alolo lom ke orekma in sang ma lo nu sin met ke inkanek lun telefon, nu sin met su oasr ke inkaneku, ku ke an in kuka? Na fuka ke akwuk mwo in som nu ke sie an su oasr me enenu yok ke met lili in sulkakin peng mwo lun Togusrai? Ya sie sin met ke sou el ku in lutlutkin kas sasu tu el an ku in akkalemye peng mwo nu sin met su kaskaskin kas saye?
12. Mea sifwen sou nukewa ku in oru in kasru sou lalos in kapkapek ke orekma lalos nu sin God?
12 Oana sifwen sou, kom enenu in akilen ke oiya puspus su met in sou lom ku in kapkapek. A oakiye akwuk mwomwo puspus inge in sun nien sun inge. Akwuk mwomwo su kom oakiye oana sie sou enenu in fusrasr a ku in akpayeye fwal nu ke kain in oiya puspus a ku lom. (Soakas 13:12) Paye la, kom fwin lungse in akpayeye akwuk mwomwo kom enenu pal yok nu ka. Ke ma inge kom in molela pal su kom orekmakin in liye television a orekmakin ma inge nu ke orekma nukewa in akmwoye fototo lom nu sin God. (Efesus 5:15, 16) Kom in kafweang yok in akpayeye akwuk mwomwo nukewa su kom oakiye nu sin sou lom. (Galetia 6:9) Sie sou su kafweang in sun akwuk mwomwo ke orekma in kulansap nu sin God ku in oru kapkapek lalos in “kalem nu sin met e nukewa.”—1 Timote 4:15.
Oru Tukeni Lutlut lun Sou ke Baibel Pal Nukewa
13. Kain in ma ekla fuka mutawauk in orek ke akwuk ke meeting lun congregation, a kusensiyuk puspus fuka kut enenu in nunku akmwoye?
13 Sie me kasru mwomwo in kasru sou nukewa in “akola” pal nukewa nu ke tuku lun Mwen nutin met pa ke ma ekla ke akwuk ke meeting ke kais sie wik su mutawauk in orek ke January 1, 2009. Akwuk in oru tukeni ke sie len su pangpang Congregation Book Study el tila orek a meeting se inge el toeni nu ke Theocratic Ministry School a Service Meeting. Ma ekla inge el sang pal mwomwo nu sin sou nukewa lun met Kristian in akkeye fototo lalos nu sin God ke elos orala akwuk mwo ke sie eku in oru tukeni lutlut lun sou ke Baibel ke kais sie wik. Mutawauk ke pal se ma ekla inge orek nu ke pal se inge, kut ku in siyuk sesr sifwana: ‘Ya nga orekmakin pal mwomwo inge in oru Tukeni Lutlut lun Sou ke Baibel ke sie eku, ku in oru lutlut luk sifwana ke kas lun God? Ya nga akpayeye niyen sun mwomwo se inge?’
14. (a) Mea sripe yok paenang oasr ma enenu yok in oru pal nukewa Tukeni Lutlut lun Sou ke Baibel ku lutlut sifwana lun sie met? (b) Efu ku kafweang lasr in orekmakin sie eku in lutlut ke kas lun God yok sripe na paye?
14 Sripe su yok emeet in oru pal nukewa Tukeni Lutlut lun Sou ke Baibel ke sie eku, ku ke pal in lutlut sifwana pa in akfototoye met in sou nukewa nu sin God. (Jemes 4:8) Kut fwin orekmakin pal in lutlutkin Baibel pal nukewa a kut eis etauk yok ke God su orekutla, fototo lasr nu sel akkeyeyuk. Kut fwin fototo na paye nu sin Jeova, oasr me akkeye yok nu sesr in akkalemye lungse nu sel ‘ke insiesr kewa, moul lasr kewa, nunkasr kewa a ku lasr kewa.’ (Mark 12:30) Aok, kut lungse na paye in akos God a in etawi el. (Efesus 5:1) Ke ma inge, kafweang lasr in oru pal nukewa Tukeni Lutlut lun Sou ke Baibel el arlana yok sripe in kasru met nukewa ke sou lasr in “akola” a in moniyuk ke orekma in kulansap lasr nu sin God ke kut sano ke tuku lun “ongoiye lulap” su palyeyuk in Baibel. (Mattu 24:21) Akwuk mwomwo se inge el arlana yok sripe nu ke molela lasr.
15. Mea fwako mwomwo lun Tukeni Lutlut lun Sou ke Baibel nu ke pulakin lun kais sie met ke sou nu sin sie sin sie?
15 Oasr siepa ma yok sripe ke akwuk ke Tukeni Lutlut lun Sou ke Baibel. Sripe se inge su arlana saok pa in kasru kais sie met ke sou in akfototoyelos nu sin sie sin sie. Orekmakin pal yok in sramsramkin a lutlutkin ma paye ke God ke kais sie wik ku in oasr fwako mwomwo nu ke pulakin lun kais sie met ke sou nu sin sie sin sie. Paye la mokul a mutan payuk elos fwa pulakin fototo nu sin sie sin sie fwin elos long la kais sie selos el akkalemye engan ke etauk su oasr in Baibel su elos lotela. (Ridi Ekklisiastis 4:12.) Papa a nine a tulik nukewa su tukeni alu nu sin God ku in tukeni nu sie ke lungse, su ‘me kapur lun inse sefwanna.’—Kolosse 3:14.
16. Srumon la fuka mutan Kristian tolu inge elos eis ma lane yok ke elos orekmakin sie eku in tukeni lutlutkin Baibel?
16 Nunku akmwoye ke mutan tolu ke congregation su eis ma lane ke akwuk mwomwo inge in orekmakin pal ke sie eku in oru tukeni lutlut lalos ke Baibel oana sie sou. Fwinne elos tia sou na paye, mutan katinmas matou tolu inge elos muta ke an sefwanna a elos kawuk fototo nu sin sie sin sie ke lusen yea puspus. Ke sripen elos lungse in orekmakin pal yok in asrouki nu sin sie sin sie a ke pal sepana elos lungse in sramsramkin ma paye a ma puspus ke God, a tia in engunkin asrouki mukena, paenang elos oru sulela in orekmakin sie eku in tukeni nu sie a lutlutkin Baibel. Elos mutawauk in orekmakin buk se inge “Kafweang in Sang Ma Lo nu sin Met Nukewa” Ke Togusrai lun God, oasr ke kas English. “Kut engunkin na paye lutlut lasr paenang kut oru ma inge loes liki ao se ke pal puspus,” sie selos el fwak. “Kut srike in lumala ke nunak lasr ke oiya puspus su sikyuk nu sin met Kristian wiyesr in century se meet, a kut akuteye la mea kut ku in oru kut fwin sun oiya inge. A kut srike in orekmakin ke orekma in luti lasr ke me lutlut mwomwo su kut lotela ke lutlut lasr. Ma inge oru orekma lasr in sulkakin Togusrai lun God a orekma in oru met tuma lutlut in oasr me engan yok a oasr fwako mwomwo yok liki meeta.” Sayen me akkeye yok nu ke lulalfongi lalos, akwuk mwo inge el oru mutan Kristian tolu inge in fototo na paye nu sin sie sin sie. “Kut aksaokye na paye akwuk se inge,” elos fwak.
17. Ma puspus fuka sang kasru in akpayeye mwo Tukeni Lutlut lun Sou ke Baibel?
17 Na fuka kom? Ke inkanek fuka kom eis me insemwomwo ke kom orekmakin sie eku in oru lutlut lun sou ke Baibel ku in oru lutlut lom sifwana? Fwin ma inge orek kais kutu pal na, niyen sun lun akwuk inge fwa tia ku in akpayeyuk. Kais sie met in sou enenu in akola in wi ke lutlut ke pal se su oakiyuki tari. Elos enenu in tia lela ma puspus su tia arlanu yok sripe in tulokinye lutlut ke eku se inge. Sayen ma inge, me lutlut enenu in suleyukla mwo tu ke kais sie pal in lutlut oasr me kasru mwomwo su ku in orekmakin sin met in sou ke moul lalos len nukewa. Mea kom ku in oru in akpayeye la oasr me insemwomwo yok ke kain in lutlut inge? Orekmakin inkanek mwo in luti, a akkalemye sunak a oru met nukewa in pwar ka a tia tufwal.—Jemes 3:18.a
Kafweang in Moniyuk a “Akola” Pal Nukewa
18, 19. Ke sripen kut etu la tuku lun Mwen nutin met el arlana apkuran, mea ma inge ku in oru nu sum a nu sin sou lom?
18 Oiya koluk puspus su sikyak fwin fwalu ke pal inge sang me akpayeye kalem, la mutamwauk in yea 1914, akwuk koluk nukewa lal Setan oasr tari ke len safla. Armagedun el arlana apkuran. Tia pat Mwen nutin met e fwa tuku in oru nununku lun Jeova nu sin met koluk nukewa. (Sam 37:10; Soakas 2:21, 22) Ke sripen kom etu ke ma su e fwa sikyak inge, ya ma inge ku in kasre kom a sou lom?
19 Ya kom akos kas in kasru lun Jisus in oru mutom in “mwo” su ngetnget nu ke ma yok sripe mukena? Paye la met lun fwal se inge elos kafweang in eis me kasrup, suk ke oiyen pengpeng, a ku, ya sou lom elos moniyuk in akmwoye akwuk mwomwo puspus nu ke orekma in kulansap nu sin God? Ya akwuk nu ke Tukeni Lutlut lun Sou ke Baibel ke sie eku ku pal in oru lutlut lom sifwana el kasre kom? Ya kom eis me kasru su tuku ke akwuk mwomwo inge? In oana ke ma akuteyuki ke me lutlut se meeta, ya kom oru kunokon lom fwal nu ke ma Simusla oana sie mokul payuk, sie mutan payuk, ku sie tulik, in sang kasru nu sin met nukewa ke sou in moniyuk a ‘tia motul’ pal nukewa? (1 Tessalonika 5:6) Fwin kom oru, kom fwa kafweang in “akola” ke tuku lun Mwen nutin met.
[Footnote]
a Ke kas in kasru puspus su akkalemye la mea ku in lutlutkin a in liye la fuka in oru Tukeni Lutlut lun Sou ke Baibel a in insemwomwo in oru, srike liye Tauer in San, ke issue lun June 1, 2010, sra 23 paragraph 11-13.
Mea Kom Lotela?
• Akuteye la fuka sou nukewa lun met Kristian ku in kafweang in “akola” ke inkanek in. . .
oasr muta “mwo.”
oakiye a kafweang in sun akwuk mwomwo ke orekma in kulansap nu sin God.
oru pal nukewa Tukeni Lutlut lun Sou ke Baibel?