Sou lun Met Kristian Nukewa—Kafweang in “Tia Motul”

“Lela kut in tia motul . . . sano a efwal.”—1 TESSALONIKA 5:6.

1, 2. Mea eneneyuk fwin sie sou el lungse in kutangla in moniyuk a tia motul pal nukewa?

KE PAL se Poul el sramsramkin ke “len lulap a me aksangeng lun Jeova,” el simusla nu sin met Kristian su oasr fwin an Tessalonika: “A komwos, met lili, tia muta in losr, tu len sa in sun komwos oana sie met pusr, tu komwos nukewa mwen nutin kalem a mwen nutin len. Kut tia ma lun fong ku losr.” El simusla pa kas inge: “Ke ma inge, lela kut in tia motul oana met lula, a lela kut in sano a efwal.”—Joel 2:31; 1 Tessalonika 5:4-6.

² Kas in kasru lal Poul inge nu sin met Tessalonika el fwal pa nu sin met Kristian nukewa su moul ke “pal safla” inge. (Daniel 12:4) Ke saflaiyen akwuk koluk nukewa lal inge apkuran, Setan el lungse na paye in oru met Kristian paye in forla liki God. Ke ma inge arlana mwo kut in orekmakin kas in kaifwe lal Poul tu kut in moniyuk pal nukewa ke orekma lasr nu sin God. Fwin sie sou su met Kristian el lungse in kutangla in moniyuk a ngetnget pal nukewa, arlana yok sripe la kais sie met in sou el akpayeye ma Jeova el sapkin nu sel, in oana ke ma akkalemyeyuk in Baibel. Ke ma inge, kunokon fuka enenu in akpayeye sin mokul a mutan payuk, a tulik nukewa in kasru sou lalos in ngetnget a “tia motul” pal nukewa?

Mokul Payuk, Komwos in Etawi “Met Seperd Mwo”

3. In fwal nu ke 1 Timote 5:8, mea eneneyuk nu ke kunokon lun sie mokul oana sie sifwen sou?

³ “Sifwen mutan, mokul,” Baibel el akkalemye. (1 Korint 11:3) Mea eneneyuk nu ke kunokon lun mokul oana sifwen sou? Ma simusla el akkalemye ke sie oiya ke kunokon lun mokul oana sifwen sou, el akkalemye kas inge: “A sie met fwin tia liaung met sral, a yokna kalos su muta in loom sel sifwana, el lafwekin lulalfongi a koluk liki met su tia lulalfongi.” (1 Timote 5:8) Paye, sie mokul el enenu in sang ma enenu lun sou lal. Fwin el lungse in kutangla in kasru sou lal in moniyuk pal nukewa ke orekma in kulansap nu sin Jeova, el enenu in kafweang yok liki na in suk mani in sang ma enenu lun sou lal. El enenu pa in akkeye sou lal ke orekma lalos nu sin God a in akmwoye fototo lalos nu sel. (Soakas 24:3, 4) El ku in oru ma inge fuka?

4. Mea ku in kasru sie mokul in kutangla in akkeye sou lal ke orekma lalos nu sin God?

⁴ Ke sripen ‘mokul el sifwen mutan kiel, oana Kraist el ouyepa sifwen congregation,’ sie mokul payuk el enenu in tuni a etawi inkanek mwo lun Jisus oana leum ku sifwe nu sin congregation. (Efesus 5:23) Loang akmwoye la fuka Jisus el akkalemye fototo lal nu sin met tuma lutlut nukewa lal. (Ridi Jon 10:14, 15.) Mea inkanek mwomwo nu sin sie met elan kutangla in akkeye met nukewa ke sou ke lulalfongi lalos? Pa inge inkanek mwo: Lutlut ke ma Jisus el fwak a oru oana ‘met seperd mwo,’ a “in fwasr in fwalkel.”—1 Piter 2:21.

5. Etauk fuka oasr yurin Met Seperd Mwo ke congregation?

⁵ Ke kas in pupulyuk, fototo mwo inmasrlon sie met seperd a sip natul el fwal nu ke etauk a lulalfongi nu sin sie sin sie. Met seperd el etu ma nukewa ke sip natul, a sip el etu a lulalfongi met seperd lal. Elos akilen a akos pusral. Jisus el fwak: “Nga etu sip nutik a sip nutik ete yu.” Oasr etauk yok lal ke congregation lal. Kas Grik su lungasyukla oana “etu” el kalmekin nu ke “etauk yok ke sie met.” Aok, Met Seperd Mwo se inge el etu na paye met lal su oana sip. El etu ma enenu lun kais sie selos, me munas lalos, a el etu pa ma elos ku in oru. Me Srikasrak mwomwo lasr se inge el etu ma nukewa ke sip natul. A sip elos etu na paye met seperd lalos a elos lulalfongi ke kolyuk lal.

6. Ke inkanek fuka mokul payuk elos ku in etawi Met Seperd Mwo?

⁶ Sie mokul payuk el enenu in lutlut in nunku kel sifwana oana sie met seperd a nunku pa ke met nukewa ke sou lal oana sip, tu elan ku in etawi Kraist in oru kolyuk lal. El enenu in kafweang in etu na paye met nukewa ke sou lal. Ya sie mokul payuk ku in eis kain in etauk inge? Aok, fwin el sramsram mwo nu sin met nukewa ke sou lal, loang akmwoye ke nunak lalos, kol orekma nukewa lun sou lal, a el nunku yok in oru sulela mwomwo ke ma yok sripe puspus oana tukeni lutlut lun sou, wi meeting pal nukewa, orekma in luti peng mwo, a akwuk in oru me akengan. Fwin sie mokul Kristian su payuk el eis etauk mwomwo ke Kas lun God a el etu na paye kais sie met ke sou lal, ma inge ku in kasrel in oru me srikasrak mwo a oru pa sulela mwo. Ke sripe se inge met nukewa ke sou lal elos ku in lulalfongi ke kolyuk lal a el fwa insemwomwo in liyelos la elos tukeni nu sie ke alu paye.

7, 8. Fuka sie mokul payuk el ku in etawi Met Seperd Mwo in akkalemye lungse nu sin met nukewa ke sou lal?

⁷ Sie met seperd mwo el lungse pa sip natul. Kut fwin lutlutkin ma simusla ke moul lun Jisus a ke orekma in luti lal su oasr ke buk lun Gospel akosr, kut eis me akkeye yok ke lungse yok lun Jisus nu sin met tuma lutlut nukewa lal. Oayepa, el ‘sang moul lal ke sip nukewa natul.’ Mokul payuk elos enenu in etawi Jisus in akkalemye lungse nu sin met nukewa ke sou lal. El tia upa nu sin mutan kiyel, a sie mokul payuk su lungse in eis me insemwomwo lun God el kafweang in akkalemye lungse nu sel, ‘oana Kraist el lungse congregation.’ (Efesus 5:25) Enenu in kalem ke kas lal la el kulang a nunku ke mutan kiyel meyen el fwal in akfulatyeyuk.—1 Piter 3:7.

⁸ Ke el sang akpa nu sin tulik natul, sifwen sou el enenu in sruokye ku akwuk fulat lun God. Tusruktu, el enenu in akkalemye lungse nu sin tulik natul pal nukewa. Me kai su eneneyuk nu sin tulik enenu in orek ke inkanek mwo a oasr lungse ka. Kutu met fwusr elos patla in kalem ke ma sapkinyuk nu selos. Ke kain in oiya inge, sie papa el enenu in akkalemye mongfusrasr yok nu selos. Fwin mokul payuk elos etawi me srikasrak lun Jisus pal nukewa, elos ku in oru moul in sou lalos in wangin kutena me sensen a me fosrnga. Met nukewa ke sou lalos elos ku in engankin kain in fototo mwo nu sin God su wangin me sensen oana ke met sim lun sam el akkalemye.—Ridi Sam 23:1-6.

9. In oana Noa, kunokon fuka oasr yurin mokul payuk nukewa, a mea ku in kasrelos in akpayeye ma inge?

⁹ Sie pa me srikasrak mwomwo nu sin sifwen sou nukewa pa Noa. Noa el moul ke saflaiyen akwuk koluk in len lal. Tusruktu Jeova el “molella Noa a met itkosr oelul, . . . ke El wise sronot nu fwin fwal lun met koluk.” (2 Piter 2:5) Oasr kunokon lal Noa in kasru sou lal in molela liki Sronot. Met Kristian nukewa su sifwen sou oasr pa kunokon lalos in kasru sou lalos ke len safla se inge. (Mattu 24:37) A elos ku in kasru sou lalos fwin elos lutlut ke me srikasrak lun ‘met seperd mwo!’

Mutan Payuk, Komwos in ‘Akkeye Sou Lomwos’

10. Mea kalmen oiya mwomwo lun mutan in akpusiselyel sifwana nu sin mokul tumal?

¹⁰ “Mutan kie, komwos in akpusiselye komwos nu sin mokul tumomwos, oana nu sin Leum,” met sap Poul el simusla. (Efesus 5:22) Kas se inge el tia akkalemye la kunokon lun mutan el tia mwo. Meet liki God el orala mutan se meet, su pangpang If, el fwak ouinge: “Tia mwo tu met se inge in mukena muta. Nga fwa oru nu sel sie met in kasrel.” (Genesis 2:18) Orekma lun sie “met kasru” in sang kasru nu sin mokul tumal ke el karungin kunokon nukewa ke sou lal, pa sie kunokon na mwomwo a fwal in kaksakinyuk.

11. Ke inkanek fuka sie mutan mwomwo el ‘akkeye sou lal’?

¹¹ Sie mutan mwomwo el kafweang in oru ma mwo nu sin met nukewa ke sou lal. (Ridi Soakas 14:1.) Sie mutan lalmetmet el siena liki sie mutan lalfon su tia akkalemye sunak nu ke akwuk ke sifwen sou, meyen oasr sunak yok lun mutan mwo ke akwuk se inge. El tia akkalemye kain in oiya koluk, oana seakos a lungse in oru nunak lal sifwana oana ke oiya su mutan puspus lun fwalu akkalemye, a mutan mwo el lungse in akpusiselye nu sin mokul tumal. (Efesus 2:2) Sie mutan lalfon el lungse in kaskaskin ma tia mwo ke mokul tumal pal nukewa, tusruktu sie mutan mwo el kafweang in akkeye sunak lun tulik nukewa natul a lun met puspus nu sin mokul tumal. Kain in mutan payuk inge el arlana taran in tia akkolukye kunokon lun mokul tumal oana sifwen sou ke inkanek in akukuin ku kaskas tia mwo nu sel. Oasr pa ma tia oana sie ke inkanek in orekmakin mwo mani lun sou. Sie mutan lalfon saap el orekmakin mani lun sou ke inkanek tia mwo. A sie mutan mwo su lungse in sang kasru nu sin mokul tumal el tia ouinge. El sang kasru a akesrui nu sin mokul tumal ke akwuk lun sou ke mani. Arlana kalem oiyen lalmetmet lal a inkanek mwo in orekmakin mani ke oiya mwomwo ke el oru ma puspus. El tia patok mokul tumal in orekma ke overtime ku alukela ma fwal pal nukewa.

12. Mea sie mutan payuk el ku in oru in kasru sou lal in ngetnget “tia motul”?

¹² Sie mutan payuk mwomwo el kasru sou lal in “tia motul,” kalme pa el moniyuk in kasru mokul tumal in luti tulik natulos kel Jeova. (Soakas 1:8) El akkeye akwuk ke Tukeni Lutlut lun Sou ke Baibel. Sayen ma inge, el sang kasru nu sin mokul tumal ke el sang kas in kasru a me kai nu sin tulik natulos. Aok el siena liki sie mutan tia mwo su srunga in akesrui, su tulik natul elos sun ma upa puspus ke manolos a ke fototo lalos nu sin God!

13. Efu ku yok sripe nu sin sie mutan payuk in kasru mokul tumal ke orekma lal ke congregation a ke u lasr?

¹³ Mea pulakin lun sie mutan mwo ke el liye mokul tumal el oru kain in kunokon puspus lal ke congregation? Paye la el insemwomwo na paye! El insemwomwo ke kunokon lun mokul tumal, fwin mokul tumal el sie ministerial servant, sie met elder, ku saap el wi ke u lun Hospital Liaison Committee ku Regional Building Committee. Kafweang lal in sang kasru nu sin mokul tumal ke kas a ke orekma kalmekin la oasr pal el lafwekunul sifwana. Tusruktu el etu la ke sripen mokul tumal el kafofo ke orekma ke congregation a ke u lasr, ma inge kasru met nukewa ke sou lal in moniyuk pa ke orekma lalos nu sin God.

14. (a) Ma fuka ku in sie ma upa nu sin sie mutan payuk mwo, a el ku in kutangla fuka liki ma upa se inge? (b) Fuka sie mutan el sang kasru in oasr me akkeye yok nu sin met nukewa ke sou lal?

¹⁴ Saap upa nu sin sie mutan payuk in oana sie me srikasrak mwo in sang kasru nu sin mokul tumal fwin mokul el orala sie sulela su mutan el tia insese ka. Ne ouinge, el akkalemye sie oiya su ‘misla a fulpap’ a akesrui nu sin mokul tumal in akpayeye sulela lal. (1 Piter 3:4) Sie mutan payuk mwomwo el kafweang in lutlut a etawi me srikasrak mwomwo lun mutan puspus su oasr sangeng lalos nu sin God, oana Sera, Rut, Abigail, a Mary, nine kiyel Jisus. (1 Piter 3:5, 6) El etawi pa mutan matu puspus ke pal inge su “fwal in orekma lalos.” (Taitus 2:3, 4) Ke inkanek in akkalemye lungse a sunak nu sin mokul tumal, sie mutan mwomwo el sang kasru yok nu ke insemwomwo lun moul in payuk lalos, a ke ma mwo nu sin met nukewa ke sou. Loom sel el sie an in me akkeye a misla. Nu sin sie mokul su oasr lungse yok a moniyuk nu sin Jeova, sie mutan payuk mwo el arlana saok!—Soakas 18:22.

Met Fwusr, ‘Komwos in Nunku Akmwoye ke Ma Puspus su Tia Ku In Liyeyuk’

15. Fuka met fwusr elos ku in oru kunokon lalos a kasru papa a nine kiyelos tu sou lalos ku in “tia motul” a moniyuk pal nukewa?

¹⁵ Met fwusr, ke inkanek fuka komwos ku in oru kunokon lomwos a kasru papa a nine kiyomwos in “tia motul” ku moniyuk pal nukewa in kulansap nu sin God? Nunku akmwoye ke me sang su Jeova el filiye ye mutom. Saap mutawauk ke pal se kom tulik srisrik, papa a nine kiyom elos akkalemye nu sum kain in petsa a me luma puspus ke moul ke Paredais. Ke kom matula, saap elos orekmakin Baibel a me rid puspus in kasre kom in lumala ke nunak lom la moul ma patpat el oana mea ke fwal sasu. Kom fwin nunku a akpayeye pal nukewa orekma in kulansap lom nu sin Jeova a kom orala akwuk mwomwo ke moul lom, ma inge fwa ku in kasre kom in “tia motul” a moniyuk pal nukewa.

16, 17. Mea met fwusr elos ku in oru in eis kutangla ke kasrusr ke akutun lun moul?

¹⁶ Esam pal nukewa ke kas su met sap Poul el simusla in 1 Korint 9:24. (Ridi.) Ke fus se inge, el pupulyukkin orekma in kulansap lasr nu sin Jeova nu ke kasrusr in akutun, a moul ma patpat nu ke sie opi ku me sang. Ke ma inge kom in oru sulela mwomwo su ku in kasre kom in eis me sang lun moul ma patpat. Met puspus elos lela orekma in suk ke ma puspus lun fwalu in kufusla nunak lalos in tia nunku ke me sang mwomwo se inge. Kain in oiya se inge el tia mwo! Fwin sie met el orala akwuk ke moul tu in eis me kasrup puspus, ma inge tia ku in oru met inge in pulakin insemwomwo paye. Ma puspus su mani ku in moli el ma na ke kitin pal. Tusruktu, kom in kafweang in nunku akmwoye ke ma puspus su ‘tia ku in liyeyuk.’ Efu? Meyen ma su “kut tia liye, ma kamwil” ku ma patpat.—2 Korint 4:18.

¹⁷ ‘Ma puspus su tia ku in liye’ kalmekin pa nu ke me insemwomwo nukewa su tuku ke Togusrai lun God. Kom in orala akwuk mwo in moulkin moul lom ke inkanek su kom ku in eis me insemwomwo inge nukewa. Insemwomwo paye el tuku ke kafweang lom in orekmakin moul lom nu ke orekma in kulansap nu sin Jeova. Orekma in kulansap nu sin God paye ku in orala pal mwomwo in akpayeye kain in akwuk mwomwo su kut ku in sun ke kitin pal na, a ke akwuk mwomwo su kut lungse in oru ke lusen pal loeloes.a Kom fwin orala akwuk mwomwo su kom ku in akpayeye, ma inge ku in kasre kom in loang akmwoye ke orekma lom in kulansap nu sin God, a in nunku pal nukewa in eis me sang ke moul ma patpat.—1 Jon 2:17.

18, 19. Fuka sie met fwusr el ku in etu a akilen fwin oasr fototo mwomwo lal sifwana nu sin God?

¹⁸ Met fwusr, step se meet nu ke inkanek lun moul pa in akkeye fototo mwomwo lom sifwana nu sin Jeova. Ya kom orala tari step se inge? Siyuk sum sifwana: ‘Ya nga sie met su oasr fototo mwomwo nu sin God, ku nga oru na kain in orekma puspus nu sin God ke sripen papa a nine kiyuk elos lungse ngan oru? Ya nga akkeye kain in oiya mwomwo puspus paenang God el insemwomwo keik? Ya nga kafweang in akpayeye sie akwuk mwo in wi pal nukewa ke orekma puspus ke alu paye, oana pre, lutlut, wi meeting, a orekma in luti peng mwo? Ya nga kafweang in akkeye fototo mwomwo luk nu sin God?’—Jemes 4:8.

¹⁹ Nunku akmwoye ke me srikasrak mwomwo lal Moses. El matula ke kain in fasin lun mutunfwal saye, ne ouinge el oru sulela in akkalemyeyuk oana sie met su alu nu sin Jeova, a tia oana sie mwen nutin an natul Fero. (Ridi Hibru 11:24-27.) Met Kristian fwusr, komwos enenu in akpayeye sulela lomwos in kulansap nu sin Jeova ke paye a oaru. Komwos fwin oru ma inge, komwos fwa pulakin insemwomwo paye, moul su mwo emeet ke pal inge, a ke fwinsrak in “sruokye [ku] moul ma patpat su moul paye.”—1 Timote 6:19.

20. Ke akutun ke moul, su ku in eis opi ku me sang?

²⁰ Ke kasrusr in akutun in pal meeta, oasr met sefwanna su ku in kutangla. Tusruktu ke akutun ke moul oasr met puspus su ku in kutangla. Ma lungse lun God pa “met e nu kemwa in moliyukla, a tuku in etu ma paye.” (1 Timote 2:3, 4) Oasr met puspus su kutangla in kasrusr ye mutom, a oasr pa met puspus su kasrusr siskom. (Hibru 12:1, 2) Me sang fwa ku in eis sin met nukewa su tia fuleak. Ke ma inge lela kom in akpayeye sulela lom in eis kutangla ka!

21. Mea fwa akuteyuki ke me lutlut toko?

²¹ “Len lun Jeova, len lulap se a me aksangeng,” paye e fwa tuku. (Malakai 4:5) Ke pal se len se inge tuku sou lun met Kristian nukewa enenu in tia lut ka ke sripen elos nukin. Ke ma inge arlana yok sripe nu sin met in sou nukewa in akpayeye kunokon lalos fwal nu ke ma Simusla. Mea pa kom ku in oru tu kom in moniyuk pal nukewa ke orekma in kulansap lom nu sin God a kom in akkeye fototo lom nu sel? Me lutlut toko e fwa akuteye oiya tolu su ku in kasru fototo lun met nukewa ke sou nu sin God.

[Footnote]

Mea Kom Lotela?

• Efu ku yok sripe nu sin sou lun met Kristian in moniyuk a “tia motul” pal nukewa?

• Fuka sie mokul payuk el ku in etawi Met Seperd Mwo?

• Mea sie mutan payuk mwomwo el ku in oru in kasru mokul tumal?

• Fuka met fwusr ku in sang kasru in oru sou lalos in moniyuk pal nukewa ke orekma in kulansap nu sin God?

[Petsac ke sra 5]

Sie mutan payuk mwo el arlana saok nu sin sie mokul su oasr lungse yok a moniyuk nu sin Jeova