Met Kristian Komwos in Etawi Me Srikasrak lun Jisus Oana Sie Sou!
“Kraist . . . el likiye nu sumwos sie srikasrak, tu komwos in fwasr in fwalkel.”—1 PITER 2:21.
1. (a) Kunokon fuka Mwen nutin God el orala ke pal se God el orala ma nukewa? (b) Mea pulakin lun Jisus nu sin metu?
KE PAL se God el orala kosrao a fwalu, Mwen natul el oasr yurol “oana sie met orekma usrnguk.” Mwen nutin God el sang pa kasru ke pal se Jeova el orala kain in ma orakrak a sak nukewa fwin fwalu a ke pal se El orala Paredais su niyen muta lun met su orekla ke luman Jeova. Mwen nutin God su kut etu oana Jisus, oasr pa yurol lungse yok nu sin metu. “El engan yurin mwen nutin met.”—Soakas 8:27-31; Genesis 1:26, 27.
2. (a) Mea Jeova el sang nu sin met nukewa su sesumwos in kasrelos? (b) Mea sie oiya su Baibel el sang kas in kasru ka?
2 Tokin siyanyen se meet elos orala ma koluk, Jeova el orala akwuk yok sripe in molela met sesumwos nukewa. Jeova el orala akwuk nu sin Kraist in sang moul lal oana sie me kise lun lango in akpayeye akwuk lal in molela metu. (Rom 5:8) Sayen ma inge, Jeova el sang nu sin metu Baibel, su Kas lal, su sang kas in kasru nu sin metu tu elos in eis me insemwomwo a kutangla ke moul lalos fwinne elos sesumwos. (Sam 119:105) Ke Kas lal, Jeova el akkalemye masap lal in kasru sou nukewa lun metu in sruokye moul mwomwo a engan pal nukewa. Ke akwuk lun payuk, buk lun Genesis el akkalemye la mokul el “fwa fulyung nu sin mutan kiel, a eltal fwa ikwe siefwanna.”—Genesis 2:24.
3. (a) Mea Jisus el luti ke akwuk lun payuk? (b) Mea kut fwa lutlutkin ke me lutlut se inge?
3 Ke pal se Jisus el oru orekma in luti lal fwin fwalu, el akkalemye yok la akwuk ke payuk el orekla in oasr pal nukewa a tia ke kitin pal na. A el luti ke akwuk mwomwo puspus fwin orekmakinyuk ku in kasru met in sou nukewa in tia oru kain in oiya a ella tia fwal su ku in aksensenye moul in payuk a akwanginyela engan a insemwomwo lun sou lalos. (Mattu 5:27-37; 7:12) Me lutlut se inge el fwa akuteye la fuka me luti puspus lun Jisus a me srikasrak su el akkalemye ke pal se ma el oasr fwin fwalu ku in sang kasru nu sin mokul payuk, mutan payuk, papa a nine nukewa, a tulik nukewa in moulkin moul mwomwo.
Sie Mokul Payuk el Aksaokye Fuka Mutan Kiyel
4. Mea ma oana sie ke kunokon lun Jisus a lun mokul Kristian nukewa su payuk tari?
4 God el srusrngiye mokul payuk nukewa oana sifwen sou, oana Jisus el pa Sifwen congregation. Met sap Poul el akkalemye: “Tu mokul el sifwen mutan kiel, oana Kraist el ouyepa sifwen surs [“congregation,” NW], a el sifwana met lango lun mano. Mokul tuma, komwos in lungse mutan kiomwos, oana Kraist el ouyepa lungse surs, a sifwana esalang ka.” (Efesus 5:23, 25) Aok, oiya mwomwo su Jisus el akkalemye nu sin met tuma lutlut lal el me srikasrak na mwomwo nu sin mokul Kristian nukewa elos in oru pa nu sin mutan kiyelos. Lela kut in lutlutkin ke pal inge ke inkanek puspus su Jisus el orekmakin ku su God el sang nu sel.
5. Jisus el oru fuka ku lal nu sin met tuma lutlut lal?
5 Jisus el “fwokpap a pusisel.” (Mattu 11:29) El sie kain in mokul su tia sangeng in aksumwosye met fwin eneneyuk. Wangin pal su el tia akpayeye kunokon nukewa lal. (Mark 6:34; Jon 2:14-17) El sang kas in kai nu sin met tuma lutlut lal ke inkanek kulang, fwin eneneyuk el oru ma inge ke pal puspus. (Mattu 20:21-28; Mark 9:33-37; Luk 22:24-27) Ne ouinge, Jisus el tia mulat nu selos a tia akmwekinyelos, ku el oru elos in pulakin a nunku mu el tia lungselos, a in nunku mu elos tia fwal in akpayeye ma el luti nu selos in oru. Aok tia ouinge, a el kaksakin met tuma lutlut nukewa lal a akkeyelos in oru ma sumwos. (Luk 10:17-21) Ke ma inge met tuma lutlut lal elos akkalemye sunak nu sin Jisus, meyen el akkalemye kulang a pakoten nu selos!
6. (a) Mea sie mokul payuk el ku in lotela ke inkanek su Jisus el akkalemye nu sin met tuma lutlut lal? (b) Kas in akkeye fuka Piter el akkalemye nu sin mokul payuk nukewa?
6 Me srikasrak lun Jisus el luti mokul payuk nukewa la fwin elos etawi inkanek lal oana sie sifwe, elos fwa tia sapsap upa nu sin mutan kiyelos pal nukewa. A, elos enenu in akkalemye oiya mwomwo nu selos a in lungselos. Met sap Piter el akkeye mokul payuk nukewa elos in etawi inkanek mwomwo lun Jisus ke elos ‘muta yurin’ mutan kiyelos, a in ‘akfulatyelos.’ (Ridi 1 Piter 3:7.) Ke ma inge, fuka sie mokul payuk el ku in orekmakin ku su God el sang nu sel a ke pal sepana el akkalemye oiya mwomwo nu sin mutan kiyel oana sie mutan su fwal in akfulatyeyuk?
7. Ke inkanek fuka mokul payuk el ku in akfulatye mutan kiyel? Sang me pupulyuk.
7 Sie inkanek su mokul el ku in akfulatye mutan kiyel ka pa ke el loang akmwoye nu ke nunak a pulakin lal meet liki el oru sulela ke sou lal. Saap sulela lal pa elos enenu in som a muta ke an saye, ku el eis orekma saye, ku elos fwa som nu ya ke pal in vacation lalos, ku fuka elos ku in akfwalye mani lalos ke molin ma enenu lalos su yokyokelik. Meyen sulela inge fwa orekmakinyuk nu ke sou, paenang mwo nu sin mokul payuk in etu ke nunak a pulakin lun mutan kiyel, meyen ma inge ku in kasrel in orala sie sulela mwomwo, a ku in fusrasr nu sin mutan in kasrel ke sulela lal. (Soakas 15:22) Mokul Kristian payuk nukewa su akfulatye mutan kiyelos elos ku in liye la mutan kiyelos fwa akkalemye lungse a sunak nu selos, a yok sripe liki nukewa, Jeova el fwa insemwomwo kelos.—Efesus 5:28, 29.
Fuka sie Mutan el Akkalemye Sunak Yok nu sin Mokul Tumal
8. Efu ku me srikasrak lal If el tia fwal in etawiyuk nu sin mutan payuk nukewa?
8 Mutan Kristian payuk nukewa elos ku in etawi pa me srikasrak lun Jisus ke el lungse in akpusiselye ke ku. Nunak lal ke ku el tia oana oiya su mutan payuk se meet el akkalemye nu ke ku! If el tia me srikasrak mwo nu sin mutan payuk nukewa in etawi. God el srusrngiye mokul tumal in orekma oana sifwel su Jeova el akkalemye masap nukewa lal ka. Tusruktu, If el tia akkalemye sunak nu ke kunokon lun mokul tumal. El tia akos masap lun God su Adam el akkalemye nu sel. (Genesis 2:16, 17; 3:3; 1 Korint 11:3) Aok, If el kiapeyukla; tusruktu el enenu in siyuk sin mokul tumal fwin el ku in lulalfongi ke pusra se su fwak nu sel mu el e fwak nu sel ke ma “God el etu.” El tia oru ma inge, a el sapkin nu sin mokul tumal ma el enenu in oru, a ke sripe se inge el akkalemye oiyen insefulat a fulang.—Genesis 3:5, 6; 1 Timote 2:14.
9. Me srikasrak fuka ke inse pusisel Jisus el akkalemye?
9 Ke oiya saye, Jisus el akkalemye me srikasrak mwomwo in akpusiselyel sifwana nu sin Leum lal. Oiya lal a inkanek in moul lal akkalemye la el “tia nunku tu ma lal oana God sie ma in sukok.” Aok, “el sifwana akpusiselyel, a nukomang luman sie met kulansap.” (Filippai 2:5-7) Ke pal inge, Jisus el kol oana sie Togusra, el srakna akkalemye kain in oiya lun inse pusisel inge. El akpusiselyel sifwana nu sin Papa tumal ke ma nukewa a el sang kasru nu ke kolyuk Lal.—Mattu 20:23; Jon 5:30; 1 Korint 15:28.
10. Fuka sie mutan payuk el ku in sang kasru nu ke kunokon lun mokul oana sifwen sou?
10 Sie mutan Kristian su payuk tari el enenu in etawi Jisus ke el sang kasru nu ke kunokon lun mokul tumal oana sifwen sou. (Ridi 1 Piter 2:21; 3:1, 2.) Nunku ke sie oiya su enenu in oasr pal mwomwo lal in oru ma inge. Tulik mokul se natul inge siyuk sel fwin el ku in wi som oru ma se. Ke pal se inge, arlana fwal nu sin nine se inge in siyuk sel, “Ya kom siyuk tari sin papa tumom fwin el fwa lela kom in wi oru ma san?” Fwin tulik mokul se natul inge el soenna oru, nine se inge el enenu in sramsramkin ma inge nu sin mokul tumal meet liki el oru kutena sulela lal nu ka. Sayen ma inge, sie mutan Kristian payuk el enenu in tia lain sulela lun mokul tumal ye mutun tulik natultal. Fwin el tia insese ke sulela lun mokul tumal, el fwa sramsram nu sin mokul tumal ka, ke elos mukelana muta.—Efesus 6:4.
Me Srikasrak lun Jisus nu sin Papa a Nine Nukewa
11. Me srikasrak fuka Jisus el akkalemye nu sin papa a nine nukewa?
11 Fwinne Jisus el tia met payuk se a wangin tulik natul, tusruktu el sie me srikasrak mwomwo nu sin papa a nine nukewa su met Kristian. Ke inkanek fuka? El kulang a mongfusrasr in luti met tuma lutlut lal ke inkanek lun kas a me srikasrak lal. El akkalemye nu selos ke inkanek mwo in akpayeye kunokon su el sang nu selos. (Luk 8:1) Inkanek mwo a oiya mwo su Jisus el oru nu sin met tuma lutlut lal lotelos ke me srikasrak mwo la oiya fuka elos enenu in akkalemye nu sin sie sin sie.—Ridi Jon 13:14-17.
12, 13. Mea eneneyuk fwin papa a nine elos lungse tulik natulos in oasr sangeng a lungse yok nu sin God?
12 Tulik elos lungse pal nukewa in etawi papa a nine kiyelos, fwinne elos oru ma mwo ku ma koluk. Ke ma inge, papa a nine, komwos in siyuk sumwos sifwana: ‘Mea tulik nutusr elos liye ke me srikasrak lasr ke lusen pal su kut orekmakin in liye TV a me akengan? A ke me srikasrak lasr in orekmakin pal mwomwo lasr in lutlutkin Baibel a in wi ke orekma in luti peng mwo? Mea ma yok sripe nu ke moul lasr oana sie sou? Ya kut akkalemye me srikasrak mwomwo ke kut oru meet ke moul lasr akwuk nukewa ke alu paye?’ Masap lun God enenu in oan meet ke insien papa a nine fwin elos lungse tulik natulos in kapkapek a oasr lungse paye lalos nu sin God.—Duteronomi 6:6.
13 Fwin papa a nine elos kafweang in orekmakin akwuk mwomwo ke Baibel len nukewa, tulik natulos ku in akilen ma inge. Kas a me luti lun papa a nine fwa oasr kasru yok nu selos. Tusruktu, fwin tulik elos liye a akilen la papa a nine elos tia orekmakin ke moul lalos ma elos luti a sapkin nu sin tulik in oru, tulik elos ku in nunku mu akwuk mwomwo lun Baibel el tia yok sripe ku tia ku in kasrelos. Ke ma inge, tulik elos tia ku in tu na ku fwin oasr me akkoluk lun fwal se inge.
14, 15. Akwuk mwomwo fuka papa a nine elos enenu in akkeye nu sin tulik natulos? A mea sie inkanek elos ku in oru ma inge?
14 Papa a nine su met Kristian elos akilen la ke orekma in karungin tulik srisrik oasr ma eneneyuk saye liki na in sang mongo, nuknuk a ma enenu lalos. Ke ma inge, tia inkanek mwo in luti sie tulik in kafweang in sun akwuk puspus su fwa ku in kasrel mukena in eis ma saok puspus lun fwalu. (Ekklisiastis 7:12) Jisus el luti met tuma lutlut lal elos in suk meet togusrai a sumwosmwos lal. (Mattu 6:33) Ke ma inge, in etawi Jisus, papa a nine su met Kristian elos enenu in kafweang in kasru tulik natulos in oasr lungse lalos in akyokye orekma in kulansap nu sin Jeova.
15 Sie inkanek su papa a nine ku in oru ouinge pa in suk in oasr pal mwomwo nu sin tulik natulos in asrouki nu sin met lili puspus su oru orekma lun pioneer. Sie me akkeye yok nu sin met fwusr ke elos aetui nu sin pioneer puspus ku nu sin circuit overseer a mutan kiyel. Missionary puspus, Bethelite puspus, a met lili nukewa su wi oru orekma in musa fwin fwalu nufon su muteta nu ke an sum elos ku in sramsram wi engan lalos ke insemwomwo yok in kulansap nu sin Jeova. Aok, met lili wiyesr inge su muteta oasr experience puspus lalos su elos fwa akkalemye. Me srikasrak lalos in orekmakin pal nukewa lalos ke orekma in kulansap ku in sang me kasru yok nu sin tulik nutum ke elos orala sulela lalos, in orala niyen sun mwomwo lalos in kulansap nu sin God. A in eis lutlut a me akpa mwomwo ke loom lutlut in ku in kasrelos in akpayeye orekma lalos in kulansap nu sin God pal nukewa.
Tulik Srisrik—Mea Kasre Komwos in Etawi Me Srikasrak lun Jisus?
16. Fuka Jisus el akfulatye papa a nine kiyel fwin fwalu a Papa tumal su oasr in kosrao?
16 Tulik srisrik nukewa, Jisus el akkalemye pa sie me srikasrak mwomwo nu sumwos. Josef a Mary elos eis kunokon in karungin Jisus, a el aksolos pal nukewa. (Ridi Luk 2:51.) El etu a akilen la, fwinne elos met sesumwos, God el sang nu selos sie kunokon mwomwo in karunganul. Ke sripe se inge, Jisus el akfulatyelos. (Duteronomi 5:16; Mattu 15:4) Ke el matula, Jisus el oru pal nukewa ma puspus su ku in akinsemwomwoye Papa tumal in kosrao. In oru papa tumal in engan el lain me srufwe nukewa. (Mattu 4:1-10) Komwos met fwusr ku pa in oasr pal komwos srufweyuk in seakos papa a nine kiyomwos. Ke ma inge, mea ku in kasre komwos in etawi me srikasrak lun Jisus?
17, 18. (a) Kain in ma upa fuka met fwusr elos sun ke loom lutlut? (b) Mea met fwusr elos enenu in esam in kasrelos in muteng a lain me srufwe nukewa?
17 Saap, tulik lutlut su wi kom ke loom lutlut elos tia akos a akfulatye akwuk mwomwo lun Baibel. Elos ku pa in srike in patok kom in wi ke kain in orekma koluk a fwin kom srunga in welulos elos fwa isrun kom a angon kom. Ya tulik lutlut wi kom lutlut elos pangon kom ke e koluk puspus meyen kom tia welulos ke orekma koluk lalos? Fwin elos oru ma inge, mea kom oru? Kom etu la fwin kom lela met puspus in kiapekomla a welulos, kom fwa akasorye papa a nine kiyom a Jeova. Mea e fwa sikyak nu sum fwin kom akos tulik lutlut puspus wiyom inge? Saap kom orala tari niyen sun mwomwo nu sum sifwana, oana in sroang ke orekma lun pioneer ku in oru kunokon lun sie ministerial servant. A saap kom lungse pa in oru orekma in kulansap ke sie territory su oasr ma enenu yok we ke met fwakak peng mwo, ku kom lungse in kulansap oana sie Bethelite. Kom fwin asrouki yurin tulik lutlut wi kom lutlut, ya ma inge ku in kasre kom in akpayeye akwuk mwomwo su kom lungse in oru?
18 Met Kristian fwusr ke congregation, ya komwos liye la oasr pal puspus ke lulalfongi lomwos srufweyuk? Oiya fuka kom akkalemye nu ka? Nunku akmwoye kel Jisus in me srikasrak mwomwo lom. El tia fuleak ke me srufwe puspus a el tu na ku ke ma su el etu la sumwos a fwal. Kom fwin esam ke me srikasrak mwomwo lal, ma inge ku in akkeye kom fwak nu sin tulik lutlut wi kom lutlut su arlana kalem la kom srunga in welulos in oru ma nukewa su kom etu la tia sumwos. In oana Jisus, kom enenu in loang akmwoye nu ke fwinsrak mwo lom in oru orekma in kulansap mwomwo a in akos Jeova ke lusen moul lom nukewa.—Hibru 12:2.
Key nu ke Moul Insemwomwo lun Sou
19. Inkanek fuka lun moul ku in ase engan a insemwomwo paye?
19 Jeova God a Jisus Kraist elos lungse met nukewa in engankin ma mwo emeet. Fwinne kut srakna sesumwos ke pal inge, kut ku in pulakin me insemwomwo. (Isaia 48:17, 18; Mattu 5:3) Jisus el luti ma paye nukewa su ku in oru metu in pulakin insemwomwo paye, tusruktu oasr pa ma saye puspus su el akkalemye nu sin met tuma lutlut puspus lal. Jisus el lutiyuk pa ke inkanek mwo emeet lun moul. Yok liki ma inge, el akkalemye ke sie me srikasrak mwo ke sie moul mwo a oiya mwomwo. Kut nukewa, fwin kut papa ku nine ku tulik, kut ku in eis ma lane yok kut fwin etawi me srikasrak mwomwo lal. Ke ma inge, komwos mokul payuk, mutan payuk, papa a nine, a tulik, etawi me srikasrak lun Jisus! Orekmakin me luti nukewa lun Jisus a in etawi me srikasrak lal pa key in pulakin engan a moul insemwomwo lun sou.
Kom E Topuk Fuka?
• Fuka mokul payuk elos ku in oru kunokon su God el sang nu selos?
• Fuka sie mutan payuk el ku in etawi me srikasrak lun Jisus?
• Mea papa a nine puspus elos ku in lotela ke oiya su Jisus el akkalemye nu sin met tuma lutlut nukewa lal?
• Mea tulik fwusr elos ku in lotela ke me srikasrak lun Jisus?
[Picture on page 15]
Meet liki sie mokul payuk el oru sulela nu ke sou lal, mea el enenu in oru?
[Picture on page 16]
Ke oiya fuka sie mutan payuk el ku in akkalemye la el sang kasru nu ke kunokon lun mokul oana sifwen sou?
[Picture on page 17]
Tulik srisrik elos etawi oiya mwomwo lun papa a nine kiyelos