Ya Kom Lela Ku lun God in Kol Komi?
“Ku lom mwona; lela ma inge in kol yu nu ke fwal sumwosmwos.”—SAM 143:10, NW.
1, 2. (a) Akkalemye ke kutu ma sikyak la Jeova el orekmakin ku lal in kasru met kulansap puspus lal. (b) Ya ku lun God el orekma na ke kutu ma yok sripe su sikyak? Akuteye.
MEA kom ku in esam kom fwin nunku ke orekma lun ku lun God? Ya kom ku in lumala ke nunak lom orekma lal Gideon a Samson? (Met Nununku 6:33, 34; 15:14, 15) Saap kom nunku pa ke pulaik su akkalemyeyuk sin met Kristian in pal meeta, ku ke nunak misla lal Stefen ke el tu na ku ye mutun met puspus ke Sanedrin. (Orekma 4:31; 6:15) In pal inge, na fuka ke insemwomwo yok su oasr yurin met nukewa su wi ke toeni lulap lasr, a yurin met lili su ke sripen oaru lalos elos kalyaiyuk a filiyuki nu niyen prison, a ke engun su kut pulakin ke sripen kapkapek yok ke orekma in luti lasr? Me pupulyuk inge nukewa sang me akpayeye ke orekma lun ku lun God.
2 Ya ku lun God el orekmakinyuk mukena kais kutu pal nu ke kain in oiya a ma yok sripe puspus? Mo. Kas lun God el akkalemye ke met Kristian su ‘fwufwasryesr ke ku lun God,’ “kolyuk sin ku lun God,” a “moul ke ku lun God.” (Galetia 5:16, 18, 25) Kas inge nukewa akkalemye la ku lun God ku in kasru moul lasr pal nukewa. Len nukewa, kut enenu in pre siyuk sin Jeova in kasru nunak, kaskas, a orekma lasr ke inkanek lun ku lal. (Ridi Sam 143:10.) Ke kut lela ku lun God in orekma ke moul lasr, ma inge fwa orala fwako mwo nu sesr su ku in me akkeye nu sin met puspus a sang kaksak nu sin God.
3. (a) Efu ku kut enenu kolyuk lun ku lun God? (b) Kusensiyuk puspus fuka kut fwa nunku yok ka?
3 Efu ku yok sripe la oasr kasru lun ku lun God ke moul lasr? Meyen oasr siepa oiya su oasr in kut, sie oiya su lain orekma lun ku lun God. Oiya saye se inge akkalemyeyuk in ma Simusla oana ke kas inge “ikwe,” su kalmekin nu ke kena koluk su oasr yurosr, su kut usrui sel Adam oana tulik natul. (Ridi Galetia 5:17.) Mea ma eneneyuk in lela kut sifwana in oasr kolyuk lun ku lun God ke moul lasr? Ya oasr inkanek mwomwo su kut ku in orekmakin in lain kena koluk lun ikwe? Lela kut in liye me top nu ke kusensiyuk nukewa inge ke kut lutlutkin ke fwako onkosr inge lun ku lun God, oana ‘mongfusrasr, kulang, inse mwo, lulalfongi, fwokpap, a sifwana leumi.’—Galetia 5:22, 23.
Oiyen Fwokpap a Mongfusrasr Akkeye Misla ke Congregation
4. Fuka oiyen fwokpap a mongfusrasr sang kasru nu ke misla ke congregation?
4 Ridi Kolosse 3:12, 13. Ke congregation, oiyen fwokpap a mongfusrasr tukeni eneneyuk in akkeye misla. Fwako luo inge lun ku lun God ku in kasre kut in oru kulang nu sin met lili puspus, a in misla na fwin oasr me purakak koluk, a kasre kut in tia folokin ma koluk lun met saye fwin oasr ma elos fwak ku oru su tia mwo. Fwin oasr ma upa lasr nu sin sie met lili, mongfusrasr ku muteng, ku in kasre kut in tia sruokye inse toasr nu sin sie brother ku sister wiyesr, a kut enenu in kafweang ke ku lasr kewa in aksumwosye ma upa lasr nu sin sie met lili. Ya oiyen fwokpap a sifwana leumi eneneyuk na paye ke congregation? Aok, meyen kut nukewa sesumwos.
5. Mea sikyak inmasrlol Poul a Barnabas, a mea ma inge akkalemye?
5 Nunku ke ma sikyak inmasrlol Poul a Barnabas. Elos tukeni orekma ke lusen yea puspus ke orekma in sulkakin peng mwo. Kais sie selos oasr oiya mwomwo lalos. Ne ouinge, ke sie pal, oasr “sie akukuin lulap sikyuk in masrloltal, a ou inge eltal fwasr liki sie sin sie.” (Orekma 15:36-39) Ma inge su sikyak in pal meeta akkalemye la fwinne inmasrlon met Kristian su oasr lungse yok lalos nu sin God, oasr pal ma upa a akukuin ku in sikyak. Fwin oasr ma upa lun sie met Kristian nu sin met lili wiyel, ma fuka el ku in oru elos in tia akukuin upa, amulati sie sin sie su ku in kunausla fototo lalos?
6, 7. (a) Kas in kasru fuka lun ma Simusla kut ku in orekmakin meet liki sie me sramsram yurin sie met lili ekla sie akukuin lulap? (b) Me insemwomwo puspus fuka tuku fwin kut “sa in long, a pat in kaskas a in mulat”?
6 In oana ke pulo kas se inge “sie akukuin lulap” el akkalemye, ma sikyak se inge inmasrlol Poul a Barnabas arlana upa. Fwin sie met Kristian el pulakin mu el mutawauk in mulat ke pal se el sramsramkin ma se nu sin sie met lili, mwo elan porongo kas in kasru se inge su simusyukla in Jemes 1:19, 20: “A lela tu met nu kemwa in sa in long, a pat in kaskas a in mulat; tu mulat lun met tia oru sumwosmwos lun God.” El ku in srike in ekulla ma se ma elos sramsramkin inge, el ku pa in oru sramsram lalos ke sie pal saye, ku el ku in som meet liki sramsram lalos ekla nu ke sie akukuin lulap.—Soakas 12:16; 17:14; 29:11.
7 Ma mwomwo fuka sie met Kristian ku in eis fwin el akos kas in kasru se inge? Ke inkanek in orekmakin pal tu in tia oasr akukuin, in kafweang pa in pre ka, a in nunku pa ke inkanek mwomwo in sang me top mwomwo, sie met Kristian el akkalemye la el lela ku lun God in kol a orekma nu ke moul lal. (Soakas 15:1, 28) Ke kasru lun ku lun God, el ku in akkalemye oiyen fwokpap a mongfusrasr. Ke ma inge el arlana fwal in porongo kas in kasru su oasr in Efesus 4:26, 29: “Komwos in mulat, a tia orek ma koluk . . . Komwos in tia lela kas fokfok in som liki oalumwos, a kutena su mwo, kas in musaiyuk fwal nu ke enenu, tu in sang kulang nu sin su porongo.” Aok kut fwin orekmakin ke moul lasr oiyen fwokpap a mongfusrasr, kut akkeye misla a inse sefwanna lun congregation.
Akkeye Sou Lom Ke Inkanek lun Kulang a Mwo Oiya
8, 9. Mea se inge oiyen kulang, a inse mwo? A mea oiya mwo luo inge ku in oru nu ke moul lun met nukewa ke sou?
8 Ridi Efesus 4:31, 32; 5:8, 9. In oana ke engyeng srisrik a me nim ou ke sie len su arlana fwol, kulang a inse mwo el sie me akkeye yok. Inmasrlon met nukewa ke sou, oiya mwomwo inge ku in kasrelos in oasr sramsram a asrouki mwomwo nu sin sie sin sie. Kulang el sie oiya mwomwo su tuku ke nunak mwo a paye nu sin met puspus, oiya su akkalemyeyuk ke orekma in sang kasru a ke kas mwomwo. Inse mwo, su oana ke kulang, el sie oiya su arlana mwo a ma inge akkalemyeyuk ke orekma su ku in akinsemwomwoye met puspus. Ma inge arlana kalem pa ke orekma su lungse in sang. (Orekma 9:36, 39; 16:14, 15) Tusruktu inse mwo el kalmekin pa nu ke ma saye.
9 Inse mwo el kalmekin pa nu ke oiyen moul nasnas. Ma inge arlana kalem ke ma kut oru a yok liki ma inge pa oiya paye lasr. Srike lumala ke nunak lom sie mutan su akola fwokun sak nan sou lal, el tuni akmwoye kais sie ipin fwokun sak inge ke el supikye ma inge, in akpayeye la ma inge mwes a emem na paye, a in etu na paye la tia kolukla lu a likin fwako se inge. Ke inkanek oapana inge, inse mwo su fwako lun ku lun God el sang kasru yok nu ke inkanek nukewa ke moul lun sie met Kristian.
10. Mea ku in orek in kasru met nukewa in sou in akkeye fwako lun ku lun God?
10 Ke sie sou lun met Kristian, mea ku in kasru met nukewa ke sou in akkalemye kulang a inse mwo nu sin sie sin sie? Etauk sumwos ke Kas lun God el me kasru na yok ka. (Kolosse 3:9, 10) Kutu sin sifwen sou elos orala akwuk in lutlutkin pa fwako lun ku lun God ke Tukeni Lutlut lalos oana sie sou kais sie wik. Akwuk in lutlutkin fwako lun ku lun God el tia upa in oru. Kom fwin orekmakin kofwen research lasr su oasr ke kas lom, kom ku in sulela sie me lutlut ke kais sie fwako lun ku lun God. Kom ku in orekmakin kutu paragraph ke kais sie wik, a lutlutkin kais sie oiya mwo inge ke lusen wik puspus. Ke kom lutlutkin me lutlut, rid a akuteye ma simusla su akkalemyeyuk ke paragraph. Suk ke inkanek puspus la fuka kom ku in orekmakin ma kom lotela, a pre nu sin Jeova in akinsemwomwoye kafweang lom inge. (1 Timote 4:15; 1 Jon 5:14, 15) Ya akwuk mwo inge in lutlutkin fwako lun ku lun God el ku in kasru na paye met nukewa in sou in akkalemye oiya mwomwo nu sin sie sin sie?
11, 12. Fuka siyanyen Kristian luo elos eis me kasru yok ke lutlut lalos ke oiyen kulang?
11 Oasr sie siyanyen fwusr, elos lungse in eis kutangla ke moul in payuk lalos, paenang elos sulela in oru lutlut yok ke fwako lun ku lun God. Elos akinsemwomwoyeyuk fuka ke kafweang lalos inge? Mutan payuk se inge el fwak: “Kut lotela la kalmen kulang pa in oaru a in lung kulang, a ma inge sang kasru yok nu sesr ke oiya su kut akkalemye nu sin sie sin sie nu ke pal inge. Ma inge luti kut in oasr nunak in fulela a in nunak munas nu sin sie sin sie. A ma inge kasre kut pa in lotela in fwak ‘kulo ma lulap’ a ‘sisla koluk’ ke pal fwal.”
12 Sie pa siyanyen su met Kristian pa, su pulakin ma upa ke moul in payuk, elos akilen la elos tia akkalemye kulang nu sin sie sin sie. Elos sulela in tukeni lutlutkin me lutlut ke kulang. Mea fwokin orekma lalos inge? Mokul el fwak: “Lutlut lasr ke kulang kasre kut in liye ke ma eneneyuk in tia nunak koluk nu sin sie sin sie, a in kafweang in liye ma mwo nu sin sie sin sie. Kut mutawauk in nunku yok in akilen a akpayeye ma enenu lun sie sin sie. Nga kafweang in akkalemye kulang a oasr ma eneneyuk nu sik in siyuk mutan kiyuk elan sukosok in akkalemye ma oasr ke nunak lal a ngan enenu in tia toasr ke ma el fwak nu sik. Kalmen ma inge pa ngan sisla oiyen inse fulat luk. Ke kut mutawauk in orekmakin oiyen kulang ke moul in payuk lasr, kut tui pa in atopuki sie sin sie. Paye la ma inge aksukosokyekutla liki oiya koluk.” Ya sou lom ku in eis me kasru ke lutlut lun fwako lun ku lun God?
Orekmakin Lulalfongi ke Kom Mukelana Muta
13. Me sensen fuka nu ke fototo lasr nu sin God kut enenu in taran ka?
13 Met Kristian elos enenu in lela ku lun God in kololos ye mutun met puspus a ke elos mukelana muta. Ke pal inge, ke fwal lal Setan, oasr kain in petsa fokfok a me akengan koluk su arlana pusla. Ma inge ku in kunausla fototo lasr nu sin Jeova. Mea sie met Kristian el enenu in oru? Kas lun God el kaifwe kut: ‘Komwos in sisla sipoklot nu kemwa, a koluk tingtinginu, a komwos in eis efwal ke kas ma eoki nu insiomwos ma inge ku in molela moul lomwos.’ (Jemes 1:21) Lela kut in lutlutkin la fuka lulalfongi, su siepa fwako lun ku lun God, ku in kasre kut in nasnas pal nukewa ye mutun Jeova.
14. Fwin wangin lulalfongi, fuka ma inge ku in kol metu in oru oiya koluk?
14 Fwin oasr yurosr lulalfongi paye, kut nunku kel Jeova God la el paye. Fwin God el tia paye nu sesr, fusrasr kut in wi oru oiya koluk. Nunku akmwoye ke ma sikyak nu sin met lun God in pal meeta. Jeova el akkalemye nu sel met palu Ezikiel la oasr me srungeyuk puspus su orek in lukma, el fwak: “Mwen nutin met, ya kom liye ma met matu lun loom sel Israel oru in losru, kais sie met in fwokil sesesla ke ma srolela lal? Tu elos fwak: ‘Jeova el tia liye kut. Jeova el fwasr liki fwal se inge.’” (Ezikiel 8:12, NW) Ya kom liye la mea paenang elos oru ma inge? Elos tia lulalfongi la Jeova el etu ma elos oru. Jeova el tia paye nu selos.
15. Lulalfongi fokoko lasr nu sin Jeova ku in kasre kut fuka?
15 Ke luma saye, nunku ke me srikasrak mwomwo lal Josef. Oasr pal el muta ke sie an su loes liki sou a met lal, ne ouinge Josef el srunga in orek kosro nu sin mutan kiyel Potifar. Efu? El fwak ouinge: “Na fuka nga ku in oru ma koluk lulap se inge, a oru ma sito lain God?” (Genesis 39:7-9) Aok, Jeova el arlana paye nu sel. Fwin God el paye pa nu sesr, kut fwa tia liye me akengan fokfok, a kut tia pa oru kutena ma ke lukma su kut etu la ku in aktoasrye God. Kut lungse pa in tu ku in akpayeye sulela lasr oana sulela lun met sim lun sam: “Nga fwa fwafwasryesr in loom sik wi inse sumwosna. Nga fwa tia likiye ma sito ye mutuk.”—Sam 101:2, 3.
Liaung Insiom ke kom Sifwana Leum Fwom
16, 17. (a) In oana ke ma akkalemyeyuk ke buk lun Soakas, sie “met fwusr su wangin lalmetmet yuro” el srufweyukla fuka? (b) In oana ke ma akkalemyeyuk in sra 19, fuka ma inge ku in sikyak pa ke pal inge nu sin met ke kain in matwe nukewa?
16 Sifwana leum fwom, pa fwako safla ke fwako lun ku lun God, su ku in kasre kut in fwak mo nu ke ma puspus su God el srunga. Ma inge ku in kasre kut in karungin insiesr. (Soakas 4:23) Nunku ke oiya su akkalemyeyuk in Soakas 7:6-23, la fuka “sie met fwusr su wangin lalmetmet lal” el kiapeyukla ke inkanek kutasrik lun sie mutan kosro. El srufweyukla tokin el “alukela inkaneku apkurun nu ke srumwasrik lun mutansa.” Saap el forfor wel, a el lungse in liye a etu ma puspus su orek ke an sel. Arlana sa, el tia na akilen la el kufusyukla tari nu ke ma su aksensenye “moul lal.”
17 Fuka met fwusr se inge el ku in fwasr liki ma tafongla se inge? Ke inkanek in loang akmwoye ke kas in sensen se inge: “Nik kom tafongla nu ke inkanek lal.” (Soakas 7:25) Oasr me lutlut yok sripe nu sesr: Kut fwin lungse ku lun God in kasre kut, oasr ma eneneyuk nu sesr in fwasr liki kutena oiya su ku in srufwekutla. Sie inkanek su sie met ku in fwufwasryesr ke inkanek koluk lun ‘sie met fwusr su wangin lalmetmet yuro’ pa ke el srike in liye kain in channel nukewa ke television, ku ke el liye ma puspus ke Internet. Saap oasr kain in petsa fokfok su ku in purakak kena koluk lal su ku in sikyak ke el liye television, ku el liye internet. Ke ma inge el ku in akkeye sie kain in ella koluk in liye petsa fokfok, su ku in kunausla conscience lal a fototo lal nu sin God. Aok ku pa in musalla moul lal.—Ridi Rom 8:5-8.
18. Inkanek mwo fuka sie met Kristian ku in orekmakin in karungin insiel? A fuka sifwana leumi eneneyuk pa nu ka?
18 Aok, kut ku in akkeye oiya mwo inge in sifwana leumi a kut enenu in orekmakin ma inge ke moul lasr fwin oasr petsa fokfok su sikyak ye mutasr. Tusruktu yok sripe liki ma inge pa kut fwin fwasr liki kain in oiya se inge! (Soakas 22:3) Kafweang lasr in orala akwuk mwomwo in karungin kut a in akpayeye ma inge oasr ma eneneyuk nu sesr in akkalemye sifwana leumi. Ke sie me pupulyuk, kut fwin filiye computer lasr ke sie an su met nukewa ke sou lasr elos ku in liye ku in oru kut in tia liye petsa fokfok. Kutu met elos liye la mwo na paye nu selos fwin elos orekmakin computer ku liye television ke pal se oasr met saye su welulos liye. Kutu met elos oru sulela in tia orekmakin Internet. (Ridi Mattu 5:27-30.) Lela kut in orekmakin inkanek mwo nukewa su eneneyuk in karungin kut sifwana a sou lasr tu kut in ku in alu nu sin Jeova ke “inse paye, a ella mwo, a lalalfongi paye.”—1 Timote 1:5.
19. Me insemwomwo puspus fuka kut ku in eis fwin kut lela ku lun God in kol kut?
19 Fwako mwomwo nukewa su tuku ke orekma lun ku lun God ase nu sesr me insemwomwo puspus. Oiyen fwokpap a mongfusrasr akkeye misla ke congregation. Kulang a inse mwo akkeye insemwomwo lun sou. Lulalfongi a sifwana leumi kasre kut in fototo pal nukewa nu sin Jeova a in nasnas ye mutal pal nukewa. Sayen ma inge, Galatia 6:8 el akkalemye nu sesr la mwo kut in taknelik orekma mwomwo lasr nu sin God a kut fwa kosrani moul ma patpat. Aok, in fwal nu ke lango lun Kraist, Jeova el fwa orekmakin ku lal in sang moul ma patpat nu selos su lela ku lun God in kololos.
Kom E Topuk Fuka?
• Fuka fwokpap a mongfusrasr akkeye misla ke congregation?
• Mea ku in kasru met Kristian in akkalemye kulang a inse mwo nu sin sou lal?
• Fuka lulalfongi a sifwana leumi kasru sie met Kristian in liaung insiel?
[Petsac ke sra 17]
Lutlut ke fwako lun ku lun God ku in akinsemwomwoye sou lom
[Petsac ke sra 19]
Kut fwin akkalemye lulalfongi a sifwana leumi, kut ku in fwasr liki ke kain in me sensen fuka?