Lungse Ma Sumwosmwos Ke Insiom Kewa

“Kom lungse sumwosmwos.”—SAM 45:7.

1. Mea fwa kasre kut in fwasr ke “inkanek sumwosmwos”?

KE INKANEK lun Kas lal a ku lal, Jeova el kol met kulansap nukewa lal ke “inkanek sumwosmwos.” (Sam 23:3) Tusruktu, ke sripen kut sesumwos, oasr pal kut ku in tia fwasr ke inkanek sumwos inge. Kut fwin lungse in sifwilpa folok nu ke inkanek sumwos in oru ma mwo, oasr ma eneneyuk kut in kafweang yok. Mea fwa kasre kut in akpayeye ma inge? In oana Jisus, kut enenu in lungse in oru ma sumwos.—Rid Sam 45:7.

2. Mea se inge “inkanek sumwosmwos”?

² Mea kalmen “inkanek sumwosmwos”? “Inkanek” inge el kalmekin nu ke oiya a orekma su fwal nu ke akwuk fulat lun Jeova ke ma sumwosmwos. Ke kas Hibru a kas Grik, kas inge “sumwosmwos” el kalmekin nu ke kafweang in orekmakin oiyen moul nasnas. Ke sripen Jeova pa “nien muta lun sumwosmwos,” met nukewa su alu nu sel elos engun in ngetak nu sel in akilen inkanek sumwos su elos enenu in fwasr ka.—Jeremaia 50:7.

3. Fuka kut ku in eis etauk ke sumwosmwos lun God?

³ Inkanek sefwanna su God el ku in insemwomwo kesr pa kut fwin kafweang ke inse kewa lasr in akfwalye moul lasr nu ke akwuk sumwosmwos lal. (Duteronomi 32:4) Ma inge ku in mutawauk ke kut lotela ma nukewa ke ku lasr kewa kel Jeova God ke inkanek lun Baibel. Fwin oasr etauk yok lasr kel, a akfototoye kut nu sel len na len, kut ku in akkalemye lungse yok ke sumwosmwos lal. (Jemes 4:8) Kut enenu pa in eis a orekmakin kas in kolyuk su oasr ke Kas lun God ke pal se kut enenu in oru sulela yok sripe ke moul lasr.

Suk Sumwosmwos lun God

4. Mea eneneyuk nu ke orekma lasr in suk ke ma sumwosmwos lun God?

⁴ Ridi Mattu 6:33. Ke orekma lasr in suk ke ma sumwosmwos lun God oasr ma eneneyuk yok liki na in orekmakin pal lasr in sulkakin peng mwo lun Togusrai. Kut fwin lungse tu orekma in kulansap lasr el me akinsemwomwoye nu sin Jeova, oiya a ella lasr len nukewa enenu in fwal nu ke akwuk fulat nukewa lal. Mea enenu in orek sin met nukewa su suk ke ma sumwosmwos lun Jeova? Elos enenu in “nukomang met sasu, su fwal nu sin God orekla tari in sumwosmwos a mutal lun paye.”—Efesus 4:24.

5. Mea fwa kasre kut in akwanginyela asor yok lasr?

⁵ Ke kut kafweang in moulkin moul fwal nu ke akwuk sumwosmwos lun Jeova, saap kutupal kut pulakin asor ku munasla ke sripen ma koluk su kut oru. Mea ku in kasre kut in akwanginyela asor yok a in lutlut in lungse a orekmakin ma sumwosmwos? (Soakas 24:10) Kut enenu in sramsram pal nukewa nu sin Jeova ke inkanek lun pre “ke inse paye in lulalfongi, tia alolo.” (Hibru 10:19-22) Kut fwin sie sin met Kristian akmusrala ku sie sin met su oasr fwinsrak in moul fwin fwalu, kut akkalemye lulalfongi ke me kise lun lango lun Jisus Kraist a ke orekma lal oana sie Met Tol Fulatlanu. (Rom 5:8; Hibru 4:14-16) Sran Jisus su arlana ku, a ma inge akkalemyeyuk ke issue se meet lun magasin se inge. (1 Jon 1:6, 7) Me lutlut se inge el akkalemye ouinge: “Arlana paye la, fwin ma srusra el liyeyuk luun sie sufwa srusra ye lamu ku kalem, ma srusra se inge e fwa liyeyuk oana ma fwasrfwasr; ke ma inge, ma koluk fwinne ma srusra na paye, kut fwin akfwalye moul lasr nu ke akwuk lun God, a ke inkanek lun sran Kraist, God el fwa liye ma inge oana ma fwasrfwasr.” (July 1879, sra 6) Sie akwuk mwolana pa inge su Jeova el orala nu sesr ke inkanek lun me kise lun lango lun Mwen kulo natul!—Isaia 1:18.

Tuni Akmwoye ke Me Meun Lasr

6. Efu ku arlana yok sripe kut in tuni akmwoye me meun lasr pal nukewa?

⁶ Pal nukewa, kut enenu in orekmakin ‘me loeyuk in iumwe lun sumwosmwos,’ meyen ma inge el sie ipin me meun lasr su tuku sin God su arlana yok sripe. (Efesus 6:11, 14) Arlana yok sripe kut in tuni akmwoye me meun lasr len nukewa, fwinne kut tufwana mwulela moul lasr nu sin Jeova, ku kut oru orekma in kulansap lasr nu sel ke lusen yea puspus. Efu? Meyen Setan a lipufan koluk nukewa lal sisila tari nu fwalu. (Fwakyuk 12:7-12) Setan el arlana mulat, a el etu la pal lula lal fototola. Ke ma inge, el liksreni na paye in akkolukye met kulansap nukewa lun God. Ya kut etu a kalem la arlana yok sripe kut in orekmakin pal nukewa ‘me loeyuk in iumwe lun sumwosmwos’?

7. Oiya fuka kut fwa akkalemye kut fwin etu a kalem ke ma enenu lasr ke ‘me loeyuk in iumwe lun sumwosmwos’?

⁷ Me loeyuk in iumwe el sang me karungin nu ke insiesr. Oayepa ke sripen oiyen sesumwos lasr, insiesr su lumeyuk pa nu ke oiya paye lasr el ku in kutasrik a koluk. (Jeremaia 17:9) Ke sripen insiesr el ku pa in oru ma koluk, paenang arlana yok sripe in sang akpa mwomwo nu ka a kai. (Genesis 8:21) Kut fwin etu ke ma enenu lasr ke ‘me loeyuk in iumwe lun sumwosmwos,’ kut fwa tia eisla ma inge fwinne ke kitin pal ke kut sulela kain in me akengan su akkalemye ke ma God el srunga; ku kut fwa tia pa lela kut in lumala ke nunak lasr la kut in wi pa oru ma koluk. Kut fwa tia sisla pal yok lasr in liye television. A, kut lungse in kafweang in oru ma nukewa su ku in akinsemwomwoye Jeova. Fwinne kut tukulkul a fuleak kutupal a orekmakin nunak lasr in nunku ke ma sesumwos, kut fwa sifwil tuyuk ke kasru lun Jeova.—Ridi Soakas 24:16.

8. Efu ku kut enenu “me loeyuk lun lulalfongi”?

⁸ Siepa ip lun me meun lasr pa “me loeyuk lun lulalfongi.” Ma inge ku in kasre kut in “kunela mwusra e nukewa lun el su koluk.” (Efesus 6:16) A lulalfongi a lungse nu sin Jeova ke inse kewa lasr ku in kasre kut in orekmakin ma sumwosmwos a in fwasr pal nukewa ke inkanek sumwos nu ke moul ma patpat. Kut ku in aksaokye ma sumwosmwos lal ke inkanek yok kut fwin lotela oiya puspus in akkalemye lungse nu sin Jeova. Tusruktu na fuka ke ella, ku conscience lasr? Fuka ma inge ku in kasre kut ke kafweang lasr in lungse ma sumwosmwos?

Sruokye sie Ella ku Conscience Mwomwo

9. Fuka kut ku in eis ma lane kut fwin sruokye sie conscience mwo?

⁹ Ke pal se kut baptais, kut orala sie me siyuk nu sin Jeova ke sie “ella mwo.” (1 Piter 3:21) Ke sripen kut akkalemye lulalfongi ke me lango, sran Jisus el afwunye ma koluk lasr a ke ma inge kut engunkin sie oiya mwomwo ye mutun God. Tusruktu, kut enenu in sruokye pal nukewa sie ella ku conscience mwomwo, tu kut in karungin oiya mwo a nasnas ye mutun God. Ke pal se conscience lasr oru kut in pula mu oasr ma koluk kut oru a ma inge aksensenye kut, kut enenu in insemwomwo ka meyen ella lasr el mwo a fwal. Ma inge akkalemye la ella lasr el srakna mwo a tia matoltol la a srakna pulakin la mea ma mwo in fwal nu ke inkanek sumwos lun Jeova. (1 Timote 4:2) Tusruktu conscience el ku in sang kutupa kasru nu sin met nukewa su lungse ma sumwosmwos.

10, 11. (a) Akuteye sie experience su akkalemye ke sripe paenang kut enenu in porongo conscience lasr su fwal nu ke akwuk lun Baibel. (b) Efu ku lungse ke ma sumwosmwos ase nu sesr me insemwomwo yok?

¹⁰ Kut fwin oru ma koluk, conscience lasr ku in oru kut in pulakin mu oasr ma koluk upa su kut oru, ku ma inge ku pa in akkeokye nunak lasr. Oasr sie met fwusr su som liki “inkanek sumwosmwos.” El arlana lungse in liye petsa a me rid fokfok a el mutawauk pa in orekmakin maru. Tia mwo pulakin lal ke pal se el wi ke meeting lun congregation. A el pulakin mu el oana sie met mwosounkas a orek luma mukena ke pal se el wi ke orekma in luti peng mwo, ke ma inge el tui in wi meeting a ke orekma in sulkakin peng mwo. El fwak: “Tusruktu, nga tia akilen la conscience luk el oru ngan pulakin a nunku la ngan enenu in eis kai upa ke orekma koluk luk.” El fwak pa la, “Nga moulkin kain in moul inge ke lusen yea akosr.” Tokin ma inge el mutawauk in nunku in forla nu ke ma paye. Paye la el nunku mu Jeova el fwa tia long pre lal, ne ouinge el pre a siyuk nunak munas ka. Tok, ke kitin pal na su tia sun minit sengoul, nine kiyel muteta nu yurol a akkeyel in sifwilpa wi ke meeting lun congregation. El som nu ke Kingdom Hall a el siyuk sin sie met elder in oru lutlut nu sel. Tokin kutupal, el eis baptais, a el sang kulo nu sin Jeova in molela moul lal.

¹¹ Ya kut tia pulakin pa me insemwomwo yok su tuku ke kafweang lasr in oru ma mwo? Ke kut lotela in lungse ma sumwosmwos a orekmakin ma inge ke inkanek yok, kut fwa pulakin engan yok in oru ma nukewa su akinsemwomwoye Papa tumasr in kosrao. A srike nunku! Len se fwa tuku ke met nukewa elos fwa pulakin me insemwomwo yok ke sripen conscience mwomwo lalos; elos e fwa akkalemye pa oiya mwomwo puspus lun God. Ke ma inge, lela kut in filiye ingena ke insiesr lungse ke ma sumwosmwos a oru Jeova in engan.—Soakas 23:15, 16.

12, 13. Fuka kut ku in sang akpa nu ke ella lasr?

¹² Mea kut ku in oru in sang akpa ke conscience lasr? Ke pal se kut lutlutkin ma Simusla, a me rid nukewa nutusr su tuku ke Baibel, arlana yok sripe kut in esam la “insien met lalmetmet nunku ke topuk.” (Soakas 15:28) Nunku pa la fuka ma inge ku in kasre kut fwin oasr kusensiyuk puspus ke sie orekma su kut lungse in oru. Fwin sie orekma el kalem la lain masap ke ma Simusla, kut sa in porongo kas in kasru su met kulansap oaru a lalmetmet elos akkalemye ka. Tusruktu, ke pal se tia kalem fwin sie orekma el fwal ku tia, kut enenu in suk ke akwuk yok sripe lun Baibel su ku in orekmakin nu ka a nunku a pre ke akwuk yok sripe inge.a Kut ku in orekmakin oiya se inge nu ke akwuk mwomwo su ku in kasre kut in tia aktukulkulye conscience lun met puspus saye. (1 Korint 10:31-33) Kut enenu in nunku yok ke akwuk mwomwo lun Baibel su me kasru yok nu ke fototo lasr nu sin God. Fwin Jeova el paye nu sesr, kut fwa siyuk sesr sifwana kusensiyuk inge, ‘Nga fwin oru orekma se inge, ya ma inge ku in akasorye Jeova?’—Sam 78:40, 41.

¹³ Ke pal se kut akola nu ke lutlut lun Tauer in San ku Lutlut Baibel lun Congregation, kut enenu in esam ke ma eneneyuk in sifwilpa nunku ke me lutlut mwomwo su akkalemyeyuk ka. Ya kut silaklak pal nukewa in lineye me top nu ke sie kusensiyuk a sa in som nu ke paragraph toko? Kain in inkanek inge in akola ke me lutlut el tia ku in akyokye lungse lasr ke ma sumwosmwos, a tia pa ku in sang me akkeye nu ke ella lasr. Kut fwin lungse in akkeye lungse lasr nu ke ma sumwosmwos, kut enenu in alken in lutlut a in sifwilpa nunku yok ke ma kut rid ke Kas lun God. Kut fwin lungse in lotela in lungse ma sumwosmwos ke inse kewa lasr kut enenu in kafweang yok!

Musrinsral a Malukin Ma Sumwosmwos

14. Mea Jeova God a Jisus Kraist elos lungse kut in nunku ke orekma in kulansap lasr?

¹⁴ Jeova God a Jisus Kraist elos lungse kut in insemwomwo ke kut oru orekma in kulansap lasr. Mea oru kut in insemwomwo? Aok, lungse ke ma sumwosmwos! Ke Me Sramsram fwin Eolu, Jisus el fwak: “Insemwomwo elos su musrinsral a malukin ma sumwosmwos, tu elos fwa kup.” (Mattu 5:6) Mea kalmen kas inge nu selos su oasr kena yok lalos in lungse ma sumwosmwos?

15, 16. Ke inkanek fuka met puspus su musrinsral a malukin ma paye ku in akkupyeyuk?

¹⁵ Fwal se inge su kut oasr ka oasr ye kolyuk lun met koluk se. (1 Jon 5:19) Kut fwin eis sie newspaper ke kutena an, kut ku in rid report ke orekma sulallel, a akmas su wangin ma oana. Orekma sulallel lun met nu sin sie met el oru sie met sumwos in fosrnga a in nunku yok ka. (Ekklisiastis 8:9) Nu selos su lungse Jeova, kut etu la el mukena ku in akfwalye ma enenu lun met puspus in etu ma paye a lungse in lutlut ke ma sumwosmwos. Met koluk nukewa tia pat e fwa akwanginyeyukla, a met nukewa su lungse ma sumwosmwos elos fwa tia sifwil pulakin me asor a me fosrnga su tuku ke orekma lun met koluk nukewa. (2 Piter 2:7, 8) Sie me akkeye na paye pa inge!

¹⁶ Oana met kulansap lun Jeova a met tuma lutlut lun Jisus Kraist, kut akilen la met nukewa su masrinsral a malukin ma sumwosmwos elos fwa ‘akkupyeyuk.’ Elos e fwa engan na paye ke inkanek lun akwuk lun God ke kosrao sasu a fwalu sasu su ma “sumwosmwos on we.” (2 Piter 3:13) Lela kut in tia munasla, a in tia lut fwin orekma in akkolukye met a orekma sulallel akwanginyela ma sumwosmwos ke fwal se inge su metu etawi oiya koluk lal Setan. (Ekklisiastis 5:8) Jeova, el su Fulatlanu, el etu ke ma sikyak inge a e fwa tia pat el fwa molela met nukewa su lungse ma sumwosmwos.

Ma Lane su Tuku ke Lungse Ma Sumwosmwos

17. Mea kutu ma lane su metu ku in eis ke sripen elos lungse ma sumwosmwos?

¹⁷ Sam 146:8 el akkalemye yok ke sie ma lane mwomwo su tuku ke orekma in fwasr ke inkanek sumwosmwos. Met sim lun sam el simusla kas inge: “Jeova el lungse met sumwosmwos.” Srike nunku! God Fulatlanu in kosrao a fwalu el lungse kut ke sripen kut lungse ma sumwomswos! Ke sripen lungse lun Jeova, kut lulalfongi la el e fwa ase nu sesr ma nukewa ke moul lasr meyen kut kafweang in oru meet akwuk lun Togusrai ke moul lasr. (Ridi Sam 37:25; Soakas 10:3.) Ke pal fwasru, fwalu nufon fwa engunkinyuk sin met nukewa su lungse ma sumwosmwos. (Soakas 13:22) Nu sin met kulansap puspus lun God, oasr me sang mwomwo nu selos ke sripen elos oru ma sumwomswos, a me sang inge fwa engun yok a moul ma patpat ke sie paredais kato fwin fwalu. Fwinne ke pal inge, met nukewa su lungse ma sumwosmwos lun God elos akinsemwomwoyeyuk meyen elos pulakin inse misla su sang kasru nu ke inse sefwanna ke sou a ke congregation lalos.—Filippai 4:6, 7.

18. Ma mwomwo puspus fuka kut ku in oru ke kut sano ke len lun Jeova?

¹⁸ Ke kut sano ke tuku lun len lulap lun Jeova, kut enenu in kafweang in suk ma sumwosmwos lal. (Zefenaia 2:2, 3) Ke ma inge, lela kut in akkalemye lungse paye nu ke inkanek sumwos nukewa lun Jeova God. A kut enenu pa in oru ‘me loeyuk in iumwe lun sumwosmwos’ in oasr ke an fwal pal nukewa in sang me karungin nu ke insiesr su lumeyuk nu ke oiya paye lasr. Kut enenu in karungin pa sie ella ku conscience mwomwo, su ku in oru kut in insemwomwo a oru insien God lasr in engun.—Soakas 27:11.

19. Sulela mwomwo fuka kut lungse in akpaye, a mea fwa lutlutkinyuk ke me lutlut toko?

¹⁹ “Mutun Jeova kasrot, kasrmu alukela fwalu nu fon, in fwakulak sifwana ku kalos su insielos sumwosna nu sel.” (2 Kronikel 16:9) Kas inge me akkeye yok nu sesr ke kut kafweang in oru ma sumwos ke pal se inge su yokelik oiya puspus su tia mwo, orekma sulallel, a ma koluk ke fwal se inge! Paye, kafweang lasr in moulkin inkanek sumwos saap sie me lut na paye nu sin met puspus su srelosla liki God. Tusruktu kut eis ma lane yok ke kut fulyung nu ke ma sumwosmwos lun Jeova. (Isaia 48:17; 1 Piter 4:4) Ke ma inge, lela kut in kafweang in lungse ma sumwosmwos ke inse kewa lasr a orekmakin ma inge, su ku in oru kut in pulakin insemwomwo yok. Tusruktu, kut fwin lungse ma sumwosmwos ke inse kewa lasr kut enenu pa in srunga ma koluk. Me lutlut toko fwa akkalemye nu sesr ke kalmen ma inge.

[Footnote]

Kom E Topuk Fuka?

• Efu ku oasr ma eneneyuk kut in akilen saokiyen me lango tu kut in lungse ma sumwosmwos?

• Efu ku yok sripe kut in nukomang ‘me loeyuk in iumwe lun sumwosmwos”?

• Fuka kut ku in sang akpa mwomwo nu ke ella lasr?

[Petsac ke sra 14]

Sie ella su pala ke ma mwomwo ku in kasre kut in eis me top ke kusensiyuk puspus ke orekma