In Eis Me Insemwomwo lun God Kol nu ke Moul Ma Patpat

“Kom fwa akinsemwomwoye met sumwosmwos, O Jeova; kom fwa apnulla ke oi oana ke sie me loeyuk.”—SAM 5:12.

1, 2. Mea Elaija el siyuk sin mutan katinmas se su muta in an Sarefat, a mwulela fuka el akkalemye nu sel?

SIE mutan a tulik mokul natul elos musrinsral, a sie met palu lun God pa. Ke pal se mutan katinmas se inge in an Sarefat el akola in taneak sie e in orala mongo nelos, na met palu Elaija el siyuk sel in kitel kof a bread. El inse mulala in sang nu sel ma nimel, tusruktu mongo nel arlana srikla oasr na ke kitin ma srisrik su el ‘lafwusak le po in flau in sie sufwa lulap, a kitin oil in sufwa soko.’ El pula mu el tia ku in sang kutena mongo nu sin met palu se inge, a pa inge ma mutan katinmas se inge el fwak nu sel.—1 Togusra 17:8-12.

² Tusruktu Elaija el fwak: “A oru sie kek srisrik keik ka meet, a wise nu yuruk a tok oru keyum a ke mwen nutum. Tu ou inge Jeova God lun Israel el fwak, ‘Flau a fwa tia wanginla in sufwa, ku oil in sufwa.’”—1 Togusra 17:13, 14.

3. Kusensiyuk yok sripe fuka akkalemyeyuk nu sesr?

³ Mutan katinmas se inge el enenu in oru sie sulela fwin el e fwa kite met palu se inge ke kitin me mongo na srisrik su oasr yurol ku tia, tusruktu oasr pa sulela su arlana yok sripe liki ma inge. Ya el fwa akkalemye lulalfongi lal nu sin Jeova in molella a tulik mokul natul, ku ya el fwa nunku yok ke ma enenu ke moul lal liki na in eis me insemwomwo a in kawuk nu sin Jeova? Oasr pa sulela su kut enenu pa in oru oana oiya se inge. Ya kut nunku yok in eis me insemwomwo lun Jeova liki na in suk ke ma saok puspus su kut enenu ke moul lasr? Oasr sripe mwomwo puspus lasr in lulalfongi a kulansap nu sin God. A oasr inkanek puspus su kut ku in oru in kafweang in suk a eis me insemwomwo lal.

‘Fwal Nu Sum in Eis Mwolana a Kaksak’

4. Efu ku arlana fwal kut in alu a kulansap nu sin Jeova?

⁴ Oasr sumwos lun Jeova in tupan metu la elos in kulansapul ke inkanek su ku in akinsemwomwoyel. Sie u lun met kulansap lal in kosrao elos inse sefwanna in akkalemye oiya inge: “Fwal nu sum, Leum lasr a God lasr, tu kom in eis mwolanu a kaksak a ku, tu kom orala ma nu kemwa, a ke lungse lom elos on, a orekla tari.” (Fwakyuk 4:11) Ke sripen el pa God su orekutla, paenang fwal kut in kulansap a alu nu sin Jeova.

5. Efu ku lungse lun God nu sesr akkeye kut in kulansapul?

⁵ Siepa sripe mwomwo kut in kulansap nu sin Jeova pa ke sripen lungse lal nu sesr arlana yok, wangin ma oana. Baibel el akkalemye: “A God el orala met in lumal sifwana, in luman God el oralla; mokul a mutan el oralosla.” (Genesis 1:27) Oasr ku lun metu su God el sang nu selos in nunku a in oru sulela lalos sifwana. Ke sripen Jeova el ase moul nu sesr, paenang el pa Papa tumun met nukewa. (Luk 3:38) In oana sie papa su mwo, el orala ma nukewa in sang nu sin mwen a an nukewa natul ma elos enenu in engunkin ke moul lalos. “El oru fwat lal in takak” a “supamu af,” tu Fwalu se inge su sie an su arlana kato a mwo in sang me mongo pukanten nu sesr.—Mattu 5:45.

6, 7. (a) Ma koluk fuka Adam el sang nu sin tulik nukewa natul? (b) Mea me lango lun Kraist e fwa oru nu selos nukewa su suk ke me insemwomwo lun God?

⁶ Jeova el molikutla pa liki fwako tia mwo lun ma koluk. Ke pal se Adam el orala ma koluk, el ku in pupulyukkin nu ke sie met su lungse in nimnim alukela ma fwal, a pal nukewa el orekmakin mani lal in moli me nimnim, ma inge el oana in pusrala ma mwomwo sin sou lal. Ke Adam el lain a seakos Jeova, el pusrala sin tulik natul nukewa fwinsrak mwomwo lalos inge in pulakin engun yok ma patpat. Orekma lal inge in nunku kel sifwana oru metu in sruo nu ke oiyen sesumwos. Ke ma inge metu elos ku in pulakin mas, asor yok, a ke saflaiye elos mise. Sie met kulansap el ku in aksukosokyeyukla liki sruo lal fwin oasr me mol ka su ku in sang in molela ma inge, a Jeova el orala akwuk in sang me mol tu elan ku in molikutla liki ma koluk nukewa inge. (Ridi Rom 5:21.) Jisus Kraist el akpayeye ma lungse lun papa tumal, paenang el “sang moul lal in moli met puspus.” (Mattu 20:28) Met nukewa su eis me insemwomwo lun God e fwa tia pat elos fwa engunkin ma lane nukewa su tuku ke me mol lun me lango.

⁷ Jeova, God su orekutla, el orala akwuk mwo emeet in ase nu sesr moul insemwomwo a in oasr akwuk mwomwo. Ke sripen me insemwomwo lal oasr yurosr, kut fwa ku in liye ke inkanek mwolana lal in akwanginyela me keok nukewa su pulakin sin met nukewa ke pal inge. Jeova el fwa akkalemye nu sin kais sie sesr la fuka el ekla “met sang moul nu selos su sokol.”—Hibru 11:6.

“Met Sram Elos Fwa Insemwomwo in Sifwana Eisalosyang”

8. Mea ma sikyak nu sel Isaia el luti nu sesr ke orekma in kulansap nu sin God?

⁸ Oasr ma eneneyuk nu sesr kut in orekmakin ku lasr in oru sulela lasr sifwana ke inkanek mwo kut fwin lungse in eis me insemwomwo lun God. Sripe paenang kut enenu in oru ma inge meyen Jeova el tia patok kutena met in kulansap nu sel. In pal lal Isaia, El siyuk kusensiyuk se inge: “Su Nga fwa supala, a su fwa som kasr?” Jeova el akkalemye sunak nu sin met palu inge ke el lela elan oru sulela lal ka. Srike lumala ke nunak lom ke insemwomwo yok lal Isaia ke el topuk: “Nga inge! Supeyula.”—Isaia 6:8.

9, 10. (a) Oiya fuka kut enenu in akkalemye ke orekma in kulansap lasr nu sin God? (b) Efu ku arlana fwal nu sesr in kulansap nu sin Jeova ke moul kewa lasr?

⁹ Metu elos sukosok in kulansap nu sin God, ku elos sukosok pa in tia kulansap nu sel. Jeova el lungse kut in kulansap nu sel ke inse mulala lasr. (Ridi Josua 24:15.) Kutena met su srunga in alu nu sin God elos tia ku in akinsemwomwoyel; a el tia pa insemwomwo ke orekma in alu lun met puspus su oru ma inge ke sripen elos lungse na in akinsemwomwoye met puspus saye. (Kolosse 3:22) Kut fwin oru orekma in kulansap nu sin God ke ‘inse luo’ lasr ke kut lela ma puspus lun fwalu in akkolukye orekma in alu lasr, kut tia ku in oru God in insemwomwo kesr. (Exodus 22:29) Jeova el etu la orekma in kulansap lasr nu sel ke inse kewa lasr pa ma mwo nu sesr. Moses el kaifwe met Israel in sulela moul ke elos ‘lungse Jeova God lalos, in akos pusral, a in fulyung nu sel.’—Duteronomi 30:19, 20.

¹⁰ Togusra Devid lun an Israel in pal meeta el yuk on soko inge nu sin Jeova: “Met sram elos insemwomwo in esaloswot sifwana in len in ku Lom. In oasku lun mutal, liki insien lututang, oasr yurum len in met fwusr lom oana aunfong.” (Sam 110:3) Met puspus ke pal inge elos suk meet ke mani in oru moul lalos in mwo a ke me akengun. Tusruktu, nu selos su lungse Jeova, orekma in kulansap lalos nu sin God pa ma yok sripe emeet liki ma nukewa. Orekma lalos in sulkakin peng mwo lun Togusrai sang me akpayeye la mea ma yok sripe ke moul lalos. Oasr lulalfongi lalos ke ku lun Jeova in sang ma enenu lalos len nukewa.—Mattu 6:33, 34.

Me Kise Su Ku In Oru God Lan Insemwomwo

11. Ma lane fuka met Israel elos fwinsrakkin in eis ke elos kisekin me kise nu sin Jeova?

¹¹ Ye mwuleang lun Masap, met kulansap lun God elos kisekin me kise mwomwo in eis me insemwomwo lal. Livitikus 19:5 el akkalemye: ‘A ke komwos kisekin me sang in me kise misla nu sin Jeova, komwos fwa kisekin ma se inge, tu komwos in esyuk.’ Ke buk sepana inge, kut ku in rid pa: “A ke komwos sang me kise kulo nu sin Jeova, komwos fwa sang ma inge tu komwos in esyuk.” (Livitikus 22:29) Ke pal se met Israel elos kisekin kosro mwo a fwal fwin loang lun Jeova, fwofwosr su som nu lung el oana sie “ma emem fwolo” nu sin God paye. (Livitikus 1:9, 13) El pulakin engun a insemwomwo yok ke orekma mwo inge lun met kulansap lal in akkalemye lungse lalos nu sel. (Genesis 8:21) Ke akwuk lun Masap inge, oasr me lutlut yok sripe su kut ku in orekmakin ke pal inge. Met nukewa su kisekin me kise mwomwo nu sin Jeova elos fwa eis me insemwomwo lal. Me kise fuka el lungse in eis? Nunku ke oiya luo ke moul lasr: ma se meet pa oiyesr a ma se akluo pa ke kaskas lasr.

12. Orekma puspus fuka ku in oru ‘kafweang lasr in kisekin manosr oana me kise’ in me srungeyuk nu sin God?

¹² Ke leta lal nu sin met Kristian in an Rom, met sap Poul el simusla: “Sang monumwos me kise moul, mutal, me akinsemwomwoye God, pa inge orekma mutal fwal nu ke ku lomwos in orekmakin nunak sumwos.” (Rom 12:1, New World Translation) Fwin sie met el lungse in eis me insemwomwo lun God oasr ma eneneyuk nu sel elan liaung manol in me akinsemwomwoye nu sin God. Fwin el akfokfokyel sifwana ke el orekmakin paip, betel nut ku pu, ono koluk, ku orekmakin me nimnim alukela ma fwal, me kise lal e fwa wangin sripe. (2 Korint 7:1) Sayen ma inge, meyen sie met su “oru kosro el oru ma koluk nu ke manol sifwana,” paenang kutena kain in orekma fokfok lal ku in oru me kise lal in me srungeyuk nu sin Jeova. (1 Korint 6:18) Sie met su lungse in akinsemwomwoye God, el enenu in ‘mutal ke oiya nukewa lal.’—1 Piter 1:14-16.

13. Efu ku arlana fwal kut in kaksakin Jeova?

¹³ Sie pa me kise su Jeova el insemwomwo ka pa ke kas lasr. Nu selos nukewa su lungse Jeova elos kaskaskin ma mwomwo kel pal nukewa ye mutun met puspus a ke pal se elos mukelanu muta in loom selos. (Ridi Sam 34:1-3.) Ridi Sam 148 nu ke 150, a kom fwa liye ke pal puspus su sam tolu inge akkeye kut in kaksakin Jeova. Paye la, kas in “kaksak fwal nu sin met sumwos.” (Sam 33:1) A me Srikasrak Mwomwo lasr, Jisus Kraist, el akkalemye kalem ke yok sripaiyen orekma in kaksakin God ke inkanek in sulkakin peng mwo.—Luk 4:18, 43, 44.

14, 15. Hosia el kaifwe met Israel in kisekin kain in me kise mwomwo fuka, a oiya fuka Jeova el akkalemye ka?

¹⁴ Ke inkanek in kafweang in sulkakin peng mwo ke moniyuk, kut sang me akpayeye ke lungse lasr nu sin Jeova a kut lungse elan insemwomwo kesr. Ke sie me pupulyuk, nunku ke inkanek mwo su met palu Hosia el kaifwe met Israel su forla nu ke alu kikiap a tula insemwomwo lun God. (Hosia 13:1-3) Hosia el fwak nu selos in siyuk nunak munas ka, a fwak: “Kut siyuk sum [Jeova] in nunak munas ma koluk nu kemwa; a eis ke kulang ma mwo, ouinge kut fwa sang oana kao mokulu me kise lun ngoasrosr.”—Hosia 14:1, 2, NW.

¹⁵ Kao mokul soko pa me kise su yok molo emeet su sie met Israel el ku in kisekin nu sin Jeova. Ke ma inge, kas inge “kao mokul me kise lun ngoasrosr” el kalmekin nu ke kas paye a mwo su orekmakinyuk in sang kaksak nu sin God paye. Oiya fuka Jeova el akkalemye nu selos su oru kain in me kise inge? El fwak: “Nga fwa arulanu lungse elos.” (Hosia 14:4) Nu selos su kisekin kas in kaksak mwomwo inge, Jeova el sang nunak munas, a el akkalemye insemwomwo a el lungse pa in kawuk fototo nu selos.

16, 17. Ke pal se lulalfongi nu sin God mokle sie met in sulkakin peng mwo, mea pulakin lun Jeova ka?

¹⁶ Orekma in sang kaksak nu sin Jeova ye mutun met puspus orek pal nukewa ke alu paye. Arlana yok sripe nu sin met sim lun sam in sang kaksak nu sin God paye paenang el pre nu sel: “Nga siyuk sum, O Jeova, tu kom fwa eis me kise lun oalik, su nga sot ke lungse luk.” (Sam 119:108) Na fuka ke pal lasr inge? Isaia el akkalemye kas palu se inge ke u lulap sin met ke pal inge su kut moul ka: “A fwa fwakak kaksak lun Jeova. . . . Elos [me sang lalos] fwa utyuk me insemwomwo nu sik fwin loang [lun God] luk.” (Isaia 60:6, 7) Kas palu se inge akpayeye ke pal inge, oasr million puspus sin met elos kisekin me “kise nu sin God ke kaksak pal e nu kemwa kel, ouinge fwako lun ngoasro, su fwakak el.”—Hibru 13:15.

¹⁷ Na fuka kom? Ya kom kisekin me kise mwomwo nu sin God? Fwin tia, ya kom e fwa oru me aksumwos a kom in mutawauk in sang kaksak nu sin Jeova ye mutun met puspus? Ke pal se lulalfongi lom mokle kom in mutawauk in sulkakin peng mwo, me kise lom fwa me “akinsemwomwoye Jeova yok liki soko kao.” (Ridi Sam 69:30, 31.) Kom ku in lulalfongi la “me fwol keng” lun kas in kaksak lom e fwa sun Jeova a ke sripe se inge el fwa insemwomwo keim. (Ezikiel 20:41) Ke ma inge engun a insemwomwo su kom e fwa pula el arlana yok a wangin ma oana.

‘Jeova el e Fwa Akinsemwomwoye Met Sumwosmwos’

18, 19. (a) Kain in nunak fuka ke orekma in kulansap nu sin God oasr yurin met puspus ke pal inge? (b) Tula lun insemwomwo lun God kol nu ke mea?

¹⁸ Ke pal inge, oasr met puspus su akkalemye kain in nunak oana met puspus in len lal Malakai: “Wangin sripen orekma nu sin God; a sripe su tu kut liaung tari fulak lal?” (Malakai 3:14) Ke sripen oasr kena yok lalos ke ma saok puspus lun fwalu, paenang elos nunku ke akwuk lun God mu tia ku in akpayeye a masap lal tila fwal in orekmakin. Nu selos, orekma in sulkakin peng mwo el ku in eis pal lalos, a oru elos in tia pulakin mwo.

¹⁹ Kain in oiya tia mwo inge oasr tari in imae Eden. Aok Setan el kiapella If in aklusrongtenye saokiyen moul mwolana su Jeova el sang nu sel a pulesru me insemwomwo Lal. Ke pal inge, Setan el srike pal nukewa in oru metu in lulalfongi mu wangin kutena me insemwomwo su elos ku in eis fwin elos oru ma lungse lun God. Tusruktu, If a mokul tumal elos akilen la ke pal se elos tula me insemwomwo lun God, tula pa moul lalos. Met nukewa su ke pal inge fwasr tokin me srikasrak koluk lalos, fwa tia pat elos fwa etu a akilen la fwin tula insemwomwo lun God yurolos, moul lalos e fwa tula pa.—Genesis 3:1-7, 17-19.

20, 21. (a) Sulela fuka mutan katinmas sa in an Sarefat el oru, a mea sikyuk nu sel ke saflaiye? (b) Ke inkanek fuka a efu kut enenu in etawi mutan katinmas se inge in an Sarefat?

²⁰ Akkalemye ma tia oana sie ke saflaiyen ma sikyak nu sel Adam a If a ke oiya puspus su sikyuk kel Elaija a mutan katinmas sa in an Sarefat. Tokin mutan katinmas se inge el long ke kas in akkeye lal Elaija, el mutawauk in orek flau a kite met palu meet ke kutu mongo. Tokin ma inge Jeova el akpayeye mwulela lal ke inkanek lal Elaija. Ma simusla el akkalemye ka: “A mutan sa a el a loom sel, mongo ka len puspus. Flau in sufwau tia wanginla, ku oil in sufwau, fwal nu ke kas lun Jeova, su el fwak kel Elaija.”—1 Togusra 17:15, 16.

²¹ Mutan katinmas se inge el oru ma se su kutu met inmasrlon billion puspus sin met ke pal inge lungse in oru. El filiye lulalfongi lal nu sin God lun molela, a God el kasrel. Ma simusla se inge a kutupa ma simusla sang me akkeye nu sesr la fwal kut in lulalfongi nu sin Jeova. (Ridi Josua 21:43-45; 23:14.) Moul lun Met Lo lun Jeova ke pal inge sang pa me akpayeye nu ka la God el fwa tia som liki met nukewa su el insemwomwo kelos.—Sam 34:6, 7, 17-19.a

22. Efu ku arlana yok sripe kut in suk ke me insemwomwo lun God ke pal na sa?

²² Len se su God el e oru nununku lal nu selos “nu kemwa su muta fwin mutun fwalu na fon” arlana apkuran. (Luk 21:34, 35) Wangin kutena met ku in kaengla liki len in nununku inge. Wangin kutena me kasrup ku moul mwomwo su tuku ka ku in lumeyuk nu ke saokiyen kafweang lun metu in long kas inge lun Met Nununku su God el srusrngiye: “Fwasru, komwos met insemwomwo lun Papa tumuk, usrui togusrai su akola nu sumwos.” (Mattu 25:34) Aok, ‘Jeova el fwa akinsemwomwoye met sumwosmwos; el fwa apnulla ke oi oana sie me loeyuk.’ (Sam 5:12) Aok arlana mwo kut in suk ke me insemwomwo lun God.

[Footnote]

Ya Kom Esam?

• Efu ku arlana fwal kut in alu nu sin Jeova ke inse kewa lasr?

• Me kise fuka Jeova el insemwomwo in eis ke pal inge?

• Kas inge “kao mokulu me kise lun ngoasrosr” el kalmekin nu ke mea? A efu ku kut kisekin ma inge nu sin Jeova?

• Efu ku kut enenu in suk ke me insemwomwo lun Jeova?

[Petsac ke sra 8]

Met palu lun God el siyuk sin sie nine su sekasrup a musrinsral in oru sulela yok sripe fuka?

[Petsac ke sra 10]

Lulalfongi paye lom nu sin Jeova fwa tia kol nu ke wangin sripe