Aksaokye Moul in Payuk oana sie Me Sang Su Tuku Sin God Me
“Ke ma inge sie met el fwa filiye papa tumal a nine kiel a fwa fulyung nu sin mutan kiel, a eltal fwa ikwe siefwanna.”—GENESIS 2:24.
1. Efu ku arlana fwal kut in akkalemye sunak nu sin Jeova?
JEOVA GOD, su orala akwuk ke moul in payuk, arlana fwal kut in akkalemye sunak. Oana God su Orekutla, el su Fulatlana, a Papa tumasr in kosrao, el akkalemyeyuk oana Met Sang lun “me kite mwo nu kemwa a kite fwal.” (Jemes 1:17; Fwakyuk 4:11) Ma inge akkalemye ke lungse yok lal. (1 Jon 4:8) Ma nukewa el luti nu sesr, ma nukewa el siyuk sesr, a ma nukewa el ase nu sesr el me kasru yok nu sesr a me insemwomwo nu sesr.—Isaia 48:17.
2. Kas in kasru fuka Jeova el sang nu sin siyanyen se meet?
2 Baibel el akkalemye ke moul in payuk oana sie me sang mwo su God el ase nu sesr. (Rut 1:9; 2:12) Ke pal se el oru akwuk ke payuk se meet in pal meeta, Jeova el sang nu sel Adam a If kas in kasru tu elos in pulakin insemwomwo ke moul in payuk lalos. (Ridi Mattu 19:4-6.) Elos fwin akos kas in kolyuk lun God elos fwa engunkin insemwomwo pal nukewa. Tusruktu, elos pulesru masap lun God a pulakin kain in fwako koluk puspus.—Genesis 3:6-13, 16-19, 23.
3, 4. (a) Fuka met puspus ke pal inge elos tia akkalemye sunak ke moul in payuk a nu sin Jeova God? (b) Me srikasrak fuka kut fwa tuni akmwoye ke me lutlut inge?
3 In oana ke siyanyen se meet inge oru, met puspus ke pal inge elos oru sulela ke moul in payuk su tia akkalemye sunak ke kas in kolyuk lun Jeova. Kutu elos tukeni muta fwinne elos tia payuk, ku kutu elos srike in ekulla akwuk mwomwo inge, oana ke mutan elos payukyak nu sin mutan a mokul nu sin mokul, elos oru ma inge in akfwalye kena koluk lalos. (Rom 1:24-32; 2 Timote 3:1-5) Elos srunga in akilen la akwuk ke moul in payuk el sie me sang su tuku sin God, a ke elos pulesru me sang se inge, elos pulesru pa Jeova God.
4 Kutupal, fwinne kutu sin met kulansap lun God tula nunak mwomwo lalos ka ku elos mwulkunla pa ke nunak lun Jeova ke akwuk lun payuk. Kutu sin met Kristian elos sulela in fwasrelik, ku elos divorce, tusruktu sripe paenang elos oru ma inge el tia fwal nu ke ma Simusla. Mea ku in oru tu oiya se inge in tia sikyak? Fuka kas in kolyuk lun God in Genesis 2:24 ku in kasru met Kristian payuk nukewa in akkeye moul in payuk lalos? A la fuka met nukewa su nunku in payuk elos ku in akola nu ka? Lela kut in loang akmwoye ke siyanyen tolu su engunkin moul in payuk mwomwo in pal lun Baibel su akkalemye la fuka sunak nu sin Jeova pa sie me kasru yok nu ke moul in payuk mwomwo.
Akkeye a Sruokye Oaru Pal Nukewa
5, 6. Ma sikyuk fuka sang ma upa nu sel Zekaraias a Elisabet? A fuka oaru lalos akinsemwomwoyeyuk?
5 Zekaraias a Elisabet elos oru ma sumwos nukewa. Ke elos oru sulela lalos in payukyak nu sin sie sin sie, kais sie selos sulela sie met kulansap oaru lun Jeova. Zekaraias el oaru in akpayeye kunokon lal oana met tol, a el a mutan kiyel elos akos masap lun God ke ku lalos kewa. Paye la elos ku in aksaokye a sang kulo ke ma puspus. Tusruktu, kom fwin muteta nu in loom selos in an Juda, kom ku in akilen la oasr ma se su wangin ka. Aok, wangin tulik natulos. Elisabet el mutan talap sa, a elos tukenina matou.—Luk 1:5-7.
6 In an Israel in pal meeta, in oswela tulik el ma na oa se, a sou puspus elos sou na lulap pukanten tulik nutulos. (1 Samuel 1:2, 6, 10; Sam 128:3, 4) Sie mokul Israel in pal meeta el ku in oru oiyen kutasrik in divorceiye mutan kiyel ke sripen el tia oswela tulik nu sel. Ne ouinge, Zekaraias, el oaru a muta yurol Elisabet pal nukewa. El a mutan kiyel elos tia suk inkanek in aksafyela moul in payuk lalos. Kalem la elos pulakin asor ke sripen wangin tulik natulos, ne ouinge elos kafweang in oaru nu sin sie sin sie a oaru in tukeni kulansap nu sin Jeova. Tusruktu tokin kutu pal, ke inkanek lun mwenmwen, Jeova el akinsemwomwoyelos yok ke elos oswela sie mwen ke elos matou.—Luk 1:8-14.
7. Ke inkanek saye fuka Elisabet el akkalemye la el oaru nu sin mokul tumal?
7 Elisabet el akkalemye oaru su fwal in kaksakinyuk ke sie pa inkanek saye. Ke mwen se natul inge, su pangpang Jon el isusla, Zekaraias el tia ku in kaskas meyen el tia arlana lulalfongi ke ma lipufon lun God el fwak nu sel. Ne ouinge, kalem la Zekaraias el orekmakin siena inkanek elan ku in sramsram nu sin mutan kiyel ke lipufon lun God el fwak nu sel la tulik mokul se inge e fwa pangpang “Jon.” Met tulan a sou lalos elos lungse in pangon en tulik se inge oana inen papa tumal. Tusruktu Elisabet el oaru in akos kas lun mokul tumal nu sel. El fwak: “Tia ouinge! tu el fwa pangpang Jon.”—Luk 1:59-63.
8, 9. (a) Fuka oiyen oaru ku in akkeye moul in payuk? (b) Mea kutu inkanek su mokul a mutan payuk ku in akkalemye oaru nu sin sie sin sie?
8 In oana Zekaraias a Elisabet, siyanyen puspus ke pal inge elos sun pa me asor a kutupa ma upa. Sie moul in payuk su wangin akkalemyeyen oaru tia eis me insemwomwo yok. Orekma in akkalemye lungse ku orek fung nu sin mokul ku mutan, petsa a me rid fokfok, orekma lun kosro, a kutu pa me sensen nu ke moul in payuk mwomwo ku in kunausla lulalfongi lun mokul a mutan payuk nu sin sie sin sie. Fwin wanginla lulalfongi lun mokul a mutan payuk nu sin sie sin sie, lungse lalos mutawauk in munasla. Ke kutu inkanek saye, oiyen oaru el oana sie nu ke me kalkal se su raunela loom sin sie sou su karunginelos liki met saye a liki me sensen puspus, sang misla nu sin met nukewa su oasr lun loomu. Ke ma inge fwin mokul a mutan payuk elos oaru nu sin sie sin sie, elos ku in tukeni muta in misla su wangin kutena me sensen, a akkalemye nunak a pulakin mwomwo lalos nu sin sie sin sie, ke ma inge lungse lalos nu sin sie sin sie yokyokelik. Aok, oiyen oaru arlana yok sripe.
9 Jeova el fwak nu sel Adam: “Sie met el fwa filiye papa tumal a nine kiel, a fwa fulyung nu sin mutan kiel.” (Genesis 2:24) Mea kalmen ma inge? Fototo lun sie met yurin kawuk a sou lal enenu na in akfwalyeyuk. Mokul a mutan payuk elos enenu in orekmakin meet pal a me karungin lalos nu sin sie sin sie. Met kawuk a ma lelos, papa a nine kiyelos elos tia ku in eis pal yok lun sou sasu inge; a siyanyen sasu inge elos fwa tia lela papa a nine kiyelos in kufusla sulela lalos, ku fulelosla in wi ke ma upa lun sou. Siyanyen se elos enenu in fulyung nu sin sie sin sie. Pa inge kas in kolyuk lun God.
10. Mea fwa ku in kasru mokul ku mutan payuk in akkeye oiyen oaru?
10 Fwinne ke sie sou su mutan ku mokul el tia wi lulalfongi, oiyen oaru ku in orala me insemwomwo. Sie sister su mokul tumal el tia met lo el fwak: “Nga arlana sang kulo nu sin Jeova in luti yu ke inkanek mwo in pusisel nu sin mokul tumuk a in akkalemye sunak yok nu sel. Kafweang luk in oaru nu sel ke lusen yea 47 orala fwako mwomwo ke moul in payuk lasr meyen oasr lungse a sunak inmasrlosr.” (1 Korint 7:10, 11; 1 Piter 3:1, 2) Ke ma inge lela kom in kafweang in oru mokul ku mutan kiyom in pulakin inse misla. Ke kas a orekma, suk inkanek in akkalemye nu sin mokul ku mutan kiyom la el pa met su saok emeet nu sum. Ke ku lom kewa, nik kom lela kutena met ku kutena ma in akmunasye fototo lom nu sin mokul ku mutan kiyom. (Ridi Soakas 5:15-20.) Ron a Jeannette, su elos engunkin moul in payuk mwomwo ke lusen yea 35, elos fwak: “Meyen kut oaru nu sin Jeova, a kut oaru nu sin sie sin sie, kut engunkin sie moul in payuk mwomwo a oasr engun yok.”
Inse Sefwanna Akkeye Moul in Payuk
11, 12. Fuka Akuila a Prisila elos akesrui nu sin sie sin sie (a) ke loom, (b) ke niyen orekma lalos, a (c) ke orekma in sulkakin a luti peng mwo?
11 Ke met sap Poul el sramsramkin ke siyanyen se inge su kawuk fototo lal Akuila a Prisila, el fwak pal nukewa inen met luo inge. Siyanyen se inge su tukeni nu sie pal nukewa pa sie me pupulyuk mwo ke kalmeyen kas lun God ke el fwak la mokul a mutan elos fwa “ikwe siefwanna.” (Genesis 2:24) Elos tukeni orekma ke loom selos pal nukewa, ke niyen orekma lalos, a ke elos oru orekma in luti lun met Kristian. Ke sie me pupulyuk, ke pal se meet su Poul el som in an Korint, Akuila a Prisila elos solel in muta yurolos, a kalem la el muta yurolos ke lusen sie pal ke el oru orekma in sulkakin peng mwo in an se inge. Tok, in an Efesus, elos orekmakin loom selos in oru meeting lun congregation a elos tukeni orekma in sang kasru nu sin met sasu, oana Apollos, in eis etauk a kalem yok ke ma paye. (Orekma 18:2, 18-26) Siyanyen se inge su arlana moniyuk elos som nu Rom, a elos sifwil lela congregation in orekmakin loom selos in oru meeting lalos we. Tok, elos sifwilpa folokla nu an Efesus, in akkeye met lili puspus we.—Rom 16:3-5.
12 Ke lusen sie pal, Akuila a Prisila elos welul Poul orekma in orala loom nuknuk. Ke ma sikyak inge kut sulpa liye ka la siyanyen se inge elos tukeni orekma, akesrui nu sin sie sin sie a tia akkalemye oiyen alein ku lain sie sin sie. (Orekma 18:3) Paye la pal su elos tukeni orekma ke orekma nukewa lalos oana met Kristian kasrelos in oru moul in payuk lalos in oasr me insemwomwo yok, a in kulansap nu sin Jeova pal nukewa. Ke pal se elos oasr in an Korint, in an Efesus, ku in an Rom, elos eteyuk sin met puspus oana “met orekma yurin Kraist Jisus.” (Rom 16:3) Elos tukeni orekma in akkeye orekma in luti peng mwo lun Togusrai yen nukewa elos oru orekma in kulansap nu sin God.
13, 14. (a) Oiya puspus fuka ku in akmunasye inse sefwanna ke moul in payuk? (b) Mea kutu ma su mokul a mutan payuk ku in oru in akkeye fototo lalos oana “ikwe sefwanna”?
13 Aok, inse sefwanna in akpayeye akwuk a orekma sefwanna ku in akkeye moul in payuk. (Ekklisiatis 4:9, 10) Sie me asor, meyen siyanyen puspus ke pal inge elos orekmakin kitin pal na nu sin sie sin sie. Elos kemwana orekma pat ke kais sie niyen orekma lalos ke lusen ao puspus. Mokul ku mutan payuk puspus elos travel pal nukewa nu ke orekma lalos, ku elos som nu ke an saye in orekma we tu elos in ku in supwela mani nu yurin sou lalos. Fwinne ke loom, kutu sin mokul ku mutan payuk elos tia orekmakin pal nu sin sie sin sie ke sripen elos orekmakin pal lalos in liye television, elos oru me akengun, sritel, video games, ku Internet. Ya ma inge sikyak pa ke sou lom? Fwin ouinge, ya kom ku in aksumwosye oiya a ma sikyuk nu sum in orekmakin pal yok nu sin sie sin sie? Na fuka in tukeni oru kain in orekma oana in orek mongo, in olla alu, ku tukeni orekma ke imae? Ya komwos ku in tukeni orekma in karungin tulik, ku in sang kasru nu sin papa a nine kiomwos su matou tari?
14 Ma yok sripe emeet, komwos in kafweang in tukeni orekmakin pal ke orekma nukewa in kulansap nu sin Jeova. Orekma lomwos in tukeni sramsramkin a lutlutkin daily text a tukeni oru lutlut lun sou in alu nu sin God sang kasru yok in oru nunak a akwuk lun sou oana sie. Ouyepa, kafweang in tukeni oru orekma in luti peng mwo. Fwin ku, srike in tukeni wi ke orekma lun pioneer, fwinne ke lusen malem se na ku ke lusen yea se na. (Ridi 1 Korint 15:58.) Sie sister su wi mokul tumal in oru orekma lun pioneer el fwak: “Orekma in luti pa sie nu ke inkanek puspus su kut ku in tukeni orekmakin pal a in sramsram nu sin sie sin sie. Ke sripen oasr akwuk sefwanna lasr in kasru met puspus su kut osun nu se ke orekma in luti, nga pulakin la kut akesrui na paye. Nga pulakin fototo nu sel liki meeta oana mokul tumuk a oana sie kawuk mwomwo luk pa.” Ke komwos tukeni orekma ke ma yok sripe puspus, ma kom lungse, ma yok sripe na paye ke moul lom, a ella a oiya lom kais kutu srisrik fwa oana sie nu sin mokul ku mutan kiyom, oana Akuila a Prisila, komwos fwa nunak, pulakin, a oru ma puspus oana “ikwe siefwanna.”
Akos Kas in Kolyuk lun God
15. Mea inkanek nu ke sie moul in payuk mwomwo? Akuteye.
15 Jisus el etu la arlana yok sripe in oru meet ma lungse lun God ke moul in payuk. El liye Jeova ke pal se el oru siyanyen se meet in payukyak. El liye ke insemwomwo yok lal Adam a If ke elos srakna akos kas in kolyuk lun God. A el liye ma upa a me keok su tuku ke orekma lalos ke elos mutawauk in pulesru masap lal. Ke ma inge, ke Jisus el luti met puspus, el kalweni me luti lun Papa tumal su oasr in Genesis 2:24. El fwak pa kas inge: “Ma God el fwalseni, lela met in tia eselik.” (Mattu 19:6) Ke ma inge, sunak yok nu sin Jeova pa inkanek nu ke sie moul in payuk mwomwo a insemwomwo. Papa a nine kiyen Jisus fwin fwalu, Josef a Mary elos akkalemye me srikasrak mwomwo ka.
16. Fuka Josef a Mary elos akkalemye la elos lungse in akos kas in kolyuk lun God ke moul in sou lalos?
16 Josef el kulang a akkalemye sunak nu sel Mary. Ke el eteyak la el putete, el lungse in akkalemye pakoten nu sel, fwinne ke pal se meet liki lipufon lun God el akuteye nu sel ma sikyuk nu sel Mary. (Mattu 1:18-20) Oana siyanyen se, elos akos masap lal Caesar a elos akos pa Masap su itukyang nu sin met Israel ke inkanek lal Moses. (Luk 2:1-5, 21, 22) A fwinne mokul mukena pa sapkinyuk in wi ke kofwo lulap elan alu nu sin God in an Jerusalem, Josef a Mary wekunang met in sou lalos, elos wi ka yea nukewa. (Duteronomi 16:16; Luk 2:41) Ke oiya inge nukewa a kutupa inkanek puspus saye, siyanyen se inge elos kafweang in akinsemwomwoye Jeova a elos akkalemye sunak yok ke ma puspus su kupasr nu ke orekma in alu nu sin Jeova oana kofwo nukewa inge. Wangin alolo ka paenang Jeova el sulelosla in karungin Mwen natul ke pal se Jisus el srakna fwusr fwin fwalu.
17, 18. (a) Ke inkanek fuka siyanyen se elos ku in akos meet kas in kasru lun God ke moul in sou lalos? (b) Fuka ma inge fwa sang ma lane nu selos?
17 Ya kafweang lomwos in akos kas in kolyuk lun God sang pa kasru yok ke moul lomwos oana sie sou? Ke sie me pupulyuk, komwos fwin orala sulela yok sripe, ya komwos oru meet research ke akwuk lun Baibel, pre nu sin God ka, a suk ke kas in kasru lun met Kristian su fokoko ke lulalfongi? Ku ya komwos srike in aksumwosye ma upa ke komwos orekmakin nunak lomwos sifwana ku nunak lun met in sou ku lun met kawuk lomwos? Ya kom kafweang in orekmakin kas in kasru mwomwo puspus su met kulansap oaru a lalmetmet elos simusla ke me rid puspus ke akwuk in payuk a ke moul lun sou? Ya komwos lungse na in akos fasin lun anu, ku kas in papu lun met pengpeng? Ya komwos tukeni pre a lutlut, a oakiye nien sun mwo ke orekma in kulansap nu sin Jeova, a sramsramkin ke ma yok sripe puspus ke sou lomwos?
18 Ke moul in payuk mwomwo a insemwomwo lalos ke lusen yea 50, Ray el fwak: “Wangin ma upa kut sun su kut tia ku in aksumwosye, meyen Jeova el wi kut oana ‘soko fwu koa tolkwe.’” (Ridi Ekklisiastis 4:12.) Danny a Trina elos insese ka. Elos fwak: “Ke kut tukeni kulansap nu sin God, moul in payuk lasr akkeyeyuk a fokoko liki meeta.” Elos moulkin moul in payuk mwomwo ke lusen yea 34 kutu. Kom fwin oru Jeova in ma yok sripe emeet ke moul in payuk lom, el fwa kasre kom in pulakin engan yok, a el fwa akinsemwomwoye kom ke inkanek yok.
Akkalemye Sunak nu ke Me Sang lun God Pal Nukewa
19. Efu ku God el orala akwuk lun payuk oana sie me sang mwomwo?
19 Nu sin met puspus ke pal inge, ma sefwanna su yok sripe nu selos pa insemwomwo lalos sifwana. Tusruktu sie met kulansap lun Jeova el akkalemye nunak saye ka. El etu la God el orala akwuk lun payuk oana sie me sang in akkeye akwuk Lal. (Genesis 1:26-28) Fwin Adam a If elos aksaokye me sang inge, fwalu nufon fwa ekla sie paredais su nenela sin met kulansap lun God su insemwomwo a sumwosmwos.
20, 21. (a) Efu ku kut enenu in aksaokye akwuk in payuk oana ma mutal? (b) Me sang mwomwo fuka kut fwa lutlutkin ke wik toko?
20 Yok liki nukewa, met kulansap lun God elos kalem ke moul in payuk oana sie pal mwomwo in sang mwolana nu sin Jeova. (Ridi 1 Korint 10:31.) Oana ma kut liye, oiyen oaru, inse sefwanna, a in akos ma lungse lun God meet ke moul in payuk lasr pa me akinsemwomwo nu sin Jeova a akkeye moul in payuk lasr. Ke ma inge, fwin kut nunku a akola in payuk, ku kut akkeye moul in payuk lasr, a kut kafweang in akmwoye moul in payuk lasr, kut enenu in liye a kalem meet ke kalme paye lun akwuk in payuk: pa akwuk se inge el sie akwuk mwomwo a mutal su God el oakiye. Kut fwin esam ma inge pal nukewa, ma inge fwa akkeye kut in oru ke ku lasr kewa in oru sulela lasr oana met payuk in fwal nu ke Kas lun God pal nukewa. Ke inkanek inge kut akkalemye la kut aksaokye akwuk in payuk oana me sang mwomwo, a kut akkalemye pa sunak nu sin Jeova God, su ase nu sesr me sang mwomwo se inge.
21 Paye la, tia akwuk in payuk mukena pa me sang mwomwo su Jeova el ase nu sesr; ku tia pa inge inkanek sefwanna in pulakin engun a insemwomwo ke moul. Ke me lutlut toko, kut fwa lutlut akmwoye ke sie pa me sang mwomwo su tuku sin God, me sang inge pa oiyen lolap ku moul lun sie met su tia payuk.
Kom E Topuk Fuka?
• Mea oiyen oaru el ku in oru nu ke moul in payuk lun met Kristian puspus?
• Efu ku kafweang in tukeni orekma ke inse sefwanna akkeye moul in payuk?
• Mea kutu inkanek su met payuk elos akos kas in kolyuk lun God?
• Kut ku in akkalemye fuka sunak nu sin Jeova, su orala akwuk ke moul in payuk?
[Petsac ke sra 9]
Tukeni orekma oru siyanyen puspus in tukeni engunkin inse sefwanna ke moul in payuk lalos