Inse Sefwanna lun Met Kristian Sang Mwolana nu sin God
‘Moniyuk in karunganang inse siefwanna in ngun.’—EFESUS 4:3.
1. Ke inkanek fuka met Kristian su muta fwin an Efesus in century se meet elos sang mwolana nu sin God?
INSE sefwanna su oasr yurin congregation lun met Kristian in pal meeta in an Efesus el sang mwolana nu sin God paye, Jeova. In an se inge su arlana mwo akwuk lalos ke business, kutu sin met Kristian su muta we elos met kasrup su oasr met foko lalos, a oasr kutu selos su met kulansap a saap elos arlana sekasrup. (Efesus 6:5, 9) Kutu selos met Ju su lotela ma paye ke lusen malem tolu su met sap Poul el kaskas nu selos ke an in tukeni lalos. Kutu selos alu nu sin god kikiap se inge pangpang Artemis a elos orekmakin ku lulalfongi akwuk lun inutnut. (Orekma 19:8, 19, 26) Kalem la, akwuk mwomwo lun met Kristian paye oru met puspus su tuku ke kain in oiya nukewa in fototo nu sin sie sin sie. Poul el etu a akilen la inse sefwanna su oasr yurin met Kristian nukewa ke congregation sang mwolana nu sin Jeova. Poul el simusla: “Nu sel mwolana in congregation.”—Efesus 3:21, NW.
2. Ma fuka aksensenye inse sefwanna lun met Kristian fwin an Efesus?
2 Tusruktu, oasr me sensen nu ke inse sefwanna ke congregation lun met Kristian su oasr fwin an Efesus. Poul el sang kas in sensen nu sin met elder ke congregation se inge: “A liki in maslomwos sifwana kutu met fwa tuyuk, a luti ma sesumwos, in amakin met lutlut in fwasr tukolos.” (Orekma 20:30) Oayepa, kutu sin met lili elos srakna akkalemye oiya tia mwo su ku in akkolukye inse sefwanna, pasis Poul el akkalemye kas in sensen inge nu selos la kain in oiya inge el ‘orekma in mwen nutin seakos.’—Efesus 2:2; 4:22.
Sie Leta su Akkalemye Kalem ke Inse Sefwanna
3, 4. Fuka leta lal Poul nu sin met Kristian in an Efesus el akkalemye yok ke inse sefwanna?
3 Poul el akilen la fwin met Kristian elos lungse in oasr akesrui lalos in fwal nu ke orekma lalos nu sin sie sin sie pal nukewa, elos enenu in kafweang in akkeye inse sefwanna inmasrlolos. God el kasrel Poul in simusla sie leta nu sin met Efesus su akkalemye yok ke oiyen inse sefwanna. Ke sie me pupulyuk, Poul el simusla ke akwuk lun God “tu lan esani nu sie ma nu kemwa in Kraist.” (Efesus 1:10) El pupulyukkin pa met Kristian nu ke kain in eot puspus su sang orala sie loom lulap. “Me musa nu kemwa, fwal nu sin sie sin sie, elos kapak nu ke sie tempel mutal in Leum [Jeova].” (Efesus 2:20, 21) Sayen ma inge, Poul el akkalemye kalem ke inse sefwanna lun met Ju Kristian a metsa puspus su ekla met Kristian, a el akesmakinye met lili la elos nukewa orekla sin God. El akkalemye la Jeova pa “Papa, su sou nu kemwa in kosrao a fwalu elos e kin.”—Efesus 3:5, 6, 14, 15.
4 Ke pal inge su kut fwa lutlutkin yok Efesus sapta ak 4, kut fwa liye la efu ku oasr ma eneneyuk in kafweang yok in engunkin inse sefwanna, a la fuka Jeova el kasre kut in oasr inse sefwanna, a oiya fuka fwa kasre kut in sruokye inse sefwanna pal nukewa. Efu ku kom tia rid sapta se inge nufon in kasre kom in eis etauk yok ke me lutlut se inge?
Kafweang Yok Eneneyuk in Oasr Inse Sefwanna
5. Efu ku lipufon lun God elos kulansap nu sel ke inse sefwanna? Tusruktu efu ku oasr pal upa nu sesr in akkalemye inse sefwanna?
5 Poul el kaifwe met Kristian wiyel in an efesus elos in ‘moniyuk in karunganang inse sefwanna.’ (Efesus 4:3) In kasre kut in eis kalem ke ma eneneyuk in kafweang ka, lela kut in lutlutkin ke lipufon puspus lun God. Wangin ma orekla luo fwin fwalu elos oana sie ke ma nukewa, ke ma inge kut ku in fwak mu Jeova el akinsemwomwoye million puspus sin lipufon lal, aok kais sie selos, ke oiya mwomwo su wangin ma oana. (Daniel 7:10) Ne ouinge, elos ku in kulansapu Jeova ke inse sefwanna meyen elos nukewa longol a oru ma lungse lal. (Ridi Sam 103:20, 21.) Aok lipufon oaru nukewa oasr oiya mwomwo lalos su tia oana sie, tusruktu oasr yurin met Kristian oiyen sesumwos. Ke sripe se inge inse sefwanna ku in upa in orek inmasrlon met Kristian.
6. Oiya mwomwo fuka ku in kasre kut in engun in akesrui nu sin met lili puspus su oasr me munas lalos su siena liki me munas lasr?
6 Fwin metu elos srike in akesrui nu sin sie sin sie, elos ku in pulakin ma upa inmasrloslos. Ke sie me pupulyuk, na fuka fwin sie met lili su fwokpap el patla in tuku pal nukewa ke orekma in kulansap lal nu sin Jeova a sie pa met lili el sa in tuku tusruktu el sa in mulat? Kais sie selos ku in nunku mu orekma lun met lili wiyel el tia fwal, tusruktu el mwulkunla la oiya lal sifwana el tia pa na fwal. Na fuka met lili luo inge elos ku in tukeni orekma ke inse sefwanna? Loang akmwoye ke oiya su elos enenu in orekmakin in kasrelos oana ke kas lal Poul toko el akkalemye. A lela kut in nunku ke inkanek mwomwo su ku in akkeye inse sefwanna ke kut kafweang in moulkin oiya mwomwo inge. Poul el simusla: “[Nga] kaifwe nu sumwos tu komwos in fwafwasryesr fwal . . . ke pusisel nu kemwa, a fulpap, ke mongfusesr, komwos in mongfusesr sie sin sie in lung, moniyuk in karunganang inse siefwanna in ngun ke me kapur lun misla.”—Efesus 4:1-3.
7. Efu ku arlana yok sripe in kafweang in inse sefwanna yurin met Kristian wiyesr su sesumwos pa?
7 Arlana yok sripe in lutlut in kulansap nu sin God ke inse sefwanna yurin met puspus su sesumwos pa meyen oasr u sefwanna lun met su alu nu sin God paye. ‘Oasr sie mano, a sie oiye, oana pangon komwos pa tari in sie fwinsrak in pang lomwos; sie Leum, sie lalalfongi, sie baptais; sie God a Papa tumun nu kemwa.’ (Efesus 4:4-6) Ku lun Jeova a me insemwomwo lal el tuku nu ke u sefwanna lun met lili su God el orekmakin. Fwin oasr sie met ke congregation el aktoasrye kut, kut ku in som nu ye? Kut tia ku in long kas lun moul ma patpat ke u saye nukewa.—Jon 6:68.
Met Liaung Elos Akkeye Inse Sefwanna
8. Mea Kraist el orekmakin in sang kasru in akkeye kut in tia kunausla inse sefwanna lasr?
8 Poul el orekmakin sie oiya inmasrlon met meun in pal meeta in pupulyukkin la fuka Jisus el orekmakin met liaung oana sie “me sang” in sang kasru nu ke inse sefwanna lun congregation. Sie met solse su eis kutangla ke meun el ku in us nu ke loom sel metsa oana sie met kulansap in kasru mutan kiyel ke orekma ke loom. (Sam 68:1, 12, 18) Ke inkanek oapana inge, kutangla lal Jisus ke fwalu el orala nu sel met kos puspus su inse mulala in kulansap nu sel. (Ridi Efesus 4:7, 8.) El orekmakin fuka met nukewa inge in oana met kulansap lal? “A el esung nu sin kutu tu elos in met sap, a kutu met palu, a kutu met sulkakin mwosasu, a kutu met sropu a met luti, tu in aksumwosye met mwo, nu ke orekma in kulansap nu ke musaiyuk monin Kraist nu ke pal kut nu kemwa sun lalalfongi siefwanna.”—Efesus 4:11-13.
9. (a) Ke inkanek fuka met liaung su oana “me sang” sang kasru in karungin inse sefwanna lasr? (b) Efu ku met nukewa su wi ke congregation elos enenu in akkeye inse sefwanna?
9 Oana met seperd mwomwo a kulang, met liaung inge oana “me sang” elos sang kasru in karungin inse sefwanna lasr. Ke sie me pupulyuk, fwin sie met elder ke congregation el liye la oasr brother luo elos “akmulatye sie sin sie,” el ku in sang kasru yok nu ke inse sefwanna lun congregation ke el sang kas in kasru nu selos, ‘in aksumwosyelos ke oiyen fwokpap.’ (Galetia 5:26–6:1) Oana met luti, met liaung inge su oana “me sang” elos kasre kut in musai lulalfongi fokoko fwal nu ke me luti lun Baibel. Ke ma inge elos akkeye inse sefwanna a kasre kut in kapkapek oana met Kristian su fokoko ke lulalfongi lasr. Poul el simusla la ma inge eneneyuk “tu kut in tia sifwil tulik, ikik ke noa a mukuikui ke eng in lutlut nu kemwa, ke sruf lun met, in kutasrik, kolla nu ke me kikiap lun ma koluk.” (Efesus 4:13, 14) Kais sie met Kristian enenu in sang kasru nu ke inse sefwanna lun u lasr oana met lili, oana laa nukewa ke manosr sang kasru laa puspus saye in akpayeye ma eneneyuk lun kais sie.—Ridi Efesus 4:15, 16.
Akkeye Oiya Mwomwo Puspus
10. Oiya koluk el ku in aksensenye fuka inse sefwanna lasr?
10 Ya kom akilen la sapta ak 4 ke leta lal Poul nu sin met lili fwin an Efesus akkalemye la orekma in akkalemye lungse el yok sripe in akpayeye inse sefwanna oana met Kristian su fokoko ke lulalfongi? Tok, el akkalemye ke lungse la fuka ma inge ku in sang kasru nu ka. Ke sie me pupulyuk, kut fwin orekmakin inkanek lun lungse kut fwa tia oru orekma lun kosro a oiya fokfok nukewa. Poul el kaifwe met Kristian wiyel elos in tia ‘sifwil fwufwasryesr oana fwufwasryesr lun met lun mutunfwal puspus.’ Met lun mutunfwalu elos “alukela liki pulauk,” a “elos sifwana esalosyang nu ke lung lun ikwe.” (Efesus 4:17-19) Fwal se inge su kut oasr ka inge su nenela ke kain in nunak fokfok a orekma koluk el aksensenye inse sefwanna lasr. Metu elos lungse in aksruksruk koluk ke orekma lun kosro, elos orekmakin ma inge ke on lalos, elos liye ke petsa, a oru ma inge ke lukma ku ye mutun met puspus. Aok, orekma in orek fung nu sin sie met, su akkalemye mu el lungse sie met fwinne el tia nunku in payukyak nu sel, ku in oru kom in som liki Jeova a ke congregation. Efu? Meyen orekma inge el arlana sa in kol nu ke orekma lun kosro. Oayepa, orekma se inge in orek kato a orek fung nu sin sie met ku in oru sie met payuk in orek kosro a pa inge sripe paenang tulik elos srela liki papa ku nine kiyelos meyen papa a nine kiyelos fwasrelik. Aok orekma se inge el ku in akwanginyela inse sefwanna lun sou! Oasr sripe mwomwo lal Poul ke el simusla kas inge: “A tia ou inge lutlut lomwos ke Kraist.”—Efesus 4:20, 21.
11. Baibel el akkeye met Kristian in orala ma ekla fuka?
11 Poul el akuteye la kut enenu in sisla kain in nunak koluk puspus a kut in akkeye oiya mwomwo puspus su ku in kasre kut in asrouki yurin met lili puspus ke inkanek fwal a mwo, el simusla: ‘Tu komwos in sisla met matu, fwal nu ke oiyen moul lomwos meeta, su kolukla fwal nu ke lung lun kikiap; . . . tu komwos in ekla sasu insiomwos, a komwos in nukomang met sasu, su orekla fwal nu ke ma lungse lun God ke ma sumwosmwos a oiyen oaru a paye.’ (Efesus 4:22-24) Kut ku in ‘aksasuye insiesr’ fuka? Kut fwin sifwilpa nunku yok ke ma kut lotela ke Kas lun God a ke me srikasrak mwomwo lun met Kristian wiyesr su ku ke lulalfongi, kut ku in aksasuye oiyesr oana met sasu su ‘orekla fwal nu ke ma lungse lun God.’
Akkeye Inkanek Mwomwo in Kaskas
12. Fuka orekma lasr in kaskaskin ma paye akkeye inse sefwanna? A efu ku upa nu sin kutu met in kaskaskin ma paye?
12 Kafweang lasr in kaskaskin ma paye el yok sripe nu sin met nukewa ke sie sou a ke sie congregation. Kaskas mwomwo, sumwos, a kulang ku in oru metu elos in fototo nu sin sie sin sie. (Jon 15:15) Tusruktu na fuka fwin brother se el orek kikiap nu sin sie brother? Fwin brother wiyel el etu a akilen ka, lulalfongi inmasrlolos e fwa akmunasyeyuk. Paenang kom ku in kalem ka la efu Poul el simusla: “Komwos in kaskas paye nu sin sie sin sie, tu kut laan sie sin sie.” (Efesus 4:25) Sie met su pala tari in kaskaskin kas kikiap, saap mutawauk ke pal se el tulik srisrik, ku in upa nu sel in mutawauk in kaskaskin ma paye. Ne ouinge Jeova el fwa akinsemwomwoye kafweang lal in ekulla oiya lal a el a fwa kasrel.
13. Mea eneneyuk tu kut in sisla kaskas tia mwo?
13 Jeova el luti kut in akkeye sunak a inse sefwanna ke congregation a ke sou, ke kut arlana liaung inkanek in kaskas lasr. “Komwos in tia lela kas fokfok in som liki oalumwos . . . Komwos in sisla liki komwos men nu kemwa, a silung, a mulat, a mwomwon, a wenteis, a ouyepa silolel.” (Efesus 4:29, 31) Sie inkanek kut in sisla kaskas tia mwo pa kut in akkeye sunak lasr nu sin met puspus saye. Ke sie me pupulyuk, sie met su kaskaskin kas upa nu sin mutan kiyel el enenu in ekulla oiya lal nu sel, yokna ke pal se el lotela la fuka Jeova el akfulatye mutan nukewa. God el akmusrala kutu mutan ke ku lal, a el sang fwinsrak nu selos in kol oana togusra yurin Kraist. (Galetia 3:28; 1 Piter 3:7) Ke inkanek oapana inge, sie mutan su wowoyuk pal nukewa nu sin mokul tumal el enenu in ekulla oiyel yokna ke el lotela la fuka Jisus el kutongyel sifwana in tia sang ma koluk nu ke ma koluk su met oru nu sel.—1 Piter 2:21-23.
14. Efu ku orekma in akkalemye mulat el arlana sensen?
14 Sie ma su oru metu elos in kaskaskin kas upa a tia mwo pa elos tia kutongye mulat lalos. Oiya se inge ku in oru pa metu elos srela liki sie sin sie. Mulat el oana sie e. Ma inge ku in arlana sa in yokelik a tia ku in kunla paenang ku in kunausla ma puspus. (Soakas 29:22) Sie met su akkalemye mulat lal ke inkanek in kaskas lal el enenu in kafweang in kutongye mulat lal in tia musalla fototo lal nu sin met puspus saye su arlana yok sripe. Met Kristian elos enenu in kafweang in sang nunak munas, in tia sruokye inse toasr a in tia sifwilpa sramsramkin ma su sikyak tari. (Sam 37:8; 103:8, 9; Soakas 17:9) Poul el sang kas in kasru nu sin met Kristian fwin an Efesus: “Komwos in mulat, a tia orek ma koluk; tia lela fwatu in tili fwin mulat lomwos, a komwos in tia sang an sin Devil.” (Efesus 4:26, 27) Kut fwin tia kutongye mulat lasr, ma inge ku in sang pal mwo nu sin Devil elan kunausla inse sefwanna a oru kut in lain sie sin sie ke congregation.
15. Kut fwin eis ma su tia ma lasr, mea fwokin ma inge?
15 Orekma mwo lasr in tia kal a pusrala ma lun met saye ku in sang inse sefwanna ke congregation. Kut ku in rid: “El su pusr, lan tia sifwil pusre.” (Efesus 4:28) Met lun Jeova elos akkeye lulalfongi lalos nu sin sie sin sie. Fwin sie met Kristian el akkolukye lulalfongi se inge ke el eis ma se su tia ma lal, el e fwa kunausla inse sefwanna inge.
Lungse nu sin God Oru Kut in Oasr Inse Sefwanna
16. Kut ku in orekmakin fuka kas mwomwo in akkeye inse sefwanna lasr?
16 Inse sefwanna ke congregation lun met Kristian el tuku ke sripen lungse lalos nu sin God akkeye met nukewa elos in akkalemye oiya mwo a sunak nu sin met puspus saye ke inkanek lun lungse. Kulo lalos nu ke kulang lun Jeova akkeyelos in kafweang yok in orekmakin kas in kasru inge: “Komwos in . . . [kaskaskin] kutena su mwo, kas in musaiyuk fwal nu ke enenu, tu in sang kulang nu sin su porongo. A komwos in kulang nu sin sie sin sie, ke mwo insiomwos, nunak munas nu sin sie sin sie, oana God el ouyepa nunak munas nu sumwos in Kraist.” (Efesus 4:29, 32) Jeova el kulang a sang nunak munas nu sin met sesumwos oana kut. Ya kut tia sang nunak munas nu sin met puspus ke pal se kut liye oiyen sesumwos lalos?
17. Efu ku kut enenu in kafweang in akkeye inse sefwanna lasr?
17 Inse sefwanna lun met kulansap lun God sang mwolana nu sin Jeova. Ku lal el akkeye kut ke inkanek puspus in akkeye inse sefwanna. Paye la kut srunga in lain kolyuk lun ku lun God. Poul el simusla: “Komwos in tia aktoasrye ku lun God.” (Efesus 4:30, NW) Sie me insemwomwo yok in karungin inse sefwanna lasr. Ma inge sang engun yok nu selos su engunkin ma inge a sang mwolana nu sin Jeova. “Ke ma inge, komwos fwa met etawi God oana tulik kulo, a fwufwasryesr in lungse.”—Efesus 5:1, 2.
Kom E Topuk Fuka?
• Oiya mwomwo fuka sang kasru nu ke inse sefwanna yurin met Kristian?
• Fuka ella lasr ku in sang me akkeye nu ke inse sefwanna lun congregation?
• Fuka kas lasr el ku in kasre kut in engunkin inse sefwanna yurin met puspus?
[Caption on page 13]
Met puspus su tuku liki mutunfwal a oiya nukewa elos engunkin inse sefwanna
[Caption on page 14]
Ya kom etu a kalem ke me sensen su tuku ke orekma in orek kato a fung nu sin met?