Engunkin Inse Misla Yurin Met Kulansap Nukewa lun God
“Nga fwa kaksakin kom in masrlon congregation.”—SAM 35:18, New World Translation.
1-3. (a) Ma fuka ku in oru kutu met Kristian in sensenkin fototo lalos nu sin God? (b) Met kulansap nukewa lun God ku in eis me karungin oya?
KE PAL se Joe a mutan kiyel elos oasr ke vacation lalos, elos engunkin orekmakin snorkel in liye ma puspus su oasr ke sie coral reef, su oasr kain in ik puspus, kain in tun, ma srisrik a ma lulap. Elos kofkof nu ke an loeloes in liye akmwoye ma puspus su oasr ke reef se inge. Ke pal se elos oasr tari ke sie an su arlana loal, mutan kiyel Joe el fwak, “Nga nunku mu kut arlana loes liki likinyenu.” Joe el fwak: “Nik kom tufwal, nga etu ma nga oru.” Joe el esam ke ma sikyak tia pat tokin pal se inge, a el siyuk sel sifwana oinge, ‘Efu ku ik nukewa wanginla, iku som nu ya?’ Ke el liye la efu ku ik nukewa wanginla, el arlana sangeng. Meyen oasr pako lulap soko su tuku liki an loal el kasrusr sumwos nu sel. A el arlana fosrngala, meyen wangin kutena ma su ku in kasrel. Ke pal se pako soko inge el arlana apkuranyang nu sel, oasr na ke fit tolu, na pako soko inge forla a som lukel.
2 Sie met Kristian ku in akkolukyeyukla ku srufweyukla ke inkanek lun akwuk koluk puspus lun Setan, oana ke me akengan, orekma, a ma puspus. A el tia akilen la el apkuranyang nu ke me sensen puspus. Joe, sie met Kristian elder el fwak: “Ma sikyak nu sik oru ngan nunku ke met puspus su kut asrouki nu se. Lela kom in kofkof ke inkofu su wangin me sensen a oasr me insemwomwo yok, aok ke congregation!” Kut fwa tia lela kutena me akkoluk lun fwal se inge in oru kut in srikutla liki congregation, su ku in orala me sensen yok. Kom fwin pulakin oiya se inge, lela kut in silaklak in folokla nu ke congregation, oana ke kas in pupulyuk el oana sie ‘kof mus.’ Fwin kom tia oru, oasr me sensen yok in akkolukye fototo lom nu sin God.
3 Ke pal inge, akwuk puspus lun fwalu el me sensen yok nu sin met Kristian. (2 Timote 3:1-5) Setan el etu la pal lula lal arlana fototo, a el suk met su tia loang akmwoye a el lungse in kunauselosla. (1 Piter 5:8; Fwakyuk 12:12, 17) Tusruktu, oasr me loeyuk lasr. Jeova God el ase nu sesr sie an mwomwo su ku in kasre kut in karungin kut sifwana a in karungin fototo lasr nu sel, pa ke congregation lun met Kristian.
4, 5. Mea pulakin a nunak lun met puspus ke pal fwasru lalos, a efu?
4 Akwuk puspus lun metu ke pal inge tia arlana ku in sang moul mwomwo a misla nu sin met nukewa, ke mano a ke nunak lalos. Oasr met puspus elos pulakin mu oasr me sensen pal nukewa, ke sripen akmas, orekma sulallel, a yok molin ma nukewa, a ke fokfokla lun yen engyengu a anu. Met nukewa sun ma upa ke sripen munasla lun mano a mas ke sripen elos matou. A nu selos su oasr orekma lalos, loom selos, a oasr mani pukanten, a mano fokoko elos nunku pa la ne nge pal ma inge nukewa ku in on a oasr na.
5 Met puspus elos tia pa pulakin inse misla. Sie me asor, meyen oasr met puspus su fwinsrakkin in koneak misla a moul mwomwo ke moul in payuk lalos a ke sou lalos elos koneak la ma inge el tia akpayeyuk. Met puspus su wi ke alu in suk inkanek mwo in akmwoye fototo lalos nu sin God elos fosak, a elos tia insemwomwo ke kas in kasru ka su elos eis. Met inge su wi ke alu elos fosak yokna ke elos liye ke oiya koluk su met kol ke alu lalos oru a ke me luti lalos su tia fwal nu ke ma Simusla. Ke ma inge, oasr pa met puspus elos nunku mu fwinsrak sefwanna lalos pa in lulalfongi ke akwuk lun science, ku ke oiya mwomwo a kulang lun met puspus. Aok, tia sie me lut, fwin oasr met puspus ke pal inge su pulakin la wangin misla a moul mwomwo, a elos oru sulela lalos in tia nunku yok ke pal fwasru lalos.
6, 7. (a) Efu ku tia oana sie nunak lun met su kulansap nu sin God a nu selos su tia kulansap nu sel? (b) Mea kut fwa lutlutkin?
6 Yok ma tia oana sie ke nunak lun met Kristian ke congregation a lun met puspus su tia wi ka! Kut oana met kulansap lun Jeova, fwinne kut sun pa ma upa puspus oana met atulani lasr elos sun a pulakin pa, tusruktu nunak lasr ka siena na paye. (Ridi Isaia 65:13, 14; Malakai 3:18.) Efu? Meyen kut lotela la Baibel el akkalemye ke sie me akuteye mwomwo ke oiya su sikyak nu sin metu, a kut etu ke inkanek mwo in muteng a kutangla ke kain in ma upa puspus. Ke sripe se inge, kut tia fosrnga ke ma su fwa sikyak ke pal fwasru. Kut su kulansap nu sin Jeova, kut eis me karungin liki nunak tia mwo a tia fwal nu ke ma simusla, orekma fokfok, a ke fwako lun orekma koluk nukewa inge. Met nukewa ke congregation lun met Kristian elos pulakin inse misla su met puspus tia pula.—Isaia 48:17, 18; Filippai 4:6, 7.
7 Kutu me srikasrak ku in kasre kut in nunku ke inse misla su engunkin sin met nukewa su kulansap nu sin Jeova a ke met puspus su tia kulansap nu sel su wangin inse misla yurolos. Me srikasrak puspus inge ku in akkeye kut in tuni nunak lasr sifwana a orekma puspus lasr in kasre kut in orekmakin kas in kai lun God ka, su ku in karungin kut.—Isaia 30:21.
‘Niyuk Apkuran na in Sirirla’
8. Mea met kulansap lun Jeova elos enenu in oru pal nukewa?
8 Ke mutaweyen me sramsram lun metu, met puspus su sulela in kulansap a akos Jeova elos suk inkanek in tia asrouki nu sin met puspus su tia kulansap nu sel. Aok, Jeova el akkalemye tari la e fwa oasr me lokwalok inmasrlon met su alu nu sel a nu sin met nukewa su fwasr tokin Setan. (Genesis 3:15) Ke sripen elos tu ku in orekmakin akwuk mwomwo nukewa lun God, met kulansap nukewa lal elos akkalemye nunak a oiya su tia oana sie nu sin met puspus lun fwalu. (Jon 17:15, 16; 1 Jon 2:15-17) Kafweang in tu na ku ka tia ma fusrasr se in oru pal nukewa. Aok, kutu sin met kulansap lun Jeova oasr pal elos inse luo ka a siyuk fwin mwo in moulkin moul in lafwekinelos sifwana.
9. Akuteye ke ma upa su sikyak nu sin met sim lun Sam ak 73.
9 Sie sin met kulansap lun Jeova su nunku yok fwin el orala sulela mwomwo, pa met sim lun Sam ak 73, saap sie sin mwen puspus natul Asap. Met sim lun sam se inge el siyuk la efu ku met koluk elos kapkapek, engun, a eis insemwomwo puspus ke moul, tusruktu kutu met su kafweang in kulansap nu sin God elos pulakin me keok a ma upa puspus.—Ridi Sam 73:1-13.
10. Efu ku kusensiyuk nukewa su met sim lun sam el siyuk yok sripe pa nu sum?
10 Ya oasr pal kom siyuk pa nu sum sifwana kusensiyuk nukewa oana ke met sim lun sam el simusla? Fwin oasr, kom tia enenu in pulakin mu oasr ma koluk kom oru ku kom in nunku mu lulalfongi lom el tula ku munasla. Paye la, oasr met kulansap puspus lun Jeova, wekunang kutu met su Jeova el orekmakin in simusla Baibel, elos nunku pa ke kusensiyuk se inge. (Job 21:7-13; Sam 37:1; Jeremaia 12:1; Hebakkuk 1:1-4, 13) Aok, met nukewa su lungse in kulansap nu sin Jeova elos enenu in nunku yok a lulalfongi na paye ke me top nu ke kusensiyuk se inge: Ya orekma in kulansap nu sin God a in aksol pa ma mwo emeet in oru? Kusensiyuk se inge el akkalemye pa ke kas in lain su Setan el fwak in imae Eden. Ma inge yok sripe pa nu ke kas in lain su orek nu ke sumwos lun God in oru kolyuk lal in kosrao a fwalu. (Genesis 3:4, 5) Ke ma inge kut nukewa mwo in nunku ke oiya puspus su met sim lun sam el akkalemye. Ya kut enenu in sok sin met koluk su luman moulkin moul lalos a wangin kutena ma upa sikyak nu selos? Ya kut fwa ‘forla’ liki orekma in kulansap lasr nu sin Jeova a etawi inkanek koluk lalos? Pa inge ma Setan el lungse kut in oru.
11, 12. (a) Ke inkanek fuka met sim lun sam el aksumwosye nunak luo lal, a mea ma inge luti nu sesr? (b) Mea kasre kom in aksumwosye nunak lom oana ke met sim lun sam el oru?
11 Mea kasru met sim lun sam in akwanginyela nunak tia mwo lal? Paye la el fwak la el apkuran na in forla liki ma sumwosmwos, tusruktu nunak tia mwo lal inge ekla ke pal se el ilyuk nu ke “loom mutal sin God,” kalme pa ke pal se el mutawauk in asrouki yurin met kulansap lun God ke tempel su moniyuk ke orekma lalos a ke pal se el nunku yok ke akwuk lun God. Tokin ma inge arlana kalem nu sin met sim lun sam la el srunga in sikyak nu sel ma e fwa sikyak nu sin met koluk nukewa. El ku in liye la inkanek lalos a sulela lalos oru elos in tu ke sie “an musresre.” Met sim lun sam el akilen la met koluk nukewa su som liki Jeova elos fwa sun safla lalos a elo fwa pulakin ‘me aksangeng’ upa, tusruktu met nukewa su kulansap nu sin Jeova fwa eis me kasru a me karungin lal. (Ridi Sam 73:16-19, 27, 28.) Wangin alolo ka la kom akilen pa la kas inge arlana paye. Aok, in moulkin moul lasr sifwana a in tia nunku ke masap lun God saap mwo nu sin met puspus, tusruktu fwako koluk su tuku ke inkanek koluk inge tia ku in kaengkinyukla.—Galetia 6:7-9.
12 Mea pa kut ku in lotela ke ma sikyak nu sin met sim lun sam se inge? El koneak inse misla a eis etauk yurin met kulansap puspus lun God. El mutawauk pa in oasr nunak mwomwo yurol ke pal se el som nu ke an su metu elos alu nu sin Jeova. Oapana ke pal inge, kut ku in koneak met papu mwomwo puspus a kut engunkin me luti mwomwo ke God su tuku ke ma simusla a ke meeting nukewa lun congregation. Aok, oasr sripe mwomwo, paenang Jeova el akkalemye nu sin met kulansap nukewa lal elos in wi ke meeting nukewa lun congregation. Ke meeting nukewa inge elos fwa eis me akkeye yok a elos fwa kaifweyuk in oru orekma mwo.—Isaia 32:1, 2; Hibru 10:24, 25.
Sulela Met Asrouki Mwomwo
13-15. (a) Ma fuka sikyak nu sel Daina, a ma inge pupulyukkin mea? (b) Efu ku asrouki nu yurin met lili wiyesr el sie me karungin?
13 Tulik mutan natul Jekob su pangpang Daina el sie me srikasrak ke sie met su sun ma upa puspus ke sripen el asrouki nu sin met puspus su tia kulansap nu sin God. Ma simusla kel in Genesis akkalemye nu sesr la el lungse in asrouki nu sin mutan fwusr puspus lun an Kenan apkuran ke an se su sou lal elos muta ka. Met kulansap lun Jeova elos orekmakin akwuk mwomwo ke moul nasnas, tusruktu met Kenan elos tia moulkin moul nasnas. Aok, met archaelogist elos koneak me akpayeye puspus la inkanek koluk lun met Kenan pa sripe paenang an selos nenela ke ma srulela, orekma lun kosro, orekma fokfok su kupasr nu ke ma srulela, a sulallel. (Exodus 23:23; Livitikus 18:2-25; Duteronomi 18:9-12) Esam ke ma sikyak ke sripen asrouki lal Daina nu sin met puspus inge.
14 Oasr sie mokul lun an se inge, su pangpang Sekem, akkalemyeyuk mu el “sunakinyuk yok liki sou lun papa tumal nukewa.” El liyel Daina “a el eisel a on yurol a akkolukyel.” (Genesis 34:1, 2, 19) Sie me asor yok pa inge! Paye la Daina el tia nunku mu kain in ma koluk se inge ku in sikyak nu sel. Saap el lungse na in orek kawuk nu sin mokul fwusr puspus in an se inge, su el nunku mu mwo a fwa tia oru ma koluk. Tusruktu, Daina el kiapeyukla na paye.
15 Mea ma simusla inge el luti kut ka? Ma inge luti kut la kut tia ku in fwinsrakkin mu wangin ma koluk su e fwa sikyak nu sesr kut fwin asrouki nu sin met su tia kulansap nu sin Jeova. Ma Simusla el akkalemye la “met asrouki koluk ku in akkolukye oiya mwomwo.” (1 Korint 15:33) Ke oiya saye, asrouki yurin met su wi kom ke lulalfongi ku in kasre kom in moulkin moul nasnas a in karungin lungse lom nu sin Jeova. Met asrouki mwomwo inge elos fwa akkeye kom in oru ma mwo pal nukewa.—Soakas 13:20.
“Komwos Aknasnasyeyuk Tari”
16. Mea met sap Poul el fwak ke oiya lun kutu met Kristian ke congregation in an Korint?
16 Congregation lun met Kristian el sang kasru nu sin met puspus in aknasnasyelos sifwana liki kain in orekma koluk puspus. Ke pal se met sap Poul el simusla leta se meet lal nu sin congregation fwin an Korint, el sang kas in kaksak nu sin met Kristian we ke ma ekla mwomwo puspus su elos oru in akfwalye moul lalos nu ke masap lun God. Kutu selos elos moulkin moul fokfok in pal meeta oana met kosro, alu nu ke ma srolela, orekma koluk lun mokul nu sin mokul, pusrapasr, met srui, a kutupa orekma koluk. Tusruktu Poul el fwak nu selos: “A komwos aknasnasyeyuk tari.”—Ridi 1 Korint 6:9-11.
17. Orekma in moulkin akwuk mwomwo lun Baibel el sang kasru fuka nu sin met puspus in akmwoye moul lalos?
17 Met puspus su tia lulalfongi wangin yurolos me kasru mwomwo su tuku ke masap lun God. Elos moulkin akwuk a nunak lalos sifwana, ku elos etawi pa moul fokfok oana ma met puspus ke an selos oru, oana kutu sin met Korint in pal meeta elos oru meet liki elos ekla met lulalfongi. (Efesus 4:14) Etauk sumwos ke Kas lun God a ke akwuk nukewa lal, el ku in sang kasru yok in ekulla a akmwoye moul lun met nukewa su orekmakin akwuk mwomwo lun ma Simusla. (Kolosse 3:5-10; Hibru 4:12) Met lili puspus ke pal inge su wi ke congregation elos ku in fwak nu sum la meet liki elos lotela a moulkin akwuk sumwomwos lun Jeova, elos moulkin moul tia nasnas. Ke sripe inge, elos tia engun a wangin inse misla lalos. Elos koneak misla ke pal se elos mutawauk in asrouki nu yurin met kulansap lun God, a orekmakin akwuk mwomwo lun Baibel.
18. Mea experience lun sie sister fwusr wiyesr, a ma inge sang me akpayeye nu ke mea?
18 Ke luma saye, oasr kutu met Kristian in pal somla elos sulela in som liki ‘kof mus’ su lumeyuk nu ke congregation lun met Kristian, a ke pal inge elos arlana asor ke sulela lalos inge. Sie sister, su pangpang Tanya, el akuteye la papa a nine kiyel “lotel ke ma paye mutawauk ke el tulik srisrik,” tusruktu ke pal se el sun yea 16, el som liki congregation in “moulkin ma lun fwalu.” Fwako koluk ka su el sun pa el puteteyuk ke wangin mokul tumal, a el uniye tulik srisrik se natul su soenna isusla. Ka pal inge el fwak: “Ke lusen yea tolu somla su nga tia wi ke congregation pa paenang nga pulakin asor yok pal nukewa. A sie ma su nga asor na paye ka ne ke pal inge pa ke nga uniye tulik srisrik se nutik su soenna isusla. . . . Nga lungse in fwak nu sin met fwusr nukewa su lungse in moulkin kutu srisrik akwuk lun fwalu: ‘Nikmet srike komwos in oru!’ Saap komwos ku in pulakin mu arlana mwo in oru ma lun fwalu, tusruktu ma inge ku in orala kain in fwako koluk puspus. Wangin kutena ma mwo su fwalu inge ku in akkalemye nu sum. Nga etu tari. Meyen nga pulakin tari. Komwos in mutana ke u lun Jeova! Pa inge inkanek sefwanna lun moul su use me insemwomwo yok.”
19, 20. Me karungin a me kasru fuka congregation lun met Kristian ku in oru, a fuka?
19 Srike nunku la mea fwa sikyak nu sum kom fwin som liki congregation lasr su oasr me karungin a me kasru yok nu sum. Oasr met lili puspus, ke elos esam ke inkanek in moul lalos su wangin sripe meet liki elos lulalfongi ke ma paye, elos srungela in sifwilpa nunku ka. (Jon 6:68, 69) Kom fwin kafweang in asrouki pal nukewa yurin met Kristian wiyom, ma inge ku in kasre kom in ku in koneak inse misla a me karungin liki me keok a ma upa puspus su oasr ke fwal lun Setan. Orekma lom pa in asrouki nu selos a in wi pal nukewa ke meeting fwa akesmakinye kom pal nukewa ke mwoiyen masap a akwuk mwomwo lun Jeova a elos fwa akkeye kom in moulkin ma inge. Oasr sripe mwomwo lom in ‘kaksakin Jeova inmasrlon congregation lulap,’ in oana ke met sim lun sam el oru.—Sam 35:18.
20 Aok, ke kain in sripe puspus, met Kristian nukewa elos ku in pulakin kutu pal mu upa nu selos in sruokye oiyen oaru lalos. Ne ouinge saap elos enenu na me kasru lun sie met lili in akkalemye nu selos inkanek sumwos. Mea kom a met nukewa ke congregation ku in oru in kasru sie met lili ke pal elos pulakin oiya inge? Me lutlut toko fwa tuni la fuka kom ku in ‘kaifwe a musai’ met lili puspus ke congregation.—1 Tessalonika 5:11.
Kom E Topuk Fuka?
• Mea kut ku in lotela ke ma sikyak nu sin met sim lun Sam ak 73?
• Ma sikyak nu sel Daina el luti nu sesr mea?
• Efu ku kom ku in koneak inse a nunak misla ke congregation lun met Kristian?
[Petsac ke sra 4]
Kofkof ke an mus a mwo; pa in mutana ke congregation!