Oru Moul Lom In Kapkapek!

“Insemwomwo met se su tia fwafwasyesr in papu lun met koluk . . . Ma nu kemwa el oru fwa kapkapek.”​—SAM 1:1, 3.

1. (a) Fuka nunuk lun met fwusr puspis nu ke orala mwo lun fwalu? (b) Fuka Baibel el akkalemye sie met su arulanu kapkapek?

KAPKAPEK​—mea kalmen kas se inge nu sum? “Nien sun luk pa in kapkapek ke business,” pa inge ma mokul fwusr se el fwak. Sie mutan fwusr el fwak: “Ma Nga lungse emeet pa in oasr sie sou insemwomwo luk.” Tusruktu siepa mutan fwusr el fwak: “Nga lungse in oasr sie condominium kato luk, sitosa soko kato . . . Nga arulanu nunku moul luk sifwanu.” Tusruktu oasr ma upa meyen tia mani, ku sou, ku orekma mwo pa srupon kapkapek na paye. In Sam 1:1-3, kut ku in rid: “Insemwomwo met se su tia fwafwasyesr in papu lun met koluk . . . A el engunak in ma sap lun Jeova . . . ma nu kemwa el oru fwa kapkapek.”

2. Oiye kapkapek na paye ku in konoiyukyuk, a mea inkanek siefwunnu tu in eis ma inge?

² Ke fus inge Baibel el mwolela ke ma se su wangin kutena met ku in wise​—kapkapek na paye! Tusruktu el tia sramsram ke kasrup ke mani. Baibel el sang kas in sensen: “Tu lungse mani okan kain koluk nu kemwa.” (1 Timote 6:10) Kutangla na paye ku in konoiyukyuk ke orekma in akinsemwomwoye God​—wikin ma inge pa akos ma sap lun Jeova. Pa inge ma siefwunnu ku in wise me insemwomwo na paye! Saap nunuk in muta ye ma sap lun Jeova a in sapkinyuk ma kom enenu in oru tianu me orala nunuk mwo. Aok, Jisus el fwak: “Insemwowo elos su nunku pal nu kemwa ke ma enenu lalos in ngun.” (Mattu 5:3 NW) Fwinne kom akilen ma inge ku tia, kom orekla in oasr enenu nu ke ma lun ngun​—wekunang kena in etu na paye God a in kalem ke akmwuk lal. Ke ma inge, kom ku in experiencekin mukena insemwomwo paye kom fwin nekla me enenu lom mwo a in “fwasr tokin ma sap lun Jeova.”

Efu Kut Enenu Ma Sap lun God

3. Efu kut enenu in insemwomwo in sang Jeova el an ‘kol inkanek lasr’?

³ Met palu Jeremaia el simusla: “O Jeova, Nga etu tu inkanek lun met tia on in el sifwanu, tia ma lun met su fwasr in aksumwosye fwalkal.” (Jeremaia 10:23) Ma se inge arulanu paye nu sin met nu kemwa, met fwusr a met matu. Tia lalmetmet, experience, a etauk mukena pa wangin yurosr tu in aksumwosye inkanek lasr sifwanu; aok, wangin yurosr sumwos in oru ou inge. In Fwakyuk 4:11, Baibel el fwak: “Fwal nu sum Jeova, Leum lasr a God lasr, tu kom in eis mwolanu a kaksak a ku tu kom orala ma nu kemwa, a ke lungse lom elos on, a orekla tari.” Oanu Met Orekutla, Jeova el “unon in moul.” (Sam 36:9) Ke sripe se inge, el etu liki kutena met fwusr in orekmakin moul lasr. Ke ma inge el orala ma sap, tia in eisla insemwomwo lasr, a in kasru kut in akinsemwomwoye kut sifwanu. (Isaia 48:17) Pilesru ma sap lun God, a oru moul lom musalla.

4. Efu met fwusr puspis elos kunausla moul lalos?

⁴ Ke sie me pupulyuk, ya oasr pal kom nunku tari la efu met fwusr puspis elos kunausla moul lalos ke inkanek lun ono koluk, moul fokfok, a kutupa orekma koluk? Sam 36:1, 2 el aketeye: “Ma sito lun met koluk fwak insiuk; wangin sangeng sin God ye mutul. Tu el sifwanu sayael ye mutal, tu ma koluk lal in tia konoiyukyuk a srungeyuk.” Meyen kolukla moul lalos “wangin sangeng” a sumwos lalos nu sin God, paenang met fwusr puspis elos sifwanu keapelosla ke pal elos lalalfongi la wangin kutena ma upa su elos ku in eis ke orekma koluk lalos. Tusruktu, ke saflaiye, elos enenu in sun akmwuk se inge su tianu wanginla: “Tu kutena ma sie met el taknelik, ma inge el fwa kosrani ouyepa; tu el su taknelik nu ke ikwel sifwanu, sin ikwe el fwa kosrani punoela, a el su taknelik nu ke ngun, sin ngun el fwa kosrani moul ma patpat.”​—Galetia 6:7, 8.

‘Oekla Len’

5, 6. (a) Efu met fwusr elos enenu in ‘lutlut ke pisen len lalos,’ a fuka in oru ou inge? (b) Mea kalmen ‘esam Met Orekutla’?

⁵ Fuka kom ku in oru moul lom in kapkapek a “kosrani moul ma patpat”? Moses el simusla: “Len in yiu lasr itngoul yiu a fwin ku oalngoul yiu . . . tu a sa wanginla a kut sokla.” (Sam 90:10) Saap, kom tianu arle nunku ke mise. Payela, met fwusr puspis elos akkalemye orekma lalos oanu elos e tia mise. Tusruktu Moses el oru kut in liye la paye moul lasr arulanu futoto. Wangin kutena me akpaye la kut ku in moul ke lusen yiu 70 ku 80 matwe. “Pal a ma sikyuk” ku in aksafyela moul lun met fwusr a met ku in mano. (Ekklisiastis 9:11) Ke ma inge, kom ku in orekmakin fuka moul saok lom su kom engunkin ke pal inge? Moses el pre: “Ou inge kom luti nu sesr pisen len lasr, tu kut fwa eis inse lalmetmet.”​—Sam 90:12.

⁶ Mea kalmen luti nu sesr pisen len lasr? Ma se inge tia kalme pa kom enenu in arulanu loang la fuka lusen moul lom. Moses el pre nu sin Jeova in luti met Lal in etu fuka in orekmakin len lula ke moul lalos ke sie inkanek su ku in akinsemwomwoyel. Ya kom oekla len in moul lom​—ke kom nunku ke kais sie len oanu sie ma saok su kom ku in orekmakin in sang kaksak God? Baibel el sang kas in akkeye inge nu sin met fwusr: “Ke ma inge eis asor liki insiom, a sisla ma koluk liki ikwom; tu pal in fwusr a lenelik lun moul ma losrongten. Esam pa Met Orekomla in len in fwusr lom.” (Ekklisiastis 11:10–12:1) In esam Met Orekutla el kalmekin yok liki na in etu la el oasr. Ke pal se met koluk se el fwak nu sel Jisus, “Esam yu ke kom tuku nu in togusrai lom,” el lungse Jisus el an tia esam enel mukena. A el lungse Jisus el an fwin oru orekma in akmoulyeak lal, el an akmoulyelak! (Luk 23:42; srike liye Genesis 40:14, 23; Job 14:13.) In oupanu, in esamul Jeova, enenu orekma, oru ma su akinsemwomwoyel. Ya fwal in fwak la kom tia mulkunla Jeova?

Taran in Tia Sok Nu Sin Met Koluk

7. Efu kutu sin met fwusr elos sulela in mulkunla Met Orelosla? Sang me srikasrak.

⁷ Met fwusr puspis elos sulela in mulkunla Jeova meyen elos pula tu in ekla Met Lo tianu fwusesr. Sie brother fwin an Spain el esam ma el pula oanu sie met fwusr: “Fwalu se inge purakak insiuk meyen nga liye tu ma paye arulanu upa a utuftuf in ma nu kemwa. Kalmen ma inge pa kom enenu in muta, lutlut, som nu ke meeting, orekmakin necktie, a ma inge nu kemwa Nga srunga oru.” Ya oasr pal kom pulakin la oasr ma wangin yurom meyen kom kulansap nu sin Jeova? Saap kom e lut in etu la sie sin met sim lun Baibel el pulakin pa ou inge. Nunuk munas ikasla Baibel nutum a rid Sam 73.

8. Efu Asaph el “lemtawi met fulang”?

⁸ Lela kut in liksreni tuni on inge. Fus 2 a 3 el fwak: “A foko keik, niuk apkurun in wanginla, fwalkuk lukuna sirirla. Tu Nga lemtawi met fulang, ke Nga liye insemwomwo lun met koluk. Fwal nu ke ma simusla, on se inge simusyukla sel Asaph. El sie met on lun Livai a el moul in len lal Togusra Devid. (1 Kronikel 25:1, 2; 2 Kronikel 29:30) Fwinne oasr kunokon mwo lal in kulansap ke tempel lun God, tusruktu el “lemta” nu sin met koluk ke orekma koluk su elos kaksakin ke ma koluk lalos. Ma nu kemwa fwasr mwo nu selos, elos engunkin misla a wangin sensen lalos. Ke ma na paye, kapkapek lalos; ‘yok liki ma insielos ku in kena ka.’ (Fus 5, 7) Elos sramsramkin ma elos oru “in fulat,” ke inkanek pengpeng. (Fus 8) ‘Elos filiye oalulos in kosrao a loalos fwafwasyesr in fwalu,’ tia akfulatye kutena met​—in kosrao ku fwin fwalu.​—Fus 9.

9. Fuka kutu sin met Kristian fwusr ke pal inge elos pulakin ma Asaph el pula?

⁹ Saap kain in oiye inge ku in fwak ke met fwusr puspis in loom lutlut. Saap kom ku in long elos sramsramkin kosro lalos, party alukela ma fwal, a ke orekmakinyen alcohol a ono koluk. Kom fwin srikeye moul insemwomwo lalos ke inkanek su kom fwasr ka oanu sie met Kristian, saap oasr pal kom pulakin “lemta nu sin met koluk” inge. (Mattu 7:13, 14) Ke sie pal Asaph el fwak: “Paye wangin sripe tu Nga aknasnasye insiuk, a wonla pouk in tia koluk. Tu in len nu kemwa aklokwalokye yu, a kai yu lutu nu kemwa.” (Fus 13, 14) Aok, el mutamwauk in alollo ke orekma in kulansap nu sin God, a ke sie moul sumwosmwos.

10, 11. (a) Mea oru Asaph in ekulla oiye lal? (b) Efu met koluk nu kemwa elos muta ke “an musresre”? Sang me srikasrak.

¹⁰ Oasr me insemwomwo, Asaph el tia srukye ke lusen pal loes kain in nunuk se inge. El sa na in akilen la misla lun met koluk el oanu sie mwemwe​—a kitin pal na! El fwak: “Paye kom fulelosi in an musresre. Kom siselosla nu ke kunausten. Fuka elos ekla me kunausten in sie minit! Elos wanginla ke me aksangengyelos!” (Fus 18, 19) Pus sin met fwusr oanu kom elos ouyepa muta ke “an musresre.” Ke pal sa ku ke pal tok oiye koluk lalos e fwa sikyuk akkoluyelos, ku in kol nu ke putete tia ke lungse lalos, mas koluk su sa in fwasrelik ke sripen kosro, ku som nu ke nien kapur ku mise! Ma upa yok emeet, pa elos keok meyen elos tia futoto nu sin God.​—Jemes 4:4.

¹¹ Sie mutan fwusr lun Met Lo fwin an Spain el liye na paye ma sikyuk inge. Oanu sie met fwusr, el moulkin moul luo, el sremla na paye ke asrouki nu sin met fwusr koluk. Kitin pal na, el mutamwauk in lungse sie selos​—el su sremla ke orekmakinyen ono koluk. El fwinne srunga in orekmakin ono koluk, tusruktu el moli ono koluk a el sang nu kel. “Nga kasrel in faksel ke ninul,” el fwak. Sie me insemwomwo meyen sister se inge el akilen ma tafongla lal tok a el sifwil foloko nu ke ku lal in ngun. Tusruktu tokin sie pal el arulanu lut ke pal se el long la mokul kamwuk lal inge el orekmakin ono koluk ne el mise ke AIDS. Paye oanu ke met on el fwak, met koluk elos muta ke “an musresre.” Kutu selos ku in mise ke pal sa ke sripen moul fokfok lalos. Nu sin met fwusr puspis, elos fwin tia ekulla oiyen moul lalos, elos e fwa sun ke pal futoto “sikme lun Leum Jisus in kosrao me wi lipufon in ku lal in e furrurur, in eis foloksak selos su tia etu God, a nu selos su tia akos mwosasu lun Leum Jisus.”​—2 Tessalonika 1:7, 8.

12. Fuka sie met fwusr in an Japan el akilen la oiyen lemtawi met koluk sie ma lalfon?

¹² Ke ma inge sie oiye koluk a lalfon, in lemtawi “met su tia etu God”! Paye, elos su etu Jeova a elos su oasr fwinsrak in moul ma patpat pa kut enenu in lemtawi. Sie brother fwusr fwin an Japan el akilen ma inge. Oanu sie met fwusr, el ouyepa lungse “sukosok yok.” El fwak: “Nga nunku mu oasr ma tula in Nga. Tusruktu, tok Nga mutamwauk in nunku ke kain in moul fuka ku in oasr yurok fwin wangin ma paye yurok. Nga ku in liye moul luk ke lusen yiu 70 ku 80 matwe na Nga mise. Tusruktu, Jeova el akola in ase fwinsrak lun moul ma patpat! Ke pal se Nga nunku ma inge, ma inge kasre yu in engunkin ma oasr yurok tari.” Aok, in kaifweung ke lalalfongi tia fwusesr fwin met puspis su raunikomla elos tia fwasr tokin ma sap lun God. Mea kom enenu in oru in lain ma upa puspis inge?

Taran ke Met Asrouki Lom!

13, 14. Efu arulanu yok sripe in oru sulela mwo fwin ke asrouki?

¹³ Lela kut in sifwilpa liye me aketeye ke met su sroukye paye moul nasnas lal in Sam 1:1-3: “Insemwomwo met se su tia fwafwasyesr in papu lun met koluk, ku tu inkanek lun met sito, ku muta fwin me muta lun met aksruksruk. A el engunak in ma sap lun Jeova, a el nunkauk ke ma sap lal Len a fong. A el e fwa oanu soko sak eoki sisken infwal lun kof, su isus fwako la in pal la a sra pa la tia paola, a ma nu kemwa el oru fwa kapkapek.”

¹⁴ Tuni akmwoye meyen arulanu yok sripe nu ke ip lun asrouki lom. Soakas 13:20 el fwak: “Fwafwasyesr yurin met lalmetmet, a kom fwa lalmetmet, a el su wi met lalfon fwa ngal ka.” Ma inge tia kalmekin la kom enenu in tia loang, tia kamwuk, ku akkalemye oiye koluk nu sin met fwusr su tia wi Met Lo lun Jeova. Baibel el kaifwe kut in lungse met tulan lasr a in “misla yurin met nu kemwa.” (Rom 12:18; Mattu 22:39) Tusruktu, kut ku in konaok la kut ‘fwafwasyesr in papu’ lun met su tia akos ma sap lun Baibel fwin arulanu futoto asrouki lasr nu selos.

Ma Lane Su Tuku ke Ridi Baibel

15. Fuka met fwusr elos ku in akkapye sie lungse in ridi Baibel?

¹⁵ Met on el liye pa la sie su sroukye moul nasnas el engunkin in ridi ma sap lun God “ke sie pusra srisrik len a fong.” (Sam 1:1, 2) Paye, tia fwusesr in ridi Baibel, e oasr ka “kutu ma upa in eteyuk.” (2 Piter 3:16) Tusruktu rid Baibel tia enenu in oanu me aktotoye. Sie met el ku in “lungse titi lun ngun su tia oasr kutusrik ka” ke Kas lun God. (1 Piter 2:2) Srike in rid kais kutu srisrik ke kais sie len. Fwin oasr ma kom ridi su tia kalem, srike in loang akmwoye a lutlut ka. Tok, nunku ke ma kom ridi tari. (Sam 77:11, 12) Fwin upa nu sum in loang na paye nu ka, srike in ridi ma inge ke “inkanek se su kom ku in long pusrem.” Kitin pal na, lungse lom in ridi Baibel fwa yokyokelik na paye. Sie sister fwusr fwin an Brazil el esamak la: “Jeova el luman loes liki yu pal nu kemwa. Tusruktu ke pal inge tokin malem ekasr somla, Nga akyokyelik lutlut luk sifwanu a rid luk ke Baibel. Ke pal inge, Nga pula na paye la futoto luk nu sin Jeova arulanu fukoko. El arulanu paye nu sik.”

16. Fuka kut ku in eis a lane yok ke meeting lun congregation?

¹⁶ In wi pal nu kemwa ke meeting lun congregation yok pa sripe nu ke kapek lom ke ma lun ngun. Kom fwin “sismouk fuka kom long,” kom ku in eis me akkeye yok. (Luk 8:18) Ya oasr pal kom pula tu meeting el tianu akengunye insiom? Fwin ou inge, siyuk sum sifwanu, ‘Mea Nga enenu in oru in orala meeting in me akengun nu sik? Ya Nga porongo? Ya Nga akola? Ya Nga sang comment luk? Aok, Baibel el sapkin nu sesr in “nunku ke sie sin sie in akkeye kut nu ke lungse a orekma mwo, . . . kaifwe sie sin sie.” (Hibru 10:24, 25) In oru ou inge, kom enenu in akesrui wi top! Paye, kom enenu in akola meet liki meeting kom fwin lungse in akesrui wi top. Sie sister fwusr el fwak: “Arulanu fwusesr na paye in akesrui wi top ke meeting kom fwin akola.”

Fwasr Tokin Inkanek lun God Kol nu ke Kapkapek

17. Fuka sie met su moniyuk in ridi Baibel ku in pupulyukinyuk nu ke “soko sak eoki nu ke infwal lun kof’?

¹⁷ Met sim lun Sam el tafwela in akkalemye ke met inge su arulanu kapkapek ke “soko sak eoki sisken infwal lun kof.” Infwal lun kof inge el sramsramkin ke me aksroksrok su orekmakinyuk meet in aksroksrokye fwokinsak. (Isaia 44:4) Kut fwin ridi Baibel len nu kemwa kut fwa lumeyuk oanu in sruokye sie akmwuk nu ke sripen ma paye a insemwomwo. (Jeremaia 17:8) Kom ku in eis ku su kom enenu ke len nu kemwa in kutangla me srifwe a ma upa. Meyen kom etu nunuk lun Jeova, paenang oasr yurom etauk su kom enenu in oru nu ke sulela sumwos a paye.

18. Mea ma inge su ku in oru in paye kapkapek lun sie met fwusr ke kulansap lal nu sin Jeova?

¹⁸ Kutupal, kulansap nu sin Jeova upa. Tusruktu lela kom in tia pulakin ke kutena pal mu ma inge arulanu upa in orek. (Duteronomi 30:11) Baibel el mwolela nu sum la ‘ma nu kemwa kom oru fwa kapkapek’ fwin nien sun ke moul lom pa in akinsemwomwoye Jeova a oru insiel in engun! (Soakas 27:11) A esam, la tia kom mukena pa orekma. Jeova a Jisus Kraist elos wi kom. (Mattu 28:20; Hibru 13:5) Elos etu ma upa su kom sun, a elos tia filikomla. (Sam 55:22) Oasr pa kasru nu sum su tuku ke “un met lili” a sin papa a nine kiom elos fwin sangeng pa sin God. (1 Piter 2:17) Ke kain in kasru inge, wekunang orekma in kaifweung lom, na kom ku in engunkin sie moul su yokyokelik tia ke pal inge mukena a ke pal fwasru nu tok ma patpat!

Kusensiyuk ke Kalweni

◻ Mea kapkapek na paye?

◻ Efu kut enenu Jeova in kol inkanek lasr?

◻ Fuka met fwusr elos ku in ‘lutlut ke len lalos’?

◻ Efu sie ma lalfon in lemtawi met koluk?

◻ Fuka ridi Baibel len nu kemwa a wi meeting pal nu kemwa ku in kasru met fwusr in engunkin kapkapek lun moul?

[Picture on page 28]

Meyen wangin “sangeng lalos nu sin God,” paenang met fwusr puspis oru ma koluk puspis

[Picture on page 30]

Pal nu kemwa met fwusr elos mulkunla la oasr fwokin orekma lalos