Kafweang in Akkalemye Oiya Mwomwo Oana Met Kulansap lun God

“Komwos fwa met etawi God.”​—2 EFESUS 5:1.

1, 2. (a) Efu ku oiya mwomwo el yok sripe? (b) Mea fwa akuteyuki ke me lutlut se inge?

MUTAN sim se inge Sue Fox el simusla: “Kut enenu in akkalemye oiya mwomwo pal nukewa. Kut enenu in akkalemye sunak nu sin met nukewa, yen nukewa.” Fwin metu elos pala tari in akkalemye sunak a oiya mwomwo nu sin met nukewa, ma upa el suke sikyak a ku pa in tia sikyak. Tusruktu fwin ma inge tia orek, e fwa oasr ma upa puspus. Fwin kut akkalemye oiya tia mwo nu sin met saye, ma inge ku in orala me lokwalok, me aktoasr, a asor yok.

² Met Kristian ke congregation elos kain in met su akkalemye oiya mwomwo pal nukewa. Ne ouinge, kut enenu in karungin kut in tia etawi oiya koluk lun met puspus ke pal inge. Lela kut in liye la kut fwin orekmakin akwuk mwomwo lun Baibel ke orekma in akkalemye sunak a oiya mwomwo, ma inge ku in karungin kut a ku in akkeye met puspus in wi ke alu paye. In kasre kut in eis etauk a kalem ke orekma in akkalemye oiya mwomwo, lela kut in lutlutkin me srikasrak mwomwo lun Jeova God a lun Mwen natul.

Jeova a Mwen Natul​—Me Srikasrak ke Oiya a Ella Mwomwo

3. Me srikasrak fuka ke oiya mwo a sunak Jeova el akkalemye?

³ Jeova el akkalemye me srikasrak mwomwo ke oiya a ella mwo. Fwinne el Fulatlana in kosrao a fwalu, el akkalemye kulang a sunak nu sin metu. Ke pal se el sramsram nu sel Ebream a Moses, Jeova el orekmakin sie kas Hibru su lungasyukla oana “nunak munas.” (Genesis 13:14; Exodus 4:6) Ke pal se met kulansap lal elos orala ma koluk puspus, Jeova el ‘pakomuta a kulang, patla in mulat, a yok in lung kulang a paye.’ (Sam 86:15) El tia oana met puspus su arlana kasrkusrak fwin oasr met su tia oru ma elos lungse.

4. Kut ku in etawi fuka Jeova God fwin metu kaskas nu sesr?

⁴ Oiya ku fasin mwomwo el kalem ke inkanek su God el loang nu sin metu. Ke pal se Ebream el siyuk kusensiyuk ke met lun an Sodom, Jeova el mongfusrasr ke el sang me top nu ke kusensiyuk nukewa lal. (Genesis 18:23-32) El tia nunku mu kusensiyuk lal Ebream eis pal Lal. Jeova el long ke pre lun met kulansap nukewa lal a ke asor a tung lun met puspus su auliyuk ke ma koluk lalos. (Ridi Sam 51:11, 17.) Aok kut enenu in etawi Jeova ke kut loang akmwoye ke pal su met saye elos kaskas?

5. Fuka orekma lasr in etawi kulang lun Jisus ku in akmwoye fototo lasr nu sin met puspus?

⁵ Oasr oiya puspus su Jisus el lotela sin Papa tumal wekunang kulang a ella mwomwo. Aok el enenu pal a ku yok lal nu ke orekma in luti, ne ouinge Jisus el mongfusrasr a kulang pal nukewa. Met lepa, met kun puspus su enenu in ngusr nu sin met puspus ke me enenu lalos, a kutupa met su enenu kasru elos konealak Jisus el akola a lungse na paye in kasrelos. El tia pulesrelos, fwinne elos tia fwak nu sel la elos fwa tuku nu yurol. Fwinne el arlana kafofo, el lungse in tui ke ma el oru meyen el lungse in kasru sie met su asor a enenu me kasru. Jisus el arlana nunku yok a kulang nu selos su filiye lulalfongi lalos nu sel. (Mark 5:30-34; Luk 18:35-41) Oana met Kristian, kut etawi me srikasrak lun Jisus ke oiya kulang a lungse in kasru pal nukewa. Kain in oiya mwo inge ku in liyeyuk sin sou lasr, met tulan lasr a met puspus saye. Sayen ma inge, oiya mwomwo inge sang me kaksak nu sin Jeova a ase nu sesr insemwomwo.

6. Me srikasrak fuka ke lungse a oiyen kawuk Jisus el akkalemye?

⁶ Jisus el akkalemye pa sunak nu sin met puspus ke el pangnolos ke inelos. Ya met kol puspus ke alu lun met Ju elos oru ouinge? Mo. Meyen elos nunku ke met puspus su tia etu ke masap oana met “selngawiyuk” a elos tia akkalemye sunak nu selos. (Jon 7:49) Mwen nutin God el tia akkalemye kain in nunak inge. Marta, Mary, Zakius, a met puspus saye elos long ke Jisus el pangnolos ke inelos. (Luk 10:41, 42; 19:5) Oasr kain in oiya ku fasin mwo puspus su kut ku in pangon met puspus ke pal inge, a met kulansap nukewa lun Jeova elos kafweang yok in kulang nu sin met puspus.a Elos tia lela oiyen srisri in akmunasye sunak lalos nu sin met lili wiyelos a nu sin met puspus saye.​—Ridi Jemes 2:1-4.

7. Akwuk mwomwo lun Baibel ku in kasre kut fuka in akkalemye sunak nu sin met yen nukewa?

⁷ Inkanek kulang lun God a lun Mwen natul nu sin met in mutunfwal nukewa a sruf nukewa akkalemye la oasr sunak lalos nu sin met nukewa inge. A ma inge ku in akkeye met puspus inge su mwo a paye insielos nu ke ma paye. Aok, akwuk in akkalemye fasin a ella mwomwo el tia oana sie nu ke an puspus. Ke ma inge kut tia orekmakin masap in akkalemye oiya mwomwo. A, kut orekmakin akwuk mwomwo lun Baibel in akfwalye orekma lasr in akkalemye sunak nu sin met nukewa yen nukewa. Lela kut in akuteye la fuka orekma lasr in akkalemye kulang a sunak nu sin met puspus ku in sang kasru in oasr fwako mwomwo ke orekma in luti lasr oana met Kristian.

Kafweang in Paing Met a in Sramsram nu Selos

8, 9. (a) Kain in ella fuka ku in nunkeyuk mu sie fasin koluk? (b) Efu ku kut enenu in orekmakin kas lun Jisus simusyukla in Mattu 5:47 in kasre kut ke oiya su kut akkalemye nu sin metu?

⁸ Ke pal se inge met in an puspus elos arlana kafofo, met luo su liye sie sin sie ke inkaneku elos tia fwak “lotu mwo” ku “kom fuka?” Aok, kut etu la kut tia ku in kaskas nu sin met nukewa su fwasr ke inkaneku. Tusruktu, ke kain in luma a ma sikyak puspus, arlana mwo kut fwin fwak kas in paing nu sin met puspus. Ya pa inge oiyom in paing met puspus? Ku, ya kom tia israsr ku fwak kutena kas nu sin met su kom osun nu se? Paye la, sie met su akkeye kain in oiya inge el kalmekin nu ke sie ella a fasin su tia mwo.

⁹ Jisus el akkalemye nu sesr kas in esmakin ke el fwak: “A komwos fwin paing met limwos mukena, mea komwos oru yok liki met ngia? Ya met pegan elos tia oru ouinge pa?” (Mattu 5:47) Ke ma inge, met sim se inge Donald Weiss el simusla: “Metu elos mulat ku toasr fwin met saye elos tia sramsram ku paing nu selos. Aok wangin kutena excuse mwomwo kom fwin tia paing sie met. Me aksumwos nu ka arlana fusrasr: Pa in paing met nukewa. Sramsram nu selos.” Kut in tia lela mwekin lasr in akmunasye orekma lasr in paing ku sramsram nu sin met puspus, paye la oasr fwako mwomwo su ku in sikyak.

10. Fuka oiya mwomwo el ku in kasre kut in oasr fwako mwomwo ke orekma in luti lasr? (Srike liye pok se inge “Ke Mutawauk Sramsram lom Kom Israsr Mwo.”)

¹⁰ Nunku ke me srikasrak lun met Kristian payuk se su pangpang Tom a Carol, su muta in sie siti lulap fwin an North America. Elos kafweang in sramsram mwo nu sin met tulan lalos ke elos oru orekma in luti lalos. Elos oru fuka ma inge? Tom el orekmakin Jemes 3:18, a el fwak: “Kut srike in akkalemye kulang a orek misla nu sin met puspus. Kut sramsram nu selos su kut liye likin loom selos a nu selos su oru orekma lalos in an se inge. Kut israsr a paing nu selos. Kut sramsramkin ma puspus su elos insemwomwo ka, ke tulik natulos, ke kosro natulos, ke loom selos, a ke orekma lalos. Tia pat, elos nunku kesr oana met kawuk lalos.” Carol el fwak pa: “Ke kut muteta nu yurolos ke kutu pal tok, kut akkalemye esr nu selos a kut siyuk inelos. Kut fwak nu selos mea kut oru in an se inge a kut oru sramsram lasr in fototo na. Tokin kutu pal, kut ku in sang ma lo nu selos.” Met tulan puspus lal Tom a Carol elos insemwomwo kelos a lulalfongelos. Pus selos insemwomwo in eis me rid su tuku ke Baibel, a oasr kutu selos lungse na paye in lutlut ke ma paye.

Akkalemye Kulang a Sunak Fwinne Oasr Ma Sikyak su Tia Mwo

11, 12. Efu ku kut etu la oasr met puspus su akkalemye oiya koluk ke kut sulkakin peng mwo? A oiya fuka kut enenu in akkalemye nu ka?

¹¹ Oasr pal puspus, su kut sun met puspus su tia akkalemye oiya mwomwo nu sesr ke kut sulkakin peng mwo. Kut etu ma inge, meyen Kraist el akkalemye tari kas in sensen nu sin met tuma lutlut nukewa lal: “Elos fwin kolyai yu, elos fwa ouyepa kolyai komwos.” (Jon 15:20) Tusruktu kut fwin akkalemye pa oiya tia mwo nu selos ke kaskas koluk lalos ma inge tia ku in orala fwako mwomwo. Oiya fuka kut fwa akkalemye? Met sap Piter el simusla: “A komwos in akmutalye Kraist oana Leum insiomwos, a komwos in akola pal nu kemwa in topuk nu sin met nu kemwa su siyuk sumwos sripen fwinsrak se su on in komwos, a ke fulpap a sangeng.” (1 Piter 3:15) Orekma mwomwo lasr in akkalemye kulang a sunak, a in sang me top ke inse pusisel, ku in oru met puspus su kaskas koluk nu sesr in ekulla nunak a oiya lalos a porongo ke peng mwo.​—Taitus 2:7, 8.

¹² Kut fwin sun met su kaskas kou, ya kut ku in akola in sang me top ke inkanek su God el insemwomwo ka? Aok. Poul el fwak: “Lela kas lomwos in kulang pal e nu kemwa, solela ke sol, tu komwos fwa ku in etu fuka fwal in topuk nu sin kais sie met.” (Kolosse 4:6) Kut fwin akkeye oiya mwomwo in kaskas ke inkanek kulang a mwo nu sin met nukewa ke sou, nu sin tulik lutlut wi kut lutlut, ke niyen orekma lasr, nu sin met lili ke congregation, a nu sin met tulan lasr, kut akola tari in akkalemye oiya mwo oana sie met Kristian fwinne oasr met su kaskas koluk a kas kou nu sesr.​—Ridi Rom 12:17-21.

13. Sang me pupulyuk ke orekma mwo in akkalemye kulang a sunak ku in oru met lain puspus in ekulla nunak koluk lalos.

¹³ Kafweang lasr in akkalemye oiya a ella mwo ke ma upa puspus su sikyak ku in orala fwako mwomwo. Ke sie me pupulyuk, in an Japan, oasr sie Met Lo su met tulan lal a met muteta nu yurol elos kaskas kou nu sel. Brother se inge el tia folokin oiya koluk nu selos, a el mongfusrasr a srakna akkalemye sunak nu selos a som liki srungul lalos. Ke el kafweang in sulkakin peng ke territory se inge, el liye la met muteta nu yurin met tulan lal el loang in liye akmwoye ma el oru. Ke pal se brother se inge el tuku nu yurol a sramsram nu sel, met se inge el fwak: “Nga taltal koluk ke ma sikyak. Fwinne kut fwak kas koluk nu sum, nga liye la kom israsr na a tia mulat. Mea nga enenu in oru in etawi oiya mwo lom?” Ke sripen mokul se inge el sisila liki orekma lal a nine kiyel el tufwana mise, paenang el arlana asor ke moul lal. Met Lo se inge el siyuk sel fwin el lungse in lutlutkin Baibel, mokul se inge el insese ka. Tokin kutu pal el lutlut pal luo ke kais sie wik.

Inkanek Mwo Emeet in Akkeye Oiya a Ella Mwomwo

14, 15. Fuka met kulansap lun God in pal meeta elos sang akpa nu sin tulik natulos?

¹⁴ Papa a nine nukewa su oasr lungse lalos nu sin God su moul in pal meeta elos luti tulik natulos ke loom selos ke fasin a ella mwomwo. Nunku ke inkanek mwomwo su Ebream a Isaak elos sramsram nu sin sie sin sie in Genesis 22:7. Arlana kalem pa la papa a nine kiyel Josef elos sang me akpa mwomwo nu sel. Ke pal se el filiyuki in prison, el kaskas mwo fwinne nu sin met puspus su muta pa ke kalpous. (Genesis 40:8, 14) Kas lal nu sel Fero akkalemye la el lotela inkanek mwo in kaskas nu sin sie met kol lulap.​—Genesis 41:16, 33, 34.

¹⁵ Ke Masap Sengoul su God el sang nu sin met Israel, masap inge wi pa ka: “Sunakin papa tumum a nine kiom, tu len lom in pus fwin fwal se su Jeova God lom el sot nu sum.” (Exodus 20:12) Sie inkanek su tulik elos in akfulatye papa a nine kiyelos pa ke elos akkalemye ella mwomwo ke loom selos. Tulik mutan se natul Jepta el akkalemye sunak yok nu sin papa tumal ke el akos kas in fulak lun papa tumal.​—Met Nununku 11:35-40.

16-18. (a) Mea ku in orek in luti tulik ke fasin a ella mwomwo? (b) Mea kutu me insemwomwo fwin papa a nine elos luti tulik natulos ke oiya a ella mwomwo?

¹⁶ Orekma in sang akpa nu sin tulik nutusr tu elos in akkalemye oiya a ella mwomwo el arlana yok sripe. Tu elos in mwo ke elos matula, met fwusr elos enenu in lotela ke inkanek mwo in paing met muteta, in topuk ke telefon, a ke elos kang mongo nelos wi met puspus saye. Elos enenu in eis etauk a kalem ka la efu elos enenu in akkalemye kulang nu sin met matou a met mas, a in kasru met puspus in srukak ma toasr su elos us. Elos enenu in kalem ke yok sripaiyen kas mwomwo inge in fwak nu sin met, “nunak munas,” “kulo ma lulap,” “ke kulang,” “nga ku in kasre kom?,” a “sisla koluk.”

¹⁷ Orekma in sang akpa nu sin tulik elos in akkalemye oiya a ella mwomwo el tia upa in oru. Inkanek mwo in oru ma inge pa ke me srikasrak lomwos. Mokul se inge pangpang Kurt su yea longoul limekosr matwe el fwak kas inge ke inkanek mwo su el a tulik mokul tolu wiyel lotela in akkalemye sunak a oiya mwo: “Kut liye a long Nine a Papa tumasr ke elos kaskas ke inkanek kulang nu sin sie sin sie a elos akkalemye oiya mwo nu sin met puspus wi mongfusrasr a nunak mwomwo. In Kingdom Hall, Papa el penyula nu yurin brother a sister puspus su matou ngan ku in sramsram nu selos meet liki a tokin meeting. Nga long ke kas in paing lal nu selos a nga liye pa ke sunak lal nu selos.” Kurt el fwak pa: “Tia pat, nga lotela in etawi oiya mwomwo lal pal nukewa. Nga akkalemye kulang a sunak nu sin metu. Kom oru oiya inge meyen tia pa inge ma eneneyuk nu sum in oru, a meyen pa inge ma kom lungse in oru.”

¹⁸ Mea ku in sikyak fwin papa a nine elos luti tulik natulos ke oiya a ella mwomwo? Tulik elos ku in orek kawuk nu sin met puspus a elos ku pa in orek misla pal nukewa nu sin met puspus saye. Elos fwa fwal in wi orekma yurin leum lalos a yurin met orekma saye su welulos. Sayen ma inge, tulik su kulang a oasr ella mwomwo, a sumwosmwos lalos elos ku in oru papa a nine kiyelos in arlana engan a insemwomwo.​—Ridi Soakas 23:24, 25.

Oiya a Ella Mwomwo Oru Kut in Siena Liki Met Puspus

19, 20. Efu ku kut enenu in kafweang in etawi God lasr a Mwen natul?

¹⁹ Poul el simusla: “Komwos fwa met etawi God oana tulik kulo.” (Efesus 5:1) Kut enenu in etawi Jeova God a Mwen natul, a kut enenu pa in orekmakin akwuk mwomwo lun Baibel, oana ke ma kut akuteye tari ke me lutlut se inge. Ma inge ku in kasre kut in fwasr liki kain in orekma in srisri su lungse na in akkalemye kulang a sunak nu sin met fulat a pengpeng, ku kut fwin etu la oasr ma puspus su kut ku in eis sin sie met.​—Jud 16.

²⁰ Ke saflaiyen pal in kolyuk koluk lal Setan, el kafweang in akwanginyela akwuk mwomwo in akkalemye oiya a ella mwomwo su Jeova el oakiye tari. Tusruktu Devil el fwa tia eis kutangla lal in akwanginyela oiya mwomwo lun met Kristian paye nukewa. Lela kut nukewa in kafweang yok in etawi me srikasrak lun God lasr a Mwen natul su kulang a oasr oiya mwomwo lal. Aok kas a ella lasr e fwa tia oana sie pal nukewa nu ke oiya lun met puspus su akkalemye oiya a ella koluk. Kut fwa ku in sang kaksak nu ke inen God lasr, Jeova, su arlana mwo, a fwa akenganye met puspus su mwo insielos in wi ke alu paye.

[Footnote]

Ya Kom Esam?

• Mea kom lotela kel Jeova a ke Mwen natul ke orekma in akkalemye oiya a ella mwomwo?

• Efu ku kafweang lasr in paing met puspus ke inkanek mwo arlana mwo nu sesr oana met Kristian?

• Fuka oiya mwomwo lasr in akkalemye sunak nu sin met puspus sang kasru nu ke orekma in luti lasr?

• Mea kunokon lun papa a nine in luti tulik natulos ke oiya a ella mwomwo?

[Box on page 29]

Ke Mutawauk Sramsram lom Kom Israsr Mwo

Oasr met puspus su inse luo in sramteak sramsram nu sin sie met su elos tia etu. Tusruktu ke sripen lungse nu sin God a nu sin met tulan lalos, Met Lo lun Jeova elos kafweang in lutlut ke inkanek mwo in sramsram nu sin metu tu elos in akkalemye nu sin met puspus ma paye lun Baibel. Mea ku in kasre kom in kapkapek ke oiya se inge?

Oasr sie akwuk mwomwo simusyukla in Filippai 2:4, su akkalemye kas inge: “A kais sie sumwos in tia nunku ke ma lal sifwana, a kais sie sumwos in ouyepa nunku ke ma lun met ngia.” Srike in orekmakin kas inge ke inkanek inge: Kom fwin soenna liye a osun nu sin sie met in pal somla, el nunku keim oana sie met sa. Mea kom ku in oru elan pwar in sramsram nu sum a tia alolo? Kafweang lom in israsr mwo a kas in paing mwo ku in sang kasru yok. Ne ouinge srakna oasr ma puspus saye su eneneyuk nu ka.

Ke kom srike in sramteak sramsram lom nu sin sie met, saap kom kufusella ke ma el nunku. A kom fwin srike in akuteye nu sel ma oasr ke nunak lom a kom tia nunku ke ma el nunku, saap el tia pwar in sramsram nu sum. Ke ma inge, kom fwin ku in etu a akilen ma met se inge el nunku, efu ku kom tia orekmakin ma el nunku inge in sramteak sramsram lom nu selos? Pa inge ma Jisus el oru ke pal se el osun nu sin sie mutan ke sie luf in kof in an Samaria. (Jon 4:7-26) Oasr ke nunak lal in ut kof. Jisus el mutawauk me sramsram lal nu sel fwal nu ke ma oasr ke nunak lun mutan se inge. A tia pat el oru sramsram lalos in arlana mwo a el akuteye ma puspus ke God a ke ma paye.

[Pictures on page 28]

Oiyen kawuk nu sin metu ku in sang kasru in sang ma lo mwomwo nu selos

[Picture on page 30]

Oiya a ella mwomwo el arlana fwal in akkalemye pal nukewa