Akkalemye “Moniyuk nu ke Orekma Mwo” Nukewa!

“[Jisus] el sifwana esalang kasr, tu lan molikutla liki ma koluk nu kemwa, a aknasnasye nu sel sifwana sie un met tu elos in ma lal, moniyuk nu ke orekma mwo.”​—TAITUS 2:14.

1. Mea sikyak in tempel ke pal se Jisus el tuku in Nisan 10, 33 C.E.?

KE NISAN 10, 33 C.E., len akosr meet liki Kofwen Alukela, oasr met puspus su alu nu sin God elos tukeni nu sie ke tempel in an Jerusalem a elos insemwomwo ke me akfulat se inge su apkuran in orek. Mea e fwa sikyak ke pal se Jisus el tuku? Met sim tolu ke Gospel, su pangpang Mattu, Mark, a Luk, elos nukewa akkalemye la ke pal akluo Jisus el sisla met kuka a met moli nukewa su oasr we. El topkakunla tebu lun met ayaol mani a me muta lun met su kukakunla mwulioa. (Mattu 21:12; Mark 11:15; Luk 19:45) Moniyuk lun Jisus el tia munasla, oana ke ma el oru yea tolu meet liki pal se inge.​—Jon 2:13-17.

2, 3. Kut etu fuka la Jisus el moniyuk in oru ma mwomwo puspus sayen in aknasnasye tempel?

² Mattu el akkalemye la Jisus el arlana moniyuk in pal sa in aknasnasye tempel a el moniyuk pa in oru ma saye. El akkeyela met kun a met ul su tuku nu yurul in an se inge. (Mattu 21:14) Luk el simusla ke kutu pa orekma su Jisus el akpayeye. “[Jisus] el luti in tempel pinganu len.” (Luk 19:47; 20:1) Aok moniyuk lun Jisus el arlana eteyuk ke el akpayeye orekma lal in luti met puspus.

³ Tok, met sap Poul el simla nu sel Taitus a el akuteye la Jisus el “sifwana esalang kasr, tu lan molikutla liki ma koluk nu kemwa, a aknasnasye nu sel sifwana sie un met tu elos in ma lal, moniyuk nu ke orekma mwo.” (Taitus 2:14) Ke inkanek puspus fuka kut ku in “moniyuk nu ke orekma mwo” ke pal inge? A fuka me srikasrak mwomwo lun togusra mwomwo puspus lun an Juda ku in akkeye kut?

Moniyuk in Sulkakin a Luti Peng Mwo

4, 5. Ke inkanek puspus fuka togusra akosr lun an Juda elos akpayeye la elos moniyuk ke orekma mwo?

⁴ Esa, Jihosafat, Hezekaia, a Josaia elos akpayeye akwuk na mwomwo in akwanginyela alu nu ke ma srolela liki an Juda. Esa el “wisla loang sa, a an fulat, a fugulye sruu, a pakiye Ashira.” (2 Kronikel 14:3) Jihosafat el arlana moniyuk ke orekma lal in alu nu sin Jeova, “ouyepa el wisla an fulat a Ashira liki fwal Juda.”​—2 Kronikel 17:6; 19:3.a

⁵ Hezekaia el orala akwuk in sifwilpa akfulatye Kofwen Alukela in an Jerusalem, a ke me akfulat orek tari ke lusen len itkosr “met Israel nukewa su muta we elos illa nu in siti lun Juda a fugulye sruu, a pakiye Ashira, a lupukye an fulat a loangu liki Juda a Benjamin nufon, a in Ifreim pa a Manassa, nu ke pal elos kunausla nukewa.” (2 Kronikel 31:1) Met fwusr se inge Josaia el ekla togusra ke pal se el oasr ke yea oalkosr. Ma Simusla el akkalemye: “Tu in yea se akoalkosr in togusra lal, ke el srakna fwusr, el mutamwauk in suk God lal Devid papa tumal, a in yea se aksengoul luo el mutamwauk in aknasnasye Juda a Jerusalem liki an fulat, a Ashira, a me srulela, a me srulela orek ke e.” (2 Kronikel 34:3) Aok, togusra akosr nukewa inge elos moniyuk ke orekma mwo.

6. Efu ku orekma lasr in luti peng mwo el ku in pupulyukkin nu ke orekma mwomwo lun togusra oaru nukewa in an Juda?

⁶ Ke pal inge, kut wi pa ke orekma saoklana se inge in kasru met puspus in sukosokla liki me luti kikiap lun alu puspus, wekunang orekma in alu nu ke me srolela. Orekma lasr in sulkakin peng mwo sie loom nu ke sie loom el kasre kut in sun kain in met nukewa. (1 Timote 2:4) Oasr sie mutan fwusr fwin an Asia el esam la nine kiyel el orek alu nu sin me srolela puspus ke loom selos. Mutan fwusr se inge el nunku la me srolela nukewa inge tia ku in aolla God paye, paenang el pre pal nukewa a siyuk elan ku in etu la su God paye. Sie len a oasr met tongtong ke srungul lal, a ke el ikasla, oasr mutan luo su Met Lo su akola in kasrel in eis etauk ke e mwolana lun God paye, e se inge pa Jeova. A el arlana insemwomwo ke sripen el etela ma paye ke me srolela puspus la ma inge wangin sripe! Ke pal inge el akkalemye moniyuk yok lal ke el wi pal nukewa ke orekma in luti peng mwo, a luti met puspus kel Jeova, a ke ma lungse lal.​—Sam 83:18; 115:4-8; 1 Jon 5:21.

7. Mea kut ku in oru in etawi met luti puspus su som nu yen nukewa in len lal Jihosafat?

⁷ Pal nukewa ke kut wi ke orekma in luti peng mwo sie loom nu ke sie loom, ya kut kafweang in sun met nukewa ke territory lasr? In pal meeta, in yea aktolu ke kolyuk lal Jihosafat, el supwela met fwisrak limekosr, met Livai yuh, a met tol luo. El sapkin elos in fwufwasryesr nu ke siti nukewa in luti met nukewa ke masap lun Jeova. Elos akpayeye orekma lalos inge yen nukewa a ke ma inge met lun mutanfwal nukewa su apkuran nu selos elos mutamwauk in sangeng sin Jeova. (Ridi 2 Kronikel 17:9, 10.) Kafweang lasr in tuku nu ke loom sin met ke pal a len su tia oana sie, paenang kut ku in sramsram nu sin met puspus ke sie sou.

8. Mea kut ku in oru in akyokye pal mwomwo lasr in sang ma lo?

⁸ Oasr met kulansap puspus lun God ke pal inge elos inse mulala in som liki an a loom selos a elos som nu ke an saye su oasr ma enenu yok nu sin Met Lo moniyuk puspus. Ya kom ku in oru ma inge? Kutu sesr su tia ku in som nu ke an saye ku in srike in sang ma lo nu sin met puspus su oasr ke an sesr tusruktu elos kaskaskin kas saye. Oasr sie mokul su pangpang Ron, su ke el yea 81 matwe, el lotela kas in paing ke kas 32, el oru ma inge ke sripen oasr kain in met puspus su el sun ke territory lal! Ke kutu pal somla el osun nu sin siyanyen se su tuku liki an Africa a el paing elos ke kas Yoruba, su pa inge kas lalos. Elos siyuk sel Ron fwin el som tari nu fwin an Africa. Ke pal se Ron el fwak mo, elos siyuk sel la fuka tu el etu kas lalos inge. Me sramsram inge kasrel Ron in sang ma lo mwomwo nu selos. Elos insemwomwo in eis magasin a elos sang address lalos nu sel, su el sang nu sin congregation ke an se su siyanyen se inge muta we, tu met lo su oasr we elos ku in oru lutlut lun Baibel yurolos.

9. Efu ku orekma lasr in rid Baibel ke orekma in luti arlana yok sripe? Sang sie me pupulyuk.

⁹ Met luti nukewa su som nu yen nukewa in akos masap lal Jihosafat oasr yurolos “buk in masap lun Jeova.” Fwin fwalu nufon kut kafweang yok in luti nu sin met ma paye lun Baibel, meyen Kas lun God pa koanon ma inge. Kut akkalemye la Baibel el arlana yok sripe nu ke orekma in luti lasr ke kut kafweang in rid fus puspus su oasr ka, in kasru met puspus in liye ke kas su simla ka. Sie mutan el akuteye nu sel Linda, sie Met Lo, la mokul tumal el sun mas upa ne ulla a el enenu in karungunal. Mutan se inge el tung a fwak: “Nga nukin la mea ma koluk Nga oru paenang God el lela ma inge in sikyak nu sik.” Linda el topuk: “Kom lungse ngan akkalemye nu sum ma paye ka?” El ridi Jemes 1:13 a el fwak: “Me keok nukewa su kut a met nukewa su kut lungse sun el tia me akkeok lun God nu sesr.” Ke sripe se inge, mutan se inge el kafsulak Linda in akkalemye kulo lal nu sel. Linda el fwak: “Nga ku in sang kas in akkeye meyen Nga orekmakin Baibel. Kutu pal met su kut sramsram nu se elos soenna long in pal somla ke fus puspus su kut rid ke Baibel.” Me sramsram se inge kol nu ke sie lutlut lun Baibel nu sin mutan se inge.

Met Fwusr Su Moniyuk in Kulansap

10. Fuka Josaia el akkalemye me srikasrak mwomwo nu sin met fwusr Kristian nukewa ke pal inge?

¹⁰ Kut fwin sifwilpa sramsramkin me srikasrak lal Josaia, ke pal se el srakna fwusr el sang kasru yok nu ke alu paye. A ke el yea 20 matwe el akpayeye orekma saoklana inge in kunausla kain in akwuk nukewa ke alu nu ke me srolela. (Ridi 2 Kronikel 34:1-3.) Ke pal inge oasr pa met fwusr puspus su akkalemye pa moniyuk yok lalos ke orekma in sulkakin peng mwo.

11-13. Me lutlut mwomwo puspus fuka kut ku in lotela ke me srikasrak mwomwo lun met fwusr puspus su arlana moniyuk in kulansap nu sin Jeova ke pal inge?

¹¹ Oasr sie mutan fwusr su pangpang Hannah, su muta in an England, el yea 13 matwe a el lutlutkin kas French in loom lutlut. Ke pal sepana inge el long la oasr sie u lun met lili su kaskaskin kas French oakiyuki nu ke sie siti su oan apkuran nu yuroltal. Papa tumal el insemwomwo pa in welul in wi meeting lun u se inge. Ke pal inge, Hannah el sun yea 18, a el moniyuk in luti peng mwo oana sie regular pioneer nu sin met puspus su kaskaskin kas French. Ya kom ku in lutlut pa ke kas saye a in kasru met puspus su kaskaskin kas saye in eis etauk kel Jeova?

¹² Rachel el insemwomwo na paye in liye video se inge Kafweang in Oru Niyen Sun Mwomwo Su Ku In Akfulatye God ke kas English. El akkalemye ke ma on ke nunak lal ke pal se el mutamwauk in kulansap nu sin Jeova in yea 1995, el fwak: “Nga nunku mu Nga moulkin tari ma paye.” El fwak pa: “Tokin Nga liye video se inge, Nga akilen la Nga wi ke forfor a wi ke meeting ke sripen pa inge ma eneneyuk nu sik in oru. Nga enenu in tu na ku ke ma paye a in nunku a kafweang yok in oru lutlut luk sifwana a orekma in kulansap luk nu sin God.” Ke pal inge Rachel el arlana moniyuk in kulansap nu sin Jeova. Ke sripe se inge mea el pulakin ke pal inge? “Fototo luk nu sin Jeova el mwo liki meeta. Pre luk el arlana mwo, oasr akwuk mwomwo ke lutlut luk sifwana, a oasr kalme yok nu sik ke ma simusla puspus ke Baibel. Ke sripe inge, Nga insemwomwo yok in oru orekma in sulkakin peng mwo a Nga engan pa in liye la kas lun Jeova el sang me akkeye yok nu sin met puspus.”

¹³ Oasr pa sie mokul fwusr su pangpag Luke su eis pa me akkeye yok ke sie video su oasr ke sifwe se inge, Met Fwusr Elos Siyuk​—Mea Nga E Fwa Oru Ke Moul Luk? ke kas English. Tokin el liye video se inge, Luke el simusla: “Nga sifwilpa nunku ke ma nga oru ke moul luk.” El fwak: “In pal somla, nga eis me akkeye yok ngan orekmakin pal yok luk meet in eis me lutlut fulat in kasreyu in oasr moul mwomwo ke pal fwasru. A fwin oasr tari orekma mwomwo luk nga ku in akmwoye orekma nukewa luk in kulansap nu sin God. Kain in me akkeye inge el tia kasru kom in kapkapek ke orekma lom nu sin God; tusruktu oiya inge ku in akmunasye kom.” Met lili nukewa su srakna fwusr, efu ku kom tia orekmakin ma kom lotela ke loom lutlut in akyokye orekma in luti lom oana ke ma Hannah el oru? A efu ku kom tia etawi me srikasrak lal Rachel, ke kom kafweang in akpayeye akwuk mwomwo su ku in akfulatye God? Etawi me srikasrak lal Luke, in tia putatla ke me sensen puspus su oana me sruf nu sin met fwusr puspus ke pal inge.

Moniyuk in Loang Akmwoye ke Kas in Sensen Nukewa

14. Jeova el insemwomwo ke kain alu fuka? A oiya fuka met kulansap lun God elos enenu in akkalemye a efu ku upa in oru ouinge?

¹⁴ Met kulansap nukewa lun Jeova elos enenu in nasnas fwin elos lungse Jeova elan insemwomwo ke orekma lalos in alu nu sel. Isaia el akkalemye kas in sensen inge: “Komwos som, komwos som, komwos fwasr liki an ingo, nikmet kaliye kutena ma tia nasnas; komwos som liki in maslol [an Babulon], aknasnasye komwos, komwos su wis alu lun Jeova.” (Isaia 52:11) Yea puspus meet liki Isaia el simusla kas inge, Togusra Esa su arlana mwo el akpayeye sie orekma saoklana in akwanginyela orekma lun kosro fwin an Juda. (Ridi 1 Togusra 15:11-13.) A tokin century puspus, met sap Poul el fwak nu sel Taitus la Jisus el sang moul lal in aknasnasye met nukewa su fwasr tokol in oralos sie “un met tu elos in ma lal, moniyuk nu ke orekma mwo.” (Taitus 2:14) Ke pal inge su metu elos nunku yok in akinsemwomwoyelos sifwana, paenang tia fusrasr nu sin met nukewa, yokna nu sin met fwusr in moulkin moul nasnas. Ke sie me pupulyuk, met kulansap nukewa lun God, met matu a met fwusr, elos enenu in karunginelos in tia akfokfokyeyuk ke ma fokfok su akkalemyeyuk ke kain in me rid puspus, ke TV, ke petsa mukuikui, a yokna ke Internet.

15. Mea ku in kasre kut in akpayeye sulela lasr in srunga ma koluk?

¹⁵ Moniyuk lasr in porongo kas in sensen lun God ku in kasre kut in tu na ku in srunga ma koluk. (Sam 97:10; Rom 12:9) Kut enenu in srunga kain in ma fokfok nukewa in kasre kut in “lain a sukosokla liki me srufwe upa lun ma inge,” oana ke sie met Kristian el akkalemye. Kut fwin lungse in takusla ku eisla sie magnet na fukoko liki mwusra, kut enenu in liksreni oru, wikin ku su kut fwa orekmakin enenu in fukoko liki kuiyen magnet se. Ke inkanek ouinge, kut enenu in kafweang yok in lain me sruf upa lun kain in ma fokfok nukewa. Etauk yok lasr ke me akkoluk upa su me rid fokfok a petsa fokfok ku in oru nu sesr fwa ku in kasre kut in akkalemye srunga lasr nu ka. Oasr sie brother su enenu in kafweang yok in kunausla oiya koluk lal in liye petsa fokfok su akkalemyeyuk ke Internet sites. El filiye computer lal nu ke sie an su met nukewa ke sou lal ku in liye ma inge. Wekunang ma inge, el oru sulela paye lal in aknasnasyel sifwana a in moniyuk in oru ma mwo. El oru siepa akwuk mwomwo. Meyen el enenu in orekmakin Internet ke business lal, paenang el sulela in orekmakin ma inge fwin mutan kiyel el muta na siskel.

Ella Mwomwo el Arlana Yok Sripe

16, 17. Mea oiya mwomwo lasr oana met Kristian ku in oru nu sin met nukewa su liye kut? Sang me pupulyuk.

¹⁶ Met fwusr puspus, mokul a mutan su kulansap nu sin Jeova elos akkalemye ella mwomwo, a ke sripe inge met puspus su liye ella mwomwo lalos kaksakunelos! (Ridi 1 Piter 2:12.) Oasr sie met muteta nu ke Bethel fwin an London el ekulla nunak lal ke Met Lo lun Jeova tokin el orekma we ke lusen len se nu ke fongeni in oru onon nu ke sie machine in orek buk. Mutan kiyel su lutlutkin Baibel yurin sie Met Lo su muta in an selos, el liye la mokul tumal el ekulla ella lal. In pal somla, mokul tumal el srunga Met Lo elos in tuku muteta in loom sel. Tusruktu tokin len se su el oru orekma ke Bethel, el kaksakin na paye oiya mwomwo lun brother puspus nu sel. El kaksakunelos ke elos tia orekmakin kas koluk. Met nukewa elos mongfusrasr, a insemwomwo, wangin kutena me sensen. El kaksakin na paye met fwusr mokul a mutan su arlana moniyuk ke orekma lalos fwinne elos tia eis molin orekma lalos, elos lungse in orekmakin pal a ku lalos in sang kasru orekma in sulkakin peng mwo.

¹⁷ Oayepa, met lili puspus wiyesr mokul a mutan, elos oru pa orekma lalos in sang kasru sou lalos, a elos akkalemye pa la elos met orekma na mwomwo. (Kolosse 3:23, 24) Ke sripe inge elos tia sisila liki orekma lalos, meyen met ma la orekma el saok kin oiya mwomwo lalos ke orekma a el srunga in siselosla liki orekma lalos.

18. Fuka kut ku in “moniyuk nu ke orekma mwo” nukewa?

¹⁸ Lulalfongi lasr nu sin Jeova, oiya mwo lasr in akos masap nukewa lal, a orekma lasr in karungin an a loom su kut oru tukeni lasr, pa inkanek puspus su kut ku in akkalemye moniyuk lasr nu ke loom sin Jeova. In wekunang, kut lungse in orekmakin pal yok lasr in wi pal nukewa ke orekma in sulkakin peng mwo lun Togusrai a in oru met tuma lutlut. Kut fwin matou tari ku srakna fwusr, kafweang lasr in sruokye a karungin oiyen moul nasnas su eneneyuk nu ke alu lasr nu sin God, kut fwa ku in eis me insemwomwo puspus ka. A kut eteyuk pal nukewa oana met su “moniyuk nu ke orekma mwo.”​—Taitus 2:14.

[Footnote]

Ke me srikasrak su oasr in Baibel a ke pal inge, mea kom lotela ke

• inkanek mwo in akkalemye moniyuk lom in sulkakin a luti peng mwo?

• inkanek mwo met Kristian fwusr elos ku in “moniyuk nu ke orekma mwo” nukewa?

• inkanek mwo in aksukosokye kut la liki oiya koluk nukewa lasr?

[Picture on page 19]

Ya kom orekmakin Baibel pal nukewa ke orekma in luti lom?

[Picture on page 21]

Kom fwin lutlutkin sie pa kas saye ke pal se kom lutlut ke loom lutlut fwa ku in kasre kom in akyokye orekma in luti lom