Akkalemye Moniyuk nu ke Alu Paye
“Kosrani yok a pu met orekma.”—MATTU 9:37.
1. Kom akuteye fuka oiyen salka a in silaklak?
OASR sie document ku papu lom su enenu na paye in liye a tuni akmwoye sin sie met ke saflaiyen lenu. Mea kom e oru? Kom e fwa simusla ku filiye sie me akul ka oana “SALKEYUK!” Ingena kom enenu in som nu ke appointment lom an, tusruktu kom patla tari. Mea kom e oru? Ma na kalem se la kom sapkin driver lom an in “Silaklak a kasrusr mui!” Aok, fwin oasr orekma kom lungse in orek tusruktu arlana srikla pal lom in oru, kom pulakin tufwal a wangin inse misla lom. Adrenaline ke monum mutawauk in suror orekma ke laan monum, a oru kom in silaklak a akpisrpisrye orekma lom. Pa inge kalmen in silaklak a in salka ke sie orekma!
2. Orekma saoklana fuka sapkinyuk nu sin met Kristian ke pal inge in oru ke inkanek in salka?
2 Orekma saoklana su met Kristian ke pal inge elos enenu in salkeyuk, pa in sulkakin peng mwo lun Togusrai a in oru met in mutanfwal nukewa tu elos in met tuma lutlut. (Mattu 24:14; 28:19, 20) Met tuma lutlut Mark el simusla ke ma Jisus el fwak, la orekma saoklana se inge e fwa orek “meet,” aok meet liki safla tuku. (Mark 13:10) Aok, ma inge arlana fwal in orek. Jisus el fwak: “Kosrani yok a pu met orekma.” Orekma in kosrani tia ku in sano; enenu in oru ma inge meet liki pal in kosrani alukela tari.—Mattu 9:37.
3. Mea met lili elos oru in akfwalye ma eneneyuk in sulkakin peng mwo ke inkanek in salka?
3 Ke sripen orekma in sulkakin peng mwo el arlana yok sripe nu sesr, paenang kut enenu in orekmakin pal yok lasr, ku lasr, a kut in loang akmwoye ka pal nukewa. Arlana mwo, meyen oasr met lili mokul a mutan puspus su oru ouinge. Kutu met lili elos oru moul lalos in tia kafofo ke ma puspus lun fwalu, tu elos in ku in wi ke orekma lun pioneer pal nukewa, ku in wi orekma oana sie missionary, ku in kulansap ke sie Bethel su oasr in an puspus fwin fwalu nufon. Elos arlana kafofo in oru kain in orekma mwomwo puspus inge ke moul lalos. Elos lafwekinelosla sifwana, a oasr ma upa puspus su elos sun pa. Ne ouinge Jeova el akinsemwomwoyelos ke inkanek yok. Paye la kut insemwomwo kelos. (Ridi Luk 18:28-30.) Oasr met lili puspus saye su tia ku in wi ke orekma lun pioneer pal nukewa, fwinne ouinge elos orekmakin pal yok lalos in wi sulkakin peng mwo su ku in molela moul lun met puspus. A kut kafweang pa in sang kasru nu sin tulik srisrik nutusr in oasr fwinsrak lalos in moliyukla.—Duteronomi 6:6, 7.
4. Efu ku kutu met lili elos tula ku munasla ke oiyen salkeyuk lalos?
4 In oana ke ma kut akuteye tari, oiya in aksalkeyuk eneneyuk pal nukewa ke sripen srikla pal lula, ku apkuran in tari pal, in safla. Kut moul tari ke pal safla, a oasr me akpayeye puspus ka, ma tuku ke ma Simusla a ke ma sikyak fwin fwalu. (Mattu 24:3, 33; 2 Timote 3:1-5) Tusruktu, wangin kutena met etu ke pal se su safla e fwa tuku. Ke pal se Jisus el akuteye ke “me akul” in ‘saflaiyen akwuk puspus lun fwalu,’ el fwak kas inge: “A wanginu met etu ke len sa a aur sa, a tia lipufon in kosrao, ku Mwen, a Papa mukena.” (Mattu 24:36) Ke sripe inge, upa nu sin kutu met lili in akkalemye pal nukewa oiyen salkeyuk lalos ke yea puspus, yokna fwin elos oru orekma inge ke lusen pal loeloes. (Soakas 13:12) Ya kom nunku a pula pa ouinge? Mea ku in kasre kut in akkeye, a in sruokye pal nukewa oiyen salkeyuk lasr nu ke orekma su Jeova God a Jisus Kraist elos lungse kut in oru ke pal inge?
Nunku Akmwoye kel Jisus, Me Srikasrak Mwomwo Lasr
5. Ke inkanek puspus fuka Jisus el akkalemye oiyen salka nu ke orekma in luti lal?
5 Jisus Kraist pa me srikasrak mwo emeet inmasrlon met nukewa su akkalemye oiyen salkeyuk lalos in kulansap nu sin God. Sie sripe paenang el akkalemye oiyen salka pa ma ke sripen pukanten orekma su el enenu in aksafyela ke lusen yea tolu tafwu. Ne ouinge, Jisus el aksafyela orekma puspus ke alu paye yok liki kutena met oru. El fwakak inen Papa tumal a akwuk lal, el sulkakin peng mwo lun Togusrai. El akkalemye pa oiya koluk a me luti kikiap nukewa lun met kol puspus lun alu, a el akfulatye kolyuk fulatlanu lun Jeova nu ke na el mise. Aok el orekmakunul sifwana ke inkanek yok in som nu yen nukewa, in luti, kasru a in akkeyela mas lun metu. (Mattu 9:35) Wangin kutena met saye akpayeye ouinge ke lusen kitin pal oana ke ma Jisus el oru. Jisus el kafweang na paye in orekma ke ku lal kewa.—Jon 18:37.
6. Mea Jisus el nunku yok in akpayeye ke moul lal?
6 Mea akkeyel Jisus in arlana moniyuk a tia tui in oru orekma ke lusen pal el oru orekma in luti? In fwal nu ke kas palu lal Daniel, Jisus el etu ke lusen pal su el enenu in akpayeye orekma lal in fwal nu ke akwuk lun Jeova ke palu. (Daniel 9:27) In oana ke ma akkalemyeyuk ka, orekma in luti lal e fwa aksafyeyukla ke “infwulwen wik sa,” ku tokin yea tolu tafwu. Tia pat tokin el ilyuk nu in Jerusalem fwin ass soko in yea 33 C.E., Jisus el fwak: “Aur se summu, tu Mwen nutin met fwa naweyukla.” (Jon 12:23) Jisus el etu la pal in mise lal apkuran, ne ouinge el tia lela ma inge elan nunku yok ka, in pa sripe yok emeet elan moniyuk ke orekma. Tusruktu, el nunku akmwoye ke pal mwomwo nukewa in oru ma lungse lun Papa tumal a in akkalemye lungse nu sin met nukewa. Kain in lungse inge akkeyel in esani a sang akpa nu sin met tuma lutlut puspus, a el supwelosla in oru orekma in luti. El oru ma inge tu elos in akpayeye orekma su el mutawauk in oru a elos fwa akpayeye orekma puspus su yok liki ma el oru.—Ridi Jon 14:12.
7, 8. Oiya fuka met tuma lutlut elos akkalemye ke orekma lun Jisus in aknasnasye temple u? A efu ku Jisus el oru ma inge?
7 Oasr sie oiya ke moul lun Jisus su sang me akpayeye kalem ke moniyuk yok lal. Ma inge sikyak ke mutaweyen orekma in luti lal, ke pulanpal lun Kofwen Alukela in yea 30 C.E. Jisus a met tuma lutlut lal elos tuku in Jerusalem a elos koneak in temple “elos su kukakunla kao a sip a mwulioa, a met ayaol mani muta we.” Oiya fuka Jisus el akkalemye ka, mea oiya inge oru nu sin met tuma lutlut lal?—Ridi Jon 2:13-17.
8 Ma Jisus el oru a fwak in pal san oru met tuma lutlut elos in esam ke sie kas palu in sam su Devid el simusla: “Moniyuk ke loom sum kangyula.” (Sam 69:9) Efu? Meyen ma Jisus el oru arlana sensen. Meyen met kol ke temple, met tol puspus, met sim, a kutupa met kol, elos insese a sang kasru nu ke orekma in kukakin ma puspus su orek we tu elos in eis kapek yok ka. Ke sripen el akkalemye a tulokinye orekma tia mwo lalos inge Jisus el oral sifwana in met lokwalok lun met kol puspus inge. In oana ke ma met tuma lutlut elos nunku akmwoye ke ma sikyak inge, ‘moniyuk ke loom sin God,’ ku moniyuk lal ke alu paye arlana kalem in pal san. Tusruktu, mea kalmen moniyuk? Ya oiya se inge siena liki oiyen salka?
Kalmeyen Oiyen Salka a Moniyuk
9. Fuka kas inge moniyuk el ku in akuteyuki?
9 Sie dictionary el akuteye kalmen kas se inge “moniyuk” oana “lungse a kena yok in oru sie orekma,” a kalmekin pa nu ke pulakin yok, lulalfongi, lungse yok in oru ma se. Paye la Jisus el akkalemye oiya nukewa inge ke pal se el oru orekma in luti lal. Ke ma inge, leng lun Baibel inge Today’s English Version lungasla fus se inge oana: “Lungse yok luk ke loom sum, O God, furur insiuk oana sie e.” In kutu an fwin an Orient, kas se inge “moniyuk” el orekla ke kas luo su kalmekin “inse-fwol,” oana ke insie el fwolak. Tia sie me lut fwin met tuma lutlut elos esam ke kas lun Devid ke pal se elos liye ma Jisus el oru ke temple u. Tusruktu, mea oru insiel Jisus in fwolak ke e, oana ke kas in pupulyuk, a akkeye, ku moklel in oru ouinge?
10. Mea kalmen kas se inge “moniyuk” oana ke inkanek su orekmakinyuk in Baibel?
10 Kas se inge “moniyuk” in sam su Devid el simusla el tuku ke sie kas Hibru su lungasyukla ke pal puspus oana “lemta” ku “sok” ke kutu fus in Baibel. Leng lun Baibel se inge New World Translation el lungasla kas inge oana “in akkalemye lungse yok nu sel mukena.” (Ridi Exodus 20:5; 34:14; Josua 24:19.) Sie dictionary su akuteye ke kas orekmakinyuk in Baibel el akkalemye ma inge ka: “Kas inge orekmakinyuk pal nukewa nu ke fototo lun sie siyanyen . . . In oana ke oiyen lemta su oasr yurin sie mokul ku mutan payuk, a kena in akkalemye lungse nu sin sie sin sie a tia nu sin met saye. Ke inkanek inge oasr sumwos lun God in sapkin met kulansap lal nukewa in akkalemye lungse lalos nu sel mukena, a el akpayeye sumwos lal inge pal nukewa.” Ke ma inge, oiyen moniyuk su orekmakinyuk in Baibel yok kalme liki na pulakin a lulalfongi lun sie met ke sie oiya, oana ke oiya su met puspus elos akkalemye nu ke me sritel ku sport su elos lungse na paye. Moniyuk lal Devid el sie kain in lemta mwomwo, kalme pa, el srunga in oasr kutena me akkoluk, sie kena mwomwo in karungin sie e mwomwo ku in aksumwosye sie me akkoluk.
11. Mea moklel Jisus in kafweang in akkalemye moniyuk paye lal?
11 Met tuma lutlut lal Jisus elos paye in esamye a orekmakin kas lal Devid ke ma elos liye Jisus el oru in temple. Jisus el moniyuk meyen el etu la srikla tari pal lula lal, a el moniyuk ku lemta ke inen Papa tumal a ke alu paye. Ke pal se el liye ke oiya puspus su inen Papa tumal akkolukyeyuk a aklusrongtenyeyuk, el arlana sumwos in moniyuk, ku in lemta, paenang el aksumwosye oiya koluk se inge. Ke pal se Jisus el liye met fwokpap akkolukyeyuk a kiapeyukla sin met kol puspus lun alu, moniyuk lal moklel in sang me kasru a me akkeye nu sin metu. A el kaskaskin kas upa in lain met kol puspus lun alu ye mutun met puspus in pal san.—Mattu 9:36; 23:2, 4, 27, 28, 33.
Moniyuk nu ke Alu Paye
12, 13. Mea met kol puspus ke alu lun Kristendom elos oru ke (a) inen God? (b) Togusrai lun God?
12 Oiya a orekma lun met puspus ke pal inge su fwak mu elos kulansap nu sin God el oana sie ku koluk liki oiyen met in pal lun Jisus. Ke sie me pupulyuk, esam la ma se meet su Jisus el luti nu sin met tuma lutlut lal in akkalemye ke pre lalos pa ke inen God: “Em in akmutalyeyuk.” (Mattu 6:9) Ya kut liye met kol lun alu puspus ke pal inge, yokna ke alu puspus su fwak mu elos fwasr tokin Kraist, elos luti met in etu God a luti ke inel a in akmutalye, ku sunakin e se inge? Mo elos tia oru ma inge, a elos akkolukye God ke inkanek lun me luti kikiap lalos oana Trinity, ngun su tia ku in mise, a ke e in isis. Ke sripe inge elos oru God in tia mwo, upa in kalem ke oiya lal, sie su sulallel, a lungse in akkeokye metu. Elos akkolukye pa God ke inkanek lun orekma koluk lalos a ke oiya lalos su tia paye. (Ridi Rom 2:21-24.) Sayen ma inge, elos oru ke ku lalos kewa in mwukunla, a elos tia fwakak inen God, a elos eisla ma inge liki leng lun Baibel natulos. Ke ma inge elos tulokinye metu in akfototoyelos nu sin God a in akkeye fototo mwomwo lalos nu sel.—Jemes 4:7, 8.
13 Jisus el luti pa met tuma lutlut lal elos in pre ke Togusrai lun God: “Togusrai lom in tuku. Ma lungse lom in orek, oana in kosrao, ouinge fwin fwalu.” (Mattu 6:10) Met kol puspus ke alu lun Kristendom elos kalweni pal nukewa pre inge, tusruktu elos kaifwe met lalos in sang kasru nu ke akwuk lun politic a nu ke u puspus lun metu a tia ke togusrai se inge. Sayen ma inge, elos aklusrongtenye met nukewa su kafweang in sulkakin a sang ma lo ke Togusrai se inge. Ke ma inge, pus sin met su fwak mu elos met Kristian, elos tia akuteye ku sramsramkin Togusrai lun God, a wangin pa lulalfongi lalos ka.
14. Fuka met kol ke alu puspus su fwak mu elos met Kristian elos aklusrongtenye Kas lun God?
14 Ke el pre nu sin God, Jisus el fwak arlana kalem: “Kas lom ma paye.” (Jon 17:17) A meet liki el folokla nu in kosrao, Jisus el akkalemye la el e fwa srusrngiye “met kulansap oaru a lalmetmet” in akola me mongo, kalme pa me lutlut mwo a paye in akkeye lulalfongi lun met nukewa lal. (Mattu 24:45) Met kol puspus ke alu su fwak mu elos met Kristian elos ekin mu elos luti metu ke Kas lun God, tusruktu ya elos oaru in akpayeye ma Leum el sapkin nu selos in oru? Mo. Elos lungse in fwak a luti la koanon Baibel el me sramsram pihlenfong mukena a tia paye. Elos tia kite u lalos ke me mongo su ku in akkeye lulalfongi lalos, tusruktu met kol inge elos luti etauk a lalmetmet lun met nu sin met su wi ke alu lalos su mwo nu ke insrelos. In wekunang ma inge, elos aklusrongtenye akwuk lun God ke oiyen moul nasnas in akfwalye nu ke nunak a oiyen met ke pal inge ke akwuk lalos sifwana su elos pangon mu oiya sasu lun moul nasnas.—2 Timote 4:3, 4.
15. Mea pulakin lom ke ma nukewa su met kol puspus lun alu elos oru nu ke inen God?
15 Ke sripen orekma a oiya puspus nukewa su orek tari, a metu orekmakin inen God lun Baibel ka, paenang oasr met puspus su akmunasyeyuk ke lulalfongi lalos, ku wanginla lulalfongi lalos ke God a ke Baibel. Ke ma inge elos putatyang nu ke orekma lal Setan a ke akwuk koluk puspus lal ke pal inge. Ke pal se kom liye a long ke oiya puspus inge sikyak len nukewa, mea pulakin lom? In oana sie met kulansap lun Jeova, ke pal se kom liye kain in me akkoluk a kaskou nu ke inen God, ya oiya inge tia mokle kom in aksumwosye me akkoluk a kaskou inge? Ke pal se kom liye met puspus su paye insielos kiapeyukla a akkolukyeyuk, ya ma inge tia mokle kom in sang me akkeye nu sin met puspus inge? Ke pal se Jisus el liye metu in len lal “tu elos ongoiye, a fwasrelik, oana sip su wangin met sropo,” el pakomutalos. Sayen ma inge el “mutawauk in luti ma puspus nu selos.” (Mattu 9:36; Mark 6:34) Oana Jisus, kut enenu pa in akkalemye moniyuk lasr nu ke alu paye.
16, 17. (a) Mea ku in mokle kut in kafweang in orekmakin moul lasr ke orekma in luti peng mwo? (b) Mea kut fwa lutlutkin ke me lutlut toko?
16 Kut fwin moniyuk ke orekma lasr in luti peng mwo, kas su Poul el simusla in 1 Timote 2:3, 4 e fwa oasr kalme yok nu sesr. (Ridi.) Kut alken in oru orekma in luti lasr meyen kut etu la kut oasr tari ke len safla a kut etu pa la pa inge ma lungse lun God. El lungse metu elos in eis etauk ke ma paye in kasrelos in lutlut ke inkanek mwo in alu nu sel a in kulansapul tu elos in akinsemwomwoyeyuk. Kut lungse na paye in orekmakin moul lasr nu ke orekma in luti, ke sripen palu fototola. Oayepa ke sripen kut lungse in akfulatye inen God a in kasru met in eis etauk ke ma lungse lal. Aok kut moniyuk nu ke alu paye.—1 Timote 4:16.
17 Oana met kulansap lun Jeova, kut akinsemwomwoyeyuk ke inkanek lun etauk ke ma paye ke akwuk lun God nu sin metu a ke fwalu. Oasr yurosr inkanek mwomwo in kasru met in koneak me insemwomwo a fwinsrak paye ke pal fwasru. Kut ku in akkalemye nu selos la fuka elos ku in eis me molela ke pal in kunanela lun akwuk nukewa lal Setan tuku. (2 Tessalonika 1:7-9) Kut tia asor ku toasr ke sripen len lun Jeova nunkeyuk mu patla in tuku. Kut enenu in engun ke sripen srakna oasr pal mwomwo lasr in akkalemye moniyuk lasr nu ke alu paye. (Maika 7:7; Hebakkuk 2:3) Kut ku in akkeye fuka oiyen moniyuk inge? Kut fwa lutlutkin ma inge ke me lutlut toko.
Ya Kom Ku In Akuteye?
• Ma fuka akkeyel Jisus in moniyuk pal nukewa ke lusen pal su el oru orekma in luti lal?
• Mea kalmen “moniyuk” in oana ke oiya su orekmakinyuk in Baibel?
• Mea kut liye ke pal inge su ku in mokle kut in moniyuk ke orekma lasr nu ke alu paye?
[Petsac ke sra 4]
Jisus el nunku akmwoye in oru ma lungse lun Papa tumal a in akkalemye lungse nu sin met nukewa
[Petsac ke sra 6]
Oasr sripe mwomwo lasr in moniyuk nu ke alu paye