Met Sumwosmwos Elos Fwa Kaksakin God Ma Patpat

“Met sumwosmwos elos fwa esamyuk ma patpat . . . Sumwosmwos lal on ma patpat.”​—SAM 112:6, 9.

1. (a) Ma mwomwo fuka ke pal fwasru akola nu sin met nukewa su God el liye mu elos met sumwosmwos? (b) Kusensiyuk fuka siyukyak?

OASR pal mwomwo ke pal fwasru su akola nu sin met nukewa su God el liye mu elos met sumwosmwos! Elos fwa insemwomwo in eis etauk ke oiya mwomwo puspus lun Jeova ke pal loeloes, aok ma patpat. Insielos fwa akkeyeyuk in sang kaksak nu sin Jeova ke elos lotela ma puspus ke orekma mwolanu nukewa lal. Sie inkanek su eneneyuk nu sesr tu kut fwa ku in pulakin pal mwomwo ke pal fwasru pa kut in akkalemye “ma sumwosmwos,” oana ke ma akkalemyeyuk in Sam 112. Tusruktu, fuka Jeova God lasr su mutal a sumwosmwos el nunku a liye metu oana ma sumwosmwos? Fwinne kut kafweang in oru ma sumwos, kut srakna oru ma koluk, a kutu pal arlana upa.​—Rom 3:23; Jemes 3:2.

2. Mwenmwen fuka luo Jeova el orala ke sripen lungse lal?

² Aok, Jeova el orala inkanek mwomwo in liye met sesumwos oana met sumwosmwos. El oru fuka ma inge? Ma se meet, pa el orala sie mwenmwen ke pal se el sang moul lun tulik kulo se nutal nu insien sie mutan virgin, a tulik mokul se inge el isusla oana sie met sumwosmwos. (Luk 1:30-35) A, tokin ma inge met lokwalok puspus lun Jisus elos unilye, Jeova el orala siepa mwenmwen su arlana sakuruk. God el akmoulyelak Jisus oana sie ngun mwolana.​—1 Piter 3:18.

3. Efu ku God el insemwomwo yok in sang nu sin Mwen nutal moul in kosrao?

³ Jeova el akinsemwomwoyel Jisus ke sie ma su Mwen nutal el tia eis meet liki el tuku nu fwalu oana sie met, me sang se inge pa moul in kosrao su tia ku in kunausyukla. (Hibru 7:15-17, 28) Jeova el insemwomwo in oru ma inge meyen Jisus el sruokye oaru lal fwinne el sun ma upa puspus. Ke ma inge Jisus el sang me top mwomwo nu sin Papa tumal. A oiyen oaru lal sang me top nu ke kas kikiap lal Setan mu metu elos kulansap nu sin God ke sripen me insemwomwo puspus su elos ku in eis a tia ke sripen lungse paye lalos.​—Soakas 27:11.

4. (a) Ke pal se Jisus el folokla nu in kosrao, mea Jisus el oru nu sesr, a mea Jeova el oru? (b) Mea pulakin lom ke ma Jeova a Jisus elos oru keim?

⁴ Sayen ma inge, oasr pa ma Jisus el oru in kosrao. El ‘sikyak ye mutun God kesr’ a el akkalemye pa saokiyen “sral sifwana.” Papa tumasr in kosrao el insemwomwo in eis me kise lun Jisus su arlana saok oana “me iumwe ke ma koluk lasr.” Ke ma inge, ke ‘ella lasr su aknasnasyeyuk tari,’ paenang kut ku in oru ‘orekma in kulansap nu sin God moul.’ Ke ma inge oasr sripe mwomwo lasr in akkalemye pa kas in mutamwauk ke Sam 112, “Komwos in kaksakin Jeova”!​—Hibru 9:12-14, 24; 1 Jon 2:2.

5. (a) Mea kut enenu in oru in sruokye ku oiya sumwos lasr ye mutun God? (b) Ke inkanek fuka Sam 111 a Sam 112 takunla a oakiye ke ma simusla?

⁵ Kut fwin lungse God lan liye kut oana met sumwomswos pal nukewa, kut enenu in kafweang in akkalemye lulalfongi lasr ke sran Kraist su aksuroryeyukla kesr. Kut enenu in sang kulo nu sin Jeova len nukewa ke sripen el lungse kut na paye. (Jon 3:16) Kut enenu pa in kafweang in lutlutkin Kas lun God a oru ke ku lasr kewa in orekmakin ke moul lasr akwuk mwomwo ka. Sam ak 112 el akkalemye ke kas in kasru limekosr nu sesr tu kut fwa ku in sruokye sie ella a oiya nasnas ye mutun God. Sam 112 a Sam 111 oasr kas in kasru mwomwo puspus ka. Sam 111 a Sam 112 oasr kas in mutamwauk inge ka, “Komwos kaksakin Jeova!” ku “Hallelujah!” a ke kas Hibru, oasr line 22, kais sie line inge el mutamwauk ke sie leta ke alphabet lun met Hibru.a

Me Kasru Yok In Pulakin Insemwomwo

6. Fuka “met” ma sangeng sin God su akkalemyeyuk in Sam 112 fwa akinsemwomwoyeyuk?

⁶ “Insemwomwo met se su sangeng sin Jeova, su arulana engun ke ma sap Lal. Fute lal e fwa ku fwin fwalu. Fwil lun met sumwos fwa akinsemwomwoyeyuk.” (Sam 112:1, 2) Loang akmwoye nu ka la met sim lun sam el akkalemye meet ke sie “met” a ke saflaiyen fus 2 el akkalemye ke fwil lun “met sumwos” su kalme pa met puspus elos sumwos. Ma inge ku in akkalemye la Sam 112 el sramsramkin ke met puspus. In orekmakin fus se inge, met sap Poul el orekmakin Sam 112:9 nu ke orekma a kasru lun God nu sin met Kristian puspus in century se meet. (Ridi 2 Korint 9:8, 9.) Aok, sam se inge el akkalemye ke oiya mwomwo su oasr yurin met kulansap puspus lun Kraist ke pal inge paenang elos ku in insemwomwo!

7. Efu ku met kulansap nukewa lun God enenu in oasr sangeng mwomwo lalos nu sel? A mea nunak a pulakin lom ke masap nukewa lun God?

⁷ In oana ke ma akkalemyeyuk in Sam 112:1, met Kristian paye inge elos pulakin insemwomwo yok ke elos moul a oru fwufwasryesr lalos in “sangeng sin Jeova.” Sangeng mwomwo lalos inge kasrelos in oru insien God in engan pal nukewa a in lain ngun lun fwal sin Setan inge. Aok, elos “arulanu engan” in lutlutkin Kas lun God a in akos masap nukewa lal. Wekunang masap in sulkakin peng mwo lun Togusrai lun God fwin fwalu nufon. Elos kafweang in oru met tuma lutlut ke mutanfwal nukewa ke pal elos sang kas in sensen nu sin met koluk nukewa ke len in nununku lun God su apkuran in tuku.​—Ezikiel 3:17, 18; Mattu 28:19, 20.

8. (a) Fuka met kulansap nukewa lun God su oaru nu sel fwa akinsemwomwoyeyuk ke sripen moniyuk lalos? (b) Me insemwomwo fuka ke pal fwasru akoeyuk nu sin met nukewa su oasr fwinsrak in eis moul lalos fwin fwalu?

⁸ Ke sripen elos akos masap lun God, paenang pisen met kulansap lun God ke pal inge yokyokelik, oasr tari ke million itkosr kutu. Su ku in fwak mu met kulansap lun God elos tia “ku fwin fwalu”? (Jon 10:16; Fwakyuk 7:9, 14) Aok elos fwa “akinsemwomwoyeyuk” ke inkanek yok ke pal se God el fwa akpayeye akwuk lal! Oana sie u, met nukewa su oasr fwinsrak in moul ma patpat fwin fwalu elos fwa moliyukla liki “ongoiye lulap” su apkuran in tuku. Elos fwa orala sie “fwal sasu” su kalme pa u sasu lun met, a ma “sumwosmwos on we.” A fwa oasr pal, met nukewa su moulla liki Armagedun “fwa akinsemwomwoyeyuk” ke inkanek yok. Elos fwa akola in sifwil paing million puspus sin met su fwa akmoulyeyukyak. Aok sie fwinsrak mwomwo pa inge! Ke saflaiye, elos nukewa su eis “insemwomwo yok” ke masap lun God elos fwa ekla met sumwosmwos a elos fwa engankin “sukosok lun mwolanu lun tulik nutin God” ma patpat.​—2 Piter 3:13; Rom 8:21.

Orekmakin Me Kasrup ke Inkanek Mwo

9, 10. Fuka met Kristian paye elos ku in orekmakin lalmetmet a etauk yok lalos in oana me kasrup saok? A fuka sumwomswos lalos ku in tu ma patpat?

⁹ “Kasrup a mani puspus on in loom sel; a sumwosmwos lal on ma patpat. Nu sin met sumwos kalem sikme in losr. El kulang, a sesesla ke pakomuta, a sumwosmwos.” (Sam 112:3, 4) In pal meeta, oasr kutu sin met kulansap lun God akkalemyeyuk in Baibel la elos met kasrup. A ke kas in pupulyuk, met nukewa su God el akinsemwomwoye, elos ekla met kasrup, fwinne tia ke me kasrup ke mani ku ma saok puspus. Aok paye la, apkuran met nukewa su oru sulela lalos in akpusiselyelos ye mutun God saap elos sekasrup a tia aksaokyeyuk sin met puspus, oana ke ma sikyak in len lal Jisus. (Luk 4:18; 7:22; Jon 7:49) Ne ouinge, fwinne sie met el sekasrup ke ma saok puspus, tusruktu el ku in kasrup ke lalmetmet a etauk lal ke God.​—Mattu 6:20; 1 Timote 6:18, 19; ridi Jemes 2:5.

¹⁰ Met Kristian akmusrala, wekunang met nukewa su welulos, elos lungse pal nukewa in sang kasru nu sin met puspus ke inkanek in lalmetmet a etauk lalos ke God oana me kasrup saok. Aok elos oana kalem su “sikyak” ke fwal lun Setan su arlana losr, a elos oana ‘kalem nu sin met sumwosmwos.’ Elos oru ma inge ke elos kasru met puspus in eis ma lane ke lalmetmet a etauk ke God su arlana saok. Met lokwalok elos srike tari in tulokinye orekma in sulkakin peng mwo lun Togusrai, tusruktu elos tia ku in eis kutangla. A, fwako mwomwo puspus lun orekma mwomwo inge el ‘on ma patpat.’ Ke elos sruokye oiyen sumwosmwos lalos ye me srufwe upa, met kulansap lun God elos ku in fwinsrakkin na paye, la sumwosmwos lalos inge ku in ‘tu ma patpat.’

11, 12. Mea kutu inkanek su met kulansap lun God elos orekmakin ma saok puspus lalos nu ka?

¹¹ Met kulansap nukewa lun God, met akmusrala a “u lulap” elos akpayeye la elos kulang a lungse in orekmakin ma saok puspus lalos. Sam 112:9 el akkalemye: “El akfwasyelik, el sang tari nu sin met enenu.” Met Kristian paye ke pal inge elos sang me kasru lalos pal nukewa nu sin met Kristian wiyelos a oasr pal nu sin met atulani lalos su oasr me enenu yok lalos. Elos orekmakin pa ma saok lalos, mani lalos in sang kasru nu sin met enenu puspus fwin oasr ongoiye sikyak. In oana ke ma Jisus el akkalemye la ma inge fwa sikyak, paenang nu selos orekma lalos inge el paenang elos in insemwomwo.​—Ridi Orekma 20:35; 2 Korint 9:7.

¹² In wekunang, nunku ke lupan mani su orekmakinyuk in sang orala me rid inge nu ke kas 172, su pus sin met su kaskaskin kas inge elos met sekasrup. Nunku pa ke ma paye inge la me rid inge orekla pa ke kain in kas su pangpang sign language su orekmakinyuk nu sin met selongkas, oayepa ke Braille nu sin met kun.

Pakomuta a Nununku Sumwos

13. Su akkalemye me srikasrak mwo emeet ke oiyen kulang in sang? A kut etawi fuka me srikasrak lalos?

¹³ “Mwo nu sin met se su oru in kulang a sangwun.” (Sam 112:5) Paye la kom liye tari ke met puspus su sang kasru nu sin metu tia paye a elos tia kulang ku pakomuta pal nukewa. Kutu metu elos sang in akkalemye la oasr ma puspus yurolos liki met puspus saye ku kutu pal elos toasr in sang me sang lalos. Aok kom tia insemwomwo in eis me kasru su tuku sin met su akkalemye oiya inge. Ke luma tia oana sie, kom arlana insemwomwo in eis me kasru sin sie met su kulang a pakoten na paye. Jeova pa me srikasrak mwomwo emeet nu ke sie Met Sang su kulang, a insemwomwo in sang. (1 Timote 1:11; Jemes 1:5, 17) Jisus Kraist el etawi me srikasrak mwomwo lun Papa tumal. (Mark 1:40-42) Ke ma inge, God el liye kut la kut lungse ma sumwosmwos, a kut enenu in oasr insemwomwo in sang a kulang a in oasr pakoten yok a paye, yokna ke orekma in sulkakin peng mwo ke kut kasru met tulan lasr in etu Jeova.

14. Mea kutu inkanek su kut ku in ‘liaung papu lasr in oasr nununku sumwos ka’?

¹⁴ “El fwa liaung papu lal in nununku.” (Sam 112:5) In oana ke ma palyeyuk tari, u lun met kulansap oaru elos nunku yok a karungin ma nukewa lun Leum in fwal nu ke nununku sumwos lun Jeova. (Ridi Luk 12:42-44.) Oiya inge kalem ke kas in kasru nu sin met elder nukewa su oasr in Baibel, la kutu pal elos enenu in aksumwosye ma koluk upa su orek sin kutu met ke congregation. Ke kas in kasru a akwuk nukewa su pal nukewa fwal nu ke akwuk mwomwo lun Baibel su met kulansap oaru elos orala nu sin congregation nukewa, missionary home, Bethel homes, a arlana kalem la oasr nununku sumwos a akmwuk mwomwo ka. Nununku sumwos el eneneyuk nu sin met elder nukewa a nu sin met Kristian nukewa elos in akkalemye ma inge nu sin sie sin sie, a nu sin met selulalfongi, wekunang nu ke akwuk lun business.​—Ridi Maika 6:8, 11.

Me Insemwomwo Puspus Nu Sin Met Sumwosmwos

15, 16. (a) Mea peng koluk ku in orek nu sin met sumwosmwos nukewa? (b) Mea met kulansap lun God elos lungse na paye in kafweang nu ka in oru?

¹⁵ “Tu el fwa tuna mukuikui. Met sumwosmwos elos fwa esamyuk ma patpat. El a fwa tia sangeng ke peng koluk. Insiel oakiyuki in lulalfongi Jeova. Insiel oakiyuki ku; el a fwa tia sangeng, nu ke pal se el a fwa liye ma lungse lal fwin met lokwalok lal.” (Sam 112:6-8) Ke pal inge oasr peng koluk puspus su tia sikyak in pal meeta, wekunang meun, orekma lun met koluk a orekma sulallel puspus lalos, kain in mas sasu puspus su arlana upa, a mas upa su eteyuk tari in pal meeta sifwil sikyak ke pal inge, akmas, moul sekasrup, a fokfokla lun yen engyengu su kunausla fwalu. Met nukewa su God el liye mu met sumwosmwos elos tia ku in kaengkunla fwako koluk nukewa su tuku ke peng koluk puspus, ne ouinge elos tia sangeng ke ma koluk puspus inge. A, insielos “oakiyuki in lulalfongi” a “oakiyuki ku,” ke elos ngetla nu ke pal fwasru. Elos akkalemye lulalfongi yok ke sripen elos etu la akwuk sasu lun God el apkuran me. Fwin oasr ongoiye sikyak nu selos, elos ku in muteng ka meyen elos lulalfongi la Jeova el fwa kasrelos. El tia lela met kulansap sumwosmwos lal in “mukuikui,” el akola in kasrelos a akkeyelos tu elos in ku in muteng.​—Filippai 4:13.

¹⁶ Met kulansap sumwosmwos nukewa lun God elos enenu pa in muteng ke orekma in akkalemye srunga a kaskas kikiap su orek sin met lokwalok puspus. Tusruktu orekma lalos inge tia ku in tulokinye met Kristian paye liki orekma lalos in sulkakin a luti ke peng mwo. A, met kulansap lun God elos tu na ku a moniyuk pal nukewa tia tui ke orekma su Jeova el sang nu selos, pa in sulkakin peng mwo lun Togusrai a in oru met puspus su lungse in porongo elos in ekla oana met tuma lutlut lal. Wangin alolo ka la, met sumwosmwos elos fwa pulakin me lain upa ke len safla apkuran me. Srunga lun met lokwalok nukewa inge fwa yokelik na paye ke pal se Setan su Devil su akkalemyeyuk pa oana Gog lun Magog, el srike in kunausla met kulansap lun God fwin fwalu nufon. In pal se inge, kut fwa ‘liye met lokwalok lasr’ ke elos kuf ke meun se inge. Sie pal mwomwo pa inge in liye ke orekma lun Jeova el akmutalye inel ke inkanek nukewa!​—Ezikiel 38:18, 22, 23.

‘Akfulatyeyuk ke Sunak’

17. Fuka met sumwosmwos nukewa elos fwa ‘akfulatyeyuk ke sunak’?

¹⁷ E fwa oasr me insemwomwo yok in kaksakin Jeova ke inse sefwanna, ke sripen wanginla me lain su tuku sin Devil a ke fwal lal inge! Met nukewa su sruokye oiya mwomwo lalos ye mutun Jeova elos fwa insemwomwo in kaksakunul ma patpat. Elos fwa tia mwekin meyen elos fwa eis kutangla lalos. Aok Jeova el mwulela pa la “ko” lun met sumwosmwos lal ‘fwa akfulatyeyuk ke sunak.’ (Sam 112:9) Met kulansap sumwosmwos nukewa lun Jeova elos pulakin engan yok ke kutangla lalos, meyen elos fwa liye ke kunausyukla lun met lokwalok nukewa ke kolyuk lun Jeova.

18. Fuka kas safla ke Sam 112 fwa akpayeyuk?

¹⁸ “Met koluk elos fwa liye, a asor insielos. El a fwa ngangorngor ke mwusel, a kofelik. Ma lungse lun met koluk a fwa wanginla.” (Sam 112:10) Met nukewa su kafweang in lain met kulansap lun God tia pat elos fwa “kofelik” ke sok a srunga lalos. Ma lungse lalos in liye saflaiyen orekma lasr fwa wanginla oana elos su wanginla ke pal in “ongiye lulap” su fwa tuku.​—Mattu 24:21.

19. Nu ke mea kut lulalfongi yok?

¹⁹ Ya kom fwa sie sin met insemwomwo su fwa moulla a wi ke kutangla lulap inge? Ku fwin oasr ma sikyak nu sum ke sripen mas ku matou kom mise meet liki saflaiyen akwuk lal Setan, ya kom fwa sie sin “met sumwosmwos” su fwa sifwil akmoulyeyukyak? (Orekma 24:15) Me top nu ka ku in aok fwin kom kafweang in akkalemye lulalfongi lom nu ke me kise lun lango lun Jisus a in etawi Jeova, oana ke “met” sumwosmwos su akkalemye in Sam 112 elos oru. (Ridi Efesus 5:1, 2.) Jeova el fwa akpayeye la “me esmakin” nu sin met nukewa inge fwa tia mwulkinyukla, ku ke orekma sumwosmwos lalos in mulkinyukla. Jeova el esamelos a akkalemye lungse paye nu selos nu tok ma patpat.​—Sam 112:3, 6, 9.

[Footnote]

Kusensiyuk in Nunkeyuk

• Mea kutu sripe paenang kut enenu in akkalemye “Hallelujah”?

• Mea ma puspus su sikyak ke pal inge oru met Kristian paye in insemwomwo yok?

• Kain in me sang fuka Jeova el lungse?

[Picture on page 27]

Kut enenu in akkalemye lulalfongi ke sran Kraist tu kut in ku in sruokye oiya mwomwo ye mutun Jeova

[Pictures on page 28]

Me kasru su tuku ke inse mulala lun met puspus sang kasru met su sun ongoiye a ke orekla a kitela lun me rid nukewa su tuku ke Baibel