Su God?

KOM fwa topuk fuka kusensiyuk se inge? Kutu metu nunku mu elos etu na paye ke God, a el sie met kawuk na fototo a mwo. A kutu met elos nunku mu God el oana sie met in sou su loesla nu selos. Elos lulalfongi mu paye el oasr tusruktu srikla etauk lalos kel. Fwin oasr etauk lom ke God, kom fwa topuk fuka kusensiyuk ekasr ten inge?

1. Ya God el met na paye se?

2. Ya oasr inen God?

3. Ya Jisus pa God Kulana se?

4. Ya God el nunku keik a karungin yu?

5. Ya God el insese nu ke kain in alu nukewa?

Fwin kom siyuk sin kutu met ke kusensiyuk ekasr lung inge, kom ku in eis me top puspus ka su tia oana sie. Paenang, tia me lut se, fwin oasr nunak a me sramsram su akuteyuki tia sumwos ke God.

Efu ku Me Top Puspus inge Yok Sripe

Ke pal se el osun a sramsram nu sin sie mutan su oasr etu lal ke God ke sie luf in kof, Jisus Kraist el akuteye arlana kalem ke me enenu yok nu ke etauk paye ke God. Mutan se inge, el sie mutan Samaria, a el lulalfongi la Jisus el sie met palu. Tusruktu oasr kutu luma su aktukulkulyel. Meyen alu lal Jisus el siena liki alu lal. Ke el akuteye ma inge, Jisus el fwakak ke kas pusisel nu sel a fwak: “Komwos alu nu ke ma komwos tia etu.” (Jon 4:19-22) Ke ma inge, Jisus el eis etauk sumwos la tia met nukewa su lulalfongi oasr etauk paye lalos ke God.

Ya kas lun Jisus ku in kalmekin la wangin sie met ku in eis etauk paye ke God? Mo. Meyen Jisus el sifwilpa akkalemye nu sin mutan se inge: “Met alu paye elos fwa alu nu sin Papa in ngun a paye, tu Papa el sokolos su ouinge tu elos in met alu nu sel.” (Jon 4:23) Ya kom sie inmasrlolos su alu nu sin God “in ngun a paye”?

Pa inge ma yok sripe nu sum in akpayeye ke me top lom nu ke kusensiyuk inge. Efu ku ma inge arlana yok sripe? Jisus el akkalemye ke me enenu nu ke etauk paye ke el pre: “Pa inge moul ma patpat, tu elos fwa ete kom God paye mukefwanna, a Jisus Kraist su kom supalma.” (Jon 17:3) Paye, la fwinsrak lun moul lom nu ke pal fwasru el kupasr nu ke etauk paye lom ke God!

Ya paye la etauk paye ke God ku in eteyuk? Aok, ku in eteyuk! Fwin paye, fuka kom ku in koneak? Jisus el fwakak ma inge kel sifwana: “Nga inkanek a paye a moul. Wangin met tuku nu yurin Papa fwin tia ke Nga.” (Jon 14:6) El sifwilpa akkalemye: “Su Papa, sayen Wen, a el su Wen el lungsel in fwakulak nu sel.”​—Luk 10:22.

Inkanek sumwos su oana key nu ke etauk paye ke God ku in koneyukyak ke me luti puspus lun Jisus Kraist, su Wen nutin God. In akpayeye, Jisus el mwulela nu sesr: “Komwos fwin mutana in kas luk, na komwos met tumuk lutlut paye. A komwos fwa etu ma paye, a ma paye fwa aksukosokye komwos.”​—Jon 8:31, 32, The Holy Bible—​New International Version.

Ke ma inge, Jisus el fwa topuk fuka kusensiyuk limekosr su siyukyuk tari a?

[Picture on page 4]

Ya kom alu nu sin sie God su kom tia etu na paye?