Ya God el Met Na Paye Se?
Me top lun met puspus nu ka:
▪ “El oasr yen nukewa, in ma nukewa. El oana engu.”
▪ “El sie su lalmetmetlana, a kulana liki ma nukewa.”
Mea Jisus el fwak?
▪ “In loom sin Papa tumuk oasr nien muta puspus.” (Jon 14:2) Jisus el fwakak la oasr sie loom sin God in kas pupulyuk, ku imwen muta lal.
▪ “Nga tuku yurin Papa me a tuku nu fwalu. Nga sifwil fwasr liki fwalu a som nu yurin Papa.” (Jon 16:28) Jisus el lulalfongi la God el oapana sie Met su enenu in oasr sie an in muta sel.
JISUS el tia lungse in luma la God nu ke kutena kain in ku su wangin sripe. Ke luma su tia oana sie, el sramsram nu sin God a pre nu sel. Pal nukewa el pangon Jeova Papa tumal su in kosrao, in akkalemye sie inkanek fototo a paye lal nu sin God.—Jon 8:19, 38, 54.
Paye la “wanginu met nu liyel God kutena pal” a “God el ngun.” (Jon 1:18; 4:24) Tusruktu tia kalme pa wangin oiyen lumal nu ke lumeyen sie met. Meyen Baibel el akkalemye nu sesr: “Fwin oasr mano in luman met, ouyepa oasr mano in luman ngun.” (1 Korint 15:44) Ke ma inge ya oasr sie mano in ngun lun Jeova?
Aok. Meyen ke Jisus el akmoulyeyukyak, el “ilyak . . . nu in kosrao sifwana, tu inge el fwa sikyak ye mutun God kesr.” (Hibru 9:24) Ma inge luti nu sesr la oasr ma yok sripe luo ke God. Ma se meet, pa oasr an in muta lal. Ma se akluo, pa el oana Met se a tia oana kain in ku su wangin kalmeye in forfor yen nukewa.
Ke ma inge, fuka akwuk lun God fwa sang me kasru in oasr yen nukewa? God el ku in orekmakin ngun mutal lal, el ku pa in orekmakin ku sakuruk lal nu yen nukewa wekunang an in kosrao. In oapana sie papa su asroela pao nu sin tulik natu in kolol a sang kasru nu sel, ouinge God el orekmakin ngun mutal lal in akpayeye akwuk lal.—Sam 104:30; 139:7.
Ke sripen oasr yurin God moul, pulakin a nunak, paenang oasr pa ma el lungse a ma el srunga. Baibel el fwakak nu sesr la el lungse a pakoten nu sin met lal, insemwomwokin orekma lal, el srunga akwuk lun ma srolela, a el pulakin keok yok ke ma koluk puspus. (Genesis 6:6; Duteronomi 16:22; 1 Togusra 10:9; Sam 104:31) Ke 1 Timote 1:11, el fwakak ke “God su insemwomwo.” Paenang tia me lut ke Jisus el fwakak la kut ku in eis me insemwomwo sin God ke insiyesr kewa!—Mark 12:30.a
[Footnote]
a In eis kutu pa me lutlut yok ke sifwe se inge, srike liye sapta 1 ke buk inge Mea Baibel el Luti Na Paye? ke kas English. Orekla sin Met Lo lun Jeova.
[Blurb on page 5]
In oana sie papa su asroelik pao, ouinge God el orekmakin ngun mutal ku ku lal in fwasrelik nu yen nukewa in akpayeye akwuk nukewa lal