Met Kristian Nu Kemwa Elos Alu In Ngun A Paye
“God el ngun, a elos su alu nu sel fwa alu in ngun a paye.”—JON 4:24.
1. Kain in akmwuk in alu fuka akinsemwomwoye God?
MWEN siefwunnu isusla nutin Jeova, Jisus Kraist, el akkalemye na paye kain in alu su akinsemwomwoye Papa tumal in kosrao. Ke pal se el sang ma lo mwomwo nu sin mutan Samaria se ke sie luf in kof futoto nu ke siti lun Sychar, Jisus el fwak: “Komwos alu nu ke ma komwos tia etu; kut alu nu ke ma kut etu, tu lango ma sin met Ju me. A aur se e fwa tuku, a summu inge, ke met alu paye elos fwa alu nu sin Papa in ngun a paye, tu Papa el sukolos su ou inge tu elos in met alu nu sel. God el ngun, a elos su alu nu sel fwa alu in ngun a paye.” (Jon 4:22-24) Mea kas lal inge lungse in akkalemye nu sesr?
2. Alu lun met Samaria oakiyuki nu ke mea?
2 Met Samaria elos tafongla ke nunuk lalos ke alu. Elos lalalfongi mukena buk limekosr lun Baibel—a buk limekosr inge, fwal nu ke leng lalos, elos pangpang Samaritan Pentateuch. Etauk lun met Samaria ke God arulanu srik, tusruktu, nu sin met Ju, etukyung nu selos etauk ke Kas lun God. (Rom 3:1, 2) Oasr pal mwo lun met Ju nu kemwa a kutupa met oaru in eis me insemwomwo lun Jeova. Tusruktu, mea ma inge su elos nu kemwa enenu in oru?
3. Mea eneneyuk ke alu nu sin God in “ngun a paye”?
3 In akinsemwomwoye Jeova, mea met Ju nu kemwa, met Samaria, a kutupa met su moul in pal meeta elos enenu in oru? Elos nu kemwa enenu in alu nu Sel in “ngun a paye.” Kut enenu pa in oru ou inge. Fwinne orekma in kulansap lasr nu sin God arulanu mwo, ku kut oru ke moniyuk, a mokleyuk ke sie inse su sesesla ke lungse a lalalfongi, tusruktu, in alu nu sin God in ngun enenu in oasr yurosr ngun mutal lal a kut lela ma inge in kol kut. Ke inkanek in lutlut a orekmakinyen Kas lun God, ngunasr, ku sulela lasr, enenu in fwal nu ke ma lungse lun God. (1 Korint 2:8-12) Kut fwin lungse alu lasr in akinsemwomwoye Jeova, kut enenu in oru ou inge in paye. Ma inge enenu in fwal nu ke Kas lun God, Baibel, ke ma akkalemyeyuk kel a ke akmwuk lal.
Ma Paye Ku In Konoiyukyuk
4. Mea nunuk lun kutu met ke ma paye?
4 Kutu sin tulik lutlut ke philosophy elos akkapye kain in nunuk su akkalemye la wangin ku lun met in etu ma paye. Aok, sie Swedish author pangpang Alf Ahlberg el simusla: “Oasr kain in kusensiyuk puspis ke inkanek lun philosophical su wangin top na paye ka.” Kutu met elos fwakla oasr saflaiyen ku lun ma paye, ya fwal nu sin met in lalalfongi ou inge? Mo, Jisus Kraist el fwak.
5. Efu Jisus el tuku nu fwalu?
5 Lela kut in nunku la kut liye na paye ma sikyuk inge meet: Yiu 33 C.E. pa inge, a Jisus el tu ye mutun Governor Pontius Pailat lun an Rom. Jisus el fwak nu sel Pailat: “Ke ma inge Nga tuku nu fwalu, tu Nga fwa orek ma lo nu ke ma paye.” Pailat el siyuk: “Mea ma paye?” Aok, el tia nunku ke topuk lun Jisus.—Jon 18:36-38.
6. (a) Fuka aketeye ke “ma paye”? (b) Kain in kunokon fuka Jisus el sang nu sin met Tuma lutlut lal?
6 “Ma paye” akkalemyeyuk oanu sie “un ma paye, ma puspis su sikyuk na paye, a me akpayeye puspis.” (Webster’s Ninth New Collegiate Dictionary) Tusruktu, ya Jisus el sang ma lo nu ke ma paye nu kemwa? Mo. El nunku na ke ma paye siefwunnu. El sapkin nu sin met tuma lutlut lal in sulkakin ma paye se inge, meyen el fwak nu selos: “Oru met in mutanfwal nu kemwa tu elos in met Tumuk lutlut, baptaiselosla in En Papa, a Mwen, a ngun mutal, luti nu selos in liaung ma nu kemwa Nga sapkin nu sumwos.” (Mattu 28:19, 20) Meet liki “saflaiyen akmwuk inge,” met tuma lutlut paye lun Jisus elos enenu in sulkakin “ma paye lun mwosasu” fwin fwalu nu fon. (Galetia 2:14) Elos enenu in oru ou inge in akpayeye kas lun Jisus: “A mwosasu inge lun togusrai fwa sulkakinelik fwin fwalu nu fon tu in ma lo nu sin mutanfwal nu kemwa; a na safla e fwa tuku.” (Mattu 24:14) Ke ma inge kut enenu in akilenyelos nu kemwa su luti ma paye nu ke mutanfwal nu kemwa ke elos fwakak peng mwo lun Togusrai.
Fuka Kut Ku In Lutlut Ma Paye
7. Fuka kom ku in sang me akpayeye la Jeova pa Sropon Ma Paye?
7 Jeova el Sropon ma paye in ngun. Aok, met on Devid el pangpang Jeova “God lun ma paye.” (Sam 31:5; 43:3) Jisus el akilen la kas lun Papa tumal ma paye a el ouyepa fwak: “Met palu elos simusla, ‘A Jeova el fwa luti nu selos nu kemwa.’ Elos nu kemwa su long sin Papa, a lutlutkin, elos fwasru nu yuruk.” (Jon 6:45; 17:17; Isaia 54:13) Ke ma inge, arulanu kalem, elos nu kemwa su suk ma paye elos enenu in lutiyuk sin Jeova, su Met Luti Lulap. (Isaia 30:20, 21) Met nu kemwa su suk ma paye elos enenu in eis “etauk lun God.” (Soakas 2:5) A Jeova el arulanu kulang in luti ma paye ke inkanek puspis.
8. Ke inkanek puspis fuka God el sang ma paye lal?
8 Ke sie me pupulyuk, el orekmakin lipufon ke pal se ma el sang Ma Sap nu sin met Israel. (Galetia 3:19) Ke inkanek lun menmen, el mwolela ke sie me insemwomwo nu sin met patriarch inge Ebream a Jekob. (Genesis 15:12-16; 28:10-19) God el sramsram in kosrao me, ke pal in baptais lun Jisus, a kas mwomwo inge lal longyuk meet fwin fwalu fwakak: “El inge Mwen kulu nutik, su Nga insemwomwo kel.” (Mattu 3:17) Kut ku in sang kulo pa meyen God el sang ma paye ke pal se el orekmakin ngun mutal lal in kasru met sim nu kemwa lun Baibel. (2 Timote 3:16, 17) Ke ma inge, ke inkanek lun lutlut lasr ke Kas lun God, kut ku in “lalalfongi ke ma paye.”—2 Tessalonika 2:13.
Ma Paye a Mwen Nutin God
9. Fuka God el orekmakin Mwen nutul in akkalemye ma paye?
9 Ke sie inkanek yok, God el orekmakin Mwen nutul, Jisus Kraist, in akkalemye ma paye nu sin met nu kemwa. (Hibru 1:1-3) Aok, Jisus el sramsram ke ma paye yok liki kutena met. (Jon 7:46) Fwinne tokin somwak lal nu in kosrao, el akkalemye ma paye su tuku sin Papa tumal. Ke sie me pupulyuk, met sap Jon el eis “Fwakyuk lun Jisus Kraist, su God el sang nu sel, tu lan fwakak nu sin met kulansap lal, aok ma su a fwa sa in tuku.”—Fwakyuk 1:1-3.
10, 11. (a) Ma paye su Jisus el luti el kapsreni nu ke mea? (b) Mea Jisus el oru in akkalemye ma paye?
10 Jisus el fwak nu sel Pontius Pailat la El tuku nu fwalu in sang ma lo nu ke ma paye. Ke lusen pal in orekma lun forfor lal, Jisus el akkalemye la ma paye inge kapsreni nu ke sumwos lun Jeova in kol ke inkanek lun Togusrai lun God ye koko lun Kraist oanu sie Togusra. Tusruktu, Jisus el tia sang ma lo mukena ke ma paye ke inkanek in fwakak a luti. Aok el akkalemye na paye ma paye ke moul lal ke pal se el akpayeye ma inge. Ke ma inge, met sap Poul el simusla: “Nik komwos lela kutena met in nununke komwos ke me mongo, ku ke me nim, ku ke len in kofwo, ku ke malem sasu, ku ke len Sabat; su ngunin ma su e fwa tuku, a mano sa Kraist.”—Kolosse 2:16, 17.
11 Sie inkanek in akkalemye la ma paye se inge el sikyuk na paye pa ke kas palu ke isusla lun Jisus in an Bethlehem. (Maika 5:2; Luk 2:4-11) Ma paye se inge el sikyuk na paye pa ke pal se kas palu lun Daniel ke tuku lun Messaia ke saflaiyen ‘wik 69 lun yiu’ akpayeyuk. Ma inge sikyuk ke pal se el akkalemyel sifwanu nu sin God ke pal in baptais lal a ngun mutal putati nu fwel in moswella, fwal nu ke pal su pakiyuki, in yiu 29 C.E. (Daniel 9:25; Luk 3:1, 21, 22) Ma paye se inge akkalemyeyuk pa ke inkanek lun orekma lun forfor lun Jisus su arulanu mwo oanu met sulkakin Togusrai. (Isaia 9:1, 2, 6, 7; 61:1, 2; Mattu 4:13-17; Luk 4:18-21) Ma paye se inge akkalemyeyuk pa ke mise lal a sifwil moulyuk.—Sam 16:8-11; Isaia 53:5, 8, 11, 12; Mattu 20:28; Jon 1:29; Orekma 2:25-31.
12. Efu Jisus el ku in fwak, ‘Nga paye’?
12 Ke sripen ma paye se inge el sramsram yok ke Jisus Kraist, paeanang el ku in fwak kas inge: “Nga inkanek, a paye, a moul. wangin met tuku nu yurin Papa fwin tia ke Nga.” (John 14:6) Met nu kemwa aksukosokyeyuk in ngun ke pal se elos “muta in ma paye” a eis kunokon lun Jisus ke akmwuk lun God. (Jon 8:32-36; 18:37) Meyen met nu kemwa su luman sip elos eis ma paye a fwasr tokin Kraist in lalalfongi, paenang elos fwa eis moul ma patpat.—Jon 10:24-28.
13. Kut akola in tuni ma paye in Ma Simusla ke inkanek tulo fuka?
13 Ma paye su Jisus a met tuma lutlut lal su eis kasre sin God elos sulkakin pa akmwuk ke lalalfongi paye nu sin met Kristian. Ke ma inge, elos nu kemwa su “akos ma lalalfongi” elos “fwafwasyesr in ma paye.” (Orekma 6:7; 3 Jon 3, 4, NW.) Ke ma inge, su fwafwasyesr in ma paye ke pal inge? Su luti mutanfwal nu kemwa ke ma paye? In sang topuk ke kusensiyuk inge, kut fwa tuni moul lun met Kristian in pal meeta a kut fwa liye ma paye puspis su tuku ke Ma Simusla su sramsramkin (1) Lalalfongi puspis, (2) akmwuk lalos ke alu, a (3) oiye lalos.
Ma Paye a Lalalfongi Puspis
14, 15. Mea kom ku in fwak ke oiye lun met Kristian in pal meeta a ke oiye lun Met Lo lun Jeova ke Ma Simusla?
14 Kas lun Jeova su simusyukla arulanu akfulatyeyuk sin met Kristian in pal meeta. (Jon 17:17) Pa inge akmwuk lun lalalfongi a orekma lalos. Clement lun an Alexandria in century akluo a aktulo el fwak: “Elos inge su kaifweung in suk ma mwo emeet, elos tia tui ke kaifweung lalos nu ke na elos koneak la ma elos lalalfongi na paye tuku ke Ma Simusla.”
15 Oanu met Kristian in pal meeta, Met Lo lun Jeova elos arulanu akfulatye Baibel. Elos lalalfongi la “Baibel nu kemwa etuku ke ngun lun God a oasr sripe in luti.” (2 Timote 3:16) Ke ma inge lela kut in tuni kutu lalalfongi lun met Kristian in pal meeta a in pal se na kut akola pa in tuni ma met kulansap lun Jeova elos lotela tari ke sripen elos orekmakin Baibel oanu buk saok emeet ke moul lalos.
Ma Paye ke Ngunmoul
16. Mea ma paye ke ngunmoul?
16 Meyen elos lalalfongi ke ma Baibel el fwak, paenang met Kristian ke century se meet elos luti ma paye ke ngunmoul. Elos etu la “met nu kemwa elos ekla sie ngunmoul” ke pal se ma God el orelosla. (Genesis 2:7) Sayen ma inge, elos akilen la ngunmoul el ku in mise. (Ezekiel 18:4; Jemes 5:20) Elos ouyepa etu la ‘met mise tia etu kutena ma.’—Ekklisiastis 9:5, 10.
17. Fuka kom ku in aketeye fwinsrak lun met mise?
17 Aok, met tuma lutlut lun Jisus in pal meeta elos lalalfongi na paye la met mise nu kemwa su God el esam elos fwa sifwil moulyuk, ku moul. Kain in lalalfongi inge akkalemyeyuk na paye sel Poul, ke pal se ma el fwak: “A oasr fwinsrak luk in God, ma elos inge ouyepa sifwanu tawi, tu a fwa oasr sifwil moulyuk nu sin met sumwos a met sesumwos.” (Orekma 24:15) Fwinne ke sie pal toko, met Kristian inge Minucius Felix el simusla: “Su met lalfon ku met nukin su ku in fwak la God el tia ku in sifwil orala met sasu, su el lumala ke mutamwauk me?” Oanu met Kristian in pal meeta, Met Lo lun Jeova elos lalalfongi ke me luti paye lun Baibel ke ngunmoul, mise, a sifwil moulyuk. Lela kut in loang akmwoye ingenu kel Jeova a Kraist.
Ma Paye a Trinity
18, 19. Efu kut ku in fwak la luti lun Trinity tia me luti lun Ma Simusla?
18 Met Kristian in pal meeta elos tia nunku ke God, Kraist, a ngun mutal oanu sie Trinity. The Encyclopædia Britannica el fwak: “Kas se inge Trinity ku me luti ka tia ku in liyeyuk na paye ke Testament Sasu, ku Jisus a met tuma lutlut lal elos srike in lain Shema [sie kain in pre ke kas Hibru] in Testament Matu: ‘Long, O Israel: Jeova God lasr el Jeova siefwunnu’ (Dut. 6:4). Met Kristian nu kemwa elos tia alu ke God tulo in ma siefwunnu lun met Rom ku kutena god. Elos insese ke kas lun Jisus su akkalemye la inkanek in alu nu kemwa enenu in orek nu sin Jeova mukefwunnu. (Mattu 4:10) Sayen ma inge, elos lalalfongi ke kas lun Jisus inge: “Papa el yok liki Yu.” (Jon 14:28) Met Lo lun Jeova elos nunku pa ou inge ke pal lasr.
19 Met tuma lutlut lun Jisus in pal meeta elos akkalemye na paye ma tia oanu sie inmaslon God, Kraist, a ngun mutal. Aok elos baptais met tuma lutlut sasu in (1) en Papa, (2) Mwen, a (3) ngun mutal, a tia ke en Trinity. Met Lo lun Jeova elos luti pa ma paye se inge su tuku ke Baibel a ke ma inge elos lalalfongi la God, Mwen, a ngun mutal, elos tia oanu sie.—Mattu 28:19.
Ma Paye A Baptais
20. Kain in etauk fuka eneneyuk sin met nu kemwa su akola in eis baptais?
20 Jisus el sapkin nu sin met tuma lutlut lal in oru met tuma lutlut ke elos luti ma paye nu selos. In fwal nu ke baptais, elos enenu in eis etauk ke Ma Simusla. Ke sie me pupulyuk, elos enenu in akilen mwal fulat lun Papa a mwal lun Mwen nutul, Jisus Kraist. (Jon 3:16) Met nu kemwa su lungse in eis Baptais elos enenu pa in akilen la ngun mutal el tia met se, a el ku lun God.—Genesis 1:2, footnote.
21, 22. Efu kom ku in fwak la Baptais el fwal mukena nu sin met lalalfongi?
21 Met Kristian in pal meeta elos orek baptais mukena nu sin met su ku in oru sulela lalos sifwanu a auliyuk a ku in mwolela moul lalos nu sin God a oru ma lungse lal. Met Ju a met proselytes nu kemwa su toeni fwin an Jerusalem in Pentecost 33 C.E. oasr tari etauk lalos ke Ma Simusla lun Hibru. Tokin elos long sramsram lal Piter kel Jisus su Messaia, apkurun nu ke 3,000 met “eis kas lal ke insielos kemwa” a “baptaisla.”—Orekma 2:41; 3:19–4:4; 10:34-38.
22 Baptais lun met Kristian fwal nu sin met lalalfongi mukena. Met fwin an Samaria elos eis ma paye, a “ke elos lalalfongel Filip ke el fwakak kas mwo ke togusrai lun God a ke en Jisus Kraist, elos baptaisla, met mokul a mutan.” (Orekma 8:12) Oanu sie met proselyte moniyuk su oasr tari etauk kel Jeova, met Ethiopia eunuch se el eis meet aketeye lal Filip ke akpayeye lun kas palu lun Messaia, tia pat toko el baptaisla. (Orekma 8:34-36) Tok, Piter el fwak nu sel Kornelius a kutupa met Pegan la “el su sangeng Sel [God] a oru ma sumwosmwos, el akinsemwomwoyel” a met nu kemwa su filiye lalalfongi nu sin Jisus Kraist elos eis nunuk munas ke ma koluk lalos. (Orekma 10:35, 43; 11:18) Ma inge nu kemwa kapsreni ma Jisus el sapkin nu selos in oru in ‘oru met tuma lutlut, luti nu selos ma nu kemwa el sapkin nu selos.’ (Mattu 28:19, 20; Orekma 1:8) Met Lo lun Jeova elos srukye na akmwuk senpanu inge, elos baptais mukena met su oasr etauk lalos ke Ma Simusla a ku in mwolela moul lalos nu sin God.
23, 24. Mea akmwuk sumwos ke baptais lun met Kristian?
23 Tilli in kof pa baptais sumwos nu sin met lalalfongi nu kemwa. Tokin baptais lun Jisus ke Infwal Jordan, “el utyuk liki in kofu.” (Mark 1:10) Met Ethiopia eunuch se el baptaisla in “sie nien kof.” El a Filip eltal “oatui nu in kofu” a tok elos “utyuk liki kofu”. (Orekma 8:36-40) Meyen Ma Simusla el kapsreni baptais nu ke pakpuki lun met mise oanu sie me akul paenang baptais mukena ke inkanek in tilli in kof fwa fwal.—Rom 6:4-6; Kolosse 2:12.
24 The Oxford Companion to the Bible el fwak: “Aketeye puspis ke baptais ke Testament Sasu akkalemye la met nu kemwa su eis baptais enenu in tilli in kof.” Fwal nu ke orekma lun French Larousse du XXe Siècle (Paris, 1928), “met Kristian in pal meeta elos eis baptais lalos ke inkanek in tilli in kof in an nu kemwa su oasr kof we.” A buk inge After Jesus—The Triumph of Christianity el fwak: “Ke sie akmwuk su arulanu pengpeng, [baptais] el siyuk sin met su akola in eis ma inge in akkalemye lalalfongi lal, tokin ma inge el ku in eis baptais ke inkanek in tilli in kof in en Jisus.”
25. Mea kut akola in sramsramkin ke me lutlut toko?
25 Me lutlut puspis inge ke lalalfongi a orekma lun met Kristian in pal meeta su tuku ke Baibel pa me srikasrak na. Oasr pa kutu ma oanu sie ke lalalfongi lalalos a lalalfongi lun Met Lo lun Jeova ke pal inge. Ke me lutlut toko, kut fwa sramsramkin kutupa inkanek in akilenyelos nu kemwa su luti metu ke ma paye.
Fuka Kom Ku In Topuk?
• Kain in akmwuk in alu fuka God el siyuk?
• Fuka ma paye akkalemyeyuk na paye ke inkanek lun Jisus Kraist?
• Mea ma paye ke ngunmoul a mise?
• Fuka baptais lun met Kristian orekla, a mea eneneyuk nu sin met nu kemwa su akola in eis baptais?
[Picture on page 11]
Jisus el fwak nu sel Pailat: ‘Nga tuku in orek ma lo nu ke ma paye’
[Picture on page 12]
Ya kom ku in aketeye efu Jisus el fwak: ‘Nga paye’?
[Picture on page 13]
Mea ma paye ke baptais lun met Kristian?