Kain in Ma Puspus Fuka Kom Enenu in Fuleak tu Kom in Eis Moul Ma Patpat?
“Mea sie met fwa sang in aolla ngunal?”—MATTU 16:26.
1. Efu ku Jisus el aksumwosyel Piter ke ma el fwak?
MET sap Piter el arulanu lut ke ma el long. Leum lal, Jisus Kraist, su el lungse yok, el fwak “ke inkanek pulaik” la tia pat El fwa sun me keok a mise! Piter el topuk a sang kas in kai nu sel Jisus, a el fwak: “Lela in loesla liki kom, Leum; ma inge fwa tiana sikyuk sum.” Jisus el tapulla nu sel Piter a nu sin met tuma lutlut puspus saye. Saap met tumal lutlut saye inge elos nunku pa oinge. El fwak nu sel Piter: “Fwala nu tukuk, Setan! Kom sie me tukulkul nu sik, tu kom tia nunku ke ma lun God, a ke ma lun metu.”—Mark 8:32, 33; Mattu 16:21-23.
2. Jisus el akuteye fuka ma eneneyuk nu sin sie met tuma lutlut paye?
2 Kas lal Jisus tok inge ku in kasrel Piter in kalem ke me top upa lun Jisus ke ma el fwak. “Jisus el pangon mu un met puspus wi met tumal lutlut” a fwak: “Kutena met fwin lungse tuku fwasr tukuk, lela lan sifwana lafwekunul, a srukak sak soko lal, a fwasr tukuk. Tu el su lungse molela moul lal a fwa tula lukel; a el su moul lal tula lukel keik a ke mwosasu fwa molela moul lal.” (Mark 8:34, 35) Kalem la, in pal san Jisus el apkurun in kisekin moul lal a el etu pa la met nukewa su fwa fwasr tokol elos enenu in akola in kisekin moul lalos nu ke orekma in kulansap nu sin God. Fwin elos oru ma inge, elos fwa eis me insemwomwo yok.—Ridi Mattu 16:27.
3. (a) Kusensiyuk puspus fuka Jisus el siyuk sin met nukewa su longol? (b) Kusensiyuk akluo lal Jisus el akesmakinye met longol ke mea?
3 In pal sepana inge, Jisus el siyuk kusensiyuk yok sripe luo inge: “Tu ma mwo su nu sin sie met, el fwin eis fwalu nufon tu in ma lal, a moul tula lukel?” a, “Mea sie met el fwa sang in aolla moul lal?” (Mark 8:36, 37) Me top nu ke kusensiyuk se meet inge el arulanu kalem nu sin metu. Wangin kutena me insemwomwo nu sin sie met fwin el eis fwalu nufon tusruktu tula moul lal. Ma soak nukewa ku in kasru sie met fwin el srakna moul a el ku in engankin in orekmakin ma inge nukewa. Ke kusensiyuk akluo su Jisus Kraist el siyuk: “Mea sie met el fwa sang in aolla moul lal?” el akesmakinye met nukewa su longol ke kas kikiap lal Setan in len lal Job: “Ma nukewa yurin sie met el fwa sang ke moul lal.” (Job 2:4) Nu sin kutu met su tia alu a kulansap nu sin Jeova, saap kas lal Setan el paye nu selos. Oasr met puspus su fwa oru ma nukewa, kunausla kutena akwuk ke oiyen moul nasnas, tu elos in ku in moul. Tusruktu, met Kristian paye elos tia akkalemye kain in nunak inge.
4. Efu ku kusensiyuk lal Jisus oasr kalme yok ka nu sin met Kristian nukewa?
4 Kut etu la Jisus el tuku nu fwalu tia in ase nu sesr mano fukoko, me kasrup, a sie moul loeloes ke fwalu se inge. El tuku in sang pal mwomwo nu sin metu in eis moul ma patpat ke akwuk sasu, a fwinsrak ke moul ma patpat inge pa kut aksaokye na paye. (Jon 3:16) Sie met Kristian el ku in kalem ka kusensiyuk se meet lal Jisus ke kalmen ma inge pa, “Tu ma mwo su nu sin sie met, el fwin eis fwalu nufon tu in ma lal a tula fwinsrak lal nu ke moul ma patpat?” Me top nu ka pa, Paye wangin na paye sripe. (1 Jon 2:15-17) In kasre kut in sang me top nu ke kusensiyuk akluo lal Jisus, kut ku in siyuk sesr sifwana, ‘Ya Nga lafwekin a kisekin ma puspus ke pal inge in oru fwinsrak luk nu ke moul ma patpat in arulanu paye ke akwuk sasu?’ Me top lasr nu ke kusensiyuk inge, in oana ke ma liyeyuk ke inkanek in moul lasr, el akkalemye fwin fwinsrak inge in paye ke insiesr.—Srike liye Jon 12:25.
5. Kut ku in eis fuka me sang nu ke moul ma patpat?
5 Aok, Jisus el tia fwak la moul ma patpat el ku in tuku nu sin met ke sripen el oru orekma in kulansap nu sin God. Moul lasr fwinne ke lusen pal fototo ke pal inge el sie me sang nu sesr. Kut tia ku in moli ma inge ku oru kutena ma tu kut in ku in eis ma inge. Inkanek sefwanna su kut ku in eis me sang ke moul ma patpat inge pa in “filiye lulalfongi lasr nu sin Jisus Kraist” a nu sin Jeova, su “met sang moul nu selos su sokol.” (Galetia 2:16; Hibru 11:6) Ne oinge, lulalfongi el enenu in akkalemyeyuk ke orekma, meyen “lulalfongi fwin saye liki orekma, mise.” (Jemes 2:26) Ke ma inge, kut fwin nunku yok ke kusensiyuk lal Jisus inge, kut enenu in nunku yok ke ma puspus su kut ku in fuleak ku eis kutla ke akwuk puspus lun fwalu inge. A kut nunku yok pa ke ma kut lungse na paye in oru ke orekma in kulansap nu sin Jeova in akkalemye la lulalfongi lasr paye, a moul.
“Kraist el Tia Akinsemwomwoyel Sifwana”
6. Mea ma yok sripe emeet nu sin Jisus?
6 Jisus el nunku yok ke ma yok sripe nukewa a el pulesru kutena me srufwe in eisla ma mwomwo nukewa lun moul a el pulesru me srufwe in eis ma mwomwo puspus in akinsemwomwoyel sifwana. Ke inkanek in moul lal arulanu kalem la el kisekunla ma puspus a el akos God pal nukewa. A el tia akinsemwomwoyel sifwana, paenang el ku in fwak: “Nga oru pal e nu kemwa ma in akinsemwomwoyel [God].” (Jon 8:29) Ma puspus fuka Jisus el lungse na paye in oru in akinsemwomwoye God?
7, 8. (a) Fuka Jisus el lafwekunul sifwana, a fuka el akinsemwomwoyeyuk? (b) Kusensiyuk fuka kut enenu in siyuk sesr sifwana?
7 Oasr sie pal, Jisus el fwak nu sin met tuma lutlut nukewa lal: “Oana Mwen nutin met el tia tuku tu met in kulansap nu sel, a tu lan kulansap nu selos, a sang moul lal in moli met puspus.” (Mattu 20:28) Meet liki pal se inge, ke pal se Jisus el sang kas in sensen nu sin met tuma lutlut puspus lal la tia pat el enenu in “sang moul lal,” Piter el sang kas in kai nu sel elan kulang nu sel sifwana. Tusruktu, Jisus el tu na ku, tia longol. El inse mulala in sang moul sumwosmwos lal, ke metu. Ke sripen el lungse in oru ma inge, Jisus el akinsemwomwoyeyuk yok. El akmoulyeyukyak a “akfulatyeyuk nu ke lepo leyut sin God.” (Orekma 2:32, 33) Ke ma inge el akkalemye me srikasrak na mwomwo nu sesr.
8 Met sap Poul el sang kas in kai nu sin met Kristian nukewa in an Rom elos in “tia akinsemwomwoyelos sifwana” a akesmakinyelos la “Kraist el oayepa tia in akinsemwomwoyel sifwana.” (Rom 15:1-3) Ke ma inge, ke oiya fuka kut fwa ku in orekmakin yok kas in kai lun met sap inge a mea kut ku in kisekinkutla in etawi Kraist?
Jeova el Lungse Kut in Sang Ma Mwo Emeet Lasr
9. Mea sie met Kristian el oru ke pal se el mwulela moul lal nu sin God?
9 In an Israel in pal meeta, Masap lal Moses el akkalemye la met Hibru nukewa su met kos enenu in aksukosokyeyukla ke yea ak itkosr ke orekma in kulansap. Tusruktu, sayen ma inge oasr kutupa inkanek ku in orek. Fwin sie met kos ku kulansap el lungse in muta yurin leum lal, el ku in oru sulela in tia som liki leum lal a oru kulansap lal nu sel ke lusen moul lal nufon. (Ridi Duteronomi 15:12, 16, 17.) Kut oru pa sulela oinge ke pal se kut mwulela moul lasr nu sin God. Kut inse mulala in oru ma lungse lun God, a tia oru ma lungse lasr sifwana. In oru oinge, kut akkalemye lungse yok lasr nu sin Jeova a kena lasr in kulansapul ma patpat.
10. Ke inkanek fuka kut ma lun Jeova, a fuka oiya se inge el ku in kasru nunak a orekma lasr?
10 Kom fwin lutlutkin Baibel yurin Met Lo lun Jeova ke pal inge, wi sulkakin peng mwo, a wi ke meeting nukewa lun congregation, kut lungse a engan in kaksakin kom. Kut fwinsrakkin la kom fwa mwulela moul lom nu sin Jeova a siyuk kusensiyuk su met Itiopia sa el siyuk sel Filip: “Mea ikolyuwi in baptaisla?” (Orekma 8:35, 36) Ke ma inge fototo lom sifwana nu sin God fwa oana fototo lun met Kristian nu sin God su Poul el simusla kas inge nu se: “Komwos tia ma lomwos sifwana, tu komwos moliyukla tari ke sie me mol.” (1 Korint 6:19, 20) Kut fwin mwulela tari moul lasr nu sin Jeova, el pa Leum lasr, fwinne fwinsrak lasr pa in moul in kosrao ku fwin fwalu. Ke ma inge, arulanu yok sripe, in tulokinye kena lasr in oru ma lungse lasr sifwana a kut in “tia met kos lun met”! (1 Korint 7:23) Sie kunokon na mwomwo nu sesr kut fwin orekmakinyuk sin Jeova oana met orekma oaru ke kutena kain in orekma su el lungse kut in oru!
11. Kain in me kise fuka met Kristian elos enenu in kisekin? A mea kalmen ma inge, in oana ke ma akkalemyeyuk ke me kise su orekmakinyuk ke Masap lal Moses?
11 Poul el kaifwe met Kristian nukewa: “Sang monumwos me kise moul, mutal, me akinsemwomwoye God, pa inge orekma fwal nu ke ngun lomwos.” (Rom 12:1) Kas inge ku in akesmakinye met Ju nukewa su ekla met Kristian ke me kise nukewa su kisekinyuk ke pal in alu lalos meet liki elos ekla oana met tuma lutlut lun Jisus. Elos lotela ke inkanek lun Masap lal Moses, la kosro nukewa su kisekinyuk fwin altar ku loang lun Jeova enenu in ma mwo emeet. Kutena kosro su tia mwo, mas a ul, su orekmakinyuk oana me kise el tia me akinsemwomwoye God. (Malakai 1:8, 13) Oiya se inge el paye pa ke kut sang manosr oana ‘sie me kise moul.’ Kut sang nu sin Jeova ma mwo emeet lasr, a kut mwulela moul lasr tia tokin kut oru ma lungse lasr sifwana. Ke pal se kut mwulela moul lasr nu sin God, kut inse mulala in sang nu sel “moul” lasr ke inse kewa lasr—wekunang ku lasr, ma saok lasr, a utuftuf lasr ke orekma. (Kolosse 3:23, NW) Fuka kut ku in orekmakin ma inge ke moul lasr?
Orekmakin Pal Lom Ke Inkanek Lalmetmet
12, 13. Mea sie inkanek su kut ku in sang ma mwomwo emeet lasr nu sin Jeova?
12 Sie inkanek in sang ma mwo emeet lasr nu sin Jeova pa in orekmakin pal lasr ke inkanek lalmetmet. (Ridi Efesus 5:15, 16.) Kut enenu in akkalemye oiyen sifwana leumi fwesr tu kut in orekmakin pal ke inkanek lalmetmet. Me sruf a me akkoluk lun fwalu wekunang oiyen sesumwos su kut usrui el oru kut in orekmakin pal lasr in akinsemwomwoye kut sifwana. Aok, “oasr pal ke ma nukewa,” wekunang pal in oru me akengan a in oru orekma in suk ma enenu lasr in kasre kut in akpayeye kunokon lasr oana met Kristian. (Ekklesiastis 3:1) Tusruktu, sie met Kristian su mwulela tari moul lal el enenu in orekmakin pal ke inkanek lalmetmet elan tia mwulkunla in oru ma yok sripe nukewa.
13 Ke pal se Poul el tuku nu in an Atens, el liye la “met Atens nukewa a metsa su mutawun we, elos tia orekmakin pal lalos in kutena ma, a in fwakak ku long kutena ma sasu.” (Orekma 17:21) Ke pal inge, oasr pa met puspus su sisla pal lalos nu ke kain in oiya oinge. Oasr me akkoluk puspus ke pal inge, wekunang orekma in liye television, sritelkin video games, ku in suk ma puspus ke internet. Pusiyen ma nukewa su ku in oru kut in kafofo a sisla pal lasr ka el yokyokelik. Kut fwin lela ma puspus inge in oru kut in kafofo, saap kut ku in mwulkunla orekma lasr in eis etauk kel Jeova. Saap kut fwa nunku mu kut arulanu kafofo in oru ma “yok sripe puspus” su kalmekin nu ke oiya puspus nu ke orekma in kulansap lasr nu sin Jeova.—Filippai 1:9, 10.
14. Kusensiyuk puspus fuka fwal kut in nunku yok ka?
14 Ke ma inge, in oana sie met kulansap lun Jeova su baptaisla tari, srike siyuk sum sifwana, ‘Ya oasr akwuk luk len nukewa in rid Baibel, in sifwilpa nunku ke me lutlut yok sripe puspus, a in pre?’ (Sam 77:12; 119:97; 1 Tessalonika 5:17) ‘Ya nga orekmakin pal in akola nu ke meeting nukewa? Ya nga sang me akkeye nu sin met puspus ke nga sang comment ke meeting?’ (Sam 122:1; Hibru 2:12) Kas lun God el akkalemye la Poul a Barnabas su welul elos “muta we patna a kaskas pulaik in Leum.” (Orekma 14:3) Ya kom ku in akfwalye akwuk ke moul lom tu kom in orekmakin pal yok in sulkakin peng mwo, a saap kom wi orekma lun pioneer?—Ridi Hibru 13:15.
15. Fuka met elder elos orekmakin pal lalos ke inkanek lalmetmet?
15 Ke pal se met sap Poul a Barnabas elos tuku nu in congregation su oasr fwin an Antiok, “eltal muta pat we yurin met tuma lutlut” in akkeyelos. (Orekma 14:28) Oapana ke pal inge met elder elos ku in orekmakin pal yok lalos in akkeye met lili puspus. In wekunang pa nu ke orekma lalos in sulkakin peng mwo, met elder elos orekma upa in akkeye u, suk ke sip su tula, in sang kasru nu sin met mas, a in akpayeye kunokon puspus saye lun congregation. Kom fwin sie brother su baptais tari, ya oasr pal mwomwo lom in sun ma eneneyuk nukewa tu kom in fwal nu ke kunokon mwomwo puspus?
16. Mea kutu inkanek su kut ku “in oru mwo . . . nu selos su sou lasr in lulalfongi”?
16 Oasr met lili puspus su insemwomwo in kasru ke orekma in sang me kasru nu sin met puspus su sun me keok ke sripen ongoiye puspus. Ke sie me pupulyuk, oasr sie sister su matwel oasr ke yea 60 su oru orekma in kulansap ke Bethel el wi u lun met kasru a som nu ke yen loeloes in sang me kasru nu sin met enenu. Efu ku el orekmakin pal in mongla lal ke inkanek inge? El fwak: “Fwinne Nga tia sumat in oru orekma puspus, tusruktu sie me insemwomwo yok in oru kutena kain in ma su eneneyuk. Nga eis me akkeye yok in liye lulalfongi fukoko lun met lili puspus wiyuk su ma saok puspus lalos tula.” Sayen ma inge, tausan puspus sin met lili wiyesr elos sang kasru in musai Kingdom Hall a Assembly Hall puspus. Kut fwin wi ke orekma inge, kut orekmakin pal lasr “in oru mwo . . . nu selos su sou lasr in lulalfongi.”—Galetia 6:10.
“Nga Wi Komwos Pal E Nukewa”
17. Mea kom fwa sang in aolla moul ma patpat?
17 U lun met nukewa su tia kulansap nu sin God elos apkurun na in wanginla. Kut tia etu na paye la ngea ma inge fwa sikyak. Ne oinge, kut etu la “pal fototo” a “ma sikyak ke fwalu el ekyek pal nukewa.” (Ridi 1 Korint 7:29-31.a) In etu la ke pal fototo lal el fwa akkalemye kalme yok nu ke kusensiyuk lun Jisus: “Mea sie met el fwa sang in aolla moul lal?” Paye la kut ku in lafwekin kutla sifwana a oru kutena ma Jeova el siyuk sesr tu kut in eis “moul paye” ka. (1 Timote 6:19) Aok, arulanu yok sripe kut in porongo kas in kaifwe lun Jisus in ‘fwasr tokol pal nukewa’ a ‘suk meet togusrai’ lun God.—Mattu 6:31-33; 24:13.
18. Kut ku in lulalfongi ke mea, a efu?
18 Paye la, orekma in fwasr tokin Jisus el tia fusrasr pal nukewa, a in oana ke kas in sensen lun Jisus, oasr met lili puspus su mise a anwuki ke pal inge. Tusruktu, in oana Jisus, kut tia lela kas inge ‘kom in kulang nu sum sifwana’ in kiapekutla. Oasr lulalfongi lasr nu ke kas in mwulela lal inge su el fwakak nu sin met tuma lutlut akmusrala nukewa lal in century se meet: “Nga wi komwos pal e nu kemwa, nu ke saflaiyen akwuk puspus lun fwalu.” (Mattu 28:20, NW) Ke ma inge, lela kut in orekmakin pal yok a ku nukewa lasr nu ke orekma in kulansap nu sin God. Kut fwin oru ma inge, kut akkalemye la kut lulalfongi la Jeova el fwa molikutla liki ongoiye lulap ku el fwa akmoulyekutyak nu ke akwuk sasu. (Hibru 6:10) Ke ma inge lela kut in akkalemye la kut aksaokye na paye me sang lun moul.
[Footnote]
a 1 Korint 7:31 (NW): “A elos su orekmakin fwalu, oanu elos su tia orekmakin ka, meyen ma sikyak ke fwalu el ekyek pal nukewa.”
Mea Me Top Lom?
• Fuka Jisus el akkalemye la el lungse na paye in kulansap nu sin God a nu sin metu?
• Efu ku sie met el lafwekunulla sifwana, a fuka ma inge ku in orek?
• In an Israel in pal meeta, kain in me kise fuka el me akinsemwomwoye nu sin Jeova mukena, a fuka ma inge ku in kasre kut ke pal inge?
• Ke inkanek puspus fuka kut ku in orekmakin pal lasr ke inkanek lalmetmet?
[Pictures on page 26]
Jisus el oru ma puspus su ku in akinsemwomwoye God
[Picture on page 28]
Met Israel puspus su oaru elos sang ma mwomwo emeet lalos in sang kasru alu paye
[Pictures on page 29]
Kut akinsemwomwoye God ke kut orekmakin pal lasr ke inkanek lalmetmet