Ya Kom Oru Me Srikasrak Mwo in Akkalemye Sunak?
“Ke sunakin, komwos in akfulatye sie sin sie.”—ROM 12:10.
1. Mea ma tia akkalemyeyuk ke an puspus lun fwalu?
KE KUTU an, oasr fasin we ke met fwusr elos enenu in epasrla a sikukmutunti fwin elos muta sisken met matou in akaklemye sunak nu selos. Ke inkanek oinge, elos fwa tia liyeyuk mu elos fulat liki met matou. In an inge, fwin sie tulik el forla a som liki met matou, orekma lal inge el nunkeyuk mu wangin akkalemyeyen sunak nu sin met matou. Fwinne sunak akkalemyeyuk ke inkanek puspus su tia oana sie, kain in oiya nukewa in akkalemye sunak el akesmakinye kut ke Masap lal Moses. In wekunang ma inge pa masap inge: “Kom fwa tuyuk ye mutun sif fiyaea, a sunakin mutun met matu.” (Livitikus 19:32) Sie me asor, meyen in an puspus elos tila akkalemye sunak nu sin met puspus. Ke ma paye, wanginla sunak liyeyuk yen nukewa ke pal inge.
2. Kas lun God el fwak nu sesr in sunakin ku akfulatye su?
2 Kas lun God el akkalemye yok ke saokye in akkalemye sunak. El akkalemye nu sesr in akfulatye Jeova a Jisus. (Jon 5:23) Kut sapkinyuk pa in akkalemye sunak nu sin met in sou a met su wi ke lulalfongi wekunang kutu met su tia wi ke congregation lasr. (Rom 12:10; Efesus 6:1, 2; 1 Piter 2:17) Mea kutu inkanek su ku in akkalemye la kut akfulatye Jeova? Fuka kut akkalemye me akfulat, ku sunak yok, nu sin met lili mokul a mutan Kristian wiyesr? Lela kut in tuni akmwoye ma inge a kutu kusensiyuk su oasr ke me lutlut inge.
Akfulatye Jeova a E Lal
3. Mea sie inkanek mwomwo in akfulatye Jeova?
3 Sie inkanek yok sripe in akfulatye Jeova pa in akkalemye sunak yok a fwal nu ke in el. Aok, kut pa “mutanfwal ke el sifwana.” (Orekma 15:14) Sie me insemwomwo yok su wangin ma oana in us in en God su fulatlana, Jeova. Met palu Maika el fwak: “Mutanfwal nukewa fwasr, kais sie in en god lal; a kut fwa fwasr in en Jeova God lasr ma patpat a ma patpat.” (Maika 4:5) Kut “fwasr in en Jeova” ke kut kafweang in moulkin moul ke kais sie len ke sie inkanek su akkalemye yok kel Jeova a in el. Oana ke Poul el akesmakinye met Kristian nukewa in an Rom, la kut fwin tia moulkin moul fwal nu ke peng mwo su kut luti, in en Jeova fwa “kaskaskouyuk,” ku akkolukyeyuk.—Rom 2:21-24.
4. Nunak fuka kom akkalemye ke kunokon in sang ma lo kel Jeova?
4 Kut akfulatye pa Jeova ke inkanek in orek ma lo. In pal somla, Jeova el suli met ma wi ke mutanfwal Israel in ekla met lo lal, tusruktu elos tia akpayeye kunokon lalos inge. (Isaia 43:1-12) Elos lain Jeova pal nukewa a “akkasrkusrakyel su Met Mutal lun Israel.” (Sam 78:40, 41) Ke saflaiye, mutanfwal Israel elos tula me insemwomwo lun Jeova ke inkanek nukewa. Tusruktu ke pal inge, kut insemwomwo nu ke kunokon mwomwo lasr in sang ma lo kel Jeova a oru in el in eteyuk. Kut oru ma inge ke sripen kut lungse el a lungse pa inel in akmutalyeyuk. Ke sripen kut etu ma paye Papa tumasr in kosrao a ke akwuk lal, paenang ma inge oru kut in akkeye lungse lasr in sulkakin ma inge. Kut ku in pula pa pulakin lun met sap Poul ke el fwak: “Tu nga tia ku in tia fwakak. Tu we nu sik nga fwin tia fwakak mwosasu!”—1 Korint 9:16.
5. Fuka lulalfongi lasr nu sin Jeova el kupasr nu ke sunak lasr nu sel?
5 Met sim lun sam Devid el fwak: “A elos su etu em fwa filiye lulalfongi lalos in kom, tu kom, Jeova, tia fwasr lukelos su suk kom.” (Sam 9:10) Kut fwin etu na paye Jeova a akkalemye sunak nu ke kalmeyen inel, kut fwa ku in lulalfongel oana met kulansap oaru puspus lal in pal meeta ke elos oru. In oasr kain in lulalfongi oinge nu sin Jeova pa siepa inkanek in akkalemye sunak nu sel. Loang akmwoye nu ka la fuka Kas lun God el akkalemye la lulalfongi nu sin Jeova a orekma in akkalemye sunak nu sel el kupasr nu sin sie sin sie. Ke pal se met Israel elos tila lulalfongel, Jeova el siyuk sel Moses: “Met inge fwa pilesre yu putaka, a putaka elos fwa tia lulalfongi yu, ke me akul nukewa su Nga orala in maslolosr?” (Oekyuk 14:11) Ke luma saye, ke inkanek in lulalfongi nu sin Jeova in karungin a kasre kut in muteng fwin oasr ma upa puspus, kut akkalemye la kut akfulatyel.
6. Mea mokle kut in akkalemye sunak nu sin Jeova?
6 Jisus el akkalemye la orekma in akkalemye sunak nu sin Jeova enenu in ma tuku ke inse. Ke pal se el sramsram nu sin met puspus su tia paye ke orekma lalos in alu nu sin God, Jisus el akkalemye kas lun Jeova fwakang: “Met inge sunakin Yu ke ngoasrolos, a insielos loesla liki Yu.” (Mattu 15:8) In akkalemye sunak paye nu sin Jeova fwa tuku ke lungse paye nu sel. (1 Jon 5:3) A kut srukye pa ke nunak lasr mwulela lun Jeova: “Tu elos su sunakin yu Nga fwa sunakin.”−1 Samuel 2:30.
Met Su Liaung Congregation Elos Akkalemye Sunak nu sin Met Puspus Saye
7. (a) Efu ku brother nukewa su oasr kunokon yok in liaung elos enenu in akkalemye sunak nu sin met nukewa ke congregation? (b) Fuka Poul el akkalemye sunak nu sin met lili nukewa?
7 Met sap Poul el kaifwe met su welul in lulalfongi: “Ke sunakin, komwos in akfulatye sie sin sie.” (Rom 12:10) Brother nukewa su oasr kunokon yok ke congregation elos enenu in oakiye me srikasrak mwomwo. Elos in “oru me kolyuk” ke inkanek mwo su akkalemye sunak nu sin met nukewa su oasr ke me karunginyuk lalos. Ke ma inge, sie met su oasr kunokon yok enenu in fwasr tokin me srikasrak su Poul el oakiye. (Ridi 1 Tessalonika 2:7, 8.) Brother nukewa ke congregation su Poul el muteta nu yuru elos etu la el tia siyuk selos in oru ma puspus su el sifwana tia ku in oru. Poul el akkalemye sunak nu sin met su welul in lulalfongi, a ke inkanek oinge elos akkalemye sunak nu sel. Ke Poul el fwak: “Ke ma inge, nga kaifwe nu sumwos, tu komwos in met etawi yu,” kut ku in etu na paye la met lili puspus wiyel elos insemwomwo in etawel Poul ke sripen me srikasrak mwomwo lal.—1 Korint 4:16.
8. (a) Mea sie inkanek yok sripe su Jisus el akkalemye sunak nu sin met tuma lutlut lal ka? (b) Fuka met liaung puspus ke pal inge elos etawi me srikasrak lal Jisus?
8 Siepa inkanek su sie met liaung el akkalemye sunak nu sin met lili nukewa pa in fwakak nu selos ke sripe la efu ku el orala me siyuk ku akkalemye kas in kasru su el fwak. In oru ma inge, paye la el etawi Jisus. Ke sie me pupulyuk, ke pal se el fwak nu sin met tuma lutlut lal in pre ke met orekma puspus in supweyukla nu in kosrani, Jisus el fwak nu selos la efu. El fwak: “Paye kosrani yok, a pu met orekma. Ke ma inge, komwos pre nu sin Leum lun kosrani, tu lan supwela met orekma nu in kosrani lal.” (Mattu 9:37, 38) Ke inkanek oapana inge, ke el fwak nu sin met tuma lutlut lal in “kafweang in sano,” el akkalemye nu selos ke sripe. El fwak: “Tu komwos tia etu in len su Leum lomwos fwa tuku.” (Mattu 24:42) Pal nukewa, Jisus el fwak nu sin met tuma lutlut lal tia ke ma elos enenu in oru mukena a el fwak pa la efu ku elos enenu in oru ma inge. Ke inkanek oinge, el akkalemye sunak a me akfulat nu selos. Sie me srikasrak mwomwo pa inge nu sin met Kristian nukewa su kol in etawi!
Akkalemye Sunak nu ke Congregation lun Jeova a Me Kolyuk Lal
9. Nu sin su kut akkalemye pa sunak ke kut akkalemye sunak nu sin congregation lun met Kristian fwin fwalu nufon a nu sin met tutafpo lal? Akkuteye.
9 In akfulatye Jeova, kut enenu pa in akkalemye sunak nu sin congregation lun met Kristian fwin fwalu nufon, wekunang met tutafpo lal. Kut fwin loang akmwoye nu ke kas in kai ma tuku ke ma Simusla su tuku sin met kulansap oaru, kut akkalemye sunak nu ke u lun Jeova a me kolyuk lal. Ke congregation lun met Kristian in century se meet, met sap Jon el liye ma eneneyuk in aksumwosye a akkalemye kai nu sin met su wangin sunak nu sin met su srusrngiyuki tari. (Ridi 3 Jon 9-11.) Kas lal Jon el akkalemye la wangin sunak lalos tia nu sin sie met liaung mukena a ouyepa ke me luti lalos a me kolyuk lalos. Oasr sie me insemwomwo, meyen met Kristian puspus elos tia akkalemye kain in oiya inge. Ke met sap puspus elos srakna moul, un met lili nukewa elos akkalemye sunak yok nu sin met su oru kolyuk lalos.—Filippai 2:12.
10, 11. Orekmakin ma Simusla in akuteye la efu ku arulana mwo a fwal nu sin kutu met lili elos in eis kunokon yok lalos nu ke congregation lun met Kristian.
10 Kutu selos fwak mu ke sripen Jisus el fwak nu sin met tuma lutlut lal la “komwos nukewa met lili,” paenang tia enenu in oasr mwal ke congregation lun met Kristian. (Mattu 23:8) Tusruktu, ma Simusla ke kas Hibru a kas Grik el oasr me pupulyuk puspus lun met su orekmakin ku lalos su God el sang nu selos. Me sramsram ke met patriarch, met nununku, togusra puspus in masrlon met Hibru sang me akpayeye puspus la Jeova el sang me kolyuk ke inkanek lun met tutafpo puspus. Fwin metu tia akkalemye sunak mwo a fwal nu sin met su God el srusrngiye, elos ku in eis kai lun Jeova.—2 Togusra 1:2-17; 2:19, 23, 24.
11 Ke inkanek oapana inge, met Kristian in century se meet elos akilen ku lun met sap nukewa. (Orekma 2:42) Ke sie me pupulyuk, met sap Poul, el sang kas in kasru nu sin met lili puspus wiyel. (1 Korint 16:1; 1 Tessalonika 4:2) Ne oinge, el insemwomwokin pa in akpusiselyel nu sin met nukewa su fulat lukel. (Orekma 15:22; Gal. 2:9, 10) Aok, Poul el orekmakin nunak sumwos a fwal nu ke ku ke congregation lun met Kristian.
12. Me lutlut luo fuka ke ku lun met kol su srusrngiyuki kut ku in lotela ke me pupulyuk lun Baibel?
12 Oasr me lutlut luo su kut lotela. Ma se meet, in fwal nu ke ma Simusla oasr sumwos lun “met kulansap oaru a lalmetmet” ke inkanek lun Governing Body lal in srusrngiye brother puspus nu ke kunokon mwomwo. A elos srusrngiye kutu brother in oru kolyuk lalos nu sin brother puspus su srusrngiyuki pa. (Mattu 24:45-47; 1 Piter 5:1-3) Ma se akluo, kut nukewa, wekunang met su srusrngiyuki, enenu in akfulatye ku sunakin met nukewa su srusrngiyuki nu ke kunokon lun met kol. Ke ma inge, mea kutu inkanek mwo su kut ku in akkalemye sunak nu sin met su oasr kunokon in liaung congregation lun met Kristian fwin fwalu nufon?
Akkalemye Sunak nu sin Met Liaung su Fwufwasryesr
13. Fuka kut ku in akkalemye sunak nu sin met tutafpo ke pal inge nu ke congregation lun met Kristian?
13 Poul el akkalemye: “Kut kaifwe nu sumwos, met lili, tu komwos in etalos su orekma in maslomwos, a liyekomwosyung in Leum, a kai komwos; a arulana akfulatyelos in lungse, ke orekma lalos. Komwos in misla sie sin sie.” (1 Tessalonika 5:12, 13) Met liaung su muteta nu ke congregation puspus elos oekyukla in masrlon met ‘su alken in oru orekma’ lalos. Ke ma inge, lela kut in akkalemye nu selos “me akfulat” a sunak yok. Sie inkanek in oru oinge pa in akos ke inse mulala kas in kolyuk lalos. Fwin met liaung inge akkalemye nu sesr me kolyuk su tuku sin met kulansap oaru, “lalmetmet lung me” fwa mokle kut in ‘akola in akos’.—Jemes 3:17.
14. Fuka met in congregation elos sang me akpayeye nu ke sunak su tuku ke inse paye nu sin met liaung su oru fwufwasryesr lal, a mea fwokin ma inge?
14 Na fuka kut fwin siyukyak in oru ma puspus ke sie inkanek su siena liki ma kut pala tari ka? In akkalemye sunak kutu pal kut enenu in fwasr liki nunak in lain nu ke me kolyuk a nunku oinge, “Kut tia oru ma inge in an se inge” ku “Ma inge ku in orekma ke an saye tusruktu ke congregation lasr tia ku.” Aok kut tia akkalemye kain in nunak oinge, a kut in kafweang in akos. Esam in sruokye pal nukewa ke nunak lasr la congregation el ma lun Jeova a la Jisus pa Sifwe ka fwa ku in kasre kut in akos ma nukewa. Ke pal se kas in kasru su tuku sin met liaung su muteta nu ke congregation puspus el orekmakinyuk sin met nukewa ke congregation, su ma inge me akpayeye nu ke sunak su tuku ke inse paye. Met sap Poul el sang kaksak nu sin met lili nukewa in an Korint ke oiyen sunak in akos su elos akkalemye nu ke me kolyuk su tuku sin met elder su oru muteta, el Taitus. (2 Korint 7:13-16) Ke pal inge, kut ku in lulalfongi la ke sripen kut lungse na paye in orekmakin kas in kolyuk su kut eis sin met liaung su muteta nu ke congregation puspus el ku in sang me kasru yok nu ke me engan su kut pulakin ke orekma in luti.—Ridi 2 Korint 13:11.
“Komwos in Akkalemye Sunak nu sin Met Nukewa”
15. Mea kutu inkanek su kut ku in akkalemye sunak nu sin met wi kut in lulalfongi?
15 Poul el simusla: “Nik kom kai sie met elder. A kaifwe nu sel oana nu sin papa tumom, a met fwusr oana met lim, mutan matu oana nine kiom, mutan fwusr oana ma loum, in nasnas nu kemwa. Sunakin katinmas, su katinmas paye.” (1 Timote 5:1-3) Aok, Kas lun God el kaifwe kut in sunakin met nukewa ke congregation lun met Kristian. Na fuka, fwin oasr ma upa in masrlom a met lili mokul ku mutan wiyom ke congregation? Ya ma inge fwa oru kom in tila akkalemye sunak nu sin met lili Kristian wiyom? Ya kom ku in aksumwosye nunak lom in suk ku liye oiya mwo puspus lun met kulansap lun God inge? Met nukewa su oasr ke kunokon yok elos enenu in sruokye a orekmakin nunak mwo wi sunak ka nu sin met lili wiyelos—elos tia “leumi . . . nu sin u.” (1 Piter 5:3) Aok, ke congregation lun met Kristian, su eteyuk ke lungse paye su oasr in masrlon met nukewa su wi ka, oasr pal mwomwo lasr in sunakin sie sin sie pal nukewa.—Ridi Jon 13:34, 35.
16, 17. (a) Efu ku arulana yok sripe in akkalemye sunak nu sin met nukewa su kut luti a oayepa nu sin met su lain kut? (b) Fuka kut ku in “akkalemye sunak nu sin met nukewa”?
16 Aok, kut tia akkalemye sunak nu sin met Kristian nukewa ke congregation mukena. Poul el simusla nu sin met Kristian ke len lal: “Oana oasr pal fwal yurosr, lela kut in oru mwo nu sin met nukewa.” (Galetia 6:10) Paye, in orekmakin akwuk ku masap inge ku in upa fwin met su wi kut orekma ku sie tulik lutlut su wi kut lutlut el akkalemye oiya tia mwo nu sesr. Ke kain in pal inge, kut enenu in esamye kas inge: “Nik kom sifwana mworerelik ke met orek ma koluk.” (Sam 37:1) In orekmakin kas in kai inge fwa kasre kut in akkalemye sunak fwinne nu sin met su lain kut. Ke inkanek ou inge, fwin ke pal se kut wi ke orekma in luti, nunak sumwos nu sesr sifwana ku in kasre kut in sang me top nu sin met nukewa ke “fulpap a sunak yok.” (1 Piter 3:15, NW) Fwinne ke me yun lasr a nuknuk lasr ku in akkalemye la kut sunakin met nukewa su kut luti.
17 Paye, fwin kut asrouki nu sin met lili wiyesr ku met su tia wi ke congregation, kut lungse in kafweang in orekmakin kas in kaifwe inge: “Komwos in akkalemye sunak nu sin met nu kemwa, komwos in lungse met lili, komwos in sangeng sin God, komwos in akfulatye togusra.”—1 Piter 2:17, NW.
Kom E Topuk Fuka?
Fuka kom ku in akkalemye sunak mwo a fwal nu sin:
• Jeova?
• Met elder nukewa a met liaung su muteta nu ke congregation puspus?
• Kais sie met ke congregation?
• Met nukewa su kom luti?
[Picture on page 23]
Met Kristian in century se meet elos akkalemye sunak nu ke me kolyuk lun governing body
[Picture on page 24]
Met elder yen nukewa elos akkalemye sunak nu sin met liaung su muteta nu ke congregation, su srusrngiyuki sin Governing Body