Me Top lun Jeova nu ke Sie Pre su Tuku ke Inse

“Tu elos fwa ku in etu tu kom mukena, su em pangpang Jeova, kom el su Fulatlanu fwin fwalu nufon.”​—SAM 83:18.

1, 2. Kain in oiya fuka sikyak nu sin met puspus, a kain in kusensiyuk puspus fuka ku in siyukyak?

KE KUTU yea somla, oasr sie mutan su arulana asor ke sripen oasr ongoiye lulap su sikyak ke an selos. Ke sripen el a met in sou lal nukewa elos wi ke alu lun Roman Catholic, paenang el siyuk ke me kasru sin met kol ke alu lalos, tusruktu el srunga in sramsram nu sel. Ke ma inge el pre nu sin God: “Nga nukin la su kom an . . . , tusruktu nga etu la kom oasr we. Nunak munas lela ngan ete kom!” Tia pat tokin el pre, oasr Met Lo su tuku nu yurol a elos akkeyel a kasrel in eis etauk su el lungse in suk. Oasr ma puspus su elos luti nu sel, wekunang en God, Jeova. Ke el lotela ma inge tari oasr me akkeyel ka na paye. El fwak, “Liye pa inge God se su nga lungse in etu ke mutamwauk me ke pal se nga tulik srisrik!”

² Oasr met puspus su arulanu lut a akkeyeyuk ke pal se elos lotela ke inen God. Ke pal puspus, elos akkalemye la elos tufwana eis etauk ke pal se meet ke inen God ke elos ridi Sam 83:18 in Baibel natulos. Ke leng lun Baibel su pangpang New World Translation, fus se inge el akkalemye: “Tu elos fwa ku in etu tu kom mukena, su em pangpang Jeova, kom el su Fulatlanu fwin fwalu nufon.” Tusruktu ya oasr pal kom muta nunku ka la efu ku Sam 83 el simusyukla? Kain in ma sikyak fuka fwa oru met nukewa in etu a akilen la Jeova pa God paye mukefwanna? Kain in me lutlut fuka kut ku in lotela ke sam inge? Kut fwa lutlutkin kusensiyuk nukewa ke me lutlut se inge.a

An Puspus Tukeni Nu Sie in Lain Jeova

3, 4. Nu sin su Sam 83 el simusla, a kain in me sensen fuka el akkalemye?

³ In fwal nu ke kas in mutamwauk ke sapta se inge su ku in liyeyuk ke kas Hibru su orekmakinyuk in pal meeta ke pal se fus inge simusyukla, Sam 83 el “on soko lal Asap.” Kalem la met sim ke on soko inge el sie sin tulik nutin met Livai se inge su pangpang Asap, sie met on sumat a pengpeng ke lusen pal se Devid el Togusra. Ke on soko inge, Devid el siyuk sin Jeova in aksumwosye mutanfwal puspus in akfulatye sumwos Lal in kol a in akkalemye in El nu selos nukewa. Sam se inge el simusyukla ke pal se Solomon el mise tari. Efu ku kut ku in fwak oinge? Meyen ke lusen pal in kolyuk lal Devid a Solomon, togusra lun an Tair el kulang nu sin met Israel. Ke pal se Sam 83 el simusyukla, met Tair elos forla liki mutanfwal Israel a elos wi in sang kasru nu sin met lokwalok nukewa.

⁴ Met sim lun sam el akkalemye ke inen mutanfwal singoul su tukeni nu sie in akpayeye akwuk koluk lalos in kunausla met kulansap nukewa lun God. Met lokwalok nukewa inge oasr ke an su on apkurun in raunela an Israel, a an nukewa inge pa: “Met in loom nuknuk sel Idom a met Ismeel, Moab a met Hegar, Gebal, a Ammon, a Amalek; Filistia wi met Tair. Assiria ouyepa welolosyung.” (Sam 83:6-8) Ma sikyak fuka sam se inge el sramsramkin? Kutu met elos fwak mu sam se inge el sramsramkin ke orekma lun an Ammon, an Moab, a met su muta fwin Eol Seir in len lal Jiosafat in orek meun nu sin an Israel. (2 Kronikel 20:1-26) Kutu met elos fwak mu ma inge el akkalemye ke orekma koluk nukewa lun met Israel nu sin mutanfwal koluk nukewa su raunelosla ke lusen pal loeloes.

5. Ke inkanek fuka Sam 83 el ku in kasru met Kristian ke pal inge?

⁵ Ke kutena ma sikyak, arulanu kalem la Jeova God el sang kasru nu ke orekma in simusla sam se inge ke pal se met kulansap nukewa lal pulakin me sensen upa. Sam se inge el sang pa me akkeye nu sin met kulansap nukewa lun God ke pal inge, su ke lusen pal loeloes elos sun me kalyai puspus sin met lokwalok nukewa lalos su lungse na paye in kunauselosla. A paye la sam se inge el ku in akkeye kut ke pal na fototo fwasru ke pal se Gog lun Magog el kol met koluk nukewa lal in srike ke pal sefwanna in kunausla met nukewa su alu nu sin God ke ngun a paye.​—Ridi Ezikiel 38:2, 8, 9, 16.

Ma Yok Sripe Emeet nu sin Met Sim lun Sam

6, 7. (a) Mea met sim lun sam el siyuk ke pre lal ke mutamweyen Sam 83? (b) Mea met sim lun sam el nunku yok ka?

⁶ Loang akmwoye nu ke kas lun met sim lun sam ke pre lal: “O God nik kom misla; nik kom kaliye oalum a tia kaskas, O God. Tu, liye! met lokwalok lom elos mwomwon; a elos su srunge kom elos kekakunak sifwelos. Elos tunyuna lain met Sram . . . Tu elos tukeni papu ke inse siefwanna; elos orek mwuleung lain kom.”​—Sam 83:1-3, 5.

⁷ Mea met sim lun sam el nunku yok ka? Aok, el fosrngala yok ke me molela nu sel sifwana a nu sin soul lal. Ne oinge, ke pre lal el akkalemye yok ke me akkoluk su orek nu ke inen Jeova a ke me sensen nu sin met kulansap nukewa lun God su orekmakin inel. Lela kut nukewa in akkalemye pa kain in nunak mwomwo oana inge ke kut muteng ke ma upa puspus su oasr ke len safla lun fwal koluk inge.​—Ridi Mattu 6:9, 10.

8. Mea mutanfwal puspus elos lungse in akpayeye paenang elos tukeni nu sie in lain met Israel?

⁸ Met sim lun sam el simusla ma met lokwalok nukewa lun met Israel elos fwak: “Fwasru, a lela kut in luselosla tu elos in tia sie mutanfwal.” (Sam 83:4) Paye la mutanfwal nukewa inge elos kasrkusrak na paye nu sin met sulela nukewa lun God inge! Tusruktu oasr pa sripe saye lalos paenang elos tukeni nu sie in lain met Israel. Elos sruokye an sin met Israel a elos konkun in fwak kas inge: “Lela kut in eis loom su ma lun God nu sesr sifwana in ma lasr.” (Sam 83:12) Ya oasr kain in oiya inge su sikyak pa ke pal inge? Aok oasr!

“Yen Mutal Sum”

9, 10. (a) In pal meeta, mea kalmen yen mutal lun God? (b) Kain in me insemwomwo fuka met lula lun met akmusrala a “sip ngie” elos engankin yok?

⁹ In pal meeta, Fwal Mwulela el akkalemyeyuk oana yen mutal sin God. Srike in esam ke on in kutangla soko su met Israel elos onkakin tokin elos moliyukla liki an Ijipt: “In lungkulang lom kom kol met su kom molela; kom penolos in ku lom nu yen mutal sum.” (Exodus 15:13) Tok, in “yen mutal” inge oasr sie temple su akwuki we sin met tol a oasr sie siti lulap, in an Jerusalem, su oasr togusra puspus su tuku liki sruf lal Devid su kais sie selos oru kolyuk lalos in pal lalos a muta fwin tron lun Jeova. (1 Kronikel 29:23) Ke sripe se inge, Jisus el pangon an Jerusalem oana “siti lun Togusra lulap.”​—Mattu 5:35.

¹⁰ Fuka ke pal inge su kut oasr ka? In yea 33 C.E., oasr sie mutanfwal sasu, su pangpang “Israel lun God,” orekla. (Galetia 6:16) Mutanfwal se inge, su met lili akmusrala wiyen Jisus Kraist elos wi ka, elos akpayeye kunokon su met Israel paye elos tia akpayeye, su kunokon inge pa in orekma oana met lo nu ke inen God. (Isaia 43:10; 1 Piter 2:9) Nu selos, Jeova el akkalemye pa oana ke ma el fwak nu sin met Israel in pal meeta: “Nga fwa God lalos, a elos fwa met srak.” (2 Korint 6:16; Levitikus 26:12) In yea 1919, Jeova el akinsemwomwoye met lula nukewa lun “Israel lun God” in oasr fototo mwomwo nu sel. A in pal se pana inge, ke kas in pupulyuk elos muta in sie “an,” an se su oasr kain in orekma in kulansap nu sin God su elos engankin fototo mwomwo nu sel. (Isaia 66:8) Mutamwauk in yea 1930 fwasru, million puspus sin “sip ngie” elos welulos. (Jon 10:16) Oasr me akpayeye puspus la Jeova el akinsemwomwoye met Kristian nukewa ke pal inge a oasr kapkapek yok inmasrlolos a sang me karunginyuk nu selos a me akpayeye yok nu ke sumwoslanu lun kolyuk lun Jeova. (Ridi Sam 91:1, 2.) Aok ma inge el akkasrkusrakye Setan!

11. Mea niyen sun se emeet lun met lokwalok nukewa lun God ke pal inge?

¹¹ Ke lusen len safla inge, Setan el akkeye met nukewa su oru ma lungse lal fwin fwalu in lain met lula lun met akmusrala a sip ngie nukewa su welulos. Met akmusrala a sip ngie elos pulakin ma inge in an Western Europe ye kolyuk lun Nazis ku met German a in an Eastern Europe ye kolyuk lun Communist guferment in an Soviet Union. Kain in oiya koluk inge orek pa nu sin met Kristian in an puspus saye, a ma inge fwa sifwil sikyak, yok ke pal safla su Gog lun Magog el fwa oru me kalyai safla lal nu sin met kulansap lun God. Ke orekma koluk lalos inge in srike in kunausla met nukewa lun God, met lain nukewa elos fwa sruokye an a ma saok nukewa lun met kulansap lun Jeova, oana ke met lokwalok elos oru in pal somla. Tusruktu, akwuk se meet su Setan el lungse in akpayeye, pa in kunauskutla in wanginla kutena met in sifwil esam ke e se inge “Met Lo lun Jeova.” Mea Jeova el fwa oru nu ke orekma inge su pulesru sumwos lal in kol? Lela kut in sifwil pa nunku yok ke kas lun met sim lun sam inge.

Ma Orek in pal Meeta el Sang Me Akpayeye la Jeova el fwa Kutangla in Len lun Met Sim lun Sam

12-14. Fuka ma luo su sikyak ku in akkalemye ke kutangla lun met Israel ke elos apkurun nu ke siti lun an Megiddo su met sim lun sam el simusla?

¹² Loang akmwoye nu ke lulalfongi yok lun met sim lun sam ke ku lun Jeova in tulokinye akwuk nukewa lun met lokwalok nukewa lal. El simusla pa in sam ke kutangla luo lun met Israel nu sin met lokwalok lalos su on apkurun nu ke siti lun an Megiddo, su meun orek we ke infwalfwal lun siti se inge a elos eis kutangla. Ke pal in fwol, Infwal Kison el paola a ma inge liyeyuk oana in kurula ke sripen infwalfwal tupasrpasr inge. Ke pal in af, infwal inge oru in oasr sronot yok nu ke infwalfwal nufon inge. Saap pa inge sripe su paenang, infwal inge el pangpang pa “kof lun Megiddo.”​—Met Nununku 4:13; 5:19.

¹³ Oasr ke mail singoul tokin infwalfwal lun an Megiddo, oasr eol srisrik pangpang More el oasr we, su in len lal Gideon met nununku, u lun met Midian, a met Amelek, a met puspus su muta an kutulap elos tukeni nu sie in orek meun nu sin met Israel. (Met Nununku 7:1, 12) U srisrik lal Gideon su piselos oasr na ke met 300, ne oinge ke kasru lun Jeova, elos eis kutangla liki u lulap lun met lokwalok inge. Fuka? Orekmakinyen akwuk lun Jeova su sapkinyuk nu selos, elos raunela niyen aktuktuk lun met lokwalok lalos ke fong a elos sruokye alu su oasr lam furur ka. Ke pal fwal Gideon el sapkin met meun nukewa lal elos in fukulye alu su on in paolos a lam fururrur su on lun alu inge liyeyuk arulana kalem. Ke pal sepana inge elos ugye me ugug lalos a wowoyuk: “Kutlas nutin Jeova a Gideon!” Met lokwalok elos arulanu fosak, a ke sripe inge elos uniye sie sin sie, a met su tia mise ka elos kaengla a sasla liki Infwal Jordan. A tokin ma inge met Israel puspus elos ukwe met lokwalok nukewa inge su kakaeng. Oasr met meun 120,000 su anwuki.​—Met Nununku 7:19-25; 8:10.

¹⁴ Mail akosr kutu alukela fwin eol lun More, su oasr tokin infwalfwal lun Megiddo, Eol Tabor oasr we. In an se inge, Met Nununku Berak el esani 10,000 met Israel in som lain un met meun lal Jabin, sie met Kenan su togusra lun met Hazor, su met kol fulat emeet ke un met meun inge pa Sisera. Un met meun lun met Kenan inge oasr sariot 900 lalos su oasr mwusra ka a arulanu kosro su tula ke wheel lun sariot nukewa inge. Ke met meun lun an Israel elos tukeni nu sie fwin Eol Tabor, met meun lal Sisera elos srufweyuk in som nu in infwalfwalu. Tokin ma inge, “A Jeova el akongoiyel Sisera, a sariot lal nukewa, a u lal nufon.” Kalem la, oasr sie af upa su oru sariot nukewa inge in tia ku in kasrusr ke sripen fok furarar su sikyak ke sripen kof su suror liki Infwal Kison. Un met meun nukewa inge anwuki sin met Israel.​—Met Nununku 4:13-16; 5:19-21.

15. (a) Mea met sim lun sam el pre nu sin Jeova elan oru? (b) Inen meun safla lun God el akesmakinye kut ke mea?

¹⁵ Met sim lun sam el siyuk sin Jeova in oru kutena ma su oana sie nu ke ma el orala tari nu sin mutanfwal puspus su aksangengye met Israel in len lal. El pre: “Kom oru nu selos oana nu sel Midian, oana nu sel Sisera, oana nu sel Jabin, sisken infwal Kison. Su tula Endor; elos ekla oana fok nu ke fwalu.” (Sam 83:9, 10) Sayen ma inge, meun safla lun God nu ke fwal lun Setan el pangpang Har–Magedon (kalme pa “Eol lun Megiddo”), ku Armagedun. E se inge el akesmakinye kut ke meun sakuruk nukewa su sikyak apkuran an Megiddo. Kutangla lun Jeova ke meun nukewa in pal meeta el sang me akpayeye nu ka la el fwa kutangla na paye pa ke meun lun Armagedun.​—Fwakyuk 16:13-16.

Kut in Pre in Akmutalye Kolyuk lun Jeova

16. Fuka mutun met lokwalok puspus ‘nenela ke mwekin’ ke pal inge?

¹⁶ Ke “len safla” inge, Jeova el kosrala orekma nukewa lun met lokwalok in kunausla met kulansap lal. (2 Timote 3:1) Ke sripe se inge, met lokwalok elos akmwekinyeyuk. Sam 83:16 el pupulyukkin ma inge, el akkalemye: “Nekla mutalos ke mwekin, tu elos fwa ku in suk em, O Jeova.” In an puspus, met lokwalok ku met lain nukewa elos tia kutangla ke orekma lalos in akmisyela Met Lo lun Jeova. In an puspus inge, oiyen oaru a mongfusesr lun met kulansap nukewa lun God paye mukefwanna el sang ma lo nu sin met puspus su paye insielos, a oasr met puspus su ‘suk ke inen Jeova.’ In an puspus su Met Lo lun Jeova elos sun me kalyai upa, ke pal inge foko foko tausan, sin met puspus su insemwomwo in sang kaksak nu sin Jeova. Sie me kutangla na paye pa inge nu sin Jeova! A sie me mwekin yok nu sin met lokwalok puspus lal!​—Ridi Jeremaia 1:19.

17. Kain in pal mwomwo fuka nu sin metu ku in wanginla, a tia pat kas fuka kut fwa esam?

¹⁷ Aok, kut etu la met lokwalok nukewa fwa tafwela na in suk inkanek in kalyai kut. A kut kafweang in sulkakin peng mwo​—fwinne nu sin met lokwalok puspus. (Mattu 24:14, 21) Tusruktu, pal inge su ikakla nu sin met lokwalok nukewa in auliyuk a in eis me molela fwa tia pat aksafyeyukla. Orekma in akmutalye inen Jeova el yok sripe nu ke molela lun metu. (Ridi Ezikiel 38:23.) Ke pal se mutanfwal nukewa fwin fwalu elos tukeni nu sie in srike in kunausla met kulansap lun God, kut fwa esam kas inge su oasr ke pre lun met sim lun sam: “Lela elos in mekin a toninfong ma patpat, aok, lela elos in fosrnga a tula.”​—Sam 83:17.

18, 19. (a) Mea sanoeyuk nu sin met lokwalok nukewa su lain kolyuk lun Jeova? (b) Fuka orekma in akmutalye kolyuk lun Jeova su apkurun na in orek el ku in kasre kom?

¹⁸ Met lokwalok nukewa su inse fulat a lain kolyuk lun Jeova elos fwa akmwekinyeyuk ke safla lalos. Kas lun God akkalemye la met nukewa su “tia akos mwosasu”​—elos kunausyukla ke pal in Armagedun—​a elos fwa sun “kunausla ma patpat.” (2 Tessalonika 1:7-9) Kunausla lalos a molela lun met nukewa su alu nu sin Jeova fwa me akpayeye fukoko la Jeova pa God paye mukefwanna. Ke fwalu sasu su oasr akwuk mwomwo ka, kutangla lulap inge fwa tia mwulkinyukla ke kutena pal. Met mise nukewa su akmoulyeyukyak ke inkanek lun “sifwil moulyuk . . . lun met sumwos a met sesumwos” elos fwa lotela ke orekma mwolanu lun Jeova. (Orekma 24:15) Ke akwuk sasu, elos fwa ku in liye ke me akpayeye mwomwo la efu ku arulanu mwo in moul ye kolyuk sumwosmwos lun Jeova. A met fwokpap nukewa in masrlolos fwa sa in akilen la Jeova pa God paye mukefwanna.

¹⁹ Aok oasr pal fwasru mwomwo su Papa tumasr su oasr in kosrao el ako nu sin met kulansap oaru nukewa lal! Ya kom fwa tia akkeyeyuk in pre nu sin Jeova ka la tia pat el fwa sang me top safla na mwomwo nu ke pre lun met sim lun sam nu sin Jeova: “Lela [met lokwalok] elos in mekin a toninfong ma patpat, aok, lela elos in fosrnga a tula; tu elos fwa ku in etu tu kom mukena, su em pangpang Jeova, kom el su Fulatlanu fwin fwalu nufon”?​—Sam 83:17, 18.

[Footnote]

Ya Kom Ku In Akuteye?

• Kain in oiya fuka sikyak nu sin met Israel ke pal se Sam 83 el simusyukla?

• Mea met sim lun Sam 83 el fosrnga yok ka?

• Setan el arulanu mulat nu sin su ke pal inge?

• Ke inkanek fuka Jeova el fwa topuk pre su akkalemyeyuk in Sam 83:18?

[Map on page 19]

(For fully formatted text, see publication)

Fuka meun nukewa su orek in an su apkurun an Megiddo el kupasr nu ke pal fwasru lasr?

Infwal Kison

Haroset

Eol Karmel

Infwalfwal lun Jezriel

An Megiddo

Teanak

Eol Gilboa

Luf in an Harod

More

An En-dor

Eol Tabor

Mwea lun an Galili

Infwal Jordan

[Picture on page 16]

Mea akkeye met sim lun sam in simusla sie pre na mwomwo su tuku ke insiel?