Mutun Jeova Srike a Tuni Met Nukewa

“Kulin mutal [Jeova] srike mwen nutin met.”​—SAM 11:4.

1. Nu sin kain in met fuka kut lungse in etu a in fototo nu se?

MEA pulakin lom ke sie met su nunku a insemwomwo paye keim? Fwin kom siyuk selos la mea elos nunku keim elos fwa akkalemye nunak paye lalos. Fwin kom enenu kasru, elos lungse in kasre kom. Fwin kom enenu kas in kasru, elos kulang in akkalemye ma inge nu sum. (Sam 141:5; Galetia 6:1) Ya kom lungse in etu a in fototo nu sin met oinge? Aok, Jeova a Mwen natul elos insemwomwo na paye keim. Paye, insemwomwo lalos keim el yok liki insemwomwo lun kutena met keim, a nunak lalos nu sum el arulanu mwo; meyen elos lungse in kasre kom in ku in “srukye moul ma patpat su moul paye.”​—1 Timote 6:19; Fwakyuk 3:19.

2. Nu ke oiya fuka Jeova el nunku a insemwomwo ke met kulansap nukewa lal?

² Met sim lun sam inge Devid el akkalemye ke insemwomwo yok lun Jeova nu sesr ke pal se fwak: “Mutal [Jeova] liye, kulin mutal srike mwen nutin met.” (Sam 11:4) Aok, God el tia ngetma nu sesr mukena a el tuni kut pa. Devid el simusla pa kas inge: “Kom akpayeye insiuk, kom tuku nu yuruk ke fong . . . Kom tia koneyukyak kutena ma.” (Sam 17:3) Kalem la, Devid el etu na paye la Jeova el nunku a insemwomwo yok kesr. El etu la el fwa akasoryel Jeova fwin el tia sisla kain in nunak koluk ku akkeye sie inse koluk. Ya Jeova el paye nu sum oana Devid?

Jeova El Liye Inse

3. Ke inkanek fuka Jeova el akkalemye sie oiya mwomwo nu ke oiyen sesumwos a tafongla lasr?

³ Jeova el insemwomwo yok ke oiya paye lun sie met​—la mea na paye oasr ke insiesr. (Sam 19:14; 26:2) Aok, el tia nunku yok ke ma tafongla lasr su arulanu pus. Ke sie me pupulyuk, ke pal se Serah, mutan kiyel Ebream, el kaskaskin ma tia paye nu sin sie lipufan su ekulla lumal nu ke monin met, lipufan se el ku in liye la el sangeng a el mwekin, ke ma inge el sang kas in kai fusrasr nu sel. (Genesis 18:12-15) Ke pal se Job in pal meeta el akkalemye “la el sifwana sumwosmwos a tia God,” Jeova el tia tulokinyel sifwana in sang me insemwomwo nu sel, meyen el etu la Job el sun me keok upa ke poun Setan. (Job 32:2; 42:12) Oayepa, Jeova el tia toasr ke kas upa lun mutan katinmas in an Sarefat nu sel Elaija. God el kalem ka la el arulanu asor a toasr ke mise lun tulik sefwanna natul.​—1 Togusra 17:8-24.

4, 5. Ke inkanek fuka Jeova el akkalemye kulang nu sel Ebimelek?

⁴ Ke sripen Jeova el srike inse, paenang el akkalemye pa kulang fwinne nu sin met su tia lulalfongi. Nunku ke oiya su el akkalemye nu sel Ebimelek, togusra ke siti se inge Gerar fwin an Filistia. Ebimelek, su tia etu la Ebream a Serah elos payukyak tari, el eis Serah tu in mutan kiyel. Tusruktu, meet liki el ku in oru kutena ma nu sel, Jeova el fwak nu sel ke inkanek lun sie mwemwe: “Nga etu tu kom oru ma inge in sumwos insiom, a Nga ouyepa srukkomi liki ma koluk lain yu. Ke ma inge Nga tia lela tu kom in kalilye. Ke ma inge sifwil folokunla inge mutan kien met sa, tu el sie met palu, a el fwa pre keyum. A kom fwa moul.”​—Genesis 20:1-7.

⁵ Aok, Jeova el ku in akkalemye mulat lal u sel Ebimelek, su alu nu sin god kikiap puspus. Tusruktu God el liye la mokul se inge el oru ma inge ke inse sumwos lal. God el etu a akilen oiya mwo lal inge paenang el fwak nu sin togusra ke inkanek mwo la fuka el ku in “moul.” Ya tia pa inge kain in God su kom lungse in alu nu se?

6. Ke inkanek fuka Jisus el etawi Papa tumal?

⁶ Jisus el etawi Papa tumal ke inkanek nukewa, su el loang akmwoye nu ke oiya mwomwo lun met tuma lutlut lal a el sa in sang nunak munas nu ke ma koluk lalos. (Mark 10:35-45; 14:66-72; Luk 22:31, 32; Jon 15:15) Oiyel Jisus el fwal nu ke kas su simusyukla in Jon 3:17: “God el tia supwema Mwen natul nu in fwalu in nununku fwalu, a tu fwalu in moul kel.” Aok, lungse lun Jeova a Jisus nu sesr el yok a oasr pal nukewa. Akkalemye kalem la elos lungse kut in eis moul. (Job 14:15) Kain in lungse inge el sang me akuteye la efu Jeova el srike a tuni kut, a mea nunak lal nu sesr, a la oiya fuka el akkalemye ke ma el liye kesr.​—Ridi 1 Jon 4:8, 19.

Srikeyuk Kut Ke Inkanek lun Lungse

7. Mea nunak lun Jeova ke el srike a tuni kut?

⁷ Ke ma inge tia sumwos in nunku mu Jeova el oana sie policeman su oasr in kosrao su liye tuni orekma nukewa lasr tu elan ku in koneak orekma koluk lasr! Setan pa akkalemye mu kut oru ma koluk a lungse in liye ma koluk kesr. (Fwakyuk 12:10) El akkalemye mu oasr nunak tia sumwos lasr kut fwin kulansap ke sripen oasr ma yok kut ku in eis ka. (Job 1:9-11; 2:4, 5) Met sim lun sam el simusla kas inge ke God: “Jeova, kom fwin akilenye ma koluk, O Jeova, su a fwa tu?” (Sam 130:3) Me top nu ke kusensiyuk inge pa, Wangin kutena met ku in tu! (Ekklisiastis 7:20) A, Jeova el liye kut oana ke sie papa su pakoten a kulang, su lungse in sang me karungin nu sin tulik nukewa natul liki me sensen. El lungse in kasre kut in aksumwosye oiya sesumwos a me munas lasr pal nukewa tu kut in ku in tia akkolukye kut sifwana.​—Sam 103:10-14; Mattu 26:41.

8. Jeova el luti a sang kai fuka nu sin met kulansap lal?

⁸ Lungse lun God el akkalemyeyuk ke inkanek lun kas in kasru a me kai su oasr ke ma Simusla a ke me rid a ke meeting nukewa su orekla sin “met kulansap oaru a lalmetmet.” (Mattu 24:45; Hibru 12:5, 6) Jeova el sang pa me kasru ke inkanek lun congregation lun met Kristian a met liaung nukewa oana “me sang nu sin metu.” (Efesus 4:8) Sayen ma inge, Jeova el loang akmwoye ke oiya su kut akkalemye nu ke me akpa lal oana sie papa, a el suk inkanek in kasre kut ke kutupa oiya. Sam 32:8 el akkalemye: “Nga fwa aketeye nu sum a luti nu sum inkanek kom fwa fwasr we. Nga fwa papu nu sum ke mutuk su on fwom.” Ke ma inge, arulanu yok sripe kut in porongo pusran Jeova pal nukewa! Kut enenu in akkalemye inse pusisel ye mutal pal nukewa, a kut in akilen la el pa Met Luti a Papa Tumasr su kulang.​—Ridi Mattu 18:4.

9. Kain in oiya fuka kut enenu in tia oru, a efu?

⁹ Ke luma saye, lela kut in tia likkeke ke sripen inse fulat, ke wangin lulalfongi, ku ke sripen “me kiapela lun ma koluk.” (Hibru 3:13; Jemes 4:6) Ke pal puspus, kain in oiya inge el sikyak ke pal se sie met el akkeye sie nunak ku kena su tia mwo. Saap oasr pal el pulesru kas in kai mwomwo su tuku ke ma Simusla. Koluk liki ma inge, saap el lungse na in akpayeye oiya koluk lal sifwana paenang el oral sifwana in met lokwalok lun God​—kain in oiya inge el tia mwo na paye! (Soakas 1:22-31) Nunku ke me srikasrak lal Kein, tulik se meet natul Adam a If.

Jeova el Liye Ma Nukewa a Orekma Fwal Nu Ka

10. Efu ku Jeova el tia insemwomwo ke me kise lal Kein, a oiya fuka Kein el akkalemye ka?

¹⁰ Ke pal se Kein a Ebel elos kisekin me kise lalos nu sin Jeova, El insemwomwo ke me kise lalos a ke nunak a ma on ke insielos. Ke sripen el etu ma oasr ke nunak lalos, paenang God el akkalemye me insemwomwo lal nu ke me kise lal Ebel, a el tia insemwomwo kel Kein, ke sripen el tia akkalemye lulalfongi. (Genesis 4:4, 5; Hibru 11:4) Kein el tia lotela kutena ma ke ma sikyak, a el kasrkusrak nu sin met wiyel.​—Genesis 4:6.

11. Kein el akkalemye fuka inse kutasrik, a me lutlut fuka ma inge el akkalemye nu sesr?

¹¹ Jeova el liye la oiyel Kein el tia mwo a el sramsram nu sel ke inkanek kulang, ke sripe se inge el ku in akkalemye engan lal. Sie me asor, ke sripen Kein el tia porongo kas in kai lun Met Oralla a el uniye tumalel wiyel. Inse koluk lal Kein el akkalemye ke oiya koluk lal ke pal se el topuk la kusensiyuk lun God nu sel inge: “Ela oya Ebel ma lim?” Kein el topuk: “Nga nukin. Ya Nga met liaung ma lik?” (Genesis 4:7-9) Aok inse el ku in arulanu kutasrik​—a ma inge ku in pulesru kas in kai lun God! (Jeremaia 17:9) Ke ma inge lela kut in lutlut ke ma simusla oinge a lela kut in sa in sisla kain in nunak koluk a kena koluk meet liki ma inge el upala paenang kut tia ku in kutongye. (Ridi Jemes 1:14, 15.) Fwin oasr kas in kai nu sesr su tuku ke ma Simusla, lela kut in aksaokye ma inge a liye ma inge oana me akpayeyen lungse lun Jeova nu sesr.

Wangin Kutena Ma Koluk su Ku in Mwukinyukla Ye Mutun Jeova

12. Oiya fuka Jeova el akkalemye nu ke ma koluk?

¹² Kutu met elos nunku mu fwin wangin kutena met liye ma koluk su elos oru, ke ma inge elos fwa tia eis me kai ka. (Sam 19:12) Aok, ma koluk nukewa tia ku in mwukinyukla. “Ma nu kemwa koflufol a lemtulaiuk ye mutun el, su kut fwa fwakak oiyesr nu sel.” (Hibru 4:13) Jeova el sie Met Nununku su tuni a srike nunak a inse, a ke oiya su el akkalemye nu ke orekma koluk el akkalemye nununku sumwos lal. El “sie God pakomuta a kulang, tia sa in mulat, a yoklanu lungkulang a paye lal.” Tusruktu, nu sin met su srunga in auliyuk, el “fwa aksumwosmwosye” ma koluk lalos yokna ke pal elos ‘lungse na paye in oru ma koluk’ ku akkalemye kain in ella kutasrik. (Exodus 34:6, 7; Hibru 10:26) Ma inge el akkalemye ke nunak lun Jeova el oru nu sel Ekan a nu sel Ananaias a Safaira.

13. Fuka nunak koluk el akkeye oiya koluk lal Ekan?

¹³ Ekan el kunausla masap lun God, a el eis kutu ke ma wapi liki siti lun an Jeriko a el mwukunla ma inge lun loom nuknuk lal, saap oasr pa etauk lun sou lal ka. Ke pal se ma koluk lal el akkalemyeyuk, Ekan el akkalemye la el akilen la ma el oru el arulanu koluk, meyen el fwak: “Paye nga oru ma koluk lain Jeova.” (Josua 7:20) Oana Kein, Ekan elos akkeye sie nunak koluk. Ke ma sikyak nu sel Ekan, kalem la oiyen rapku pa sripe, a ma inge sripeu la efu el oru ma kutasrik. Ke sripen ma wap nukewa liki an Jeriko el ma lun Jeova, ke ma inge Ekan el pusrela ma lun God, a oiya koluk lal inge pa paenang el a sou lal mise.​—Josua 7:25.

14, 15. Efu ku fwal nu sin God in tia insemwomwo kel Ananaias a Safaira, a me lutlut fuka ma inge akkalemye nu sesr?

¹⁴ Ananaias a Safaira mutan kiyel, elos wi ke congregation lun met Kristian in pal meta in an Jerusalem. Tokin Pentecost 33 C.E., oasr lupan mani su enenu in orekani in sang kasru nu sin met lili puspus su oasr ma enenu yok su tuku liki an loeloes puspus su srakna muta in an Jerusalem. Oasr lupan mani su eneneyuk ke sripen oasr met lili puspus su sang me kasru ke inse mulala lalos. Ananaias el kukakunla imae lal a el sang kutu mani ka in toeni nu ke lupan mani su eneneyuk. Mutan kiyel el etu na paye ma inge, tusruktu Ananaias el orek luma la el sang lupan mani nukewa. Wangin alolo ka la siyanyen se inge el lungse met nukewa inmasrlon congregation in akfulatyelos. Tusruktu orekma lalos el kutasrik. Ke inkanek lun mwenmwen, Jeova el akkalemye orekma kutasrik lalos nu sel Piter, su siyuk Ananaias la efu el oru me kutasrik inge. Tia pat tokin ma inge, Ananaias el putatla a el mise. A Safaira el mise pa.​—Orekma 5:1-11.

¹⁵ Ananaias a Safaira elos tia srifweyuk ka ke sripen me munas lalos ke kitin pal. Elos nunku yok a orala akwuk ka a akkalemye ma kikiap in kiapela met sap nukewa. Koluk liki ma inge, elos ‘kineak in kiapela ngun mutal a God.’ Ke oiya su Jeova el akkalemye ka arulanu kalem la el akola in karungin congregation liki met kikiap a kutasrik. Paye la, “pa inge ma aklangung lulap, in putatla nu in poun God moul”!​—Hibru 10:31.

Sruokye Oiyen Oaru Pal Nukewa

16. (a) Ke inkanek fuka Setan el srike in akkolukye met nukewa lun God? (b) Kain in inkanek puspus fuka Devil el orekmakin in akkolukye met nukewa in an sum?

¹⁶ Setan el lungse in oru ma nukewa in akkolukye kut a oru kut in akwanginyela insemwomwo lun Jeova. (Fwakyuk 12:12, 17) Nunak koluk lun Devil el akkalemyeyuk kalem ke akwuk lun fwalu, su nenela ke nunak a orekma koluk lun kosro a akmas. Me rid a petsa fokfok oasr yen nukewa a arulanu fusrasr in liye ke inkanek lun computer a kutupa inkanek. Lela kut in tia akkolukyeyuk sin orekma kutasrik lal Setan. A, lela kut in oru sulela mwomwo oana nunak lal Devid met sim lun Sam, su simusla kas inge: “Nga fwa oru oiyen lalmetmet inkanek sumwosna. . . . Nga fwa fwufwasryesr in loom sik wi inse sumwosna.”​—Sam 101:2.

17. (a) Efu ku Jeova el oru in akkalemye ma koluk nukewa su orek ke lukma ke pal pakiyuki lal? (b) Sulela mwo fuka kut enenu in oru?

¹⁷ Misenge, Jeova el tia akkalemye ke inkanek lun mwenmwen ma koluk upa a oiya kutasrik lun met oana ke ma el oru in pal meeta. Ne oinge, el liye ma nukewa a ke pal pakiyuki lal a inkanek lal el fwa akkalemye orekma lukma nukewa in lemtalaiyuk. Poul el fwak: “Ma sito lun kutu met kalem, a fwasr meet nu ke nununku, a ke kutupa met ma inge fwasr tok.” (1 Timote 5:24) Jeova el oru in akkalemye orekma koluk ke sripen lungse. El lungse congregation a el lungse ma inge in nasnas pal nukewa. Sayen ma inge, el akkalemye pakoten nu selos nukewa su oru ma koluk, tusruktu akkalemye la elos auliyuk na paye. (Soakas 28:13) Ke ma inge lela kut in kafweang in sruokye inse paye nu sin God a pulesru kain in me akkoluk a me kufusla nukewa.

Sruokye Sie Inse Mwo a Paye

18. Devid el lungse mwen se natul in akkalemye nunak a pulakin fuka nu sin God?

¹⁸ Togusra Devid el fwak nu sel Solomon mwen se nutul: “Kom in etu God lun papa tumom, a orekma nu sel ke inse sumwos a ngun in lungse; tu Jeova el ilus inse nu kemwa, a etu ma kineuk nu kemwa in nunak.” (1 Kronikel 28:9) Devid el lungse mwen natul in akkeye fototo lal nu sin God a tia in fwak mukena la oasr lulalfongi lal nu sel. El lungse Solomon in aksaokye insemwomwo yok lun Jeova nu sin met kulansap nukewa Lal. Ya kom sang kulo nu sin Jeova ke sripen insemwomwo yok lal nu sin met kulansap nukewa lal?

19, 20. In fwal nu ke Sam 19:7-11, mea kasrel Devid in fototo nu sin God, a fuka kut ku in etawel Devid?

¹⁹ Jeova el etu la met nukewa su lungse in oasr fototo mwomwo nu sel elos fwa tuku in alu nu sel a la etauk lalos ke oiya mwomwo lal fwa akkeye insielos. Ke ma inge, Jeova el lungse kut in eis etauk kel a kut in etu oiya mwomwo puspus lal. Fuka kut ku in oru ma inge? Ke inkanek in lutlutkin kas lal a ke inkanek in pulakin me insemwomwo lal nu ke moul lasr.​—Soakas 10:22; Jon 14:9.

²⁰ Ya kom rid Kas lun God len nukewa a akilen la ma inge tuku sin God, kom siyuk ke kasru tu kom in ku in orekmakin ma inge? Ya kom kalem ke yok sripaiyen orekma lom in moulkin akwuk mwomwo lun Baibel? (Ridi Sam 19:7-11.) Fwin oinge, lulalfongi lom nu sin Jeova a lungse lom nu sel fwa kapkapek yok. A ke sripe se inge, el fwa akfototoyeyuk nu sum, a oana ke kas in pupulyuk el fwasr wi kom a sruokye poum. (Isaia 42:6; Jemes 4:8) Aok, Jeova el fwa akpayeye lungse lal nu sum ke el akinsemwomwoye a kasre kom in fototo nu sel ke kom fwufwasryesr ke inkanek ousriksrik nu ke moul.​—Sam 91:1, 2; Mattu 7:13, 14.

Kom E Topuk Fuka?

• Efu ku Jeova el srike a tuni kut?

• Mea oru kutu met elos in ekla met lokwalok lun God?

• Kut akkalemye fuka la Jeova el paye nu sesr?

• Fuka kut ku in karungin sie inse paye a oaru nu sin God pal nukewa?

[Picture on page 8]

Fuka Jeova el karungin kut oana sie papa su kulang?

[Picture on page 9]

Me lutlut fuka kut ku in lotela ke me srikasrak koluk lal Ananaias?

[Picture on page 10]

Mea fwa kasre kut in kulansapu Jeova pal nukewa ke inse kewa lasr?