Fulpap—sie Oiye Mwo Lun Met Kristian Su Eneneyuk
“Ke ma inge, komwos nukomang . . . fulpap.”—KOLOSSE 3:12.
1. Mea se inge su oru fwokpap in sie oiye mwo na paye?
KE pal se oasr pulanpal mwo, ma inge sie me insemwomwo, a me akinsemwomwoye met. Fwin sie met el fulpap, ku fwusesr insiel, sie me insemwomwo na paye in welul. Aok, “sie loa fwusesr kotelik sri,” pa inge ma Togusra Solomon el liye. (Soakas 25:15) Fulpap el sie kain in oiye su tuku ke toeni lun oiye mwo a ku.
2, 3. Mea ma inge su kapsreni fulpap a ngun mutal, a mea kut akola in tuni ke me lutlut inge?
2 Met sap Poul el toeni fulpap nu ke “fwako lun ngun mutal,” su ku in konoiyukyuk in Galetia 5:22, 23. Kas Greek inge su langasyukla nu ke “fulpap” in fus 23 lun New World Translation pal nu kemwa langasyukla nu ke “fwokpap” ku “inse pusisel” ke kutu version lun Baibel. Paye, arulanu upa in koneak kas sumwos na paye ke kas saye in langasla kas Greek inge meyen ke kas Greek na paye el tia aketeye ou inge oanu inse pusisel ku oiye fulpap lik, a fulpap a kulang lu; tia ke oiye su ku in liyeyuk nu sin met se, a pa inge oiyen nunuk lal a insiel.
3 In kasru kut in kalem na paye ke kalme a ke ma saok su tuku ke fulpap, lela kut in tuni me srikasrak akosr in Baibel. (Rom 15:4) Ke kut tuni me srikasrak inge nu kemwa, kut e fwa lotela kalmen oiye se inge a fuka kut ku in eis a orekmakin ma inge ke orekma lasr nu kemwa.
“Yoklanu Molo Ye Mutun God”
4. Efu kut ku in etu la Jeova el aksaokye fulpap?
4 Ke sripen fulpap el sie ipen fwako lun ngun mutal lun God, paenang ke inkanek lalmetmet, kut ku in koneak ma inge futoto nu ke oiye mwolanu lun God. Met sap Piter el simusla la “fulpap a ngun okak” el “yoklanu molo ye mutun God.” (1 Piter 3:4) Paye, fulpap el sie oiye mwomwo su Jeova el akkalemye; ma inge arulanu yok sripe ye mutun God. Pa inge sripe, efu met kulansap nu kemwa lun God elos enenu in akkapye fulpap. Tusruktu, fuka sie God Ku Liki Ku, su fulat liki in kosrao a fwalu el akkalemye fulpap?
5. Ke sripen fulpap lun Jeova, kain in fwinsrak fuka ke pal fwasru oasr yurosr?
5 Ke pal se seanyen se meet, Edam a If, elos seakos ma sap lun God in tia mongo fwokinsak se su tuku ke sak in etu ma mwo a ma koluk, elos oru ou inge tia ke sripen munas ku tafongla. (Genesis 2:16, 17) Seakos lalos ke insielos kemwa kol nu ke ma koluk, mise, a elos oru moul lalos a moul lun tulik nutulos nu kemwa su e fwa isusla in tia futoto nu sin God. (Rom 5:12) Fwinne oasr sumwos lun Jeova in oru nunuku lal in pal meeta, tusruktu el tia sisla sou lun met oanu wanginla fwinsrak in ekulla oiyen moul lalos a tia ku in sifwil molela. (Sam 130:3) A, ke sripen oiye kulang lal a insemwomwo lal in tia siyuk ma puspis—sie inkanek pa inge in akkalemye fulpap—Jeova el oakiye sie inkanek su ku in kasre met sesumwos nu kemwa in sifwil futoto nu sel a eis insemwomwo lal. Aok, ke inkanek lun me sang lal ke me kise lango lun Mwen nutul, Jisus Kraist, Jeova el oru nu sesr kemwa in tu ye mutun tron lal ke pulaik a wangin sangeng.—Rom 6:23; Hibru 4:14-16; 1 Jon 4:9, 10, 18.
6. Fuka fulpap ku in akilenyuk ke oiye su God el akkalemye nu sel Kein?
6 Meet liki Jisus el tuku nu fwalu, fulpap lun Jeova akkalemyeyuk tari ke pal se Kein a Ebel, mwen nutul Edam, elos orek kise nu sin God. Meyen el akilen insielos, paenang Jeova el tia insemwomwo ke me kise lal Kein, tusruktu el ‘insemwomwo’ kel Ebel, a me kise lal. Insemwomwo lun God nu sel Ebel su oaru a ke me kise lal purakak Kein in oru ma sesumwos. “Kein el arulanu mulat, a mutal kouyuk,” Baibel el fwak. Mea Jeova el oru? Ya el mulat ke oiye lal Kein? Mo. Ke oiye fulpap, el siyuk sel Kein efu el arulanu mulat. Jeova el aketeye nu sel mea el enenu in oru el fwin lungse in “eis kulang.” (Genesis 4:3-7) Paye, Jeova el sie me srikasrak sumwosmwos ke fulpap.—Exodus 34:6.
Fulpap El Sie Me Purakak a Sang Mongle
7, 8. (a) Fuka kut ku in akilen fulpap lun Jeova? (b) Mea kas in Mattu 11:27-29 el akkalemye kel Jeova a Jisus?
7 Sie inkanek mwo in engunkin oiye fulat mwomwo lun Jeova pa ke lutlut mwo ke moul a orekma lun forfor lun Jisus Kraist. (Jon 1:18; 14:6-9) Ke pal se el muta in an Galili ke lusen yiu akluo lun orekma in luti lal, Jisus el orala menmen puspis in an Koresin, Betsaida, Keperneum, a ke an nu kemwa su futoto nu ke an ekasr inge. Tusruktu, apkurun met nu kemwa elos inse fulat a tia pwar in long lutlut, a elos srunga in lalalfongi. Mea Jisus el oru? Fwinne el akesmakinyelos ke ma upa su ku in tuku ke silalalfongi lalos, tusruktu el arulanu pakomuta ke luma upa in ngun lun ʽam ha·ʼaʹrets, met srisrik, met sikasrup inmaslolos.—Mattu 9:35, 36; 11:20-24.
8 Orekma puspis lun Jisus toko akkalemye la el “etu na paye Papa” a el etawi el. Nu sin met sikasrup, Jisus el sang nu selos me solsol mwo inge: “Fwasru nu yuruk, komwos nu kemwa su orekma a fwuni, a Nga fwa sot mongle nu sumwos. Eis srenenu luk nu fwomwos a lutlut sik, tu Nga fwokpap a inse pusisel, a komwos fwa konoiyuk mongle in ngunumwos.” Kas inge sang insemwomwo a mongle na paye nu sin met keok nu kemwa! Kas inge lun Jisus ase nu sesr insemwomwo a mongle pa nu sesr ke len inge. Kut fwin oaru in nukomang fulpap, na kut e fwa sie selos “su Mwen lungse in fwakulak” nu sin Papa.—Mattu 11:27-29.
9. Kain in oiye fuka su kapasr nu ke fulpap, a fuka Jisus el sie me srikasrak mwo ke ma se inge?
9 Oiye mwo su futoto na paye ke fulpap pa fwokpap, inse pusisel.” Paye, inse fulat, kol nu ke fulang a pal nu kemwa oru sie met in akpusisilye kutu met ke inkanek sufwal a koluk. (Soakas 16:18, 19) Jisus el akkalemye inse pusisel ke lusen orekma lun fofor lal fwin fwalu. Fwinne ke pal se el som nu Jerusalem len onkosr meet liki el mise a kaksakinyuk sin met oanu sie Togusra lun met Ju, Jisus el akalemye la el siena liki met kol lun fwalu se inge. El akpayeye kas palu lal Zekaraia ke Messaia: “Liye! Togusra el tuku nu yurom, el fulpap, a kasrusr fwin soko ass, a fwin ass fwusr natu.” (Mattu 21:5; Zekaraia 9:9) Met palu oaru inge pangpang Daniel el liye sie arurumu su akkalemye la Jeova el sang kunokon nu sin Mwen nutul in kol. Aok, ke sie kas palu meet liki ma inge, el akkalemyel Jisus oanu sie “met su arulanu pusisel.” Fulpap a inse pusisel kapsreni nu ke sie sin sie.—Daniel 4:17; 7:13, 14.
10. Efu ku fulpap lun met Kristian tia ku in kalmekin munas?
10 Fulpap lun Jeova a Jisus su elos akkalemye kasre kut in futoto nu selos. (Jemes 4:8) Paye, fulpap el tia kalmekin munas. Aok, tia ou inge! Jeova, el God Ku Liki Ku, el akkalemye ku lulap lal a el yok in pen. El sesesla ke mulat lain ma sesumwos. (Isaia 30:27; 40:26) Jisus el oupanu akkalemye kaifweung lal in tia kunausla ma sap, el fwinne muta ye ma upa su tuku sel Setan su Devil. El tia lela orekma koluk ke business lun met kol lun alu in len lal. (Mattu 4:1-11; 21:12, 13; Jon 2:13-17) Aok, el srukye na oiye fulpap a tia mulat ke pal se el aksumwosye met tuma lutlut lal ke tafongla lalos, a el mongfwusesr ke munas lalos. (Mattu 20:20-28) Sie scholar lun Baibel el akkalemye fulpap ke inkanek inge: “Ke oiye se inge su arulanu pusisel kom ku in koneak ku lun mwusra.” Lela kut in akkalemye kain in oiye fulat inge lun Kraist—fulpap.
Sie Met Su Arulanu Fwokpap in Len Lal
11, 12. In fwal nu ke inkanek in kapek lal, efu ku fulpap lun Moses el arulanu mwo?
11 Me srikasrak se aktulo su kut akola in tuni pa ma kel Moses. Baibel el akkalemyel oanu “met su arulanu fwokpap, yok liki met e nu kemwa su muta fwin mutanfwalu.” (Oekyuk 12:3, footnote) Oiye lal inge su akkalemyeyuk simuyukla ye koko lun ngun mutal lun God. Fwokpap lal Moses su arulanu yok kasrel in arulanu pusisel ke kolyuk lun Jeova.
12 Kapek lal Moses ke el srakna srik arulanu sakuruk. Jeova el molela mwen se inge su ma nutin papa a nine Hibru oaru ke lusen pal in orekma silolel a akmas. Moses el muta ye kurungin lun nine kiel ke mutamweyen moul lal, a el kaifweung in lotel ke God paye, Jeova. Tok, elos eisla Moses in loom sel a el muta ke sie an sasu su siena liki an lal. “A Moses el lutlut in lalmetmet nu kemwa lun met Ijipt,” pa inge ma sie met Kristian su anwuki ke lalalfongi lal in pal meeta pangpang Stephen el esam. “A, [Moses] el ku in kas a orekma lal.” (Orekma 7:22) Lalalfongi lal akkalemyeyuk ke pal se el liye nununku sesumwos orekla nu sin met lili wiel sin met kulansap lal Fero su liaung met sruo. Meyen el uniye sie met Ijipt su arulanu akkeokye sie met Hibru, paenang Moses el enenu in kaengla liki Ijipt a muta in fwal Midian.—Exodus 1:15, 16; 2:1-15; Hibru 11:24, 25.
13. Mea muta lal Moses ke lusen yiu 40 in an Midian oru nu sel?
13 Ke el sun yiu 40 matwe, Moses el enenu in kurunganang moul lal sifwanu ke yen mwesis. In an Midian el osun nu sin tulik mutan itkosr lal Reuel a kasrelos in ut kof nimen un kosro lulap lun papa tumalos. Ke pal se ma elos foloko, mutan fwusr itkosr inge elos insemwomwo in akkalemye nu sel Reuel la oasr “sie met Ijipt” su molelosla liki met Seperd puspis su orek lokwalok nu selos. Ke solsol lal Reuel, Moses el muta yurin sou lal. Ma upa su el sun tianu aktoasryel ku srukye mulat lal; ku ma inge kutongyel in tia pala ke an sasu lal. Kena lal in oru ma lungse lun Jeova tia munasla ke kutena pal. Ke lusen yiu 40, oanu met liaung lun sip nutul Reuel, a payuk nu sel Zippora, su oswela mwen nutul, Moses el akkapye sie kain in oiye su oru el an arulanu pengpeng ka. Aok, ke sripen muteng lal ke ma upa yok ke lusen pal loes, paenang Moses el lutlut in fwokpap.—Exodus 2:16-22; Acts 7:29, 30.
14. Akkalemye ma sikyuk ke lusen pal in kolyuk lun Moses in an Israel su akkalemye fulpap lal.
14 Tokin Jeova el sang kunokon nu sel oanu sie met kol lun an Israel, oiye fulpap lal Moses srakna ku in akilenyuk. Sie mokul fwusr el akkalemye nu sel Moses la Eldad a Medad elos orekma oanu sie met palu ke imwen aktuktuk—elos fwinne tia muta ke pal se Jeova el okoela ngun mutal lal nu sin met matu 70 su akola in kulansap oanu met kasru lal Moses. Josua el fwak: “Moses leum luk, kom kutongultalu!” Moses el topuk ke fulpap: “Ya kom lemta keik? Ke met lun Jeova nu kemwa in met palu, tu Jeova lan filiye ngun lal fwelos!” (Oekyuk 11:26-29) Fulpap el ku in akfwusesrye me fos lulap.
15. Fwinne Moses el sesumwos, efu ku me srikasrak lal arulanu mwo kut in etawi?
15 Ke sie pal, fulpap el luman wangin sel Moses. In an Meriba, futoto nu Kadesh, el mulkunla in sang mwolanu nu sin Jeova, El Su Met Orek Menmen. (Oekyuk 20:1, 9-13) Fwinne Moses el met sesumwos, tusruktu lalalfongi lal su tia wanginla ke kutena pal akkeyel na paye ke lusen moul lal nu fon, a fulpap yok lal arulanu purakak insiesr fwinne ke pal inge.—Hibru 11:23-28.
Orekma Silolel Lain Fulpap
16, 17. Kain in kas in sensen fuka kut ku in eis ke me sramsram kel Nebal a Abegeil?
16 Sie me srikasrak su oupanu kas in sensen sikyuk in len lal Devid, tia pat tokin mise lal Samuel sie met palu lun God. Ma inge el sramsram ke seanyen payuk se pangpang, Nebal a Abigeil mutan kiel. Yok na paye ma tia oanu sie inmaslon met luo inge! Abigeil el “mwo a lalmetmet,” tusruktu mokul tumal el “kuo a likkeke in orekma lal.” Nebal el srunga in sang me mongo nu sin met lal Devid ke pal se elos siyuk, fwinne met inge kasrel Nebal in kurunganang u lulap lun sip nutul lain met pusrapasr. Meyen oasr sumwos lal in mulat, Devid a un met lal elos losye kutlas nutulos a som nu yurol Nebal in lainul.—1 Samuel 25:2-13.
17 Ke pal se Abigeil el long ma sikyuk, el silaklak in akola bred, ikwe, a cake pukanten orek ke raisin a fig a el silaklak in illa in sonol Devid. “Leum luk, lela meta in on fwuk, aok, on fwuk,” el siyuk sel. A lela mutan kulansap lom, Nga siyuk sum, in kaskas in srem, a kom porongo kas lun mutan kulansap lom.” Kas kulang lal Abigeil akfusesrye insiel David. Tokin el long aketeye lal Abigeil, Devid el fwak: “Insemwomwo Jeova, God lun Israel, su supekomme misenge in sun yu! A insemwomwo nunuk mwo lom, a insemwomwo kom, su srukyewi misenge liki metik ke sra.” (1 Samuel 25:18, 24, 32, 33) Kuo a likekke lal Nebal kol nu ke mise lal. Ke saflaiye, oiye mwomwo lal Abigeil sang nu sel insemwomwo in ekla mutan kiel Devid. Oiye fulpap lal oakiye sie me srikasrak nu sin met nu kemwa su kualnsap nu sin Jeova ke len inge.—1 Samuel 25:36-42.
Fwasr Tokin Fulpap
18, 19. (a) Kain in ekla fuka arulanu kalem ke kut nukomang fulpap? (b) Mea ku in kasre kut in tuni mwo moul lasr sifwanu?
18 Ke ma inge, fulpap el sie kain in oiye su arulanu yok sripe. Ma inge el yok liki kulang, sie kain in oiye mwo pa inge su purakak met ngie a sang mongle nu selos. In pal meeta, saap kut pala in sramsram ke inkanek kuo a sikulang. Tusruktu, tokin kut lotela ma paye, kut ekulla oiyen moul lasr a kut mutamwauk in akkalemye oiye kulang a mwo. Poul el sramsram ke ekla se inge ke pal se el kaifwe nu sin met lili Kristian wiel: “Komwos nukomang, oanu met sulosula lun God, mutal a kulu, inse pakoten, kulang, fwokpap, fulpap, mongfwusesr.” (Kolosse 3:12) Baibel el pupulyukin ma inge ke ekla lun kosro lemnak oanu—wolf, leopard, lion, bear, a cobra—nu ke kain in kosro muna su metu elos liaung oanu—sip, cow fwusr, a cow lulap. (Isaia 11:6-9; 65:25) Sakuruk na paye ekla se inge paenang elos su liye ma inge elos arulanu lut. Aok, ekla se inge sikyuk ke sripen kasru lun ngun mutal lun God, meyen sie ipen fwako sakuruk lal pa fulpap.
19 Ya kalmen ma inge pa, tokin kut ekla tari a mwolela moul lasr nu sin Jeova, kut tia sulpa enenu in akkapye fulpap? Mo, tia ou inge. Aok, nuknuk sasu nu kemwa enenu in karunganang pal nu kemwa tu in fwal a nasnas. In loang nu ke Kas lun God a in kalweni ke nunuk lasr me srikarak nu kemwa su oasr ka ku in kasre kut in orala nien sun sasu ke moul lasr sifwanu. Mea Kas lun God su orekma oanu selngun lungse in akkalemye nu sum?—Jemes 1:23-25.
20. Fuka kut ku in kutangla ke kaifweung lasr in akkalemye fulpap?
20 Meyen kais sie met tia oanu sie paenang oiye lalos tia pa oanu sie. Kutu sin met kulansap lun God elos arulanu fwusesr in akkalemye fulpap liki na kutu met. Fwinne ou inge, met Kristian nu kemwa enenu in akkapye fwako lun ngun mutal nu kemwa, wekunang fulpap. Poul el akkeyel Timote ke kulang: “Fwasr tokin sumwosmwos, mutal, lalalfongi, lungse, mongfwusesr, fwokpap.” (1 Timote 6:11) Kas se inge “fwasr” el akkalemye la kaifweung eneneyuk. Sie leng lun Baibel el akkalemye kas inge in kaifwe inge oanu ‘sang insiom nu ka.’ (New Testament in Modern English, by J. B. Phillips) Kom fwin kaifweung in nunku pal nu kemwa ke me srikasrak mwo puspis su tuku ke Kas lun God, ma inge ku in wi ipen moul lom a kom tia mulkunla, oanu ma inge filiyuki tari ke munom. Oanu ma eoki ke insiom su ku in kol kom.—Jemes 1:21.
21. (a) Efu kut enenu in kaifweung in suk fulpap? (b) Mea ma inge su kut akola in sramsramkin ke me lutlut toko?
21 Oiye su kut akkalemye nu sin kutu met, el akkalemye lupan kaifweung lasr in orekmakin fulpap ke moul lasr. “Su sumwos etu a lalmetmet?” Met tuma lutlut Jemes el siyuk. “Lela lan fwakak orekma mwo ke moul mwo in efwal a lalmetmet.” (Jemes 3:13) Fuka kut ku in akkalemye oiye se inge lun met Kristian in loom sesr, ke orekma lun forfor lun met Kristian, a in congregation? Me lutlut toko el akkalemye me kasru mwomwo.
In Kalweni
• Mea ma kom lotela tari ke fulpap su tuku ke me srikasrak lun
• Jeova?
• Jisus?
• Moses?
• Abigeil?
• Efu kut enenu in kaifweung in suk fulpap?
[Picture on page 20]
Efu Jeova el insemwomwo ke me kise lal Kein?
[Picture on page 21]
Jisus el akkalemye fulpap a inse pusisel kemwanu
[Picture on page 22]
Moses el oakiye met srikasrak mwo ke fulpap