Jeova el Long Pre Lasr in Siyuk ke Kasru
“Mutun Jeova on nu sin met sumwosmwos, a srel igakla nu ke pang [“tung,” NW] lalos.”—SAM 34:15.
1, 2. (a) Mea pulakin a nunak lun met puspus ke pal inge? (b) Efu ku kut tia lut ke oiya inge?
YA KOM pulakin me keok upa? Aok, tia kom mukena pulakin kain in oiya inge. Million puspus sin met elos kafweang in muteng ke ma upa puspus ke moul len nukewa ke akwuk koluk fwin fwalu inge. Nu sin kutu met, me akkeok lalos nunkeyuk mu elos tia ku in muteng ka. Elos pula pa mu oana sie nu ke ma Devid el simusla inge: “Nga mulalla a arulana kusennisra, nga sao ke tia misla insiuk. Foko insiuk arulana kumkum, ku luk wanginla, a fono ke kalem lun mutuk el ouyepa fwasr liki yu.”—Sam 38:8, 10.
2 Kut oana met Kristian, kut tia lut ke me keok puspus lun moul. Meyen kut etu a kalem ka la “asor yok” el sie sin me akul puspus nu ke oasr tari lun Jisus su palyeyuk tari. (Mark 13:8; Mattu 24:3) Kas Grik su lungasyukla nu ke “asor yok” el sramsramkinyuk nu ke waek upa su pulakin sin sie mutan ke pal el oswela sie tulik srisrik. Aok kas se inge el akkalemye kalem ke upala lun me keok su metu elos sun ke pal inge su oasr “ongoiye” puspus, ku pal “upalanu” su oasr “me keok puspus ka”!—2 Timote 3:1; Kingdom Interlinear.
Jeova El Etu a Kalem Ke Me Keok Nukewa Lasr
3. Mea met kulansap lun God elos etu a kalem ka na paye?
3 Met kulansap nukewa lun Jeova elos etu na paye la elos ku in sun pa me keok puspus inge, a kalem la, ma upa puspus su sikyak e fwa yokyokelik na paye liki meet. Sayen ma upa nukewa su metu sun ke pal inge, in oana met kulansap lun God kut wi pa pulakin me lain upa puspus lun “met lokwalok, Devil,” su lungse na paye in akmunasye lulalfongi lasr. (1 Piter 5:8) Kut ku in pula pa oana ma Devid el pula in pal meeta: “Kunausla insiuk ke kaskou, a nga tingtingi ke toasr. A nga fwinsrak tu kutena fwa pakomutuk, a wangin; a ke met akpwarye, a nga tia liye sie”!—Sam 69:20.
4. Mea ku in akkeye kut fwin kut sun me keok puspus?
4 Ya Devid el lungse in akkalemye la wanginla kutena fwinsrak lal? Mo. Loang akmwoye nu ke kutupa kas lal ke sam se inge: “Tu Jeova el long elos su enenu, a el tia pilesru met prison lal,” ku “met kulansap lal oana met prison puspus.” (Sam 69:33, ftn., NW) Kalmen ma inge pa, oasr pal kut ku in pulakin mu kut oana met prison ke sripen me keok a ma upa puspus su kut pulakin. Saap met puspus saye elos tia etu a kalem ke ma sikyak nu sesr. Tusruktu, in oana Devid, kut ku in eis me akkeye ke kut etu la Jeova el etu na paye me keok nukewa su kut sun.—Sam 34:15.
5. Ke mea Togusra Solomon el lulalfongi ka?
5 Solomon mwen natul Devid el akkalemye yok ke ma paye inge ke pal in kisekinyukla temple lun an Jerusalem. (Ridi 2 Kronikel 6:29-31.) El siyuk sin Jeova in long pre lun kais sie met su paye insielos ke pal se el pre nu Sel ke “me lokwalok lal sifwana a asor lal sifwana.” Oiya fuka God el akkalemye nu sin met nukewa inge su pulakin asor yok? Solomon el akkalemye lulalfongi fukoko lal la God el fwa long pre lalos a el fwa oru kutena ma in sang kasrelos. Efu? Meyen el etu na paye ma oasr ke “insien tulik nutin metu.”
6. Fuka kut ku in muteng ke me fosrnga yok, a efu?
6 Ke inkanek oapana inge, kut ku in akkalemye nu sin Jeova ke inkanek lun pre ke ‘me lokwalok lasr sifwana a ke asor lasr sifwana,’ ku me keok lun kais sie sesr. Kut ku in eis me akkeye yok la el etu a kalem ke me keok nukewa lasr a el fwa karungin kut. Met sap Piter el akkalemye me akpayeye ka ke el fwak: “A komwos in likiye nu kemwa sensen lomwos nu fwel, tu el karungin komwos.” (1 Piter 5:7) Jeova el loang yok nu ke ma puspus su sikyak nu sesr. Jisus el akkalemye yok ke me karungin mwomwo lun Jeova ke el fwak: “Ya elos tia kukakunla luo mwon ke sie penni? A wangin sie selos fwa putati nu in foko, a Papa tumomwos tia liye. A aunsifomwos nu kemwa oekyukla. Ke ma inge nik komwos sangeng: komwos saok liki mwon sparro puspus.”—Mattu 10:29-31.
Lulalfongi ke Kasru lun Jeova
7. Ke kain in me kasru fuka mwuleyukla nu sesr?
7 Kut ku in lulalfongi na paye la Jeova el lungse a el ku in kasre kut fwin kut sun me keok puspus. “God el nien molela nu sesr, a ku lasr, su arulana apkurun nu sesr in pal in keok in kasre kut.” (Sam 34:15-18; 46:1) Ke inkanek fuka Jeova el ase nu sesr kain in me kasru inge? Nunku akmwoye ke ma 1 Korint 10:13 el akkalemye: “Wangin me srifwe nu sumwos, a me srifwe na su met elos ku ka, a God el oaru, su fwa tia liki komwos in srifweyuk yok liki ku lomwos, a in me srifwe el fwa oru inkanek in kaengla tu komwos in ku ka.” Jeova el ku in orala inkanek puspus in sang kasru in akwanginyela me lokwalok lasr, ku el ku in ase nu sesr ku su kut enenu in muteng ka. Ke kutena inkanek inge, Jeova el fwa kasre kut.
8. Fuka kut ku in oru inkanek in eis a engankin me kasru lun God?
8 Fuka kut ku in oru inkanek in eis a engankin me kasru inge? Loang akmwoye nu ke kas in kai ke ma kut enenu in oru: “A komwos in likiye nukewa sensen lomwos nu fwel.” Kalmen kas inge pa kut in lela Jeova in karungin kut ka a in nunku kesr. Kut kafweang in tia fosrnga a in akkalemye lulalfongi lasr nu sel in karungin ma enenu nukewa lasr. (Mattu 6:25-32) Kain in lulalfongi inge oasr ma eneneyuk nu sesr ka in akkalemye inse pusisel, a kut in tia fungfung nu ke ku a lalmetmet lasr sifwana. Kut fwin akpusiselye kut sifwana “ye po ku lun God,” ke ma inge kut akkalemye la kut akilen la kut arulana pusisel liki God. (Ridi 1 Piter 5:6.) Paenang ma inge ku in kasre kut in muteng ke kutena ma su God el lela. Kut lungse in oasr me aksumwos nu ka ke pal na sa, tusruktu kut ku in lulalfongi la Jeova el etu na paye la ngea a fuka el fwa oru me kasru lal nu sesr.—Sam 54:7; Isaia 41:10.
9. Kain in me utuk toasr fuka Devid el enenu in sang nu sin Jeova?
9 Srike in esam kas lal Devid su simusyukla in Sam 55:22: “Filiye me utuk lom fwin Jeova, a el fwa kasre kom. El koflana filiye met sumwosmwos tu in mukuikui.” Ke pal se Devid el simusla kas inge, el pulakin me keok yok. (Sam 55:4) Kalem la sam se inge el simusyukla ke pal se mwen natul su pangpang Absalom el orala akwuk in eisla kolyuk lukel. Mokul se inge su pangpang Ehitofel, el pa met se su sang kas in kasru nu sel Devid su el lulalfongi yok ka, el wi mwen se natul ke orekma in kasru nu ke orekma in lain inge. Devid el enenu in kaengla nu Jerusalem in molela moul lal. (2 Samuel 15:12-14) Fwinne ke pal se su oasr me keok upa nukewa inge, Devid el tafwela na in lulalfongi nu sin God, a ke ma inge God el kasrel a karunganul.
10. Mea kut enenu in oru kut fwin sun me keok puspus?
10 Arulana yok sripe la kut, oana Devid, in sramsram nu sin Jeova ke inkanek lun pre ke kutena me keok ku me aktoasr a me akasor yok su kut ku in sun ke pal inge. Lela kut in nunku yok ke ma met sap Poul el akkeye kut ka in oru. (Ridi Filippai 4:6, 7.) Mea kain in pre oinge su tuku ke insiesr ku in oru? “Misla lun God, su alukela ma eteyuk nu kemwa, fwa liaung insiomwos a nunkomwos in Kraist Jisus.”
11. Fuka “misla lun God” el karungin insiesr a ku lun nunak lasr?
11 Ya pre el ku in sang kasru in ekulla kutena ma upa su sikyak nu sum? Aok ma upa su sikyak nu sesr ku in ekla. Tusruktu, kut enenu in akilen la Jeova el tia topuk pre lasr ke oiya se su kut lungse pal nukewa. Fwinne oinge, pre el kasre kut in sruokye sie nunak mwomwo pal nukewa, a pre el oru kut in tia fuleak nunak mwomwo nukewa lasr. “Misla lun God” ku in kasre kut in oasr misla in nunak ke pal se kut asor na paye ke sripen nunak a pulakin tia mwo. In oana ke sie u lun met meun su sapkinyuk in karungin sie siti liki sruo lun met lokwalok koluk, “misla lun God” fwa karungin insiesr a ku lun nunak lasr. Ma inge ku in kasre kut pa in akwanginyela nunak in alolo lasr, sangeng lasr, a nunak tia mwo lasr a in karungin kut in tia sa oru kutena ma fwin kut tia nunkela ka meet.—Sam 145:18.
12. Sang me pupulyuk nu ka la fuka sie met el ku in sruokye misla lun nunak lal.
12 Fwin kut sun me keok ku me asor yok puspus fuka kut ku in sruokye misla ke nunak in pal nukewa? Nunku akmwoye nu ke sie me pupulyuk su ku in sang me akuteye mwomwo nu ke kutena ma su sikyak nu sesr. Oasr sie met orekma su oru orekma lal ye kolyuk lun sie manager koluk. Tusruktu, met orekma se inge el eis sie pal mwomwo lal in akkalemye nunak a pulakin lal nu sin met se ma la company se inge, su el sie met na kulang, a oasr nunak mwomwo yurol. Met se ma la company se inge el mwulela nu sin met orekma se inge la el kalem ke ma sikyak nu sel a akkalemye nu sel la manager koluk se inge fwa tia pat el sisila liki an mwomwo se lal inge. Mea pulakin lun met orekma se inge nu ke mwulela se inge? Fwin oasr lulalfongi nu ke mwulela se inge a in kalem ke ma su fwa orek el ku in akkeye sulela lal in tafwela na orekma lal, fwinne el sun ma upa puspus su fwa sikyak ke kitin pal. Ke inkanek oapana inge, kut ku in etu la Jeova el etu a kalem ke ma sikyak nu sesr, a el mwulela ka nu sesr la tia pat “leum lun fwal se inge fwa sisyukla.” (Jon 12:31) Ma se inge el sie me akkeye na paye!
13. In wekunang nu ke pre, mea pa kut enenu in oru?
13 Ke ma inge, kut fwin akkalemye a filiye ma upa puspus lasr nu sin Jeova, ya ma inge fwal tari a wanginla ma eneneyuk saye? Mo. Srakna oasr ma puspus saye su eneneyuk. Kut enenu in akfwalye orekma lasr in fwal nu ke ma kut fwak ke pre lasr. Ke pal se Togusra Soul el supwela met puspus nu ke loom sel Devid in unilye, Devid el pre: “Moliyula liki met lokwalok luk, O God luk; filiyuwi fulat lukelos su tuyuk lain yu. Moliyula liki met orek ma koluk, a langoyula liki met srasra.” (Sam 59:1, 2) In wekunang nu ke pre, Devid el porongo pusran mutan kiyel a el orala akwuk elan kaengla. (1 Samuel 19:11, 12) Ke inkanek oapana inge, kut ku in pre siyuk ke etauk mwomwo su ku in kasre kut in kutangla a muteng ke ma upa nukewa a in kasre kut in akmwoye ma upa puspus lasr.—Jemes 1:5.
Fuka Kut Ku In Eis Ku in Muteng
14. Mea ku in kasre kut in muteng fwin oasr me keok puspus su sun kut?
14 Me keok puspus lasr tia ku in sa akwanginyeyukla. Saap ma inge ku in on ke kitin pal ku kutu pal. Fwin pa inge ma sikyak nu sesr, mea fwa ku in kasre kut in muteng? Ma se meet, lela kut in esam la kut fwin sruokye ku orekma in kulansap lasr nu sin Jeova ke paye a oaru fwinne oasr ma upa puspus, kut akpayeye lungse lasr nu sel. (Orekma 14:22) Esam pal nukewa ke oiyen kaskas kikiap lal Setan kel Job: “Ya Job el sangeng sin God ke wangin? Ya kom tia oru sie kalkal raunella, a apunla loom sel, a apunla ma lal nu kemwa, siske nu kemwa? Kom akinsemwomwoye orekma lun paul, a me kasrup lal yokelik in fwalu. A inge asroela poum, a kalye ma lal nu kemwa—a el fwa pilesre kom ye mutom!” (Job 1:9-11) Ke sripen paye a oaru lal, Job el akpayeye la kas lun Setan inge el kaskas kikiap a tia na paye. Ke kut kafweang in muteng ke pal se su oasr me keok puspus sun kut, oasr pa pal mwomwo lasr in akpayeye la Setan el kikiap. Ke sripe inge, mongfusesr lasr el akkeye fwinsrak lasr a lulalfongi lasr.—Jemes 1:4.
15. Kain in me srikasrak fuka ku in akkeye kut?
15 Ma se akluo, esam la “keok sana oreyuk tari in met limwos su in fwalu.” (1 Piter 5:9) Aok, “wangin me srifwe nu sumwos, a me srifwe na su met elos ku ka.” (1 Korint 10:13) Ke ma inge kom ku in eis ku a pulaik ke kom nunku akmwoye ke me srikasrak lun met puspus a tia in loang akmwoye na nu ke me keok puspus lom sifwana. (1 Tessalonika 1:5-7; Hibru 12:1) Orekmakin pal yok in nunku ke me srikasrak lun met oaru puspus su muteng fwinne elos sun me keok upa puspus. Ya kom lutlutkin yok ke experience puspus su akkalemyeyuk ke me rid puspus natusr in etu ke ma upa puspus su elos sun su oana sie nu ke ma sikyak nu sum? Kom ku in liye la ma inge el sropon me akkeye yok lom.
16. Ke inkanek fuka God el akkeye kut fwin kut sun ma upa puspus?
16 Ma se aktolu, esam la Jeova pa “Papa tumun pakomuta a God lun pwarak nu kemwa su akpwarye kut in keok lasr nu kemwa, tu kut fwa ku in akpwaryelos su muta in kutena keok, ke me pwarak su kut sifwana akpwaryeyuk ka sin God me.” (2 Korint 1:3, 4) Ke kas in pupulyuk God el tu siskesr in akkeye kut a akpwarye kut, tia ke me keok lasr ke pal inge mukena, a “ke keok lasr nukewa.” Ma inge ku in oru kut in akkeye met puspus “in kutena keok” lalos. Poul el liye a pulakin pa la kas inge paye.—2 Korint 4:8, 9; 11:23-27.
17. Fuka Baibel el ku in kasre kut in muteng ke me keok a ma upa puspus lun moul?
17 Ma se akakosr, oasr yurosr Kas lun God, Baibel, su “oasr sripe in luti, in kai, in aksumwosye, a in aketeye ma sumwosmwos nu sin met tu met lun God in sumwosna, a akola fwal nu ke orekma mwo nu kemwa.” (2 Timote 3:16, 17) Kas lun God el oru kut in “sumwosna” a “akola fwal nu ke orekma mwo nukewa.” Ma inge ku in kasre kut pa in muteng ke ma upa puspus lun moul. Ma inge oru kut in “sumwosna” a “akola fwal” ke inkanek yok. Kalmeyen kas Grik su lungasyukla nu ke “akola fwal” pa “arulana fwal nu ke kutena ma.” Kas inge ku in orekmakinyuk in pal meeta ke sie oak su arulana fwal a oasr ma nukewa ka su eneneyuk nu ke orekma in kasrusr fwin kofu, ku ke sie engine su ku in oru kutena ma fwal nu ke akwuk su el orekla nu ka. Ke inkanek oapana inge, Jeova el ase nu sesr ma nukewa su kut enenu nu ke kasru lun Kas lal tu kut in muteng ke kutena ma su kut sun. Ke ma inge, kut ku in fwak mu, “Fwin God el lela sie me keok in sikyak, Nga ku in muteng ka, ke sripen oasr kasru lal.”
Me Molela Liki Me Keok Nukewa Lasr
18. In loang akmwoye ke mea fwa kasre kut pa in oaru in muteng?
18 Ma se aklimekosr, loang akmwoye pal nukewa ke ma paye la tia pat Jeova el fwa aksukosokyela metu liki me keok nukewa. (Sam 34:19; 37:9-11; 2 Piter 2:9) Ke pal se su ma inge akpayeyuk, molela lasr ke inkanek lun God el kalmekin molela lasr liki me keok nukewa ke pal inge a oayepa ke pal mwomwo in eis moul ma patpat, nu sin met nukewa su oasr fwinsrak in som nu in kosrao, ku nu sin met nukewa su oasr fwinsrak in moul ke sie paredais.
19. Fuka oiyen oaru in muteng ku in akkalemyeyuk na paye?
19 Nu ke pal se, kut tafwela in muteng ke me keok puspus su sikyak ke fwal koluk se inge. Kut arulana lungse in liye ke pal se su me keok nukewa wanginla! (Sam 55:6-8) Lela kut in esam la oiyen oaru lasr in muteng el sang me akpayeye la Devil el kikiap. Lela kut in eis ku ke pre lasr a ke u lun met lili Kristian wiyesr, a esam pa pal nukewa la met lili wiyesr elos sun pa ma upa puspus su oana sie ke ma kut sun. Tafwela na in orekmakin oiyen utuftuf a akola fwal ke oiya nukewa ke inkanek in orekmakin Kas lun God. Nikmet lela lulalfongi lom ke karungin mwomwo lun “God lun pwarak nukewa” in munasla. Esam pal nukewa la “mutun Jeova on nu sin met sumwosmwos, a srel igakla nu ke pang lalos.”—Sam 34:15.
Ya Kom Ku In Topuk?
• Mea pulakin lal Devid ke me keok puspus su el sun?
• Kain lulalfongi fuka Solomon el akkalemye?
• Mea ku in kasre kut in muteng ke ma upa puspus su Jeova el lela?
[Picture on page 17]
Solomon el lulalfongi la Jeova el fwa kasru met kulansap nukewa Lal su keok