Akfototoye Kom nu sin God
El Su Ku In Folokonak Moul lun Sie Met
YA OASR sie met ke sou lom ku sie sin met kawuk lom el mise? Fwin oasr, saap kom pulakin tari sie me asor yok su ku in sikyak ke moul. Met Orekutla el kalem ke asor yok lom. Sayen ma inge, el ku in akwanginyela mise. In Baibel, el akkalemye nu sesr ma simusla ke sifwil moulyuk su sikyak in pal meeta in akkalemye la El pa sang moul nu sin kais sie met a El pa ku in akmoulyeyuk sie met mise. Lela kut in lutlutkin ke sie orekma in akmoulyeyak met mise ke el sang ku nu sin Mwen natul, Jisus Kraist, in oru ma inge. Me sramsram ke mwenmwen se inge el simusyukla in Luk 7:11-15.
Ma inge sikyak in yea 31 C.E. Jisus el fwufwasryesr nu in an Nain, sie siti fwin an Galili. (Fus 11) Pal se inge el apkurun nu ke eku ke pal se el sun siti se inge. Baibel el akkalemye: “A ke el kalukyung nu ke mutunpot lun siti sa, liye, elos wisla sie met mise, mwen siefwanna nutin nine kiel. A el sie katinmas. A met puspus lun siti sa oelul.” (Fus 12) Ya kom ku in lumala ke nunak lom ke asor yok lun nine se inge? Ke mise lun mwen siefwanna natul inge, el pulakin ke pal akluo inge la met su fwa sang ma enenu lal a met se su fwa karunganul el wanginla.
Jisus el loang akmwoye nu sin nine se su arulana asor inge, su kalem la el fwasr apkurun ke pok in mas lun mwen se natul inge. Ma simusla el akkalemye: “A ke Leum el liyel, el pakomutal, a fwak nu sel: ‘Nikmet tung.’” (Fus 13) Jisus el akkalemye pakomuta yok nu sin mutan katinmas se inge su sun me asor yok. Saap el nunku yok ke nine sifwana kiyel, su saap el katinmasla in pal san, su tia pat el fwa asor pa ke ma su fwa sikyak nu sel.
Jisus el tuku nu yurolos—tusruktu el tia welulos in som nu ke an in pukpuki mas. El mukuikui oana sie met su oasr ku yok lal, a el “kal me on lun met mise sa” a el sapkin un met inge elos in tui. A el kaskas ke sie pusra oana sie met su oasr ku in akwanginyela mise, el fwak: “‘Met fwusr, Nga fwak nu sum, Tukakek!’ A el su mise el tukakek a muta, a mutamwauk in kaskas, a el esalang nu sin nine kiel.” (Fus 14, 15) Met fwusr se inge el tila ma lun nine kiyel ke pal se el mise. Ke ma inge ke pal se Jisus el “esalang nu sin nine kiyel,” elos sifwilpa orala sie sou. Wangin alolo ka la me asor yok su oasr ke insien mutan katinmas se inge el wanginla a el tung ke sripen insemwomwo yok lal ka.
Ya kom lungse pa in pulakin kain in me insemwomwo yok inge—in sifwilpa liye sie sin sou lom su mise tari? Kom ku in lulalfongi la Jeova el etu pa pulakin lom inge. Pakomuta lun Jisus nu sin mutan katinmas se su asor yok el akkalemye ke pakomuta su God el pula pa, meyen Jisus el etawi na paye oiya mwomwo nukewa lun papa tumal. (Jon 14:9) Kas lun God, Baibel el luti kut la God el lungse in akmoulyeak met mise nukewa su oasr ke me esmakin lal. (Job 14:14, 15) Baibel el akkalemye sie fwinsrak na mwomwo, fwinsrak inge pa in moul ke sie paredais fwin fwalu a oasr pal mwomwo lasr in liye ke sifwil moulyuk lun met nukewa su kut lungse su mise. (Luk 23:43; Jon 5:28, 29) Efu ku kom tia akyokye etauk lom ke God su ku in Folokonak moul lun met mise a la fuka kom ku in akkeye fwinsrak lom inge?
[Picture on page 29]
“El su mise el muta a mutamwauk in kaskas, a el esalang nu sin nine kiyel”