Tuni a Lutlutkin Yok “Ma Loal lun God”

“Tu ngun el tuni ma nu kemwa, aok, ma loal lun God.”​—1 KORINT 2:10.

1. Mea kutu me luti paye lun Baibel su ku in akinsemwomwoye tulik lutlut sasu nukewa ke Baibel?

KUT nukewa su oasr ke congregation lun met Kristian ku in esamak ke pal se meet kut eis etauk ke ma paye. Kut lotela tari la efu ku inen Jeova el yok sripe, a efu ku el lela in oasr me keok, a efu ku tia met nukewa som nu in kosrao, a mea akwuk nu sin met oaru nukewa ke pal fwasru. Saap oasr pal kut lutlut ke Baibel meet, tusruktu etauk lun ma inge nukewa tia akuteyuki nu sesr, in oana ke met puspus elos eis in pal inge. Kut ku in lumeyukla nu ke sie met su tili nu in kofu in liye kutu eka su on in kofu. Fwin wangin kutena me kasru nu ke mutal, el koflana liye kutena ma kato su oasr ye kofu. Tusruktu fwin oasr kutena kain in glass in turong ku kutena kain in oaku su orek ke glass, met se el ku in liye a tuni akmwoye ke katoiye a sakurukiyen eka puspus su on ye kofu, ke aten ik, ke aten ma orakrak in kofu, a ke kutena ma moul puspus su oasr in kofu. Ma inge lumeyukla in oapana, ke pal se met se el mutamwauk in eis etauk paye su ku in sang me akuteye kalem a mwo nu ke kalmeyen ma simusla puspus su oasr in Baibel, ke pal se meet el lutiyuk ke “ma loal lun God.”​—1 Korint 2:8-10.

2. Efu ku me insemwomwo yok in eis etauk ke kas lun God tia ku in wanginla?

² Ya kut fwalkin in long mukena me luti paye lun Baibel? Kas se inge “ma loal lun God” el kalmekin nu ke lalmetmet lun God su akkalemyeyuk ke orekma lun ngun mutal paenang tia met nukewa ku in eis etauk inge. (1 Korint 2:7) Wangin kutena ma ku in lumeyuk nu ke lalmetmet lun God su yoklana me insemwomwo tuku ka! Kut tia ku in aksafyela inkanek puspus in eis etauk nu ke oiyen lalmetmet lun God. Me insemwomwo yok su kut engankin ke pal se meet kut eis me luti paye lun Baibel fwa tia ku in wanginla kut fwin sruokye ku etauk inge a kafweang in lotela ke “ma loal lun God.”

3. Efu ku kut enenu in eis etauk yok nu ke oiyen lulalfongi lasr?

³ Efu ku kut enenu in eis etauk yok ke “ma loal”? Tia fwal in eis etauk ke ma kut lulalfongi mukena tusruktu ke sripe yok fuka ku in oasr lulalfongi lasr ka​—akuteye sripen lulalfongi lasr—​akkeye lulalfongi a me fwinsrak paye lasr. Ma simusla nukewa ke Baibel el fwakak nu sesr in akkalemye oiyen “ku lun nunak in sang me top sumwos” ku in kasru “tu kut in srike mea lungse lun God, su mwo a me akinsemwomwo a sumwoslana.” (Rom 12:1, 2, NW) Fwin oasr kalem yok nu ka la efu ku God el sapkin nu sesr in moulkin inkanek oinge fwa ku in kasre kut in akos ma nukewa su el sapkin nu sesr. Ke ma inge, etauk yok nu ke “ma loal nukewa” fwa ku in akkeye kut in lain kutena kain in me sruf nu ke orekma lun ma koluk a in kasre kut in filiye ke nunak lasr oiyen “moniyuk nu ke orekma mwo.”​—Taitus 2:14.

4. Mea weang nu ke lutlut lun Baibel?

⁴ Fwin kut lungse in oasr etauk nu ke ma loal nukewa enenu in oasr nunak in kafweang yok nu ke lutlut. Tusruktu, lela in kalem la inkanek in lutlut el tia oana sie nu ke oiya se su orek nu ke inkanek in rid mukena a tia nunku yok ka. Inkanek in lutlut el enenu in oasr inkanek in tuni a loang akmwoye nu ke me lutlut in eis etauk paye a sumwos nu ke ma su eteyuk tari. (2 Timote 1:13) Ke akwuk oinge oasr ma eneneyuk in oasr kalem mwomwo ka yok na nu ke ma su fwakyuk tari. Lutlut lun Baibel el oasr ke oiya lun muta nunkela la fuka kut ku in orekmakin ma kut lotela tari in sang kasru sulela sumwos a in kasru kutu pa met saye. Ke sripen “Baibel nukewa etuku ke ngun lun God a oasr sripe,” ke ma inge kut enenu in lutlutkin “ke kas nu kemwa su tuku liki oalin God.” (2 Timote 3:16, 17; Mattu 4:4) Oasr ma eneneyuk in orek nu ke kafweang yok nu ke lutlut lun Baibel! Tusruktu orekma inge el me akinsemwomwo, a in eis etauk yok ke “ma loal lun God” el tia arulana upa.

Jeova el Kasru Met Fwokpap In Eis Kalem

5. Su ku in etu a kalem ke “ma loal lun God”?

⁵ Fwinne kom tia arulana sumat ke loom lutlut a kom tia pala in lutlut, kom tia enenu in nunku mu kom tia ku in eis kalem ke “ma loal lun God.” Ke lusen pal in oru orekma in luti lun Jisus, Jeova el akkalemye etauk ke akwuk Lal, tia nu sin met lalmetmet, a nu sin met tia lutlut a silalkung tusruktu elos inse pusisel na paye in lutiyuk sin Jeova. Elos oana sie tulik srisrik fwin srikeyuk nu sin met puspus su eis me lutlut yok ke loom lutlut puspus. (Mattu 11:25; Orekma 4:13) Ke “ma God el akoe nu sin met su lungse el,” met sap Poul el simusla nu sin met Kristian puspus: “God El fwakak ma inge nu sesr ke ngun, tu ngun el tuni ma nu kemwa, aok, ma loal lun God.”​—1 Korint 2:9, 10.

6. Mea kalmen 1 Korint 2:10?

⁶ Fuka ngun lun God el tuni “ma nukewa, aok, ma loal lun God”? Ngun mutal el tia akkalemye ma paye ke inkanek su el sang ma inge nu sin kais sie met Kristian, tusruktu Jeova el orekmakin ngun mutal lal in kol u lal, su sang etauk yok ke Baibel nu sin met kulansap nukewa lun God su oasr inse sefwanna lalos. (Orekma 20:28; Efesus 4:3-6) Fwin fwalu nufon, congregation nukewa elos engankin akwuk mwomwo ke lutlut lun Baibel su oana sie yen nukewa. Ke lusen yea puspus, congregation nukewa elos lutlutkin me luti nukewa lun Baibel. Ngun mutal el orekma ke congregation in kasru met puspus in akfwalye oiya lalos su eneneyuk in etu ke “ma loal lun God.”​—Orekma 5:32.

Mea Weang nu ke “Ma Loal lun God”

7. Efu ku met puspus elos tia ku in kalem ke “ma loal lun God”?

⁷ Kut tia enenu in nunku mu “ma loal” el me luti puspus su upa in eteyuk a kalem ka. Etauk ke “ma loal lun God” el losr nu sin met puspus, tia ke sripen etauk ke God el arulana upa in kalem, tusruktu ke sripen Setan el kiapela metu elos in pulesru me kasru su Jeova el orala ke inkanek lun u Lal.​—2 Korint 4:3, 4.

8. Ma loal fuka Poul el sramsramkin ke sapta aktolu ke leta lal nu sin met Kristian in an Efesus?

⁸ Sapta aktolu ke leta lal Poul nu sin met Kristian fwin an Efesus el akkalemye la oasr pa ma puspus su weang nu ke “ma loal lun God” su pus sin met kulansap lun Jeova elos arulana kalem ka, oana ke etauk ke Fute su God el mwulela ka, ke orekma in sulela kutu met in masrlon met puspus in oasr fwinsrak lalos nu ke moul in kosrao, a ke Togusrai lun Messaia. Poul el simusla: “Su in fwil meeta tia akkalemyeyuk nu sin tulik nutin met, oana fwakyuk inge nu sin met sap mutal lal a met palu in ngun, pa inge, tu met pegan elos met usru yurolos, a mano siefwanna, a met ipeis in mwuleung lun Kraist Jisus.” Poul el fwak la el srusrngiyuki tari in “akkalemye met nu kemwa ke orekma in ma lukma su mwukla omeet me in God.”​—Efesus 3:5-9.

9. Efu ku sie kunokon na mwomwo in eis etauk ke “ma loal lun God”?

⁹ Poul el tafwela in akuteye ke ma lungse lun God la “lalmetmet lun God, kain puspus, a fwak kalem inge nu sin met leum a met ku in kosrao ke inkanek lun congregation.” (Efesus 3:10, NW) Lipufan puspus elos eis ma lane ke elos liye a eis etauk ke orekma lun God nu sin congregation lun met Kristian. Sie me insemwomwo nu sesr in eis kalem ke ma puspus su oru pa lipufan puspus in tuni a lutlut ka! (1 Piter 1:10-12) Tok, Poul el fwak la kut enenu in “etu yurin met mwo nukewa mea sralupa a luse a fulata a loal” lun lulalfongi lun met Kristian. (Efesus 3:11, 18) Ingena lela kut in lutlutkin kutu me pupulyuk ke ma loal puspus su ku in akyokye etauk lasr.

Me Srikasrak ke Ma Loal Puspus

10, 11. In fwal nu ke ma Simusla, ngea Jisus el ekla ip se meet lun “futen” “mutan” lun God in kosrao?

¹⁰ Kut etu la Jisus pa ip se meet ke “fute” lun “mutan” lun God in kosrao su sramsramkinyuk in Genesis 3:15. In akyokye kalem lasr ka, kut ku in siyuk: ‘Ngea Jisus el ekla Fute se su God el mwulela? Ya ma inge sikyak ke pal se meet liki el ekla sie met, ke pal se el isusla oana sie met, ke pal in baptais lal, ku ke pal se el akmoulyeyukyak?’

¹¹ God el mwulela ka la ipen u lal in kosrao, su sramsramkinyuk ke kas palu se inge su oana “mutan,” el fwa orala sie fute su fwa kunausla sifwen serpent. Tusruktu oasr tausan puspus yea somla, a mutan se lun God inge el tia orala fute se su ku in kunausella Setan a orekma lal. Aok, kas palu lal Isaia el akkalemyel oana mutan “talap” sa a “toasr insie.” (Isaia 54:1, 5, 6) Tokin yea puspus somla, Jisus el isusla in an Betleem. Tusruktu, tokin pal in baptais lal, ke pal se el akmusrala ke ngun mutal a ekla sie mwen su oasr fototo mwomwo lal nu sin God, a ke pal se inge Jeova el akkalemye: “El inge Mwen kulu Nutik.” (Mattu 3:17; Jon 3:3) Ip yok se meet lun “fute” lun mutan el akkalemyeyuk kel sifwana. Tok, met tuma lutlut lun Jisus elos akmusrala pa ke ngun mutal a elos ekla pa mwen nutin God. “Mutan” lun Jeova, su ke pal loeloes el pulakin mu el sie “mutan su tia isusla,” ke pal se el ku in “wowoyuk ke pusra lulap.”​—Isaia 54:1; Galetia 3:29.

12, 13. Fus puspus fuka akkalemye la met Kristian akmusrala nukewa fwin fwalu elos orala “met kulansap oaru a lalmetmet”?

¹² Me srikasrak akluo ke ma loal su akkalemyeyuk nu sesr pa ke akwuk lun God ke orekma in sulela 144,000 in masrlon metu. (Fwakyuk 14:1, 4) Kut kalem ka a lulalfongi la met akmusrala nukewa su moul fwin fwalu ke kutena pal elos wi ke u lun “met kulansap oaru a lalmetmet” su Jisus el fwak la elos akola “me mongo” ke pal fwal nu sin met in loom sel. (Mattu 24:45) Fus fuka in Baibel sang me akpayeye ka la etauk ke ma inge el sumwos? Ya Jisus el tia sramsramkin kutena met Kristian su sang me akkeye nu sin met lili wiyelos ke inkanek in akola me lutlut in akkeye fototo lalos nu sin God?

¹³ God el fwak nu sin mutanfwal Israel: “Komwos met lo luk . . . a met kulansap luk, su Nga sulela.” (Isaia 43:10) Tusruktu in Nisan 11 in yea 33 C.E., Jisus el fwak nu sin met kol puspus lun Israel la God el pulesru mutanfwal lalos a elos tila met kulansap Lal. El fwak: “Togusrai lun God fwa etukla liki komwos, a fwa etukyung nu sin sie mutanfwal su fwa isus fwako ka.” Jisus el fwak nu sin u lulap lun met puspus inge: “Liye! Loom sumwos on yurumwos wangin karunginye.” (Mattu 21:43; 23:38) Oana met kulansap lun God, met Israel elos tia sruokye oaru lalos ku lalmetmet lalos. (Isaia 29:13, 14) In len sepana inge, ke pal se Jisus el siyuk: “Na su sie met kulansap oaru a lalmetmet?” ke kas saye el siyuk, ‘Mutanfwal fuka se su lalmetmet fwa aola mutanfwal Israel in ekla met kulansap oaru lun God?’ Met sap Piter el sang me top nu ka ke pal se el fwak nu sin congregation lun met Kristian akmusrala: “Komwos . . . ‘mutanfwal mutal, met su ma lun God mukena.’” (1 Piter 1:4; 2:9) Mutanfwal in ngun se inge, su “Israel lun God,” elos ekla met kulansap sasu lun Jeova. (Galetia 6:16) In oana ke met Israel nukewa in pal meeta elos orala sie u lun “met kulansap,” ke oiya oinge met Kristian akmusrala nukewa fwin fwalu ke kutena pal elos orala pa sie u lun “met kulansap oaru a lalmetmet.” Sie kunokon mwomwo nu sesr in eis “me mongo” ke inkanek lun met kulansap lun God!

Kut Ku In Engankin Lutlut Lasr Sifwana

14. Efu ku kom ku in eis me insemwomwo yok ke lutlut lun Baibel liki in rid mukena ma inge?

¹⁴ Fwin etauk a kalem lasr ke Baibel el yokyokelik, ya kut tia insemwomwo ke sripen el akkeye lulalfongi lasr? Pa inge sripe paenang lutlut lun Baibel el akinsemwomwoye kut liki na in ridi mukena ma inge. Ke ma inge, fwin kom ridi me rid puspus su tuku ke Baibel su orekla sin met Kristian, siyuk sum sifwana: ‘Fuka me akuteye se inge el kupasr nu ke me lutlut su Nga etu tari? Ma simusla ku fus puspus fuka ku me top mwomwo fuka Nga ku in nunku ka su ku in sang kutupa me akuteye mwomwo nu ke me lutlut su akkalemyeyuk?’ Fwin kom enenu in oru kutupa research, simusla kusensiyuk su kom lungse in eis top ka, a oru ma inge in pa sifwe yok ke akwuk lom nu ke lutlut lom ke pal toko.

15. Kain in akwuk puspus fuka ke lutlut ku in akinsemwomwoye kom, a fuka akwuk nukewa inge ku in akinsemwomwoye kom ke inkanek yok pal nukewa?

¹⁵ Kain project puspus fuka ke lutlut fwa kasre kom in lotela ma sasu puspus? Kain in project ku akwuk puspus inge su oana ke tuni a lutlutkin akmwoye kain in mwuleang puspus su God el orala nu sin metu in akinsemwomwoyelos el ku in akyokye etauk lasr ka. Kom ku in akkeye lulalfongi lom kom fwin lutlutkin kas palu nukewa kel Jisus Kraist, ku fwin kom lutlutkin kais sie fus ke sie kas palu su oasr ke buk lun Baibel su akkalemye ke kas palu. Oasr pa me akkeye lulalfongi kom fwin kalweni me sramsram lun Met Lo lun Jeova ke pal inge, orekmakin buk se inge Jehovah’s Witnesses​—Proclaimers of God’s Kingdom (Met Lo lun Jeova​—Met Fwakak Togusrai lun God), fwin orekla tari ke kas lom.a A kom ku in eis etauk a kalem yok ke kutu fus in Baibel kom fwin lutlutkin “Kusensiyuk Sin Met Rid Puspus” su oasr ke Tauer In San. Tuni a loang akmwoye ke ma Simusla su orekmakinyuk ka in sang me akuteye mwomwo nu ke sie me lutlut su akkalemyeyuk. Kain in akwuk inge fwa ku in kasre kom in akpaye “ku lun nunak” lom a in akyokye liyaten a etauk lom. (Hibru 5:14) Ke pal se kom oru lutlut lom, simusla me lutlut yok su kom lotela ke sra in buk lun Baibel nutum ku ke sie paper in oru me kasru yok nu sum pal nukewa a nu sin met su kom kasru in lutlutkin ma paye.

Kasru Met Fwusr Elos in Insemwomwokin Lutlut lun Baibel

16. Fuka kom ku in kasru tulik fwusr elos in engankin lutlut lun Baibel?

¹⁶ Papa a nine elos ku in kasru tulik natulos ke inkanek yok in akkeye lungse lalos in oasr fototo mwomwo lalos nu sin Jeova. Nikmet nunku mu tulik fwusr elos tia ku in kalem ke me lutlut loal puspus. Kom fwin sang kunokon nu sin tulik nutum in oru research ke sie me lutlut in akola nu ke lutlut lun sou ke Baibel, kom ku in siyuk selos ke ma elos lotela ka. Ke pal in lutlut lun sou ke Baibel, komwos ku in oru pa me akpa a me luma in kasru tulik fwusr in lotela in karungin lulalfongi lalos a in akpayeye la ma lutiyuk nu selos el paye. In wekunang, kom ku in orekmakin buk srisrik inge “See the Good Land” (“Liye Fwal Mwolanu”)b in luti tulik nutum ke oiya a aten an puspus su akkalemyeyuk in Baibel a in sang kalem yok ke ma komwos lutlutkin ke akwuk lomwos in rid Baibel ke wik nukewa.

17. Efu ku kut enenu in akkalemye nunak mwomwo kut fwin oru project puspus ke lutlut lasr sifwana ke Baibel?

¹⁷ Akwuk a niyen sun mwomwo ke lutlut lom sifwana ke Baibel ku in me akinsemwomwoye yok a me akkeye lulalfongi, tusruktu nik kom mulkunla in akola pa nu ke meeting nukewa lun congregation. Meeting nukewa el sie pa inkanek lun Jeova in luti kut ke kasru lun “met kulansap oaru a lalmetmet.” Tusruktu, akwuk lom in oru kutupa lutlut yok ku in sang me kasru in orala me top mwomwo nu ke meeting​—ke sie me pupulyuk, ke Congregation Book Study ku ke pal in highlights ke rid Baibel ke wik nukewa ke Theocratic Ministry School.

18. Efu ku arulana yok sripe kafweang lun met puspus su lutlutkin “ma loal lun God”?

¹⁸ In oru lutlut lom sifwana ke me luti loal ke Kas lun God el ku in kasre kom in akfototoye kom nu sin Jeova. Baibel el akkalemye ke yok sripaiyen akwuk ke lutlut oinge, el akkalemye: “Tu lalmetmet sie me liaung moul, oana mani sie me liaung moul; a pa inge sripen etauk, tu lalmetmet me liaung moul lun el su ma la.” (Ekklisiastis 7:12) Ke ma inge, arulana mwo a yok sripen kafweang lom in akloalye ku in eis lutlut ke me luti loal ke ma paye su tuku sin God. Baibel el akkalemye mwulela inge nu selos su kafweang in lutlut a tuni ma loal: “Na kom fwa . . . koneak etauk lun God.”​—Soakas 2:4, 5.

[Footnotes]

Ya Kom Ku In Akuteye?

• Mea kalmen “ma loal lun God”?

• Efu ku lutlut lasr ke ma loal puspus tia enenu in tui?

• Efu ku oasr pal mwomwo lun met Kristian nukewa elos in engankin in etu a kalem ke “ma loal lun God”?

• Fuka kom ku in eis ma lane ke “ma loal lun God” ke inkanek yok?