Moliyukla Liki Me Sruf lun Met Srumwon

“[Jeova] el fwa eiskomla liki me kaisrip lun met srumwon.”​—SAM 91:3.

1. Su “met srumwon” se inge, a efu ku el arulana sensen?

MET Kristian nukewa elos sun sie me lokwalok, su kulana a lalmetmetlana a kutasriklana liki metu. El akkalemyeyuk in Sam 91:3 oana sie “met srumwon.” Su met lokwalok se inge? Mutamwauk ke issue lun June 1, 1883, magasin se inge el akkalemye met lokwalok se inge oana Setan su pangonyuk pa Devil. Met lokwalok ku a fukoko se inge el arulana kutasrik in kiapela a srufwe met kulansap nukewa lun Jeova oana ke sie met srumwon el kafweang in sruokye sie mwon ke inkanek lun me sruf.

2. Efu ku Setan el pupulyukkinyuk nu ke sie met srumwon?

² In pal meeta, metu lungse in srumwon ke sripen elos lungse in karungin ma inge in long kain in pusra kato lalos, a ke ate mwo a una su arulana kato kelos, a in orekmakin oana me mongo a oana me kise nu ke alu. Tusruktu, mwon puspus elos etu inkanek in sensenkin mukuikui lalos, a oasr ku lalos in sa koneak fwin oasr me sensen nu selos, paenang upa in sruokye mwon puspus inge. Ke ma inge, sie met srumwon in pal meeta el enenu in tuni akmwoye meet ke oiya a mukuikui lun mwon puspus su elos lungse in sruokye. Tokin el lotela tari ke oiya puspus lun mwonu, met srumwon el ku in orala inkanek lukma su tia kalem in sang sruokye mwon puspus. Setan el ku in pupulyukkinyuk nu ke sie met srumwon, tusruktu Baibel el kasre kut in etu a kalem ke inkanek in kutasrik puspus lal. Devil el ku in tuni akmwoye ke orekma lasr oana met se met se. El suk in loang akmwoye nu ke oiyesr a ella lasr a el orekmakin kain in me sruf lal su tia kalem nu sesr a in me akkolukye kut. (2 Timote 2:26) Fwin kut srufweyukla sin Setan kalem la el orekmakin ma inge in sang kunausla fototo lasr nu sin Jeova a ku in kol kutla nu ke tula lasr. Ke ma inge, kut enenu in etu a akilen ke kain in inkanek puspus lun “met srumwon” se inge.

3, 4. Ke inkanek fuka me sruf lun Setan el oana sie nu ke inkanek lun soko laion? a lun soko serpent?

³ Met sim lun sam el orekmakin me pupulyuk mwomwo, ke el orekmakin inkanek in pupulyuk kel Setan nu ke inkanek lun soko laion fwusr ku lun soko serpent. (Sam 91:13) In oana soko laion, Setan el orekmakin inkanek upa in akkolukye met kulansap lun God ke inkanek lun me kalyai ku masap lun guferment in tulokinye orekma lalos. (Sam 94:20) Kain in orekma upa inge ku in aktukulkulye kutu met in forla liki Jeova. Tusruktu, ke pal puspus, kain in me kalyai inge el tia akmunasye met kulansap, a el oru in me akkeye inse sefwanna lun met kulansap lun God. Tusruktu, fuka orekma lun Setan el oana orekma lun soko serpent ke pal inge?

⁴ Devil el orekmakin lalmetmet yok lal in sang orala akwuk sulallel a orekma koluk nukewa lal su ku in sang uniye metu in oana ke orekma lun soko serpent su lungse in wukwuk ke sie an. Ke inkanek inge, el ku in eis kutangla lal in akkolukye a in srufwela nunak lun kutu met kulansap lun God, a el oayepa kiapelosla tu elos in oru ma lungse lal a tia ma lungse lun Jeova, ke saflaiyen ma inge el me asor yok na paye. Ke ma inge, kut pulakin me insemwomwo yok meyen kut etu ke orekma kutasrik nukewa lun Setan. (2 Korint 2:11) Lela kut in lutlutkin ke pal inge ke me sruf upa akosr su orekmakinyuk sin “met srumwon.”

Sangeng sin Met

5. Efu ku me sruf se inge in “sangeng sin met” el arulana ku?

⁵ “Met srumwon” el etu a kalem ke inkanek lun metu la elos lungse in eis kaksak sin met puspus saye a met puspus inge elos in akkalemye insemwomwo lalos nu selos. Nunak a pulakin lun met Kristian nukewa el oapana pulakin a nunak lun met nukewa su raunelosla. Ke sripen el etu ma inge, paenang Devil el lungse in kufusla nunak lalos nu ke ma met puspus saye elos nunku kelos. Ke sie me pupulyuk, el lungse in srufwe met kulansap puspus lun God ke el orekmakin kain in me sruf inge in “sangeng sin met.” (Soakas 29:25) Fwin met kulansap lun God elos wi met puspus in oru ma Jeova el sapkin nu selos in tia oru, ma inge ku in akkalemye la elos srufweyukla tari sin “met srumwon” se inge.​—Ezikiel 33:8; Jemes 4:17.

6. Me pupulyuk fuka el akkalemye ke oiya se su sie met fwusr el ku in srufweyukla ka sin “met srumwon”?

⁶ Ke sie me pupulyuk, sie met fwusr el ku in fuleak ke me akkoluk upa lun tulik lutlut puspus su welul ke loom lutlut a el sismok ku orekmakin paip. Ke ma inge orekmakinyen paip saap el wangin na paye ke nunak lal ke pal se el som liki loom sel a som nu ke loom lutlut in len sa. Tusruktu, tia pat el oru ma se su koluk nu ke manol pa inge paip in sismok kin su tia me akinsemwomwoye God. (2 Korint 7:1) Fuka tu el srufweyukla? Saap el asrouki nu sin met asrouki koluk inge a el sangeng la fwin el tia wi oru ma elos oru inge, met kawuk lal inge elos fwa isrenul ku anglol a tila insemwomwo sel. Met fwusr, nik komwos lela “met srumwon” se inge in kiapekomwosla a srufwekomwosla! Oasr inkanek mwo tu komwos in tia akkolukyeyukla, pa in karungin komwosyang sifwana in tia oru kutena ma in kunausla akwuk mwomwo lun God. Porongo kas in sensen lun Baibel in fwasr liki met asrouki koluk.​—1 Korint 15:33.

7. Fuka Setan el ku in oru kutu papa a nine in orekmakin ku a pal nukewa lalos in suk ma enenu lun sou a wanginla pal in kulansap nu sin God?

⁷ Papa a nine su met Kristian elos nunku yok ke kunokon lalos in sang ma enenu nukewa lun sou lalos. (1 Timote 5:8) Tusruktu, oasr niyen sun lal Setan in oru met Kristian elos in orekmakin ku a pal nukewa lalos in suk ma enenu lun sou. Saap elos tia wi pal nukewa ke meeting meyen elos akos ma met kol lalos ke orekma el sapkin in orek nu ke kutupa orekma. Saap elos sangeng in siyuk sin met kol lalos ke pal in mongla tu elos in ku in wi ke sie toeni lulap lun district in wi met lili wiyelos in alu nu sin Jeova. Me loeyuk mwomwo nu ke me sruf inge pa in “lulalfongi Jeova.” (Soakas 3:5, 6) Sayen ma inge, oasr ma yok sripe su ku in kasre kut yok, pa kut fwin esam pal nukewa la kut nukewa wi ke u ku loom sin Jeova a ke sripe se inge el fwa karungin kut. Papa a nine, ya oasr lulalfongi fukoko lomwos kel Jeova la el fwa karungin komwos a sou lomwos fwin komwos oru ma lungse lal? Ku ya Devil el fwa sruokomi ke sie me sruf lal a kufusla nunak lom in oru ma lungse lal meyen kom sangeng sin met? Kut kaifwe kom ke inkanek yok in pre a nunku yok ke kusensiyuk nukewa inge.

Lungse Ma Puspus lun Fwalu el Sie Me Sruf

8. Ke inkanek fuka Setan el orekmakin me sruf nu ke oiyen lungse ma puspus lun fwalu?

⁸ Setan el orekmakin pa lungse nu ke ma puspus lun fwalu in srufwekutla. Akwuk lun business lun fwalu el akkeye pal nukewa akwuk in sa sruokye me kasrup a kain in oiya inge el kiapela pa kutu met kulansap lun God. Ke pal puspus, oasr met puspus su akkeyeyuk ke kas inge: “Kafweang ke orekma lom. Fwin kom eis tari mani yok ku me kasrup, kom relax a engankin moul lom. Kom ku in sroang pa nu ke orekma lun pioneer.” Kain in kas a nunak tia mwo inge oasr yurin kutu met lili ke congregation su lungse in eis ma lane ke me asrouki lalos nu sin met puspus ke congregation. Nunku akmwoye nu ke oiya inge in akyokye mani a ma puspus lom in oru kom in moulkin moul fusrasr ke pal fwasru. Ya oiya se inge el tia oana nunak lun sie met kasrup su “tia mwo ma el nunku” ke me pupulyuk lun Jisus?​—Luk 12:16-21.

9. Efu ku kutu sin met Kristian elos srufweyukla ke elos kafweang in eis ma puspus lun fwalu?

⁹ Setan el orekmakin akwuk koluk lal inge in kufusla nunak lun met nukewa elos in lungse in eis ma puspus. Kain in nunak inge in lungse ma puspus el ku in akkolukye yok moul lun sie met Kristian, in kupowiye kas a oru ma inge in “wangin fwako.” (Mark 4:19) Baibel el akkeye kut in fwalkin ma oasr yurosr tari oana me mongo a nuknuk. (1 Timote 6:8) Tusruktu, oasr met puspus su srufweyukla sin “met srumwon” meyen elos tia orekmakin kas in kasru inge nu selos sifwana. Ya nunak lun insefulat pa orelos in sruokye kain in oiya lun moul mwomwo in oasr ma puspus lalos? Fuka nu sesr in oana met se met se? Ya kena yok lasr in eis ma puspus ku in oru kut in nunku ke alu paye la ma inge el tia arulana yok sripe? (Haggeai 1:2-8) Sie me asor yok, la ke pal in ma upa sikyak oasr kutu met lili su tia suk meet in kulansap nu sin God, a elos orekmakin ku a pal yok lalos in eis mani a ma yok puspus tu elos in ku in tafwela in engankin akwuk mwomwo lun moul su elos pala tari ke moul lalos. Kain in oiya inge su nunku yok ke ma puspus lun fwalu el akinsemwomwoye “met srumwon”!

Me Sruf lun Me Akengan Koluk

10. Kain in orekma fuka in tuniyuk nu sesr sifwana kais sie sesr oana met Kristian enenu in oru?

¹⁰ Siepa inkanek lun “met srumwon” pa in akmunasye ku a nunak lun met in akilen ma mwo a ma koluk. Kain in nunak oinge el oana nunak lun met in an Sodom a Gomorra ke elos orekmakin akwuk lun business su kukakin petsa mukuikui a kutupa kain in me akengan. Fwinne report ke news ke television a ke newspaper puspus el akkalemye ke akmas a orekma sulallel, su oru met puspus in nunku yok ke orekma fokfok. Ma puspus su akkalemyeyuk inge el me akengan nu ke media fwinne ma inge el akkolukye ku lun met in “akilen ma mwo a ma koluk.” (Hibru 5:14) Tusruktu, esam kas lun Jeova su met palu Isaia el simusla: “We nu selos su pangon ma koluk mwo, a ma mwo koluk!” (Isaia 5:20) Ya “met srumwon” el akkolukye nunak lom ke inkanek in kais kutu srisrik oru me akengan koluk? Arulana yok sripe in tuni kut sifwana.​—2 Korint 13:5.

11. Kain in kas in sensen fuka petsa ke TV se su pangpang soap opera el akkalemye ke magasin inge?

¹¹ Apkurun yea longoul limekosr somla, magasin se inge Tauer In San el sang kas in sensen nu sin met Kristian paye in karungin ke akwuk lun me liye ke TV.a Kas inge ku in akkalemyeyuk ke me akkoluk su ku in sikyak ke petsa su pangpang soap opera: “Oiyen sukok nu ke lungse el orekmakinyuk in oana sripe mwomwo se nu ke kutena ella ku orekma lun sie met. Ke sie me pupulyuk su lumeyukla ke sie petsa mukuikui, su sie met fwusr el puteteyak el fwinne tia payuk a el fwak nu sin sie mutan kawuk lal: ‘Tusruk Nga lungse Victor. Nga mensiskin ma met puspus elos fwak. . . . In oswela tulik srisrik se inge el arulana yok sripe nu sik!’ Oasr soko on kato su sritelkinyuk ke petsa inge su kufusla nunak lun met puspus su liye petsa se inge elos in nunku ke inkanek in moul lun mutan fwusr se inge in paenang elos in pangon mu tia na koluk ma el orala. Kom su liye petsa se inge kom lungse pa Victor. Saap kom pulakin pa nunak in pakomuta nu sin tulik mutan fwusr se inge. Ke kom liye petsa se inge kom ‘kalem ke ma elos oru’ a kom insese pa nu ke orekma koluk su elos oru. ‘Sie me lut yok fwin kom pulakin mu fusrasr nu sum in fwak mu tia koluk a oasr insese lom nu ke kain in oiya inge,’ sie met su liye kain in petsa inge el fwak tusruktu tok el koneak la tia mwo a el enenu in aksumwosye nunak lal. ‘Kut etu la orekma lun kosro el koluk. . . . Tusruktu Nga akilen la Nga fwin lungse in liye ma inge, kalem la ke nunak luk Nga insese tari nu ke kain in met su moulkin moul fokfok inge.’”

12. Me akpayeye fuka akkalemye la arulana fwal kas in sensen ke pal inge in karungin kutena kain in petsa su akkalemyeyuk ke TV?

¹² Mutamwauk ke pal se me lutlut puspus inge el akkalemyeyuk ke me rid inge, oasr kain in petsa inge su akkalemyeyuk ke TV in akkolukye nunak a inse el arlana yokyokelik na paye. In an puspus, kain in program inge el akkalemyeyuk ke TV ke lusen ao 24 ke kais sie len. Mokul puspus, mutan puspus, a met fwusr puspus elos liye pal nukewa a akkeye nunak a insielos nu ke kain in me akengan inge. Tusruktu, lela kut in tia sifwana kiapekutla nu ke kain in nunak koluk inge. Tia mwo in nunkeyuk mu me akengan koluk el tia arulana koluk liki ma liyeyuk ke moul lun met puspus fwin fwalu. Ya sie met Kristian el ku in nunku mu sumwos in oru sulela lal nu ke me akpwaryeyuk sin kain in met su el nukin a wangin etu yok lal kel in suliyuk nu in loom sel?

13, 14. Fuka kutu met lili elos akkalemye la elos eis me kasru yok ke kas in sensen ke akwuk lun TV?

¹³ Met Kristian puspus elos eis ma lane yok ke elos porongo kas in sensen su akkalemyeyuk sin “met kulansap oaru a lalmetmet.” (Mattu 24:45-47) Tokin el ridi ke kas in kai kalem su tuku ke Baibel, in oana ke kutu met Kristian elos simusla ke leta in akkalemye la fuka me lutlut puspus inge kasrelos na paye.b Oasr sie sister el fwak: “Ke lusen yea 13 Nga lungse yok in liye soap opera. Nga nunku mu fototo luk nu sin Jeova el mwo ke Nga wi ke meeting nukewa lun met Kristian a wi kutu pal ke orekma in sulkakin peng mwo. Tusruktu oasr tari ke nunak a ke insiuk oiyen fwalu su akkalemyeyuk ke soap opera mu fwin mokul tumum el akkolukye kom, ku el tia akkalemye lungse nu sum, kom ku in oru pa orekma lun kosro​—Nga nunku mu kain in mokul payuk inge pa fwal in oasr meta ka. A ke sripe se inge Nga nunku mu ‘fwal pa’ Ngan oru orekma lun kosro a Nga orala ma koluk inge nu sin Jeova a nu sin mokul tumuk.” Mutan se inge el sisila liki congregation. Tokin kutu pal, ke el akilen a pulakin ma koluk lal, a el auliyuk, a sifwilpa folokinyukla el nu ke congregation. Kas in sensen ke soap opera ke TV el sang ku nu sel in pulesru a tia orekmakin me akengan su Jeova el srunga.​—Emos 5:14, 15.

¹⁴ Siepa met su ridi magasin inge el pulakin pa ke moul lal akkolukyeyuk el fwak: “Nga tung ke Nga ridi me lutlut inge, meyen Nga liye a pulakin la insiuk tila lungse Jeova ke inkanek nukewa. Ke ma inge Nga mwulela nu sin God luk la Nga tia sifwil oru moul luk in oana met kos nu ke petsa mukuikui su akkalemyeyuk len nukewa ke TV.” Tokin sie mutan Kristian el akkalemye kas in kulo wi kaksak lal nu ke me lutlut inge, el akkalemye la el lungse na paye in liye petsa oinge pal nukewa a el simusla: “Nga nunku mu . . . fwin fototo luk nu sin Jeova el ku in akkolukyeyuk. Na fuka ‘met nukewa su oasr ke soap opera’ elos met kawuk luk a ke pal sepana inge fuka Nga ku in kawuk nu sin Jeova?” Fwin oasr kain in petsa inge su akkalemyeyuk ke TV el akkolukye insien met puspus ke yea 25 somla, me akkoluk fuka el ku in oru ke pal inge? (2 Timote 3:13) Kut enenu in etu a akilen ke me sruf nukewa lal Setan su el orekmakin nu ke kain in me akengan koluk nukewa inge, oana soap opera ke TV, video games su tia mwo meyen el akkalemye ke orekma lun akmas, ku ke on nukewa su akkalemye ke orekma fokfok nukewa.

Ma Upa Su Sikyak In Masrlon Met Luo el Siepa Me Sruf

15. Fuka kutu met lili elos akkolukyeyuk sin Devil?

¹⁵ Setan el orekmakin ma upa ku ma koluk nu sin sie sin sie oana me sruf in oru in oasr alein a wangin inse sefwanna in masrlon met kulansap lun God. Kut ku in srufweyukla ke inkanek inge fwinne kut engankin kain in kunokon yok ke orekma in kulansap lasr. Kutu met lili elos akkolukyeyuk meyen elos lela ma koluk nu sin sie sin sie in kunausla misla a inse sefwanna a kapkapek mwomwo ke ma lun ngun su Jeova el oru in sikyak nu ke u lal.​—Sam 133:1-3.

16. Fuka Setan el kafweang yok ke orekma koluk a kutasrik lal in kunausla inse sefwanna lasr?

¹⁶ Ke pal in Meun Lulap I, Setan el srike in kunausla u lun Jeova fwin fwalu ke me kalyai upa, tusruktu el tia kutangla. (Fwakyuk 11:7-13) Mutamwauk in pal ingo fwasru, el kafweang in orekmakin inkanek koluk a kutasrik lal in kunausla inse sefwanna lasr. Kut fwin lela ma tafongla a ma koluk lun sie sin sie in oasr alein ka a wanginla inse sefwanna lasr, kut ku in akkalemye la kut sang an sin “met srumwon” in akkolukye kutla ke inkanek yok. Ke ma inge kut fwa sifwana kosrala ku eisla ngun mutal liki moul lasr a oayepa ke congregation. Fwin ma inge sikyak, Setan el fwa insemwomwo yok ka meyen kutena me lokwalok a alein su ku in sikyak ke congregation el ku in kosrala orekma yok sripe inge in luti peng mwo.​—Efesus 4:27, 30-32.

17. Mea ku in sang kasru nu selos su oasr ma upa sikyak in masrlolos?

¹⁷ Mea kom ku in oru fwin oasr ma upa sikyak in masrlom a sie met Kristian wiyom? Aok, ma upa nukewa el tia oana sie. Tusruktu, paye la oasr sripe nu ka la efu ku sie ma upa el sikyak, fwinne oinge ma upa nukewa su sikyak in masrlon met Kristian luo enenu in aksumwosyeyuk ke pal sa. (Mattu 5:23, 24; 18:15-17) Kas in kasru su oasr ke Kas lun God el tuku sin God, a sumwosmwos. Fwin orekmakinyuk, akwuk mwomwo lun Baibel el sang kasru yok pal nukewa. Oasr fwako mwomwo ka pal nukewa!

18. Efu ku in etawi Jeova el kasre kut in aksumwosye ma upa lasr nu sin met lili wiyesr?

¹⁸ Paye la Jeova el “akola in nunak munas” nu sesr. (Sam 86:5; 130:4) Kut akkalemye la kut tulik kulo nutin God kut fwin etawel. (Efesus 5:1) Kut nukewa orek ma koluk a kut enenu na paye nunak munas lun Jeova nu ka. Ke ma inge, lela kut in taran kut sifwana kut fwin pulakin mu kut srunga in sang nunak munas nu sin sie met. Kut ku in oapana met kulansap se su oasr ke me pupulyuk lun Jisus su srunga in sang nunak munas nu sin met kulansap wiyel ke sie inkanek lun sowemol su arulana srikla a tia oana sie nu ke sowemol lal su arulana yok nu sin leum lal su el sang nunak munas tari nu sel ka. Ke pal se leum lal el etauk ke ma el oru, el sapkin in filiyuki el nu in niyen prison ke sripen met kulansap se inge el srunga in sang ku orekmakin inkanek in nunak munas. Jisus el aksafyela me pupulyuk se inge ke el fwak: “Ke ma inge, Papa tumuk in kosrao el fwa oru pa nu sumwos, komwos nukewa fwin tia nunak munas insiomwos nu sin met limwos.” (Mattu 18:21-35) Kut fwin nunku yok ke me pupulyuk inge a srike in nunku yok ka la pal ekasr la Jeova el lungse na paye in sang nunak munas nu sesr fwa ku in kasre kut ke pal se kut kafweang in aksumwosye ma upa lasr nu sin met lili wiyesr!​—Sam 19:14.

Misla a Wangin Me Sensen ke “An in Lukma sin El su Fulatlanu”

19, 20. Nunak fuka kut fwa akkalemye ke “an in lukma” a “ye lulin” Jeova ke lusen pal in ma upa se inge?

¹⁹ Kut moul ke pal inge su oasr ma upa puspus. Setan el kunauskutla tari fwin wangin me kasru a karungin lun Jeova nu sesr. Ke ma inge, tu “met srumwon” el fwa tia ku in sruok kuti, kut enenu in oasr ke pal nukewa luun an in molela lasr, kut in “muta in an in lukma sin el su Fulatlanu,” a kafweang “in mutana ye lulin El su Kulanu.”​—Sam 91:1.

²⁰ Lela kut in esam a nunku pal nukewa la kas in esmakin a masap lun Jeova el me kasru, a fwa tia oru kut in tia engankin ma kut lungse in oru. Kut nukewa sun sie met lokwalok su ku a lalmetmet. Fwin wangin me kasru lun Jeova, wangin kutena sesr fwa ku in kutangla me sruf lal. (Sam 124:7, 8) Ke ma inge lela kut in pre nu sin Jeova a siyuk nu sel elan molikutla liki me sruf nukewa lun “met srumwon” sa!​—Mattu 6:13.

[Footnotes]

Ya Kom Esam?

• Efu ku “sangeng sin met” el sie me sruf su ku in oru sie met in mise?

• Fuka Devil el orekmakin lungse ke ma puspus lun fwalu oana sie me sruf?

• Fuka Setan el srifwe kutu met ke me sruf lun me akengan koluk?

• Kain in me sruf fuka Devil el orekmakin in kunausla inse sefwanna lasr?