Kut Ku In Eis Ma Lane ke Inkanek In Muteng ke Me Keok
“Ku pangnolos insemwomwo elos su muteng.”—JEMES 5:11.
1, 2. Mea akkalemye la tia akwuk lun Jeova metu in keok?
WANGIN met su oasr nunak mwo yuru el lungse in keok, fwinne met su Orekutla, Jeova God, el tia lungse metu in keok. Kut ku in liye ma inge ke kut tuni Kas lal su tuku ke ngun a in loang akmwoye nu ka la mea sikyuk tokin el orala mokul a mutan. Ma se meet, God el oralla mokul. “Jeova God El srulela met liki kutkut in foko, a mongyung nu in fwael momong in moul; a oasr yurol ngun in moul.” (Genesis 2:7) Adam el sumwos ke mano a nunak, a el tia ku in mas a mise.
2 Fuka oiyen moul lal Adam? “Jeova God El eokoala sie ima kutulap, in Eden; a El filiye ingo met se su el orala. A Jeova God el akkapyeak liki in foko sak nu kemwa su mwo in liye, a mwo in mongo.” (Genesis 2:8, 9) Aok, oasr sie loom mwomwo sel Adam. Wangin me akkeok in Eden.
3. Fwinsrak puspus fuka oasr yurin siyanyen se meet?
3 Genesis 2:18 el fwak nu sesr: “Jeova God el fwak: ‘Tia mwo tu met se inge in mukena muta. Nga fwa oru nu sel sie met in kasrel.’” Jeova el mutamwauk in orala sie mutan sumwosmwos nu sel Adam, in ku in oakiya sie fwinsrak lun moul insemwomwo in sie sou. (Genesis 2:21-23) Baibel el fwakak pa nu sesr: “God El akinsemwomwoyelos a God El fwak nu selos: ‘Komwos in kapak, a yokelik, a nekla fwalu, a kutangla.’” (Genesis 1:28) Siyanyen se meet inge oasr kunokon mwomwo lalos in akyokye Paredais lun Eden ne ke na, pal se su, ma inge nukewa nekla fwalu nufon, in orala sie paredais nu fwin fwalu nufon. A elos fwa oswela tulik su engan a insemwomwo, su fwa sukosok liki kutena me keok. Sie akwuk mwolana na paye pa inge ke mutamwauk!—Genesis 1:31.
Me Keok Mutamwauk in Sikyak
4. In fwal nu ke ma sikyuk fwin fwalu, mea akkalemyeyuk ke metu?
4 Tusruktu, kut fwin liye ke ma sikyuk nu ke sou lun metu ke me sramsram lun fwalu, ma inge arulana kalem la oasr sripe yok su paenang sikyuk lun ma koluk nukewa. Oasr ma koluk puspus sikyuk, a sou lun met nukewa elos keok yok ka. Century puspus tok, tulik natul Adam a If nukewa elos sun mas, kapak matou, a mise. Paye la fwalu ekla tila sie paredais su nenela ke met engan a insemwomwo. Ma sikyuk inge el akkalemye fwal nu ke Rom 8:22: “Ma orekla nu kemwa sao a tukeni ngalnu nu ke pal se inge.”
5. Fuka papa a nine se meet kiyesr elos oakiya me keok nu sin sou lun metu?
5 Wangin kunokon lun Jeova nu ke me keok upa su sikyuk ke pal loeloes. (2 Samuel 22:31) Oasr pa meta ku ma koluk lun metu su sang orala me keok. “Elos koluk, elos oru me srungeyuk.” (Sam 14:1) Papa a nine se meet kiyesr elos eis ma mwomwo nukewa ke mutamwalos. In oasr yurolos kain in ma mwomwo nukewa inge elos enenu in akos God in ma nukewa, tusruktu Adam a If elos sulela in orekmakin sukosok lalos liki ma Jeova el sapkin. Ke pal se papa a nine se meet kiyesr elos seakos Jeova, elos ekla tila met sumwosmwos nu sel. Elos fwa matou a pulakin keok nu ke elos mise. Kut usrui oiya sesumwos inge.—Genesis 3:17-19; Rom 5:12.
6. Mea kunokon lal Setan nu ke mutamweyen me keok?
6 In wekunang pa oasr sie ma orekla in ngun su ekla Setan su Devil el pa mutamweyen me keok nukewa. Itukyang nu sel oiyen sukosok in orala sulela. Tusruktu, el orekmakin sukosok in orala sulela inge ke inkanek sesumwos in oru metu in alu nu sel. Tusruktu, Jeova mukena pa enenu in orek alu nu se, tia nu ke ma el orala. Setan el moklel Adam a If in orekmakin sukosok lalos liki Jeova, su fwak nu selos mu elos ku in “oana God in etu ma mwo a ma koluk.”—Genesis 3:5.
Jeova Mukena Oasr Sumwos Yuru In Kol
7. Mea fwokin orekma in lain kolyuk lun Jeova akkalemye?
7 Fwokin ma koluk su sikyuk ke orekma in lain akkalemye la Jeova mukena, pa Met Su Fulatlana fwin Fwalu Nufon, oasr sumwos lal in kol a kolyuk lal mukena sumwos a mwo. Tausan puspus yea somla akkalemye la Setan, su ekla “leum lun fwal se inge,” el akkeye kain in kolyuk su koluk, sesumwos a sulallel su tia mwo ku fwal. (Jon 12:31) Kolyuk koluk lun metu su on ye koko lun Setan akkalemye pa la wangin ku lalos in kol ke inkanek sumwomwos. (Jeremaia 10:23) Ke ma inge, kutena kain in kolyuk su metu elos orekmakin sayen kolyuk lun Jeova fwa tia eis kutangla. Me sramsram lun metu in pal somla akpayeye ma inge.
8. Mea akwuk lun Jeova nu ke kain in kolyuk nukewa lun metu, a el fwa akpayeye fuka akwuk inge?
8 Ke sripen Jeova el lela tausan puspus yea nu sin metu in oru kolyuk lalos sifwana su sukosok liki kolyuk lal, inge oasr me akpayeye tari ka nu sel in eisla kain in kolyuk inge nukewa liki fwalu a aolla ke guferment lal sifwana. Kas palu su akkalemye ma inge el fwak: “A in len lun togusrai ingo [kolyuk lun metu] God in kosrao fwa tulokunak sie togusrai [guferment lal in kosrao ye koko lun Kraist] su fwa tia na kunausyukla. . . . A fwa musalsallu a kanausla togusrai inge nu kemwa, a a fwa tu ma patpat.” (Daniel 2:44) Kolyuk lun dimon a metu fwa tui wanginla, a Togusrai lun God in kosrao mukena fwa sikyuk a kol fwalu nufon. Kraist el fwa Togusra ka, a fwa oasr met su welul kol su oasr ke met 144,000 su oaru a paye nu ke mise fwa utukla liki fwalu.—Fwakyuk 14:1.
Eis Ma Lane Ke Me Keok
9, 10. Fuka Jisus el eis ma lane ke ma nukewa su el pulakin?
9 Arulana mwo in tuniyuk oiya lun met nukewa su fwa kol ke Togusrai in kosrao. Ma se meet, Kraist Jisus el akkalemye ke oiya fwal ku sumwos lal nu ke kunokon lal in oana sie Togusra. El orekma ke pal loeloes wi Jeova in orala ma lungse lun Papa tumal, oana sie “met orekma usrnguk” Lal. (Soakas 8:22-31) Ke pal se ma Jeova el orala akwuk nu sel in tuku nu fwalu, Jisus el insemwomwokin in akos. Fwin fwalu el kafweang yok in fwakak nu sin met puspus ke oiyen sumwos lun Jeova in kol kosrao a fwalu a Togusrai lal. Jisus el akkalemye sie me srikasrak mwomwo nu sin met nukewa ke el akos na paye ke kolyuk inge.—Mattu 4:17; 6:9.
10 Jisus el sun me kalyai puspus, a ke saflaiye el anwuki. Ke orekma in luti lal, el liye ma upa a me keok nukewa lun met su raunela. Ya oasr kutena ma lane nu sel ke el liye me keok nukewa a sifwana esalang nu ke ma inge? Aok. Hibru 5:8 el akkalemye: “El fwinne Mwen Natul, el lutlut in akos ke ma el keok ka.” Ma nukewa su Jisus el pulakin ke el muta fwin fwalu oral in oasr kalem yok ke ma upa nukewa a pakomuta yok. El sifwana pulakin ke ma sikyuk nu ke oiyen moul in sou. El ku in pulakin pakomuta nu sin met nukewa su keok ku sun ma upa a ku in sang kalem mwomwo nu ke kunokon lal in molelosla. Loang akmwoye nu ke oiya su met sap Poul el akkalemye ke ma inge in buk se inge Hibru: “Ke ma inge fwal nu sel in ma nu kemwa tu lan orekla oana ‘ma lel’, tu el fwa met tol fulat su kulang a oaru in ma lun God, in oru me iumwe ke ma koluk lun met. Tu ke el sifwana keok ke srifweyuk el, el ku in kasrelos su srifweyuk.” “Tu met tol fulat lasr el tia sie su koflanu kulang ke munas lasr, a el sie su srifweyuk tari in ma nu kemwa oana kut, a wangin ma koluk lal. Ke ma inge, lela kut in pulaik in kalukyung nu ke tron lun kulang, tu kut fwa eis pakoten, a konoiyuk kulang in kasre kut in pal enenu.”—Hibru 2:17, 18; 4:14-16; Mattu 9:36; 11:28-30.
11. Fuka experience lun togusra a met tol puspus fwin fwalu ku in kasrelos ke pal fwasru in oana met kol?
11 Oasr ma oana sie su ku in akkalemyeyuk ke met 144,000, inge su “moliyukla” liki fwalu in kol welul Kraist Jisus ke Togusrai in kosrao. (Fwakyuk 14:4) Elos nukewa isusla oana sie met fwin fwalu, elos kapkapak ke sie fwal su sesesla ke me keok, a elos sifwana pulakin me keok. Pus selos kalyaiyuk, a kutu selos anwuki ke sripen elos srukye ku oaru a paye lalos nu sin Jeova a elos insemwomwokin in fwasr tokin Jisus. Tusruktu elos ‘tia mekin ke me fwakak lun Leum lasr, in keok ke ma upa wi mwosasu.’ (2 Timote 1:8) Ma sikyak nu selos fwin fwalu orallos in fwal in sang nununku nu sin sou nukewa lun metu ye kosrao. Elos lotela in orekmakin pakoten yok, kulang, a insemwomwokin in kasru metu.—Fwakyuk 5:10; 14:2-5; 20:6.
Insemwomwo lun Met Nukewa Su Oasr Fwinsrak Lalos Fwin Fwalu
12, 13. Fuka met nukewa su oasr fwinsrak lalos fwin fwalu ku in eis ma lane su tuku ke me keok?
12 Ya me keok ke pal inge ku in orala kutena ma mwomwo nu sin met nukewa su oasr fwinsrak in moul ma patpat ke sie paredais fwin fwalu su fwa sukosok la liki mas, asor, a mise? Ngal a asor su me keok orala el tia me akengun. Tusruktu kut fwin muteng ke kain in me keok inge, oiya mwomwo nu sin sie met fwa ku in akkalemyeyuk a orala me insemwomwo puspus.
13 Loang akmwoye nu ke Kas lun God el fwakak ke ma inge: “A komwos fwin keok ke ma sumwosmwos, komwos insemwomwo na. Fwin akkolukyeyuk komwos ke en Kraist, komwos in insemwomwo.” (1 Piter 3:14; 4:14) “Insemwomwo komwos ke met akangonye komwos, a kolyai komwos, a fwak kain koluk nu kemwa lain komwos in kikiap keik. Komwos engunak, a arulanu insemwomwo, tu yok ma lane lomwos in kosrao.” (Mattu 5:11, 12) “Insemwomwo met se su muteng ke srifweyuk, tu ke akpayeyuk tari el a fwa eis tefuro lun moul.”—Jemes 1:12.
14. Ke inkanek fuka me keok el orala met kulansap lun Jeova in insemwomwo?
14 Arulana paye la me keok nukewa su kut sun ku pulakin fwin kut muteng tia ku in oru kut in insemwomwo ka. Insemwomwo, engun, ku in pulakinyuk fwin kut etu la kut keok ke sripen kut oru ma lungse lun Jeova a fwasr tokin me srikasrak lun Jisus. Ke sie me pupulyuk, ke century se meet, kutu sin met tuma lutlut elos filiyuki ke nien kalbous a tok utukla elos nu yurin met nununku fulat lun met Ju a akkolukyeyuk elos ke sripen fwakak a luti lalos kel Jisus Kraist. Elos akkeokyeyuk a tok elos taltalla. Oiya fuka elos akkalemye ke ma elos sun inge? Ma simusla lun Baibel el fwakak la elos “fwasr liki ye mutun met papu, a engun tu filiyuki elos fwal in keok ke e se inge.” (Orekma 5:17-41) Elos insemwomwo, tia ke sringsring a akngalyeyuk lun mano, tusruktu ke elos etu la ma inge sikyuk ke sripen elos sruokye ku oaru a paye lalos nu sin Jeova a fwasr in fwalken Jisus.—Orekma 16:25; 2 Korint 12:10; 1 Piter 4:13.
15. Fuka muteng ke me keok lasr ke pal inge ku in kasre kut in eis ma lane ke pal fwasru?
15 Kut fwin muteng ke me lain a me kalyai ke inkanek lun nunak sumwos, ma inge ku in akkeye inkanek in muteng nu sesr. Ma inge ku in kasre kut in muteng ke me keok in pal fwasru. Kut rid: “Met lili luk, komwos in oekla oana me akengun nu kemwa, ke me sruf puspus apinkomwosla, a komwos etu tu me akpayeye lalalfongi lomwos orekma fulpap.” (Jemes 1:2, 3) Rom 5:3-5 el fwakak oapana nu sesr: “Kut ouyepa engun in keok lasr; tu kut etu tu keok me orala mongfusesr; a mongfusesr orala srike, a srike orala fwinsrak; a fwinsrak tia me akmekin.” Ke ma inge kut fwin muteng yok ke me srifwe ke sripen inkanek lasr el oana sie met Kristian, kut fwa ku in akoekutla mwo in muteng mwo nu ke kutu pa me srifwe su sikyak ke pal koluk lun ma puspus inge.
Jeova Fwa Moli
16. Mea Jeova el fwa oru nu sin togusra nukewa a met tol nukewa ke pal fwasru su fwal in sang molela me keok lalos?
16 Fwinne kut sun a pulakin tula lun ma saok puspus lasr ke sripen me lain ku me kalyai su orek in akkeokye kut ke sripen kut sruokye ku inkanek lun met Kristian, kut in insemwomwo ke sripen kut etu la Jeova el fwa akinsemwomwoye kut ke inkanek yok. Ke sie me pupulyuk, nu sin kutu met su oasr fwinsrak lalos in som nu in kosrao oana met kol ke Tokusrai lun God, met sap Poul el simusla: “Komwos . . . insemwomwo ke pal ma gaspeyomwos kunausyukla, tu komwos etu tu oasr ma gaspeyomwos sifwana mwo liki, su on ma patpat.” (Hibru 10:34) A nunku nu ke me insemwomwo su oasr yurulos ke pal se elos oasr ye kolyuk lun Jeova a Kraist in welulos sang me insemwomwo puspus nu sin met nukewa su fwa muta fwin fwalu ke fwal sasu. Aok arulanu paye kas lun met sap Poul nu sin met Kristian nukewa su oaru: “Nga nunku tu ma keok in pal se inge tia fwal in lumeyuk nu ke mwolana su fwa sikme nu sesr.”—Rom 8:18.
17. Mea Jeova el fwa oru nu sin met nukewa su oasr fwinsrak lalos in moul fwin fwalu su oaru in oru kulansap lalos nu sel ke pal inge?
17 Ke inkanek sepana inge, fwa orek nu sin met puspus su oasr fwinsrak lalos in muta fwin fwalu fwin tula kutena ma saok lalos ke pal inge ku elos lungse in fuleak kutena ma lalos ke sripen orekma in kulansap lalos nu sin Jeova, paye la el fwa akinsemwomwoyelos ke inkanek su arulanu yok ke ma el fwa oru ke pal fwasru. El fwa sang nu selos sie moul sumwosmwos, a moul ma patpat in paredais fwin fwalu. Ke fwalu sasu se inge, Jeova el “fwa ela sroninmutalos nu kemwa, a a fwa wangin pa mise; a elos fwa tia sifwil asor, ku tung, ku ngal, tu ma meeta wanginla.” (Fwakyuk 21:4) Pa inge sie mwulela su arlana mwomwo! Ma nukewa su kut fuleak in pal inge ke akwuk inge ke sripen orekma in kulansap lasr nu sin Jeova tia ku in lumeyuk nu ke moul mwomwo se su fwa tuku, su el fwa sang nu sin met kulansap oaru nukewa lal su muteng ke ma upa nukewa.
18. Mwulela fuka Jeova el akkalemye nu sesr ke Kas lal?
18 Kutena me keok su saap kut sun a muteng ka fwa tia ku in akmunasyela fwinsrak lasr nu ke moul ma patpat ke fwal sasu lun God. Me keok nukewa fwa wanginla a fwa aksasuyeyukla ke oiya mwomwo puspus ke fwal sasu. Isaia 65:17, 18 el akkalemye nu sesr: “Ma meeta fwa tia esamyuk, ku nunkauk ka. A komwos insemwomwo a engun ma patpat in ma Nga orekla.” Ke ma inge, arulanu fwal nu sin tumalel lal Jisus su pangpang Jemes in akkalemye: “Kut pangnolos insemwomwo elos su muteng.” (Jemes 5:11) Aok, kut fwin muteng pal nukewa nu ke me keok puspus ke pal inge, kut ku in eis ma lane mwomwo ke pal inge a ke pal fwasru.
Kom E Topuk Fuka?
• Fuka metu elos pulakin me keok?
• Me keok el sang ma lane puspus nu sin met kol puspus a met nukewa su fwa muta fwin fwalu ke pal fwasru?
• Efu ku kut ku in insemwomwo ke pal inge fwinne oasr me keok?
[Picture on page 23]
Fono papa a nine se meet kiyesr akos lukun oasr pal mwomwo nu selos tok
[Picture on page 25]
Ke sripen el liye a pulakin me keok paenang ma inge kasrel Jisus in akola nu ke sie Togusra a Met Tol Fulat mwomwo
[Picture on page 27]
Met sap elos ‘engun tu filiyuki elos fwal in keok’ ke sripen lulalfongi lalos