Fulela Lun God Ke Keok Apkurun In Wanginla

AN nu kemwa kom liye, oasr me keok. Baibel el akkalemye na paye nu sesr la “God el lung.” (1 Jon 4:8) Ke ma inge, efu sie God lun lungse el lela me keok in tafweyukla ke lusen century puspis?

Ke pal se God el orala Edam a If, el sang nu selos ku in oru sulela ke inkanek sukosok. A ma inge sie me sang na mwomwo, meyen “God el liye ma nu kemwa ma el orala, a, liye! tu nu arulanu mwo.” (Genesis 1:31) Kut nu kemwa engunkin ma saok su tuku ke me sang inge in oru sulela.

Tusruktu, me sang inge ke sukosok in oru sulela tia ku in orekmakin pal nu kemwa mu wangin me kutongye. God el oru met nu kemwa in pusisel nu ke ma sap lal su ku in liyeyuk a pulakinyuk, oanu ma sap lun gravity. In oupanu, ke el orala met in pusisil nu ke ma sap lal ke oiyen moul nasnas, su orekla in sang me insemwomwo nu sin metu. Ke ma inge, ke sripe mwo, Kas lun God el kaifwe: “Lalalfongi Jeova ke insiom kemwa, a tia fungla nu ke etauk lom sifwanu.”​—Soakas 3:5.

Sou se meet lasr, Edam a If, elos orekmakin sukosok lalos in oru sulela ke inkanek koluk. Elos tafongla in nunku mu elos ku in kutangla elos fwin aksukosokyelos sifwanu liki God. Ke lungse lalos sifwanu elos, illa liki masrol lun ma sap lun God.​—Genesis, sapter 3.

Me Sramsram Yok​—Su Oasr Sumwos Ka In Kol

Ke pal se Edam a If tunyuna lain God, elos lain kolyuk lal, kalmen ma inge, sumwos lal in kol. Jeova el ku in kunaselosla a sifwil mutamwauk ke seanyen sasu, tusruktu ma inge tia ku in aksumwosye me sramsram yok ke kolyuk sumwos a mwo emeet nu sin metu. Ke pal su etukyung in akyokyelik oiyen moul lun met fwal nu ke inkanek lalos sifwanu, ku in akkalemye me topuk sumwos la kolyuk lalos sifwanu sayen God ku in kutangla na paye.

Mea me sramsram lun met ke lusen tausen yiu puspis akkalemye nu sesr? Ke lusen century puspis inge, ma koluk a keok on na.

Fulela lun Jeova nu ke ma inge a ke ma koluk a ke me keok apkurun in wanginla. Oasr ma God el akola in oru nu ke mokuikui lun met ke lusen pal na futoto. (Daniel 2:44) Pa inge inganek lun God in aksafyela me keok. El akola in kunausla fwal koluk inge a kol kut la nu ke sie akmwuk sasu lun ma nu kemwa “su sumwosmwos on we.”​—2 Piter 3:13.

Sie peng mwo na paye pa inge! Kut enenu na paye fwalu sasu se inge. A kut tia enenu in sano pat in liye ma inge. Mutamwauk ke akpayeyen kas palu nu kemwa, kut etu la lela lun God nu ke me keok apkurun in wanginla.