Ya Kom “Kasrup Ye Mutun God”?

“Ou inge el su elosak ma lal kel sifwana, a tia kasrup nu sin God.”​—LUK 12:21.

1, 2. (a) Nu ke mea metu elos lungse na paye in fuleak ma puspus? (b) Kain in ma upa a me sensen fuka met Kristian elos ku in sun?

OREKMA in suk me kasrup el tia sie me sritel su tulik elos lungse in sritelkin; el sie oiya su sikyak na paye nu ke moul ke pal puspus a sikyak in an puspus. Ke sie me pupulyuk, orekma yok in suk gold in century ak19 in an Australia, an South Africa, an Canada, a in an United States el oru met puspus su muta in an loeloes elos lungse in som liki loom selos a liki met nukewa su elos lungse tu elos in suk ma mwomwo in an puspus su elos tia etu a kutupal an su arulanu sensen. Aok, oasr met puspus su arulanu lungse in eis me kasrup puspus fwinne elos etu la oasr me sensen yok a elos enenu in kisekunla kain in ma puspus.

² Fwinne met puspus ke pal inge elos tia wi oru orekma in suk me kasrup, tusruktu elos enenu in kafweang in oru orekma in suk ma enenu lun moul. In oru ma inge ke pal inge el ku in oru in oasr ma upa, enenu in orekmakin ku a pal yok, a pulakin me aktoasr puspus. Arulanu fusrasr metu in nunku yok ke me mongo, nuknuk, a loom su oru ma yok sripe puspus in tia nunkeyuk a ku in mulkinyukla. (Rom 14:17) Jisus el akkalemye ke sie me pupulyuk, su akuteyuki sumwos nu ke oiya lun metu. Me pupulyuk se inge oasr in Luk 12:16-21.

3. Akkalemye ke kas fototo me pupulyuk lal Jisus su oasr in Luk 12:16-21.

³ Me pupulyuk lal Jisus el akkalemye ke pal sepana el sramsramkin ke me enenu nu ke karunginyen moul liki oiyen rapku, su kut akuteye tari ke me lutlut taria. Tokin el sang kas in sensen ke oiyen rapku, Jisus el sramsramkin sie mokul kasrup su tia fwalkin ku tia insemwomwokin imwen fwulma lal su nenela ke ma mwomwo puspus su oasr yurol tari, tusruktu el kunausla ma inge a el sifwil musai sie ma yok liki meeta tu elan ku in filiye ma mwo puspus we. Oana ke ma el nunku el akola in mongla a engankin sie moul mwomwo, tusruktu God el fwak nu sel la moul lal el fwa aksafyela a ma mwomwo nukewa su mokul se inge el elosak fwa som nu sin met saye. Tokin ma inge Jisus el akkalemye pa kas in aksafyela inge: “Ou inge el su elosak ma lal kel sifwana, a tia kasrup nu sin God.” (Luk 12:21) Me lutlut fuka kut ku in lotela ke me pupulyuk inge? Fuka kut ku in orekmakin me lutlut inge ke moul lasr sifwana?

Sie Mokul Su Oasr Sie Ma Upa

4. Kain in met fuka kut ku in fwak mu Jisus el akkalemye ke me pupulyuk lal?

⁴ Me pupulyuk su Jisus el akkalemye el sie me pupulyuk su eteyuk. Kut ku in liye la Jisus el mutamwauk in akkalemye me sramsram lal ke el fwak: “Fwal sin sie met kasrup isus fwako puspus.” Jisus el tia fwak mu mokul se inge el eis me kasrup lal ke inkanek kutasrik ku tia fwal nu ke masap. Ke kas saye, mokul se inge el tia akkalemyelyuk in oana met koluk se. Aok, ke ma Jisus el fwak, arulanu sumwos in nunku mu mokul se inge ke me pupulyuk el kafweang in orekma. Aok kut ku in kalem ka la mokul se inge el sie met su orala akwuk mwo a elosak ma puspus in orekmakin ke pal fwasru, saap el nunku ke me kasru mwomwo nu ke sou lal. Ke ma inge, in fwal nu ke nunak lun met puspus, mokul se inge el nunkeyuk mu sie met su alken su akpayeye a nunku yok ke kunokon lal.

5. Kain in ma upa fuka mokul se ke me pupulyuk lal Jisus el sun?

⁵ Ke kutena oiya, Jisus el pangon mokul se inge ke me pupulyuk lal oana sie met kasrup, kalme pa el sie met su oasr ma mwomwo puspus yurol. Tusruktu, in oana ke ma Jisus el akkalemye, oasr ma upa lun mokul kasrup se inge. An sin mokul inge el oswela fwako su yok liki ma el nunku, su arulanu pukanten liki ma el enenu ku ma el ku in karungin. Mea el enenu in oru?

6. Sulela puspus fuka met kulansap puspus lun God ke pal inge elos sun?

⁶ Pus sin met kulansap lun God ke pal inge elos sun kain in oiya puspus su oana sie nu ke ma sikyak nu sin mokul kasrup sa. Met Kristian paye elos kafweang in paye, alken, nunku yok ke orekma lalos. (Kolosse 3:22, 23) Fwinne oasr orekma lalos ku oasr business lalos sifwana, elos eis me insemwomwo yok ka, elos arulanu utuftuf ku sumat ke ma elos oru. Fwin oasr pal su elos akoe in kiluk mololos ku in oasr pal mwomwo in orek business sasu, elos enenu in oru sulela mwo nu ka. Ya elos ku in eis oiya inge a orekmakin pal mwomwo inge in suk mani yok? Oayepa, oasr met Lo fwusr puspus su arulanu sumat ke loom lutlut. Ke ma inge, oasr opi puspus ku scholarships nu ke college ku university mwomwo a pengpeng in eis lutlut fulat a yok. Ya elos fwa etawi ma tulik lutlut puspus elos oru a eis ma mwo su akkalemyeyuk nu selos?

7. Mea mokul se su oasr ke me pupulyuk lal Jisus el aksumwosye ma upa lal?

⁷ In sifwilpa nunku ke me pupulyuk lal Jisus, mea mokul kasrup el oru ke pal se an ku fwal lal isus fwako puspus paenang wanginla an su el ku in elosak ma el kosrani nu ka? El mutamwauk in igruiye imwen fwulma puspus lal a el musai ma yok liki meeta a elosak me mongo a ma mwomwo puspus. Saap kain in akwuk inge el oru in oasr nunak misla lal a el insemwomwokin paenang el nunku kel sifwana: “A nga fwa fwak nu sin ngunik: ‘Ngunik, ma puspus ma lom elyuk ke yea puspus; kom in mongla, mongo, nim, a engun.’”​—Luk 12:19.

Efu ku “Tia Nunak Mwo”?

8. Ma yok sripe fuka mokul se inge ke me pupulyuk lun Jisus el mulkunla?

⁸ Tusruktu, oana ke ma Jisus el akkalemye, akwuk lun met kasrup el akkalemye sie nunak tia paye nu ke oiyen misla. Akwuk inge el luman mwo, tusruktu oasr ma yok sripe su wangin ka​—pa ke ma lungse lun God. Mokul sa el nunku mukena kel sifwana, ke inkanek su el ku in mongla a mongo, nim, a engankin moul lal sifwana. El nunku pa la ke sripen oasr “ma mwo puspus” lal, paenang el ku in sun “yea puspus.” Tusruktu tia mwo nu sel, ma puspus tia akpayeyuk oana ma el nunku. Oana ke ma Jisus el fwak tari, “moul lun met tia ke ma puspus ma lal.” (Luk 12:15) Ke fong sa, ma nukewa su mokul se inge elosak el sun saflaiya su tia mwo, meyen God el fwak nu sel: “Kom met lalfon, fong se inge elos fwa siyuk ngunum sum. A ma lun su ma kom akoela tari?​”—Luk 12:20.

9. Efu ku mokul se ke me pupulyuk inge el akkalemyeyuk mu wangin nunak mwo yurol?

⁹ Inge, kut sramsramkin me lutlut yok sripe emeet ke me pupulyuk lal Jisus. God el akkalemye mokul se inge mu ma el nunku tia mwo. Buk se inge Exegetical Dictionary of the New Testament el akuteye la oiya nu ke kas Grik su orekmakinyuk el “akkalemye ke srikla lun etauk pal nukewa.” Dictionary se inge el akkalemye la ke me pupulyuk inge, God el akkalemye mu el orekmakin sie kas in akkalemye ke “wangin sripaiyen akwuk nu ke pal fwasru lun met kasrup se.” Kas inge el sramsramkin, tia ke sie met su wangin etauk yuro, a el sramsramkin “sie met su tia akilen la moul lal el fungfung nu sin God.” Me akuteye lal Jisus ke sie met kasrup el oru kut in esam ke ma el fwak tok nu sin met Kristian puspus in congregation lun met Kristian in an Leodisia, in an Asia Minor: “Kom fwak: ‘Nga kasrup, a nga yokelik in me kasrup, a wangin enenu luk,’ a kom tia etu tu kom met asor, a keok a sekasrup a kunla a koflufol.”​—Fwakyuk 3:17.

10. Efu ku fwin oasr “ma mwomwo puspus” el tia ku in me akpayeye la kut ku in eis “yea puspus” ku pal loeloes?

¹⁰ Kut enenu in sifwilpa nunku yok ke me lutlut inge. Ya kut e fwa oana mokul se ke me pupulyuk inge​—su kafweang in orekma in akpayeye la kut ku in eis “ma mwomwo puspus” tusruktu kut tia kutangla in eis ma eneneyuk nu ke fwinsrak lun “yea puspus,” ku pal loeloes. (Jon 3:16; 17:3) Baibel el akkalemye: “Wangin sripen me kasrup in len in mulat,” a “el su lulalfongi me kasrup lal fwa ikori.” (Soakas 11:4, 28) Ke ma inge, Jisus el akkalemye pa ke kas inge in weang nu ke me pupulyuk lal: “Ou inge el su elosak ma lal kel sifwana, a tia kasrup nu sin God.”​—Luk 12:21.

11. Efu ku wangin sripe in akkeye ku ako me fwinsrak a moul mwomwo misla lun sie met ke ma puspus lun fwalu?

¹¹ Ke pal se Jisus el fwak “oinge,” el akkalemye ke ma sikyak nu sin met kasrup se ke me pupulyuk lal la e fwa ku in sikyak pa nu sin met puspus fwin elos ako moul lalos​—ku me fwisrak lalos a ke me misla, a me insemwomwo lalos—​ke ma puspus lun fwalu mukena. Ma koluk pa tia ke orekma in ‘elosak ma lal kel sifwana’ a ma koluk pa in tia “kasrup nu sin God.” Met tuma lutlut su pangpang Jemes el akkalemye ke sie kas in sensen su oana ke el simusla: “Komwos in muwin, komwos su fwak: ‘Misenge ku lutu kut fwa som nu in siti se inge a muta we ke sie yea, a kuka a lais me kasrup,’ tu komwos tia etu mea a sikyuk lutu.” Mea elos enenu in oru? “A fwal komwos in fwak ou inge: ‘God el fwin lungse, kut fwa moul a oru ma inge ku ma ingo.’” (Jemes 4:13-15) Fwinne sie met el arulanu kasrup ku oasr yurol ma saok puspus lun fwalu, ma nukewa inge wangin sripe fwin el tia kasrup nu sin God. Ke ma inge, mea kalmen in kasrup nu sin God?

In Kasrup Nu Sin God

12. Mea kut enenu in oru tu kut fwa kasrup nu sin God?

¹² Ke kas lun Jisus, in kasrup nu sin God el tia oana sie nu ke orekma in elosak ma saok puspus lun fwalu nu sin met se sifwana, ku in akkasrupye moul lun sie met ke ma puspus. Ke ma inge, Jisus el akkalemye la nunak yok lasr pa in tia elosak ma saok puspus lun fwalu ku in engankin ma puspus su oasr tari yurosr. A, kut enenu in orekmakin ma saok puspus lasr in akmwoye, ku in musai, fototo mwomwo lasr nu sin Jeova. In oru oinge kut fwa ku in kasrup na paye nu sin God. Efu? Meyen ma inge ku in ikasla srungul ku inkanek nu ke me insemwomwo puspus su tuku sel me. Baibel el akkalemye nu sesr: “Insemwomwo lun Jeova me akgasrupye met, a el tia esani toasr nu ka.”​—Soakas 10:22.

13. Fuka me insemwomwo lun Jeova ‘akkasrupye’ kut?

¹³ Fwin Jeova el sang me insemwomwo puspus nu sin met kulansap lal, el engan pal nukewa in sang nu selos ma mwo emeet. (Jemes 1:17) Ke sie me pupulyuk, ke pal se Jeova el sang nu sin met Israel an in muta lalos, an inge el “sie fwal su suror ke milk a unni.” Fwinne an Ijipt el akkalemyeyuk pa oinge, tusruk an se su Jeova el sang nu sin met Israel el tia oana sie ke sie oiya yok sripe. An se inge el “sie an su Jeova God lom el liaung,” Moses el fwak nu sin met Israel. Ke kas saye elos fwa kapkapek meyen Jeova el fwa karunginelos. Ke met Israel elos sruokye oaru lalos nu sin Jeova, el fwa akinsemwomwoyelos ke inkanek yok a elos fwa moulkin sie inkanek lun moul su mwo liki moul lun met in mutanfwal puspus su raunelosla. Aok, me insemwomwo lun Jeova fwa “orelos in kasrup”!​—Oekyuk 16:13; Duteronomi 4:5-8; 11:8-15.

14. Mea met puspus su kasrup nu sin God elos engankin?

¹⁴ Kas inge “kasrup nu sin God” el akkalemyeyuk pa oana “kasrup ke liye lun God” (Today’s English Version) ku “kasrup ye mutun God.” (The New Testament in Modern English, by J. B. Phillips) Elos su kasrup ke ma puspus lun fwalu elos nunku yok pal nukewa ke liye ku nunak yok lun met puspus nu selos. Ma inge el akkalemyeyuk pal nukewa ke inkanek lun moul lalos. Elos lungse in purakak nunak lun met puspus ke ma Baibel el akkalemye oana “mwolanu lusrongten lun moul.” (1 Jon 2:16) Ke oiya saye su tia oana sie, nu selos nukewa su kasrup nu sin God elos engankin me insemwomwo lun God, a kulang alukela ma fwal ke inkanek yok a in oasr fototo mwomwo lalos nu sel. Fwin elos oasr ke oiya mwomwo inge su ku in oru elos in pulakin me insemwomwo a misla, su mwo liki kutena ma saok puspus lun fwalu su ku in sang nu selos. (Isaia 40:11) Kusensiyuk su srakna enenu in oasr me top ka pa, Mea kut enenu in oru in kasrup ye mutun God?

Kasrup Ye Mutun God

15. Mea kut enenu in oru in kasrup nu sin God?

¹⁵ Ke me pupulyuk lal Jisus, mokul se el orala akwuk a kafweang nu ka in orekma in akkasrupyel mukena, ke ma inge el pangonyuk oana met se su nunku kel sifwana su tia mwo. Ke ma inge, in kasrup nu sin God, kut enenu in kafweang yok in oru orekma a in wi pal nukewa ke orekma saok nukewa ye mutun God. Wekunang nu ke orekma inge pa ma Jisus el sapkin: “Komwos som, a oru met in mutanfwal nu kemwa tu elos in met tumal lutlut.” (Mattu 28:19) Orekmakinyen pal lasr, ku lasr, a lalmetmet lasr, tia in akinsemwomwoye kut sifwana, a in akkeye orekma in sulkakin peng mwo lun Togusrai a in oru met tuma lutlut el ku in pupulyukkinyuk nu ke orekma in elosak ma saok paye. Nu selos su orala tari ma inge elos kosrani tari me insemwomwo yok ke ma lun ngun, oana akkalemyeyuk ke experience puspus tok inge.​—Soakas 19:17.

16, 17. Experience puspus fuka kom ku in srumon in akkalemye ke inkanek lun moul su oru sie met in kasrup ye mutun God?

¹⁶ Nunku akmwoye ke ma sikyak nu sin sie mokul Kristian ke sie mutanfwal in an Asia. Oasr orekma mwomwo lal su el eis me moul yok ka oana sie computer technician. Tusruktu, orekma lal inge el enenu pal yok lal a ma inge oru elan pulakin mu el munasla ke ma lun ngun. Ke saflaiye, el tui a sisla orekma lal inge a el mutamwauk in oru sie business su orala ice cream a el kukakin ma inge ke inkaneku, akwuk inge orek in oasr pal yok lal in karungin ma enenu lal a ke kunokon puspus lal ke ma lun ngun, a tia in kafweang in suk in kilukyak ke orekma lal. Met puspus su welul ke niyen orekma elos orek aksruksruk nu sel, tusruktu mea saflaiyen orekma lal inge? “Aok, Nga eis ma enenu lun moul luk su yok liki na ke pal se Nga oru orekma ke computer,” el fwak. “Ma inge oreyu in insemwomwo yok meyen wanginla ma upa ke nunak a me fosrnga su oasr yuruk ke Nga srakna oasr ke orekma luk meeta. A yok sripe liki nukewa, Nga pulakin ingena la Nga fototo nu sin Jeova yok liki meeta.” Akwuk ke orekma sasu inge oru met Kristian se inge el ku in sroang nu ke orekma lun pioneer su orek pal nukewa, a el oru orekma in kulansap ke pal inge ke sie branch ofus lun Met Lo lun Jeova ke mutanfwal sel. Paye la me insemwomwo lun Jeova el “akkasrupye” sie met.

¹⁷ Oasr siepa me pupulyuk ke sie mutun su matula ke sie sou su nunku yok a aksaokye na paye me lutlut fulat. El wi ke university puspus in an France, an Mexico, a an Switzerland a oasr fwinsrak lal nu ke sie orekma na mwomwo. “Nga eis me insemwomwo paye a Nga eis kutangla; met puspus elos sunakin yu a oasr pal mwomwo su utuku nu sik,” el fwak, “tusruktu ke insiuk, oasr pulakinyen asor a wanginla yuruk insemwomwo paye.” Tokin ma inge el lotela ma puspus kel Jeova. El fwak: “Ke Nga kapkapek ke ma lun ngun, lungse luk in akinsemwomwoye Jeova a in folokonang kutu srisrik ma el use nu sik kasreyu in eis kalem mwomwo nu ke inkanek su Nga enenu in fwasr ka​—pa in kulansap nu sel pal nukewa.” El sisla orekma mwomwo lal meeta a tia pat el eis baptais. Ke lusen yea 20 somla, el insemwomwokin in oru kulansap lal pal nukewa oana sie pioneer. “Oasr kutu met su nunku mu Nga sisla pal mwomwo a lalmetmet luk,” el fwak, “tusruktu elos akilen la Nga insemwomwo, a elos kaksakin akwuk mwomwo ku principles nukewa su Nga orekmakin ke moul luk. Len nukewa Nga pre nu sin Jeova in kasreyu in akkalemye oiyen pusisel in eis me insemwomwo lal.”

18. Oana Poul, fuka kut ku in kasrup nu sin God?

¹⁸ Soul, su ekla met sap Poul, oasr pa pal mwomwo lal in eis sie orekma mwomwo. Ne oinge, el simusla tok: “Nga oekla ma nu kemwa oana ma tula ke mwoiyen etu luk ke Jisus Kraist Leum luk.” (Filippai 3:7, 8) Nu sel Poul, me kasrup puspus su el eis ke inkanek lun Kraist el mwo liki kutena me kasrup lun fwalu su el ku in eis. Ke inkanek oinge, ke kut fwin sisla kutena kain in niyen sun lasr in akinsemwomwoye kut sifwana a tokin ma inge kut kafweang in moulkin sie moul mwomwo in kulansap nu sin God, kut ku in engankin pa sie moul su kasrup ye mutun God. Kas lun God el akkalemye nu sesr: “Molin fwokpap a sangeng sin Jeova, me kasrup, a sunak, a moul.”​—Soakas 22:4.

Ya Kom Ku In Akuteye?

• Ma upa fuka oasr yurin mokul se ke me pupulyuk lal Jisus?

• Efu ku mokul se ke me pupulyuk lal Jisus el akkalemyeyuk mu tia mwo ma el nunku?

• Mea kalmen in kasrup nu sin God?

• Fuka kut ku in kasrup nu sin God?

[Picture on page 9]

Efu ku mokul kasrup se el akkalemyeyuk mu tia mwo ma el nunku?

[Picture on page 13]

Fuka in eis pal mwomwo in kapkapek ke ma lun fwalu el sie me srifwe na paye?

[Picture on page 10, 11]

“Me insemwomwo lun Jeova​—me akgasrupye met”