Ya kom Nunku mu Ma Koluk—el Tia Ku in Aksafyeyukla?

Ya kom Nunku mu Ma Koluk—el Tia Ku in Aksafyeyukla?

Sie tulik mokul srisrik el koneak a srukak ma se ke sie imae—bomb srisrik se pa inge—a ma se inge kunausla mutal a kunausla pa manol ke lusen moul lal. Oasr sie nine su fuliya awowo se natul su el tufwana oswella, a el mwukanulla ke niyen sisi kutkut se sisken inkanek u. Oasr sie met orekma su sisila liki orekma lal e el sifwil folokla nu ke niyen orekma lal meet, el likesikye met nukewa we su el liye, a tokin ma inge el sifwana unilye. Oasr sie mokul su sunakinyuk sin met puspus el akkolukye tulik srisrik puspus su wangin ku lalos in lainul.

SIE me asor, meyen report ke kain in ma koluk inge arlanu yokelik ke pal lasr inge. Me asor yok liki ma inge, oasr ma koluk puspus su sikyak upa liki report puspus inge nukewa su akkalemyeyuk tari oana meun lun sruf puspus su uniye sie sin sie, a orekma in aksangengye met puspus in pal inge. “Century se inge su arlanu nenela ke ma koluk upa puspus pa century lal Setan,” sie me rid su orekla in yea 1995 el akkalemye. “Soenna oasr ke ma sikyak in pal somla su metu akkalemye yok ke ku a sumat lalos, a kena yok lalos, in uniye million sin met puspus ke sripen sruf, alu ku u lalos.”

Ke pal sepana inge, metu elos akfokfokye yen engyengu, a fwalu, orekmakin me kasru nukewa su oasr ka, a uniye a kunausla ma orakrak puspus nu ke na apkurun in wanginla. Ya metu elos ku in kutangla in akwanginyela ma koluk nukewa inge a oru fwalu in sie an mwo a oasr misla su wangin me sensen ka? Ku fwin srikeyuk in orek ma inge ya efwa oana sie orekma in kafweang in kosrala alongu ke inkanek in orekmakin sie broom? Oasr sie met luti su simusla ma puspus ke sifwen me sramsram ke ma koluk el fwak: “Oasr ma enenu ku kafweang yok luk in oru me kasru in ekulla kutu ma yok ke fwalu, in akmwoyela fwalu. Tusruktu fwalu el tia ku in liyeyuk mu mwola.” Saap kom pulakin pa oinge.

Oiya su sikyak nu ke fwalu el ku in pupulyukkin nu ke soko oak su kasrusr fwin mwea ke pal se ekla lun an meoa in kolukla a oasr me sensen yok sikyak ke kais sie len. Fwinne wangin met lungse in kasrusr ke inkanek soko elos som ka, tusruktu kafweang nukewa lalos in ekulla inkanek su elos kasrusr ka tia ku in orekma ku akosyuk. Oak soko inge tia ku in tui a el som na nu ke an se su oasr paka upa we su arlanu sensen.

Nu ke kutu oiya, su oasr ke kain in oiya koluk inge nukewa ke el yokyokelik el ku in akkalemyeyuk mu sikyak ke sripen oiya sesumwos lun metu. (Rom 3:23) Tusruktu, ke lupa a upala lun ma koluk inge, a ma inge ku in yokyokelik a tia tui paenang ku in fwak mu el yok liki oiya koluk nukewa lun met puspus mukena. Ku ya oasr sie ma su oasr ku lal su arlanu fukoko a koluklanu su tia liyeyuk su akkolukye metu? Fwin oinge, mea ku se inge, a fuka kut ku in karungin kut yang sifwana? Me lutlut toku, fwa akuteye me top nu ke kusensiyuk nukewa inge.

[Picture Credit Line on page 3]