Me Akkeye Su Tuku ke Etauk Sumwos lun God
NU sin kutu met, ma Baibel el fwak ke lungse a pakoten lun God moklelos in siyuk kusensiyuk se ke sripen alollo. Elos siyuk: Fwin God el lungse in kunausla ma koluk, meyen el etu fuka in oru ou inge, a oasr ku lal in oru ou inge, na efu ku ma koluk yokyokelik? Nu selos su nunku ou inge, ma upa nu selos pa in aksumwosye ma tulo inge su luman amei sie sin sie: (1) God el ku liki nu kemwa; (2) God el lungse a mwo; a (3) ma koluk puspis yokyokelik pal nu kemwa. Elos akukuin a fwak la meyen ma se aktulo sikyuk na paye a ku in liyeyuk, paenang sie ke ma luo su lula tia ku in paye. Nu selos su ou inge, elos fwak la, God el tia ku in kutongye ma koluk ku elos tia loang nu ka.
Len ekasr tokin kunanela lun World Trade Center in an New York, sie met kol pengpeng lun alu in an United States el fwak: “Nga siyuk tari nu sik sifwanu . . . pal foko foko ke moul luk efu ku God el lela ongoiye a me keok. Nga ku in fwak na paye la Nga nukin topuk nu ke kusensiyuk inge, su ku in akinsemwomwoye yu.”
In aketeye ma el nunku ke me sramsram se inge, sie professor lun theology el simusla la el arulanu pwar ke “me sramsram mwo ke theology” su met kol lun alu inge el luti. El akkeye pa me sramsram lun sie scholar su simusla: “Tia kalem lasr efu ku oasr me keok sie ipen tia kalem lasr efu ku oasr God.” Tusruktu, ya kut tia ku in kalem na paye efu God el lela ma koluk?
Mutamweyen Ma Koluk
Tia oanu ma met kol lun alu elos fwak, Baibel el tia akkalemye la kut tia ku in kalem na paye efu ku God el lela ma koluk. Sie me lutlut yok tu kut in kalem nu ke kusensiyuk ke ma koluk pa kut enenu in akilen meet la Jeova el tia orala sie fwal koluk. El orala seanyen se meet in sumwosmwos, a wangin ma koluk yurolos. Tokin el aksafyela orekma lal, Jeova el tuni ma nu kemwa su el orala a liye, tu nu “arulanu mwo.” (Genesis 1:26, 31) Akmwuk lal nu sel Edam a If eltal in akyokye Paredais lun Eden fwalu nu fon, a in nekla ma inge ke met insemwomwo su muta ye kurungin lal.—Isaia 45:18.
Ma koluk el mutamwauk, ke pal se ma orekla in ngun se, su ke mutamwauk oaru nu sin God, el akkapye sie kena koluk a el lungse met nu kemwa in alu nu sel sifwanu a tia nu sin God. (Jemes 1:14, 15) Orekma in lain lal akkalemyeyuk fwin fwalu ke pal se ma el purakak seanyen se meet in welul lain God. Edam a If elos tia akos ma sap lun God nu selos in tia mongo ku kal fwokinsak se in etu ma mwo a ma koluk, aok Edam a If elos eis a kang fwokinsak inge. (Genesis 3:1-6) Ke ma inge, elos tia seakos God mukena, a elos akkalemye pa la elos lungse in sukosokla liki kolyuk lun God.
Sie Me Sramsram Yok Sikyuk
Orekma in lain inge su sikyuk in an Eden purakak sie me sramsram yok, sie me sramsram su arulanu yok sripe in kosrao a fwalu. Met inge su lain God elos sang alollo ke inkanek lun Jeova in kol ke ma orekla lal nu kemwa, elos siyuk fwin el kol ke inkanek sumwos ku tia. Ya oasr sumwos lun Met Orekutla in siyuk sin met in aksol pal e nu kemwa? Ku moul lun met el ku in mwo liki elos fwin sukosokla liki God, piye ka?
Jeova el aksumwosye me lain inge ke kolyuk lal ke inkanek se su akkalemye lungse, nununku sumwos, lalmetmet, a ku su arulanu sumwosmwos. El ku in orekmakin ku lal in kunausla met inge nu kemwa su lainul. Luman nununku sumwos pa inge, meyen oasr sumwos lal in oru ou inge. Tusruktu, el fwin oru ou inge, ma inge tia ku in sang topuk nu ke me sramsram yok lun met su lainul. Ke inkanek saye, God el ku in tia loang na ke ma koluk su elos oru. Kain in oiye se inge luman sie inkanek lun lungse nu sin met puspis ke len inge. Aok, ma inge tia ku in sang pa topuk ke ma Setan el akukuin in fwak la met nu kemwa elos ku in kololos sifwanu ke inkanek mwo fwinne wangin kasre sin God. Sayen ma inge, ya kain in orekma inge el tia purakak kutupa ma orekla lal in som liki inkanek lun Jeova? Fwokin ma inge pa me keok ma patpat.
Ke inkanek lun lalmetmet, Jeova el lela met in suk inkanek lalos sifwanu ke lusen sie pal. Fwinne ma inge ku in kalmekin la el enenu in lela ma koluk in oan kitin pal, tusruktu ma inge el sang pal mwo nu sin met in akkalemye fwin oasr na paye ku lal in kololos sifwanu fwinne wangin kasru sin God, a in oakiye akmwuk lalos sifwanu ke ma koluk a ma mwo. Mea fwokin ma inge? Me sramsram lun fwalu arulanu pengpeng ke meun, nununku sesumwos, orekma silolel, a me keok. Me lain nu sin Jeova su tia kutangla sang topuk nu ke me sramsram yok in Eden pal siefwunnu ke pal e nu kemwa.
In pal se na, God el akkalemye lungse lal ke pal se el supwemu Mwen nutul, Jisus Kraist, su sang moul lal oanu me kise lango. Ma inge sang kasru nu sin met nu kemwa su akos in sukosokla liki ma koluk a mise, su tuku ke seakos lal Edam. Me kise lango inge el ekesla inkanek nu ke moul ma patpat nu sin met nu kemwa su lalalfongi Jisus.—Jon 3:16.
Kut nu kemwa akpwaryeyuk ke kas paye lun Jeova su akkalemye la oasr saflaiyen me keok nu kemwa lun met. “Tu kitin pal na, a met koluk fwa wanginla,” met sim lun sam el simusla. “Aok, kom fwa alken in nunku ke yen sel, a wangin. A met fwokpap elos fwa usru fwalu, a fwa sifwanu akengunyelos in misla puspis.”—Sam 37:10, 11.
Sie Pal Fwasru Su Oasr Misla a Insemwomwo
Akpayeyen kas palu nu kemwa lun Baibel akkalemye la pal lun God in aksafyela mas, asor, a mise arulanu apkurun. Loang akmwoye ke ma mwolanu puspis su e fwa tuku, su etukyung nu sel met sap Jon ke sie arurumu lal. El simusla: “A Nga liye kosrao sasu a fwalu sasu; tu kosrao se meet a fwalu se meet wanginla, a wangin pa mwea. . . . Loom sin God oan yurin metu. A el e fwa ela sroninmutalos nu kemwa, a a fwa wangin pa mise, a elos fwa tia sifwil asor, ku tung, ku ngal. Tu ma meeta wanginla.” Ke sie me sramsram su akkalemye la mwolela se inge arulanu paye, akkalemyeyuk nu sel Jon: “Simusla, tu kas inge oaru a paye.”—Fwakyuk 21:1-5.
A fuka billion puspis lun met su wangin meta tusruktu elos mise tokin ma koluk in Eden? Jeova el mwolela la el e fwa akmoulyeak met puspis su mutol in mise. Met sap Poul el fwak: “A oasr fwinsrak luk in God . . . ma elos inge ouyepa sifwanu tawi tu a fwa oasr sifwil moulyuk nu sin met sumwos a met sesumwos.” (Orekma 24:15) Oasr fwinsrak lun met inge nu kemwa ke sie fwalu sasu “yen sumwosmwos oan we.”—2 Piter 3:13.
Oanu sie papa su lungse mwen nutul, el lela taktu in orek laslas nu sin tulik nutul el fwin etu la ma inge ku in sang me insemwomwo ma patpat nu sel toko, ou inge Jeova el lela metu in sun ma upa ke ma koluk fwin fwalu su e fwa oan kitin pal na. Aok, me insemwomwo ma patpat sano met nu kemwa su akos ma lungse lun God. Poul el fwak: “Tu akpusisilye tari ma orekla nu ke wangin sripe, tia ke lungse la sifwanu, a ke el su akpusisilyel, in fwinsrak, tu ouyepa ma orekla fwa taltalla liki sruo lun ma kulamwi nu ke sukosok lun mwolanu lun tulik nutin God.”—Rom 8:20, 21.
News paye pa inge—tia pa inge kain in news su kut liye ke television ku rid ke newspaper, aok sie peng mwo pa inge. Pa inge news mwomwo emeet su tuku sin “God lun pwarak nu kemwa,” su arulanu kurungin kut.—2 Korint 1:3.
[Pictures on page 6]
Lusen pal somla akkalemye la wangin ku lun met in kololos sifwanu fwin wangin kasru sin God
[Credit Lines]
Sou lun met Somalia: PITSE LUN UN 159849/M. GRANT; bakudang lun atom: pitse lun USAF; nien kapur lulap pangpang concentration camp: Pitse lun U.S. National Archives