Kasru Met Puspus in Akos Ma Baibel el Luti
“A elos in fok mwo elos su ke insielos paye a mwo, ke elos long kas, srukye ku, a isus fwako wi mongfusesr.”—LUK 8:15.
1, 2. (a) Nu ke akwuk fuka buk se inge What Does the Bible Really Teach? (Mea Baibel el Luti Na Paye?) orekla? (b) Ke kutu yea somla, fuka Jeova el akinsemwomwoye orekma in kafweang lun met kulansap lal in oru met tuma lutlut?
“BUK se inge el arlana mwo. Tulik lutlut luk elos lungse ma se inge. Nga lungse buk se inge. Buk se inge sang kasru in mutamwauk lutlut lun Baibel nu sin met su ku in sramsram nu se ke srungul lalos.” Pa inge sie met luti oana regular pioneer lun Met Lo lun Jeova el fwak ke buk inge What Does the Bible Really Teach? (Mea Baibel El Luti Na Paye?)a Sramsramkinyen me rid sepana inge, oasr sie met orekma lun Togusrai su matu tari el fwak: “Oasr kunokon mwomwo luk in kasru met puspus in etu Jeova ke lusen yea 50 su Nga oru orekma in luti peng mwo. Tusruktu Nga ku in fwak la, me rid se inge el arlana mwo. Kas in pupulyuk nukewa el me akkeye a petsa puspus ka in oana me pupulyuk el me akinsemwomwo.” Ya pa inge ma kom pula ke buk se inge Bible Teach? Buk se inge el oana me kasru in lutlutkin Baibel el orekla in kasre kom in akpayeye masap lun Jisus: “Ke ma inge komwos som, a oru met in mutanfwal nu kemwa tu elos in met Tumal lutlut, . . . luti nu selos in liaung ma nu kemwa Nga sapkin nu sumwos.”—Mattu 28:19, 20.
2 Wangin alolo ka la, insien Jeova el insemwomwo ke el liye million 6.6 sin Met Lo lal su inse mulala in akos masap lun Jisus in oru met tuma lutlut. (Soakas 27:11) Kalem la Jeova el akinsemwomwoye kafweang lalos. Ke lusen orekma in kulansap ke yea 2005, ke sie me pupulyuk, peng mwo el sulkakinyukelik in an su pus liki 235 a, oasr lutlut lun Baibel su pus liki 6,061,500 orekla. Fwokin ma inge pa, oasr met puspus ‘su long kas lun God a eis ma inge, tia oana kas lun met, a oana kas lun God.’ (1 Tessalonika 2:13) Ke lusen yea luo somla, oasr met tuma lutlut sasu su piselos pus liki lumfoko tausan elos akfwalye moul lalos nu ke masap lun God a mwulela moul lalos sifwana nu sin God.
3. Kusensiyuk puspus fuka ke orekmakinyen buk se inge Bible Teach fwa tuniyuk ku lutlutkinyuk ke me lutlut inge?
3 Ke pal fototo somla ya kom pulakin tari me insemwomwo ke orekma in lutlut Baibel yurin met? Fwin fwalu nufon, srakna oasr met puspus su “insielos paye a mwo” su ke pal se elos long kas lun God elos fwa “srukye ku, a isus fwako wi mongfusesr.” (Luk 8:11-15) Lela kut in akuteye la fuka kom ku in orekmakin buk inge Bible Teach ke orekma in oru met tuma lutlut. Kut fwa akuteye a tuni kusensiyuk tolu inge: (1) Fuka kom ku in mutamwauk sie lutlut lun Baibel yurin met? (2) Kain in inkanek puspus in luti fuka ku in orekmakinyuk mwo emeet? (3) Fuka kom ku in kasru sie met in ekla tia sie tulik lutlut lun Baibel mukena a oayepa sie met luti ke Kas lun God, Baibel?
Fuka Kom Ku In Mutamwauk sie Lutlut lun Baibel Yurin Met?
4. Efu ku kutu met elos alolo in lutlutkin Baibel, a fuka kom ku in kasrelos in sisla nunak lalos su srunga ku alolo in lutlutkin Baibel?
4 Fwin sapkinyuk kom in srola alukela soko infwal su arlana srulap a upa in tupalyukla ke kom liksreni in tupalla ke pal sefwanna, saap kom srunga in oru ma inge. Tusruktu fwin oasr eot in sro puspus su filiyuki takla ke infwal soko inge, saap kom fwa lungse in srike in srolla sasla ka. Ke inkanek oinge, saap sie met su kafofo el alolo in lutlutkin Baibel. Met in loomu el ku in nunku mu pal yok a orekma yok eneneyuk nu ka in lutlutkin ma inge. Fuka kom ku in kasru met in loomu in sisla kain in nunak inge su alolokin in lutlut Baibel? Ke inkanek in oru lutlut Baibel ke pal puspus tusruktu ke lusen pal na fototo, a srike in sramsramkin me lutlut mwo puspus, a kom ku in orekmakin buk se inge Bible Teach in kasru met inge in lutlutkin Kas lun God pal nukewa. Kom fwin akola mwo, ke kais sie pal su kom muteta nu yurin met se inge el fwa ku in oana stepping-stone ku eot su takla nu ke oiyen kawuk lal nu sin Jeova.
5. Efu ku kom enenu in ridi buk se inge Bible Teach?
5 Tusruktu, meet liki kom ku in kasru kutena met in eis ma lane ke buk se inge Bible Teach, kom enenu in etu na paye koanon ma inge? Ya kom ridi tari koanon buk inge ke mutamwauk nu ke safla? Oasr sie siyanyen su us me rid inge ke pal se elos som vacation a elos mutamwauk in ridi ma inge ke pal se elos muta mongla ke likinyen u. Ke pal se sie mutan su kukakin ma puspus nu sin met muteta el tuku nu yurolos, el liye sifwen me rid inge What Does the Bible Really Teach? El fwak nu sin siyanyen se inge la ke ao ekasr meet liki na pal se inge, el pre siyuk ke kain in kusensiyuk oinge, sin God ke me top. Siyanyen se inge elos insemwomwo in sang nu sin mutan se inge sie copy ke buk inge. Ya kom ‘molela pal’ in rid me rid se inge, saap ke pal akluo, ke kom sano ke appoinment lom ku ke pal se kom mongla ke niyen orekma ku ke loom lutlut? (Efesus 5:15, 16) Kom fwin oru ma inge, kom ku in etu ke koanon buk inge su me kasru in lutlutkin Baibel a ma inge ku in sang pal mwomwo nu sum in sramsramkin nu sin met puspus koanon me rid inge.
6, 7. Fuka kom ku in orekmakin buk inge Bible Teach in mutamwauk lutlut lun Baibel?
6 Ke pal in kitakatla buk inge nu sin met puspus ke kut oru orekma in luti, orekmakin mwo me pupulyuk puspus ka, ke ma simusla puspus, a ke kusensiyuk puspus su oasr in sra 4, 5, a 6. Ke sie me pupulyuk, kom ku in mutamwauk ke me sramsram nu sin met ke kom siyuk, “Ke sripen oasr ma upa puspus su sikyak nu sin metu ke pal inge, mea kom nunku mu sie sropon me kolyuk mwomwo nu ka?” Tokin kom loang akmwoye nu ke me top lun met san, rid 2 Timote 3:16, 17, a akuteye la Baibel el akkalemye me aksumwos paye nu ke ma upa nukewa lun metu. Tokin ma inge, akkalemye nu sin met in loomu ke sra 4 a 5, a siyuk kusensiyuk se inge: “Ke ma upa nukewa su akkalemyeyuk ke sra puspus inge, piye ka ma upa se su arlana akkeokye kom?” Fwin met in loomu el srusrngiye nu ke sie luma, lela elan sruokye buk san a kom rid ma simusla su oasr ka a orekmakin Baibel nutum. Tok, ridi sra 6, a siyuk sin met in loomu, “Ke kusensiyuk onkosr su akkalemyeyuk ten ke sra inge, piye ka ke kusensiyuk inge kom lungse in etu ke me top nu ka?” Ke pal se met in loomu el sulela sie sin ma inge, akkalemye nu sel ke sapta su sang me top nu ke kusensiyuk san, filiye buk san yurul, a orala sie akwuk mwomwo in sifwilpa folok muteta yurol a akuteye kusensiyuk san.
7 Me lumala inge su tufwana akkalemyeyuk fwa orek ke lusen minit limekosr. Tusruktu, ke lusen minit ekasr inge, kom fwa lotela ke ma puspus su met inge el nunku yok ka, ridi a orekmakin ma simusla luo, a kom ku in orala ku filiye pelung mwo nu ke sie return visit. Ke lusen pal fototo su kom sramsram nu sin met in loomu ke ma inge saap pa inge pal mwo se meet su el pulakin ke me akkeye a oasr me insemwomwo ka su el tufwana pulakin ke lusen pal loeloes. Ke ma inge, fwinnne sie met su kafofo el ku pa in ngetla liye ke pal fwasru in orekmakin kutupa pal ke kom kasrel in eis inkanek lal in aksumwosye fwasr lal nu ke ‘inkaneku su kol nu ke moul.’ (Mattu 7:14) Ke pal fwasru, ke insemwomwo lun met in loomu yokyokelik, lusen pal in lutlut el ku in akloesyukelik. Ma inge ku in orek ke kom siyuk fwin komwos ku in muta a lutlut ke lusen pal loes.
Inkanek Puspus in Luti su Orekmakinyuk Mwo Emeet
8, 9. (a) Fuka kom ku in kasru sie tulik lutlut lun Baibel in tu na ku ke me kutong a ma upa puspus su el ku in sun? (b) Piye kofwen me musa su tia ku in fururyuk ke e su mwo in sang musai lulalfongi fukoko el ku in koneyukyak ka?
8 Ke pal se sie met el mutamwauk in akos ma Baibel el luti, el ku in sun ma upa puspus su ku in kutongya kapkapek lal. Met sap Poul el fwak: “Elos nu kemwa su lungse in moulkin moul mutal in Kraist Jisus, elos fwa keok ke kolyai.” (2 Timote 3:12) Poul el lumala ma upa puspus inge nu ke e su ku in kunausla kofwen me musa nu ke sie loom tusruktu kofwen me musa su oana gold, silfer, a eot saok tia ku in musalla ke e. (1 Korint 3:10-13; 1 Piter 1:6, 7) In kasru tulik lutlut lom ke Baibel in akkeyel ke oiya mwo puspus su eneneyuk in kasrel in tu na ku ke ma upa nukewa su el ku in sun, kom enenu in kasrel in orekmakin kofwen me musa su tia ku in fururyuk ke e.
9 Met sim lun sam el pupulyukkin “kas lun Jeova” nu ke “silfer srikeyuk in fwunyu fwin fwalu, aknasnasyeyuk pal itkosr.” (Sam 12:6) Paye la, oasr in Baibel kofwen me musa nukewa su arlana saok su ku in orekmakinyuk in sang musaela lulalfongi fukoko. (Sam 19:7-11; Soakas 2:1-6) A buk se inge Bible Teach el akkalemye nu sum ke oiya fuka kom ku in orekmakin mwo ma Simusla puspus.
10. Fuka kom ku in kasru tulik lutlut in nunku akmwoye ke Baibel?
10 Ke pal in lutlut, kasru tulik lutlut in loang akmwoye nu ke ma simusla su oasr ke kais sie sapta su sramsramkinyuk. Orekmakin kusensiyuk puspus su ku in kasru tulik lutlut in kalem ke key text lun Baibel a in orekmakin ma simusla inge ke moul lalos sifwana. Kom enenu in taran in tia sapkin nu sel ke sulela su el enenu in oru. A, mwo in etawi me srikasrak lun Jisus. Ke pal se sie met su oasr etauk yok lal ke masap el siyuk kusensiyuk nu sel, Jisus el topuk: “Mea simla in ma sap? Kom rid fuka?” Met se inge el sang me top fwal nu ke ma Simusla, a Jisus el kasrel in liye la fuka in orekmakin akwuk mwo nu sel sifwana. Ke inkanek in orekmakin me pupulyuk, Jisus el kasru pa mokul se inge in liye la fuka me luti inge ku in orekma pa nu sel. (Luk 10:25-37) Oasr ke buk se inge Bible Teach me pupulyuk fusrasr puspus su kom ku in orekmakin in sang kasru sie tulik lutlut in orekmakin akwuk mwo lun ma Simusla nu sel sifwana.
11. Fuka lupan me lutlut su kom ku in akuteye ke kais sie pal in lutlut?
11 Buk se inge Bible Teach el orekmakin kas fusrasr, kas sumwos in akuteye Kas lun God, oana ke Jisus el akkalemye me luti upa ke inkanek lun kas fusrasr. (Mattu 7:28, 29) Etawi me srikasrak lal. Akkalemye me luti ke inkanek fusrasr, kalem, a sumwos. Nikmet sulaklak in lutlutkin sie me lutlut. A, lela luma a oiya puspus a ku lun tulik lutlut in sang akkalemye la piya pusen paragraph su kom ku in akuteye ke kais sie pal in lutlut. Jisus el etu me munas lun met tuma lutlut nukewa lal a el lotelos ke me lutlut puspus su elos enenu in pal ingo a el tia oru alukela me luti puspus nu selos su ku in aktoasryelos.—Jon 16:12.
12. Fuka appendix ke buk el ku in orekmakinyuk?
12 Ke buk se inge Bible Teach oasr appendix ka su oasr me lutlut 14. In fwal nu ke me enenu lun tulik lutlut, kom su oana met luti lal enenu in etu la fuka me lutlut inge ku in orekmakinyuk ke inkanek mwo emeet. Ke sie me pupulyuk, fwin oasr sie tulik lutlut su upa in kalem ke sie me lutlut ku oasr kusensiyuk lal ke kutu ma ke sripen ma puspus su el lulalfongi ka in pal meeta, saap mwo in kasrel in orekmakin appendix ke buk inge su akkalemye ke me kasru mwomwo a lela nu sel in sifwana lutlutkin ke sifwe se su mwo in sang kasrel sifwana. Ke luma saye, ma enenu lun tulik lutlut ku in oru kom in sulela in lutlutkin me lutlut inge yurul. Oasr ke appendix kain in sifwe puspus su yok sripe ke ma Simusla, oana “‘Soul’ a ‘Spirit’—Mea Kalme Na Paye ke Kas Luo Inge?” a “Akilenye ‘Babulon Lulap.’” Saap kom lungse in akuteye me lutlut puspus inge nu sin tulik lutlut lom. Ke sripen wangin kusensiyuk su akoeyukla nu ke sifwe puspus su akuteyuki ke appendix, paenang kom enenu in etu na paye ke me lutlut san tu kom fwa ku in orala kusensiyuk yok sripe puspus.
13. Mea pre el ku in oru in akkeye lulalfongi?
13 “Jeova El fwin tia musai loom, na elos su musai orekma ke wangin sripe,” Sam 127:1 el akkalemye. Ke ma inge, ke kom akola in kol ke sie lutlut lun Baibel, pre siyuk ke kasru lun Jeova. Lela pre su kom fwak ke mutamwauk a saflaiyen kais sie pal in lutlut in akkalemye ke fototo mwomwo lom nu sin Jeova. Akkeye tulik lutlut in pre nu sin Jeova siyuk ke lalmetmet in kalem ke Kas Lal a ke ku se su eneneyuk in orekmakin nu ke kas in kai su tuku ka. (Jemes 1:5) Fwin el oru oinge, tulik lutlut se fwa akkeyeyuk in muteng ke ma upa nukewa a el fwa ku in tafwela in fokoko ke lulalfongi.
Kasru Tulik Lutlut in Fwal in Ekla Met Luti
14. Oiyen kapkapek fuka tulik lutlut lun Baibel elos enenu in oru?
14 Fwin tulik lutlut lasr ke Baibel elos akos “ma nukewa” su Jisus el sapkin nu sin met tuma lutlut lal, elos enenu in kapkapek in akkalemye la elos tulik lutlut ke Kas lun God nu ke elos ekla met luti ka. (Mattu 28:19, 20; Orekma 1:6-8) Mea kom ku in oru in kasru sie tulik lutlut in akkalemye kain in kapkapek inge ke ma lun ngun?
15. Efu ku kom enenu in akkeye tulik lutlut lom ke Baibel in wi ke meeting nukewa lun met Kristian?
15 Mutamwauk ke pal se meet in lutlut, suli tulik lutlut in wi kom nu ke meeting nukewa lun congregation. Akuteye nu sel la kom eis me akpa oana sie met luti ke Kas lun God ke meeting nukewa. Ke lusen wik puspus, kom orekmakin minit ekasr ke saflaiyen kais sie pal in lutlut Baibel in akuteye nu sel ke akwuk nu ke kas in kasru ke ma lun ngun su kom eis ke meeting nukewa a ke toeni lulap nukewa. Kom akkalemye insemwomwo lom in sramsramkin ma lane puspus su kom eis ke meeting nukewa inge. (Hibru 10:24, 25) Ke pal se tulik lutlut el mutamwauk in wi meeting pal nukewa, el ku in ekla sie met luti ke Kas lun God.
16, 17. Mea kutu niyen sun su sie tulik lutlut lun Baibel el ku in oakiye a akpayeye?
16 Kasru tulik lutlut lun Baibel in oakiye niyen sun puspus su el ku in orala. Ke sie me pupulyuk, akkeyel in akkalemye nu sin sie sin met kawuk lal ku nu sin sie sin sou lal ke ma el lotela tari. Oayepa, akkalemye nu sel elan oakiye sie niyen sun nu ke sie akwuk in ridi Baibel nufon. Kom fwin kasrel in oakiye a sruokye sie akwuk in rid Baibel pal nukewa, kain in oiya inge ku in akinsemwomwoyel ke pal loeloes tokin el baptaisla tari. In wekunang, efu ku tia akkalemye nu sin tulik lutlut la el ku in orala niyen sun in esamya saap fwinne ke sie fus in Baibel su sang me top nu ke sie kusensiyuk yok su oasr ke kais sie sapta lun buk inge Bible Teach? In oru oinge, el fwa ekla “sie met orekma su tia enenu in mwekin, su orekmakin sumwosna kas lun God.”—2 Timote 2:15.
17 Akkeye tulik lutlut elan ku in akuteye fus puspus lun Baibel su orekmakinyuk ke kais sie me lutlut su lutlutkinyuk fwin el sang me top nu sin met puspus su siyuk sel ke sripen lulalfongi lal, a tia in lotel mukena in esamye a kalweni ma simusla. Ke lusen pal fototo puspus in oru me akpa ku in sang me kasru yok, su kom oru nu ke me lumala la kom pa sou lal ku sie met orekma su welul ke pal se siyukyuk sel in akuteye ke oiyen lulalfongi lal. Ke tulik lutlut el insemwomwo in eis me akpa, akkalemye nu sel la fuka in sang me top ke inkanek lun “fulpap a sunak paye.”—1 Piter 3:15.
18. Ke pal se sie tulik lutlut lun Baibel el fwal tari in oana sie unbaptized publisher, mea kutupa me kasru kom ku in sang nu sel?
18 Ke pal fwasru, tulik lutlut se ku in fwal in wi ke orekma in luti peng mwo. Akkalemye yok nu sel la sie kunokon na mwomwo fwin leyukla elan wi ke orekma inge. (2 Korint 4:1, 7) Ke pal se met elder elos etu a akilen la tulik lutlut se inge el fwal in oana sie unbaptized publisher, kasrel in akola ke sie me sramsram fusrasr a welul in oru orekma in luti peng mwo. Tafwela in welul in oru oiya nukewa ke orekma in luti nu sin met puspus, a lotel la fuka in akola a orala sie return visit mwomwo. Me srikasrak mwo lom sifwana el sie me kasru mwomwo.—Luk 6:40.
“Sifwana Molikomla a Elos Su Long Kom”
19, 20. Niyen sun fuka kut enenu in oru, a efu?
19 Wangin alolo ka la, enenu kafweang yok in kasru sie met in eis “etauk sumwos ke ma paye.” (1 Timote 2:4, NW) Tusruktu, tia me akengan puspus ke moul ku in srikeyuk nu ke me insemwomwo yok su tuku ke orekma in kasru sie met in akos ma Baibel el luti. (1 Tessalonika 2:19, 20) Paye la, oasr sie kunokon mwomwo yurosr in oana “met orekma yurin God” ke orekma in luti inge su orek fwin fwalu nu fon!—1 Korint 3:9.
20 Ke inkanek lun Jisus Kraist a lipufon kulanu puspus, tia pat Jeova el fwa oru nununku upa lal nu selos su “tia etu God a nu selos su tia akos mwosasu lun Leum Jisus.” (2 Tessalonika 1:6-8) Moul lun met puspus oasr ke me sensen. Ya kom ku in oru niyen sun lom in orala fwinne ke sie lutlut lun Baibel in orekmakin buk inge What Does the Bible Really Teach? Ke kom wi ke orekma se inge, oasr pal mwomwo lom in “sifwana molikomla a elos su long kom.” (1 Timote 4:16) Ke pal inge, arlana yok sripe kut in kasru met puspus in akos ma Baibel el luti.
[Footnote]
a Orekla sin Met Lo lun Jeova.
Mea Kom Lotela?
• Buk se inge Bible Teach el orekla nu ke akwuk fuka?
• Fuka kom ku in mutamwauk ke sie lutlut lun Baibel orekmakin buk inge Bible Teach?
• Mea inkanek puspus in luti su arlana mwo?
• Fuka kom ku in kasru sie tulik lutlut in ekla sie met luti ke Kas lun God?
[Picture on page 12]
Ya kom orekmakin mwo buk se inge?
[Picture on page 13]
Sie me sramsram ke lusen pal fototo ku in purakak ku akkeye kena lun met in eis etauk ke Baibel
[Picture on page 15]
Mea kom ku in oru in kasru tulik lutlut in nunku akmwoye ke Baibel?
[Picture on page 16]
Kasru tulik lutlut lun Baibel in kapkapek