Fuka Papa a Nine Elos Ku In Tu Na Ku Fwin Sie Tulik Natulos el Lain ku Seakos

SIE mutan Kristian su kut pangon Joy el kafweang in karungin tulik mokul natul in lungse Jeova God. Ke el sun matwel oana yea 18 ku 19, tulik mokul inge el mutamwauk in lain akwuk a suk in som liki loom selos. “Pa inge me akngal upa yok Nga pulakin,” Joy el fwak. “Nga pulakin keok ke el tukakinyukyak ku kiapayula, oasr inse musalla, a asor yok luk. Nga nenela ke kain in nunak sesumwos.”

Saap kom sie su kafweang pa in kurangin tulik nutum in lungse a kulansupu God​—tusruktu tok oasr sie selos ku pus selos forla lukel in kulansupal. Kom ku in kutangla fuka kain in pulakin yok ke me keok a asor inge? Mea fwa ku in kasre kom in kafweang in tu ku ke orekma in kulansap lom nu sin Jeova?

Ke Mwen Puspus Nutin Jeova Lainul

Inkanek se meet in kalem ka la Jeova el etu na paye ma kom pula. In Isaia 49:15, kut rid: “Ya sie mutan el ku in mulkunla tulik su el katiti natul, tu el fwa tia pakomuta mwen nutin insiel? Aok, elos ku in mulkunla, tusruktu Nga fwa tia mulkinkomla.” Aok, Jeova el pula pa pulakin su papa a nine puspus elos pula. Ke ma inge, nunku mwo ke me insemwomwo su el pulakin ke lipufon puspus su mwen nutal elos kaksakunal a kafweang in kulansupal. Ke el sang me top nu sin met patriarch Job “in fworu me,” Jeova el esamak pal mwomwo su el muta yurin sou lal in ngun ke inse sefwanna, fwakang: “Kom muta ya ke Nga filiye foundeson lun fwalu? . . . Ke itu in lututang tukeni on, a mwen nutin God nu kemwa sala ke engun?”​—Job 38:1, 4, 7.

Ke kutu pal tok, sie sin lipufon sumwosmwos nutin God el mutamwauk in lainul a ekla Setan, su kalme pa “Met Lain.” Jeova el liye pa la mwen se meet natul, Adam, a mutan kiel, If, elos wi ke orekma in lain inge. (Genesis 3:1-6; Fwakyuk 12:9) Tok, kutu pa lipufon lun God “elos som liki an selos” a lain God.​—Jud 6.

Ma Simusla el tia fwakak nu sesr la mea pulakin lun Jeova ke kutu sin tulik sumwosmwos natul elos orekmakin inkanek in lain lalos. Tusruktu, Baibel el akuteye sumwos: “A Jeova el liye tu yok ma koluk lun met fwin fwalu, a tu nunuk lun insielos sitoena pal e nukemwa. A Jeova el auli insiel tu el orala met tari fwin fwalu, a toasr insiel ka.” (Genesis 6:5, 6) Orekma in lain lun met sulela nukewa lun Jeova, met Israel, oral pa in pulakin “ngal” a “toasr ku asor.”​—Sam 78:40, 41.

Wangin alolo ka la Jeova el pulakin pa asor yok lun papa a nine su sun me akngal a asor ke sripen orekma in lain lun tulik natulos. Ke kas lal, in Baibel, el sang kas in kasru mwomwo a me akkeye in sang kasru papa a nine in kutangla me asor su sikyak nu selos. God el kaifwelos in likiye me sensen nukewa nu fwel, in akpusiselyelos sifwana, a in tu ku in lain Setan su Devil. Lela kut in liye la fuka in akos kas in kai inge ku in kasre kom in kafweang in tu na ku fwin tulik nutum el lain a seakos.

Likiye Me Fosrnga Nukewa Lomwos Nu Sin Jeova

Jeova el etu la oasr kutu ma su oru papa a nine elos in pulakin me fosrnga yok ke tulik natulos elos fwin oasr ke me sensen in akkolukyelos sifwana ku fwin akkolukyeyuk sin met puspus. Met sap Piter el akkalemye ke sie inkanek in kasru in kutangla ma inge a kutu pa me fosrnga. El simusla: “Likiye nukewa me fosrnga lomwos nu sin [Jeova], tu El karungin komwos.” (1 Piter 5:7, NW) Efu ku me solsol inge a kas in akkeye inge yok sripe nu sin papa a nine kiyen sie tulik lain?

Ke tulik nutum el srakna srik, kom arulana loang akmwoye in karunginul liki me sensen, a el akos ke me kai mwomwo lom. Tusruktu, ke el matula, ku lom nu sel saap munasla, a kena yok lom in karunginul liki me sensen tiana munasla. Paye la, saap ma inge yokelik.

Ke ma inge, ke tulik nutum el lain ku seakos a sun ma upa in ngun, ke pulakin, ku ke ma upa ke mano, saap kom pulakin mu oasr ma lom nu ke ma inge. Joy, su akkalemyeyuk ke mutamweyen me lutlut inge, el pulakin kain in oiya inge. El fwak: “Kais sie len, Nga asor yok ke sripen Nga pula la Nga tia kutangla, Nga nunku yok pal nukewa ke ma sikyuk in pal somla in liye ke ma koluk Nga orala.” Yokna ke pal oinge Jeova el lungse kom in “likiye nukewa me fosrnga lom nu fwel.” Kom fwin oru ou inge, el e fwa kasre kom. “Filiye me utuk lom fwin Jeova,” met sim lun sam el fwak, “a El a fwa kasre kom. El koflana filiye met sumwosmwos tu in mukuikui.” (Sam 55:22) Joy el pula kain in me akkeye inge. El akuteye: “Nga sramsram nu sin Jeova na paye ke ma nukewa nga pulakin ke insiuk. Nga ikasla nu sel pulakin luk nukewa, a ma inge oasr me kasru yok emeet ka.”

Oana sie papa ku nine su sesumwos, saap oasr ma tafongla lom ke kom karunganang tulik nutum. Efu ku kom nunku ma tafongla lom mukena? Kalem la Jeova el tia ou inge, met sim lun sam el on: “Jeova, kom fwin akilenye ma koluk, O Jeova, su a fwa tu?” (Sam 130:3) Fwinne kom sie papa ku nine sumwosmwos, saap srakna oasr tulik nutum su oru me lain. Akkalemye pulakin nukewa lom nu sin Jeova ke inkanek lun pre, a el e fwa kasre kom in kutangla. Tusruktu, fwin kom sifwana kafweang in tu ku ke kulansap lom nu sin Jeova a fwasr liki me akkoluk lun Setan, kom enenu in kafweang yok.

Sifwana Akfulpapye Komwos

“Komwos in sifwana akfulpapye komwos ye po ku lun God,” met sap Piter el simusla, “tu El fwa akfulatye komwos in pal fwal.” (1 Piter 5:6) Efu ku inse pusisel eneneyuk ke tulik nutum el oru me lain? In wekunang ma puspus su oru kom in pulakin toasr a ngal ka, fwin oasr sie tulik su lain saap ku in oru kom in pulakin pa mwekin. Saap kom nunku yok ke orekma ku mukuikui lun tulik nutum su ku in kunausla oiya mwo lun sou lom, yokna fwin el sisila liki congregation lun met Kristian. Pulakinyen me akkolukye kom sifwana a me mwekin ku in akmunasye kom in tia wi meeting nukewa lun met Kristian.

In suk me kasru nu ke kain in ma sikyuk inge, kom enenu in orekmakin lalmetmet paye. Soakas 18:1 el kaifwe: “El su sifwana srella, el suk ma lungse lal, a mulat lain lalmetmet paye nu kemwa.” In wi meeting nukewa lun met Kristian pal nukewa fwinne kom asor yok, kom fwa ku in eis sropon kas in kasru yok sripe a me akkeye. “Ke mutamwauk, Nga srunga in liye kutena met,” Joy el fwak. “Tusruktu Nga akesmakinye yu sifwana ke yok sripaiyen akwuk mwomwo nu ke orekma in alu luk nu sin God. Sayen ma inge, fwin Nga muta na looma, Nga ku in nunku yok ke ma upa puspus luk. Meeting nukewa kasre yu in loang yok nu ke ma lun ngun su oasr me akkeye ka. Nga arulana engun ma lulap la Nga tia sifwana sriyula a paenang in tia eis ma lane su tuku ke me kasru mwomwo lun brother a sister wiyuk nukewa.”​—Hibru 10:24, 25.

Esam, pa, la kais sie met ke sie sou enenu in “sifwana wis me toas lal” oana sie met Kristian. (Galetia 6:5) Jeova el tupan papa a nine in akkalemye lungse a in kai tulik natulos. El ouyepa tupan tulik in akos a akfulatye papa a nine kiyelos. Fwin papa a nine elos oru ke ku lalos nukewa in kasru tulik natulos in kapek ke “kai a kaiyuk lun Jeova,” papa a nine elos sifwana fwa oasr sie oiya mwomwo lalos nu sin God. (Efesus 6:1-4) Fwin sie tulik el lain kai su tuku sin papa a nine ke inkanek lun lungse, oiya mwo lun tulik inge fwa akkolukyeyukla. “Aok sie tulik sifwana fwakulak ke orekma lal, orekma lal fwin nasnas, a fwin sumwos,” Soakas 20:11 el fwak. Orekma in lain lal Setan el tia kunausla oiya mwomwo lun Jeova in masrlon ma orekla nukewa su etu ke ma paye inge.

Komwos In Tu Ku in Lain Devil

“Komwos in efwal, komwos in sano,” met sap Piter el sang kas in sensen. “Met lokwalok lomwos Devil, el oana soko laion ngutngut, el fwafwasryesr, in suk su el fwa kangla.” (1 Piter 5:8) In oana soko laion, target lun Devil pal nukewa pa met fwusr a met su soenna oasr etauk yok yuru ku met nukewa su nukin. In pal meeta, laion puspusc fwin forfor in an Israel a oasr me sensen nu sin kosro nukewa su muna ke anu. Fwin oasr soko lam fwusr el som liki u lal, ma soko inge arulana fusrasr in akkolukyeyuk. Nine kiyen lam fwusr soko inge fwa sulaklak in sang moul lal sifwana in sang karungin lam natul. Tusruktu, fwinne soko sip su matu tari wangin ku lal in lain soko laion. Ke ma inge, oasr ma eneneyuk ke met seperd su pulaik in karunganang un sip.​—1 Samuel 17:34, 35.

In karunganang met nukewa lal su lumeyuk oana sip natul liki “laion ngutngut,” Jeova el orala akwuk in oasr met seperd in ngun in karungin u su on ye “met seperd lulap,” Jisus Kraist. (1 Piter 5:4) Piter el sang nu sin met su srusrngiyuki inge ke kas in kaifwe inge: “Komwos in kiteung u lun God in maslomwos, a karungnulosyung in tia sranges, a ke lungse lomwos; fwal nu ke lungse lun God; a tia pa insien mani in moli, a ke insiomwos kena oru.” (1 Piter 5:1, 2) Ke akesrui lomwos oana papa a nine, met seperd inge saap ku in sang kasru nu sin sie met fwusr in aksumwosye inkanek lal ke orekma in kulansap lal nu sin Jeova.

Ke met Kristian seperd elos enenu in sang kas in kai nu sin tulik nutum su lain, saap kom ku in pulakin mu oasr ma eneneyuk in loangela ku sang karungin tulik nutum ke me kai. Tusruktu, in kafweang na in tafwela ke inkanek inge fwa sie ma tafongla upa. Piter el akkalemye: “Komwos in tu ku lainul [Devil]”—tia lain met seperd in ngun.​—1 Piter 5:9.

Ke Me Kai El Arulana Upa

Fwin tulik nutum el srunga in auliyuk a el sie met Kristian su bapatis tari, el ku in eis kain in me kai upa​—in sisella liki congregation. Lupan me sramsram ku osun su orek ke mutamweyen pal inge fwasru su orek nu sin tulik nutum el fwal nu ke matwel a kutu pa ma sikyuk.

Fwin tulik el sie met fwusr a el muta in loomu, kom fwa tafwela na in karunganang ma enenu lal in ikwe. El enenu pa me akpa nu ke oiya nasnas a me kai, a oasr kunokon lom in sang ma inge. (Soakas 1:8-18; 6:20-22; 29:17) Saap kom lungse in oru sie Baibel study yurol, a el ku in rid a sang me top ke pal in lutlut inge. Kom ku in sang kasru nu ke nunak lal in nunku ke ma simusla puspus a ke me rid su “met kulansap oaru a lalmetmet” elos orala. (Mattu 24:45) Kom ku in us pa tulik inge in wi kom nu ke meeting nukewa lun met Kristian a lela el an muta siskom. Ma inge nukewa ku in orala in oasr fwinsrak nu ka la el e fwa ku in eis kas in kasru lun ma Simusla nu ke insiel.

Ma sikyuk inge tia oana sie fwin met su sisila el tila met fwusr a muta loes liki loom selos. Met sap Poul el kaifwe met Kristian in an Korint in pal meeta: “Komwos in tia aengune yurin sie met, fwin etukyung e, met lili, a el met kosro, ku met rapku, ku met alu nu ke me srulela, ku met aksruksruk koluk, ku met srui, ku met pusrapasr, mwo in tia mongo yurin sie su ou inge.” (1 Korint 5:11) Fwinne ke karunginyen me enenu lun sou saap nu ke eneneyen sramsram ku osun nu sin met sisila, papa ku nine Kristian enenu in kafweang in tia oru asrouki su tia eneneyuk.

Ke pal se tulik su oru ma koluk el kaiyuk sin met Kristian seperd, efwa tia mwo ku sie inkanek lalmetmet fwin kom srike in pilesru ku aksrikye orekma lalos fwal nu ke Baibel. In weak tulik nutum fwin kas in kai lun met elder orek in sang karungin tulik nutum su enenu me kai el tia sang me kasru nu sin tulik kutena me karungin paye in lain Devil. Paye la, kom sensenkin moul in ngun lom sifwana. Nu ke oiya saye, fwin oasr kasru nu ke kafweang lun met seperd, kom fwa ku in “tu ku in lalalfongi” a fwa sang me kasru mwo emeet nu sin tulik nutum.​—1 Piter 5:9.

Jeova Fwa Kasre Kom

Fwin tulik nutum el srike in lain, esam la kom tia mukena. Oasr kutu pa papa a nine Kristian elos pulakin pa kain in ma sikyak inge. Fwin oasr kutena ma upa sikyuk nu sesr, Jeova el ku in kasre kut.​—Sam 68:19.

Lulalfongi Jeova ke pre. Asrouki nu sin congregation lun met Kristian pal nukewa. Sang kasru ke me kai lun met seperd su srusrngiyuki. In oru oinge, kom fwa ku in kafweang in tu ku. A me srikasrak mwomwo lom ku in kasru tulik nutum in porongo me solsol mwolana a kulang su tuku sin Jeova elan sifwil pa folokla nu yurol.​—Malakai 3:6, 7.

[Pictures on page 30]

Eis ku su tuku ke pre a ke congregation lun met Kristian