“Sifwil Moulyuk Se Meet”—Orek Ke Pal Inge!
“Met mise in Kraist elos fwa moulyuk meet.”—1 TESSALONIKA 4:16.
1, 2. (a) Mea fwinsrak lun met puspus su mise tari? (b) Lulalfongi lom nu ke sifwil moulyuk el fwal nu ke mea? (Srike liye footnote.)
“MET moul elos etu la elos fwa mise.” Oiya inge akpayeyuk mutamwauk ke pal se Adam el orala ma koluk. Ke lusen pal ke me sramsram lun metu, kais sie met su isusla el etu la ke saflaiye el fwa mise, a met puspus elos nunku ka la: ‘Mea fwa sikyak tok? Mea sikyak nu sin met mise?’ Baibel el sang me topuk: “Met mise, elos tia etu kutena ma.”—Ekklisiastis 9:5.
2 Ke ma inge, ya oasr kutena fwinsrak nu selos su mise tari? Aok. Paye la, oasr fwinsrak nu sin met mise fwin akwuk se meet lun God nu sin metu fwa akpayeyuk. Ke lusen century puspus, met kulansap oaru puspus lun God elos lulalfongi ke mwulela lun Jeova ke sie Fute su fwa kunaosulla Setan a akwanginyela ma koluk nukewa su el oru. (Genesis 3:15) Oasr met pus elos mise. Fwin elos ku in liye me akpayeyen mwulela se inge a ke kutupa mwulela su Jeova el akkalemye, oasr ma enenu elos in akmoulyeyukyak nu ka liki mise. (Hibru 11:13) Ya ma inge ku in sikyak? Aok, ku. Met sap Poul el fwak: “Tu a fwa oasr sifwil moulyuk nu sin met sumwos a met sesumwos.” (Orekma 24:15) Oasr sie pal Poul el akmoulyeak sie mokul su pangpang Eutikus sie met fwusr, su putatla liki windo ke infwokil aktolu lung a metu “sruklulak tu el nu mise.” Pa inge akwuk in akmoulyeak safla ke sifwil moulyuk su sikyak ke pal yuh su simusyukla in Baibel.—Orekma 20:7-12.a
3. Kain in me akkeye fuka kom sifwana pula ke kas lun Jisus in Jon 5:28, 29, a efu?
3 Sifwil moulyak su sikyak ke pal yuh in pal meeta pa pelung mwomwo in lulalfongiyuk nu ke ma Poul el simusla. Ma inge nukewa akkeye lulalfongi lasr nu ke mwulela lun Jisus: “Tu aur se a fwa tuku, ke elos nu kemwa su muta inkulyuku fwa long pusral [Jisus] a fwa tuku liki.” (Jon 5:28, 29) Kas inge el me akkeye inse na paye! A kas inge el me akkeye yok nu sin million puspus sin met su oasr met su elos lungse tusruk elos mise tari!
4, 5. Kain in sifwil moulyuk puspus fuka Baibel el akkalemye, a sifwil moulyuk fuka fwa akuteyuki ke me lutlut inge?
4 Pus sin met su akmoulyeyukyak tari fwa moul ke sie fwal su oasr misla ka ye Togusrai lun God. (Sam 37:10, 11, 29; Isaia 11:6-9; 35:5, 6; 65:21-23) Tusruktu, oasr sifwil moulyuk saye su fwa sikyak meet liki ma inge sikyak. Ma se meet, Jisus Kraist el akmoulyeyukyak in sang saokiyen me kise lal nu sin God kesr. Jisus el mise a akmoulyeyukyak in yea 33 C.E.
5 Tok, met akmusrala su wi ke u lun “Israel lun God” elos enenu in wi Leum Jisus Kraist ke mwolena lal in kosrao, an se su elos fwa “muta yurin leum ma patpat.” (Galetia 6:16; 1 Tessalonika 4:17) Ma sikyak inge pangpang “moulyuk se meet.” (Fwakyuk 20:6) Ke pal se kain in sifwil moulyuk inge aksafyeyukla, pa inge pal se su million puspus sin met mise fwa sifwil akmoulyeyukyak fwin fwalu su oasr fwinsrak in eis moul ma patpat ke sie Paredais. Ke ma inge, fwinne fwinsrak lasr pa in moul in kosrao ku fwin fwalu, oasr insemwomwo yok lasr ke “moulyuk se meet.” Kain in sifwil moulyuk fuka inge? Nge ma inge sikyak?
“Kain in Mano Fuka?”
6, 7. (a) Meet liki met akmusrala elos ku in som nu in kosrao, mea enenu in sikyak? (b) Ke kain in mano fuka elos fwa eis tokin elos akmoulyeyukyak?
6 Ke leta se meet lal nu sin met Korint, Poul el siyuk ke sifwil moulyuk se meet: “Fuka akmoulyeak met mise? A mea oiyen mano elos tuku ka?” Tokin ma inge el sang me top nu ke kusensiyuk inge: “Ma su kom sifwana taknelik tia kapek, fwin tia mise . . . a God el sang mano oana el lungse . . . A sie mwolana lun mano in kosrao, a siepa lun mano fwin fwalu.”—1 Korint 15:35-40.
7 Kas lal Poul el akkalemye la met Kristian akmusrala ke ngun mutal elos enenu in mise meet liki elos ku in eis me sang lalos in kosrao. Tokin mise lalos, manolos in ikwe fwa folokla nu in foko. (Genesis 3:19) Ke pal pakiyuki lun God, elos fwa sifwil akmoulyeyukyak ke sie kain in mano su fwal nu ke moul in kosrao. (1 Jon 3:2) God el sang pa nu selos moul ma patpat. Kain in moul inge tia oasr yurolos ke pal se elos isusla, oana ke sie ma su pangpang ngun su tia ku in mise su mongyung nu in fwelos. “Ma mise inge fwa nukomang ma tia ku in mise,” Poul el fwak. Oiya se inge ke met el tia ku in mise el sie me sang sin God, su “nukomang” sin met puspus su wi ke sifwil moulyuk se meet.—1 Korint 15:50, 53; Genesis 2:7; 2 Korint 5:1, 2, 8.
8. Kut etu fuka la God el tia sulela met 144,000 liki met puspus su wi ke alu puspus?
8 Met 144,000 mukena wi ku eis moulyuk se meet. Jeova el mutamwauk in sulelos la ke len in Pentecost 33 C.E., tia pat tokin el akmoulyelak Jisus. Oasr yurin met nukewa inge “el [Jisus], a en Papa Tumal simla tari fwin mutunsrolos.” (Fwakyuk 14:1, 3) Ke ma inge, elos tia suleyukla liki alu puspus. Elos nukewa fwasr tokin Jisus Kraist, a elos nukewa engan na paye in us ku orekmakin inen Papa—Jeova. Ke elos akmoulyeyukyak, elos eis kunokon ku orekma in kosrao. Fwinsrak in oru orekma in kulansap nu sin God ke inkanek sumwos inge el me akinsemwomwoye na paye nu selos.
Sikyak Ke pal Inge?
9. Fuka Fwakyuk 12:7 a 17:14 kasre kut in motko ke pal se su moulyuk se meet mutamwauk?
9 Nge moulyuk se meet sikyak? Oasr me akpayeye fukoko ka la ma inge orek ke pal inge. Ke sie me pupulyuk, srike liye akmwoye sapta luo ke Fwakyuk. Ma se meet, srike liye Fwakyuk sapta 12. Ke sapta se inge kut ku in rid ka la Jisus Kraist su tufwana eis mwal lal oana togusra, wekunang lipufon mutal nukewa lal, elos orek meun in lainul Setan a lipufon nukewa lal. (Fwakyuk 12:7-9) Oana ke me rid inge el akkalemye pal nukewa, meun se inge mutamwauk in yea 1914.b Tusruktu, loang akmwoye nu ka la met kulansap akmusrala lun Kraist elos tia welul Jisus ke meun inge su orek in kosrao. Ingena srike liye pa sapta 17 ke Fwakyuk. Kut rid ke sapta se inge la tokin kunanela lun “Babulon Lulap,” Lam el fwa sruokye mutanfwal puspus. Ke sapta inge el akkalemye pa la: “Elos su pangonyuk a sulosula a oaru su oasr yurol elos fwa kutangla pa.” (Fwakyuk 17:5, 14, NW) “Elos su pangonyuk a sulosula a oaru” elos akmoulyeyukyak tari fwin elos fwa welul Jisus in kutangla in aksafyela fwal lal Setan. Ke ma inge, met akmusrala nukewa su mise meet liki Armagedun elos akmoulyeyukyak ke lusen pal in masrlon yea 1914 a pal in Armagedun.
10, 11. (a) Su met elder 24, a mea sie selos akkalemye nu sel Jon? (b) Mea kut ku in fwak ke ma inge?
10 Ya kut ku in fwak na paye la piye pal na paye nu ke moulyuk se meet mutamwauk? Oasr sie me kasru su oasr in Fwakyuk 7:9-15, su ke ma simusla inge met sap Jon el akkalemye aruruma se lal ke “sie u lulap, su wangin met ku in oekla.” Me akul nu ke u lulap se inge akkalemyeyuk nu sel Jon sin sie met in masrlon met elder 24, a met elder nukewa inge elos aoliyen 144,000 met usru su welul Kraist ke mwolena lalos in kosrao.c (Luk 22:28-30; Fwakyuk 4:4) Oasr fwinsrak lal Jon in som nu in kosrao; tusruktu ke sripen el srakna moul oana sie met fwin fwalu ke pal se met elder sa el kaskas nu sel, ke aruruma se inge Jon el aolyen met akmusrala nukewa su oasr fwin fwalu su soenna eis me sang lalos in moul in kosrao.
11 Ke ma inge, mea kut ku in fwak ke me akpayeye inge la sie sin met elder 24 el akkalemye u lulap se inge nu sel Jon? Ma inge el ku in akkalemye la met su wi ke u lun met elder 24 su akmoulyeyak tari saap elos wi in akkalemye ma paye lun God ke pal inge. Efu ku ma se inge yok sripe? Meyen me akul sumwos lun u lulap akkalemyeyuk nu sin met kulansap akmusrala nukewa lun God fwin fwalu in yea 1935. Fwin sie sin met elder 24 su orekmakinyuk in akkalemye ma paye su yok sripe inge, el enenu in akmoulyeyukyak tari nu in kosrao in yea 1935 ku meet liki yea se inge. Ma inge akkalemye la moulyuk se meet mutamwauk ke lusen pal su oasr in masrlon yea 1914 a 1935. Ya kut ku in akkalemye ke pal nge ma inge orek na paye?
12. Akuteye la fuka pulan pal lun spring in yea 1918 el ku in nunkeyuk nu ke pal in mutamwauk lun sifwil moulyuk se meet.
12 Ke me lutlut yok sripe se inge, oasr me kasru su ku in sang me akuteye mwomwo nu ke ma su nunkeyuk mu oana sie ma su sikyak su oana sie nu ke ma su oasr in Baibel. Jisus Kraist el akmusrala ke pulan pal lun fall ku malem lun October in yea 29 C.E oana Togusra ke pal fwasru ke Togusrai lun God. Tokin yea tolu tafwu, ke pulanpal lun spring ku malem lun April in yea 33 C.E., el akmoulyeyukyak oana sie ngun su yoklanu ku yuru. Ke ma inge, ke sripen Jisus el eis kunokon lal oana sie togusra ke pulan pal lun fall in yea 1914, ya ma inge ku in fwak mu sifwil moulyuk lun met kulansap oaru lal su akmusrala elos mutamwauk ke yea tolu tafwu tokin pal inge, ke pulan pal lun spring in yea 1918? Oiya inge saap ku in sikyak. Fwinne ma inge tia ku in akpayeyuk sumwos in Baibel, tusruktu ma inge el fwal nu ke kutupa ma simusla su akkalemye la sifwil moulyuk se meet el orek tia pat tokin oasr tari lun Kraist mutamwauk.
13. Ke inkanek fuka 1 Tessalonika 4:15-17 ku in akkalemye la sifwil moulyuk se meet sa mutamwauk ke pal in oasr tari lun Kraist?
13 Ke sie me pupulyuk, met sap Poul el simusla: “Kut su moul, a mutana nu ke pal in oasr tari lun Leum [tia, nu ke saflaiyen oasr tari lal] fwa tia som meet lukelos su motul; tu Leum el fwa sifwana oatui in kosrao me, wi sasa, a pusren lipufon su fulat, a igug lun God, a met mise in Kraist elos fwa moulyuk meet. Na kut su moul a mutana, fwa utukyuk yurolos in pukunyengu, in sun Leum yen engyengu; a ou inge kut fwa muta yurin Leum ma patpat.” (1 Tessalonika 4:15-17) Ke ma inge, met Kristian akmusrala su mise meet liki oasr tari lun Kraist elos akmoulyeyukyak nu ke moul in kosrao meet liki met akmusrala nukewa su srakna moul ke lusen pal in oasr tari lun Kraist. Kalmen ma inge pa sifwil moulyuk se meet sa mutamwauk ke pal in oasr tari lun Kraist, a ma inge tafweyukla in orek “ke lusen pal in oasr tari lal.” (1 Korint 15:23, NW) Sifwil moulyuk se meet el sikyak ku orek ke lusen sie pal, a met akmusrala elos tia akmoulyeyukyak ke pal sefwanna.
“Etukyung Nu Selos Nukewa Nuknuk Fwosfwos”
14. (a) Nge aruruma puspus su simusyukla in Fwakyuk sapta 6 akpayeyuk? (b) Mea akkalemyeyuk in Fwakyuk 6:9?
14 Nunku pa, ke me akpayeye su oasr in Fwakyuk sapta 6. Ke ma simusla inge Jisus el liyeyuk la el muta fwin ors soko oana sie Togusra su kutangla. (Fwakyuk 6:2) Mutanfwal puspus elos wi ke meun ke inkanek yok. (Fwakyuk 6:4) Oasr sral yen nukewa. (Fwakyuk 6:5, 6) Oasr mas upa puspus su akkeokye metu. (Fwakyuk 6:8) Ma sikyak nukewa inge su palyeyuk tari arlena kalem la pa inge ma sikyak fwin fwalu mutamwauk ke yea 1914. Tusruktu oasr kutupa ma su sikyak. Kut enenu in loang akmwoye nu ke sie altar ku loang nu ke oreyen me kise. Oasr ke pelung lun loang inge pa “ngunalos su mise ke kas lun God, a ke luti su elos luti ka.” (Fwakyuk 6:9) Ke sripen “ngun [ku, moul] lun ikwe oasr ke sra,” paenang ma su lumeyukla oana ma se su oasr ke niyen loang pa sran met kulansap oaru nukewa lun Kraist su anwuki ke sripen orekma pulaik a moniyuk lalos in sang ma lo.—Livitikus 17:11.
15, 16. Akuteye la efu ku kas in Fwakyuk 6:10, 11 el sramsramkinyuk nu ke sifwil moulyuk se meet.
15 In oana ke sral Ebel ke el sie met sumwos, sran met Kristian oaru nukewa inge wowoyuk in suk ke nununku sumwos. (Genesis 4:10) “A elos wowoyuk ke pusra lulap, fwakang: ‘Putaka, O Leum, mutal a paye, Kom tia nununku a foloksak ke sras nu fwelos su muta fwin fwalu?’” Mea sikyak tok? “Etukyung nu selos nu kemwa nuknuk fwosfwos; a el fwak nu selos, tu elos fwa mongla kiten pal, nu ke pal met asruoki yurolos in orekma a ma lelos, su fwa mise oana elos.”—Fwakyuk 6:10, 11.
16 Ya nuknuk fwosfwos nukewa inge itukyuk nu ke lulu in sra su oasr ke pelung lun me loang u? Mo tia oinge! Nuknuk fwosfwos itukyang nu sin met puspus su sralos surorla, oana ke kas in pupulyuk, nu ke me loang u. Elos kisekin moul lalos ke inen Jisus a ingena elos akmoulyeyukyak oana met in ngun. Kut etu fuka ma inge? Meet liki pal se inge in buk lun Fwakyuk, kut rid: “El su kutangla, el fwa nukomang nuknuk fwosfwos; a Nga fwa tia ela el liki buk in moul.” Esam pa la, met elder 24 elos “nukomang nuknuk fwosfwos; a tefuro gold on fwin sifwelos.” (Fwakyuk 3:5; 4:4) Pasis tokin meun, sral, a mas upa puspus mutamwauk in sikyak a akkeokye fwalu, met su wi ke u lun met 144,000 su mise tari, su aolien sra ke niyen me loang, elos akmoulyeyukyak nu ke moul in kosrao a oana ke kas pupulyuk elos nukomang nuknuk fwosfwos.
17. Ke inkanek fuka elos nukewa su eis nuknuk fwosfwos elos “mongla”?
17 Met nukewa su tufwana akmoulyeyukyak elos enenu in “mongla.” Elos enenu in mongfusesr in sano nu ke len in foloksak lun God. “Met kulansap” wiyelos, su wi ke u lun met Kristian akmusrala su srakna oasr fwin fwalu, elos srakna enenu in akpayeye oiyen paye a oaru lalos ye me srife. Ke pal se nununku lun God summu, “mongla” lalos fwa aksafyeyukla. (Fwakyuk 7:3) In pal se, met nukewa su akmoulyeyukyak elos fwa wi Leum Jisus Kraist in kunausla met koluk, wekunang elos nukewa su aksurorye sran met Kristian puspus su wangin meta.—2 Tessalonika 1:7-10.
Mea Kalmen Ma Inge Nu Sesr?
18, 19. (a) Ke sripe puspus fuka kom ku in fwak mu sifwil moulyuk se meet orek ku sikyak ke pal inge? (b) Fuka etauk a kalem lom ke sifwil moulyuk se meet akkeye kom?
18 Kas lun God el tia akkalemye nge pal na paye nu ke moulyuk se meet, tusruktu el akkalemye la ma inge sikyak ke lusen sie pal, ke lusen pal su Kraist el oasr tari. Met puspus su akmoulyeyukyak meet pa met Kristian akmusrala su mise meet liki mutamweyen oasr tari lun Kraist. Ke oasr tari lun Kraist fwafwala na, met Kristian akmusrala su oaru in aksafyela moul lalos fwin fwalu elos ekla “in sarup se” nu ke sie oiya su oana ma orekla in ngun su ku. (1 Korint 15:52) Ya met akmusrala nukewa elos fwa eis me sang lalos in kosrao meet liki meun lun Armagedun? Kut tia etu. Tusruktu, ma kut etu ka pa ke pal pakiyuki lun God, met 144,000 nukewa elos fwa tu in Eol Saion in kosrao.
19 Kut etu pa la pus sin met su wi ke 144,000 elos welul Kraist tari. Oasr na met ekasr lula su srakna moul muta fwin fwalu. Sie me akul fukoko pa inge la pal in oru nununku lun God el arlena fototoeni! Tia pat, akwuk nukewa ke fwal lun Setan fwa kunausyukla. Setan el fwa sifwana filiyuki nu in abyss ku niyen prison lal. Tokin ma inge, akwuk lun sifwil moulyuk ke inkanek yok ku in mutamwauk, a ke kasru lun me kise ke lango lun Kraist, met oaru puspus elos ku in eis me kasru in ekla met sumwosmwos su fwa oana sie nu ke oiya su tula sel Adam. Kas palu lun Jeova su simusyukla in Genesis 3:15 akpayeyuk ke inkanek mwolena. Sie me insemwomwo na paye nu sesr in moul ke pal inge!
[Footnotes]
a Ke pal oalkosr saye ke sifwil moulyak el sikyak, srike liye 1 Togusra 17:21-23; 2 Togusra 4:32-37; 13:21; Mark 5:35, 41-43; Luk 7:11-17; 24:34; Jon 11:43-45; Orekma 9:36-42.
b Ke me akpayeye su tuku ke ma Simusla la oasr tari lun Kraist mutamwauk in yea 1914, nunak munas liye buk se inge What Does the Bible Really Teach? (Mea Baibel el Luti Na Paye?) sra 215-18, orekla sin Met Lo lun Jeova.
c Ke me akuteye la kut etu fuka la met elder 24 elos aoliyen met akmusrala ke an selos a orekma lalos in kosrao, srike liye buk se inge Revelation—Its Grand Climax At Hand! (Fwakyuk—Akpayeyen Kas Palu Nukewa Ke Inkanek Nukewa Apkurun!) sra 77, orekla sin Met Lo lun Jeova.
Ya Kom Ku In Akuteye?
Fuka ma simusla puspus toku kasre kut in akilen pal in “sifwil moulyuk se meet”?
• 1 Korint 15:23; 1 Tessalonika 4:15-17
[Pictures on page 24]
Sifwil moulyuk fuka sikyak meet liki pal se met puspus su mise tari elos fwa akmoulyeyukyak liki mise?
[Picture on page 27]
Ke inkanek fuka nuknuk fwosfwos itukyang nu sin met puspus su motulla ke inkanek in mise lalos?