Efu ku in Akilen a Akkalemye ke Met Su Lain Kraist?

Efu ku in Akilen a Akkalemye ke Met Su Lain Kraist?

“Komwos nu long tu met lain Kraist a tuku,” met sap ke kasru lun ngun mutal el simusla in pal meeta. (1 Jon 2:18) Kas inge el sie me purakak nunak na paye! Ke lusen century puspus, metu elos nunku yok ke kalmeyen kas inge. Su met su lain Kraist inge? Ngea el fwa tuku? Mea el fwa oru ke pal se el tuku?

KE LUSEN yea puspus oasr met puspus su pangonyuk mu elos met su lain Kraist. In pal somla, oasr met puspus su pangonyuk mu “met su lain Kraist” wekunang met Ju puspus, met kol puspus lun Catholic, a met kol puspus lun an Rom. Ke sie me pupulyuk, ke pal se Emperor Frederick II (1194-1250) el oru sulela lal in tia wi ke sie Meun in sang kasru ke alu, Pope Gregory IX el panglol met lain Kraist a el sisella liki alu inge. Oasr sie met kol su aolul Gregory, su pangpang Innocent IV, el sifwilpa sisella. In akkalemye me top lal nu ke orekma lalos inge, Frederick el akkalemye la mokul se inge Innocent el pa met su lain Kraist.

Met sap Jon pa met sim sefwanna lun Baibel su orekmakin kas se inge “met su lain Kraist.” Ke buk luo su Jon el simusla, kas se inge simusyukla ke pal limekosr, su sramsramkin ke met sefwanna a oasr pal orekmakinyuk nu ke met puspus. Fus nukewa su kas inge sikyak ka el akkalemyeyuk ke pok se ke sra toku. Ke fus nukewa inge, kut ku in liye la met su lain Kraist el oana sie met kikiap a sie met kinauk, su lungse na paye in kunausla fototo lun sie met nu sin Kraist a nu sin God. Ke ma inge, met sap elos akkeye met Kristian nukewa wiyelos: “Met kulu, komwos in tia lalalfongi ngun nu kemwa, a akpayeye ngun, elos fwin ma sin God me, ku tia; tu met palu kikiap puspus elos fwasrelik nu fwalu.”—1 Jon 4:1.

Jisus el sang pa kas in sensen lain met kikiap puspus, ku met palu kikiap, a el fwak: “[Elos] tuku nu yurumwos in luman sipu, a elos wolf lemnak insielos. Komwos fwa etalos ke fwako [ku, orekma] lalos.” (Mattu 7:15, 16) Ya Jisus el sang pa kas in sensen nu sin met tuma lutlut lal ke met su lain Kraist? Lela kut in liye la fuka kut ku in etu a akilen met kikiap su koluklanu inge.