Efu Ku Kut Enenu In Kafweang In Oru Ma Sumwos Ye Mutun God?

OASR mokul se su yok etauk lal el fwak: “Tu lungse on yuruk, a in oru ma mwo tia on yuruk. Tu ma mwo su nga lungse nga tia oru, a ma koluk su nga tia lungse, ma inge nga oru.” Efu ku mokul se inge el etu la upa in oru ma mwo su el lungse? El akuteye: “Na nga konoiyuk ke ma sap, tu nga su lungsik in oru ma mwo, ma koluk on yuruk. Tu nga engun in ma sap lun God ke insiuk, a nga liye siena lo in laak, su meuni nu ke lo lun nunkuk, a nga sruo ka ye ma sap lun ma koluk su on in laak.”​—Rom 7:18, 19, 21-23.

Kas lun met sap Poul inge, su simusyukla apkurun nu ke yea 2,000 somla, el akuteye la efu ku in oru ma sumwos el sie ma upa nu sin met sesumwos nukewa. In sruokye a orekmakin pal nukewa akwuk sumwos nukewa, yokna ke pal su oasr ma upa puspus, enenu in oasr na paye ku lasr in orekmakin nu ke oiyen moul nasnas. Ke ma inge kut enenu in siyuk, Mea sripe yok se meet in oru ma sumwos?

Nunku la mea ma Simusla el akkalemye ke pal fwasru lun sie met sumwos. In Sam 37:37, 38, kut ku in rid: “Akilenye met sumwosna, a suiye met sumwos, tu oasr insemwomwo in saflaiyen met lun misla. Fono ke met koluk, elos fwa tukeni kunausyukla; saflaiyen met orek ma koluk fwa mwotla.” Soakas 2:21, 22 el akkalemye nu sesr: “Tu met sumwos fwa muta in fwalu, a met sumwosna fwa mutana we. A met koluk fwa mwotla liki fwalu, a met kutasrik fwa fufyuk liki.”

Mwulela nukewa inge a kutupa kas in mwulela su oasr in Baibel el ase nu sesr me kasru in kafweang in fwasr ke sie inkanek su akinsemwomwoye God.