Fuka In Sramsram Nu Sin “Met Su Long Pre”
“O Kom su long pre, nu sum ikwe nu kemwa fwa tuku.”—SAM 65:2.
1. Ke oiya fuka metu tia oana sie nu ke ma orekla nukemwa fwin fwalu, a pal mwomwo fuka oasr yurosr ke sripen oiya inge?
KE MA orekla moul nukemwa fwin fwalu, metu mukena pa oasr ku la in alu nu sin Met Orala ma nukemwa. Met mukena pa etu in nunku yok ke ma enenu lal in ngun a elos lungse in akyokye ma inge. Ke sripe inge, oasr yurosr pal mwomwo nukemwa in oasr futoto lasr sifwana nu sin Papa tumasr in kosrao.
2. Kain in fwako koluk fuka sikyak ke sripen ma koluk paenang in oasr ma ekla nu ke futoto lun met nu sin Met su Oralla?
2 God el orala met su oasr ku in sramsram nu sin Met su Oralla. Adam a If orekla wangin ma koluk lalos. Ke ma inge, elos sukosok in osun nu sin God oana sie tulik srisrik su tuku nu yurin papa tumal. Tusruktu, ke sripen ma koluk su elos orala, kunokon mwomwo inge tula lukelos. Adam a If elos seakos God a tula futoto mwomwo lalos nu sel. (Genesis 3:8-13, 17-24) Ya ma inge kalmekin la tulik nukemwa natul Adam su oasr oiyen sesumwos lalos elos tila ku in sramsram nu sin God? Mo, Jeova el srakna lela elos in sramsram nu sel fwin elos srakna akos masap lal. Mea masap ku me siyuk inge?
Ma Eneneyuk Puspus in Sramsram nu sin God
3. Fuka met sesumwos elos ku in sramsram nu sin God, a me srikasrak fuka pupulyukkinyuk nu ke ma inge?
3 Oasr sie ma sikyak ke tulik mokul luo natul Adam su ku in kasre kut in liye ma God el siyuk sin sie met sesumwos su lungse in sramsram nu sel. Kein a Ebel kemwana elos kafweang in futoto nu sin God ke elos kisekin me kise lalos nu sel. God el eis me kise lal Ebel, a me kise lal Kein el tia eis. (Genesis 4:3-5) Efu? Hibru 11:4 el akkalemye: “Ke lalalfongi Ebel el kise nu sin God ke me kise mwo liki kise lal Kein, a ke ma se inge oasr ma lo kel tu el sumwosmwos.” Kalem la, lulalfongi el eneneyuk nu ke oiyen futoto nu sin God. Siepa ma eneneyuk ku in liyeyuk ke kas lun Jeova nu sel Kein: “Ya kom fwin oru mwo, kom fwa tia eis kulang ka?” Aok, God el insemwomwo ke inkanek lal Kein in futoto nu sel fwin el oru ma mwo. Tusruktu, Kein el srunga in orekmakin kas in kai lun God, el unilye Ebel, a ke saflaiye el ekla oana sie met kaeng a met tukusrkusr. (Genesis 4:7-12) Ke ma inge, fwinne in pal meeta, yok sripen lulalfongi nu ke futoto nu sin God wekunang orekma mwo su akkalemyeyuk tari.
4. Mea kut enenu in akilen ke inkanek lasr in futoto nu sin God?
4 Akilenyen sesumwos lasr sifwana el yok sripe kut fwin lungse in futoto nu sin God. Met nukemwa oru ma koluk, a ma koluk el sie me kutong nu sin sie met in sramsram nu sin God. Met palu Jeremaia el simusla ke met Israel: “Kut orek ma koluk . . . Kom sifwana afwunkomla ke sie pukunyeng, tu oinge wangin pre fwa ku in alukela.” (Eoksra 3:42, 44) Fwinne met elos sesumwos, ke lusen me sramsram lun metu God el akkalemyel sifwana la el lungse in eis a long pre nukemwa lun met nukemwa su sramsram nu sel ke lulalfongi paye a akkalemye oiya mwo a fwal nu ke inse, in akos masap nukemwa lal. (Sam 119:145) Su kutu sin met inge, mea kut ku in lotela ke pre lalos?
5, 6. Mea kut ku in lotela ke inkanek lal Ebream in futoto nu sin God?
5 Sie sin met inge pa Ebream. God el insemwomwo in eis ku long ke inkanek lal Ebream in futoto nu sel, paenang God el panglol Ebream “kawuk luk.” (Isaia 41:8) Mea kut ku in lotela ke inkanek lal Ebream in sramsram nu sin God? Met patriarch oaru inge el siyuk sin Jeova ke sie me usru, el fwak: “Mea Kom a fwa ase nu sik, tu wangin tulik nutik?” (Genesis 15:2, 3; 17:18) Oasr sie pa pal, el akkalemye nunak lal ke met su fwa moliyukla fwin God el oru nununku lal in lain met koluk nukemwa in an Sodom a an Gomora. (Genesis 18:23-33) Ebream el oayepa pre ke met puspus. (Genesis 20:7, 17) A, in oana ke ma sikyak kel Ebel, inkanek lal Ebream in futoto nu sin God ke pal puspus oasr me kise su el kisekin nu sin Jeova.—Genesis 22:9-14.
6 Ke pal nukemwa inge, Ebream el pula la el sukosok in sramsram nu sin Jeova. Tusruktu, ke oiyen sukosok inge in sramsram wekunang pa inse ku nunak pusisel lal ke futoto lal nu sin Met su Oralla. Loang akmwoye nu ke kas lal su oasr pusren sunak ka, su oasr in Genesis 18:27: “Liye inge, Nga sifwana akfulatye yu in kaskas nu sin Jeova, nga su kutkut a apat mukena.” Sie oiya mwomwo na paye su fwal in etawiyuk!
7. Ma puspus fuka met patriarch elos siyuk sin Jeova ke pre lalos?
7 Met patriarch puspus elos pre ke ma puspus, a Jeova el insemwomwo in long pre lalos. Jekob el akkalemye pre lal oana sie fulak. Tokin el siyuk ke kasru lun God, el oru sie mwulela: “Liki ma nu kemwa Kom a fwa ase nu sik, paye nga fwa sot sie tafu siengoul nu sum.” (Genesis 28:20-22) Tok, ke pal se el apkurun na in sun tamulel wiyel, Jekob el siyuk Jeova ke me karungin, el fwak: “Moliyula, nga siyuk sum, liki poun ma lik, liki paul Iso, tu nga sangeng sel.” (Genesis 32:9-12) Met patriarch inge su pangpang Job el sramsram nu sin Jeova ke sou lal, kisekin me kise kelos. Ke pal se met kawuk tolu lal Job elos oru ma koluk ke kaskas lalos, Job el pre kelos, “a Jeova El porongel Job.” (Job 1:5; 42:7-9) Me sramsram nukemwa inge kasre kut in akilen ma puspus su kut ku in siyuk sin Jeova ke pre. Kut liye pa la Jeova el akola pal nukemwa in long pre lun met nukemwa su sramsram nu sel ke inkanek mwo a fwal.
Ye Mwuleang lun Masap
8. Ke mwuleang lun Masap, fuka ma puspus akkalemyeyuk nu sin Jeova in kasru metu?
8 Tokin Jeova el molela mutanfwal Israel liki an Ijipt, el sang nu selos, mwuleang ke Masap. Oasr akwuk su oakiyuki ke Masap ke inkanek in futoto ku sramsram nu sin God ke inkanek lun met tol puspus su pakiyuki. Kutu sin met Livai elos pakiyuki in oru orekma oana met tol in kasru metu. Fwin oasr ma upa sikyak ke mutanfwal inge, oasr met tutafpo lun mutanfwal inge—kutupal sie togusra ku sie met palu—akkalemye ma upa lalos nu sin God ke pre. (1 Samuel 8:21, 22; 14:36-41; Jeremaia 42:1-3) Ke sie me pupulyuk, ke pal in kise lun temple, Togusra Solomon el sramsram nu sin Jeova ke inkanek lun pre su tuku ke inse. Aok, Jeova el akkalemye la el eis ku long pre lal Solomon ke el nekla temple ke mwolanu Lal a fwak: “Srek forang, nu ke pre su orek in an se inge.”—2 Kronikel 6:12–7:3, 15.
9. Mea eneneyuk nu ke inkanek mwo a fwal in sramsram nu sin Jeova ke temple?
9 Ke masap su itukyang nu sin met Israel, Jeova el sang pa sie ma su eneneyuk nu ke inkanek in futoto nu sel su ku in oru orekma in temple. Mea ma se inge? Ke lututang nukemwa a ke fong nukemwa, in wekunang nu ke orekma in kisekin me kise ke kosro, met tol fulat el enenu in esukak me keng ye mutun Jeova. Tok, met tol puspus elos oru pa ma inge, a ke Len in Orek Iumwe elos tia esukak me keng. Fwin met tol elos tia oru orekma in akkalemye sunak inge, Jeova el fwa tia akinsemwomwoye orekma in kulansap lalos.—Exodus 30:7, 8; 2 Kronikel 13:11.
10, 11. Me akpayeye fuka kut ku in etu ka la Jeova el eis ku long pre lun kais sie met?
10 In an Israel in pal meeta, ya oiyen sramsram nu sin God ku in orek mukena sin met tutafpo su pakiyuki? Mo, ma Simusla el akkalemye la Jeova el insemwomwo in long pre lun kais sie met. Ke pre in kise lal Solomon in temple, el siyuk sin Jeova, a el fwak: “Kutena pre a kaifwe su kutena met oru, ku met Sram Israel nu kemwa . . . a asroela paul nu ke loom se inge, na kom long in kosrao.” (2 Kronikel 6:29, 30) Ma simusla lal Luk el akkalemye nu sesr la ke pal se Zekaraia, papa tumal Jon Baptais, el kisekin me keng ke temple, oasr sie u lun met puspus su tia orekma oana met tol su alu nu sin Jeova elos “pre likinuma.” Kalem la, oasr oiya lun met Israel in toeni nu sie in pre likin temple ke me keng el kisekinyuk nu sin Jeova ke loang su orek ke gold.—Luk 1:8-10.
11 Ke ma inge, Jeova el insemwomwo in long pre lun met tutafpo nukemwa lun mutanfwal sa a pre lun kais sie met su lungse in sramsram nu sel, fwin oiya inge in sramsram nu sel orek ke inkanek mwo a fwal. Ke pal inge, kut tila muta ye mwuleang lun Masap. Fwinne oinge, kut ku in lotela kutu me lutlut yok ke pre ke inkanek nukemwa su met Israel in pal meeta elos sramsram ka ku oru pre lalos nu sin God.
Inkanek in Kalukyang a in Sramsram nu sin Jeova ke Inkanek lun Congregation lun met Kristian
12. Akwuk fuka orekla nu sin met Kristian elos in sramsram ku in futoto nu sin Jeova?
12 Kut moul ingena ye akwuk su Kraist el oakiye. Wanginla temple paye su oasr met tol su aoliyen met kulansap nukemwa lun God ku an se su kut som nu we kut fwin e pre nu sin God. Ne oinge, Jeova el orala akwuk tu in ku in futoto ku in orek sramsram nu sel. Mea ma se inge? In yea 29 C.E., ke pal se Kraist el akmusrala a pakiyuki oana sie Met Tol Fulat, a oasr sie temple in ngun su mutamwauk in orekmakinyuk.a Temple in ngun sasu se inge pa akwuk sasu in kasru metu in sramsram nu sin Jeova nu ke alu a ma inge fwal nu ke me kise lun Jisus Kraist in oana me iumwe.—Hibru 9:11, 12.
13. Ke pre, mea ma se su oana sie in masrlon temple in Jerusalem a temple in ngun?
13 Oasr oiya puspus ke temple in an Jerusalem su petsaela pa akwuk puspus ke temple in ngun, wekunang ma puspus su kupasr nu ke pre. (Hibru 9:1-10) Ke sie me pupulyuk, me keng su kisekinyuk, ke lututang a eku, fwin loang lun me keng ke an Mutal lun temple el lumeyuk nu ke mea? In fwal nu ke buk lun Fwakyuk, el akkalemye la “me keng, su pre lun met mwo.” (Fwakyuk 5:8; 8:3, 4) Devid el simusla: “Lela pre luk in filiyuki ye mutom oana me kise keng.” (Sam 141:2) Ke ma inge, ke akwuk lun congregation lun met Kristian, me keng su mwo folo arlana fwal in lumeyuk nu ke pre mwomwo a kas in kaksak nu sin Jeova.—1 Tessalonika 3:10.
14, 15. Mea ku in fwak ke inkanek in futoto ku sramsram nu sin Jeova lun (a) met Kristian akmusrala? (b) “sip ngie”?
14 Su ku in tuku nu yurin God ke temple in ngun inge? In temple paye, met tol nukemwa a met Livai oasr kunokon lalos in oru orekma in kulansap lun kalkal lun temple, tusruktu met tol mukena pa ku in ilyuk nu in an Mutal. Met Kristian akmusrala nukemwa su oasr fwinsrak lalos in kosrao elos engankin sie oiya lun ngun su arlana mwo a lumeyukla nu ke kalkal su oan lun temple, in an Mutal, a ke sripe inge elos ku in pre a sang kaksak nu sin God.
15 Fuka nu sin met nukemwa su oasr fwinsrak lalos in moul fwin fwalu, ku “sip ngie”? (Jon 10:16) Met palu Isaia el akkalemye la met lun mutanfwal puspus fwa tuku in alu nu sin Jeova “in len safla.” (Isaia 2:2, 3) El simusla pa la “metsa puspus” elos fwa sifwana wi Jeova. In akkalemye inse mulala lal in long inkanek in sramsram lalos, God el fwak: “Nga fwa . . . akengunyelos in imwen pre sik.” (Isaia 56:6, 7) Fwakyuk 7:9-15 el akkalemye ke kutupa ma, su el sramsramkin ke “sie u lulap” su tuku liki “mutanfwal nukemwa” su tukeni nu sie in orek alu a pre nu sin God “len a fong” ke elos tu ke kalkal likin temple in ngun. Sie me akkeye na paye pa inge la met kulansap nukemwa lun God ke pal inge elos ku in sramsram nu sin God a elos ku in lulalfongi la God el fwa long pre lalos!
Kain in Pre Fuka Longyuk sin God?
16. Mea kut ku in lotela ke pre lun met Kristian in pal meeta?
16 Met Kristian in pal meeta pa kain in met su lungse in pre pal nukemwa. Ma puspus fuka elos pre ka? Met Kristian elder elos siyuk ke kasru in sulela mokul puspus su fwa oru kunokon puspus ke u ku congregation. (Orekma 1:24, 25; 6:5, 6) Epafras el pre ke met lili puspus. (Kolosse 4:12) Met Kristian nukemwa su wi ke congregation fwin an Jerusalem elos pre kel Piter ke pal se el muta ke niyen prison. (Orekma 12:5) Met Kristian in pal meeta elos siyuk sin God in akpulaikyelos ke pal su oasr me kalyai, ke elos fwak: “Leum [Jeova, NW], kom liye me aksangeng lalos, a sang nu sin met kulansap Lom in fwak kas Lom ke pulaik nu kemwa.” (Orekma 4:23-30) Met tuma lutlut Jemes el kaifwe met Kristian nukemwa in pre nu sin God siyuk ke lalmetmet ke pal su oasr me srife. (Jemes 1:5) Ya kom siyuk pa ke ma nukemwa inge ke pre lom?
17. Pre lun su Jeova el long?
17 God el tia long pre nukemwa. Ke ma inge, kut ku in etu fuka la God el fwa long pre lasr? God el long pre lun met oaru nukemwa in pal meeta su sramsram nu sel ke paye a oasr oiya mwo lun inse. Elos akkalemye lulalfongi a akkalemye ma inge ke orekma mwo nukemwa. Kut ku in lulalfongi la Jeova el fwa long pre lun met nukemwa su sramsram nu sel ke inkanek oinge ke pal inge?
18. Fwin elos lungse pre lalos in longyuk, ma eneneyuk fuka met Kristian elos enenu in sun?
18 Oasr siepa ma eneneyuk. Met sap Poul el akuteye ma inge, el fwak: “Tu ke el kut . . . tuku nu yurin Papa ke sie ngun.” Su ka Poul el sramsramkin ke pal se el simusla ma inge, “ke el”? Nu sin Jisus Kraist. (Efesus 2:13, 18) Aok, kut sukosok in tuku nu yurin Papa ke inkanek lun Jisus mukena.—Jon 14:6; 15:16; 16:23, 24.
19. (a) Nga me kise keng in an Israel ekla me srungeyuk nu sin Jeova? (b) Fuka kut ku in etu la pre lasr el oana me kise keng nu sin Jeova?
19 Oana ke ma akkalemyeyuk tari, me keng su kisekinyuk sin met tol lun Israel el lumeyuk nu ke pre mwomwo lun met kulansap oaru nukemwa lun God. Tusruktu, oasr pal, me kise keng lun met Israel el me srungeyuk nu sin Jeova. Pa inge oiya su orek ke pal se met Israel elos esukak me kise keng in temple a ke pal sepana inge elos epasr a orek alu nu ke ma srolela. (Ezikiel 8:10, 11) Oapana ke pal inge, pre lun met nukemwa su fwak mu elos kulansap nu sin God tusruktu ke pal sepana inge elos oru orekma su lain masap lal su oana sie fofoul ku sie folo koluk nu sel. (Soakas 15:8) Ke ma inge, lela kut in tafwela in oru oiya nukemwa lun moul lasr in nasnas tu pre lasr fwa oana sie me kise keng nu sin God. Jeova el insemwomwo ke pre lun met nukemwa su akos masap sumwos lal. (Jon 9:31) Tusruktu, srakna oasr kutu kusensiyuk sikyak. Kut e pre fuka? Kut ku in pre ke ma fuka? A fuka God el topuk pre lasr? Me lutlut lasr toko fwa akuteye ma inge a kutupa kusensiyuk.
[Footnote]
a Srike liye Tauer In San ke kas Merika, issue lun May 15, 2001, sra 27.
Ya Kom Ku In Akuteye?
• Fuka met sesumwos elos ku in futoto ku sramsram nu sin God ke inkanek mwo?
• Ke pre lasr, fuka kut ku in etawi met patriarch puspus?
• Mea kut ku in lotela ke pre lun met Kristian in pal meeta?
• Ngea pre lasr el oana me keng lun spais keng nu sin God?
[Petsa ke sra 15]
Efu ku God el eis me kise lal Ebel a el tia eis me kise lal Kein?
[Petsa ke sra 16]
“Nga kutkut a apet”
[Petsa ke sra 17]
“Paye Nga fwa sot sie tafu siengoul nu sum”
[Petsa ke sra 18]
Ya pre lom el oana me keng lun spais keng nu sin Jeova?