Sie Me Lutlut Ke Oiyen Fulang a Inse Pusisel

OASR ma sikyak nu ke moul lal Togusra Devid su akkalemye yok ke ma tia oana sie nu ke oiyen inse pusisel paye a ke oiya lun fulang. Ma inge sikyak tokin el sruokye an Jerusalem a orala an se inge oana capital siti se. Devid el ngetak nu sin Jeova oana Togusra na paye lun met Israel, ke ma oinge el orala akwuk ke Tuptup in Mwuleang, su lumeyuk nu ke oasr lun God, in utukla nu in siti se inge. Ma sikyak inge arulanu yok sripe nu sel Devid paenang el akkalemye engan lal ye mutun met nukemwa ke el fwasr tokin met tol fulat su us Tuptup in Mwuleang. Met nukemwa su muta in an Jerusalem elos liye togusra lalos “el onsrosro . . . ke ku lal kemwa.”​—1 Kronikel 15:15, 16, 29; 2 Samuel 6:11-16.

Tusruktu, mutan kiyel Devid su pangpang Maikal el tia wi akkalemye insemwomwo lal ke ma sikyak inge. El ngetla in windo a liye ma sikyak, a el tia lungse inkanek lal Devid in sang kaksak nu sin Jeova, a el “mutamwauk in srungel insiel.” (2 Samuel 6:16) Efu ku Maikal el akkalemye pulakin inge? Saap, el nunku mu el sie mutan su arlana yok sripe meyen el an nutal Soul, togusra se meet lun Israel, a ingena el mutan kiyen togusra akluo lun Israel. El ku in pulakin mu mokul tumal, su togusra se, el tia enenu in akpusiselyel sifwana wi u lun met kulansap ku met orekma a in welulos ke inkanek lalos in oru me akengan inge. Kain in nunak insefulat inge akkalemyeyuk ke el painglul Devid ke pal se el folokla nu in loom sel. El fwak ke kas in aksruksruk koluk: “Fuka lupan mwo togusra lun Israel misenge, su sifwana igasak misenge ye mutun mutan kulansap lun met kulansap lal, oana sie met lusrongten su sifwana igasalak a tia mekin!”​—2 Samuel 6:20.

Oiya fuka Devid el akkalemye ke kas in aksruksruk koluk inge? Devid el sang kas upa nu sel Maikal ke el fwak la Jeova el srunga a esella Soul, papa tumal, a God el sulella in aolul Soul. Devid el fwak pa: “Nga fwa srakna srungeyuk liki pal se inge, a nga fwa piles ye mutuk sifwanu; a fono ke mutun kulansap su kom kaskas ka, elos fwa sunakin yu [Nga lungse in akmutalyeyu sifwana yurolos, NW].”​—2 Samuel 6:21, 22.

Aok, Devid el oru sulela in kulansap nu sin Jeova ke inse pusisel pal nukemwa. Oiya inge kasre kut in etu ku kalem ka la efu Jeova el panglol Devid “sie met su oana insiuk.” (Orekma 13:22; 1 Samuel 13:14) Aok, Devid el etawi me srikasrak mwo emeet ke oiyen inse pusisel​—ke me srikasrak lun Jeova God sifwana. Kalem la, kas su orekmakinyuk sel Devid ke pal se el fwak nu sel Maikal, “Nga fwa piles” el tuku ke kas Hibru su orekmakinyuk pa in akkalemye nunak sifwana lun God ke metu. Fwinne Jeova el Met se in ngun su yok emeet in kosrao a fwalu, Sam 113:6, 7 akkalemye la oana “el sifwana akpusiselyel in liye ma in kosrao a fwin fwalu; el tulokunak met sekasrup liki kutkut, a srukak met enenu liki in foko.”

Ke sripen Jeova el inse pusisel, wangin alolo ka la el srunga “muta fulang” lun met insefulat. (Soakas 6:16, 17) Ke sripen Maikal el akkalemye oiya koluk inge a el tia akfulatye togusra su God el sulela, paenang kunokon in oswela sie tulik mokul nu sel Devid tia itukyang nu sel. El mise a wangin tulik natul. Sie me lutlut yok sripe nu sesr! Met nu kemwa su lungse me insemwomwo lun God enenu in akos kas inge: “Komwos nu kemwa in loseni kapinsiomwos ke fulpap, in kulansupu sie sin sie; tu God El sinukin met su fulang, a El sang lungkulang nu sin met fulpap.”​—1 Piter 5:5.