Job—el Sie Me Srikasrak Nu Ke Muteng A Ke Oiyen Oaru
“Ya kom nunku kel Job met kulansap luk, tu wangin sie oana el fwin fwalu, sie met wangin meta a sumwos, sie su sangeng sin God a forla liki ma koluk?”—JOB 1:8.
1, 2. (a) Kain in ma upa puspus fuka Job el sun? (b) Akuteye moul lal Job meet liki ma upa puspus sikyak nu sel.
OASR sie mokul su oasr ma nukemwa yurol—me kasrup, oiyen pengpeng, mano fukoko, a sie sou su oasr moul insemwomwo. Tokin ma inge oasr ma upa yok tolu su sikyak nu sel. Arulanu sa me kasrup lal in tula lukel. Oasr sie paka sakuruk upa su sikyak tok a uniye tulik natul nukemwa. Tia pat tokin ma inge, oasr mas upa sikyak su akmunasyel a pa inge sripe yok su paenang oasr faf upa sikyak ke manol nafon su arulanu ngal. Kom ku in akilen mokul se inge la el pa Job, sie met su sramsramkinyuk yok ke sie buk in Baibel pangpang Job.—Job, sapta 1 a 2.
2 “O ke nga in oana in malem meeta,” el sasao. (Job 3:3; 29:2) Ke pal se oasr ma upa sikyak, su e fwa tia sifwilpa nunku ke ma mwomwo nukemwa su sikyak in pal meeta? Ke ma sikyak nu sel Job inge, el engankin moul mwomwo in pal somla, su luman wangin me keok ka. Met pengpeng elos akkalemye sunak nu sel a elos siyuk sel ke me kai. (Job 29:5-11) El met kasrup, tusruktu oasr nunak mwomwo lal nu ke mani. (Job 31:24, 25, 28) Fwin oasr mutan katinmas a tulik su wangin papa a nine su enenu me kasru, el kasrelos. (Job 29:12-16) A el oaru pal nukemwa nu sin mutan kiyel.—Job 31:1, 9, 11.
3. Mea nunak lun Jeova kel Job?
3 Job el moulkin moul su wangin meta ka ke sripen el alu nu sin God. “Tu wangin sie oana el fwin fwalu,” Jeova el fwak, “sie met sumwosmwos a sumwos, sie su sangeng sin God, a forla liki ma koluk.” (Job 1:1, 8) Tusruktu fwinne oasr oiya nasnas lal Job, moul mwomwo lal tula ke sripen me keok nukemwa su sikyak. Ma nukemwa su el eis a orala tula, a oiya paye lal srifeyuk ke kain in me akngal, a me akasor yok.
4. Efu ku sie me kasru yok in nunku a akuteye ke ma upa su sikyak nu sel Job?
4 Paye, tia Job mukena pa met kulansap lun God su sun me keok upa su akkolukyelos sifwana. Met Kristian puspus ke pal inge elos sun pa kain in oiya inge. Ke sripe se inge, oasr kusensiyuk luo su fwal in akuteyuki: Fuka orekma in akesmakin nu ke me srife lal Job kasre kut fwin oasr ma upa sun kut? A fuka ma inge ku in luti kut in akkalemye la kut pula pa kain in pulakin lun met puspus su sun me keok inge?
Sie Issue nu ke Oaru a sie Me Srife nu ke Oiyen Sumwos
5. In fwal nu ke ma Setan el fwak, efu ku Job el kulansap nu sin Jeova?
5 Ma sikyak nu sel Job wangin ma oana. Job el nukin la, Devil el siyuk ke sripe paye puspus ke orekma in kulansap lal nu sin God. Ke pal se su oasr tukeni in kosrao a ke Jeova el akkalemye oiya mwomwo puspus lal Job, Setan el topuk: “Ya kom tia oru sie kalkal raunella, a apunla loom sel, a apunla ma lal nu kemwa, siske nu kemwa?” Ke kas lal inge Setan el fwak mu Job el kulansap nu sin God ke sripen rapku—a el akkalemye pa mu pa inge nunak lun met kulansap nukemwa lun God. “A inge asroela poum, a kalye ma lal nu kemwa, a el fwa pilesre kom ye mutom,” Setan el fwak nu sin Jeova.—Job 1:8-11.
6. Kusensiyuk yok sripe fuka Setan el akkalemye?
6 Kusensiyuk inge el arulanu yok sripe. Setan el lain inkanek su Jeova el orekmakin ke kolyuk lal. Ya oasr ku lun God in orekmakin lungse lal ke kolyuk lal in kosrao a fwalu? Ku, oana ma Setan el lungse in akkalemye, ya oiyen rapku e fwa kutangla ke saflaiye? Jeova el lela Devil el an srifel Job in oana sie me pupulyuk fwin paye ma Setan el fwak, Jeova el lulalfongi ke oiyen oaru a paye lun met kulansap Lal inge. Ke ma inge, Setan sifwana el oru ma upa nukemwa su sikyak nu sel Job. Ke pal puspus Setan el tia na eis kutangla, el akkeokyel Job ke sie mas upa su arulanu ngal. “Kolo ke kolo, aok, ma nu kemwa yurin sie met el fwa sang ke moul lal,” Devil el fwak.—Job 2:4.
7. Ke inkanek puspus fuka met kulansap lun God ke pal inge elos sun me srife puspus su oana sie nu ke ma Job el sun?
7 Fwinne met Kristian puspus ke pal inge elos tia sun me keok oana ma Job el sun, tusruktu elos pulakin pa kain me keok puspus. Met Kristian puspus elos sun me kalyai ku ma upa puspus ke moul lun sou. Oiyen sekasrup ku mas ku in oru met puspus in arulanu asor. Kutu sin met Kristian elos kisekin moul lalos ke elos sruokye lulalfongi lalos. Paye la, kut tia enenu in nunku ka mu Setan sifwana pa oru kais sie me keok su kut sun. A, kutu ma upa ku in tuku ke ma tafongla lasr sifwana ku ke oiyen mano su kut usrui. (Galetia 6:7) A kut nukemwa pulakin fwako lun oiyen matou a ke ma sikyak puspus. Baibel el akkalemye la ke pal inge, Jeova el tia orekmakin akwuk lun mwenmwen in sang langoela ku karungin met kulansap lal liki me keok nukemwa inge.—Ekklisiastis 9:11.
8. Fuka Setan el ku in suk inkanek in orekmakin me keok nukemwa su kut sun?
8 Ne oinge, Setan el ku in orekmakin ma upa puspus su kut pula in akmunasye lulalfongi lasr. Met sap Poul el akkalemye la el sun me keok ke “sie otunmu in ikuk, sie met sap lun Setan,” su “poukol” pal nukemwa. (2 Korint 12:7) Fwinne otunmu inge el sie mas nu ke mano, oana ke mutal okokla, ku ke kutena ma, Poul el kalem ka la Setan el ku in orekmakin ma upa inge a fwako tia mwo lun ma upa inge in akwanginyela insemwomwo lal a oiyen oaru a sumwos lal. (Soakas 24:10) Ke pal inge, Setan el ku in purakak met in sou, tulik lutlut puspus wi lutlut, ku guferment puspus in kalyai met kulansap puspus lun God ke kutu kain in inkanek.
9. Efu ku ma upa ku me kalyai el tia aklutye kut na paye?
9 Fuka kut ku in muteng a kutangla ma upa nukemwa inge? Ke inkanek in liye a nunku ma inge in eis pal mwomwo in akkalemye la lungse lasr nu sin Jeova a akosten lasr nu ke kolyuk lal el paye. (Jemes 1:2-4) Fwinne oasr sripe puspus ke me keok lasr, in kalem ke yok sripaiyen oaru nu sin God fwa kasre kut in sruokye oiya mwomwo lasr nu ke orekma nukemwa lasr in alu nu sin Jeova. Met sap Piter el simusla nu sin met Kristian nukemwa: “Met kulo, nik komwos nunku ke me srike oana e in maslomwos, su tuku nu fwomwos in akpayeye komwos, oana me lut su sikyuk nu sumwos.” (1 Piter 4:12) A Poul el akuteye: “Elos nu kemwa su lungse in moulkin moul mutal in Kraist Jisus, elos fwa keok ke kolya.” (2 Timote 3:12) Setan el srakna siyuk a lain oiyen oaru lun Met Lo nukemwa lun Jeova, oana ma el oru kel Job. Paye la, Baibel el akkalemye la Setan el akyokye kafweang lal in akkolukye met kulansap nukemwa lun God ke len safla inge.—Fwakyuk 12:9, 17.
Me Akfos a Kutu Kas in Kai Tia Sumwos
10. Kain in oiya fuka su tia mwo Job el sun?
10 Oasr ma sikyak nu sel Job, su kut tia enenu in sun. El nukin ka la efu ku ma upa puspus sikyak nu sel. Job el tafongla in fwak mu ke kutu oiya “Jeova el ase, a Jeova el eisla.” (Job 1:21) Saap, Setan el srike in oru Job in nunku mu God pa oru me keok nukemwa lal.
11. Akuteye oiya su Job el akkalemye nu ke ma upa nukemwa lal.
11 Job el arulanu akmunasyeyuk, fwinne el srunga in selngawi God, oana ma mutan kiyel kaifwel in oru. (Job 2:9, 10) ‘Met koluk elos luman kapkapek liki yu,’ el fwak. (Job 21:7-9) ‘Efu ku God el kai yu?’ saap el nunku oinge. Oasr pal el lungse in mise. “O ke kom in lungsum in mwukunyula in Hedis, ke kom lungsum in srukyuwi in lukma, nu ke pal se mulat lom wanginla!” el fwak.—Job 14:13.
12, 13. Fuka kas lun met kawuk tolu lal Job akmunasyel?
12 Oasr met asrouki tolu lal Job su tuku muteta yurol, oana elos “tuku in memelil kel a in akparyel.” (Job 2:11) Ne oinge, elos akkalemye la elos “met akpwar koluk.” (Job 16:2) Job el ku in eis me akkeye su tuku sin met kawuk puspus su el ku in akkalemye nu selos ma upa nukemwa lal, tusruktu met tolu inge elos akyokye me fosrnga lal Job a akmunasyel na paye.—Job 19:2; 26:2.
13 Kut ku in fwak mu, saap Job el siyuk sel sifwana: ‘Efu ku ma inge sikyak nu sik? Mea Nga oru in sun me keok nukemwa inge?’ Met kawuk tolu lal inge elos sang me akuteye koluk su arulanu akfosyelak. Elos fwak mu Job el oru nu sel sifwana me akkeok nukemwa meyen el oru kutu ma koluk upa. “Su tula a wangin meta?” Elifas el siyuk. “Oana nga liye, elos su plau ma koluk, a taknelik keok, kosrani oana.”—Job 4:7, 8.
14. Efu ku kut tia enenu in sa fwak mu sie met el sun me keok ke sripen oasr ma koluk su el oru?
14 Paye la, ma upa puspus ku in sikyak fwin kut taknelik in ikwe a tia in ngun. (Galetia 6:7, 8) Tusruktu, ke akwuk su oasr ke pal inge, oasr ma upa su ku in sikyak fwinne kut akkalemye oiya mwo ku tia. Sayen ma inge, tia paye la met su wangin meta elos fwa tia sun me keok puspus. Jisus Kraist, su “nasnas na nasnas, srela liki met koluk,” el mise fwin sak soko, a met tuma lutlut Jemes el mise oana sie met su arulanu oaru. (Hibru 7:26; Orekma 12:1, 2) Kas koluk lal Elifas a lun met kawuk luo lal moklel Job in karungin e mwomwo lal a el kafweang in fwak la wangin meta lal. Ne oinge, kas tia paye lalos la Job el fwal in sun me keok ku in akkolukye nunak lal ke nununku sumwos lun God.—Job 34:5; 35:2.
Suk Me Kasru Fwin Sun Me Keok
15. Kain nunak fuka fwa kasre kut ke pal su oasr me keok?
15 Ya oasr ma kut ku in lotela kel Job? Me keok puspus, mas, ku me kalyai el nunkeyuk mu tia mwo. Met puspus elos ku in kaengla liki ma upa puspus oinge. (Sam 73:3-12) Ke pal puspus, kut enenu in siyuk sesr sifwana kusensiyuk puspus inge: ‘Ya lungse luk nu sin God akkeye yu in kulansapul fwinne oasr ma upa puspus sikyak? Ya Nga lungse in sang nu sin Jeova “sie me top nu sin sie met su akangonyel?”’ (Soakas 27:11; Mattu 22:37) Kut tia enenu in lela kas tia mwo lun met puspus in oru kut in alolo nu sin Papa tumasr in kosrao. Sie met Kristian oaru su sun me keok ke sripen sie mas upa ke lusen yea puspus el fwak: “Nga etu la kutena ma su Jeova el lela in sikyak, Nga fwa eis a muteng ka. Nga etu la el fwa ase nu sik ku su Nga enenu. El use ku su Nga enenu pal nukemwa.”
16. Fuka Kas lun God el sang kasru nu sin met puspus su sun ma upa puspus?
16 Ke inkanek puspus lal Setan, oasr kalem lasr ka yok lukel Job. “Kut etu oiyen nunkal,” ku orekma kutasrik lal. (2 Korint 2:11) Sayen ma inge, oasr ma puspus su kut ku in eis lalmetmet mwomwo ka. In Baibel, kut ku in koneak me sramsram ke mokul a mutan puspus su oaru in muteng ke kain ma upa puspus. Met sap Poul, su pulakin keok yok liki met Kristian puspus, el simusla: “Tu ma nu kemwa su simusla meet simla in luti kut, tu ke mongfusesr a parak lun ma Simusla fwa oasr fwinsrak lasr.” (Rom 15:4) Sie Met Lo in an Europe su filiyuki ke niyen prison ke sripen lulalfongi lal ke lusen meun lulap akluo, el aolla mongo nel ke lusen len tolu nu ke sie Baibel. “Oasr na paye ma lane ke orekma in ayaol inge!” el fwak. “Fwinne Nga musrinsral ke mano, Nga eis me mongo in ngun su kasre yu a kutupa ke me srife nukemwa lasr ke lusen pal in ma upa se inge. Nga srakna sruokye Baibel se inge ne ke pal inge.”
17. Me sang fuka su tuku sin God ku in kasre kut in muteng?
17 Sayen me akkeye su tuku ke ma Simusla, oasr me kasru lasr in lutlutkin Baibel su sang kas in kasru su ku in orekmakinyuk in muteng ke ma upa puspus. Kom fwin lutlut a orekmakin Watch Tower Publications Index, kom ku in liye sie experience lun sie met lili Kristian su sun me srife su oana sie nu ke me srife su kom pulakin. (1 Piter 5:9) Oasr pa me kasru mwo kom fwin sramsramkin oiya inge su sikyak nu sum nu sin met elder puspus ku kutupa met Kristian su matu in ngun. Yok liki nukemwa, ke inkanek lun pre, kom ku in tupan ke me kasru su tuku sin Jeova a ke ngun mutal lal. Fuka Poul el lain orekma lal Setan in ‘puokol’? Ke inkanek in lutlut in tupan ke ku lun God. (2 Korint 12:9, 10) “Nga ku in oru ma nu kemwa in El su akkeyeyu,” el simusla.—Filippai 4:13.
18. Fuka met lili Kristian elos ku in sang me akkeye su arulanu saok?
18 Ke ma inge, oasr me kasru su kom ku in orekmakin, a kom tia enenu in alolo ka in suk ma inge. “Kom fwin mulalla in len in ongoiye, ku lom srik na,” soakas inge el akkalemye. (Soakas 24:10) In oana ma orakrak srisrik se inge su pangpang termite el ku in kunausla sie loom su orek ke sak, me akmunas el ku in akmunasye oiyen oaru a sumwos lun sie met Kristian. In lain me sensen inge, Jeova el kasre kut ke inkanek lun me akkeye su tuku sin met kulansap puspus lun God oana kut. Oasr sie lipufon su sikyak nu sel Jisus a akkeyella ke sie fong su met meun puspus elos sruokilya. (Luk 22:43) Ke pal se el fwufwasryesr nu in an Rom oana sie met prison, Poul el “sang kulo nu sin God a pulaikelik” ke el sun brother puspus ke sie niyen Kitakat lun Appius a Tavern Tolu. (Orekma 28:15) Sie Met Lo su met German el srakna esam ke me kasru su el eis ke pal se el tuku nu ke niyen prison in an Ravensbrück ke pal se su el srakna fwusr a nenela ke nunak in alolo. “Sie mutan Kristian oana Nga el sa na in koneyuyak a el paing yu ke nunak paye,” el esam. “Sie pa mutan su met lili oaru el karungin yu, a el ekla oana nine in ngun nu sik.”
“Akpayeye nu Sum Sifwana La Kom Oaru”
19. Mea kasrel Job in lain kafweang nukemwa lal Setan?
19 Jeova el akkalemyel Job oana sie met su “sruokye oaru lal.” (Job 2:3) Fwinne el pulakin munasla a el tia kalem ka la efu ku el sun me keok, Job el tia na fuleak in sruokye oiyen oaru lal. Job el tia lafwekin ma nukemwa su arulanu saok nu ke moul lal. El fwak: “Nu ke pal nga mise nga tia sisla sumwos luk liki yu!”—Job 27:5.
20. Efu ku oiyen mongfusesr el arulanu yok sripe?
20 Fwin oasr sulela mwomwo lasr oinge, ma inge fwa kasre kut in sruokye oaru lasr fwinne oasr kutena ma sikyak—fwinne oasr me srife puspus, me lain, ku me keok. “Nik kom fosrnga ke ma kom fwa keok ka,” Jisus el fwak nu sin congregation lun Smyrna. “Liye! Devil el fwa sisla kutu sumwos nu in prison, tu lan srike komwos; a komwos fwa asor len siengoul. Kom in oaru nu ke mise, a nga fwa sot nu sum tefuro lun moul.”—Fwakyuk 2:10.
21, 22. Ke pal se kut muteng ke me keok, etauk fuka ku in akkeye kut?
21 Ke akwuk inge su kolyuk sin Setan, mongfusesr a oiyen oaru lasr fwa srikeyuk. Ne oinge, Jisus el fwak la ke kut ngetla nu ke pal fwasru, wangin sripe kut in sangeng. Ma yok sripe pa in akpayeye la kut oaru. “Tu keok lasr mulala,” Poul el fwak, a “mwolena,” ku me sang su Jeova el mwulela nu sesr, “orek kasr yokna mwolana a kamwil.” (2 Korint 4:17, 18) Fwinne me keok lal Job el mulala ku ke kitin pal na fwin srikeyuk nu ke lusen yea puspus su el insemwomwokin meet liki a tokin me srife ku me keok lal.—Job 42:16.
22 Ne oinge, saap oasr pal ke moul lasr oasr me srife su sikyak nu sesr su luman wangin saflaiye a me keok lasr el luman oru kut tia ku in muteng ka. Ke me lutlut toko, kut fwa akuteye la fuka ma sikyak ke moul lal Job ku in luti kut ke kutupa me lutlut mwomwo nu ke mongfusesr. Kut fwa liye pa ke inkanek puspus su kut ku in akkeye met puspus su sun me keok.
Kom E Topuk Fuka?
• Kusensiyuk yok sripe fuka Setan el akkalemye ke oiyen oaru lal Job?
• Efu ku me keok el tia enenu in aklutye kut na paye?
• Fuka Jeova el kasre kut in muteng?
[Petsa ke sra 21]
In oru lutlut yok ku research, in sramsram nu sin met Kristian su matu in ngun, a in akkalemye ma oasr ke insiesr ke inkanek lun pre ku in kasre kut in mongfusesr