Sangeng Sin Jeova​—Akkalemye Insemwomwo!

“Insemwomwo met se su sangeng sin Jeova.”​—SAM 112:1.

1, 2. Mea sangeng sin Jeova ku in oru?

ME INSEMWOMWO el tia fusrasr in eis. Me insemwomwo paye el fwal nu ke orekma in oru sulela mwomwo, in oru ma sumwos, a in forla liki ma sito. Met Orekutla, Jeova, el ase nu sesr Kas lal, Baibel, in luti ke oiya fuka in engankin inkanek mwomwo emeet nu ke moul. Ke inkanek in suk a in akos masap lun Jeova, a fwin kut akkalemye sangeng sin God, kut ku in pulakin engan a insemwomwo na paye.​—Sam 23:1; Soakas 14:26.

² Ke me lutlut inge, kut fwa sramsramkin me srikasrak puspus su oasr in Baibel a oasr ke pal inge su akkalemye la fuka sangeng paye nu sin God el sang kasru nu sin sie met in lain me srife in oru ma koluk a in use pulaik nu sesr in oru ma sumwos. Kut ku in liye la sangeng sin God el ku in ase me insemwomwo nu sesr ke inkanek in akkeye kut in aksumwosye inkanek koluk lasr, oana ma Togusra Devid el oru. Kut ku in liye pa la sangeng sin Jeova el sie me usru su arulanu saok su papa a nine ku in sang nu sin tulik natulos. Aok, Kas lun God el akkalemye nu sesr: “Insemwomwo met se su sangeng sin Jeova.”​—Sam 112:1.

In Sifwilpa Pulakin Me Insemwomwo su Tula

3. Mea kasrel Devid in sifwilpa akmwoye futoto lal nu sin Jeova tokin el orala ma koluk puspus?

³ Oana ke ma akuteyuki ke me lutlut tari a, Devid ke pal tolu el tia akkalemye sangeng mwo nu sin God a el oru ma koluk. Tusruktu, oiya lal su el akkalemye nu ke me kai lun Jeova akkalemye la fwinne el oru ma koluk el sie met su sangeng sin Jeova. Sangeng mwomwo a sunak lal nu sin God moklel in akkalemye ma koluk lal, aksumwosye inkanek lal, a sifwilpa akmwoye futoto mwomwo lal nu sin Jeova. Fwinne ma koluk puspus lal el sang me keok nu sel a nu sin met puspus, ke sripen el auliyuk paye paenang el tafwela na in eis me kasru a me insemwomwo lun Jeova. Me srikasrak lal Devid ku in akkeye met Kristian ke pal inge fwin elos orala ma koluk upa.

4. Fuka sangeng sin God ku in kasru sie met in sifwilpa pulakin me insemwomwo?

⁴ Nunku ke ma sikyak nu sel Sonja.a Fwinne el kulansap oana sie met luti peng mwo ke pal nukemwa, Sonja el asrouki nu sin met puspus su akkalemye oiya koluk, el wi oru oiya koluk su tia fwal nu sin met Kristian, a ke sripe inge paenang el enenu in sisila liki congregation lun met Kristian. Ke pal se nunak lal aksumwosyeyukla, Sonja el kafweang in oru ma nukemwa su eneneyuk in sifwilpa akmwoye futoto lal nu sin Jeova. Tia pat tokin ma inge, el sifwilpa foloko nu ke congregation. Ke ma inge nukemwa, Sonja el tia na fuleak ke lungse lal in kulansap nu sin Jeova. Ke saflaiye, el sifwilpa sroang nu ke orekma lun pioneer ke pal nukemwa. Tok, el payukyak nu sin sie met Kristian elder mwomwo, a ingena el arlana engan in welul in oru orekma in kulansap ke sie congregation. Fwinne Sonja el arulanu asor ke sripen el som ku sisila liki congregation ke lusen kutu pal, el insemwomwo yok la sangeng lal nu sin God kasrel in sifwil foloku nu sin Jeova.

Mwo in Pulakin Keok Liki in Oru Ma Koluk

5, 6. Akuteye la fuka a efu ku Devid el tia unilye Soul ke pal luo.

⁵ Paye la, oasr sripe yok, fwin sangeng sin God kasru sie met in fwasr liki orekma koluk upa. Ma inge akpayeyuk sel Devid. Oasr sie pal in pal meeta, Soul a met meun su oasr ke tausan tolu lal elos ilyuk nu ke sie luf tokin elos ukwel Devid​—su ke luf sepana inge Devid a met meun lal mwukmwuk ka. Met meun lal Devid elos kaifwel in unilye Soul. Ya Jeova el tia sang nu ke paol Devid met lokwalok lal? Devid el karunganang mwo ke mukuikui lal, a el orakak nu yurul Soul a sipukye sie ipen nuknuk ku skirt lal. Ke sripen Devid el sangeng sin God, paenang fwinne orekma inge su wangin me sensen ka el akkolukye nunak a pulakin lal. Devid el sapkin nu sin met meun lal su arulanu fosek, a el fwak: “Jeova lan ikolyuwi tu ngan tia oru ma se inge nu sin leum luk, su Jeova el moswella.”b​—1 Samuel 24:1-7.

⁶ Ke sie pa ma su sikyak tok kutu, Soul a met meun nukemwa lal elos tukeni nu sie ke sie an a elos orala “sie motul fulosumwos su tuku sin Jeova.” Devid a Ebishai sie sin tulik nutin met wiyel elos som nu infwulwen un met meun inge a elos tu ke an se su Soul el motul we. Ebishai el lungse in unilye Soul. Devid el sapkin Ebishai in tia oru, a el siyuk sel: “Su a ku in asroela paul lain el su Jeova el moswella, a wangin metal?”​—1 Samuel 26:9, 12.

7. Mea kutongilye Devid in tia oru ma koluk?

⁷ Efu ku Devid el tia unilye Soul ke oasr pal mwomwo luo lal in oru ma inge? Meyen el sangeng sin Jeova yok liki el sangeng sel Soul. Ke sripen sangeng mwomwo lal nu sin God, Devid el akola in eis keok, fwin eneneyuk, liki na in oru ma koluk. (Hibru 11:25) Oasr lulalfongi yok lal ke me karunginyuk lun Jeova nu sin met kulansap nukemwa Lal a nu sel sifwana. Devid el etu la in akos a in lulalfongi God ku in use me insemwomwo a ma lane puspus, a el fwin tia oru ma inge God el fwa tia insemwomwo kel. (Sam 65:4) El etu pa la God el fwa akpayeye mwulela Lal in orel Devid oana sie togusra a el fwa sisella Soul ke pal pakiyuki a inkanek Lal sifwana.​—1 Samuel 26:10.

Sangeng sin God Ase Me Insemwomwo

8. Fuka oiya su Devid el akkalemye ke pal in ma upa sang me srikasrak mwomwo?

⁸ In oana met Kristian, kut etu tari la oasr orekma in akangonye, me kalyai, a kutupa sripe su ku in sun kut. (Mattu 24:9; 2 Piter 3:3) Oasr pal, saap kut sun ma upa puspus yurin met lili wiyesr. Tusruktu, kut etu la Jeova el liye ma nukemwa, el long pre lasr, a ke pal fwal, el fwa aksumwosye ma puspus in fwal nu ke ma lungse lal. (Rom 12:17-21; Hibru 4:16) Ke ma inge, kut tia enenu in sangeng sin met lokwalok lasr, a kut enenu in sangeng sin God a ngetak nu sel in molikutla. In oana Devid, kut tia foloksak, kut tia orekmakin masap ku akwuk sumwosmwos in fwasr liki me keok. Ke saflaiye, ma inge ku in ase me insemwomwo. Tusruktu ke inkanek fuka?

9. Sang me pupulyuk ke sangeng sin God su ku in kol nu ke me insemwomwo fwinne oasr me kalyai.

⁹ “Nga nunku ke me srikasrak lun sie nine a lun sie tulik mutan fwusr natul su srunga in moli card puspus lun sie u lun politic ke sripen oiya lalos in oana met Kristian su srunga in wi ke kutena u,” sie sin missionary fwin an Africa ke lusen pal loeloes el srumon. “Elos akkolukyeyuk sin mokul puspus a tokin ma inge elos sapkinyuk in folokla nu in loom selos. Ke elos fwasr ke inkanek u, nine sa el srike in akkeye tulik mutan se natul inge su tung, ke sripen upa nu sel in kalem ka la efu ku ma inge sikyak. Elos tia insemwomwo ke pal se inge, tusruktu oasr conscience nasnas lalos. Tok, elos arlanu insemwomwo ke sripen elos akos God. Fwin elos molela card lun sie u lun politic, met puspus inge elos arulanu insemwomwo. Mokul puspus inge fwa sang sufwa puspus ke soft drinks a elos fwa dance raunelos nu ke elos sun loom selos. Tusruktu tulik mutan se inge a nine kiyel, ke sripen elos etu la fwin elos tia akos God, elos fwa met asor emeet fwin fwalu.” Sangeng lalos nu sin God kasrelos in fwasr liki ma inge nukemwa.

10, 11. Fwako mwo puspus fuka tuku ke sangeng sin God akkalemyeyuk sin sie mutan?

¹⁰ In akkalemye sangeng sin God ku in orala me engan ke pal se fwin oasr me srife puspus sikyak nu ke oiyen aksaokyeyen moul. Ke pal se Mary el putete ke tulik aktolu natul, taktu lal kaifwel in uniye tulik se su srakna oasr ke insiel. “Oasr me sensen ke moul lom,” taktu se inge el fwak. “Kom ku in pulakin me sensen inge ke kutena pal a kom ku in mise ke lusen ao 24. A awowo se inge el ku in mise pa. Ke kutena oiya, wangin me akpayeye nu ka la awowo se inge el mwo tia fuke.” Mary el lutlut Baibel yurin Met Lo lun Jeova tusruktu el soenna eis baptais. “Ne oinge,” Mary el fwak, “Nga oru sulela luk in kulansap nu sin Jeova, a Nga lungse in sruokye akosten luk nu sel, fwinne oasr ma mwo ku ma tia mwo su ku in sikyak.”​—Exodus 21:22, 23.

¹¹ Ke pal se su el putete, Mary el kafofo in lutlut Baibel a karungin sou lal. Ke saflaiye el oswela awowo natul. “In oswela awowo se inge el pulakin ma upa yok liki tulik luo natul saye, tusruktu wangin ma upa ku me sensen yok su sikyak,” Mary el fwak. Sangeng sin God sang kasru yok nu sel Mary in sruokye sie nunak ku conscience mwomwo, a tia pat el eis baptais. Ke lusen pal su awowo natul el kapkapek, tulik natul inge el lotela pa in akkalemye sangeng sin Jeova, a ke pal inge tulik mokul natul inge el oru orekma in kulansap nu sin God ke sie branch ofus lun Met Lo lun Jeova.

‘Akkeye Komwos Sifwana in Jeova’

12. Fuka sangeng sin God akkeyel Devid?

¹² Sangeng lal Devid nu sin God sang me kasru yok nu sel a tia in kutongilya sifwana in oru ma koluk. Ma inge akkeyel in oru sulela mwo a akkalemye lalmetmet ye ma upa puspus. Ke lusen yea se a malem akosr, Devid a met meun lal elos suk me loeyuk lalos in tia koneakyak elos sel Soul in an Ziklag in an Filistia. (1 Samuel 27:5-7) Oasr sie pal ke mokul nukemwa elos wangin in an selos, met Amalek su sulallel a arlana koluk elos lungse in pusrela ma lun met inge a elos esokak siti se inge a elos wisla mutan kielos nukemwa, a tulik natulos, a un ma orakrak nukemwa natulos. Ke elos folokla a liye ma sikyak inge, Devid a met meun nukemwa lal elos tung. Me asor lalos sa in ekla nu ke oiyen mulat, a met meun lal Devid elos sramsramkin in tunglal. Fwinne el asor yok, tusruktu Devid el tia fuleak. (Soakas 24:10) Sangeng lal nu sin God akkeyel in forla nu sin Jeova, a el “akkeyel sifwana in Jeova.” Ke kasru lun God, Devid a met meun lal elos ukwe met Amalek a sifwilpa eis ma nukemwa lalos.​—1 Samuel 30:1-20.

13, 14. Fuka sangeng sin God el kasru sie met Kristian in oru sulela mwo puspus?

¹³ Met kulansap lun God ke pal inge elos sun pa ma puspus su sikyak enenu in akkalemye lulalfongi paye nu sin Jeova a pulaik in oru sulela mwomwo. Nunku ke sie me pupulyuk kel Kristina. Ke pal se el srakna fwusr, Kristina el lutlut ke Baibel yurin Met Lo lun Jeova. Tusruktu el lungse in ekla sie concert pianist ku sie met sritel ke me on ke piano, a el arulanu kapkapek a ekla met sritel piano su arulanu sumat ka. Sayen ma inge, el pulakin mwekin a tufwal ke el oru orekma in luti peng mwo paenang el sangeng in eis kunokon nukemwa lun sie met orekma su baptais tari. Ke Kristina el tafwela in lutlutkin Kas lun God, kais kutu srisrik el mutamwauk in pulakin ku lun ma inge. El lotela in akkalemye sangeng sin Jeova, a el lotela la Jeova el tupan met kulansap nukemwa lal in lungse el ke inse, nunak, ngun, a ku lalos kemwa. (Mark 12:30) Ma inge akkeyel in mwulela moul lal sifwana nu sin Jeova a eis baptais.

¹⁴ Kristina el siyuk me kasru sin Jeova in kapek ke ma lun ngun. “Nga etu la moul lun sie concert pianist el enenu in oru fwufwasryesr lal pal nukemwa a oru contract puspus in sritelkin me on su pus liki concert 400 ke kais sie yea,” Kristina el akuteye. “Ke ma inge Nga oru sulela luk in ekla sie met luti in suk ma enenu luk ke mani a kulansap oana sie met luti peng mwo ke pal nukemwa.” In pal ingo, oasr tari akwuk su orek nu sel Kristina in oru concert se meet lal ke sie concert hall ku loom lulap su eteyuk na paye ke mutanfwal lal. “Concert se meet luk inge pa concert se meet a safla luk,” el fwak. Kristina el payukyak sin sie met Kristian elder. El a mokul tumal, ingena elos tukeni kulansap ke sie branch ofus lun Met Lo lun Jeova. El insemwomwo ke sripen Jeova el sang ku nu sel in oru sulela sumwos a ingena el ku in orekmakin pal a ku lal ke orekma in kulansap nu sel.

Sie Me Usru Saok

15. Mea Devid el lungse in sang nu sin tulik natul oana me usru, a fuka el oru ma inge?

¹⁵ “Fwasru, komwos tulik, poronge yu,” Devid el simusla. “Nga fwa luti nu sumwos sangeng sin Jeova.” (Sam 34:11) Oana sie papa, Devid el lungse na paye in sang nu sin tulik natul sie me usru saok​—ma inge pa in sangeng paye, mwo, a sumwos sin Jeova. Ke kas a orekma, Devid el akkalemye Jeova, tia oana sie God su lungse in sapsap a me aksangeng, su akola in suk kutena ma tafongla lasr nu ke masap Lal, a el sie Papa nu sin tulik Natul fwin fwalu su oasr lungse, me karungin a lungse in sang nunak munas. “Su ku in akilen ma koluk lal?” Devid el siyuk. Tokin ma inge, in akkalemye lulalfongi lal la Jeova el tia tuni ma tafongla lasr pal nukemwa, ke el fwak: “Aknasnasye yu liki ma sito su on in lukma!” Devid el etu la fwin el kafweang na paye, kas lal a nunak lal ku in me akinsemwomwoye nu sin Jeova.​—Sam 19:12, 14, Baibel Mutal Ke Kas Kosrae.

16, 17. Fuka papa a nine elos ku in luti tulik natulos in sangeng sin Jeova?

¹⁶ Devid el sie me srikasrak mwomwo nu sin papa a nine nukemwa ke pal inge. “Papa a nine kiyesr karungin kut ke inkanek su oru kut in insemwomwo ke kut fwasr ke ma paye,” Ralph el fwak, su el a mokul wiyel su fwusr lukel elos tukeni kulansap ke sie branch ofus lun Met Lo lun Jeova. “In pal se su kut srakna fwusr, elos lela kut in welulos ke elos sramsramkin orekma nukemwa ke congregation, a kut insemwomwo na paye ke ma paye oana elos. Elos kasre kut in lulalfongi la kut ku in oru ma mwomwo puspus ke orekma in kulansap nu sin Jeova. Aok, ke lusen yea puspus sou lasr elos muta ke sie mutanfwal su oasr ma enenu yok nu sin met orekma lun Togusrai a in sang kasru in oakiye congregation sasu puspus.

¹⁷ “Ma su ku in kasre kut in fwasr pal nukemwa ke inkanek sumwos pa tia ke sripen masap upa puspus, a ke oiya su akkalemyeyuk sin papa a nine, la nu selos Jeova el paye, a el arulanu kulang a mwo. Elos lungse in etu na paye kel Jeova a in akinsemwomwoyel, a ke sangeng paye lalos sin God a ke lungse lalos nu sel su kut lotela ka. Fwinne oasr pal kut oru ma koluk, papa a nine kiyesr elos tia oru kut in pula mu Jeova el tila lungse kut; ku elos arulanu mulat nu sesr a sapkin kut in tia oru ma puspus. Ke pal puspus elos sramsram nu sesr ke inkanek misla, Nine el sramsram nu sesr kutupal a oasr sronin mutal, el kafweang kasru lal in sun insiesr. A oasr fwako mwo lun inkanek mwomwo inge. Ke kas a orekma lun papa a nine kiyesr kut lotela la sangeng sin Jeova el sie ma su arulanu mwo a in oana sie Met Lo lal el sie me insemwomwo a me engan, tia sie me aktoasr.”​—1 Jon 5:3.

18. Mea sangeng sin God ku in ase nu sesr?

¹⁸ Ke “kas safla lal Devid,” kut ku in rid: “Sie su leum fwin met in sumwos, su leum ke sangeng sin God, el a fwa oana kalem lun lututang ke fwatu takak.” (2 Samuel 23:1, 3, 4) Solomon, mwen natul Devid a el aolal oana sie togusra, el lotela mwoiyen kas inge, meyen el siyuk sin Jeova in sang nu sel “sie inse su lungse in akos” a ku in “akilen in masrlon ma mwo a ma koluk.” (1 Togusra 3:9) Solomon el akilen la in sangeng sin Jeova pa inge inkanek lun lalmetmet a me insemwomwo. Tok, el aksafyela buk se inge Ekklisiastis ke kas inge: “Pa inge saflaiyen mao; longyuk tari ma nu kemwa: Sangeng sin God, a liaung ma sap lal. Tu pa inge orekma mwo nu kemwa lun metu. Tu God el fwa wise orekma nu kemwa nu in nununku, wi ma lukma nu kemwa, fwinne mwo, ku fwinne koluk.” (Ekklisiastis 12:13, 14) Kut fwin porongo kas in kai inge, kut fwa koneak la “fwokin inse pusisel a sangeng sin Jeova” tia lalmetmet a me insemwomwo mukena a oasr pa “me kasrup, a sunak, a moul.”​—Soakas 22:4.

19. Mea ku in kasre kut in kalem ke “sangeng sin Jeova”?

¹⁹ Ke me srikasrak puspus in Baibel a ke experience puspus ke pal inge, kut liye la oasr fwako mwomwo tuku ke sangeng mwo sin God ke moul lun met kulansap paye puspus lun Jeova. Sangeng mwo inge el kasre kut in tia oru ma puspus su tia akinsemwomwoye Papa tumasr in kosrao a ma inge ku in oru kut in pulaik in lain met lokwalok lasr nukemwa a ase nu sesr ku in muteng ke me srife a ma upa puspus su sun kut. Ke ma inge, lela kut nukemwa, met fwusr a met matu, in lutlutkin ke paye Kas lun God, nunku yok ke ma kut lotela tari, a kafweang yok in futoto nu sin Jeova ke inkanek lun pre su tuku ke insiesr pal nukemwa. In oru ma inge, kut fwa koneak “etauk lun God” a kut ku in kalem pa ke kalmen “sangeng sin Jeova.”​—Soakas 2:1-5.

[Footnotes]

Ya Kom Ku In Akuteye?

Fuka sangeng sin God ku in

• kasru sie met in sifwilpa akmwoye futoto lal nu sin Jeova tokin el orala ma koluk upa?

• ase me insemwomwo ye me srife puspus a me kalyai?

• akkeye kut in oru ma lungse lun God?

• sie me usru saok nu sin tulik natusr?

[Petsa ke sra 13]

Sangeng sin Jeova kasrel Devid pal nukemwa in tia unilye Togusra Soul

[Petsa ke sra 15]

Sangeng sin God el sie me usru saoklanu su papa a nine ku in sang nu sin tulik natulos