Met Fwusr, Komwos Oru Sulela Lomwos In Kulansapu Jeova
“Komwos sulela misenge su komwos fwa orekma nu se.”—JOSUA 24:15.
1, 2. Kain in orekma fuka ke baptais orek ke alu lun Kristendom in pal meeta nu ke pal inge?
“LELA [tulik] elos in ekla met Kristian ke pal se elos ku in etu Kraist.” Sie met sim su pangpang Tertullian el simusla kas inge ke saflaiyen century akluo C.E. El lain orekma in baptaisela tulik srisrik, meyen orekma se inge el tuku ke akwuk lun alu su fwak mu elos Kristian in len lal tusruktu elos tia sruokye me luti paye. Oasr sie met kol lun surs su pangpang Father Augustine el tia insese nu sel Tertullian a ke Baibel, el fwak mu baptais el akwanginyela mwetan ma koluk se meet su orekla ke mutamweyen metu a awowo nukemwa su mise a soenna baptais elos isis in hell. Kain in lulalfongi oinge el akkeye orekma in baptaisela awowo puspus ke pal sa tokin elos isusla.
2 Alu puspus lun Christendom elos srakna orekmakin akwuk in baptaisela awowo puspus su tufwana isusla. Sayen ma inge, ke lusen me sramsram lun fwalu, oasr orekmakinyen baptais orek nu sin “met pegan” puspus su sruo sin met kol lun an u a met kol puspus lun alu ke mutanfwal puspus su fwak mu elos met Kristian. Tusruktu orekma in baptaisela awowo a in baptaisela met matu puspus fwinne elos srunga el tia fwal nu ke me luti lun Baibel.
Wangin Orekma in Mwulela Ke Pal Inge Fwin sie Met el Srunga in Oru
3, 4. Mea ku in kasru tulik nutin papa a nine nukemwa su mwuleyukla nu sin God in oru sulela ke inse mulala lalos in mwulela moul lalos nu sin God?
3 Baibel akkalemye la God el liye tulik srisrik oana ma mutal se fwinne papa ku nine kiyelos mukena pa met Kristian oaru. (1 Korint 7:14) Ya ma inge oru tulik nukemwa elos in met kulansap su mwuleyukla nu sin Jeova? Mo. Tusruktu, tulik srisrik su karunginyuk sin papa a nine su orala mwulela lalos nu sin Jeova elos ku in eis me akpa su ku in sang kasru tulik inge elos in ku in oru mwulela lun moul lalos nu sin Jeova ke lungse lalos sifwana. Togusra Solomon sie met lalmetmet el simusla: “Mwen nutik, liaung masap lun papa tumom, a tia fwasr liki ma lo lun nine kiyom. . . . Ke kom fwasr, a fwa kol kom; ke kom motul, a fwa sano fwom; a ke kom ngutalik, a fwa kaskas nu sum. Tu ma sap el sie lam, a sie ma lo kalem; a kas in kai lun me lutlut nu ke inkanek in moul.”—Soakas 6:20-23.
4 Me kasru ku kolyuk lun papa a nine su met Kristian ku in sang me karungin nu sin met fwusr, fwin elos lungse in akos ma inge. Solomon el fwak pa: “Sie mwen lalmetmet el akinsemwomwoye papa tumal; a sie mwen lalfon me toasr nu sin nine kiyel.” “Kom porongo, mwen nutik, a lalmetmet, a kol insiom inkaneku.” (Soakas 10:1; 23:19) Aok, in eis ma lane ke me akpa su orek sin papa a nine, komwos met fwusr enenu in eis kas in kai, me papu, a me kai. Kom tia isusla a eis lalmetmet tari, tusruktu kom ku in “ekla lalmetmet” a ke inse mulala lom kom ku in fwasr tokin “inkanek lun moul.”
Mea Kalmen Orekma in Sang Kasru nu ke Nunak lun Tulik?
5. Kas in kai fuka Poul el sang nu sin tulik a papa nukemwa?
5 Met sap Poul el simusla: “Tulik srisrik, komwos in akos papa tumomwos a nine kiomwos in Leum; tu ma inge sumwos: ‘Oru mwo nu sin papa tumom a nine kiom’; ma inge ma sap se meet oasr mwuleung ka: ‘Tu a fwa mwo nu sum, a tu in loes moul lom fwin fwalu.’ A komwos, papa tuma, komwos in tia angon tulik nutumwos nu ke mulat; a komwos in oakoakelos in kai a kaiyuk [me kasru nunak, NW] lun Leum.”—Efesus 6:1-4.
6, 7. Mea eneneyuk nu ke orekma in karungin tulik nu ke “me kasru nunak lun Jeova,” a efu ku ma inge tia ku in kalmekin mu papa a nine elos sruokye nunak lun tulik natulos ke inkanek tia sumwos?
6 Ya papa a nine nukemwa su met Kristian elos akkeye tulik natulos ke inkanek tia sumwos ke pal se elos karunginelos ke “kai a me kasru nunak lun Jeova”? Mo. Su ku in akkolukye papa a nine puspus ke sripen elos luti tulik natulos ke ma elos nunku mu sumwos a ku in akmwoye oiyen nasnas lun tulik natulos? Met nukemwa su tia lulalfongi God elos tia akkolukyeyuk ke sripen elos luti tulik natulos mu wangin God. Met nukemwa su wi ke alu lun Catholic ku ke kutena alu su elos pulakin mu oasr kunokon lalos nu ka in karungin tulik natulos ke me luti lun alu lalos, a elos suka akkolukyeyuk ke elos kaifweang in oru ma inge. Ke inkanek oinge, Met Lo lun Jeova elos tia enenu in akkolukyeyuk ke kas kikiap mu elos lungse in sruokye nunak lun tulik natulos ke pal se elos karunginelos in orekmakin nunak lun Jeova ke ma paye a masap ke oiyen nasnas.
7 In fwal nu ke sie buk su pangpang Theological Dictionary of the New Testament (Theological Dictionary lun Testament Sasu), kas Grik su lungasyukla nu ke “me kasru nunak” in Efesus 6:4 el sramsramkin sie orekma su “suk in aksumwosye nunak, in aksumwosye ma sito, in akmwoye oiya ku ella nu sin God.” Fuka fwin sie met fwusr el lain me akpa lun papa a nine ke sripen el akos met asrouki lal, a el lungse in oru ma met asrouki ku met kawuk puspus lal oru? Su ku in oru me akkoluk nu selos—papa a nine ku met asrouki lun met fwusr inge? Fwin met asrouki inge elos kaifwe met fwusr in eis a orekmakin ono koluk, nim wain alukela ma fwal, ku wi oru orekma lun kosro, ya papa a nine elos enenu in akkolukyeyuk meyen elos srike in aksumwosye nunak lun tulik natulos a kasrelos in etu fwako koluk lun orekma nukemwa inge?
8. Orekma fuka orek paenang Timote el ekla sie met lulalfongi?
8 Met sap Poul el simusla nu sel Timote su sie met fwusr: “Kom in mutana in ma kom lutlut ka, a etu ma paye, tu kom etu el su kom lutlut ma inge sel a tu ke pal se kom tulik me kom etu Baibel mutal, su ku in aklalmetmetye kom nu ke molela ke lalalfongi su in Kraist Jisus.” (2 Timote 3:14, 15) Mutamwauk ke pal se Timote el tulik srisrik, nine kiyel a nine matu kiyel elos kasrel in oasr lulalfongi fukoko lal nu sin God in fwal nu ke etauk lun ma Simusla Mutal. (Orekma 16:1; 2 Timote 1:5) Tok, ke pal se elos ekla met Kristian, elos tia patkol Timote in lulalfongi tusruktu elos “akkeyel” in ekla sie met lulalfongi ke oiyen me kasru lun me sramsram ku me luti mwomwo lalos fwal nu ke etauk lun ma Simusla.
Jeova el Suli Kom in Oru Sulela
9. (a) Fuka Jeova el akfulatye metu, a ke sripe fuka? (b) Fuka Mwen sefwana nutin God el orekmakin sukosok lal in oru sulela?
9 Jeova el ku in orala metu in oana robot ku kutena kain in kosro puspus, oakiye nu selos in oru ma lungse lal a tia ku in oru sulela lalos sifwana. A el tia oru ma inge, a el sang nu selos sukosok in oru sulela lalos sifwana. God lasr el lungse met nukemwa su muta ye kolyuk lal ke sripen elos lungse in oru ma inge. El insemwomwo in liye metu, met matu a met fwusr, elos kulansapul ke sripen elos lungse el. Me srikasrak mwo emeet nu ke lungse in akpusiselye sifwana nu ke ma lungse lun God pa Mwen sefwanna natul, su Jeova el akkalemye ke kas inge: “El inge Mwen kulu Nutik, su Nga insemwomwo ke el.” (Mattu 3:17) Mwuonse se inge el fwak nu sin Papa tumal: “Nga engun in oru ma lungse lom, O God luk, aok, masap Lom on insiuk.”—Sam 40:8; Hibru 10:9, 10.
10. Orekma in kulansap nu sin Jeova el enenu in fwal nu ke mea in akinsemwomwoyel?
10 Jeova el tupan met nukemwa su kulansapul ye kolyuk lun Mwen natul in akpusiselyelos ke inse mulala lalos nu ke ma lungse Lal oana ma mwen natul el oru. Ke inkanek lun kas in palye, met sim lun sam el akkalemye: “Met Sram elos insemwomwo in esaloswot sifwana in len in ku lom. In oasku lun mutal, liki insien lututang, oasr yurum len in met fwusr Lom oana aunfong.” (Sam 110:3) U lun Jeova, in kosrao a fwin fwalu, elos orekma fwal nu ke oiya su akkalemye lungse in akpusiselye nu ke ma lungse lun God.
11. Sulela fuka filiyuki ye mutun met fwusr nukemwa su karunginyuk sin papa a nine puspus su orala mwulela lalos nu sin God?
11 Ke ma inge komwos met fwusr komwos enenu in etu a kalem ka la papa a nine kiyomwos ku met elder ke congregation elos tia patok komwos in eis baptais. In kulansupu Jeova kom enenu in akkalemye lungse lom sifwana in oru ma inge. Josua el fwak nu sin met Israel: “Orekma nu Sel [Jeova] in sumwos a in paye . . . Komwos sulela misenge su komwos fwa orekma nu se.” (Josua 24:14-22) Ke oiya sepana inge, sulela in mwulela moul lom nu sin Jeova a in orekmakin moul lom in oru ma lungse lal enenu in tuku sum sifwana.
Akilen Ma Kunom
12. (a) Paye la papa a nine elos ku in sang akpa nu sin tulik natulos, tusruktu mea elos tia ku in oru nu selos? (b) Nge pal sie met fwusr el mutamwauk in oru kunokon lal sifwana ye mutun Jeova ke sulela nukemwa su el oru?
12 Oasr pal e fwa tuku ke komwos met fwusr fwa tila oasr ye me karunginyuk lun papa a nine kiyomwos ke sripen oaru lalos. (1 Korint 7:14) Met tuma lutlut Jemes el simusla: “Ke ma inge nu sel su etu in oru mwo a tia oru, ma inge koluk nu sel.” (Jemes 4:17) Papa a nine elos tia ku in kulansapu God ke tulik natulos a tulik elos tia ku in kulansapu God ke papa a nine kiyelos. (Ezikiel 18:20) Ya oasr ma kom lotela kel Jeova a ke akwuk lal? Ya kom sun tari matwe fwal in etu a kalem ke ma kom lotela a in mutamwauk in engankin futoto lom sifwana nu sel? Ke ma inge ya mwo a fwal in nunku mu God el nunku keim mu oasr tari ku lom in oru sulela in kulansapul?
13. Kusensiyuk puspus fuka met fwusr su sun matwe fwal su soenna baptais enenu in siyuk selos sifwana?
13 Ya kom sie sin met fwusr su karunginyuk sin papa a nine su kulansapu a alu nu sin God, wi ke meeting nukemwa lun met Kristian, a wi pa ke orekma in sulkakin peng mwo lun Togusrai? Fwin oinge, siyuk sum sifwana ke paye: ‘Efu ku Nga oru ma inge? Ya Nga wi ke meeting nukemwa a wi oru orekma in sulkakin peng mwo meyen papa a nine kiyuk elos lungse Ngan oru ma inge ku Nga oru ma inge ke sripen Nga lungse in akinsemwomwoye Jeova?’ Ya kom akpayeye nu sum sifwana “ma lungse lun God, su mwo a me akinsemwomwo a sumwoslanu”?—Rom 12:2.
Efu Ku Patla in Oru Sulela in Eis Baptais?
14. Me pupulyuk fuka in Baibel akkalemye la sulela in eis baptais tia enenu in patla in orek?
14 “Mea igolyuwi in baptaisla?” Met Itiopia se el tufwana lotela la Jisus el pa Messaia a el siyuk kusensiyuk inge nu sel Filip sie met fwakak peng mwo. Tusruktu oasr etauk fwal lun met Itiopia se inge ke ma Simusla paenang el akilen la el tia enenu in patla in oru sulela in akkalemye la mutamwauk in pal sa fwasru el fwa kulansapu Jeova oana sie met su wi ke congregation lun met Kristian, a ma inge arulanu akinsemwomwoyel. (Orekma 8:26-39) Ke oiya inge, oasr sie mutan su pangpang Lydia, el ikasla insiel “in long ma Poul el fwakak ka,” a tia pat “el baptaisla,” a met in loom sel. (Orekma 16:14, 15) Oayepa, ke met liyeang prison in an Filippai el long kel Poul a Sailas ke elos “fwakak kas lun Jeova nu sel,” a “el baptaisla a sou lal nu kemwa.” (Orekma 16:25-34) Ke ma inge, fwin oasr etauk lom kel Jeova a ke akwuk lal, a oasr lungse lom in oru ma lungse lal, a oasr oiya mwomwo lom ke congregation a kom oaru in wi ke meeting nukemwa a in wi ke orekma in sulkakin peng mwo lun Togusrai, efu ku kom patla in oru sulela lom in eis baptais?—Mattu 28:19, 20.
15, 16. (a) Kain in nunak tia mwo fuka kutongye kutu met fwusr in eis baptais lalos? (b) Fuka mwulela a baptais el ku in sang me karungin yok nu sin met fwusr?
15 Ya sie sripe paenang kom alolo in eis akwuk yok sripe inge meyen kom sangeng in eis me kai upa ku me nununku nu sum kom fwin oru ma koluk? Fwin oinge, srike nunku ke me pupulyuk inge: Ya kom srunga in eis driver’s license ke sripen kom sangeng mu oasr pal saap kom e fwa sun accident? Aok paye la kom tia! Ku kom enenu in alolo in eis baptais kom fwin fwal tari ka. Paye la, kom fwa akkeyeyuk in oru ke ku lom kemwa in lain orekma koluk kom fwin mwulela tari moul lom nu sin Jeova a kom insese in oru ma lungse lal. (Filippai 4:13) Met fwusr, lela komwos in tia nunku mu fwin komwos patla in oru sulela lomwos in eis baptais, komwos ku in kaengla liki nununku. Komwos fwin sun matwe fwal in oru ma kunomwos, Jeova el fwa nununke komwos ke orekma nukemwa lomwos fwinne kom baptais tari ku tia.—Rom 14:11, 12.
16 Met Lo puspus fwin fwalu elos pulakin mu sulela lalos su elos oru ke pal se elos srakna fwusr kasrelos ke inkanek yok. Nunku ke sie me pupulyuk lun sie Met Lo su matwel oasr ke yea 23 in an Western Europe. El esam la orekma lal in eis baptais ke pal se el yea 13 matwe akkeyel in karunganul sifwana in tia fuleak a oru “lung koluk lun met fwusr.” (2 Timote 2:22) Ke pal se el fwusr, el orala sulela lal in oru orekma in kulansap oana sie met luti pal nukemwa. Ke pal inge, el insemwomwo in oru orekma in kulansap lal ke sie branch ofus lun Met Lo lun Jeova. Me insemwomwo yok oasr yurin met fwusr nukemwa, oana kom sifwana, su oru sulela in kulansupu Jeova.
17. Ke kain in oiya puspus fuka eneneyuk in kalem a akilen ka la mea “ma lungse lun Jeova”?
17 Mwulela a baptais pa mutamweyen sie moul su mwo kut in nunku ka a in orekma fwal nu ke ma lungse lun Jeova ke orekma lasr nukemwa. Kut enenu in ‘molela pal’ in akpayeye mwulela lasr. Kut ku in oru fuka ma inge? Kut ku in molela pal kut fwin tia orekmakin pal nu ke ma lusrongten a kut orekmakin pal in oru lutlut lasr ke Baibel, in wi meeting pal nukemwa, a in wi pal nukemwa ke orekma in luti “peng mwo lun togusrai.” (Efesus 5:15, 16; Mattu 24:14) Mwulela lasr nu sin Jeova a kena lasr in oru ma lungse lal fwa use ma lane yok nu ke oiya nukemwa lun moul lasr, wekunang inkanek su kut orekmakin pal nukemwa lasr nu ke me akengan, ke oiya lasr nu ke me mongo a me nim, a ke kain in on su kut long. Efu ku kom tia sulela kain in me akengan su kom ku in insemwomwokin ma patpat? Tausen puspus sin met fwusr oana Met Lo elos ku in srumon nu sum ke oiyen inkanek yok sripe puspus su elos oru in insemwomwokin me akengan lalos a tia kunausla “ma lungse lun Jeova.”—Efesus 5:17-19.
“Kut Fwa Wi Kom Som”
18. Kusensiyuk puspus fuka met fwusr elos enenu in siyuk selos sifwana?
18 Mutamwauk ke yea 1513 B.C.E. nu ke len in Pentecost 33 C.E., oasr u lun met kulansap lun God fwin fwalu su el sulela in alu nu sel a orekma oana met lo lal. (Isaia 43:12) Oasr met Israel fwusr puspus su isusla nu ke mutanfwal inge. Mutamwauk in len in Pentecost, oasr sie “mutamfwal” sasu lun Jeova fwin fwalu, Israel in ngun, “sie mutanfwal ke el sifwana.” (1 Piter 2:9, 10; Orekma 15:14; Galetia 6:16) Met sap Poul el fwak la Kraist el aknasnasye nu sel sifwana “sie un met tu elos ma lal, moniyuk nu ke orekma mwo.” (Taitus 2:14) Met fwusr komwos sukosok in eis eteak nu sumwos sifwana la piye met puspus inge a elos ku in koneyukyak oya. Su “mutanfwal sumwoswos su sruokye lulalfongi [oiyen oaru, NW],” in moulkin moul fwal nu ke akwuk mwomwo lun Baibel, orekma oana Met Lo oaru nu sin Jeova, a sulkakin Togusrai lal oana fwinsrak sefwanna nu sin met nukemwa? (Isaia 26:2-4) Tuni orekma lun alu puspus lun Christendom a lun kutupa alu, a srike liye oiya lalos nu ke ma Baibel el sapkin nu sin met kulansap paye lun God.
19. Million puspus sin met fwin fwalu nu fon elos arulanu lulalfongi ke mea?
19 Million puspus sin met fwin fwalu nu fon, wekunang met fwusr puspus, elos lulalfongi la met lula sin met akmusrala lun Met Lo lun Jeova pa met su wi ke “mutanfwal su sumwosmwos.” Elos fwak nu sin Israel in ngun inge: “Kut fwa wi kom som, tu kut long tu God El oasr yurumwos.” (Zekaraia 8:23) Kut fwinsrak a pre ka la komwos met fwusr fwa oru sulela lomwos in wi ke u lun met kulansap lun God a “sulela moul”—moul ma patpat ke fwal sasu lun Jeova.—Duteronomi 30:15-20; 2 Piter 3:11-13.
Ke Inkanek lun Kalweni
• Mea eneneyuk nu ke orekma in sang kasru nu ke nunak lun tulik?
• Kain in orekma in kulansap fuka me akinsemwomwoye Jeova?
• Sulela fuka oasr ye mutun met fwusr nukemwa su karunginyuk sin papa a nine su orala mwulela lalos nu sin God?
• Efu ku sie met el tia enenu in patla in oru sulela lal in eis baptais?
[Petsa ke sra 12]
Nu sin su kom fwa long ku porongo?
[Petsa ke sra 14]
Fuka mwulela a baptais el ku in oru me karungin nu sum?
[Petsa ke sra 15]
Mea ikolkomi in eis baptais?