“Nga Wi Komwos”

“Met roso lun Jeova el fwak: . . . ‘“Nga wi komwos,” Jeova El fwak.’”​—HAGGEAI 1:13.

1. Kas in palu fuka sikyuk ke len lasr fwal nu ke ma Jisus el sramsramkin?

KUT moul ke sie pal su arulanu yok sripe a oasr insemwomwo ke me sramsram lun metu. Oana me akpayeye ke kas palu lun Baibel, mutamwauk ke yea 1914 kut oasr ke “len lun Leum.” (Fwakyuk 1:10) Saap oasr etu lom ke kas palu ke len lun Leum, a kom etu pa la Jisus el akkalemye ke “len lun Mwen nutin met” el fwin eis ku lun Togusrai fwa lumeyuk oana ke “len lal Noa” a “len lal Lot.” (Luk 17:26, 28) Baibel el akkalemye ke ma sikyuk in len lal Noa a ke len lal Lot la sikyak oana sie ke kas palu a ma inge nukemwa sikyak pa ke pal lasr. Tusruktu, oasr siepa ma sikyuk su oapana ma sikyuk inge su fwal kut in loang yok nu ka.

2. Kain in kunokon fuka Jeova el sang nu sel Haggeai a Zekaraia?

² Lela kut in loang akmwoye nu ke sie ma su sikyuk in pal meeta ke len lun met palu Hibru luo su pangpang Haggeai a Zekaraia. Peng fuka met palu luo inge elos akkalemye nu ke ma su eneneyuk nu sin met kulansap lun Jeova ke pal lasr? Haggeai a Zekaraia elos ‘met roso lun Jeova’ nu sin met Ju tokin met Ju elos foloko liki kapur lalos fwin an Babulon. Elos sapkinyuk in akkalemye nu sin met Israel ke me kasru lun God in sifwilpa sang musai tempel. (Haggeai 1:13; Zekaraia 4:8, 9) Fwinne buk su Haggeai a Zekaraia elos simusla futoto, buk luo inge koanon “Baibel nukemwa [su] etuku ke ngun lun God a oasr sripe in luti, in kai, in aksumwosye, a in aketeye ma sumwosmwos nu sin met.”​—2 Timote 3:16.

Kut Enenu in Loang Akmwoye nu ke Kas Palu lal Haggeai a Zekaraia

3, 4. Efu kut enenu in insemwomwo a nunku yok ke kas palu lal Haggeai a Zekaraia?

³ Paye, peng lal Haggeai a Zekaraia arulana yok sripe nu sin met Ju ke len lalos, a kas palu puspus lalos akpayeyuk ke len lalos. Tusruktu, kut ku in etu fuka la buk luo inge yok sripe nu sesr ke pal inge? Kut ku in koneak me top nu ka in Hibru 12:26-29. Ke fus inge met sap Poul el orekmakin ma simusla in Haggeai 2:6, su sramsramkin ke orekma lun God in “mokle kosrao a fwalu.” Orekma inge “fwa lungasla tron lun togusrai a fwa kunausla ku lun togusrai lun mutanfwalu.”​—Haggeai 2:22.

⁴ Tokin el orekmakin ma simusla in Haggeai, Poul el akkalemye la mea e fwa sikyak nu ke “togusrai lun mutanfwalu” a el sramsramkin ke sie Togusrai su tia ku in mokleyukla su met Kristian akmusrala elos fwa eis. (Hibru 12:28) Kom ku in kalem ke kas lal Poul la kas palu nukemwa lal Haggeai a Zekaraia soenna akpayeyuk in pal se buk lun Hibru simusyukla in century se meet C.E. Srakna oasr met lula sin met Kristian akmusrala fwin fwalu ke pal inge, su fwa welul Jisus in usrui Togusrai lun Messaia. Ke ma inge, oasr sripe yok ke kas palu lal Haggeai a Zekaraia nu sesr ke pal inge.

5, 6. Oasr oiya puspus fuka sikyak in pal lal Haggeai a Zekaraia paenang elos oru orekma lun met palu?

⁵ Buk lal Ezra el sang me aketeye nu ke ma puspus su sikyak meet liki Haggeai a Zekaraia elos palye ke kas palu nukemwa lalos. Tokin met Ju elos folokla liki sruo lalos in an Babulon in yea 537 B.C.E., Governor Zerubbabel a Met tol Fulat Josua (ku Jesua) elos liaung orekma in musai foundeson lun temple sasu in yea 536 B.C.E. (Ezra 3:8-13; 5:1) Fwinne orekma in musai foundeson lun temple el orelos in pulakin insemwomwo yok, tusruktu tia pat met Ju elos akkalemye sangeng. Ezra 4:4 el akkalemye la met lokwalok, lun “metu in fwal sa, elos akmunasye poun met Juda, a akongoiyelos in musai.” Met lokwalok nukemwa inge, yokna met Samaria, elos kaskas kikiap lain met Ju. Met lokwalok elos oru togusra lun an Persia in lulalfongi ke kas kikiap lalos a orala masap in sang tulokinye orekma in musa temple lalos.​—Ezra 4:10-21.

⁶ Insemwomwo yok lalos su elos akkalemyeyuk ke mutamweyen musaiyuk temple munasla. Met Ju puspus elos loang yok nu ke me akinsemwomwoyelos sifwana. Tusruktu, in yea 520 B.C.E., yea 16 tokin foundeson lun temple musala, Jeova el sapkin Haggeai a Zekaraia in akkeye met Ju in tafwela orekma lalos in musai temple. (Haggeai 1:1; Zekaraia 1:1) Ke sripen elos akkeyeyuk sin met tutafpo lun God a ke me akpayeye kalem la oasr me kasru lun Jeova nu selos, paenang Met Ju elos tafwela orekma lalos in musai temple a aksafyela orekma in musa temple lalos in yea 515 B.C.E.​—Ezra 6:14, 15.

7. Ma sikyak in len lun met palu Haggeai a Zekaraia el oapana ke len lasr ke oiya fuka?

⁷ Ya kom etu ke yok sripaiyen ma inge nukemwa nu sesr? Oasr orekma su kut enenu in oru a orekma inge pa in sulkakin “peng mwo lun togusrai.” (Mattu 24:14) Enenu in oasr kaifweang yok orek nu ke sulkakinyen peng mwo tokin Meun Lulap I. In oana ke ma sikyak nu sin met Ju su aksukosokyeyukla liki sruo lalos in an Babulon, met kulansap lun Jeova in pal inge elos aksukosokyeyukla liki Babulon Lulap, ku u lun alu kikiap nukemwa. Met kulansap akmusrala nukemwa lun Jeova elos moniyuk in oru orekma in sulkakin, a in luti peng mwo, a in kasru met puspus in wi ke alu paye. Orekma se inge srakna orek ne misenge ke inkanek yok, a saap kom sie sin met su wi oru orekma inge. Pa inge pal su orekma in luti enenu in orek, meyen saflaiyen akwuk koluk inge arulanu apkurun! Orekma se inge su God el sapkin kut in oru enenu in orek ne ke na pal se su Jeova el sap in tui a el ekulla akwuk lun metu ke len in “ongoiye lulap.” (Mattu 24:21) Orekma lun Jeova inge fwa akwanginyela ma koluk a el fwa oru ma mwomwo in oasr yen nukemwa fwin fwalu.

8. Efu ku kut enenu in lulalfongi ke kasru lun God ke orekma lasr?

⁸ In oana ke ma akkalemyeyuk ke kas palu lal Haggeai a Zekaraia, kut ku in lulalfongi ke me kasru a me insemwomwo lun Jeova kut fwin wi ke orekma inge ke insiesr kemwa. Fwinne kutu met elos srike in tulokinye orekma lun met kulansap lun Jeova inge, wangin kutena gufernment ku in kutangla ku kutongya kapkapek lun orekma in luti peng mwo inge. Nunku ke orekma lun Jeova la fuka el akinsemwomwoye orekma lun Togusrai paenang oasr kapkapek yok ka su pulakinyuk ke yea puspus tokin Meun Lulap I nu ke pal lasr inge. Ne oinge, srakna oasr orekma yok su enenu in orek.

9. Nu ke kain in ma sikyak fuka in pal meeta kut enenu in loang nu ka, a efu?

⁹ Fuka me lutlut su kut lotela ke kas lal Haggeai a Zekaraia ku in kasre kut in akos masap lun God in sulkakin a in luti peng mwo? Ke ma inge, lela kut in loang akmwoye nu ke me lutlut su kut ku in lotela ke buk luo lun Baibel inge. Nu ke sie me pupulyuk, fwin nunkeyuk nu ke ma puspus su sikyak wekunang nu ke orekma in musai temple su met Ju su folokla liki sruo lalos elos enenu in oru. In oana ke ma akkalemyeyuk tari, Met Ju su folokla nu in an Jerusalem liki an Babulon elos tia mongfusesr nu ke orekma lalos in musai temple. Tokin elos musaela foundeson, elos tila moniyuk nu ke orekma in musai temple a elos tui. Kain in nunak tia sumwos fuka sikyak inmasrlolos? A mea kut ku in lotela ka?

Kut Enenu in Eis Nunak Sumwos nu ke Ma Puspus lun Fwalu

10. Met Ju elos akkeye nunak tia sumwos fuka, a mea fwokin ma inge?

¹⁰ Met Ju su folokla nu in an Jerusalem elos fwak: “Pal fwal sumwena tuku.” (Haggeai 1:2) Ke pal se elos mutamwauk in musaela temple, in sang foundeson nu ka in yea 536 B.C.E., elos tia fwak mu “pal fwal sumwena tuku.” Tusruktu, tia pat elos lela orekma in lain lun met tulan lalos a lun gufernment in akmunasyelosla. Met Ju elos mutamwauk in nunku yok ke loom selos sifwana a ke me akinsemwomwoyelos sifwana. Ke God el liye ke ma su tia oana sie inmasrlon loom selos sifwana su oasr sinke ka orekla ke ipen sak su arulana mwo a ke temple su tia aksafyeyukla, Jeova el siyuk: “Ya sie pal fwal nu sumwos sifwana in muta in loom sumwos su afwinyuki lu ke saku, ke loom se inge on mesis?”​—Haggeai 1:4.

11. Efu ku Jeova el enenu in sang kas in kai nu sin met Ju in pal lal Haggeai?

¹¹ Met Ju elos ekulla nunak lalos nu ke ma yok sripe emeet. Elos tila oru meet akwuk lun Jeova in sifwilpa musaela temple, paenang met kulansap lun God elos nunkula yok kelos sifwana a ke loom selos sifwana. Elos mulkunla tari in oru orekma nu ke loom sin God. Kas lun Jeova su simusyukla in Haggeai 1:5 el akkeye met Ju in ‘nunku ke inkanek lalos.’ Jeova el akkalemye nu selos in tui a in sifwilpa nunku yok ke ma elos oru a in nunku ke oiya fuka elos akkolukyeyukla ka paenang elos tia sifwil oru orekma in musai temple oana ma yok sripe se meet ke moul lalos.

12, 13. Fuka Haggeai 1:6 el akkalemye ma sikyak nu sin met Ju, a mea kalmen fus se inge?

¹² In oana ke ma kom nunku ka, met Ju su nunku ke ma koluk puspus oana ma yok sripe nu ke moul paenang ma inge akkolukyelos. Loang akmwoye nu ke nunak lun God su akkalemyeyuk in Haggeai 1:6: “Komwos taknelik pus, a esani pu. Komwos mongo, a komwos tia kup. Komwos nim, a komwos tia muti ke nim. Komwos sifwana nukomang, a wangin sie fwosfwos ka; a el su eis mol ke orekma lal eis mol in filiye in sie bag su oasr ol ka.”

¹³ Met Ju elos muta ke an su God el sang nu selos, ne oinge fwal se inge tia isus fwako fwal nu ke ma elos lungse. Jeova el tia akinsemwomwoyelos, oana ke ma el akkalemye tari. (Duteronomi 28:38-48) Ke sripen wangin me kasru lal, met Ju elos taknelik fute tusruktu elos kosrani ma srisrik, tia fwal nu ke me mongo nelos su ku in akkupyelos. Meyen wangin me insemwomwo lal, elos tia ku in nukomelosyang sifwana ke nuknuk fwosfwos. Ke kas in pupulyuk, mani su elos eis ke orekma lalos lumeyuk oana elos filiyuki ke bag su oasr ol pukanten ka, paenang wangin me insemwomwo elos eis ke me mol lalos. Mea kalmen kas inge: “Komwos nim, a komwos tia muti ke nim”? Kas inge el tia akkalemye mu fwin elos srui oasr me insemwomwo lun God nu selos, mo tia oinge, meyen God el srunga. (1 Samuel 25:36; Soakas 23:29-35) A, kas inge el sie pa me akpayeye nu ke wanginla lun me insemwomwo lun God nu sin met Ju. Kutena wain su elos ku in orala arulanu srikla, tia fwal in oru sie met in srui. Leng lun Baibel ke kas Kosrae el lungasla Haggeai 1:6 ke kas inge: “Komwos nim, a komwos tia muti ke nim.”

14, 15. Me lutlut fuka kut ku in lotela ke Haggeai 1:6?

¹⁴ Me lutlut su kut ku in lotela ke loom sin met Ju tia ke katoiyen aten loomu ku fuka in nawela loom sesr. Meet liki sruo lalos nu Babulon, met palu Emos el sang kas in aksumwos nu sin met kasrup nukemwa in an Israel ke “loom orek ke aifori” a ke orekma lalos in “onnu fwin me on aifori.” (Emos 3:15; 6:4) Loom nukemwa su oasr me nawela ku me akkato pukanten a furniture kato tia on pat. Ma nukemwa ingo utukla sin met lokwalok lalos su orek wap ke an selos. Ne oinge, tokin sruo ke lusen yea 70 in an Babulon, pus sin met kulansap lun God elos tia lotela ke ma sikyak inge. Ya oasr ma kut ku in lotela ke ma sikyak inge? Arulanu fwal nu sin kais sie sesr in siyuk kusensiyuk inge: ‘Paye, fuka lupan kaifweang Nga orekmakin in akkatoye a nawela loom sik? Fuka ke kutupa me lutlut, su ku in eisla pal saap ke lusen yea puspus, paenang wanginla pal in oru orekma yok sripe nukemwa in kulansap nu sin God?’​—Luk 12:20, 21; 1 Timote 6:17-19.

¹⁵ Ma kut rid tari in Haggeai 1:6 oru kut in nunku yok la kut enenu me insemwomwo lun God ke moul lasr. Me insemwomwo lun God el wangin yurin met Ju in pal meeta, a ke sripe se inge elos sun ma upa puspus. Kut fwin met kasrup ku tia, fwin kut tia eis me insemwomwo lun Jeova, ma inge fwa akkolukye futoto lasr nu sin Jeova. (Mattu 25:34-40; 2 Korint 9:8-12) Tusruktu, fuka kut ku in eis me insemwomwo inge?

Jeova el Sang Kasru ke Inkanek lun Ngun Mutal Lal

16-18. Ke ma sikyak in pal meeta, mea kalmen Zekaraia 4:6?

¹⁶ Zekaraia, el sie pa met palu su welul Haggeai, el akkeyeyuk in akkalemye yok ke inkanek mwo su orekmakinyuk sin Jeova in akkeye a akinsemwomwoye met kulansap oaru a paye in pal ingo. A ma inge akkalemye la fuka el fwa akinsemwomwoye kom pa. Kut rid: “‘Tia ke peng, ku ke ku, a ke Ngunik,’ Jeova lun un met meun El fwak.” (Zekaraia 4:6) Saap kom long ke pal puspus fus inge orekmakinyuk, tusruktu mea kalmen fus inge nu sin met Ju nukemwa in len lal Haggeai a Zekaraia, a mea kalmen fus inge nu sum?

¹⁷ Esam la oasr fwako mwomwo ke kas lal Haggeai a Zekaraia in pal sa. Kas lun met palu luo inge akkalemyeyuk nu sin met Ju oaru a paye nukemwa. Haggeai el mutamwauk in palye ke malem akonkosr ke yea 520 B.C.E. Zekaraia el mutamwauk in palye ke malem akoalkosr in yea sepana inge. (Zekaraia 1:1) In oana ke ma kom liye ke Haggeai 2:18, orekma in musa foundeson lun temple el sifwilpa orek ke insese lalos kemwa in malem akyu. Ke ma inge met Ju elos akkeyeyuk in orekma, a elos akos Jeova a akkalemye a lulalfomgi nu ke kasru lal. Kas mwomwo in Zekaraia 4:6 el kupasr nu ke me kasru lun God.

¹⁸ Ke pal se met Ju elos folokla nu ke mutanfwal selos sifwana in yea 537 B.C.E., wanginla na paye met meun welulos. Ne oinge, Jeova el karunginelos a kololos ke fwufwasryesr lalos liki an Babulon. In wekunang nu ke ma inge ngunin Jeova kolulos ke elos mutamwauk in oru orekma ke temple tia pat tokin elos folokla nu in an selos. Ke pal se elos sifwilpa mutamwauk in oru orekma lalos ke insielos kemwa, Jeova el kasrelos ke inkanek lun ngun mutal lal.

19. Ngun lun God el kutangla kain in me akkoluk upa fuka?

¹⁹ Ke inkanek lun aruruma oalkosr, Zekaraia el etu a akkeyeyuk la Jeova el fwa wi met kulansap nukemwa lal, a ke ma inge met kulansap lal elos paye a oaru in akpayeye orekma ke temple nu ke elos aksafyela ma inge. Aruruma akakosr, su simusyukla in sapta 3, el akkalemye la Setan el lain kaifweang lun met Ju in aksafyela orekma in musai temple. (Zekaraia 3:1) Setan el srunga na paye in liye Met Tol Fulat Josua in oru orekma nukemwa in temple in sang kasru nu sin metu ke sie temple sasu. Fwinne Devil el kafweang in tulokinye met Ju in musai temple, ngunin Jeova el kasrelos na paye in kosrala me kutong nukemwa a akkeye met Ju nukemwa in tafwela orekma nu ke temple el aksafyeyukla.

20. Fuka ngun lun God el kasru met Ju in akpayeye masap lun God in aksafyela orekma in oru temple?

²⁰ Ke kas in pupulyuk oasr me kutong yok ku me lain upa oana soko eol lulap, su tuku sin met kol puspus lun guferment in orekmakin masap su tuku sin togusra in sang tulokinye orekma. Ne oinge, Jeova el mwolela ka la fwinne oasr ma upa oana “eol” e fwa akwanginyeyukla a eol inge fwa ekla “an tupasrpasr.” (Zekaraia 4:7) A Jeova el akpayeye mwolela lal! Togusra Daraius 1 el orala sie inkanek in orek lolngok a el koneak masap lal Sairus su lela met Ju in sifwilpa musaela temple. Ke sripe se inge Daraius el kunausla masap su orekla in sang tulokinye met Ju ke orekma in musa lalos a el lela mani su tuku ke me kasrup lun togusra in fwa itukyang nu sin met Ju in kasrelos in moli ma enenu nu ke orekma lalos. Sie me lut lulap pa inge! Ya ngun lun God el sang kasru nu ke me lut lulap inge? Ngun lun God el sang kasru yok nu ke ma sikyak inge. Temple el aksafyeyukla in yea 515 B.C.E., yea akonkosr ke kolyuk lal Daraius I.​—Ezra 6:1, 15.

21. (a) In pal meeta, ke inkanek fuka God el “mokle mutanfwal puspus” paenang oasr “ma saok puspus” su tuku ka? (b) Fuka ma inge akpayeyuk ke pal lasr inge?

²¹ In Haggeai 2:5, met palu inge el akesmakinye met Ju nukemwa ke mwuleang su God el orala nu selos in Eol Sainai ke pal se “eol sokoa nufon arulanu kusrusrus.” (Exodus 19:18) In len lal Haggeai a Zekaraia, Jeova el orala siepa kusrusr ku me lut lulap, oana ma akkalemyeyuk ke kas in me pupulyuk ke fus 6 a 7. Ma sikyak ke Togusrai lun met Persia el tia mwo a munas, tusruktu orekma ke temple el tafweyukla nu ke orekma nukemwa aksafyeyukla. Met puspus su tia met Ju, su lumeyuk nu ke “ma saok lun mutanfwal nu kemwa,” ke saflaiye elos kaksakin God wi met Ju puspus in an in alu se inge. Ke inkanek yok ke pal lasr inge, God el ‘mokle mutanfwal nu kemwa’ ke inkanek lun orekma lasr oana met Kristian in sulkakin peng mwo, a oasr “ma saok lun mutanfwal nu kemwa” su tuku in alu nu sin God wi met lula nukemwa sin met Kristian akmusrala. Paye la, met akmusrala a sip ngie elos nekla loom sin Jeova ke mwolena nukemwa. Met nukemwa su alu nu sin God paye elos sano wikin lulalfongi ke pal se Jeova el fwa ‘mokle kosrao a fwalu’ ke siepa inkanek. Orekma inge fwa orek in eisla a kunausla ku lun togusrai lun mutanfwal nukemwa.​—Haggeai 2:22.

22. Fuka mutanfwal nukemwa ‘mokleyuk,’ a mea fwokin ma inge, a mea e fwa sikyak ke pal na futoto fwasru?

²² Kut akesmakinyeyuk ke ma usrnguk lulap su fwa sikyak nu ke ma puspus su petsaiyukla ke “kosrao a fwalu a mwea a fwal pao.” Sie sin ma ekla lulap inge pa, ke Setan su Devil a dimon puspus lal sisila nu fwalu. (Fwakyuk 12:7-12) In wekunang, orekma in sulkakin peng mwo su met kulansap akmusrala nukemwa lun God elos oru me kolyuk in oru orekma in mokle akwuk nukemwa lun metu. (Fwakyuk 11:18) Ke ma inge, oasr “sie u lulap” lun ma saok puspus lun mutanfwal nukemwa elos wi Israel in ngun in kulansapu Jeova. (Fwakyuk 7:9, 10) U lulap inge elos wi met Kristian akmusrala ke orekma in sulkakin peng mwo a tia pat God el fwa mokle a nununku mutanfwal nukemwa ke len in Armageddon. Ma sikyak inge fwa sang kasru in oru alu paye in yokelik ke inkanek nukemwa fwin fwalu nafon.

Ya Kom Esam?

• Nge a ke ma sikyak puspus fuka Haggeai a Zekaraia elos oru orekma in kulansap lalos?

• Fuka kom ku in orekmakin kas in kai su Haggeai a Zekaraia akkalemye?

• Efu ku kom nunku mu Zekaraia 4:6 el sie me akkeye?

[Petsa ke sra 22]

Ma simusla nukemwa lal Haggeai and Zekaraia akkeye kut ke me kasru lun God

[Petsa ke sra 25]

“Ya sie pal fwal nu sumwos sifwana in muta in loom sumwos su afwinyuki lu ke saku, ke loom se inge on mesis?”

[Petsa ke sra 26]

Met kulansap nukemwa lun Jeova elos wi ke orekma in suk ‘ma saok nukemwa lun mutanfwalu’