Ya Kom Fwa Fwasr Wi God?

“Fwasr wi inse fwokpap yurin God lom.”​—MAIKA 6:8.

1, 2. Fuka pulakin lun Jeova nu sesr ku in pupulyukkinyuk nu ke pulakin lun sie papa su luti sie tulik in fwasr?

SIE tulik srisrik su srakna awowo, el tu ke niel ke el srakna munas, el sruokye paun nine ku papa tumal a el srike in oru step se meet lal in fwasr. Ke kaifweang lun awowo se inge el tia koneak ma yok sripe ke kaifweang lal, tusruktu nu sin papa a nine kiyen tulik srisrik se inge, ma inge arlana yok sripe, meyen oasr fwinsrak mwomwo lalos nu ke pal fwasru. Papa a nine inge elos ngetla nu ke pal se ma tulik natulos el mutamwauk in fwasr, asruk poi sie sin sie, ke malem puspus a yea puspus in pal fwasru. Ke inkanek puspus, elos fwinsrak tu elos fwa ku in sang me kolyuk a me kasru ke ma enenu lal ke me mongo, nuknuk a ke pulakin lal ke pal inge ne ke pal fwasru.

² Oasr pulakin oinge yurin Jeova God nu sin tulik natul nukemwa fwin fwalu. Oasr pal el fwak ma inge nu sin met Israel ku Ifreim, met kulansap lal: “Nga lotel Ifreim in fwasr; Nga esalos in pouk . . . Nga amakunulos ke fwu lun metu, ke me kapur lun lungse.” (Hosia 11:3, 4) Ke fus inge Jeova el akkalemyel sifwana oana sie papa kulang su mongfusesr in luti tulik natul in fwasr, fwin el ikori El fwa sraklulak. Jeova, el Papa se su mwo emeet, el arulanu lungse in luti kut ke oiyen fwasr lasr. El insemwomwo pa in wi kut ke kut tafwela in kapkapek. Oana sifwen me lutlut lasr el akkalemye, kut ku in fwasr wi God! (Maika 6:8) Tusruktu mea kalmen in fwasr wi God? Efu kut enenu in oru ma inge? Fuka ma inge ku in orek? A me insemwomwo puspus fuka tuku ke orekma in fwasr wi God? Lela kut in aketeye kusensiyuk akosr inge ke kais sie pal.

Mea Kalmen in Fwasr Wi God?

3, 4. (a) Kas in pupulyuk inge in fwasr wi God el akkalemye yok kas in aketeye fuka? (b) Mea kalmen in fwasr wi God?

³ Paye la, ke inkanek paye sie met el kofla fwasr wi Jeova, su sie ngun. (Exodus 33:20; Jon 4:24) Ke ma inge ke pal se Baibel el akkalemye ke oiya lun metu ke elos fwasr wi God, el orekmakin oiya se inge ke kas in pupulyuk. El sang me aketeye mwomwo ku kas in pupulyuk mwo, nu ke sie ma su sikyak tia ke sie mutanfwal ku sie oiyen met mukena a ma inge ku in orekmakinyuk ke pal nukemwa. Aok, nu ke an ku pal fuka metu elos fwa tia kalem ke oiyen sie met ke el fwasr wi siepa met? Ya kas in pupulyuk inge tia akkalemye ke oiyen lungse a futoto nu sin sie sin sie? Kain in me pulakin inge el ase kutu etauk nu sesr ke kalmeyen in fwasr wi God. Tusruktu, lela kut in liye me pupulyuk nu ka.

⁴ Esam mokul oaru luo inge Inuk a Noa. Efu ku elos akkalemyeyuk mu elos fwufwasryesr wi God? (Genesis 5:24; 6:9) In Baibel, pal nukemwa kalmeyen kas inge “in fwasr” pa in fwasr tokin inkanek mwo lun moul. Inuk a Noa elos sulela inkanek lun moul su fwal nu ke ma lungse lun Jeova God. Tia oana met puspus su raunelosla, elos ngetak nu sin Jeova ke inkanek in kolyuk lal a in akos masap lal. Elos lulalfongel ke paye. Ya kalmeyen ma inge pa Jeova el oru sulela lalos? Mo. Jeova el sang sukosok nu sin met elos in oru sulela lalos sifwana, a el lungse kut in orekmakin oiyen sukosok inge wekunang in orekmakin “ku lun nunuk lasr sifwana in sang me top.” (Rom 12:1, NW) Tusruktu, ke kut oru sulela, kut enenu in inse pusisel in lela nunak lun Jeova su mwo emeet in kasre kut ke orekmakinyen ku lun nunak lasr in sang me top. (Soakas 3:5, 6; Isaia 55:8, 9) Aok, ke kut fwasr ke inkanek lun moul, kut fwufwasryesr a Jeova el wi kut a el futoto nu sesr.

5. Efu ku Jisus el sramsramkin oiyen toeni sie kubit nu ke lusen sie moul?

⁵ Baibel el pupulyukkin moul nu ke oiya lun fwufwasryesr loeloes ku forfor. Ke kutu oiya, Baibel el orekmakin me pupulyuk inge ke inkanek sumwos ku kalem, tusruktu ke kutu pal, tia oinge. Ke sie me pupulyuk, Jisus el fwak: “A su sumwos fwa ku ke nununkala in akloesye moul lal ke sie kubit?” (Mattu 6:27) Kutu kas inge ku in aklutye kom ku orekom in nunak yok. Efu ku Jisus el sramsramkin oiya nu ke toeni lun “sie kubit,” su orekmakinyuk nu ke sie me srikasrak nu ke lusen an luo, oana “lusen moul” lun sie met, su srikasrak nu ke oiyen pal?a Kalem la Jisus el pupulyukkin moul nu ke orekma in fwufwasryesr. Aok, el luti la in nunkela yok ke me enenu lun moul fwa tia ku in kasre kom in toeni fwinne ke sie fwasr futoto nu ke fwufwasryesr lun moul lom. Ke ma inge, ya kut ku in fwak mu wangin ma kut ku in oru ke lusen pal kut fwasr wi God? Mo tia oinge! Paenang ma inge kol kut nu ke kusensiyuk akluo lasr, La efu kut enenu in fwasr wi God?

Efu Kut Enenu in Fwasr Wi God?

6, 7. Oasr me enenu yok fuka lun met sesumwos, a efu kut enenu in forla nu sin Jeova in akfwalye ma enenu inge?

⁶ Sie sripe la efu kut enenu in fwasr wi Jeova God pa aketeyuki in Jeremaia 10:23: “O Jeova, nga etu tu inkanek lun met tia on in el sifwana; tia ma lun met su fwasr in aksumwosye fwalkel.” Ke ma inge kut metu wangin ku lasr ku sumwos lasr in aksumwosye inkanek in moul lasr sifwana. Kut enenu na paye kolyuk lal. Elos su arulanu lungse in oru ma lungse lalos sifwana, a wangin me kolyuk lun God yurulos, elos ku in tafongla ku in sun me keok a ma koluk su Adam a If elos oru. Siyanyen se meet elos sruokye sumwos lalos in oru sulela nu selos sifwana ke ma mwo a ma koluk. (Genesis 3:1-6) Akwuk lun sumwos in oru ma mwo a ma koluk “tia ma nu sesr.”

⁷ Ya kom tia pulakin me enenu nu ke inkanek in kolyuk nu ke fwufwasryesr lun moul? Len nukemwa, kut enenu in oru sulela srisrik a sulela yok. Kutu sulela inge arulanu upa a ku in akkolukyela ku akmwoyela pal fwasru lasr​—oapana ke pal fwasru lun met puspus su kut lungse. Tusruktu, nunku ka, la sie su matu a lalmetmet liki kut el insemwomwo in ase nu sesr me kolyuk mwo in orala sulela puspus! Sie me asor, met puspus ke pal inge elos lungse in lulalfongi ke sulela lalos sifwana a in kol inkanek lalos sifwana. Elos pilesru ma paye su akkalemyeyuk in Soakas 28:26: “El su lalalfongi insiel sifwana, el sie met lalfon; a el su fwasr wi lalmetmet fwa moliyukla.” Jeova el lungse kut in kaengla liki me keok puspus su tuku ke lulalfongi lun inse kutasrik lun met. (Jeremaia 17:9) El lungse kut in fwasr ke lalmetmet, in lulalfongel oana sie met Kol a met Luti lalmetmet. Kut fwin oru ma inge, e fwa oasr misla, insemwomwo, a oiyen engan nu ke akwuk lun fwufwasryesr lasr nu ke moul.

8. Ma koluk a oiya sesumwos kol metu nu ke safla fuka, ne oinge mea Jeova el lungse sesr?

⁸ Sie pa sripe la efu kut enenu in fwasr wi God pa ke lusen fwufwasryesr lasr su kut enenu in oru. Baibel el akkalemye ma paye ke sie oiya upa. Ke sie oiya, met sesumwos nu kemwa elos fwufwasryesr in sun an sefwanna. In akkalemye ma upa puspus su tuku ke oiyen matou, Ekklisiastis 12:5 el akkalemye: “Tu metu som nu yen sel ma patpat, a met memelil fwasr inkaneku.” Mea kalmen kas inge “yen sel ma patpat”? Pa inkalyuk u, yen se su ma koluk a oiyen sesumwos oru kut in som nu we. (Rom 6:23) Tusruktu, Jeova el lungse kut in engankin sie fwufwasryesr su yok liki sie fwufwasryesr futoto, a oasr ma upa puspus mutamwauk ke pal in isusla lasr nu ke inkalyuk u ku pal in mise. (Job 14:1) Kut fwin fwufwasryesr wi God mukena e fwa oasr pal mwomwo lasr in fwasr ke pal loeloes oana ma el lungse​—aok ma patpat. Ya tia pa inge ma kom lungse? Ke ma inge, kalem la, kom enenu in fwufwasryesr wi Papa tumom.

Fuka Kut Ku In Fwasr Wi God?

9. Efu ku Jeova el mwukla kutu pal liki met kulansap lal, tusruktu fwal nu ke Isaia 30:20 mwolela fuka el akkalemye?

⁹ Kusensiyuk aktolu ke me lutlut inge arulanu fwal kut in loang akmwoye nu ka. Ma inge pa, Fuka kut ku in fwasr wi God? Kut ku in koneak me top ka in Isaia 30:20, 21: “Met Luti lom fwa tia sifwil mwukla, a mutom fwa liye Met Luti lom. A srem fwa long sie kas tukum, fwakang: ‘Pa inge inkaneku, komwos fwasr we,’ ke komwos forla nu ke lepo leyut, a ke komwos forla nu ke lepo lese.” Ke fus inge, kas lun Jeova su simusyukla in fus 20 ku in akesmakinye met kulansap lal la ke elos lain masap lal, el mwukunla mutal lukelos in oana kas in pupulyuk. (Isaia 1:15; 59:2) Tusruktu ke fus inge, Jeova el akkalemyeyuk, oana sie met luti su tia mwukmwuk, a el tu ye mutun met kulansap oaru nukemwa lal. Kut ku in nunku ke sie met luti el tu ye mutun tulik lutlut nukemwa lal, el akkalemye ma el lungselos in etu.

10. Ke oiya fuka kom ku in “long sie kas fwintokum” sin met Luti Lulap lom?

¹⁰ In fus 21, sie kas in pupulyuk akkalemyeyuk. Jeova el akkalemyeyuk oana sie met su fwufwasryesr tokin met kulansap nukemwa lal, su akkalemye kas in kasru nu ke inkanek su fwal in fwasr we. Baibel scholar elos fwak la kas inge ku in fwal nu ke oiya su met seperd el fwasr tokin un sip natul, sang kas in kolyuk nu selos ke pusra lulap, a in karunginelos in tia fwasr nu ke inkanek saye. Fuka kas in pupulyuk inge ku in orekmakinyuk nu sesr? Aok, ke kut forla nu ke Kas lun God in eis me kasru, kut ridi kas lun God su simusyukla ke tausen puspus yea somla. In oana ke kas in pupulyuk, kas in kasru inge tuku fwintokosr, meyen ma inge simusyukla tari in pal meeta. Ne oinge, kas in kolyuk inge srakna yok sripe misenge oana in pal meeta ke ma inge simusyukla. Kas in kai lun Baibel ku in kol kut ke kain in sulela nukemwa lasr len nukemwa, ma inge ku in kasre kut in orala plan ku akwuk mwo ke inkanek lun moul lasr ke yea puspus ke pal fwasru. (Sam 119:105) Ke kut kaifweang in suk kas in kai inge a orekmakin ma inge, kut oru Jeova el an oana met Kol lasr. Kut fwufwasryesr wi God.

11. Fwal nu ke Jeremaia 6:16, Jeova el orekmakin kas in pupulyuk mwo fuka in sang kasru met kulansap nukemwa lal, tusruktu oiya fuka elos akkalemye ka?

¹¹ Ya kut lela Kas lun God in kol kut na paye? Arulanu yok sripe kut in muta nunku kutu pal a tuni kut sifwana? Nunku ke sie fus su ku in kasre kut in oru ma inge: “Oinge Jeova El fwak: ‘Komwos tu inkaneku a liye, a siyuk ke inkanek matu, su inkanek mwo; a fwasr we, a komwos fwa konoiyuk mongla nu ke ngunumwos.’” (Jeremaia 6:16) Kas inge akesmakinye kut ke sie met fwufwasryesr su tui in siyuk a suk me kasru nu ke inkanek mwo in fwasr ka ke sripen inkanek el sengelik. Nu ke oiya lun ngun, met kulansap nukemwa lun Jeova fwin an Israel su seakos elos enenu in oru pa ma inge. Elos enenu in suk inkanek lalos in folok nu ke “inkanek matu.” “Inkanek mwo” inge pa inkanek su papa matu su sumwos a oaru tumalos fwasr ka, inkanek su mutanfwal sa elos tila fwasr ka. Sie me asor, meyen met Israel elos likkeke tia long kas in akesmakin lun Jeova. Fus sepana inge el fwak: “A elos fwak: ‘Kut fwa tia fwasr we.’” Tusruktu, ke pal inge met kulansap lun God elos akkalemye oiya mwo nu ke kas in kai inge su tia oana sie nu ke oiya lun met Israel in pal meeta.

12, 13. (a) Fuka met akmusrala lun Kraist elos orekmakin kas in kai in Jeremaia 6:16? (b) Fuka kut ku in tuni kut sifwana ke inkanek su kut fwasr ka ke pal inge?

¹² Ke saflaiyen century ak19, met kulansap akmusrala lun Kraist elos orekmakin kas in kai in Jeremaia 6:16 nu selos sifwana. Oana sie u, elos kol in suk in furokla insiyelos kemwa nu ke “inkanek matu.” Tia oana sie nu sin Kristendom su tia oru alu paye, elos oaru in fwasr ke “me srikasrak lun kas sumwos” su oakiyuki sin Jisus Kraist a orekmakinyuk sin met kulansap oaru nukemwa lal in century se meet C.E. (2 Timote 1:13) Nu ke pal inge, met akmusrala elos kasru sie sin sie oayepa elos kasru pa “sip ngia” nukemwa su welulos in kaifweang in fwasr ke inkanek mwo su Kristendom elos fwasr liki.​—Jon 10:16.

¹³ In akoela me mongo in ngun ke pal fwal, met kulansap oaru a lalmetmet elos kasru million puspus sin met in suk “inkanek matu” a in fwasr wi God. (Mattu 24:45-47) Ya kom sie sin million puspus inge? Fwin aok, mea kom ku in oru in tia patla, a in tia fwasr ke inkanek lom sifwana? Sie inkanek lalmetmet in tui kitin pal a muta nunku a tuni inkanek in moul su kom fwasr ka. Kom fwin oaru in rid Baibel a me rid puspus su tuku ke Baibel a wi ke meeting a akwuk nukemwa in luti kut su orekla sin met kulansap oaru a lalmetmet ke pal inge, ke ma inge kom eis tari akpa in fwasr wi God. A ke kom orekmakin kas in kai su sapkinyuk nu sum, paye kom fwasr wi God, kom fwasr tokin “inkanek matu.”

Fwufwasryesr ke Oiya “Oana Kut Liyel Su Tia Liyeyuk”

14. Kut fwin lungse na paye Jeova, fuka ma inge fwa akkalemyeyuk ke sulela nukemwa su kut oru?

¹⁴ Kut fwin fwufwasryesr wi Jeova, kut enenu in akkalemye lungse paye lasr nu sel. Esam la, Jeova el mwulela nu sin met kulansap oaru in an Israel in pal meeta la el tia mwukla liki ye mutalos. Ke pal inge, el akkalemye pa kel sifwana nu sin met kulansap nukemwa lal oana Met Luti Lulap. Ya Jeova el paye in kom, in oana el tu ye mutum in luti kom? Pa inge kain in lulalfongi su kut enenu fwin kut fwasr wi God. Oasr kain in lulalfongi inge yurol Moses, “tu el muteng, oana el liye El su tia liyeyuk.” (Hibru 11:27) Kut fwin lungse na paye Jeova, kut fwa nunku ke pulakin lal ke kut oru sulela puspus. Ke sie me pupulyuk, kut fwa tia nunku in wi oru orekma koluk a tokin ma inge kut srike in mwukanla ma koluk lasr nu sin met elder puspus ku met in sou lasr. A, kut kaifweang in fwasr wi God fwinne wangin met ku in liye kut. In oana Togusra Devid in pal meeta, kut oru sulela oana sulela lal inge: “Nga fwa fwafwasryesr in loom sik wi inse sumwosna.”​—Sam 101:2.

15. Fuka orekma lasr in asruoki nu sin met lili wiyesr kasre kut in pulakin la Jeova el arulanu paye nu sesr?

¹⁵ Jeova el etu la kut met sesumwos, ma orekla in ikwe a oasr pal kut ku in pulakin la upa in lulalfongi ke ma su kut tia liye. (Sam 103:14) El oru ma puspus in kasre kut in kutangla me munas lasr nukemwa. Ke sie me pupulyuk, el esani “sie mutanfwal ke El sifwana” liki mutanfwal nukemwa fwin fwalu. (Orekma 15:14) Ke kut inse sefwanna in tukeni oru orekma in kulansap, kut eis ku nu sin sie sin sie. In long la fuka Jeova el kasru sie met lili in kutangla kutu me munas lal ku in aksumwosye inkanek liki sie me srife upa su oru God lasr el an arulanu paye nu sesr.​—1 Piter 5:9.

16. In lotela ma puspus kel Jisus fwa kasre kut fuka in fwufwasryesr wi God?

¹⁶ Yok liki nukemwa, Jeova el ase nu sesr me srikasrak lun Mwen natul. Jisus el fwak: “Nga inkanek, a paye, a moul. Wangin met tuku nu yurin Papa, fwin tia ke Nga.” (Jon 14:6) In lutlutkin inkanek in moul lal Jisus fwin fwalu pa inge sie inkanek mwo emeet in oru kut in lulalfongi Jeova ke inkanek nukemwa. Ma nukemwa su Jisus el oru ku fwak pa inge me srikasrak mwomwo nu ke oiya mwo a inkanek puspus lun Papa tumal in kosrao. (Jon 14:9) Ke kut oru sulela puspus, kut enenu in nunku mwo ke inkanek su Jisus el oru ke ma puspus. Fwin akkalemyeyuk sulela nukemwa lasr nu ke kain in nunak a oiya mwo ke kasru lun pre, ma inge ku in kasre kut in fwasr tokin me srikasrak ku fwalkel Jisus. (1 Piter 2:21) Ke ma inge, kut fwufwasryesr wi God.

Me Insemwomwo Puspus Fuka Fwa Tuku Ka?

17. Kut fwin fwasr ke inkanek lun Jeova, “mongla” fuka kut ku in koneak nu ke ngunasr?

¹⁷ In fwasr wi Jeova God kol nu ke moul su oasr me insemwomwo puspus ka. Esam ma Jeova el mwolela ka nu sin met kulansap nukemwa lal ke orekma in suk “inkanek mwo.” El fwak: “Fwasr we, a komwos fwa konoiyuk mongla nu ke ngunumwos.” (Jeremaia 6:16) Mea kalmen kas se inge “mongla” ku pulakin mwo? Ya kalmeyen ma inge pa kut tupan sie moul fusrasr ku mwo su sesesla ke me akengan puspus a me kasrup puspus? Mo. Jeova el ase ma mwo liki ma inge, sie ma su met kasrup emeet inmasrlon metu suka koneyukyak. In koneak mongla ku in pulakin ma mwo nu ke ngunumwos pa in koneak inse misla, engan, pulakin mwomwo, a insemwomwo in oru orekma in kulansap nu sin God. Kalmen kain in mongla ku pulakin mwo inge pa kom ku in lulalfongi la kom sulela in fwasr ke inkanek mwo emeet ke moul. Kain in inse misla inge suka koneyukyak ke fwal se inge su oasr ma upa puspus!

18. Me insemwomwo fuka Jeova el lungse in usot nu sum, a sulela fuka kom oru?

¹⁸ Aok, moul el sie me insemwomwo yok. Fwinne lusen moul su futoto el mwo liki sie met el fwin tia moul ke kutena pal. Tusruktu, Jeova el tia oakiya nu sum in fwasr ku moul ke lusen kitin pal mutamwauk ke pal in ku lun met fwusr nu ke pal in ma upa lun moul in matou. Mo, Jeova el lungse kom in eis me insemwomwo emeet. El lungse kom in fwasr welul ma patpat! Oiya inge akkalemyeyuk na paye in Maika 4:5: “Tu mutanfwal nu kemwa fwasr, kais sie in en god lal; a kut fwa fwasr in En Jeova God lasr ma patpat a ma patpat.” Ya kom lungse in aksaokye me insemwomwo inge? Ya kom lungse in moulkin ma Jeova el fwak oana “moul paye”? (1 Timote 6:19) Ke ma inge, ke inkanek nukemwa, lela kom in sulela in fwufwasryesr wi Jeova misenge, lutu, a len nukemwa aok nu tok ma patpat!

[Footnote]

Kom E Topuk Fuka?

• Mea kalmen in fwufwasryesr wi God?

• Efu kom nunku ku pulakin mu oasr ma enenu in orek in fwasr wi God?

• Mea fwa kasre kom in fwasr wi God?

• Me insemwomwo puspus fuka ku in eisyuk ku pulakinyuk sin met nukemwa su fwufwasryesr wi God?

[Petsa ke sra 29]

Ke inkanek lun sra nukemwa in Baibel, kut long pusren Jeova fwintokosr fwakang, “Pa inge inkaneku”

[Petsa ke sra 31]

Ke meeting nukemwa, kut eis me mongo in ngun ke pal fwal